​အခန်း (၂၁) - ဆန်းကြယ်သော သွေးမျှော့ကောင်များ

​"မီးအတတ်" လုယွမ်သည် အခြေခံမန္တန်တစ်ခုကို ချက်ချင်းပင် ရွတ်ဆိုလိုက်သည်။ မီးလုံးများ စုစည်းလာပြီး ထိုကျင့်ကြံသူများ၏ အလောင်းများကို လျင်မြန်စွာ ဝါးမြိုသွားတော့သည်။

​မကြာမီအချိန်အတွင်းမှာပင် အားလုံးမှာ ပြာအတိ ဖြစ်သွားကြသည်။ ဒါဟာ ကောင်းမှုကုသိုလ်တစ်ခု လုပ်ပေးလိုက်ခြင်းလည်း ဖြစ်သည်။

​"စီနီယာအစ်ကို... မိစ္ဆာသားရဲတွေကို ရှင်းလင်းပြီးပြီလား" မကြာမီ နန်းဆောင်အပြင်ဘက်မှ 'ရွှီဟို့' ၏ အသံ ထွက်ပေါ်လာသည်။

​"ပြီးပြီ" လုယွမ် လှည့်ထွက်လာခဲ့သည်။

​လုယွမ် နန်းဆောင်အပြင်ဘက်သို့ လှမ်းထွက်လိုက်သည်နှင့် ရွှီဟို့က ချက်ချင်းပင် မြှောက်ပင့်ပြောဆိုတော့သည်။ "စီနီယာအစ်ကိုကတော့ မျှော်လင့်ထားတဲ့အတိုင်းပဲ.. စီနီယာအစ်ကို လက်ဖျားခါးခါးလှုပ်လိုက်ရုံနဲ့ အရာရာက လွယ်ကူသွားတာပဲ"

​"တော်စမ်း... မြှောက်ပင့်မနေနဲ့…ဒါနဲ့ မင်းတစ်ယောက်တည်းပဲ လား" 'ဝမ်ရှီရှီ' ကို မတွေ့သဖြင့် လုယွမ် မေးလိုက်သည်။

​"စီနီယာအစ်ကို... ကျွန်တော်တို့ လျှို့ဝှက်အခန်းတစ်ခု တွေ့ခဲ့တယ် စီနီယာအမ ဝမ်က အခု အဲ့ဒီအခန်းတံခါးက တားမြစ်ချက်ကို ဖျက်ဖို့ ကြိုးစားနေတာ။ အဲ့ဒါနဲ့ စီနီယာအစ်ကို့ကို အရင်သွားခေါ်ခိုင်းလို့ လာခဲ့တာပါ" ရွှီဟို့က ချက်ချင်း ပြန်ဖြေသည်။

​"လမ်းပြပါ" လုယွမ်က အသာအယာ ဆိုသည်။

​"နားလည်ပါပြီ စီနီယာအစ်ကို" ရွှီဟို့ ပြုံးလိုက်သည်။

​ထို့နောက် ရွှီဟို့နောက်သို့ လိုက်ပါရင်း သူတို့သည် အတွင်းပိုင်းသို့ ပို၍ နက်ရှိုင်းစွာ ဝင်ရောက်လာခဲ့ကြသည်။ မကြာမီမှာပင် လျှို့ဝှက်အခန်း၏ အဝင်ဝသို့ ရောက်ရှိလာသည်။

​ထိုအချိန်တွင် ဝမ်ရှီရှီသည် လျှို့ဝှက်အခန်းတံခါးမှ တားမြစ်ချက်ကို ဖျက်ဆီးရန် ကြိုးစားနေဆဲ ဖြစ်သည်။ သူမ၏ တစ်ကိုယ်လုံးတွင် ချွေးများ စိုရွှဲနေပြီး ဤတားမြစ်ချက်မှာ ဖျက်ဆီးရန် မလွယ်ကူကြောင်း ထင်ရှားလှသည်။

​"စီနီယာအမ... ဘယ်လိုလဲ" ရွှီဟို့က တိုးတိုးလေး မေးလိုက်သည်။

​"ရတော့မယ်... နောက်ထပ် နည်းနည်းပဲ လိုတော့တယ်" ဝမ်ရှီရှီက ပြန်ဖြေသည်။

​ဝုန်း….

