အခန်း (၂၄) - ကောင်းကင်ပိတ်ဆို့ခြင်း အတတ်ငါးရပ်
မသိလိုက်မသိဘာသာဖြင့် တစ်နာရီ.. နှစ်နာရီခန့် ကုန်ဆုံးသွားသည်။
လုယွမ်သည် သူ၏လက်ထဲမှ ဆန်းပြားသောပိုးမွှားများ၏ အဆင့်သတ်မှတ်ချက် မှတ်တမ်းစာအုပ်ကို သိုလှောင်လက်စွပ်ထဲသို့ ပြန်ထည့်လိုက်ရင်း အံ့ဩတုန်လှုပ်စွာဖြင့် သက်ပြင်းချလိုက်မိသည်။
"ဒီကမ္ဘာမှာ ဒီလောက်အထိ ထူးဆန်းဆန်းပြားတဲ့ ပိုးကောင်တွေ အများကြီး ရှိနေလိမ့်မယ်လို့ ငါ တကယ်မထင်ထားခဲ့ဘူး"
"ကြည့်ရတာ နောက်ကျရင် ငါ ပိုပြီးတော့ သတိထားရမယ်..ဒီဆန်းပြားတဲ့ ပိုးမွှားတွေထဲက အချို့ကိုဆိုရင် ဝိညာဉ်အသွင်ပြောင်းလဲခြင်းအဆင့် ကျင့်ကြံသူတွေတောင် ကြောက်ကြရတာပဲ"
ဤမှတ်တမ်းစာအုပ်ကြောင့် လုယွမ်သည် အသိပညာဗဟုသုတများစွာ တိုးပွားသွားခဲ့ရသည်။ နောင်တွင် အကယ်၍ ထိုအကောင်များနှင့် ကြုံတွေ့ရပါက ၎င်းတို့ကို ကိုင်တွယ်ဖြေရှင်းရန် နည်းလမ်းကောင်းများကို သူ စဉ်းစားနိုင်မည် ဖြစ်သည်။
လုယွမ်၏ မှတ်ဉာဏ်မှာ အလွန်ပင် ကောင်းမွန်လှသည်။ အခြေခံအားဖြင့် တစ်ကြိမ် ဖတ်ရုံမျှဖြင့် အရာအားလုံးကို သူ မှတ်မိနိုင်သည်။
"အခု ငါ့ရဲ့ ကူးယူခြင်းစွမ်းရည်က အသစ်ပြန်ဖြစ်သွားပြီဆိုတော့.. နောက်ထပ် ဘာကို ကူးယူရမလဲ" လုယွမ်သည် သူ၏ ကိုယ်ရေးကိုယ်တာ အချက်အလက်စာမျက်နှာကို စစ်ဆေးလိုက်ရာ သူသည် နည်းလမ်းများစွာကို ကူးယူထားပြီးသား ဖြစ်နေသည်။
အခု ပြန်စဉ်းစားကြည့်သည့်အခါ ကောင်းကင်မြစ်ဂိုဏ်းထဲတွင် သူ ကူးယူရန် ကျန်ရှိသောအရာ မရှိတော့သလိုပင်။
"ဝိညာဉ်အသွင်ပြောင်းလဲခြင်းအဆင့်က မဟာယန်အင်ပါယာမှာ အမြင့်ဆုံးအဆင့်ပဲ။ ဒီထက်မြင့်တဲ့ ကျင့်ကြံခြင်းအဆင့်ကို ကူးယူချင်ရင်တော့ ငါ မဟာယန်အင်ပါယာကနေ ထွက်ခွာရလိမ့်မယ်"
လုယွမ်က အသာအယာ ခေါင်းညိမ့်လိုက်ရင်း "ဒါပေမဲ့ အခုလောလောဆယ် လောစရာမလိုသေးပါဘူး… နောက်မှ ထွက်သွားလည်း မနှောင်းပါဘူး" ဟု ရေရွတ်သည်။
"ဘာပဲဖြစ်ဖြစ် ဒီမဟာယန်အင်ပါယာထဲမှာတော့ အနည်းဆုံးတော့ ငါ့ရဲ့ အသက်အန္တရာယ်အတွက် စိုးရိမ်စရာ မလိုဘူး"
