အခန်း (၃၁) ယင်ယွီ ပန်းဆိုင်လေးနှင့် အမျိုးသမီးဇာတ်လိုက် အန်ယွီမုန်

​ဟိုင်ချန်းတက္ကသိုလ် လူသွားလူလာများပြားရာ လမ်းမထက်ရှိ ယင်ယွီ ပန်းဆိုင်လေး။

​ပန်းဆိုင်၏ အဝင်ဝတွင် ဖူးပွင့်ဝေဆာနေသော ပန်းအိုးအနည်းငယ်ကို ချိတ်ဆွဲပြသထားခဲ့ရာ.. ၎င်းတို့၏ တောက်ပလှသော အရောင်အသွေးများနှင့် မွှေးပျံ့လှသော ရနံ့များမှာ လေထုအတွင်း၌ ပျံ့လွင့်နေခဲ့သည်။

​ဆိုင်၏ မှန်ပြတင်းပြင်ကျယ်ကြီး နောက်ကွယ်တွင်မူ အနုပညာဆန်စွာ စီစဉ်ပြင်ဆင်ထားသော ပန်းစည်းမျိုးစုံကို ခင်းကျင်းပြသထားခဲ့သဖြင့်.. လမ်းသွားလမ်းလာများအား ခြေလှမ်းများကို ရပ်တန့်စေလျက် ငေးမောချီးကျူးရစေရန် ဆွဲဆောင်နေခဲ့၏။

​ကုချန်သည် ပန်းဆိုင်၏ တံခါးချပ်ကို ဖြည်းညင်းစွာ တွန်းဖွင့်လိုက်ရာ.. လေတိုက်ခတ်မှုကြောင့် လှုပ်ခတ်သွားသော လေချိမ်းခေါင်းလောင်းလေးမှာ ပြတ်သားလှသော "တဒင်ဒင်" ဟူသော အသံကို မြည်ဟည်းစေလျက် ပန်းဆိုင်တစ်ခုလုံးအတွင်း ပဲ့တင်ထပ်သွားခဲ့တော့သည်။

​သူ ဆိုင်အတွင်းသို့ လျှောက်လှမ်းဝင်ရောက်လာခဲ့ပြီး ပတ်ဝန်းကျင်ကို ဝေ့ဝဲကြည့်ရှုလိုက်၏။ ဆိုင်လေးမှာ အလွန်အမင်း ကြီးမားကျယ်ဝန်းခြင်း မရှိသော်လည်း.. ပတ်ဝန်းကျင် အပြင်အဆင်မှာမူ နွေးထွေးကာ ကျော့ရှင်းလှပေသည်။

​ပန်းစင်နှစ်ခုကို စနစ်တကျ စီတန်းထားခဲ့ပြီး ၎င်းတို့အပေါ်၌ နှင်းဆီ.. နှင်းပန်း.. ကျူးလစ်  စသည့် ပန်းမျိုးစုံကို ခင်းကျင်းထားခဲ့သည်။ 

ပန်းတစ်ပွင့်ချင်းစီမှာ လတ်ဆတ်ကာ လှပနေခဲ့ကြသဖြင့် အသေအချာ ဂရုတစိုက် ပြုစုပျိုးထောင်ထားခဲ့ကြောင်း ထင်ရှားလှပေသည်။

​"မင်္ဂလာပါရှင်... ဘာပန်းများ ဝယ်ယူချင်လို့လဲရှင်"

​ပန်းဆိုင်၏ ငွေရှင်းကောင်တာဆီမှနေ၍ စိတ်နှလုံးအတွင်းရှိ မတည်ငြိမ်မှုများကို ချော့သိပ်ပေးနိုင်လောက်သော နူးညံ့ပျော့ပျောင်းလှသည့် မိန်းကလေးတစ်ဦး၏ အသံ ထွက်ပေါ်လာခဲ့သည်။

​ကုချန် အသံထွက်ပေါ်လာရာ နေရာဆီသို့ အကြည့်လွှဲလိုက်ရာ.. ငွေရှင်းကောင်တာအနီး၌ ပန်းစည်းများကို စနစ်တကျ ပြင်ဆင်နေသော မိန်းကလေးတစ်ဦးကို တွေ့ရှိလိုက်ရတော့၏။ 

