အခန်း ၁၀၄ ... လွတ်မြောက်ခြင်းအဆင့် အစောပိုင်းသို့ ရောက်ရှိခြင်း
【ကျင့်ကြံခြင်းအဆင့်ကို ကူးယူခြင်း အောင်မြင်ပါသည်】
စနစ်၏ အသိပေးချက် ထွက်ပေါ်လာခဲ့သည်နှင့်တစ်ပြိုင်နက် လုယွမ်က ပျော်ရွှင်လှသည့် အပြုံးတစ်ခုကို ပြသလိုက်ရင်း သူ့စိတ်ထဲကနေ တိုးတိုးလေး တွေးလိုက်ပါသည် ... "ကူးထည့်ခြင်းကို စတင်လိုက်တော့"
【ကူးထည့်ခြင်းကို ဆောင်ရွက်နေပါသည်...】
【ဂုဏ်ယူပါသည်... သင်၏ လွတ်မြောက်ခြင်းအဆင့် အစောပိုင်းကျင့်ကြံခြင်းအဆင့်ကို ကူးထည့်ခြင်း ပြီးဆုံးသွားခဲ့ပါပြီ】
သူ၏ ကျင့်ကြံခြင်းအဆင့်သည် စက္ကန့်ပိုင်းအတွင်းမှာ တင် လွတ်မြောက်ခြင်းအဆင့် အစောပိုင်းသို့ ရောက်ရှိသွားခဲ့ရပါသည်။
ဒီလိုမျိုး ခံစားချက်က လုယွမ်ကို သဘာဝကျကျပဲ လန်းဆန်းတက်ကြွသည့် ခံစားချက်မျိုးကို ပေးစွမ်းခဲ့သည်။
သူက မျက်လုံးများကို ဖွင့်လိုက်သည်။
လုယွမ်က ပတ်ဝန်းကျင်ကို ထပ်မံပြီး လှည့်ပတ်ကြည့်ရှုလိုက်ပြန်သည်။
ဒါဟာ သူ့မျက်စိအရှေ့က အရာအားလုံးသည် ကြီးမားလှသည့် ပြောင်းလဲမှုတစ်ခု ဖြစ်ပေါ်သွားခဲ့ရသလိုမျိုး ဖြစ်နေခဲ့သည်။
အရင်တုန်းက သူ သတိမထားမိခဲ့သည့် အရာများကိုလည်း အခုအချိန်မှာ အထင်အရှား မြင်တွေ့နိုင်ခဲ့ပြီ ဖြစ်သည်။
သူ၏ ကျင့်ကြံခြင်းအဆင့်က လွတ်မြောက်ခြင်းအဆင့်သို့ ရောက်ရှိသွားခဲ့ပြီးနောက်တွင် သူ၏ ခန္ဓာကိုယ်တစ်ခုလုံးသည်လည်း အပြည့်အဝ သန့်စင်သွားခဲ့ရသလိုမျိုး ဖြစ်သွားခဲ့ရသည်။
ဘေးနားမှာ ရှိနေခဲ့သည့် စုဝမ်ချင်းသည်လည်း လုယွမ်၏ အရှိန်အဝါများသည် ပိုမို အားကောင်းလာခဲ့ရသည်ကို အထင်အရှား ခံစားသိရှိလိုက်ရပါသည်။
"သခင်လေး... သခင်လေးက အဆင့်တစ်ခုကို ထိုးဖောက်အောင်မြင်သွားခဲ့တာလားဟင်" စုဝမ်ချင်းက မနေနိုင်ဘဲ သိချင်စိတ်ဖြင့် မေးမြန်းခဲ့ပါသည်။
"အင်း... အဲလိုပြောလို့လည်း ရတာပေါ့" လုယွမ်က အနည်းငယ် ခေါင်းညိမ့်ပြလိုက်ပါသည်။
"နောက်ပိုင်းကျရင် တို့တွေ ဒီနေရာမှာ နောက်ထပ် နှစ်ရက်လောက် ဆက်ပြီး နေကြဦးမယ်" ဟု လုယွမ်က ဆက်ပြောခဲ့ပါသည်။