"ဖန်းလုံလျှို့ဝှက်နယ်မြေနဲ့ ပတ်သက်ရင်တော့ အမြူတေစုစည်းခြင်းအဆင့် ကျင့်ကြံသူတွေနဲ့ အမြူတေဖြစ်ပေါ်ခြင်းအဆင့် ကျင့်ကြံသူတွေပဲ ဝင်လို့ရတာ…ငါက ဝိညာဉ်အသွင်ပြောင်းလဲခြင်းအဆင့် ရောက်နေပြီဆိုတော့ အထဲကို ဝင်လို့ရမှာ မဟုတ်ဘူး"
"ဒါပေမဲ့ တောင်ထိပ်သခင် မု ပြောတာအရဆိုရင် ဖန်းလုံလျှို့ဝှက်နယ်မြေထဲမှာ ကောင်းတဲ့အရာတွေ အများကြီး ရှိနေတာ… ငါ တကယ်ကို လက်လွတ်မခံချင်ဘူး"
"ငါ့ရဲ့ ကျင့်ကြံမှုကို အမြုတေဖြစ်တည်ခြင်းအဆင့်အထိ နှိပ်နှိမ်ပိတ်ဆို့ထားနိုင်တဲ့ လျှို့ဝှက်နည်းလမ်းကို သုံးရင် အထဲကို ဝင်လို့ရမလား မသိဘူး"
လုယွမ်တွင် သူ၏ကျင့်ကြံမှုကို နှိပ်နှိမ်ထားနိုင်သော ထိုကဲ့သို့သော လျှို့ဝှက်နည်းလမ်းမျိုး မရှိသော်လည်း ထိုသို့သော နည်းလမ်းမျိုး သေချာပေါက် ရှိနေမည်ဟု သူ ယုံကြည်သည်။
"ကျမ်းစာဆောင် ကို သွားပြီး အဲ့ဒီလို လျှို့ဝှက်နည်းလမ်းမျိုး ရှိမရှိ ရှာကြည့်ရမယ်" လုယွမ် မတ်တတ်ရပ်လိုက်ပြီး အပြင်သို့ လျင်မြန်စွာ ပျံသန်းထွက်ခွာလာခဲ့သည်။
မကြာမီမှာပင် သူသည် ကျမ်းစာဆောင်သို့ ရောက်ရှိလာခဲ့သည်။
"စီနီယာအစ်ကို့ကို ဂါရဝပြုပါတယ်"
"စီနီယာအစ်ကို့ကို ဂါရဝပြုပါတယ်"
ကျမ်းစာဆောင်ထဲသို့ ဝင်လိုက်သည်နှင့် သူသည် အတွင်းဂိုဏ်းတပည့်များစွာနှင့် ကြုံတွေ့ရသည်။ လုယွမ် ပေါ်လာသည်ကို မြင်လျှင် သူတို့အားလုံးက ရိုသေလေးစားစွာဖြင့် ဦးညွှတ်နှုတ်ဆက်ကြသည်။
"အင်း..." လုယွမ်က အသာအယာ ခေါင်းညိမ့်ပြရင်း လှေကားထစ်များအတိုင်း တက်လာကာ ကျမ်းစာဆောင်၏ အပေါ်ဆုံးထပ်သို့ ရောက်ရှိလာခဲ့သည်။
ဤနေရာတွင် သိမ်းဆည်းထားသော ကျင့်စဉ်များနှင့် လျှို့ဝှက်မှတ်တမ်းများမှာ ကောင်းကင်မြစ်ဂိုဏ်း၏ ထိပ်တန်းဖြစ်တည်မှုများ ဖြစ်ကြသည်။
သို့သော်လည်း ဂိုဏ်း၏ အမွေအနှစ်ကျင့်စဉ်အစစ်အမှန်များနှင့် နတ်ဘုရားစွမ်းရည်များမှာမူ ဤကျမ်းစာဆောင်တွင် ထားရှိမည် မဟုတ်ပေ။