သူမသည် နို့နှစ်ရောင် ဘောင်းဘီရှည်လေးနှင့်အတူ အပြာနုရောင် လက်တိုအင်္ကျီလေးကို တွဲဖက်ဝတ်ဆင်ထားခဲ့ရာ.. ဝတ်စားဆင်ယင်မှုမှာ ရိုးရှင်းသော်လည်း သန့်ရှင်းသပ်ရပ်လှပေသည်။ သူမ၏ ဆံပင်များကို မြင်းမြီးပုံစံ အမြင့်ကြီး စုစည်းထားခဲ့သဖြင့် ကြည့်ရသည်မှာ ဖြတ်လတ်လန်းဆန်းနေစေခဲ့၏။

​သို့သော်လည်း သူမ၏ မျက်ဝန်းအစုံမှာမူ အနည်းငယ် မှေးမှိန်နေခဲ့ပြီး.. ပါးလွှာသော မြူခိုးထူထူတစ်ခု နောက်ကွယ်တွင် ဖုံးကွယ်ခြင်းခံထားရသည့်အလား မည်သည့်အာရုံစူးစိုက်မှုမျိုးမျှ ရှိမနေခဲ့ချေ။

​【 အမည်: အန်ယွီမုန် 】

​အဆင့်အတန်း: ကံတရားသတ်မှတ်ထားသော အမျိုးသမီးဇာတ်လိုက်

​စွမ်းအားတန်ဖိုး: ၆၃

​နှစ်သက်သဘောကျမှုတန်ဖိုး: ၃၀

​ရရှိနိုင်မည့် ဗီလိန်အမှတ်: ၁,၀၀၀

​ဇာတ်ကောင်နောက်ခံ: ယာဉ်မတော်တဆမှုတစ်ခုကြောင့် မိဘနှစ်ပါးစလုံး ကွယ်လွန်သွားခဲ့ပြီး မျက်စိအမြင်အာရုံ ဆုံးရှုံးခဲ့ရရှာသော်လည်း.. ပန်းစည်းများအပေါ်၌မူ နက်ရှိုင်းစွာ မြတ်နိုးသူ ဖြစ်သည်။

​အန်ယွီမုန်သည် မျက်စိအမြင်အာရုံ ချို့တဲ့သူတစ်ဦး ဖြစ်သော်လည်း.. ရာနှုန်းပြည့် မမြင်ရတာ မဟုတ်ချေ။

​သူမ၏ အမြင်အာရုံမှာ ဝေဝါးနေခဲ့သော်လည်း.. အရာဝတ္ထုများ၏ ယေဘုယျ ပုံသဏ္ဌာန်များနှင့် အလင်းအမှောင် အရိပ်အယောင်များကိုမူ ခွဲခြားနိုင်စွမ်း ရှိပေသည်။ 

ထို့ကြောင့်ပင် ဝယ်ယူသူများ၏ တည်နေရာနှင့် လှုပ်ရှားမှုများကို ခန့်မှန်းတွက်ချက်နိုင်ခြင်း ဖြစ်၏။ ၎င်းအပြင် အန်ယွီမုန်သည် ပန်းတစ်ပွင့်ချင်းစီ၏ ရနံ့ကို အခြေခံ၍လည်း ပန်းအမျိုးအစားများကို အသေအချာ ခွဲခြားနိုင်စွမ်း ရှိပေသေးသည်။

​ကုချန် ပြုံးလိုက်ပြီး နူးညံ့ကာ ရင်းနှီးသော လေသံဖြင့် ဆိုလိုက်၏။

​"မိန်းကလေး အန်ယွီ... မတွေ့ရတာ ကြာပြီနော်"

​အန်ယွီမုန်သည် ကုချန်၏ အသံကို ကြားလိုက်ရသည့်အခါ အနည်းငယ် တန့်သွားခဲ့ရပြီးနောက်.. မျက်နှာထက်တွင် အံ့အားသင့်မှုများနှင့်အတူ အပြုံးတစ်ခု ပွင့်လန်းလာခဲ့ကာ ဆိုလိုက်သည်။