"နားလည်ပါပြီ" စုဝမ်ချင်းက ခေါင်းညိမ့်လိုက်သည်... ထို့နောက်တွင်တော့ စူးစမ်းချင်စိတ်ဖြင့် ထပ်မံမေးမြန်းခဲ့ပါသည် ... "သခင်လေး... အဲဒီစီနီယာက တို့တွေကို အောက်ခြေက အဆင့်မြင့် ဝိညာဉ်ကြောထဲ ဝင်ပြီး ဝိညာဉ်ကျောက်တုံးတွေ တူးဖော်လို့ ရတယ်လို့ ပြောခဲ့တယ်မဟုတ်လား... ကျွန်မတို့တွေ မသွားကြတော့ဘူးလားဟင်"
သူတို့၏ လက်ရှိအင်အားနှင့်ဆိုလျှင် အချိန်တိုလေးအတွင်းမှာ တင် အဆင့်မြင့်ဝိညာဉ်ကျောက်တုံး အမြောက်အမြားကို အသေအချာ တူးဖော်နိုင်မှာ ဖြစ်သည်။
စုဝမ်ချင်း၏ အမြင်မှာတော့ ဒီလိုမျိုး ကောင်းမွန်သည့် အခွင့်အလမ်းကို သေသေချာချာ ဆုပ်ကိုင်ထားသင့်သည်ဟု ထင်မြင်မိသည်။
"မလိုအပ်ပါဘူး..ငါ့မှာ ကိုယ်ပိုင် နည်းလမ်းတွေ ရှိနေခဲ့ပြီးသားပါ…အဲဒီအချိန်ကျရင် အသုံးပြုဖို့အတွက် အဆင့်မြင့်ဝိညာဉ်ကျောက်တုံးတွေ အဆက်မပြတ် ရှိနေစေရမယ်လို့ ငါ အာမခံပါတယ်" ဟု လုယွမ်က ခပ်ဖွဖွလေး ရယ်မောရင်း ပြောလိုက်ပါသည်။
သူ၏ လေသံထဲမှာတော့ အကြွင်းမဲ့ သေချာမှုများနှင့် ယုံကြည်ချက်များ ပြည့်နှက်နေခဲ့သည်။
နောက်ထပ် နှစ်ရက်ကြာပြီးနောက်တွင် သူ၏ စနစ်၏ လုပ်ဆောင်ချက်က ပြန်လည်ရရှိမည် ဖြစ်ရာ အဲဒီအချိန်ကျရင် သူက ဒီတောင်ထိပ်တစ်ခုလုံးကို တိုက်ရိုက် ကူးယူနိုင်မှာ ဖြစ်သည်။
အဲဒီအချိန်ကျမှ အဆက်မပြတ် ကူးယူပြီး ကူးထည့်လိုက်မယ်ဆိုလျှင်တော့ သူ၏ လက်ထဲတွင် ရေတွက်လို့မရနိုင်သည့် အဆင့်မြင့် ဝိညာဉ်ကြောများ ရှိလာတော့မှာ ဖြစ်သည်။
အဲဒီအချိန်ကျရင်တော့ လုယွမ် ပြောခဲ့သလိုမျိုးပဲ ... အဆင့်မြင့်ဝိညာဉ်ကျောက်တုံးများဆိုသည်မှာ အဆုံးမရှိ စီးဆင်းလာမည့် အခြေအနေမျိုးသို့ ရောက်ရှိသွားမှာ ဖြစ်သည်
"ကောင်းပါပြီ" လုယွမ် ပြောသည်ကို ကြားလိုက်ရသည့်အခါတွင် စုဝမ်ချင်းက ထပ်မံပြီး မေးခွန်းများ မမေးတော့ဘဲ ချက်ချင်းပဲ ခေါင်းညိမ့် တုံ့ပြန်လိုက်ပါသည်။
ဒီလောက်အထိ အကြာကြီး ရှိနေခဲ့သည့်အတွင်းမှာ စုဝမ်ချင်းသည် လုယွမ်၏ စကားများအပေါ်တွင် အလွန်အမင်း ယုံကြည်ကိုးစားမှု ရှိနေခဲ့ခြင်း ဖြစ်သည်။
ဘာပဲဖြစ်ဖြစ် အရင်တုန်းက လုယွမ် ပြောခဲ့သည့် အရာအားလုံးသည်လည်း လက်တွေ့မှာ အမှန်တကယ် ဖြစ်လာခဲ့ကြရဖူးသောကြောင့် ဖြစ်သည်။
ထို့နောက်တွင်။
သူတို့နှစ်ယောက်လုံး ထိုင်လိုက်ကြပါသည်။
