အခန်း (၁) - ဇာတ်လမ်းက တစ်ဝက်ကျိုးနေမှ ဗီလိန်အဖြစ်ကူးပြောင်းခြင်း
‘ဟင်…ငါ ဒီလိုကြီး ကူးပြောင်းလာတာလား…မြန်ဆန်လွန်းလို့ စီစဉ်ချိန်တောင် မရလိုက်ဘူး’
ကုချန် တစ်ယောက် သန့်စင်ခန်းမှန်ရှေ့မှာ ရပ်ရင်း... မှန်ထဲက စိမ်းသက်သလိုလို ရင်းနှီးသလိုလို ဖြစ်နေတဲ့ မိမိကိုယ်ကိုယ် ကြည့်ပြီး မညည်းတွားဘဲ မနေနိုင်ခဲ့ပေ။
လွန်ခဲ့တဲ့ မိနစ်ပိုင်းလောက်ကတင် သူ အလုပ်လုပ်ရင်း သန့်စင်ခန်းထဲ ခိုးဝင်ပြီး ဖုန်းပွတ်... ဗီဒီယိုကြည့်နေခဲ့တာ။
ရလဒ်ကတော့ ဘော့စ် (သူဌေး) မိသွားတာပေါ့။
ကုချန် တစ်ယောက် အရမ်းလန့်သွားပြီး စိတ်ထဲကနေ မသိစိတ်အရ ဆုတောင်းလိုက်မိတယ်
‘တစ်ယောက်ယောက် ငါ့ကို လာကယ်ပါဦး’
ဒါပေမဲ့ ကယ်တင်ရှင် ရောက်မလာဘဲ သူ့လက်ထဲက ဖုန်းက "ဘန်း" ဆိုပြီး ရုတ်တရက် ပေါက်ကွဲသွားခဲ့သည်။
ဟုတ်တယ်... တကယ်ကြီး ပေါက်ကွဲသွားတာ။
စူးရှတဲ့ အလင်းဖြူကြီး လက်ခနဲ ဖြစ်သွားပြီးနောက် ကုချန် တစ်ကမ္ဘာလုံး ချာချာလည်သွားသလို ခံစားလိုက်ရပြီး မျက်လုံး ပြန်ဖွင့်လိုက်ချိန်မှာတော့ သူက ဒီစိမ်းသက်လှတဲ့ သန့်စင်ခန်းထဲကို ရောက်နေခဲ့ပြီ ပဲဖြစ်သည်။
မှန်ထဲက လူက ရုပ်ရည်သန့်ပြန့်ပြီး အေးစက်စက် အရှိန်အဝါရှိတယ်... ဝတ်စုံပြည့် ဝတ်ထားပေမဲ့ နက်ကတိုင်က တွန့်လိမ်စောင်းရွဲ့နေပြီး လူက အားအင်ကုန်ခမ်း နွမ်းလျနေတဲ့ ပုံစံမျိုး ထွက်ပေါ်နေတယ်။
သူ လက်လှမ်းပြီး မှန်မျက်နှာပြင်ကို ထိလိုက်တော့... လက်ဖျားထိပ်က အေးစက်စက် ခံစားချက်က အရမ်းကို လက်တွေ့ဆန်လွန်းတာကြောင့် ရင်တွေတောင် တဒိန်းဒိန်း ခုန်လာရတယ်။
ဒီအချိန်မှာပဲ စိမ်းသက်နေတဲ့ မှတ်ဉာဏ်တွေက ဒီရေလိုပဲ သူ့ဦးနှောက်ထဲ အလုအယက် တိုးဝင်လာခဲ့တယ်။
ကုချန် လက်ဆေးကန်ကို အားပြုမှီထားလိုက်ရပြီး သူ့နားထင်တွေက တဒုတ်ဒုတ်နဲ့ ပြင်းပြင်းထန်ထန် တုန်ခါလာခဲ့သည်။
ဒီမှတ်ဉာဏ်တွေထဲက လူက သူ့နဲ့ နာမည်တူရုံတင်မကဘဲ ရုပ်ရည်ကပါ တစ်ပုံစံတည်း တူနေတာ။
ကုချန် စိတ်ကို အတတ်နိုင်ဆုံး တည်ငြိမ်အောင် ထိန်းပြီး ခေတ္တမျှ စဉ်းစားလိုက်တော့မှ အခြေအနေကို ချက်ချင်း သဘောပေါက်သွားတော့သည်။