​"အကို ကု... အကိုရဲ့ အသံကို မကြားရတာ တော်တော်လေးကို ကြာသွားခဲ့ပြီပဲနော်"

​ယခင်ကုချန် ဖြစ်သူသည် ရှန်ကျီဝေနောက်သို့ စတင်လိုက်လံ ပိုးပန်းနေခဲ့သော ပထမဆုံး အချိန်ပိုင်းအချို့တုန်းက.. ရှန်ကျီဝေသည် ဟိုင်ချန်းတက္ကသိုလ်၌ ပညာသင်ကြားနေဆဲ ဖြစ်သည်။ 

ထို့ကြောင့်ပင် ကုချန်သည် ပန်းများဝယ်ယူရန်အတွက် ဤဆိုင်လေးဆီသို့ မကြာခဏ လာရောက်လေ့ရှိရာမှတစ်ဆင့် အချိန်ကြာလာသည်နှင့်အမျှ အန်ယွီမုန်နှင့် အတော်ပင် ရင်းနှီးကျွမ်းဝင်မှု ရှိသွားခဲ့ခြင်း ဖြစ်၏။

​ယခင်ကုချန်သည် အန်ယွီမုန်၏ အခြေအနေကို သိရှိထားသဖြင့် သူမ၏ မျက်စိကို ကုသပေးရန်အတွက် သူ၏ ကွန်ရက်များကို အသုံးပြု၍ ကူညီပေးမည်ဟု ကမ်းလှမ်းခဲ့ဖူးသော်လည်း.. အန်ယွီမုန်က ယဉ်ကျေးစွာဖြင့် ငြင်းပယ်ခဲ့သည်။ 

ထိုအချိန်တုန်းက သူ၏ အာရုံစိုက်မှု အားလုံးမှာ ရှန်ကျီဝေထံ၌သာ ရှိနေခဲ့သဖြင့်.. တစ်ဖက်လူက ငြင်းပယ်လိုက်ပြီးနောက်တွင်မူ သူလည်း ၎င်းကိစ္စကို ထပ်မံ၍ ထည့်သွင်းပြောကြားခြင်း မပြုတော့ချေ။

​သူ့အနေဖြင့် အန်ယွီမုန်ကို ကူညီပေးချင်ခဲ့ရသည့် အကြောင်းရင်းမှာ...သူမသည် မိမိအတွက် ပန်းများကို အမြဲတမ်း စိတ်ရှည်လက်ရှည် ရွေးချယ်ပေးလေ့ရှိသည့်အပြင်.. အကြံဉာဏ်ကောင်းများစွာကိုလည်း ပေးအပ်ခဲ့ဖူးခြင်းကြောင့် ဖြစ်၏။ 

ကုချန်အတွက်မူ အန်ယွီမုန်၏ မျက်စိကို ကုသပေးရန်ဟူသော အချက်မှာ အသေးအဖွဲ ကိစ္စရပ်တစ်ခုမျှသာ ဖြစ်ပေသည်။

​နောက်ပိုင်းတွင် ရှန်ကျီဝေသည် တက္ကသိုလ်မှ တစ်နှစ်တာ ခွင့်ရက်ယူခဲ့ပြီးနောက်.. ကုချန်သည်လည်း ဤပန်းဆိုင်လေးဆီသို့ တစ်ကြိမ်မျှ ထပ်မံရောက်ရှိလာခြင်း မရှိတော့ချေ။

​ကုချန် သူမ၏အနားသို့ ခြေလှမ်းအနည်းငယ် တိုးကပ်လိုက်ပြီး.. သူမလက်ထဲရှိ ပန်းစည်းထံသို့ အကြည့်ပို့လျက် တိုးညင်းစွာ ဆိုလိုက်၏။

​"လတ်တလောမှာ အလုပ်တွေ နည်းနည်းများနေခဲ့လို့... ဒီကို မရောက်ဖြစ်တာ ကြာသွားတာပါ…မင်း ငါ့ကို မှတ်မိနေလိမ့်မယ်လို့ မထင်ထားခဲ့ဘူး"