ထို့နောက် လုယွမ်သည် တစ်အုပ်ချင်းစီကို စိတ်ရှည်လက်ရှည်ဖြင့် စတင်ရှာဖွေတော့သည်။ အချိန်များက မသိမသာဖြင့် လျင်မြန်စွာ ကုန်ဆုံးသွားသည်။
ကံကောင်းထောက်မစွာဖြင့် ကြိုးစားမှုက အရာထင်ခဲ့သည်။ လုယွမ်သည် အလွန်ထူးခြားသော ကျင့်စဉ်တစ်ခုကို ရှာဖွေတွေ့ရှိခဲ့သည်။
၎င်းမှာ "ကောင်းကင်ပိတ်ဆို့ခြင်း အတတ်ငါးရပ်" ဖြစ်သည်။
ဤကျင့်စဉ်သည် မိမိ၏ ကျင့်ကြံခြင်းအဆင့်ကို သီးသန့် ပိတ်ဆို့ထားရန် ဖြစ်သည်။ ထို့အပြင် ထိုပိတ်ဆို့ခြင်းကို အချိန်မရွေး.. နေရာမရွေး ပြန်လည်ရုပ်သိမ်းနိုင်သည်။
တစ်နည်းအားဖြင့် ပြောရလျှင် သူ၏ကျင့်ကြံမှုကို ပိတ်ဆို့ထားစဉ်အတွင်း အကယ်၍ အလွန်အစွမ်းထက်သော ရန်သူနှင့် ကြုံတွေ့ရပါက ထိုပိတ်ဆို့ခြင်းကို ချက်ချင်း ဖျက်သိမ်းနိုင်သည်။ ထို့ကြောင့် ကျင့်ကြံမှုကို ပိတ်ဆို့ထားပြီးမှ ပြန်လည်ဖြေဖျောက်ရန် ခက်ခဲမည်ကို စိုးရိမ်စရာ မလိုပေ။
"ဒီကျင့်စဉ်က ငါအလိုရှိနေတဲ့အရာပဲ… ငါ့ရဲ့ ကံတရားက တကယ်ကောင်းလို့ ဒီလောက်အမြန် ရှာတွေ့တာပဲ" လုယွမ်က ပျော်ရွှင်စွာ ရယ်မောလိုက်သည်။
"ဒီကျင့်စဉ်က ဖုန်တွေတက်နေတာကို ကြည့်ရသလောက် လူတွေမကိုင်တာ ကြာလှပြီ… ကျင့်ကြံတဲ့လူလည်း အများကြီး မရှိဘူး ထင်တယ်"
"ကြည့်ရတာ ငါ့ဘာသာငါပဲ ကြိုးစားပြီး ကျင့်ကြံရတော့မယ်…ဘာပဲဖြစ်ဖြစ် ငါ့မှာ တခြားလုပ်စရာ အရေးကြီးတာလည်း မရှိဘူးလေ"
သူသည် ကျမ်းစာဆောင်အတွင်းရှိ သီးသန့်ကျင့်ကြံဆောင်တစ်ခုသို့ ဝင်ရောက်လာခဲ့သည်။
လုယွမ်သည် တင်ပျဉ်ခွေထိုင်လိုက်ပြီး "ကောင်းကင်ပိတ်ဆို့ခြင်း အတတ်ငါးရပ်" ကို ဖွင့်ကာ ကျင့်စဉ်၏ မန္တန်ဂါထာများအတိုင်း တိုက်ရိုက် စတင်ကျင့်ကြံတော့သည်။
ထိုသို့ဖြင့် ရက်အနည်းငယ်မှာ မျက်စိတစ်မှိတ်အတွင်း ကုန်ဆုံးသွားခဲ့သည်။ ယနေ့ မွန်းတည့်ချိန်သို့ ရောက်ရှိမှသာ လုယွမ်သည် သူ၏မျက်လုံးများကို တဖြည်းဖြည်း ဖွင့်လိုက်ပြီး အလွန်ပင် ပျော်ရွှင်သော အပြုံးတစ်ခုကို ပြသလိုက်သည်။ "ငါ့ရဲ့ ပါရမီက တော်တော်လေး မဆိုးဘူးပဲ"
