​အခန်း (၁၄) - ဝိညာဉ်အသွင်ပြောင်းလဲခြင်းအဆင့်၏ ထိတ်လန့်ဖွယ်ရာအစွမ်း

​တောက်ဒီကျွင်း ကျင့်စဉ်။

​လုယွမ်၏ ဒီစာသားတွေက အရင်ဘ၀က ‘တာအို’ စာအုပ်မှ ဖြစ်ပြီး သူ အလွတ်ရနေပြီးသားဖြစ်သည်။ 

ဘယ်လိုပင်ဖြစ်စေ ဤကျင့်ကြံခြင်းကမ္ဘာတွင် 'တောက်ဒီကျွင်းကျင့်စဉ်' ဟူ၍ မရှိပေ။ တာအို စာအုပ်၏ အကြောင်းအရာများ ဖြစ်သဖြင့် ကြားလိုက်ရရုံမျှဖြင့်ပင် လူတိုင်းက အလွန်နက်နဲသည်ဟု ခံစားရရန် လုံလောက်လှသည်။

​မျှော်လင့်ထားသည့်အတိုင်းပင် ယန်လင်းယွဲ့သည် ထိုစကားများကို ကြားပြီးနောက် သိသိသာသာ စိတ်လှုပ်ရှားသွားသည်။

​"လူသည် မြေကြီးကို အတုယူ၏... မြေကြီးသည် ကောင်းကင်ကို အတုယူ၏... ကောင်းကင်သည် 'တာအို’ကို အတုယူ၏... တာအို သည် သဘာဝတရားနိယာမများကို အတုယူ၏" လုယွမ်က နောက်ဆုံးစာကြောင်းကို ရွတ်ဆိုပြီးနောက် ဆက်ပြောလိုက်သည်။ 

"ကဲ... ဒီနေ့အတွက်တော့ ဒါပါပဲ ငါရွတ်ပြလိုက်တာတွေက မင်းကျင့်ကြံဖို့အတွက် လုံလောက်နေပါပြီ"

​"ဒါကို မင်း ဘယ်လောက်အထိ နားလည်သဘောပေါက်မလဲ ဆိုတာကတော့ မင်းရဲ့ ကံတရားအပေါ်မှာပဲ မူတည်တယ်"

​ဤအချိန်တွင် လုယွမ်၏ ပုံစံမှာ တကယ့်နတ်ဘုရားအစစ်တစ်ပါးကဲ့သို့ပင် ဖြစ်နေသည်။ ဟန်ဆောင်မှတော့ အထက်ဆီးကနေရတာပေါ့။ (ငါ/မင်း)လို့ သုံးလိုက်ပြီ။

​"ကျေးဇူးတင်ပါတယ် နတ်ဘုရားကြီး" ယန်လင်းယွဲ့မှာ အလွန်ပင် စိတ်လှုပ်ရှားနေသည်…သူသည် လုယွမ်ရွတ်ဆိုပြသမျှကို စာလုံးတစ်လုံးမကျန် အလွတ်မှတ်သားထားလိုက်သည်။

​သူ၏အမြင်တွင်တော့ 'တာအို’ဆိုသည်မှာ ရှာဖွေရန် ခက်ခဲလှသည်။ ယခု လုယွမ်ပေးသော နည်းလမ်းမှာ တာအို လမ်းစဉ်ဆီသို့ တိုက်ရိုက်ဦးတည်နေသည်။ 

၎င်းကိုသာ အောင်မြင်စွာ ဆင်ခြင်ကျင့်ကြံနိုင်ပါက သူ၏နောင်လာမည့် ကျင့်ကြံမှုအဆင့်မှာ အသစ်အဆန်းဖြစ်သော အမြင့်တစ်ခုသို့ ရောက်ရှိသွားမည်မှာ သေချာသည်။

​ထို့အပြင် ဤကျင့်စဉ်တွင် အကြောင်းအရာများစွာ ကျန်ရှိနေသေးပုံရပြီး ၎င်းတို့ကိုသာ အကုန်တတ်မြောက်ပါက နောင်တွင် နတ်ဘုရားဘုံသို့ တက်လှမ်းနိုင်ရန် အခွင့်အလမ်း အများကြီး ရှိနေသည်။