"ဒါ... ငါ ဖတ်နေကျ ဇာတ်လမ်းမဆုံးသေးတဲ့ ဝတ္ထုထဲက ဇာတ်ကွက် မဟုတ်ဘူးလား နေပါဦး... ငါက ဘာလို့ ဗီလိန် ဖြစ်နေရတာလဲ"
【 ဒေါင် ဝိညာဉ်ကူးပြောင်းခြင်း အောင်မြင်ပါသည် ‘ဗီလိန်စနစ်’ နှင့် ချိတ်ဆက်မှု ပြီးမြောက်ပါပြီ 】
【 ဤစနစ်သည် အိမ်ရှင် အား အင်အားအကြီးဆုံး ဗီလိန်ဖြစ်လာစေရန်... ကံကြမ္မာကို ပြောင်းလဲစေရန်နှင့် ဇာတ်ကောင်မင်းသားကို ပြန်လည်တိုက်စစ်ဆင် ချေမှုန်းနိုင်ရန် ကူညီပေးဖို့ ရည်ရွယ်ပါသည်။ 】
"စနစ် "
ခေါင်းထဲက ထွက်ပေါ်လာတဲ့ အသံကို ကြားလိုက်ရတော့ ကုချန်ရဲ့ မျက်ဝန်းတွေ ချက်ချင်း တောက်ပသွားခဲ့တယ်။
(Lazy nerds ဝဘ်ဆိုဒ်) မှာ ဝတ္ထုပေါင်း များစွာ ဖတ်ဖူးတဲ့ စာဖတ်ပရိသတ်တစ်ယောက်အနေနဲ့ ‘စနစ်’ ဆိုတဲ့ ရွှေလက်ချောင်း ကို သူ ကောင်းကောင်းကြီး ရင်းနှီးပြီးသားလေ။
ကုချန် တစ်ယောက် စိတ်လှုပ်ရှားစွာ လက်ဝါးချင်းပွတ်ရင်း စိတ်ထဲကနေ အလောတကြီး မေးလိုက်သည်။
"စနစ်... မင်းမှာ ဘာစွမ်းဆောင်ရည်တွေ ရှိလဲ ငါ့ကို မြန်မြန်ပြောပြစမ်း"
【 စနစ်၏ စွမ်းဆောင်ရည်များမှာ အောက်ပါအတိုင်း ဖြစ်ပါသည် 】
【 ဗီလိန်အမှတ် - အိမ်ရှင်အနေဖြင့် ‘ကံကြမ္မာရဲ့ သားတော်’ (မင်းသား) ကို ဖိနှိပ်ခြင်းနှင့် ‘ကံကြမ္မာရဲ့ မင်းသမီးများ’ (မင်းသမီးများ) ရဲ့ စိတ်ကို သိမ်းပိုက်ခြင်းဖြင့် ဗီလိန်အမှတ်များ ရရှိနိုင်ပါသည်။ ဗီလိန်အမှတ်များကို အသုံးပြု၍ စကေး များ... ပစ္စည်းများနှင့် ကိုယ်ပိုင်အရည်အချင်း များကို လဲလှယ်မြှင့်တင်နိုင်ပါသည်။ 】
【 ဇာတ်ကွက် ကြိုတင်မြင်ကွင်း - အိမ်ရှင်သည် ရှေ့ဆက်ဖြစ်မည့် ဇာတ်ကွက်များကို ကြိုတင်ဖွင့်လှစ်ကြည့်ရှုနိုင်ပြီး အရေးကြီးသော သတင်းအချက်အလက်များကို ရယူနိုင်ပါသည်။ 】
ကုချန်က စနစ်က ဆက်ပြောဦးမယ် ထင်နေတာ... ဒါပေမဲ့ ခဏကြာတဲ့အထိ ဘာသံမှ ထွက်မလာတော့ဘူး။
ကုချန် တစ်ယောက် စနစ်က ဆက်ပြောမယ့်စကားကို မျှော်လင့်ချက်အပြည့်နဲ့ နားစွင့်နေခဲ့ပေမဲ့... စနစ်က ရုတ်တရက်ကြီး တစ်စုံတစ်ယောက်က Pause (ရပ်တန့်ခြင်း) ခလုတ် နှိပ်လိုက်သလိုမျိုး တိတ်ဆိတ်သွားခဲ့သည်။
