​အခန်း (၁၆) - အဆင့်ရှစ် ဆေးလုံးဆရာသခင် ဖြစ်လာခြင်း 

​"ဒါက တကယ်ကို လန်းလွန်းတယ်… အခုဆို ငါ 'ကောင်းကင်မြစ်ဂိုဏ်း' ရဲ့ အသန်မာဆုံး ဓားကျင့်စဉ်ကို တိုက်ရိုက် တတ်မြောက်သွားပြီပဲ… ဒီဓားကျင့်စဉ်နဲ့ဆိုရင် တူညီတဲ့ အဆင့်ထဲက ကျင့်ကြံသူတွေကြားထဲမှာ ငါ သေချာပေါက် အနိုင်မခံ အရှုံးမပေး အလံမလှဲဘဲ စိန်ခေါ်နိုင်ပြီ"

​'ဇိီယွမ်ခြံဝန်း' သို့ ပြန်ရောက်ပြီးနောက် လုယွမ်သည် အလွန်ပင် စိတ်လှုပ်ရှားပြီး ပျော်ရွှင်နေခဲ့သည်…ကုလားထိုင်ပေါ်တွင် လဲလျောင်းရင်း လုယွမ်သည် သစ်သီးများကို စားကာ သူ့ကိုယ်သူ အပြည့်အဝ အပန်းဖြေနေတော့သည်။

​"နောင်ကျရင် ငါ့ရဲ့ ဘဝက ဒါထက် ပိုပြီး သာယာစိုပြည်လာတော့မှာပဲ" လုယွမ်က အနည်းငယ် ပြုံးလိုက်သည်။

​သူ့အတွက် ကျင့်ကြံအားထုတ်နေရန် မလိုတော့ချေ။ ကျန်ရှိသော ရက်စွဲများတွင် သူသည် ပျင်းရိငြီးငွေ့စွာဖြင့် အနားယူနေရုံသာ ဖြစ်သည်။ စနစ်၏ စွမ်းဆောင်ရည်အသစ် ပြန်လည်အသက်ဝင်လာသည်နှင့် သူသည် ထိုအစွမ်းထက်သော စွမ်းရည်များကို ထပ်မံ၍ ကူးယူနိုင်မည် ဖြစ်သည်။

​"ကြည့်ရတာ ဆေးလုံးဖော်စပ်ခြင်း ... လက်နက်သွန်းလုပ်ခြင်း  နဲ့ မန္တန်အစီအရင် ... ဒါတွေအားလုံးကိုပါ နောက်ကျရင် ငါ တတ်မြောက်အောင် လုပ်ရမယ်။ 

ဘာပဲဖြစ်ဖြစ် ဘက်စုံဖွံ့ဖြိုးတာက အကောင်းဆုံးပဲလေ" လုယွမ်က ခေါင်းညိတ်လိုက်ပြီး သူ၏ နောင်ရေးအတွက် အကြမ်းဖျင်း အစီအစဉ်နှင့် ပြင်ဆင်မှုများကို စတင်တွေးတောနေခဲ့သည်။

​'ဝိညာဉ်အသွင်ပြောင်းလဲခြင်းအဆင့်’ သည် အမြင့်ဆုံး အထွတ်အထိပ် မဟုတ်သေးချေ။ အပြင်ဘက်ရှိ ပိုမိုကျယ်ပြောသော ကမ္ဘာကြီးထဲတွင် ထိုအဆင့်ထက် ပိုမိုအစွမ်းထက်သည့် လူကြီးလူကောင်းများစွာ ရှိနေဦးမည် ဖြစ်ရာ... လုယွမ်သည် အနာဂတ်ကို အလွန်ပင် မျှော်လင့်စောင့်စားနေမိသည်။

​အချိန်များမှာ တစ်ရက်ပြီးတစ်ရက် ကုန်ဆုံးသွားခဲ့သည်။ နေ့စဉ်ရက်ဆက် လုယွမ်သည် သက်တောင့်သက်သာနှင့် အေးချမ်းသော ဘဝကို ဖြတ်သန်းနေခဲ့သည်။ ပူပန်မှုကင်းဝေးပြီး ငြိမ်းချမ်းလှသည်။