သူတို့အရှေ့က ရှုခင်းများကို ကြည့်ရှုရင်း။
ခေတ္တမျှအတွင်းမှာ တင် စုဝမ်ချင်းက မနေနိုင်ဘဲ စကားစမြည် ပြောဆိုခဲ့ပါသည် ... "သခင်လေး... သခင်လေးအထင် အဲဒီဝိညာဉ်လောက ဆိုတာ ဘယ်လိုမျိုး ကမ္ဘာ ဖြစ်နေမလဲဟင်"
"ငါလည်း သေသေချာချာတော့ မသိဘူး... ဒါပေမဲ့ သေချာနေတဲ့ အချက်တစ်ခုကတော့ ဝိညာဉ်လောကဆိုတာ အားကြီးတဲ့သူက အားနည်းတဲ့သူကို အနိုင်ကျင့်တဲ့ ပြီးတော့ အင်အားကိုပဲ အလေးထားတဲ့ ကမ္ဘာမျိုး ဖြစ်နေမှာ အသေအချာပဲ" ဟု လုယွမ်က သေချာလှသည့် အမူအရာဖြင့် ပြောလိုက်ပါသည်။
"အတိုချုပ်ပြောရရင်တော့ ငါတို့တွေ ဘယ်ကမ္ဘာကိုပဲ ရောက်ရောက်... အခြေခံအားဖြင့် ဥပဒေတစ်ခုပဲ ရှိတယ်... အဲဒါကတော့ အားကြီးတဲ့သူက ဥပဒေပဲ ဖြစ်တယ်" ဟု လုယွမ်က ချက်ချင်းပဲ ဆက်လက်ပြောပြခဲ့ပြန်သည်။
ဒါက စုဝမ်ချင်းကို အလွန်အမင်း သဘောတူသွားစေခဲ့ရပါသည်။
"ကြည့်ရတာ ငါလည်း ပိုပြီး ကြိုးစားရတော့မယ်... ပြီးတော့ ပိုပြီး မြင့်မားတဲ့ အဆင့်တစ်ခုဆီကို အမြန်ဆုံး ထိုးဖောက်နိုင်အောင် လုပ်ရမယ်။
ဒါပေမဲ့ နှမြောစရာကောင်းတာက ဝိညာဉ်အသွင်ပြောင်းလဲခြင်းအဆင့် ကို ရောက်ကတည်းက ငါ အရင်တုန်းက ကျင့်ကြံခဲ့တဲ့ ကျင့်စဉ်က ငါ့အတွက် သိပ်ပြီး အထောက်အကူ မပြုတော့တာပဲ" ဟု စုဝမ်ချင်းက သက်ပြင်းချလိုက်ပါသည်။
နောက်ပိုင်းကျရင် သူမအနေဖြင့် ကျင့်ကြံခြင်းကို ဆက်လက်လုပ်ဆောင်ပြီး ပိုမို မြင့်မားသည့် အဆင့်တစ်ခုဆီသို့ ထိုးဖောက်ချင်တယ်ဆိုလျှင်တော့ ဝိညာဉ်အသွင်ပြောင်းလဲခြင်းအဆင့် ကျင့်ကြံသူတစ်ယောက်နှင့် သင့်တော်မည့် ကျင့်စဉ်တစ်ခုကို ရရှိဖို့ လိုအပ်မှာ ဖြစ်သည်။
ဒါပေမဲ့လည်း…
စုဝမ်ချင်းသည် ဒီလိုမျိုး အစွမ်းထက်လှသည့် ကျင့်စဉ်မျိုးကို ဘယ်နေရာမှာ သွားရောက် ရှာဖွေရမလဲဆိုတာကို လတ်တလောအတွင်းမှာ မသိသေးဘဲ ဖြစ်နေခဲ့ရသည်။
ဒါကို ကြားလိုက်ရသည့်အခါတွင် လုယွမ်က မနေနိုင်ဘဲ တွေးတောဆင်ခြင်ခြင်းထဲသို့ ကျရောက်သွားခဲ့ရပါသည်။
သူကိုယ်တိုင်လည်း ဒီပြဿနာကို မစဉ်းစားမိခဲ့ပါဘူး။
ဒါပေမဲ့လည်း။
ကျင့်စဉ် များဆိုသည်မှာ တကယ့်ကို အရေးကြီးလှသည်မှာ အမှန်ပဲ ဖြစ်သည်။