"ဒါပဲလား"
ကုချန် ကြောင်အသွားပြီးနောက် မကျေမနပ်နဲ့ ထပ်မေးလိုက်တယ်။
"လူသစ် လက်ဆောင်ထုပ် တို့ ဘာတို့ကော မရှိဘူးလား"
【 ဪ... ဟုတ်သားပဲ လူသစ်လက်ဆောင် ထုတ်ပေးနေပါသည်... 】
【လူသစ်လက်ဆောင် ထုတ်ပေးမှု မအောင်မြင်ပါ 】
ကုချန်ရဲ့ မျက်နှာက ချက်ချင်းပဲ ‘ မဲမှောင် သွားခဲ့ ပါတော့တယ်။
"မင်း ငါ့ကို နောက်နေတာလား"
【 စိတ်မကောင်းပါဘူး အိမ်ရှင်… စနစ်က အခုမှ အလုပ်စတင်တာဖြစ်ပြီး ဗီလိန်အမှတ်လည်း အများကြီးမရှိသေးလို့.. တကယ့်ကို ကောင်းမွန်တဲ့ လက်ဆောင် တစ်ခုကို မထုတ်ပေးနိုင်သေးလို့ပါ】
"အဲဒါဆိုရင် မင်းက ငါ့ကို ဒီလိုအချိန်ကြီးမှ ဘာလို့ ဆွဲခေါ်လာရတာလဲ" ကုချန် သွေးတိုးလာသလို ခံစားလိုက်ရသည်။
"အခု ဇာတ်ကွက်က ဘယ်အခြေအနေ ရောက်နေပြီလဲဆိုတာ မင်း မသိတာတော့ မဟုတ်ပါဘူးနော်… ဇာတ်လမ်းက တစ်ဝက်တောင် ကျိုးနေပြီဟ"
"ဇာတ်ကောင်မင်းသမီး သုံးယောက်စလုံးက မင်းသားဘက်ကို ဘက်ပြောင်းသွားကြပြီ မင်းက ငါ့ကို ဘာပစ္စည်းမှမပေးဘဲ ဒီအချိန်ကြီးမှ ဆွဲခေါ်လာပြီး ငါ့ကို နိုင်အောင်တိုက်ခိုင်းနေတာလား"
"ဖြေစမ်း"
"ငါ့မျက်လုံးကို သေသေချာချာ ကြည့်ပြီးဖြေ"
မှန်တာပေါ့... ကုချန် တစ်ယောက် သူ့ခေါင်းထဲက အမှတ်သညာတွေကို ပြန်တွေးကြည့်လိုက်တော့မှ ဒါက ထိုဝတ္ထုရဲ့ ဇာတ်လမ်းအလယ်ပိုင်း ရောက်နေပြီဆိုတာ သိလိုက်ရသည်။
ဒီအချိန်မှာ အဓိက မင်းသမီး သုံးယောက်စလုံးက ကုချန် စီမံခန့်ခွဲနေတဲ့ ကုမ္ပဏီရဲ့ ရှယ်ယာ ၅၀ ရာခိုင်နှုန်းကို သိမ်းပိုက်ထားပြီးသားဖြစ်ပြီး... အခုလောလောဆယ်မှာပဲ သူ့ကို စီမံခန့်ခွဲမှုအလွှာကနေ ကန်ထုတ်ဖို့ အစည်းအဝေးလုပ်ပြီး ကြိုးစားနေကြတာ။
ဒါကို တွေးမိတော့ ကုချန် ဒေါသထွက်လွန်းလို့ သွေးတက်ချင်သွားတယ်။
ဒီ မူလခန္ဓာကိုယ်ပိုင်ရှင် ဗီလိန်အစစ်က တကယ့်ကို အူကြောင်ကြောင် အချစ်ရူး တစ်ယောက်ပဲ။
မြို့တော်ရဲ့ ထိပ်သီးမိသားစုကြီးလေးခုထဲက ချမ်းသာတဲ့ သခင်လေးတစ်ယောက် ဖြစ်နေတာကို... ဘာပဲလုပ်လုပ် ရတာကို... တစ်နေ့ကုန် ကောလိပ်ကျောင်းသူလေးတစ်ယောက်နောက်ပဲ တကောက်ကောက် လိုက်နေခဲ့တာ။