​နှစ်ရက်လျှင်တစ်ကြိမ်... စနစ်၏စွမ်းဆောင်ရည် ပြန်လည်အသက်ဝင်လာပြီးတိုင်း... လုယွမ်သည် ပင်မတောင်ထိပ် သို့ သွားရောက်ကာ ဂိုဏ်းချုပ် '‌ လော့ချီဖုန်း'  နှင့် သွားရောက်တွေ့ဆုံလေ့ရှိသည်။

​ထိုသို့ဖြင့်... တစ်လတာ အချိန်မှာ လျင်မြန်စွာ ကုန်ဆုံးသွားခဲ့သည်။ အခြေခံအားဖြင့် လုယွမ်သည် လော့ချီဖုန်း တတ်မြောက်ထားသည့် အစွမ်းထက်သော စွမ်းရည်အားလုံးကို မိမိကိုယ်ထဲသို့ အောင်မြင်စွာ ကူးယူ... ကူးထည့်ပြီး ဖြစ်သည်။ ၎င်းက လုယွမ်၏ အလုံးစုံသော ခွန်အားကို များစွာ မြှင့်တင်ပေးခဲ့သည်။

​"ငါ ဂိုဏ်းချုပ်ဆီကနေ အကုန်နီးပါး ကူးယူပြီးပြီဆိုတော့... နောက်ထပ် အခြားအရာတွေကို ကူးယူဖို့ စဉ်းစားရမယ်" ထိုနေ့တွင် လုယွမ်က ဖြည်းဖြည်းချင်း ရေရွတ်လိုက်သည်။ 

"ဒါဆို အခု ငါ ဘာကို ကူးယူရမလဲ"

​စနစ်၏ လုပ်‌ဆောင်ချက်ကတော့  ပြန်လည်အသက်ဝင်နေပြီ ဖြစ်သည်။

​ဝူး...

​အတိအကျပင် ထိုအချိန်၌... ကောင်းကင်ယံမှ လူရိပ်တစ်ခု ဆင်းသက်လာခဲ့သည်။

​ရောက်ရှိလာသူမှာ သက်လတ်ပိုင်း အမျိုးသားတစ်ဦး ဖြစ်ပြီး အထက်လူကြီးတစ်ယောက်၏ အရှိန်အဝါများ ထွက်ပေါ်နေကာ သူ၏ ကျင့်ကြံခြင်းနယ်ပယ်မှာ 'နတ်ဝိညာဉ်အဆင့်' သို့ ရောက်ရှိနေခဲ့ပြီ ဖြစ်သည်။

​"သူငယ်လေး... မင်း ဘယ်တုန်းက 'အမြုတေဖြစ်တည်ခြင်းအဆင့်'  ကို ရောက်သွားတာလဲ" ထိုသက်လတ်ပိုင်း အမျိုးသားက လုယွမ်ကို ကြည့်ကာ မေးလိုက်သည်။

​"လူကြီးမင်းက ဘယ်သူပါလဲ" လုယွမ် ကုလားထိုင်ပေါ်မှ မတ်တတ်ရပ်လိုက်သည်။

​"ငါက ဒန်ရှတောင်ထိပ်ရဲ့ တောင်ထိပ်သခင် 'မုချန်'  ပဲ" မုချန်က တည်ငြိမ်စွာ ဆိုသည်။

​၎င်းကို ကြားလျှင် လုယွမ် ချက်ချင်းပင် အံ့ဩသွားရသည်။ "ဩော်... တောင်ထိပ်သခင် ဖြစ်နေတာပဲ တပည့်က တောင်ထိပ်သခင်ကို ဂါရဝပြုပါတယ်"

​ချက်ချင်းပင် လုယွမ် ဦးညွှတ် နှုတ်ဆက်လိုက်သည်။ သူ၏ နှလုံးသားထဲတွင်မူ ပို၍ပင် ဝမ်းသာပီတိ ဖြစ်နေခဲ့သည်။ ဒန်ရှတောင်ထိပ်၏ တောင်ထိပ်သခင်သည် အလွန်အစွမ်းထက်သော ဆေးလုံးဖော်စပ်ခြင်း အတတ်ပညာ ရှိသည်ဟု ပြောစမှတ်ပြုကြရာ... ကြည့်ရတာ သူ ကူးယူရန်အတွက် ပစ်မှတ်အသစ်ကို ရှာတွေ့သွားခဲ့ပြီ ဖြစ်သည်။

