အခန်း (၁) - စနစ်ရဲ့ တစ်ခုတည်းသောစွမ်းဆောင်ရည် - ကူးယူခြင်းနှင့် ကူးထည့်ခြင်း
ကောင်းကင်မြစ်ဂိုဏ်း..
နှစ်ပေါင်းသောင်းချီ သက်တမ်းရှိပြီး မဟာယန်မင်းဆက်ရဲ့ အထွတ်အထိပ် ဂိုဏ်းကြီးများထဲမှ တစ်ခုဖြစ်ကာ အရပ်မျက်နှာအနှံ့ကို ဩဇာညောင်းလှသော ဂိုဏ်းကြီးဖြစ်သည်။
ကျင့်ကြံသူတိုင်း အိမ်မက်မက်ရသည့် နေရာတစ်ခုလည်း ဖြစ်၏။
"ဟား... အဲ့ဒီ ကုန်တင်ကားကြီးက တကယ်ပဲ တခြားကမ္ဘာကို ကူးပြောင်းပေးတဲ့ တံခါးပေါက်ကြီး ဖြစ်နေတာပဲ"
ယခုအချိန်တွင် ဂိုဏ်းပြင်ပတပည့်များနေထိုင်ရာ ရိုးရှင်းသော သစ်သားအိမ်လေးအတွင်း၌ လူငယ်တစ်ဦးသည် ကြေးမှန်ထဲမှ မိမိကိုယ်ကိုယ် ကြည့်ရင်း အံ့အားသင့်တကြီး ရေရွတ်လိုက်သည်။
သူ (လုယွမ်) မှတ်မိသလောက်ဆိုလျှင် သူသည် မီးပွိုင့်စိမ်းနေစဉ် လမ်းကူးနေခဲ့ခြင်းဖြစ်သည်။
ထိုစဉ် ကုန်တင်ကားကြီးတစ်စီးက သူ့ထံသို့ အရှိန်အဟုန်ဖြင့် ပြေးဝင်လာခဲ့သည်။
ထို့နောက်တွင်တော့... ဘာမှမသိတော့။
အမှောင်ထုထဲတွင် နစ်မြုပ်သွားခဲ့ပြီး ပြန်နိုးလာချိန်မှာတော့ ဤစိမ်းသက်သော ပတ်ဝန်းကျင်သို့ ရောက်ရှိနေခဲ့ပြီဖြစ်သည်။
သူ့ခေါင်းထဲတွင် မိမိနှင့်မဆိုင်သော မှတ်ဉာဏ်သစ်များ စီးဝင်လာသည်။
ထိုမှတ်ဉာဏ်များကို ဖတ်ကြည့်လိုက်ပြီးနောက် သူသည် အခြားကမ္ဘာတစ်ခုသို့ ကူးပြောင်းရောက်ရှိလာပြီဖြစ်ကြောင်း သဘောပေါက်သွားခဲ့သည်။
မူလခန္ဓာကိုယ်ပိုင်ရှင်မှာလည်း 'လုယွမ်' ပင် ဖြစ်သည်။ ဤလောကသည် အားကြီးသူက အားနည်းသူကို အနိုင်ကျင့်သည့်.. အစွမ်းထက်သူသာ အလေးထားခံရသည့် ကျင့်ကြံခြင်းလောကဖြစ်သည်။
လုယွမ်သည် လက်ရှိတွင် ကောင်းကင်မြစ် ဂိုဏ်း၏ ပြင်ပတပည့်တစ်ဦးဖြစ်ပြီး ကျင့်ကြံမှုအဆင့်မှာ 'ချီသန့်စင်ခြင်းအဆင့်၃’ မျှသာ ရှိသေးသည်။
ဤလောက၏ ကျင့်ကြံမှုအဆင့်များမှာ …
ချီသန့်စင်ခြင်း..
အခြေခံတည်ဆောက်ခြင်း..
အမြုတေစုစည်းခြင်း..