အချစ်ရူး တာက ထားပါတော့... ကုမ္ပဏီရဲ့ ရှယ်ယာ ၂၀ ရာခိုင်နှုန်းကိုတောင် အဲဒီမိန်းကလေးရဲ့ မွေးနေ့လက်ဆောင်အဖြစ် ပေးလိုက်သေးတယ်။
ရလဒ်က ဘာလဲ အဲဒီမိန်းကလေးက အဲဒီရှယ်ယာတွေကို သုံးပြီး သူ့ကို ပြန်နှိပ်ကွပ်ဖို့ လုပ်တော့တာပဲ။
မူလဗီလိန်က အဲဒီသစ္စာဖောက်မှုကို ခံစားလိုက်ရပြီး စိတ်ထိခိုက်ကာ သန့်စင်ခန်းထဲမှာ လဲကျသွားခဲ့ပုံရတယ်။
အဲဒီနောက်မှာတော့ ကုချန်က ကူးပြောင်းရောက်ရှိလာခဲ့တာ ဖြစ်တယ်။
ဒီလို အချစ်ရူး ကောင်ရဲ့ ခန္ဓာကိုယ်ကို သုံးပြီး အခြေအနေကို ပြောင်းပြန်လှန်ရမယ်လို့ တွေးလိုက်မိတော့ ကုချန် သွေးတိုးနှုန်း မြှင့်တက်သွားရတယ်။
【 ကျေးဇူးပြု၍ စိတ်အေးအေးထားပါ အိမ်ရှင် ဒါက ဝိညာဉ်ပူးကပ်ခြင်း မဟုတ်ဘဲ ခန္ဓာကိုယ်တစ်ခုလုံး ကူးပြောင်းလာခြင်း ဖြစ်ပါတယ်။ ‘ကု’ မိသားစုရဲ့ သွေးမျိုးဆက် DNA ကိုသာ သင့်ရဲ့ မျိုးရိုးဗီဇထဲ ပေါင်းစပ်ပေးထားတာပါ 】
【 အိမ်ရှင်ကို မူလအိမ်ရှင်နဲ့ နာမည်တူ ရုပ်တူ အမြွှာညီအစ်ကိုလို့ နားလည်နိုင်ပြီး... မည်သူမျှ အမှန်တရားကို သိရှိနိုင်မည်မဟုတ်ပါ 】
ဒါကို ကြားလိုက်ရတော့မှ ကုချန်ရဲ့ စိတ်က နည်းနည်း ပြန်ငြိမ်သွားတယ်။
သူ စိတ်အေးအေးထားပြီး ခေါင်းထဲက အမှတ်သညာတွေကို စီစစ်လိုက်တော့ ကုမိသားစုအကြောင်း သတင်းအချက်အလက်တွေက တဖြည်းဖြည်း ရှင်းလင်းလာခဲ့တယ်။
မူလအိမ်ရှင်က မြို့တော်ရဲ့ ထိပ်သီးမိသားစုကြီးလေးခုထဲက တစ်ခုဖြစ်တဲ့ ကုမိသားစုရဲ့ တစ်ဦးတည်းသော သားဖြစ်သည်။
မိမိကိုယ်ကိုယ် သက်သေပြဖို့အတွက် သူ အသက် ၁၈ နှစ်မှာ ဟိုင်ချန်မြို့ကို လာပြီး စီးပွားရေးလုပ်ငန်း စတင်ခဲ့ကာ... ဟိုင်ချန်မြို့ရဲ့ လက်ရှိထိပ်တန်းလုပ်ငန်းစုကြီးဖြစ်တဲ့ ‘ထျန်းချန်လုပ်ငန်းစု’ ကို တစ်ကိုယ်တော် တည်ထောင်ခဲ့တာ ဖြစ်တယ်။
ဒါပေမဲ့ ကံဆိုးစွာပဲ... မင်းသမီးတွေထဲက တစ်ယောက်ဖြစ်တဲ့ ရှန်ကျီဝေ နဲ့ တွေ့ပြီးနောက်မှာတော့ မူလဗီလိန်က သူ့အသိစိတ်တွေကို လုံးဝ ဆုံးရှုံးသွားခဲ့ရတယ်။