လုယွမ်သည် ကောင်းကင်ပိတ်ဆို့ခြင်း အတတ်ငါးရပ်ကို အောင်မြင်စွာ တတ်မြောက်သွားခဲ့ပြီ ဖြစ်သည်။ သူသည် ၎င်းကို ချက်ချင်း စမ်းသပ်ကြည့်လိုက်သည်။
သူ၏ ကျင့်ကြံခြင်းအဆင့်မှာ ချက်ချင်းပင် အခြေခံတည်ဆောက်ခြင်းအဆင့် အစောပိုင်း ခွန်အားအထိ ပိတ်ဆို့ခြင်း ခံလိုက်ရသည်။
ထို့နောက် နောက်တစ်စက္ကန့်တွင် သူ၏ စိတ်ဆန္ဒအတိုင်းပင် ထိုပိတ်ဆို့ခြင်းမှာ ချက်ချင်း ပျောက်ကွယ်သွားပြီး သူ၏ ကျင့်ကြံခြင်းမှာ ဝိညာဉ်အသွင်ပြောင်းလဲခြင်းအဆင့် အလယ်အလတ် သို့ တိုက်ရိုက် ပြန်လည်ရောက်ရှိသွားသည်။
"မဆိုးဘူး.. မဆိုးဘူး… ဒီကောင်းကင်ပိတ်ဆို့ခြင်း အတတ်ငါးရပ်က တကယ်ကို အသုံးဝင်တာပဲ" လုယွမ်က အလွန်ပင် ကျေနပ်စွာ ခေါင်းညိမ့်လိုက်သည်။ "အခုဆိုရင် ငါ ဖန်းလုံလျှို့ဝှက်နယ်မြေထဲကို အဆင်ပြေပြေ ဝင်နိုင်လောက်ပြီ"
"ဒီဖန်းလုံလျှို့ဝှက်နယ်မြေက တကယ်တော့ ဘယ်လိုမျိုးလဲ မသိဘူး" လုယွမ် အလွန် စပ်စုချင်နေမိသည်။
လျှို့ဝှက်နယ်မြေများကို ယေဘုယျအားဖြင့် အမျိုးအစားနှစ်မျိုး ခွဲခြားထားသည်။ ပထမအမျိုးအစားမှာ လူသားများက ဖန်တီးထားသော လျှို့ဝှက်နယ်မြေ ဖြစ်ပြီး ၎င်းကို တကယ့် ထိပ်တန်းပညာရှင်ကြီးများသာ လုပ်ဆောင်နိုင်သည်။
ဒုတိယအမျိုးအစားမှာမူ ကောင်းကင်နှင့် မြေကြီးက အလိုအလျောက် ဖန်တီးပေးထားသော သဘာဝလျှို့ဝှက်နယ်မြေ ဖြစ်သည်။ သဘာဝလျှို့ဝှက်နယ်မြေများမှာ အဖိုးတန်ဆုံး ဖြစ်တည်မှုများ ဖြစ်ကြသည်။
အများကြီး ဆက်မတွေးတော့ဘဲ လုယွမ်သည် ကျမ်းစာဆောင်အပြင်ဘက်သို့ လျင်မြန်စွာ လျှောက်လှမ်းထွက်ခွာလာခဲ့သည်။
သူ အပြင်သို့ လှမ်းလိုက်သည်နှင့် နေရောင်ခြည်က သူ၏အပေါ်သို့ ဖြာကျလာသည်။ နေရောင်ခြည်ကို မမြင်ရသည်မှာ ကြာပြီဖြစ်သဖြင့် လုယွမ် စိတ်ထဲတွင် အတွေးများစွာ ဖြစ်ပေါ်လာရသည်။
"ကျင့်ကြံနေတာ အချိန်တွေ ကုန်သွားတာတောင် မသိလိုက်ဘူး" လုယွမ် ရယ်မောလိုက်သည်။