​၎င်းအပြင် လုယွမ်ရွတ်ပြသော စာသားများကို ကြားလိုက်ရုံမျှဖြင့်ပင် သူ၏ကျင့်ကြံမှုနယ်ပယ်မှာ အနည်းငယ် လှုပ်ခတ်သွားသလို ခံစားလိုက်ရသည်။ 

ဤသို့ ကျင့်ကြံမှုအဆင့်၏ အချုပ်အနှောင်များ လျော့ရဲသွားသည့် ခံစားချက်မျိုးကို သူ မခံစားရသည်မှာ အလွန်ကြာလှပြီ ဖြစ်သည်။

​"မလိုပါဘူး" လုယွမ်က ခေါင်းညိမ့်ပြလိုက်ရင်း စိတ်ထဲမှ သက်ပြင်းချလိုက်မိသည်။

​ကြည့်ရတာ 'တောက်ဒီကျွင်းကျင့်စဉ်' က သူ့ကို လုံးဝကို အံ့အားသင့်သွားစေပုံရသည်။ သူသည် နတ်ဘုရားလူဝင်စား ဖြစ်သည်ဆိုသောအချက်မှာလည်း အခိုင်အမာ ဖြစ်သွားပြီ ဖြစ်သည်။

​"ဒါနဲ့... ငါ့ရဲ့ အကြောင်းတွေကို တခြားသူတွေကို အခုလောလောဆယ် မပြောနဲ့ဦး" လုယွမ်က မှာကြားလိုက်သည်။

​"စိတ်ချပါ " ယန်လင်းယွဲ့က ကတိပေးသည်။

​"ကောင်းပြီ... ဒါဆို ငါပြန်တော့မယ်" လုယွမ်က လက်ဝှေ့ယမ်းပြလိုက်သည်။

​စနစ်၏ လုပ်ဆောင်ချက်က အသစ် ဖြစ်ရန် နှစ်ရက် လိုသေးသည်။ သို့မဟုတ်ပါက ယန်လင်းယွဲ့ဆီမှာ ရှိသမျှ အစွမ်းထက်သော ကျင့်စဉ်နှင့် တန်ခိုးစွမ်းအားအားလုံးကို သူ ကူးယူပစ်ချင်နေမိသည်။

​"ကျွန်တော် လိုက်ပို့ပါရစေ" ယန်လင်းယွဲ့က ဆိုသည်။

​"မလိုပါဘူး... ငါက ဒီလို အဆောင်အယောင်တွေကို ဂရုမစိုက်ဘူး" လုယွမ်က လက်ကာပြလိုက်ပြီး လှည့်ထွက်လာခဲ့သည်။

​လုယွမ်၏ ကျောပြင် ပျောက်ကွယ်သွားသည်အထိ ကြည့်နေရင်း ယန်လင်းယွဲ့သည် သက်ပြင်းကို အကြိမ်ကြိမ် ချလိုက်မိသည်။ 

"ငါတို့ ကောင်းကင်မြစ်ဂိုဏ်းကနေ နတ်ဘုရားတစ်ပါး ထွက်ပေါ်လာလိမ့်မယ်လို့ မထင်ထားခဲ့ဘူး…ဒါဟာ တကယ့်ကို ကံကောင်းခြင်းကြီးပဲ"

​သူသည် လက်ကို တစ်ချက် ဝှေ့ယမ်းလိုက်ရာ ဟင်းလင်းပြင် တစ်ခု ပွင့်ထွက်သွားသည်။ ထို့နောက် သူသည် ထိုအထဲသို့ လှမ်းဝင်သွားတော့သည်။

​ယန်လင်းယွဲ့ ပြန်လည်ပေါ်ထွက်လာသည့်အခါ သူသည် ဂိုဏ်းချုပ်၏ နန်းဆောင်ထဲသို့ ရောက်နေပြီ ဖြစ်သည်။ 

ထိုအချိန်တွင် ဂိုဏ်း၏ ကိစ္စရပ်များကို စစ်ဆေးနေသော ဂိုဏ်းချုပ် 'လော့ချီဖုန်း' သည် ယန်လင်းယွဲ့ကို မြင်သည်နှင့် ချက်ချင်း ထရပ်ကာ ရိုသေစွာ ဂါရဝပြုလိုက်သည်။ 

"ဘိုးဘေးကြီး... ဘာများ အကြောင်းထူးလို့ ဒီကို ကြွလာတာပါလဲ "

​"ထိုင်ပါဦး..."