​ရုတ်တရက် တားမြစ်ချက်ဆီမှ ပြင်းထန်သော တုံ့ပြန်မှု ဖိအားတစ်ခု အဟုန်ပြင်းစွာ ထွက်ပေါ်လာသည်။

​"ဒုက္ခပဲ..." ဝမ်ရှီရှီမှာ ခုခံရန် အချိန်မရလိုက်ဘဲ နောက်သို့ လွင့်ထွက်သွားတော့သည်။

​၎င်းကို မြင်လိုက်ရသည့်အခါ လုယွမ်၏ ပုံရိပ်မှာ လျှပ်စီးကဲ့သို့ လှုပ်ရှားသွားသည်။ သူသည် ဝမ်ရှီရှီ၏ ရှေ့တွင် ပေါ်လာပြီး သူမကို ရင်ခွင်ထဲသို့ ပွေ့ပိုက်ကာ အောက်သို့ တည်ငြိမ်စွာ ဆင်းသက်လိုက်သည်။

​ထိုအချိန်တွင် ဝမ်ရှီရှီ မျက်လုံးပွင့်လာပြီး သူမ၏ မျက်နှာမှာ ရှက်သွေးဖြာကာ ချက်ချင်းပင် ရဲတက်သွားသည်။ "ကျေးဇူးတင်ပါတယ် စီနီယာအစ်ကို"

​"ရပါတယ်" လုယွမ်က အသာအယာ ရယ်မောရင်း သူမကို ညင်သာစွာ ပြန်ချပေးလိုက်သည်။

​"စီနီယာအစ်ကို... ဒီတားမြစ်ချက်က အရမ်းသန်မာတာပဲ… ကျွန်မ အောင်မြင်ခါနီးမှ ပျက်စီးသွားရတယ်… ဒါ ကျွန်မရဲ့ ကျင့်ကြံမှုအဆင့်က နိမ့်လွန်းလို့ပါ" ဝမ်ရှီရှီက တောင်းပန်လိုက်သည်။ သူမအနေဖြင့် တစ်ဖက်တစ်လမ်းမှ ကူညီနိုင်ရန် မျှော်လင့်ခဲ့သော်လည်း ကျရှုံးခဲ့ရခြင်း ဖြစ်သည်။

​"ကိစ္စမရှိပါဘူး… နောင်ကျရင် စိတ်အာရုံစိုက်ပြီး ကြိုးစားကျင့်ကြံပေါ့" လုယွမ်က သူမကို အားပေးလိုက်သည်။

​ထို့နောက် လုယွမ်သည် လျှို့ဝှက်အခန်းတံခါးဆီသို့ လျှောက်လှမ်းသွားသည်။

​"စီနီယာအစ်ကိုက တားမြစ်ချက်တွေကိုလည်း နားလည်တာလား" ရွှီဟို့က မေးမြန်းသည်။

​"အနည်းငယ်ပေါ့" လုယွမ် ပြုံးလိုက်သည်။

​လုယွမ်သည် လက်ညှိုးဖြင့် တစ်ချက်မျှသာ ထောက်လိုက်သည်။

​ဂျိန်း...

​လျှို့ဝှက်အခန်းတံခါးမှ တားမြစ်ချက်မှာ ချက်ချင်းပင် ပျက်စီးသွားတော့သည်။

​ဤမြင်ကွင်းက ရွှီဟို့နှင့် ဝမ်ရှီရှီကို ဆွံ့အသွားစေသည်။

​"မျှော်လင့်ထားတဲ့အတိုင်းပဲ စီနီယာအစ်ကိုကတော့... လက်ညှိုးတစ်ချောင်းတည်းနဲ့ တားမြစ်ချက်ကို ဖျက်ဆီးပစ်နိုင်တာပဲ" ရွှီဟို့က အံ့ဩချီးကျူးရင်း စိတ်ထဲမှ တွေးလိုက်မိသည်။