ရက်များမှာ တစ်ရက်ပြီးတစ်ရက် ကုန်ဆုံးသွားခဲ့သည်။ ဂိုဏ်းအတွင်းရှိ တပည့်တစ်ယောက်ယောက်က သူတို့၏ကျင့်စဉ်ကို အမြင့်ဆုံးအဆင့် အထိ ကျင့်ကြံတတ်မြောက်သွားကြောင်း လုယွမ် သိရှိရတိုင်း.. သူသည် ထိုတပည့်နှင့် သွားရောက်ထိတွေ့ပြီး အမြင့်ဆုံးအဆင့်သို့ ရောက်နေသော ကျင့်စဉ်ကို တိုက်ရိုက် ကူးယူကာ မိမိကိုယ်ပေါ်သို့ ကူးထည့် လိုက်သည်။
အတိုချုပ်ပြောရလျှင် ထိုကျင့်စဉ်က အစွမ်းထက်သည်ဖြစ်စေ.. မထက်သည်ဖြစ်စေ အမြင့်ဆုံးအဆင့်သို့ ရောက်ရှိနေသရွေ့ လုယွမ်က ကူးယူရန် ဝန်မလေးပေ။
နည်းလမ်းများစွာ ရှိနေခြင်းက အမြဲတမ်း ပိုကောင်းသောကြောင့် ဖြစ်သည်။ ဥပမာအားဖြင့် 'မီးလုံးကျင့်စဉ်' မှာ နိမ့်ကျသော ကျင့်စဉ်တစ်ခု ဖြစ်သော်လည်း အလောင်းများကို ဖျက်ဆီးရန်နှင့် သက်သေများကို ဖျောက်ဖျက်ရန်အတွက် အလွန်ပင် အဆင်ပြေပြီး မြန်ဆန်လှသည်။
သူ၏ ကိုယ်ရေးကိုယ်တာ အချက်အလက်စာမျက်နှာကို ပြန်ဖွင့်ကာ အထဲမှ အကြောင်းအရာများကို ကြည့်ပြီး လုယွမ် အလွန်ပင် ကျေနပ်စွာ ခေါင်းညိမ့်လိုက်သည်။ "မဆိုးဘူး.. မဆိုးဘူး။ အခုဆိုရင် ငါ့ကိုယ်ငါ အရာရာကို လုပ်ဆောင်နိုင်စွမ်းရှိတဲ့သူ လို့ ပြောလို့ရပြီ"
သူသည် အပြင်သို့ ထွက်လာခဲ့ပြီး ဒန်ရှတောင်၏ လမ်းမပေါ်တွင် လမ်းလျှောက်နေခဲ့သည်။ လမ်းတစ်လျှောက် ကြုံတွေ့ရသော တပည့်များအားလုံးက လုယွမ်ကို ရိုသေစွာ ဦးညွှတ်ကြသည်။ ၎င်းက လုယွမ်ကို အလွန်ပင် စိတ်ကြည်နူးစေသည်။
တခြားတပည့်များမှာမူ ကျင့်ကြံခြင်းနှင့် ဆေးဖော်စပ်ခြင်းများအတွက် အသည်းအသန် ကြိုးစားနေကြရသော်လည်း.. လုယွမ်တစ်ယောက်တည်းသာ လောလောဆယ်တွင် အားယားနေပြီး နေ့တိုင်း အပြင်ထွက်ကာ လျှောက်လည်နေသည်။
ဒန်ရှတောင်မှ တပည့်များစွာသည် လုယွမ်ကို နေ့တိုင်းလိုလို မြင်တွေ့နေရသည်။
တပည့်ရင်းတစ်ယောက် ဖြစ်သော လုယွမ်က ဘာကြောင့် သေချာမကျင့်ကြံဘဲ နေ့တိုင်း လျှောက်လည်နေရသနည်းဟု သူတို့ သိချင်နေကြသည်။
သူတို့ အလွန် သိချင်နေကြသော်လည်း လုယွမ်ကို တိုက်ရိုက် သွားရောက်မေးမြန်းရန်မူ မဝံ့ကြပေ။