​"သူငယ်လေး... ငါ မင်းကို စောင့်ကြည့်နေတာ ရက်အနည်းငယ် ရှိပြီ…မင်းက ဘာမှမလုပ်ဘဲ လဲလျောင်းနေတာ ဒါမှမဟုတ်ရင် ပင်မတောင်ထိပ်ကို သွားနေတာပဲ ရှိတယ်။ မင်း သေသေချာချာ ကျင့်ကြံနေတာကို ငါ တစ်ခါမှ မမြင်မိဘူး" မုချန်၏ လေသံမှာ တင်းမာလှသည်။ "မုချင်းရွှယ် က မင်းကို သေချာကျင့်ကြံဖို့ မမှာခဲ့ဘူးလား"

​"တောင်ထိပ်သခင်... ကျွန်တော့်ကို စွပ်စွဲနေတာပဲ အကယ်၍ ကျွန်တော် သေချာမကျင့်ကြံခဲ့ရင် ကျွန်တော့်ရဲ့ အဆင့်က ဘယ်လိုလုပ်ပြီး အမြုတေဖြစ်တည်ခြင်းအဆင့်ကို ရောက်လာပါ့မလဲ" လုယွမ်က ခပ်ပြုံးပြုံးဖြင့် ဆိုသည်။

​အကယ်၍ သူသာ ယခုအချိန်တွင် သူ၏ ဝိညာဉ်အသွင်ပြောင်းလဲခြင်းအဆင့် ခွန်အားကို ထုတ်ပြလိုက်ပါက... ဤတောင်ထိပ်သခင်သည် ထိုနေရာတင် သူ့ကို ချက်ချင်း ဦးညွှတ်ရပေလိမ့်မည်။

​"လွန်ခဲ့တဲ့ ရက်အနည်းငယ်ကမှ မင်းက အခြေခံတည်ဆောက်ခြင်းအဆင့် မှာပဲ ရှိသေးတာ... အခုတော့ အမြုတေစုစည်းခြင်းအဆင့် ကို ကျော်ဖြတ်ပြီး အမြုတေဖြစ်တည်ခြင်းအဆင့်ကို တိုက်ရိုက် ရောက်သွားတာပဲ… မင်း တစ်စုံတခုသော မိစ္ဆာကျင့်စဉ်တွေကို ကျင့်ကြံထားတာများလား" မုချန်က နှာခေါင်းရှုံ့လိုက်သော်လည်း လုယွမ်၏ ခန္ဓာကိုယ်ပေါ်တွင် မည်သည့် မိစ္ဆာကျင့်စဉ် အငွေ့အသက်မျှကိုမူ ရှာမတွေ့ခဲ့ချေ။

​"တောင်ထိပ်သခင်... ကျွန်တော့်လို ဒီလောက် လျင်မြန်စွာ အဆင့်တက်နိုင်တဲ့ မိစ္ဆာကျင့်စဉ်မျိုး လူကြီးမင်း မြင်ဖူးလို့လား" လုယွမ်က အသာအယာ ရယ်မောရင်း... ဂိုဏ်းဘိုးဘေး ပေးထားသည့် ကျောက်စိမ်းပြားကို ထုတ်ပြလိုက်သည်။ "တောင်ထိပ်သခင်... ကျေးဇူးပြုပြီး ဒါကို ကြည့်ပေးပါဦး"

​ထိုကျောက်စိမ်းပြား ပေါ်လာသည့်အခါ မုချန် ချက်ချင်းပင် ထိတ်လန့်သွားရသည်။ "ဒါက တကယ့်ကို ဂိုဏ်းဘိုးဘေးကြီးရဲ့ အမှတ်အသား ကျောက်စိမ်းပြားပဲ"