 ‘ငါကော ဘယ်တော့မှ စီနီယာအစ်ကို လုလိုမျိုး အစွမ်းထက်လာမှာလဲ’

​"စီနီယာအစ်ကိုက တားမြစ်ချက်အစီအရင်အတတ်မှာလည်း ဒီလောက်အထိ ကျွမ်းကျင်လိမ့်မယ်လို့ မထင်ထားခဲ့ဘူး" ဝမ်ရှီရှီ၏ မျက်လုံးများတွင် အထင်ကြီး လေးစားမှုများ အထိုင်းအမှိုင်း ဖြတ်သန်းသွားသည်။ သူမ၏ စိတ်နှလုံးမှာလည်း ပို၍ လှုပ်ခတ်သွားရသည်။

​"အပြင်လောကမှာ လှည့်လည်သွားလာတဲ့အခါ အခက်အခဲမှန်သမျှကို ကိုယ်တိုင်ဖြေရှင်းနိုင်ဖို့ အရာရာကို အနည်းငယ်စီ တတ်မြောက်ထားဖို့ လိုအပ်တယ်" လုယွမ်က တည်ကြည်သော အမူအရာဖြင့် ခေါင်းညိမ့်ကာ ပြောလိုက်သည်။

​"စီနီယာအစ်ကို ပြောတာ မှန်ပါတယ် ကျွန်တော် နားလည်သွားပါပြီ" ရွှီဟို့က လက်ယှက်ကာ အရိုသေပြုကာ‌ ပြောလိုက်သည်။

​"ကဲ... အထဲဝင်ပြီး ကြည့်ရအောင်" 

 "ဒီနေရာကို တားမြစ်ချက်နဲ့ ပိတ်ထားတယ်ဆိုကတည်းက အထဲမှာ ရှိတာတွေက မရိုးရှင်းနိုင်ဘူး…သတိထားကြ"

​"နားလည်ပါပြီ" ရွှီဟို့နှင့် ဝမ်ရှီရှီတို့ နှစ်ဦးစလုံး ခေါင်းညိမ့်ကြသည်။

​လုယွမ်က ရှေ့ဆုံးမှ ဦးဆောင်ကာ လျှို့ဝှက်အခန်းထဲသို့ ဝင်ရောက်လာခဲ့သည်။ အခန်းထဲသို့ လှမ်းဝင်လိုက်သည်နှင့် ပြင်းထန်လှသော သွေးညှီနံ့ကြီးက သူတို့ဆီသို့ တိုးဝှေ့လာသည်။

​"အလင်းပေးမန္တန်" ဝမ်ရှီရှီက လက်ဟန်တစ်ခု ပြုလုပ်လိုက်သည်။ အလင်းလုံးတစ်ခု ပေါ်ထွက်လာပြီး အလွန်ပင် စူးရှတောက်ပသော အလင်းရောင်ကို ထုတ်လွှတ်သည်။ ၎င်းမှာ လူလုပ် နေမင်းအသေးစားလေးတစ်ခု ကဲ့သို့ပင်။

​ထိုအလင်းရောင်က လျှို့ဝှက်အခန်းတစ်ခုလုံးကို လင်းထိန်သွားစေသည်။ 

အခန်းထဲတွင် ကြီးမားလှသော 'သွေးကန်' ကြီးတစ်ခုကို သူတို့ မြင်လိုက်ရသည်။ သွေးကန်၏ ပတ်ပတ်လည်တွင်တော့ တန်းစီလျက်ရှိသော ကမ္မည်းကျောက်စာတိုင် များစွာ ရှိနေသည်။ ထိုကျောက်စာတိုင်များပေါ်ရှိ နာမည်များကို ကြည့်လိုက်သည့်အခါ အားလုံးမှာ 'ချန်' ဆိုသည့် မျိုးရိုးအမည်များ ဖြစ်ကြသည်။