အမြုတေဖြစ်တည်ခြင်းနှင့်
နတ်ဝိညာဉ်ဖြစ်တည်ခြင်း…
စသည်ဖြင့် အဆင့်ဆင့် ရှိကြသည်။
အဆင့်တိုင်းတွင် အဆင့်ငယ်၉ ဆင့်ရှိသည်။
မဟာယန်မင်းဆက်တစ်ခုလုံးတွင် နတ်ဝိညာဉ်ဖြစ်တည်ခြင်းအဆင့်မှာ အမြင့်ဆုံး တိုက်ခိုက်ရေးစွမ်းအားဖြစ်ပြီး ကောင်းကင်မြစ် ဂိုဏ်းတွင် ထိုအဆင့်ရှိ ပုဂ္ဂိုလ်ကြီး ၆ ဦးအထိ ရှိနေသောကြောင့် ဤမျှ ဩဇာကြီးမားနေခြင်းဖြစ်သည်။
သို့သော် လုယွမ်မှာမူ ချီသန့်စင်ခြင်း အဆင့် ၃ တွင်သာ ရှိနေသေးသည်။
"ဒီခန္ဓာကိုယ်ရဲ့ ကျင့်ကြံမှုပါရမီက တော်တော်ညံ့တာပဲ… ဂိုဏ်းထဲဝင်တာ ၃ နှစ်ရှိပြီ.. အဆင့် ၃ မှာပဲ ရှိနေသေးတယ်… တခြားသူတွေဆို အဆင့် ၄.. အဆင့် ၅ တောင် ရောက်ကုန်ကြပြီ" လုယွမ်က သက်ပြင်းချရင်း ညည်းတွားလိုက်သည်။
"ဒါကတော့ တကယ့် ငရဲအဆင့် အစပြုခြင်းပဲ"
"နေဦး... တခြားကမ္ဘာကူးလာသူတွေဆို 'ရွှေလက်ချောင်း' ဆိုတာကြီး ပါလာတယ်မဟုတ်လား…ငါ့ရဲ့စနစ်လား……လက်စွပ်ထဲက အဘိုးကြီးလား အဖွားကြီးလား ထွက်ခဲ့စမ်းပါ"
သူ ဘယ်လိုပင် ခေါ်နေပါစေ.. ဘာတုံ့ပြန်မှုမှ မရှိခဲ့ပေ။
"ပြင်ပတပည့် လုယွမ် ရှိသလား"
ထိုစဉ် အိမ်ပြင်မှ အေးစက်စက် အသံတစ်သံ ထွက်ပေါ်လာသည်။ လုယွမ်လည်း ကပျာကယာပင် အိမ်ပြင်သို့ ထွက်ကြည့်လိုက်ရာ မျက်နှာသေနှင့် စည်းကမ်းထိန်းသိမ်းရေး တပည့်တစ်ဦးကို တွေ့လိုက်ရသည်။
"ဂါရဝပြုပါတယ် စီနီယာအစ်ကို"
"လုယွမ်... ဂိုဏ်းရဲ့ စည်းကမ်းအရ မင်းသာ ၃ နှစ်အတွင်း ချီသန့်စင်ခြင်း အဆင့် ၄ ကို မရောက်ရင် ဂိုဏ်းကနေ ထုတ်ပယ်ခံရမယ်… အခု မင်းမှာ ၁ လပဲ အချိန်ကျန်တော့တယ်ဆိုတာ လာသတိပေးတာ"
ထိုသူက ခံစားချက်ကင်းမဲ့စွာ ပြောသည်။
"နောက်ပြီး အချိန် ၁ လပဲ ကျန်ပေမဲ့ ဂိုဏ်းရဲ့ တာဝန်တွေကိုတော့ ပျက်ကွက်လို့မရဘူး… သွားလုပ်လိုက်ဦး"
ပြောပြီးသည်နှင့် ထိုတပည့်မှာ ချက်ချင်းပင် လှည့်ထွက်သွားတော့သည်။