​"မလိုဘူး" ယန်လင်းယွဲ့က လက်ကာပြလိုက်သည်။ 

"ငါ ဒီကိုလာတာက ငါ ကျင့်ကြံဖို့အတွက် တံခါးပိတ် တော့မယ်ဆိုတာ ပြောဖို့ပဲ… ဝမ်လင်မျှော်စင်အတွက်တော့ တခြားအကြီးအကဲ တစ်ယောက်ကို လွှတ်ပြီး စောင့်ခိုင်းလိုက်တော့"

​"ဂုဏ်ယူပါတယ် ဘိုးဘေးကြီး" လော့ချီဖုန်းက စိတ်လှုပ်ရှားစွာ ပြောသည်။ "ဘိုးဘေးကြီးက ဝိညာဉ်အသွင်ပြောင်းလဲခြင်း အလယ်အလတ်အဆင့်ကို ရောက်နေပြီဆိုတော့ ဒီတစ်ခါ တရားအားထုတ်ပြီးရင် ကျွန်တော်တို့ ဂိုဏ်းမှာ အဆင့်မြင့် ဝိညာဉ်အသွင်ပြောင်းလဲခြင်း ပညာရှင်ကြီးတစ်ယောက် ရှိလာတော့မှာပေါ့"

​"ဒါက မတော်တဆ ရလာတဲ့ ကံကောင်းမှုတစ်ခုပါပဲ" ယန်လင်းယွဲ့က တည်ငြိမ်စွာ ဆိုသည်။ 

"ဒါနဲ့ နောက်ထပ် ကိစ္စတစ်ခု ရှိသေးတယ်။ ဒန်ရှတောင်က လုယွမ်ကို ငါ့ရဲ့ တံဆိပ်ပြား ပေးထားတယ်…နောက်ဆိုရင် သူ ဂိုဏ်းထဲမှာ ဘာပဲလုပ်လုပ် သူ့ကို အပြည့်အဝ ပူးပေါင်းဆောင်ရွက်ပေးလိုက်…သူ ဘာလိုချင်လဲ... ဂိုဏ်းမှာ ရှိရင် ပေးလိုက်... မရှိရင်လည်း လူလွှတ်ပြီး ရှာပေးလိုက်"

​"ဟမ်" လော့ချီဖုန်းမှာ ချက်ချင်းပင် ကြောင်အသွားပြီး ဤကိစ္စကို လုံးဝ နားမလည်နိုင် ဖြစ်သွားသည်။

​သူ လုယွမ်ကို သိသည်။ မုချင်းရွှယ် တပည့်လက်ခံလိုက်ခြင်းမှာ ဂိုဏ်းအတွက် ကိစ္စကြီးတစ်ခု ဖြစ်ရာ ဂိုဏ်းချုပ်အနေဖြင့် သူ သိထားခြင်း ဖြစ်သည်။ ဤလုယွမ်ဆိုသူမှာ မုချင်းရွှယ်၏ တပည့်ဖြစ်ကြောင်း သူ နားလည်ထားသည်။

​"ဘိုးဘေးကြီး... ဒီလုယွမ်မှာ ဘာများ ထူးခြားတာ ရှိလို့ပါလဲ " လော့ချီဖုန်းက စပ်စုလိုက်သည်။

​"အခုလောလောဆယ် ငါ မင်းကို မပြောနိုင်တဲ့ အကြောင်းအရာတွေ ရှိတယ်။ အတိုချုပ်ပြောရရင် ဒါဟာ ကောင်းကင်မြစ်ဂိုဏ်းရဲ့ အကျိုးအတွက်ဆိုတာ မင်း နားလည်ထားဖို့ပဲ လိုတယ်… နောင် အချိန်တန်ရင် မင်း သိလာလိမ့်မယ်" ယန်လင်းယွဲ့က ဆိုသည်။