​"ဟုတ်ပါတယ်... ကျွန်တော် ဂိုဏ်းဘိုးဘေးကြီးရဲ့ လမ်းညွှန်မှုကို ရရှိခဲ့လို့ ဒီလို လျင်မြန်စွာ အဆင့်တက်လှမ်းနိုင်ခဲ့တာပါ။ ကျွန်တော် ပင်မတောင်ထိပ်ကို သွားတာကလည်း ဂိုဏ်းချုပ်ဆီကနေ ကျင့်ကြံခြင်းဆိုင်ရာ လမ်းညွှန်မှုတွေကို သွားရောက် တောင်းခံဖို့ပါ..." လုယွမ်က ခေါင်းညိတ်ပြုံးရွှင်လျက် ဆိုသည်။

​"ဒီလိုဆိုရင်တော့ ငါ စိတ်အေးရတာပေါ့" မုချန်၏ လေသံနှင့် အမူအရာမှာ သိသာထင်ရှားစွာ ပျော့ပြောင်းသွားခဲ့သည်။ ဤကျောက်စိမ်းပြားကို ပိုင်ဆိုင်ထားခြင်းက ဂိုဏ်းဘိုးဘေးကြီးကိုယ်တိုင် သူ့ကို အထူးတန်ဖိုးထားကြောင်း သက်သေပြနေခြင်း ဖြစ်သည်။

​"တောင်ထိပ်သခင်... လူကြီးမင်း ရောက်လာတုန်း... ကျွန်တော့်ကို ဆေးလုံးဖော်စပ်ခြင်း အတတ်ပညာအချို့ လမ်းညွှန်ပေးလို့ ရမလား" လုယွမ်က ပြုံး၍ မေးလိုက်သည်။

​"ငါ ဒီနေ့လာတာကလည်း တစ်စိတ်တစ်ပိုင်းအနေနဲ့ မင်းကို ဆေးလုံးဖော်စပ်ခြင်းအကြောင်း လမ်းညွှန်ပေးဖို့ပါပဲ" မုချန် ခေါင်းညိတ်လိုက်သည်။ 

ဘာပဲဖြစ်ဖြစ် သူ၏ သမီးဖြစ်သူက မထွက်ခွာမီတွင် အချိန်ရပါက လုယွမ်ကို လမ်းညွှန်ပေးရန် အထူးမှာကြားခဲ့ခြင်းကြောင့် ဖြစ်သည်။ ဖခင်တစ်ဦးအနေဖြင့် သူ သေချာပေါက် လုပ်ဆောင်ပေးရမည် ဖြစ်သည်။

​"တောင်ထိပ်သခင်ကို ကျေးဇူးအများကြီး တင်ပါတယ်" လုယွမ် ဝမ်းသာအားရ ဆိုလိုက်သည်။

​နောက်ထပ် တစ်နာရီခွဲခန့် အချိန်အတွင်းမှာပင်... မုချန်၏ လမ်းညွှန်မှုကြောင့် လုယွမ်သည် ဆေးလုံးဖော်စပ်ခြင်းအတတ်ပညာ၏ အခြေခံသဘောတရားများကို ယေဘုယျအားဖြင့် နားလည်သဘောပေါက်သွားခဲ့သည်။

​ထိုအချိန်အတွင်းမှာပင် လုယွမ်သည် မုချန်ကို တိုက်ရိုက် ထိတွေ့လိုက်သည်။

​【မုချန် 】

【အမျိုးသား】

【ကောင်းကင်မြစ်ဂိုဏ်း၏ ဒန်ရှတောင်ထိပ် သခင်】

【နတ်ဝိညာဉ်အဆင့် နှောင်းပိုင်း (ကူးယူနိုင်သည်)】

【အဆင့်ရှစ် ဆေးလုံးဆရာသခင် (ကူးယူနိုင်သည်)】

【ကျင့်စဉ် - ...】

【...】

​"အဆင့်ရှစ် ဆေးလုံးဆရာသခင်ကို ကူးယူစမ်း" လုယွမ် စိတ်ထဲမှ ခပ်သွက်သွက် ရွတ်ဆိုလိုက်သည်။