"ဟ ဒီလိုစည်းကမ်းမျိုးလည်း ရှိသေးတာပဲလား"
လုယွမ် မှတ်မိသွားသည်။
ဂိုဏ်း၏ စည်းကမ်းမှာ ပြင်းထန်လှ၏။
၁ လအတွင်း အဆင့်မတက်လျှင် ဂိုဏ်းက နှင်ထုတ်ခံရမည်ဖြစ်သလို.. လစဉ်လည်း ဂိုဏ်းတာဝန် တစ်ခု မဖြစ်မနေ ထမ်းဆောင်ရမည်ဖြစ်သည်။
"၁ လအတွင်း ဘယ်လိုလုပ်ပြီး အဆင့်တက်မှာလဲ" လုယွမ် အကြံအိုက်နေတော့သည်။
သူ ရောက်ခါစပဲ ရှိသေးသဖြင့် ဘာကိုမှ ကောင်းကောင်း နားမလည်သေး။ ထို့ပြင် ဂိုဏ်းတာဝန်ဆိုသည်မှာလည်း သူ့လို အဆင့်နိမ့်သူအတွက် ပင်ပန်းရုံသာရှိပြီး အကျိုးအမြတ်နည်းလှသည့် အလုပ်ကြမ်းများသာ ဖြစ်ပေလိမ့်မည်။
【 တင်း ~~~ 】
လုယွမ် စိတ်ညစ်နေစဉ်မှာပင် နားထဲ၌ ကြည်လင်သော အသံတစ်သံ မြည်ဟီးသွားသည်။
သူ့မျက်စိရှေ့တွင် ဒေါင်းလုဒ်ဆွဲနေသည့်အတန်း တစ်ခု ပေါ်လာ၏။
သူ မျက်စိကို ပွတ်ပြီး ပြန်ကြည့်သော်လည်း ပျောက်မသွားပေ။
"ငါ သိသားပဲ ကမ္ဘာကူးလာသူတစ်ယောက်မှာ ရွှေလက်ချောင်း မပါလို့ ဘယ်ဖြစ်မလဲ" လုယွမ် စိတ်လှုပ်ရှားစွာဖြင့် အားရပါးရ ရယ်မောလိုက်သည်။
"ဟားဟား... ငါ့အလှည့် ရောက်ပြီဟေ့"
ဒေါင်းလုဒ် က ၁၀၀ ရာခိုင်နှုန်း ပြည့်သွားသောအခါ သာယာသော အသံက ထပ်မံထွက်ပေါ်လာသည်။
【 စနစ်ကို အောင်မြင်စွာ ထည့်သွင်းပြီးပါပြီ】
【 အသုံးပြုသူ - လုယွမ် 】
【 ကျင့်ကြံမှုအဆင့် - ချီသန့်စင်ခြင်း အဆင့် ၃ (အထူး ပုရွက်ဆိတ်အဆင့်) 】
မျက်နှာပြင်တစ်ခု ပေါ်လာပြီး လုယွမ်၏ အချက်အလက်များကို ပြသနေသည်။
"ဟေ့စနစ်... အချက်အလက်တွေကလည်း အသေးစိတ်လွန်းလိုက်တာ… ပြီးတော့ ပုရွက်ဆိတ်ဆိုရင်လည်း ရပြီပေါ့.. ဘာလို့ 'အထူး' ပုရွက်ဆိတ်လို့ ပြောနေရတာလဲ" လုယွမ် အနည်းငယ် ဆွံ့အသွားသည်။
【 သတိပြုရန်…ဤစနစ်တွင် လုပ်ဆောင်ချက် တစ်ခုတည်းသာ ရှိပါသည် 】
【 ကူးယူခြင်း နှင့် ကူးထည့်ခြင်း 】
"ဟမ်" လုယွမ် ကြောင်သွားသည်။