"မင်းတို့ ကြားပြီးပြီလား ပိသျှံတောင် က စီနီယာအမ ရွယ်ယောင် က 'ကြယ်ကြွေဓားကျင့်စဉ်' ကို အထွတ်အထိပ်အဆင့်အထိ ကျင့်ကြံအောင်မြင်သွားပြီတဲ့။
မနေ့က ပိသျှံတောင်ရဲ့ အတွင်းဂိုဏ်းပြိုင်ပွဲမှာ စီနီယာအမ ရွယ်ယောင်က အဲ့ဒီဓားကျင့်စဉ်ကို ထုတ်သုံးလိုက်တာ ကြယ်တွေ ကြွေကျလာသလိုမျိုးပဲ.. စွမ်းအားက အလွန်ကြီးမားတာ"
"အကယ်၍ သူမရဲ့ ကျင့်ကြံခြင်းအဆင့်က အမြူတေစုစည်းခြင်းအဆင့် အစောပိုင်းမှာပဲ ရှိမနေဘူးဆိုရင်.. ဒီပိသျှံတောင်ရဲ့ အတွင်းဂိုဏ်းပြိုင်ပွဲမှာ ထိပ်ဆုံးသုံးယောက်ထဲ ဝင်ဖို့က ပြဿနာမရှိဘူး"
"ကြယ်ကြွေဓားကျင့်စဉ်က အလွန် နက်နဲတဲ့ ဓားအတတ်တစ်ခုပဲ အဲ့ဒါကို အမြင့်ဆုံးအဆင့်အထိ ကျင့်ကြံနိုင်တယ်ဆိုတာ ကျင့်ကြံသူတစ်ယောက်ကို အဆင့်ကျော်ပြီး တိုက်ခိုက်နိုင်စွမ်း ရှိစေတယ်"
"ဟုတ်တယ်.. နှမြောစရာပဲ… မင်းနဲ့ငါကတော့ ဓားပညာ အတွက် ဒီလောက်အထိ ပါရမီမပါဘူး ငါတို့ အေးအေးဆေးဆေးပဲ ဆေးဖော်စပ်တဲ့အတတ်ကို တိုးတက်အောင် လုပ်တာ ပိုကောင်းပါတယ်..."
မလှမ်းမကမ်းတွင် ဒန်ရှတောင်မှ တပည့်အချို့ ထိုင်ကာ စကားပြောနေကြသည်။ သူတို့ အဝေးတွင် ရှိနေသော်လည်း လုယွမ်သည် သူတို့၏ စကားဝိုင်းကို အလွန်ရှင်းလင်းစွာ ကြားနေရသည်။
"ကြည့်ရတာ ကူးယူဖို့အတွက် နောက်ထပ် ပစ်မှတ်တစ်ခု ရှိလာပြီပဲ…အဲ့ဒါက ကြယ်ကြွေဓားကျင့်စဉ်ပဲ" လုယွမ်က ပြုံးလိုက်သည်။
သူ နေ့တိုင်း အပြင်ထွက် လျှောက်လည်နေခြင်းမှာ ဤတပည့်များ၏ အတင်းအဖျင်း စကားဝိုင်းများမှတစ်ဆင့် ဂိုဏ်းအတွင်း ဖြစ်ပျက်နေသောအရာများကို သိရှိနိုင်ရန်အတွက် ဖြစ်သည်။
ချက်ချင်းပင် လုယွမ်သည် ပိသျှံတောင် ရှိရာဘက်သို့ တိုက်ရိုက် ပျံသန်းသွားတော့သည်။
အမွှေးတိုင်တစ်တိုင် ကုန်ဆုံးလုနီးပါး အချိန်တွင် လုယွမ်သည် ပိသျှံတောင်၏ နယ်မြေအတွင်းသို့ ရောက်ရှိလာခဲ့သည်။
မိုးတိမ်များထဲသို့ ထိုးထွက်နေသော ပိသျှံတောင်မှာ အလွန်ပင် မတ်စောက်လှသည်။