​【ကူးယူခြင်း အောင်မြင်ပါသည်】

【ကူးထည့်နေပါသည်】

【ကူးထည့်ခြင်း ပြီးဆုံးပါပြီ။ ဂုဏ်ယူပါသည်... သင်သည် အဆင့်ရှစ် ဆေးလုံးဆရာသခင် တစ်ဦး ဖြစ်လာပါပြီ】

​ထိုအချိန်အတွင်းမှာပင် အချိန်များ ရပ်တန့်သွားသကဲ့သို့ ခံစားလိုက်ရသည်။ လုယွမ်သည် မိမိကိုယ်ကိုယ် တစ်စုံတခုသော မြင့်မြတ်ခြင်းနှင့် ပြောင်းလဲခြင်းအသွင်သို့ ကူးပြောင်းသွားသကဲ့သို့ ခံစားလိုက်ရသည်။

​မုချန် လမ်းညွှန်မှုပေးပြီး ထွက်ခွာသွားပြီးနောက်... လုယွမ်သည် အမျိုးမျိုးသော ဝိညာဉ်ဆေးပင်များကို ချက်ချင်း ကောက်ယူလိုက်ပြီး ဆေးလုံးများကို စတင်ဖော်စပ်တော့သည်။ 

အဆင့်ရှစ် ဆေးလုံးဆရာသခင်၏ စွမ်းရည်ဖြင့် ဤဆေးလုံးများကို ဖော်စပ်ရခြင်းမှာ အလွန်ပင် လွယ်ကူလှရာ... သူဖော်စပ်လိုက်သည့် ဆေးလုံးအချို့၏ အရည်အသွေးမှာ တစ်လုံးချင်းစီတိုင်း နီးပါး ပြီးပြည့်စုံနေခဲ့သည်။

​"အဆင့်ရှစ် ဆေးလုံးဆရာသခင်ရဲ့ စွမ်းရည်က အဆင့်ခြောက် ဆရာသခင်နဲ့ ယှဉ်ရင် တကယ်ကို ကောင်းကင်နဲ့ မြေကြီးလို ကွာခြားတာပဲ" လုယွမ် ရေရွတ်ကာ အံ့ဩမိရသည်။

​သူသည် ယခုအခါ အစွမ်းထက်ဆုံး ဆေးလုံးဆရာသခင်၏ စွမ်းရည်ကို အောင်မြင်စွာ ကူးယူပြီး ဖြစ်သည်။

​"လက်နက်သွန်းလုပ်သူတွေနဲ့ မန္တန်အစီအရင် ဆရာသခင်တွေအတွက်လည်း ကောင်းကင်မြစ်ဂိုဏ်းမှာ သက်ဆိုင်ရာ တောင်ထိပ်တွေ ရှိကြပြီး... ထိုတောင်ထိပ်နှစ်ခုလုံးရဲ့ တောင်ထိပ်သခင်တွေကလည်း အလွန်မြင့်မားတဲ့ အောင်မြင်မှုတွေ ရှိကြတာပဲ" လုယွမ်က ဖြည်းဖြည်းချင်း ခေါင်းညိတ်လိုက်သည်။

​နောက်ရက်အနည်းငယ်အတွင်း သူသည် လက်နက်သွန်းလုပ်ခြင်းတောင်ထိပ်နှင့် မန္တန်အစီအရင်တောင်ထိပ်တို့ဆီသို့ သွားရောက်လည်ပတ်ရပေဦးမည်။

​လုယွမ် မိမိ၏ ခြံဝန်းအတွင်းသို့ ပြန်လာခဲ့ပြီး ကုလားထိုင်ပေါ်တွင် ဆက်လက်လဲလျောင်းကာ စာအုပ်တစ်အုပ်ကို ဖတ်ရှုရင်း အပန်းဖြေနေခဲ့သည်။

 "အခု ငါ့ဘေးနားမှာ အစေခံမိန်းကလေးတစ်ယောက်သာ ရှိရင် သိပ်ကောင်းမှာပဲ…ငါ့ရဲ့ ကျင့်ကြံခြင်းနယ်ပယ်နဲ့ဆိုရင် အစေခံတစ်ယောက် ဘေးနားမှာ ထားပြီး ပြုစုခိုင်းတာက လုံးဝ ပုံမှန်ကိစ္စပဲ မဟုတ်လား"