​"နားလည်ပါပြီ ဘိုးဘေးကြီး… ဘိုးဘေးကြီးရဲ့ အမိန့်အတိုင်း ကျွန်တော် ချက်ချင်း စီစဉ်လိုက်ပါ့မယ်" လော့ချီဖုန်းက ရိုသေစွာ ပြန်ဖြေသည်။

​"ဒါဆိုရင်တော့ ငါ စိတ်ချလက်ချနဲ့ တံခါးပိတ်ကျင့်ကြံလို့ ရပြီ" ယန်လင်းယွဲ့သည် စကားအဆုံးတွင် ဟင်းလင်းပြင်ကို ထပ်မံ ဖောက်ခွဲလိုက်ပြီး ပျောက်ကွယ်သွားတော့သည်..  သူသည် တရားအားထုတ်ရန် တရားဝင် စတင်လိုက်ပြီ ဖြစ်သည်။

​ဂိုဏ်းချုပ် လော့ချီဖုန်းမှာမူ နန်းဆောင်အပြင်ဘက်သို့ ပျံထွက်လာခဲ့ပြီး ဆေးဖော်စပ်ရာတောင် ရှိသည့်ဘက်သို့ လှမ်းကြည့်လိုက်မိသည်။

‘ဒီလုယွမ်မှာ ဘာတွေရှိနေလို့ ဘိုးဘေးကြီးက ဒီလောက်အထိ အရေးတယူ လုပ်နေရတာလဲ... ကဲပါ ဘာပဲဖြစ်ဖြစ် ဘိုးဘေးကြီးရဲ့ ဆုံးဖြတ်ချက်က အမြဲတမ်း မှန်ကန်နေတာပဲ… ငါကတော့ ခိုင်းတဲ့အတိုင်း လုပ်ရမှာပဲ’

​...

​အခြားတစ်ဖက်တွင်မူ လုယွမ်သည် ကောင်းကင်မြစ်ဂိုဏ်း အပြင်ဘက်သို့ တိတ်တဆိတ် ပျံထွက်လာခဲ့သည်။ သူ၏ ကျင့်ကြံမှုအဆင့်မှာ ဝိညာဉ်အသွင်ပြောင်းလဲခြင်းအဆင့်သို့ ရောက်နေပြီဖြစ်ရာ ဓားပျံကို အားကိုးစရာ မလိုတော့ဘဲ လေထဲတွင် တိုက်ရိုက် ပျံသန်းနိုင်သည်။

​ဤသို့ ပျံသန်းရသည့် ခံစားချက်မှာ ပို၍ပင် ရင်ဖိုစရာ ကောင်းလှသည်။ သူသည် ဟင်းလင်းပြင်ကို ခဏတာ ဖောက်ခွဲပြီး ခရီးသွားကြည့်ရာ ဤနည်းလမ်းမှာ ပို၍ပင် လျင်မြန်သေးသည်။ ဟင်းလင်းပြင်ကို ဖောက်ခွဲခြင်းမှာ ဝိညာဉ်အသွင်ပြောင်းလဲခြင်းအဆင့်သို့ ရောက်လျှင် အလိုအလျောက် တတ်မြောက်သွားသော အတတ်ဖြစ်သည်။

​"တကယ်ကို အမိုက်စားပဲ" လုယွမ်သည် ကောင်းကင်နှင့် မြေကြီးကြားတွင် ပျံဝဲနေသည်။ ခဏတာတော့ သူသည် နတ်ဘုရားစစ်စစ် တစ်ပါးကဲ့သို့ ခံစားနေရသည်။ လူသားများနေထိုင်ရာ ရွာတစ်ရွာကို ဖြတ်ပျံသွားသည့်အခါ ထိုလူသားများက လုယွမ်ကို ကောင်းကင်တွင် မြင်တွေ့ရပြီး "နတ်ဘုရားကြီးကို ဂါရဝပြုပါတယ်" ဟု အော်ဟစ်ကာ ဝတ်ပြုကြသည်။

​သာမန်လူသားများအတွက်တော့ ကောင်းကင်တွင် ပျံသန်းနိုင်သော ကျင့်ကြံသူမှာ 'နတ်ဘုရား' ပင် ဖြစ်သည်။

​တောင်တန်းတစ်ခုပေါ်မှ ပျံသန်းနေစဉ် လုယွမ်သည် 'သံချပ်ကာဝက်ဝံ'  ဆိုသည့် မိစ္ဆာသားရဲတစ်ကောင်ကို တွေ့လိုက်ရသည်။ 