​"ကြည့်ရတာ ဒီလျှို့ဝှက်အခန်းက ချန်မိသားစုရဲ့ ဘိုးဘွားခန်းမ ဖြစ်ပုံရတယ်... ချန်မိသားစုဝင်တွေကို ရည်စူးထားတာပဲ" ရွှီဟို့က တည်ငြိမ်စွာ ဆိုသည်။ 

"ဒီပမာဏကို ကြည့်ရသလောက် ချန်မိသားစုက ဒီလောက်အထိ ကြီးမားတဲ့ မိသားစုကြီး ဖြစ်နေလိမ့်မယ်လို့ မထင်ထားမိဘူး"

​"ငါတို့ သဲလွန်စတွေ ရှိမလားဆိုတာ ရှာကြည့်ရအောင်" လုယွမ်က အသာအယာ ပြောလိုက်သည်။

​သူသည် သွေးကန်၏ အနားသတ်ဆီသို့ တိုက်ရိုက် လျှောက်လှမ်းသွားသည်။ ရှေ့မှ သွေးကန်ကို ကြည့်ရင်း အောက်ခြေတွင် တစ်ခုခု ရှိနေကြောင်း သူ အာရုံခံမိသည်။ လုယွမ်က လက်ညှိုးကို မြှောက်ကာ အသာအယာ ဝှေ့ယမ်းလိုက်သည်။

​ဗွမ်း...

​နောက်တစ်စက္ကန့်တွင် အရာဝတ္ထုတစ်ခုမှာ သွေးကန်အောက်ခြေမှ ငေါက်ခနဲ ထွက်ပေါ်လာပြီး လုယွမ်၏ ရှေ့တွင် လွင့်မျောနေသည်။ 

၎င်းမှာ ထူးခြားသော သတ္တု တစ်ခု ဖြစ်သည်။ ထိုသတ္တုရိုင်းတွင် အလွန်ပင် ညစ်ထေးသော အငွေ့အသက်များ ပါဝင်နေသည်။ ၎င်းအထဲတွင် ကိန်းအောင်းနေသော စွမ်းအင်မှာ အလွန်ပင် ဆိုးယုတ်လှသည်။

​"ငါက လေ့လာမှု အားနည်းသေးတော့ ဒါက ဘာလဲဆိုတာ မသိဘူး" လုယွမ်က ခေါင်းယမ်းလိုက်ရင်း စိတ်ထဲမှ တွေးလိုက်သည်။ "ထားလိုက်ပါတော့... သိမ်းထားလိုက်ပြီးမှ နောက်မှ တခြားသူတွေကို မေးကြည့်ရမယ်"

​သူသည် ထိုဆိုးယုတ်သော စွမ်းအင်များ ပါဝင်နေသည့် ကျောက်တုံးကို သူ၏ သိုလှောင်လက်စွပ် ထဲသို့ လျင်မြန်စွာ ထည့်သွင်းလိုက်သည်။

​ထို့နောက် လုယွမ်သည် သွေးကန်ဆီသို့ ထပ်မံ ကြည့်လိုက်သည်။ ယခင်ကျောက်တုံး၏ အငွေ့အသက် ဖုံးကွယ်ထားမှု မရှိတော့သဖြင့် သွေးကန်အောက်ခြေတွင် ခေါင်းတလား တစ်ခု ရှိနေသည်ကို လုယွမ် အခု ရှင်းလင်းစွာ ခံစားသိရှိလိုက်ရသည်။

​"စီနီယာအမ... သတိထား"

​ရုတ်တရက် ရွှီဟို့က ထိတ်လန့်တကြား အော်ဟစ်လိုက်သည်။

​တစ်ခဏအတွင်းမှာပင် ဝမ်ရှီရှီသည် သူမ၏ ပေါင်ကို တစ်ခုခုက ကိုက်လိုက်သကဲ့သို့ စူးရှသော နာကျင်မှုကို ခံစားလိုက်ရသည်။ 

အောက်သို့ ငုံ့ကြည့်လိုက်သည့်အခါ ဆန်းကြယ်သော သွေးရောင် မျှော့ကောင် တစ်ကောင်ကို မြင်လိုက်ရသည်။ သူမသည် မျက်နှာတစ်ခုလုံး သွေးဆုတ်ဖြူလျော်သွားပြီး ချက်ချင်းပင် မြေပြင်ပေါ်သို့ လဲကျသွားတော့သည်။