ပိသျှံတောင်တစ်ခုလုံးတွင် အလွန်ကြီးမားသော 'ဝိညာဉ်စွမ်းအားစုဆောင်းခြင်း မန္တန်အစီအရင်ကြီး'ကို တည်ဆောက်ထားသဖြင့် တောင်အတွင်းရှိ ကောင်းကင်နှင့် မြေကြီး၏ ဝိညာဉ်စွမ်းအားများမှာ သိသိသာသာ ပိုမိုသိပ်သည်းပြီး သန့်စင်လှသည်။
"စီနီယာအစ်ကို့ကို ဂါရဝပြုပါတယ်" လုယွမ်သည် ပိသျှံတောင်၏ အတွင်းစည်း၀င်းထဲသို့ လျင်မြန်စွာ ဝင်ရောက်လာခဲ့ရာ.. ပိသျှံတောင်မှ အတွင်းစည်းတပည့်များသည် လုယွမ်ကို မြင်လျှင် တစ်ယောက်ပြီးတစ်ယောက် ရိုသေစွာ ဦးညွှတ်ကြသည်။
"ဂျူနီယာညီမလေး ရွယ်ယောင် ဘယ်မှာလဲဆိုတာ မင်းတို့ သိလား" လုယွမ်က အတွင်းဂိုဏ်းတပည့်တစ်ယောက်ကို ကြည့်ကာ မေးလိုက်သည်။
"သိပါတယ်.. ကျွန်တော် စီနီယာအစ်ကို့ကို လိုက်ပို့ပေးပါ့မယ်" ထိုအတွင်းဂိုဏ်းတပည့်က ချက်ချင်းပင် ခေါင်းညိမ့်ကာ ပြန်ဖြေသည်။
"ဒါဆိုရင် လမ်းပြပေးပါဦး" လုယွမ်က အသာအယာ ခေါင်းညိမ့်လိုက်သည်။ ထို့နောက် သူသည် ထိုအတွင်းဂိုဏ်းတပည့်၏ နောက်မှ လိုက်ပါသွားခဲ့သည်။
တခြားတပည့်များက တိုးတိုးတိုးတိုးဖြင့် စတင်ပြောဆိုကြတော့သည်။ "ဒီတပည့်ရင်းက ပိသျှံတောင်က တပည့်လည်း မဟုတ်ဘူး.. ဘာလို့ ဒီကို လာတာလဲ"
"မင်းကလည်း အ.. လိုက်တာ ခုနက သူပြောတာ မကြားဘူးလား စီနီယာအမ ရွယ်ယောင် ဘယ်မှာလဲလို့ မေးတာလေ…ကြည့်ရတာ သူကလည်း စီနီယာအမ ရွယ်ယောင်ကို လိုက်နေတဲ့သူ ထင်တယ်"
"အဲ့လိုဆိုရင် ငါတို့အတွက် အခွင့်အရေး မရှိတော့ဘူးပေါ့ ဒီတပည့်ရင်းကပါ ရောက်လာပြီဆိုတော့"
"စီနီယာအမ ရွယ်ယောင်က ဘယ်လိုပါရမီရှင်မျိုးလဲ မင်းက စီနီယာအမ ရွယ်ယောင်ကို မင်းရဲ့ ကျင့်ကြံဖော် ဖြစ်စေချင်တယ် ဟုတ်လား.. အိပ်မက်ပဲ မက်နေလိုက်"
"ငါက ဘာလို့ အိပ်မက်မမက်ရမှာလဲ မရဘူးလား"
"ဟူး... ကျန်းထျယ် ကတော့ ငါတို့ထက် အရင် လက်ဦးသွားပြီ… တပည့်ရင်းတစ်ယောက်အတွက် လမ်းပြပေးရတယ်ဆိုတာ ရှားပါးတဲ့ အခွင့်အရေးပဲ"
"ဟုတ်တယ်.. အကယ်၍ သူနဲ့သာ မိတ်ဆွေဖြစ်သွားရင် နောင်ကျရင် ဒီဂိုဏ်းထဲမှာ နောက်ခံတစ်ခု ရသွားတာနဲ့ တူတူပဲ..."