​အန်ယွီမုန် ခပ်ဖွဖွ ပြုံးလိုက်ပြီး စနောက်လိုသည့် လေသံဖြင့် ပြန်လည်ပြောကြားလာခဲ့သည်။

​"အကိုကုရဲ့ အသံက တော်တော်လေးကို ထူးခြားမှုရှိတာပဲလေ... ၎င်းအပြင် ကိုယ်က ကျွန်မတို့ဆိုင်ရဲ့ ပုံမှန်ဝယ်ယူသူတစ်ယောက်လည်း ဖြစ်ခဲ့ဖူးတာပဲလေ"

​ကုချန် ခပ်ဖွဖွ ရယ်မောလိုက်ပြီး ဆိုင်အတွင်းရှိ ပတ်ဝန်းကျင်ကို တစ်ချက်ဝေ့ဝဲကြည့်ရှုလိုက်ကာ မေးမြန်းလိုက်၏။

​"လတ်တလော ဆိုင်ရဲ့ အရောင်းအဝယ် အခြေအနေတွေကော ဘယ်လိုရှိလဲ"

​"အဆင်ပြေပါတယ်ရှင်... ဒီပတ်ဝန်းကျင်က ဆရာ.. ဆရာမတွေနဲ့ ကျောင်းသားတွေက ကျွန်မရဲ့ ဆိုင်လေးကို တော်တော်လေး ကူညီပံ့ပိုးပေးကြပါတယ်"

​အန်ယွီမုန် စကားပြောရင်း သူမလက်ထဲရှိ ပန်းစည်းကို ဘေးနားသို့ ညင်သာစွာ ချထားလိုက်သည်။

​"အကိုကု... ဒီနေ့ ပန်းလာဝယ်တာလား.. ဒါမှမဟုတ်..."

​ကုချန် ခေါင်းခါယမ်းလိုက်ပြီး နူးညံ့ကာ ပေါ့ပါးသော လေသံဖြင့် ဆိုလိုက်၏။

​"ငါ အလုပ်တွေကနေ ခေတ္တအနားယူထားလို့ စိတ်အပန်းဖြေဖို့ ထွက်လာတာပါ… ဒီဘက်ကို တိုက်တိုက်ဆိုင်ဆိုင် ဖြတ်လာမိရင်းနဲ့... ဆိုင်ထဲဝင်ပြီး ခဏလောက် ထိုင်ချင်လို့ပါ…မိန်းကလေးအန်ယွီ အနှောင့်အယှက်ဖြစ်သွားရင် စိတ်မရှိပါနဲ့နော်"

​၎င်းကို ကြားလိုက်ရသည့်အခါ အန်ယွီမုန်၏ မျက်နှာထက်ရှိ အပြုံးမှာ ပိုမို၍ ညင်သာသွားခဲ့ရသည်။

​"ဘာလို့ စိတ်ရှိရမှာလဲရှင်... လွန်ခဲ့တဲ့ အချိန်တွေတုန်းက အကိုကုသာ မကူညီခဲ့ဘူးဆိုရင်.. ဒီပန်းဆိုင်လေး ဆက်ပြီး ဖွင့်လှစ်ထားနိုင်ဦးမလားဆိုတာတောင် မသေချာပါဘူး"

​ကုချန်သည် သူမ မည်သည့်အကြောင်းအရာကို ဆိုလိုခြင်းဖြစ်ကြောင်း သဘာဝကျစွာပင် သိရှိထားပေသည်။

​ယခင်ကုချန် ပန်းလာဝယ်လေ့ရှိသော အချိန်ကာလတစ်ခုတုန်းက.. လူမိုက်အချို့ ရုတ်တရက် ပေါ်ပေါက်လာခဲ့ကာ ဆိုင်အတွင်းရှိ ပန်းစည်းများစွာကို ဖျက်ဆီးလျက် ပြဿနာရှာခဲ့ကြဖူးသည်။ 

ထိုအချိန်တုန်းက ယခင်ကုချန်သည် ဤမြင်ကွင်းကို ကိုယ်တိုင်ကိုယ်ကျ မြင်တွေ့ခဲ့ရသဖြင့် ပန်းဆိုင်လေး ပိတ်သိမ်းသွားရမည်ကို စိုးရိမ်ခဲ့မိသည်။ 