​ဝုန်း…

​လုယွမ်က လက်ညှိုးကို ဝှေ့ယမ်းလိုက်ရာ ထိုဆန်းကြယ်သော မျှော့ကောင်မှာ ချက်ချင်းပင် သေဆုံးသွားသည်။ 

ထို့နောက် လုယွမ်သည် ဝမ်ရှီရှီ၏ ဘေးသို့ ချက်ချင်းသွားကာ ဆေးလုံး  တစ်လုံးကို သူမ၏ ပါးစပ်ထဲသို့ လျင်မြန်စွာ ခွံ့ကျွေးလိုက်သည်။

​ဝမ်ရှီရှီ၏ အခြေအနေမှာ ချက်ချင်းပင် သိသိသာသာ ကောင်းမွန်လာသည်။

​ရှဲ... ရှဲ...

​မျက်စိတစ်မှိတ်အတွင်းမှာပင်။ သူတို့ သတိမထားမိလိုက်သော အချိန်တွင်...

​လျှို့ဝှက်အခန်းထဲ၌ ဆန်းကြယ်သော သွေးမျှော့ကောင်များ သိပ်သည်းစွာ ရုတ်တရက် ထွက်ပေါ်လာပြီး လုယွမ်နှင့် တခြားသူများကို ဝိုင်းရံထားလိုက်ကြသည်။

​"စီနီယာအစ်ကို... ကျွန်တော်တို့ ဒီလျှို့ဝှက်အခန်းထဲကနေ အရင် ထွက်ကြရအောင်" ရွှီဟို့က လျင်မြန်စွာ အကြံပြုသည်။

​"အချိန်မရှိတော့ဘူး… ဒီသွေးမျှော့ကောင်တွေမှာ ပြင်းထန်တဲ့ အဆိပ်တွေ ပါနေတယ်… ဂျူနီယာညီမလေး ဝမ်ကို အဆိပ် ချက်ချင်း မဖြေပေးရင် အသက်အန္တရာယ် ရှိတယ်…ငါ ခုနက ကျွေးလိုက်တဲ့ ဆေးလုံးက အခြေအနေကို အနည်းငယ်ပဲ ထိန်းထားပေးနိုင်တာ" 

လုယွမ်သည် အလွန်ပင် တည်ငြိမ်နေသည်။ အခြေအနေက ပိုပြီး ပြင်းထန်လေလေ.. ၎င်းကို ဖြေရှင်းနိုင်ရန် ပိုပြီး တည်ငြိမ်ဖို့ လိုအပ်လေလေ ဖြစ်သည်။

​ချက်ချင်းပင် လုယွမ်သည် ဝိညာဉ်ကျောက်တုံး ရာပေါင်းများစွာနှင့် မန္တန်အလံ အချို့ကို ထုတ်ယူလိုက်သည်။ 

ခြေလှမ်းအနည်းငယ်အတွင်းမှာပင် သေးငယ်သော အကာအကွယ် မန္တန်အစီအရင် တစ်ခုကို တည်ဆောက်လိုက်နိုင်သည်။

​"စီနီယာအစ်ကိုက မန္တန်အစီအရင်တွေကိုပါ တည်ဆောက်တတ်တာလား" ရွှီဟို့ စိတ်ထဲမှ အလွန်ပင် တုန်လှုပ်အံ့ဩသွားရသည်။

​ဒုံး... ဒုံး... ဒုံး...