ဤဝက်ဝံမှာ အလွန်မာကျောသော အနက်ရောင် အကြေးခွံများဖြင့် ဖုံးအုပ်ထားသည်။ သာမန်လက်နက်များဖြင့် ၎င်းကို အနည်းငယ်မျှပင် ဒဏ်ရာမပေးနိုင်ပေ။ ထို့ကြောင့်လည်း ဤအမည်ကို ရခြင်းဖြစ်သည်။ ၎င်းအပြင် ၎င်း၏ လက်သည်းများမှာလည်း အလွန်ထက်လှသည်။

​ဤဝက်ဝံမှာ ချီသန့်စင်ခြင်း နဝမအဆင့်ရှိရာ ထိုအဆင့်ရှိ သားရဲများထဲတွင် အစွမ်းထက်ဆုံးဟု ဆိုနိုင်သည်။ ချီသန့်စင်ခြင်းအဆင့် ကျင့်ကြံသူအချို့မှာ ဤဝက်ဝံကို မြင်လျှင် ချက်ချင်းပင် ထွက်ပြေးကြပြီး တိုက်ခိုက်ရန်ပင် မဝံ့ရဲကြပေ။

​ဝုန်း…

​သံချပ်ကာဝက်ဝံသည် ကောင်းကင်ရှိ လုယွမ်ကို မြင်သည်နှင့် ကျယ်လောင်စွာ ဟိန်းဟောက်လိုက်သည်။ ၎င်း၏ မျက်လုံးများမှာ သွေးရောင်ကဲ့သို့ ရဲရဲနီနေသည်။

​"ခရမ်းရောင်မီးလျှံအတတ်"

​လုယွမ်က လက်ညှိုးကို ဝှေ့ယမ်းလိုက်ရာ ခရမ်းရောင်မီးလျှံတစ်ခု ဖြစ်ပေါ်လာသည်။

​ရှူး...

​ခရမ်းရောင်မီးလျှံမှာ အောက်သို့ အဟုန်ဖြင့် ပစ်ဆင်းသွားသည်။ မျက်စိတစ်မှိတ်အတွင်းမှာပင် မီးလျှံသည် သံချပ်ကာဝက်ဝံကို ဝါးမြိုသွားတော့သည်။

​ဝုန်း…

​ကြီးမားသော ပေါက်ကွဲသံကြီးမှာ ကောင်းကင်နှင့် မြေကြီးကို တုန်ဟည်းသွားစေသည်။ ဖုန်မှုန့်များ ငြိမ်သက်သွားသည့်အခါ အောက်ခြေတွင် အချင်း မီတာတစ်ရာခန့် ကျယ်ပြီး မီတာပေါင်းများစွာ နက်သော တွင်းကြီးတစ်ခု ဖြစ်ပေါ်နေသည်ကို မြင်ရသည်။

​သံချပ်ကာဝက်ဝံမှာမူ အစအနပင် မကျန်တော့ဘဲ ပျောက်ကွယ်သွားပြီ ဖြစ်သည်။ ဤဝက်ဝံမှာ သူ မည်မျှ ကြောက်မက်ဖွယ်ကောင်းသော ဖြစ်တည်မှုကို သွားရောက် ရန်စမိသည်ကို သိပင် သိသွားလိမ့်မည် မဟုတ်ပေ။

​"ငါ့ရဲ့ ဒီတိုက်ကွက်က ကြက်သတ်ဖို့ အမြှောက် သုံးလိုက်သလို ဖြစ်နေပြီ..." လုယွမ်က အသာအယာ ရယ်လိုက်သည်။ သူ၏ ပေါ့ပေါ့ပါးပါး တိုက်ကွက်တစ်ခုကပင် ဤမျှ စွမ်းအားကြီးလိမ့်မည်ဟု သူ မထင်ထားခဲ့ပေ။

​ဝိညာဉ်အသွင်ပြောင်းလဲခြင်းအဆင့်၏ စွမ်းအားမှာ တကယ့်ကို ကြောက်မက်ဖွယ်ကောင်းလှသည်ဟု ဆိုရပေမည်။