အဘယ်ကြောင့်ဆိုသော် ပန်းဆိုင်ပိတ်သိမ်းသွားပါက ရှန်ကျီဝေနောက်သို့ လိုက်လံပိုးပန်းမည့် သူ၏ အစီအစဉ်အပေါ် သက်ရောက်မှု ရှိနိုင်ခြင်းကြောင့် ဖြစ်၏။

​အမှန်စင်စစ် ဤဆိုင်လေးမှ ပန်းများသည် ဈေးနှုန်းသင့်တင့်ရုံမျှမက.. ပြုစုပျိုးထောင်ထားပုံမှာလည်း အခြားသော ပန်းဆိုင်များထက် အဆပေါင်းများစွာ သာလွန်ကောင်းမွန်လှပေသည်။ 

ထို့ကြောင့်ပင် ယခင်ကုချန်သည် လူလွှတ်ကာ ၎င်းလူမိုက်များကို ဥပဒေဘောင်အတွင်းသို့ တိုက်ရိုက် ပို့ဆောင်ပေးခဲ့ပြီး.. နောက်နောင်တွင်လည်း မည်သူမျှ လာရောက်ပြဿနာမရှာရဲအောင်အထိ အပြတ်အသတ် ကိုင်တွယ်ပေးခဲ့ခြင်း ဖြစ်သည်။

​ပြောရမည်ဆိုပါက ယခင်ကုချန်၏ စိတ်နှလုံးတစ်ခုလုံးမှာ ရှန်ကျီဝေထံ၌သာ ရှိနေခဲ့သော်လည်း.. သူ မရည်ရွယ်ဘဲ လုပ်ဆောင်ခဲ့မိသော အချို့သောအရာများမှာ ယခုအခါတွင်မူ ကုချန်အတွက် များစွာသော အဆင်ပြေချောမွေ့မှုများကို ဖန်တီးပေးထားခဲ့ခြင်း ဖြစ်၏။

((ယခင်ကုချန်လို့သုံးတာက ၀ိညာဉ်ပဲ သီးသန့်ကူးပြောင်းလာတာ မဟုတ်လို့ပါ ဒီက ကုချန် ဟိုရောက်ပြီး(သေ) ဟိုက ကုချန် ဒီ ရောက်လာလို့ပါ(အသက်ရှင်)))

​အန်ယွီမုန် စကားပြောရင်း ကုလားထိုင်တစ်လုံးကို အနားသို့ တွန်းပေးလိုက်သည်။ ကုချန်သည် မဆိုင်းမတွဘဲ ထိုင်လိုက်မိသလို.. အန်ယွီမုန်မှာမူ သူ့အတွက် ရေနွေးကြမ်းတစ်ခွက် ငှဲ့ပေးရန်အတွက် နောက်ဘက်ရှိ အခန်းငယ်လေးဆီသို့ လှည့်ထွက်သွားခဲ့တော့သည်။

​ဤပန်းဆိုင်လေးကို အတွင်းပိုင်းနှင့် ပြင်ပပိုင်းဟူ၍ အပိုင်းနှစ်ပိုင်း ခွဲခြားထားခြင်း ဖြစ်၏။ ပြင်ပပိုင်းမှာ ပန်းဆိုင်၏ အဓိကနေရာ ဖြစ်ပြီး ပန်းမျိုးစုံဖြင့် ပြည့်နှက်နေခဲ့သလို.. အတွင်းပိုင်းမှာမူ အန်ယွီမုန်၏ နေ့စဉ်လူမှုဘဝ နေထိုင်ရာ နေရာငယ်လေး ဖြစ်ကာ...အလွန်အမင်း ကြီးမားခြင်းမရှိသော်လည်း နွေးထွေးကာ သန့်ရှင်းသပ်ရပ်လှပေသည်။

​ကုချန် ထ၍ ကူညီပေးခြင်းမျိုး မပြုခဲ့ချေ။

​သူသည် အန်ယွီမုန်အနေဖြင့် ယခုကဲ့သို့သော လူမှုဘဝပုံစံမျိုးကို ကျင့်သားရနေခဲ့ပြီ ဖြစ်ကြောင်း သိရှိထားပေသည်။ 