လုယွမ်က ထိုအဖိုးအို ကျင့်ကြံထားခဲ့သည့် ကျင့်စဉ်အချို့သည် အလွန်အမင်း နက်ရှိုင်းလှသည်ကို လျင်မြန်စွာပဲ သတိရသွားခဲ့ပါသည်။
တကယ်လို့ သူက အဲဒါတွေကို တစ်ခုချင်းစီ ကူးယူပြီး ကူးထည့်နိုင်ခဲ့မယ်ဆိုလျှင်။
အဲဒီနောက်တွင် သူက ဒီနက်ရှိုင်းလှသည့် ကျင့်စဉ်များကို စုဝမ်ချင်း၏ ကိုယ်ပေါ်သို့ ပြန်လည် ကူးထည့်ပေးနိုင်မှာ ဖြစ်ပြီး သူမကို ပိုမို ကောင်းမွန်စွာ ကျင့်ကြံနိုင်အောင် ကူညီပေးနိုင်မှာ ဖြစ်သည်။
ဒါပေမဲ့လည်း…
ပိုပြီးတော့ တိုက်ရိုက်ကျသည့် နည်းလမ်းတစ်ခုလည်း ရှိနေပါသေးသည်။
လုယွမ်အနေဖြင့် လွတ်မြောက်ခြင်းအဆင့် ရှိသည့် ကျင့်ကြံခြင်းအဆင့်ကို တိုက်ရိုက်ပဲ ကူးထည့်ပေးနိုင်မှာ ဖြစ်ပြီး စုဝမ်ချင်းကိုလည်း လွတ်မြောက်ခြင်းအဆင့် ရှိသည့် ပညာရှင်တစ်ယောက်အဖြစ် ချက်ချင်း ပြောင်းလဲပေးနိုင်မှာ ဖြစ်သည်။
"အများကြီး မတွေးပါနဲ့ဦး အချိန်တန်ရင်တော့ ထိုက်တန်တဲ့ အခွင့်အလမ်းက သဘာဝကျကျပဲ ရောက်လာမှာပါ" လုယွမ်က တိုးတိုးလေး ပြောလိုက်ပါသည်... အချိန်များသည်လည်း တရွေ့ရွေ့ ကုန်လွန်သွားခဲ့ရသည်။
သူတို့ သတိမထားမိလိုက်ဘဲ တင်။
နှစ်ရက်တာ အချိန်သည် လျင်မြန်စွာ ကုန်လွန်သွားခဲ့ပါပြီ။
【စနစ်၏ လုပ်ဆောင်ချက်ပြန်လည်ရပါပြီ】
စနစ်၏ အသံ ထွက်ပေါ်လာခဲ့သည်နှင့်တစ်ပြိုင်နက် လုယွမ်က ချက်ချင်းပဲ ခေါင်းညိမ့်လိုက်ပါသည် ... "တကယ့်ကို ကောင်းတယ်... ငါတို့တွေ အခုပဲ စတင်ကြတာပေါ့"
ဒီအချိန်မှာပဲ…
လုယွမ်သည် အလင်းတန်းတစ်ခုအဖြစ် ပြောင်းလဲသွားခဲ့ရပြီး စက္ကန့်ပိုင်းအတွင်းမှာ တင် ပျောက်ကွယ်သွားခဲ့ရပါသည်။
လုယွမ် ပြန်လည်ပေါ်ပေါက်လာခဲ့သည့် အချိန်မှာတော့ သူသည် ဂူတစ်ခု၏ အထဲသို့ ရောက်ရှိနေခဲ့ပြီ ဖြစ်သည်။
အဖိုးအို ချင်မင်သည် အခုအချိန်မှာ ဂူထဲတွင် တင်ပလ္လင်ခွေထိုင်လျက် ကျင့်ကြံနေသည့် ပုံစံမျိုး ရှိနေခဲ့ခြင်း ဖြစ်သည်။
သူ့ဘေးပတ်ပတ်လည်ရှိ ပျစ်ခဲပြီး သန့်စင်လှသည့် ဝိညာဉ်စွမ်းအားများသည်လည်း အလွန်အမင်း မြန်ဆန်လှသည့် အရှိန်နှုန်းဖြင့် ချင်မင်၏ ခန္ဓာကိုယ်ထဲသို့ စီးဝင်နေခဲ့ကြရသည်။