သို့သော်လည်း မူရင်းဝတ္ထုဇာတ်ကွက်အရ မူလဗီလိန်က သေမသွားခဲ့ပါဘူး... သူ့ကို အင်အားကြီးတဲ့ အဖွဲ့အစည်းတစ်ခုဖြစ်တဲ့ ‘ကုမိသားစု’ က ပြန်ခေါ်သွားခဲ့တာ။
အဲဒီနောက်ပိုင်းမှာတော့ သူ့အကြောင်း ဇာတ်ကွက်တွေ မရှိတော့ဘူး။
"ဥက္ကဋ္ဌကု... ရှယ်ယာရှင်တွေအားလုံး ဥက္ကဠကို စောင့်နေကြပါတယ်ခင်ဗျာ"
တံခါးအပြင်ဘက်ကနေ လက်ထောက်ဖြစ်သူရဲ့ စိုးရိမ်တကြီး သတိပေးသံ ထွက်ပေါ်လာပြီး ကုချန်ရဲ့ အတွေးတွေကို ဖြတ်တောက်လိုက်တယ်။
သူ မော့ကြည့်လိုက်ပြီး သန့်စင်ခန်းမှန်ထဲက မိမိကိုယ်ကိုယ် တစ်ချက်ကြည့်ကာ အသက်ပြင်းပြင်းရှူလိုက်တယ်။ ပြီးနောက် နက်ကတိုင်ကို ပြန်ပြင်ပြီး သန့်စင်ခန်းထဲကနေ လှမ်းထွက်ခဲ့လိုက်တယ်။
ကုချန်ရဲ့ နှုတ်ခမ်းထောင့်မှာ အေးစက်စက် အပြုံးတစ်ခု ပေါ်လာပြီး သူ့ရဲ့ သွယ်လျတဲ့ လက်ချောင်းလေးတွေနဲ့ ဝတ်စုံရဲ့ လက်မောင်းအနားသတ်ကို ခါထုတ်လိုက်တယ်။
သူ့ရဲ့ ကုမ္ပဏီကို လိုချင်ကြတယ်ပေါ့လေ သူတို့မှာ အဲဒီလို အရည်အချင်းမျိုး ရှိမရှိ စောင့်ကြည့်ရသေးတာပေါ့။
စင်္ကြံလမ်းရဲ့ မီးရောင်က သူ့ရဲ့ ရှည်လျားတဲ့ အရိပ်ကို ထင်ဟပ်စေတယ်။
ကုချန် လျှောက်လှမ်းရင်းနဲ့ သူ့ရဲ့ စနစ်မျက်နှာပြင် ကို ဖွင့်ကြည့်လိုက်တယ် -
【 အမည် - ကုချန် 】
【 အဆင့်အတန်း - ဗီလိန် 】
【 အသက် - ၂၃ နှစ် 】
【 ခွန်အား - ၇၈ (သာမန်လူကြီးတစ်ယောက်၏ ပျမ်းမျှခွန်အားမှာ ၆၆ ဖြစ်သည်) 】
【 ဆွဲဆောင်မှု - ၈၈ (အမြင့်ဆုံးသတ်မှတ်ချက် ၁۰۰... စာဖတ်သူများအတွက် ၁၀၁) 】
【 ဗီလိန်အမှတ် - ၀ 】
【 ပစ္စည်းများ - မရှိသေးပါ 】
【 စကေးများ - မရှိသေးပါ 】
"ဟက်... တကယ့်ကို ဘာမှမရှိတဲ့ ကွက်လပ်အခြေအနေကနေ စရတာပဲ"
ကုချန် ခပ်ဖွဖွ နှာခေါင်းရှုံ့လိုက်ပြီး ပြကွက်ကို ပိတ်ကာ လေးလံတဲ့ ကျွန်းသားတံခါးကြီးကို တွန်းဖွင့်လိုက်တယ်။
"ကျွီ… "
တံခါးပတ္တာ လည်ပတ်သံက တိတ်ဆိတ်နေတဲ့ စင်္ကြံလမ်းမှာ ထူးထူးခြားခြား ကျယ်လောင်စွာ ထွက်ပေါ်လာခဲ့တယ်။
အစည်းအဝေးခန်းမအတွင်းက ဆွေးနွေးသံတွေ ချက်ချင်း ရပ်တန့်သွားပြီး လူတိုင်းရဲ့ အကြည့်တွေက တံခါးဆီသို့ တပြိုင်နက်တည်း ရောက်ရှိလာကြတယ်။