​အခြားတစ်ဖက်တွင်မူ... မုချန်သည် ပင်မတောင်ထိပ်၏ ဂိုဏ်းချုပ်ခန်းမဆီသို့ တိုက်ရိုက် သွားရောက်ခဲ့သည်။

​ဂိုဏ်းချုပ် လော့ချီဖုန်းသည် မုချန် ရောက်ရှိလာသည်ကို မြင်လျှင် မပြုံးဘဲ မနေနိုင်ခဲ့ချေ။ "တောင်ထိပ်သခင် မု... ဒီနေ့ ဘယ်လိုကိစ္စမျိုးကြောင့် ဒီကို ရောက်လာရတာလဲ"

​"ဂိုဏ်းချုပ်... ကျွန်တော် လုယွမ်အကြောင်း မေးချင်လို့ပါ" မုချန်က တိုက်ရိုက်ပင် မေးမြန်းလိုက်သည်။ "သူက ဂိုဏ်းဘိုးဘေးကြီးရဲ့ ကျောက်စိမ်းပြားကို တကယ်တော့ ဘယ်လိုမျိုး ရရှိခဲ့တာလဲ"

​"တကယ်တော့ ငါလည်း အများကြီး မသိခဲ့ရပါဘူး" လော့ချီဖုန်းက ခေါင်းယမ်းလိုက်သည်။ 

"ငါသိတာကတော့ လုယွမ်က ဂိုဏ်းဘိုးဘေးကြီးကိုယ်တိုင် အထူးတန်ဖိုးထားတဲ့ လူတစ်ယောက်ပဲ။ ဂိုဏ်းဘိုးဘေးကြီးက ပြောတယ်... ငါတို့ ကောင်းကင်မြစ်ဂိုဏ်းရဲ့ အနာဂတ်က လုယွမ်နဲ့ များစွာ ဆက်စပ်နေတယ်တဲ့"

​"ငါ သူ့ကို 'ဓားထိန်း နတ်မိုးကြိုး'  ဓားကျင့်စဉ်ကိုတောင် သင်ကြားပေးခဲ့သေးတယ်"

​၎င်းကို ကြားရလျှင် မုချန် လုံးဝ တုန်လှုပ်ခြောက်ခြားသွားခဲ့သည်။ သူသည် ဓားထိန်းချုပ်ခြင်း မိုးကြိုးနတ်ဘုရားစွမ်းရည်၏ အဓိပ္ပာယ်ကို ရှင်းလင်းစွာ နားလည်ထားခြင်းကြောင့် ဖြစ်သည်။

​"ဂိုဏ်းဘိုးဘေးကြီးက သူ့ကို တကယ်ပဲ အဲ့ဒီလောက်အထိ တန်ဖိုးထားတာလား" မုချန် မမေးဘဲ မနေနိုင်အောင် ဖြစ်နေရဆဲ ဖြစ်သည်။

​"တောင်ထိပ်သခင် မု... ဂိုဏ်းဘိုးဘေးကြီးရဲ့ ဆုံးဖြတ်ချက်တွေက ဘယ်တုန်းကမှ မမှားခဲ့ဖူးဘူးဆိုတာ မင်းလည်း သိတာပဲ.. ငါတို့ အခုလောလောဆယ် နားမလည်နိုင်ပေမဲ့ နောင်ကျရင် နားလည်လာလိမ့်မယ်" လော့ချီဖုန်းက တည်ငြိမ်စွာ ဆိုသည်။ 

"ငါတို့ ဂိုဏ်းဘိုးဘေးကြီး ပြောတဲ့အတိုင်း လုပ်ဆောင်ဖို့ပဲ လိုအပ်တာပါ"

​"ကောင်းပါပြီ... ဒီလိုဆိုရင်တော့ ကျွန်တော် ဂိုဏ်းဘိုးဘေးကြီးကို ယုံကြည်ပါတယ်" မုချန် ခေါင်းညိတ်လိုက်လေတော့သည်။