သူ့ရဲ့ ရွှေလက်ချောင်းက ကွန်ပျူတာက Ctrl+C နဲ့ Ctrl+V တဲ့လား။
【 ဤလုပ်ဆောင်ချက် နှစ်ခုကို တွဲဖက်အသုံးပြုရမည်.. တစ်ကြိမ်သုံးပြီးတိုင်း ပြန်လည်အသုံးပြုရန် အချိန်၂ရက် လိုအပ်ပါသည် 】
"နေဦး..." လုယွမ် တစ်ခုခုကို တွေးမိသွားသည်။
"ကျင့်ကြံမှုကိုရော ကူးလို့ရလား"
အကယ်၍ ရခဲ့လျှင် သူ ကျင့်ကြံနေစရာ မလိုတော့ဘဲ သူတပါးရဲ့ အဆင့်တွေကို ကူးယူပြီး သူ့ကိုယ်ထဲ ထည့်လိုက်ရုံသာ ဖြစ်သည်။
【 ရပါသည် 】
"လန်းတယ်ဟေ့" လုယွမ် ဝမ်းသာအားရ အော်ဟစ်လိုက်သည်။
"ဒါပေမဲ့ ငါက အဆင့်နိမ့်တော့ နတ်ဝိညာဉ်ဖြစ်တည်ခြင်းအဆင့် ပုဂ္ဂိုလ်ကြီးတွေကို တွေ့ဖို့ မလွယ်ဘူး။ အကယ်၍ သူတို့ဆီကသာ ကူးလို့ရရင် ငါလည်း ချက်ချင်း အထွတ်အထိပ် ရောက်သွားမှာပဲ"
သို့သော် နတ်ဝိညာဉ်ဖြစ်တည်ခြင်းအဆင့် ကျင့်ကြံသူများမှာ သူ့လို ပြင်ပတပည့်လေးနှင့် တွေ့နိုင်သော ပုဂ္ဂိုလ်များ မဟုတ်ပေ။
【 မှတ်ချက်… ကူးယူလိုပါက ပစ်မှတ်နှင့် ခန္ဓာကိုယ်ချင်း ထိတွေ့မှု ရှိရပါမည် 】
"နားလည်ပြီ" လုယွမ် ခေါင်းငြိမ့်လိုက်သည်။ ကွန်ပျူတာမှာတောင် မောက်စ် နဲ့ ဖိမှ ကူးလို့ရတာပဲ.. အခုလည်း လက်နဲ့ ထိရမှာပေါ့။
"ဒါဆိုရင် အခုလောလောဆယ် အရေးကြီးဆုံးက အဆင့်တက်ဖို့ပဲ" လုယွမ် မစောင့်နိုင်တော့ပေ။
ဂိုဏ်းက နှင်ထုတ်ခံရလျှင် အပြင်လောကရှိ မိစ္ဆာကျင့်ကြံသူများနှင့် သားရဲများ၏ ဘေးအန္တရာယ်က ကြောက်စရာကောင်းလှသည်။
"တာဝန်ပေးခန်းမဆောင်ကို သွားရမယ်…အဲ့ဒီမှာ လူတွေ အများကြီးရှိတယ်… ဂိုဏ်းက အကြီးအကဲကြီးတွေနဲ့လည်း ဆုံနိုင်တယ်"
လုယွမ်သည် တာဝန်ပေးခန်းမဆောင်သို့ ဦးတည်ထွက်ခွာလာရင်း တစ်ဖက်လူ မရိပ်မိအောင်.. မလန့်သွားအောင် မည်သို့ ထိတွေ့ရမည်ကို အကြံထုတ်နေတော့သည်။
အကြံအစည်များစွာ ရှိသော်လည်း လက်တွေ့တွင်မူ အခြေအနေကြည့်ကာ လုပ်ဆောင်ရန်သာ ဆုံးဖြတ်လိုက်လေတော့သည်။