လုယွမ် ရောက်ရှိလာခြင်းကို ချင်မင်က ချက်ချင်းပဲ ခံစားသိရှိလိုက်ရပါသည်။ သူက မျက်လုံးများကို ဖွင့်လိုက်ပြီး လုယွမ်ကို မြင်လိုက်ရသည့်အခါတွင် သူ၏ မျက်ဝန်းထဲတွင် ချက်ချင်းဆိုသလို လေးနက်မှုများ ပြည့်နှက်သွားခဲ့ရပါတော့သည်။
လွန်ခဲ့သည့် နှစ်ရက်တုန်းက သူ လုယွမ်ကို ကြည့်ခဲ့စဉ်ကတော့ လုယွမ်၏ ကျင့်ကြံခြင်းအဆင့်ကို တိုက်ရိုက် ထိုးဖောက်မြင်နိုင်ခဲ့သေးသည်။
ဒါပေမဲ့ အခုအချိန်မှာတော့။
သူက လုယွမ်ကို လုံးဝကို ထိုးဖောက်မမြင်နိုင်တော့ဘဲ ဖြစ်နေခဲ့ရသည်။
ဒီအချက်တစ်ခုတည်းက တင် ချင်မင်ကို အတော်လေး ဝေခွဲမရ ဖြစ်သွားစေခဲ့ရခြင်း ဖြစ်သည်။
"စီနီယာ... တို့တွေ ပြန်ဆုံကြပြန်ပြီနော်" လုယွမ်က လက်ယှက်ကာ ဂါရဝပြုလိုက်ပါသည်။
ဒီစီနီယာ့ထံတွင် အစွမ်းထက်လှသည့် နည်းလမ်းတွေ အများကြီး ရှိနေခဲ့သောကြောင့် လုယွမ်အနေဖြင့် အဲဒါတွေကို တစ်ခုချင်းစီ ကူးယူပြီး ကူးထည့်ဖို့ လိုအပ်နေခဲ့ခြင်း ဖြစ်သည်။
သူ အခုလိုမျိုး ရဲရဲတင်းတင်း လှုပ်ရှားရဲရသည့် အကြောင်းရင်းကတော့။
လုယွမ်၏ လက်ရှိကျင့်ကြံခြင်းအဆင့်သည် ချင်မင်နှင့် အတူတူပဲ ဖြစ်နေခဲ့ပြီ ဖြစ်သောကြောင့် ဖြစ်သည်။
အဆိုးဆုံး ရလဒ် ဖြစ်ပေါ်လာခဲ့ရင်တောင်။
လုယွမ်အနေဖြင့် တစ်ဖက်လူကို အနိုင်မယူနိုင်ခဲ့ရင်တောင် သူက လွတ်မြောက်အောင် ပြေးနိုင်ဆဲ ဖြစ်သည်... ဒီလောက်အထိ အင်အားစိုက်ထုတ်ခဲ့ရပြီးမှတော့။
ဒီလိုမျိုး ပညာရှင်ကြီးနှင့် ဆုံတွေ့ရခဲလှသည် ဖြစ်ရာ။
သူသည် ဒီပညာရှင်ကြီးဆီကနေ အစွမ်းကုန် အကျိုးအမြတ် ထုတ်ယူရမှာ အသေအချာပဲ ဖြစ်သည်။
"သူငယ်ချင်းလေး... မင်း ဒီနေရာကို ဘယ်လိုမျိုး ရှာတွေ့ခဲ့တာလဲ" ချင်မင်က မေးမြန်းခဲ့ပါသည်။
သူငယ်လေးမှ သူငယ်ချင်းလေးဟု အခေါ်အဝေါ်ပင်ပြောင်းသွားသည်။
"ဒါက အဲလောက်အထိ မခက်ခဲပါဘူး စီနီယာ…ကျွန်တော်က အနည်းငယ်ပဲ အာရုံခံကြည့်လိုက်တာနဲ့ ရှာတွေ့သွားခဲ့တာပါ" လုယွမ်က ခပ်ဖွဖွလေး ရယ်မောလိုက်ပါသည်
"ဒါဆိုရင် မင်း ဘာကိစ္စ ရှိလို့ လာခဲ့တာလဲ" ချင်မင်က ထပ်မံ မေးမြန်းခဲ့ပြန်သည်။
"ရိုးရှင်းပါတယ် စီနီယာ…ဂျူနီယာက အရာတစ်ခုကို စမ်းသပ်ကြည့်ချင်ရုံတင်ပါ" လုယွမ်က ပြောလိုက်ပါသည်။
ချက်ချင်းဆိုသလိုပင်…
လုယွမ်က သူ၏ လက်ညှိုးကို ဆန့်ထုတ်လိုက်ပါသည်။