သူမ၏ လှုပ်ရှားမှုများမှာ သာမန်လူများထက် နှေးကွေးနေခဲ့သော်လည်း.. အရာအားလုံးမှာ စနစ်တကျ ရှိလှပေသည်။

​အကယ်၍ သင်က တစ်ဖက်လူ၏ အမြင်အာရုံ ချို့တဲ့မှုအပေါ် စိုးရိမ်ပူပန်သော စေတနာကောင်းဖြင့် ထ၍ ကူညီပေးလိုက်မည်ဆိုပါက.. ၎င်းသည် မရည်ရွယ်ဘဲ တစ်ဖက်လူကို မိမိကိုယ်ကိုယ် သာမန်လူများနှင့် ကွဲပြားခြားနားနေသည်ဟူသော ခံစားချက်မျိုး ဝင်ရောက်သွားစေနိုင်ပေသည်။ 

အန်ယွီမုန်သည် မျက်စိအမြင်အာရုံ ဆုံးရှုံးထားရရှာသော်လည်း.. သူမကို သနားဂရုဏာသက်သည့် အကြည့်များဖြင့် ကြည့်ရှုခြင်းထက် သာမန်လူတစ်ဦးကဲ့သို့ တန်းတူရည်တူ ဆက်ဆံပေးခြင်းကိုသာ ပိုမို၍ နှစ်သက်သဘောကျသူ ဖြစ်၏။

​ခေတ္တမျှ ကြာပြီးနောက်တွင်မူ.. အန်ယွီမုန်သည် ပူနွေးသော ရေနွေးကြမ်းတစ်ခွက်ကို ကိုင်ဆောင်လျက် အပြင်သို့ ပြန်လည်ထွက်ပေါ်လာခဲ့ပြီး.. လှုပ်ရှားမှုများမှာ တည်ငြိမ်နေခဲ့ကာ မည်သည့်ပျာယာခတ်မှုမျိုးမျှ ရှိမနေခဲ့ချေ။ 

ကုချန် ရေနွေးခွက်ကို လှမ်းယူလိုက်ပြီး တိုးညင်းစွာ ကျေးဇူးတင်စကားဆိုလိုက်ကာ.. ၎င်းနောက်တွင်မူ ၎င်းတို့နှစ်ဦးစလုံး စကားလက်ဆုံ ကျနေခဲ့ကြတော့သည်။

​ဆယ်မိနစ်ခန့် ကြာမြင့်ပြီးနောက်တွင်မူ.. ပန်းဆိုင်၏ ပြင်ပဆီမှနေ၍ ဆူညံလှသော ခြေသံများ ရုတ်တရက် ထွက်ပေါ်လာခဲ့တော့သည်။

​၎င်းနောက်တွင်မူ အုပ်စုလိုက်ဖြစ်နေသော လူအများအပြားသည် စကားတပြောပြော.. တခိခိ ရယ်မောလျက် ဆိုင်အတွင်းသို့ တိုးဝှေ့ဝင်ရောက်လာခဲ့ကြရာ...၎င်းတို့မှာ အတူတကွ လာရောက်ကြသော ဝယ်ယူသူများ ဖြစ်ကြကြောင်း ထင်ရှားလှပေသည်။

​ကုချန် ၎င်းတို့၏ ပေါ်ပေါက်လာမှုကို မြင်လိုက်ရသည့်အခါ စိတ်ထဲမှနေ၍ တိုးညင်းစွာ တွေးတောလိုက်မိသည်။

​‘နောက်ဆုံးတော့... ရောက်လာကြပြီပေါ့’

​သူ ယခုကဲ့သို့သော အချိန်အခါမျိုးကို ရွေးချယ်၍ ပန်းဆိုင်သို့ လာရောက်ခဲ့ခြင်းမှာ...ဤဇာတ်ကွက် အလှည့်အပြောင်း အတွက်ကြောင့်ပင် ဖြစ်၏။