​ထိုဆန်းကြယ်သော သွေးမျှော့ကောင်များသည် မန္တန်အစီအရင်ကို ဆက်တိုက် တိုက်ခိုက်နေကြသည်။ မန္တန်အစီအရင်ကို ဖောက်ခွဲရန်အတွက် ထိုသွေးမျှော့ကောင်များသည် မိမိကိုယ်ကိုယ် အသေခံ ပေါက်ကွဲသည့် နည်းလမ်းကိုပင် ရွေးချယ်ကြသည်။

​သို့သော် ဤမန္တန်အစီအရင်မှာ လုယွမ်ကိုယ်တိုင် တည်ဆောက်ထားခြင်း ဖြစ်ရာ ဤသွေးမျှော့ကောင်များအနေဖြင့် ဖောက်ထွက်ရန်မှာ လုံးဝ မဖြစ်နိုင်ပေ။

​"ဒီချန်မိသားစုက တကယ်ကို ယုတ်မာတာပဲ ဘိုးဘွားကမ္မည်းကျောက်စာတိုင်တွေကို ထားတဲ့နေရာမှာ ဒီလောက်အထိ ဆန်းကြယ်တဲ့ သွေးမျှော့ကောင်တွေ အများကြီး ထားထားရတယ်လို့" ရွှီဟို့က ကျိန်ဆဲလိုက်သည်။

​သူတို့ စတင်ဝင်ရောက်လာစဉ်က မည်သည့် သက်ရှိသတ္တဝါ၏ အငွေ့အသက်ကိုမှ မခံစားမိခဲ့ကြပေ။ 

ဝိညာဉ်အသွင်ပြောင်းလဲခြင်းအဆင့် ရှိသော လုယွမ်ပင်လျှင် ၎င်းတို့ကို အာရုံမရခဲ့ပေ။ ဒါဟာ ဤသွေးမျှော့ကောင်များမှာ သာမန်မဟုတ်ကြောင်း ပြသနေခြင်း ဖြစ်သည်။

​"စီနီယာအစ်ကို... ငါတို့ နောက်ထပ် ဘာလုပ်ကြမလဲ စီနီယာအမရဲ့ အဆိပ်ကို ကျွန်တော့်ပါးစပ်နဲ့ စုပ်ထုတ်ပေးရမလား" ရွှီဟို့က ဆက်မေးသည်။

​"မင်းသာ အဆိပ်ကို တိုက်ရိုက် စုပ်ထုတ်လိုက်ရင် မင်းရဲ့ အသက်နဲ့ သူမရဲ့ အသက်ကို လဲလိုက်ရသလို ဖြစ်သွားလိမ့်မယ်" လုယွမ်က လက်ကာပြလိုက်ပြီး ဝိညာဉ်ဆေးဘက်ဝင် အပင်များစွာကို လျင်မြန်စွာ ထုတ်ယူလိုက်သည်။

​မျက်စိတစ်မှိတ်အတွင်းမှာပင် လုယွမ်သည် လိုအပ်သော ဆေးဖက်ဝင် အပင်များကို ရွေးချယ်လိုက်သည်။ သူ၏ လက်ဖဝါးကို ဖြန့်လိုက်ရာ မီးလျှံတစ်ခု ချက်ချင်း စုစည်းပေါ်ထွက်လာသည်။ ရွေးချယ်ထားသော ဆေးပင်များကို ထိုမီးလျှံထဲသို့ တစ်ခုပြီးတစ်ခု ပစ်ထည့်လိုက်သည်။

​"ဆေးဖော်စပ်ခြင်းအတတ် အလို... ဘုရားရေ.. မျှော်လင့်ထားတဲ့အတိုင်းပဲ စီနီယာအစ်ကိုက ဆေးဖော်စပ်ခြင်းအတတ်မှာလည်း ကျွမ်းကျင်တာပဲ..." ဤမြင်ကွင်းကို ကြည့်ရင်း ရွှီဟို့မှာ အံ့အားသင့်လွန်းသဖြင့် ပါးစပ်အဟောင်းသား ဖြစ်သွားရသည်။ 

‘ငါ့တစ်သက်မှာ စီနီယာအစ်ကို လုယွမ် လိုမျိုး အောင်မြင်မှုတွေ ရနိုင်ပါ့မလား မသိဘူး’

​မိနစ်အနည်းငယ်ခန့် ကြာပြီးနောက် အလင်းရောင် တောက်ပနေသော မြကျောက်ရောင် ဆေးလုံးတစ်လုံးကို အောင်မြင်စွာ ဖော်စပ်ပြီးစီးသွားသည်။ 