သူက လုယွမ်၏ လက်ညှိုးပေါ်တွင် ဝိညာဉ်စွမ်းအားများ စုစည်းလာသည်ကို မြင်တွေ့လိုက်ရသည်။
ဒီဝိညာဉ်စွမ်းအားသည် ကြိုးတစ်ချောင်းအဖြစ် ပြောင်းလဲသွားခဲ့ပြီး ချင်မင်၏ ထံသို့ တည့်တည့်ပဲ ပြေးဝင်သွားခဲ့ပါသည်။
ဒီမြင်ကွင်းသည် ချင်မင်ကို အလွန်အမင်း ဝေခွဲမရ ဖြစ်သွားစေခဲ့ရသော်လည်း ၎င်း၏ အထဲမှာတော့ ဘာဘေးအန္တရာယ်မျိုးမှ ရှိမနေခဲ့သည်ကို မြင်တွေ့ခဲ့ရသည်။
သူက လုယွမ်အနေဖြင့် ဒီလိုမျိုး ပြုလုပ်ရသည့် ရည်ရွယ်ချက်က ဘာလဲဆိုတာကို တကယ်ပဲ သဘောမပေါက်နိုင်ဘဲ ဖြစ်နေခဲ့ရသည်
ဝိညာဉ်စွမ်းအားဖြင့် ဖွဲ့စည်းထားသည့် အလင်းတန်းသည် ချင်မင်၏ အရှေ့သို့ လျင်မြန်စွာ ရောက်ရှိသွားခဲ့ပါသည်။
"ဒါက ဘာအဓိပ္ပာယ်လဲ"
"စီနီယာ... စီနီယာ့ရဲ့ လက်နဲ့ ဒါကို ခပ်ဖွဖွလေး ထိတွေ့ပေးလို့ ရမလားဟင်" လုယွမ်က တောင်းဆိုလိုက်ပါသည်။
ဒါကို မြင်လိုက်ရသည့်အခါတွင် ချင်မင်သည်လည်း သူ၏ လက်ညှိုးဖြင့် ထိုအလင်းတန်းကို ထိတွေ့လိုက်ပါသည်။
သူကိုယ်တိုင်လည်း လုယွမ်က ဘယ်လိုမျိုး လှည့်ကွက်ကို ကစားချင်နေတာလဲဆိုတာကို ကြည့်ချင်နေခဲ့မိသောကြောင့် ဖြစ်သည်။
ချင်မင်က ထိုအလင်းတန်းကို ထိတွေ့လိုက်သည်နှင့်တစ်ပြိုင်နက် ချင်မင်၏ ကိုယ်ရေးကိုယ်တာ အချက်အလက် မျက်နှာပြင်သည် လုယွမ်၏ မျက်စိအရှေ့တွင် ချက်ချင်းပဲ ထပ်မံ ပေါ်ပေါက်လာခဲ့ရပြန်သည်။
ဒီအလင်းကြိုးက သူတို့နှစ်ယောက်လုံးကို ဆက်သွယ်ပေးလိုက်ခြင်း ဖြစ်ပြီး ဒါဟာ အချင်းချင်း ထိတွေ့ဆက်ဆံလိုက်ခြင်းနှင့် အတူတူပဲ ဖြစ်နေခဲ့သည်။
’ဟဲဟဲ... တကယ်ပဲ အလုပ်ဖြစ်တာပဲ’လုယွမ်က အလွန်အမင်း ဝမ်းသာသွားခဲ့ရပါသည်။
ဒီနှစ်ရက်တာ အချိန်အတွင်းမှာ။
လုယွမ်က စဉ်းစားနေခဲ့ခြင်း ဖြစ်သည်။
ပြီးတော့ လုယွမ်က ဒီနည်းလမ်းကို စဉ်းစားမိသွားခဲ့ခြင်း ဖြစ်သည်။
အစတုန်းကတော့ လုယွမ်က စုဝမ်ချင်း၏ ကိုယ်ပေါ်တွင် အထူးတလည် စမ်းသပ်ကြည့်ခဲ့ဖူးပြီး ရလဒ်ကတော့ အောင်မြင်ခဲ့ရပါသည်
လုယွမ်က အပြင်သို့ ထုတ်လွှတ်ထားခဲ့သည့် ဝိညာဉ်စွမ်းအားများကို လျင်မြန်စွာပဲ ပြန်လည်ရုပ်သိမ်းလိုက်ရာ ထိုဝိညာဉ်စွမ်းအား အလင်းကြိုးသည်လည်း စက္ကန့်ပိုင်းအတွင်းမှာ တင် ပျောက်ကွယ်သွားခဲ့ရပါတော့သည်။