​မူရင်းစာအုပ်၏ ဇာတ်ကြောင်းအရ ဆိုပါက ဝမ်လိရွှမ်းသည် ယခုကဲ့သို့သော အချိန်မျိုးတွင် ပန်းဆိုင်သို့ ရောက်ရှိလာခဲ့ရမည် ဖြစ်သည်။ (အခုမရောက်ရှိ)

သို့သော်လည်း ယခုတစ်ကြိမ်တွင်မူ သူသည် ပန်းများကို ကျောက်ယွင်ယန်ထံသို့ ပေးရန်အပ်ခြင်းမျိုး မဟုတ်ဘဲ.. လတ်တလော အချိန်ကာလအတွင်း မိမိအပေါ် ဂရုစိုက်ပေးခဲ့မှုများအတွက် ကျေးဇူးတင်စကား ဆိုနိုင်ရန် အန်ယွီမုန်ထံသို့ ပြန်လည် ပေးအပ်ရန် ရည်ရွယ်ထားခဲ့ခြင်း ဖြစ်၏။

​ထိုအချိန်၌ ဝယ်ယူသူ အများအပြား ဆိုင်အတွင်းသို့ ရုတ်တရက် ရောက်ရှိလာခဲ့ကြသဖြင့်.. အန်ယွီမုန် တစ်ဦးတည်းအနေဖြင့် အရာအားလုံးကို အဆင်ပြေအောင် ကိုင်တွယ်နိုင်စွမ်း ရှိတော့မည် မဟုတ်ချေ။ 

ကျန့်ရှောင်ယင်မှာမူ အတန်းတက်နေဆဲ ဖြစ်သလို.. ဆိုင်တွင် လာရောက်ကူညီပေးလေ့ရှိသော အခြားကျောင်းသားတစ်ဦးမှာလည်း အလုပ်ကိစ္စတစ်ခု ရှိနေသဖြင့် ၎င်းတို့နှစ်ဦးစလုံးမှာ လာရောက်ကူညီနိုင်စွမ်း မရှိကြချေ။

​ထိုသို့သော အခြေအနေမျိုးတွင် ဝမ်လိရွှမ်းသည် စနစ် ၏ ကူညီပံ့ပိုးမှုဖြင့် အန်ယွီမုန်နှင့်အတူ ပန်းစည်းများကို မိတ်ဆက်ပေးခြင်းနှင့် ရောင်းချပေးခြင်းများကို အတူတကွ လုပ်ဆောင်ပေးခဲ့ရာမှတစ်ဆင့်.. ၎င်းတို့နှစ်ဦးစလုံး အချင်းချင်း ပိုမို၍ ရင်းနှီးကျွမ်းဝင်မှုများ ရှိသွားမည့်ဇာတ်ကွက်ဖြစ်သည်။

​သို့သော်လည်း ယခုတစ်ကြိမ်တွင်မူ ကုချန်သည် ဝမ်လိရွှမ်း၏ တည်ရှိမှုကို တိုက်ရိုက်ပင် အစားထိုးပစ်လိုက်ပြီ ဖြစ်၏။

​သူသည် စနစ်ပိုင်ရှင်တစ်ဦး ဖြစ်သလို ထောက်လှမ်း‌ရေးမျက်လုံးကိုလည်း ပိုင်ဆိုင်ထားသူ ဖြစ်သဖြင့်.. ဤပန်းများ၏ အမျိုးအစား.. စရိုက်လက္ခဏာများနှင့် ပြုစုပျိုးထောင်ပုံ နည်းစနစ်များကို အားလုံး အသေးစိတ် သိရှိနားလည်ထားပြီး ဖြစ်ပေသည်။ 

ဝမ်လိရွှမ်း အဘယ်ကြောင့် ယခုအချိန်အထိ ရောက်ရှိမလာခဲ့သနည်းဟူသော အချက်မှာမူ...ကုချန်သည် လွန်ခဲ့သော ညကပင် လူအနည်းငယ်ကို စေလွှတ်၍ သူ့ကို လူအများရှေ့မှောက်၌ သူ အပြစ်ပြုလုပ်ရန် စီစဉ်ခဲ့ခြင်းကြောင့် ဖြစ်၏။