သူသည် ထိုဆေးလုံးကို ဝမ်ရှီရှီ၏ ပါးစပ်ထဲသို့ ချက်ချင်း တိုက်ကျွေးလိုက်သည်။ ဆေးလုံးသည် သူမ၏ ခန္ဓာကိုယ်ထဲသို့ ရောက်ရှိသွားပြီး အလွန်ပင် သန့်စင်သော စွမ်းအင်များအဖြစ် ပြောင်းလဲကာ တစ်ကိုယ်လုံးရှိ သွေးကြောများဆီသို့ စီးဆင်းသွားတော့သည်။

​သူမ၏ ခန္ဓာကိုယ်ထဲမှ သွေးမျှော့ကောင်အဆိပ်များမှာ လျင်မြန်စွာ ပျောက်ကွယ်သွားသည်။ 

တဖြည်းဖြည်းနှင့် ဝမ်ရှီရှီ၏ မျက်နှာပြင်မှာ ပြန်လည်ကောင်းမွန်လာပြီး သွေးရောင်လွှမ်းကာ ပန်းရောင် သန်းလာသည်။ သူမ၏ အသက်ရှူသံမှာလည်း တည်ငြိမ်သွားသည်။ ကြည့်ရတာ သူမ မကြာခင် နိုးလာတော့မည့်ပုံပင်။

​"စီနီယာအစ်ကို... စီနီယာအစ်ကိုက တကယ်ကို အံ့ဩဖို့ကောင်းတာပဲ" ရွှီဟို့က ချီးကျူးလိုက်သည်။

​"ပညာဟူသည် အပိုမရှိပါဘူး" လုယွမ်က တည်ငြိမ်စွာ ဆိုသည်။ "မင်းလည်း နောင်အခွင့်အရေးရရင် အတတ်ပညာအချို့ကို တတ်မြောက်အောင် ကြိုးစားထားပေါ့"

​"ဟုတ်ကဲ့... နားလည်ပါပြီ" ရွှီဟို့ ပြန်ဖြေသည်။

​လုယွမ် ထရပ်လိုက်ပြီး လက်ညှိုးကို တစ်ချက် ဝှေ့ယမ်းလိုက်ရာ မီးလုံးများ စုစည်းကာ သွေးမျှော့ကောင်များဆီသို့ ပျံသန်းသွားတော့သည်။

​ဝုန်း... ဝုန်း... ဝုန်း...

​လုယွမ်၏ ဆက်တိုက် တိုက်ခိုက်မှုများအောက်တွင် သွေးမျှော့ကောင်များ၏ အရေအတွက်မှာ လျင်မြန်စွာ လျော့နည်းသွားသည်။ ၎င်းတို့ အားလုံး ပျက်စီးလုနီးပါး ဖြစ်သွားသည့် အချိန်မှာပင်...

​သွေးကန်အောက်ခြေမှ သွေးမျှော့ကောင် အုပ်စုကြီးများမှာ အဆုံးမရှိသကဲ့သို့ ထပ်မံ၍ ဆက်တိုက် ထွက်ပေါ်လာကြပြန်သည်။

​"နောက်ထပ် ဘယ်လောက်တောင် ရှိသေးလဲဆိုတာ ငါ ကြည့်ရသေးတာပေါ့" လုယွမ်က ခပ်ပြုံးပြုံးဖြင့် သူ၏ ခန္ဓာကိုယ်အတွင်းမှ ဝိညာဉ်စွမ်းအားများကို မြှင့်တင်လိုက်သည်။

​ခဏအတွင်းမှာပင် လျှို့ဝှက်အခန်းတစ်ခုလုံးကို မီးလျှံများက ဝါးမြိုသွားတော့သည်။ သွေးမျှော့ကောင်တွေ ဘယ်လောက်ပဲ ထွက်လာထွက်လာ.. ထွက်လာသမျှ အားလုံးကို သူ အကုန် ဖျက်ဆီးပစ်နေတော့သည်။