လုယွမ်အတွက် လမ်းပြပေးနေသော အတွင်းဂိုဏ်းတပည့်၏ အမည်မှာ ကျန်းထျယ် ဖြစ်သည်။ ယခုအချိန်တွင် တခြားအတွင်းဂိုဏ်းတပည့်များမှာ မနာလို ဖြစ်နေကြရသည်။
မကြာမီအချိန်အတွင်းမှာပင် ကျန်းထျယ်၏ လမ်းပြမှုကြောင့် သူတို့သည် မက်မွန်တောအုပ်တစ်ခုသို့ ရောက်ရှိလာခဲ့ကြသည်။
နေရာအနှံ့တွင် မက်မွန်ပန်းများ ပွင့်လန်းနေပြီး ရှုခင်းမှာ အလွန်ပင် လှပဆန်းပြားလှသည်။
လေထုထဲတွင် မက်မွန်ပန်းများ၏ မွှေးပျံ့သော ရနံ့များဖြင့် ပြည့်နှက်နေသဖြင့် လူကို ခေတ္တမျှ စိတ်ကြည်နူးသွားစေသည်။
"ဒီနေရာက တကယ်ကို ကောင်းတဲ့နေရာပဲ" လုယွမ်က အသာအယာ ခေါင်းညိမ့်သည်။
"စီနီယာအစ်ကို... စီနီယာအမ ရွယ်ယောင်က ဒီမက်မွန်တောအုပ်ထဲမှာ နေတာပါ…အထဲကို ဆက်လျှောက်သွားရင် ခြံဝန်းတစ်ခုကို မြင်ရပါလိမ့်မယ်" ကျန်းထျယ်က လုယွမ်ကို အလွန်ပင် ယဉ်ကျေးစွာ ပြောလိုက်သည်။
"အလွန်ကောင်းတယ်.. ဒီဆေးလုံးက မင်းလမ်းပြပေးတဲ့အတွက် ဆုလာဘ်ပဲ" လုယွမ်က လက်ကို ဝှေ့ယမ်းလိုက်ရာ ပြီးပြည့်စုံသောအဆင့် ရှိသည့် 'နဂါးဝါဆေးလုံး' တစ်လုံး ပေါ်ထွက်လာသည်။
ထိုဆေးလုံးကို ကြည့်ပြီး ကျန်းထျယ် အလွန်ပင် စိတ်လှုပ်ရှားသွားရသည်။
"ကျေးဇူးတင်ပါတယ် စီနီယာအစ်ကို.. ကျေးဇူးအများကြီး တင်ပါတယ် "
လုယွမ်က လက်ပြလိုက်ပြီးနောက် မက်မွန်တောအုပ်ထဲသို့ လှောက်လှမ်းဝင်ရောက်သွားခဲ့သည်။
ကျန်းထျယ်သည် သူ၏လက်ထဲမှ ဆေးလုံးကို စိုက်ကြည့်နေမိပြီး အတော်ကြာမှ သတိပြန်ဝင်လာသည်။
"ဒါက တကယ်ပဲ ပြီးပြည့်စုံသောအဆင့် ရှိတဲ့ နဂါးဝါဆေးလုံးပဲ.. ဘုရားရေ... ဒီတပည့်ရင်းက တကယ်ကို ရက်ရောတာပဲ"
"နဂါးဝါဆေးလုံးက အခြေခံတည်ဆောက်ခြင်းအဆင့် ကျင့်ကြံသူတွေ သောက်သုံးဖို့ အသင့်တော်ဆုံးပဲ.. ပြီးတော့ ဒါက ပြီးပြည့်စုံသောအဆင့်တောင် ဖြစ်နေသေးတယ်…သောက်ပြီးရင် အာနိသင်က အဆတစ်ရာမက တိုးတက်လာမှာ"
"ငါ အခုချက်ချင်း အခန်းထဲပြန်ပြီး ကျင့်ကြံရမယ် ဒီပြီးပြည့်စုံတဲ့ နဂါးဝါဆေးလုံးနဲ့ဆိုရင် ငါ့ရဲ့ ကျင့်ကြံခြင်းအဆင့်ကို အခြေခံတည်ဆောက်ခြင်းအဆင့် နှောင်းပိုင်း အထိ သေချာပေါက် အောင်မြင်စွာ တက်လှမ်းနိုင်လိမ့်မယ်"
ကျန်းထျယ်သည် ဆေးလုံးကို လျင်မြန်စွာ သိမ်းဆည်းလိုက်ပြီး သူ၏ နေအိမ် ရှိရာဘက်သို့ အမြန်ဆုံး အရှိန်ဖြင့် ပြေးသွားတော့သည်။ လမ်းတစ်လျှောက်တွင် သူသည် အလွန်ပင် သတိထားနေခဲ့ရပြီး တခြားသူများက သူ၏လက်ထဲတွင် ပြီးပြည့်စုံသောအဆင့် နဂါးဝါဆေးလုံး ရှိနေသည်ကို သိသွားမည်ကို အလွန်ပင် ကြောက်ရွံ့နေမိသည်။