တိုက်ခိုက်ရေးအဆင့် စွမ်းအား၅၀၀ ကျော် ကို အသစ်စက်စက် ရရှိထားကာ သွေးကြွနေသော လူငယ်တစ်ဦးဖြစ်သည့် ဝမ်လိရွှမ်းအနေဖြင့် မည်ကဲ့သို့ သည်းခံနိုင်စွမ်း ရှိပါမည်နည်း။ သူသည် ယခုအချိန်၌ ရဲစခန်းတွင် စစ်ဆေးမေးမြန်းခြင်းကို ခံနေရလောက်ပြီ ဖြစ်ပေသည်။

​အန်ယွီမုန်သည် ဆိုင်အတွင်းသို့ ရုတ်တရက် တိုးဝှေ့ဝင်ရောက်လာကြသော ခြေသံများကို ကြားလိုက်ရသည့်အခါ မျက်နှာထက်တွင် ပျာယာခတ်မှု အရိပ်အယောင်အချို့ ဖျတ်ခနဲ ဖြတ်သန်းသွားခဲ့ရသည်။

​သူမအနေဖြင့် ပန်းဆိုင်၏ နေ့စဉ် လုပ်ငန်းဆောင်တာများကို လုပ်ဆောင်ရာ၌ ကျင့်သားရနေခဲ့ပြီ ဖြစ်သော်လည်း.. ဝယ်ယူသူ အများအပြား တစ်ပြိုင်နက်တည်း ရုတ်တရက် ရောက်ရှိလာခြင်းက သူမကို အနည်းငယ် အငိုက်မိသွားစေခဲ့သည်မှာ အမှန်ပင် ဖြစ်၏။ 

သို့သော်လည်း သူမသည် မိမိကိုယ်ကိုယ် အလျင်အမြန်ပင် ပြန်လည်တည်ငြိမ်အောင် ထိန်းချုပ်လိုက်ပြီး.. မျက်နှာထက်တွင် ညင်သာသော အပြုံးတစ်ခုကို ဖန်တီးလျက် ရှေ့သို့ လှမ်းတက်ကာ တိုးညင်းစွာ မေးမြန်းလိုက်သည်။

​"ညီမတို့... ဘာပန်းမျိုး ဝယ်ယူချင်လို့လဲရှင်"

​ဆိုင်အတွင်းသို့ ရောက်ရှိလာကြသူ အနည်းငယ်မျှမကရှိပြီး ၎င်းတို့အားလုံးမှာ မိန်းကလေးများ ဖြစ်ကြသည်။ 

၎င်းတို့သည် ပန်းစင်ပတ်ပတ်လည်တွင် စိတ်လှုပ်ရှားစွာဖြင့် ဝိုင်းအုံကြည့်ရှုနေခဲ့ကြပြီး.. မေးခွန်းများကိုလည်း တစ်ပြိုင်နက်တည်း ပြိုင်တူ မေးမြန်းလာခဲ့ကြတော့၏။

​မေးခွန်းတစ်ခုပြီးတစ်ခု ဆက်တိုက် ထွက်ပေါ်လာခဲ့သဖြင့်.. အန်ယွီမုန်အနေဖြင့် အတတ်နိုင်ဆုံး ကြိုးပမ်းဖြေကြားပေးနေခဲ့သော်လည်း အခြေအနေကို အပြည့်အဝ ထိန်းချုပ်ရန် ရုန်းကန်နေရသည်မှာ သိသာလှပေသည်။

​ကုချန် သင့်တော်သော အခိုက်အတန့်သို့ ရောက်ရှိလာခဲ့ပြီ ဖြစ်ကြောင်း သတိပြုမိလိုက်သဖြင့်.. သူ တည်ငြိမ်သော လေသံဖြင့် ကြားဖြတ်၍ လှမ်းပြောလိုက်တော့၏။

​"ညီမတို့... ဘာပန်းမျိုး ဝယ်ယူချင်လို့လဲ  ပြောပြပါ... ငါ ညီမတို့အတွက် သင့်တော်မယ့် ပန်းတွေကို ညွှန်းပေးပါ့မယ်"