လူတိုင်းရဲ့ အကြည့်တွေကို ရင်ဆိုင်ရင်း ကုချန်က တည်ငြိမ်အေးဆေးစွာနဲ့ အဓိက သဘာပတိခုံဆီသို့ လျှောက်လှမ်းသွားခဲ့တယ်။
စားပွဲအရှည်ကြီးရဲ့ တစ်ဖက်မှာတော့ စရိုက်လက္ခဏာ မတူညီကြပေမဲ့ တစ်ယောက်စီတိုင်း ညှို့ဓာတ်ပြင်းပြင်းနဲ့ လှပလွန်းကြတဲ့ အမျိုးသမီး သုံးယောက် ထိုင်နေကြတယ်။
【 အမည် - စူးချင်းလန် 】
အဆင့်အတန်း - လန်ဖုန်းလုပ်ငန်းစု၏ အဓိကထိန်းချုပ်သူ... ကံကြမ္မာရဲ့ မင်းသမီး
ခွန်အား - ၆၀
နှစ်သက်မှု - (-၆၀)
ရရှိနိုင်မည့် ဗီလိန်အမှတ် - ၁,၀၀၀
ကိုယ်ရေးအကျဉ်း - အသက် ၂၄ နှစ်တွင် မိသားစုစီးပွားရေးဖြစ်သော ‘လန်ဖုန်းလုပ်ငန်းစု’ ကို လွှဲပြောင်းရယူခဲ့ပြီး ဟိုင်ချန်မြို့၏ ထိပ်တန်းလုပ်ငန်းကြီးတစ်ခုဖြစ်အောင် မြှင့်တင်ခဲ့သူ။
【 အမည် - ရှန်ကျီဝေ 】
အဆင့်အတန်း - ဟိုင်ချန်တက္ကသိုလ်ကျောင်းသူ... ကံကြမ္မာရဲ့ မင်းသမီး
ခွန်အား - ၅၀
နှစ်သက်မှု - (-၆၆)
ရရှိနိုင်မည့် ဗီလိန်အမှတ် - ၁,၀၀၀
ကိုယ်ရေးအကျဉ်း - ဟိုင်ချန်တက္ကသိုလ်မှ ပါရမီရှင် ထိပ်တန်းကျောင်းသူ... အသက် ၂၁ နှစ်အရွယ်မှာတင် ပညာရေးဆိုင်ရာ ဆုတံဆိပ်များစွာကို ဆွတ်ခူးထားသူ။
【 အမည် - ချင်ယုနင် 】
အဆင့်အတန်း - ချင်မိသားစုခေါင်းဆောင်၏ တစ်ဦးတည်းသောသမီး... ကံကြမ္မာရဲ့ မင်းသမီး
ခွန်အား - ၅၅
နှစ်သက်မှု - (-၇၀)
ရရှိနိုင်မည့် ဗီလိန်အမှတ် - ၁,၀၀၀
ကိုယ်ရေးအကျဉ်း - ဟိုင်ချန်မြို့ ချင်မိသားစုရဲ့ ရင်နှစ်သည်းချာ သမီးရတနာ... ကလေးဘဝတည်းက စည်းစိမ်ချမ်းသာအပြည့်ဖြင့် ကြီးပြင်းလာသူ။
ဒီအမျိုးသမီး သုံးယောက်စလုံးက မူလက သူတို့ရဲ့ နယ်ပယ်အသီးသီးမှာ ထိပ်တန်းခေါင်းဆောင်တွေ ဖြစ်ကြပြီး... ဉာဏ်ရည် နဲ့ အရည်အချင်းက အပြစ်ပြောစရာမရှိအောင် မြင့်မားကြသူတွေပါ။
ဒါပေမဲ့... သူတို့တွေ မူရင်းဝတ္ထုရဲ့ မင်းသား ‘ယဲ့ချန်း’ နဲ့ တွေ့ပြီးကတည်းက သူတို့ရဲ့ မြင့်မားလှတဲ့ IQ တွေက ချက်ချင်းပဲ သုညအထိ ထိုးဆင်းသွားခဲ့ပုံရတယ်။
ယဲ့ချန်း နဲ့ ကုချန်တို့ကြားက ပဋိပက္ခကို သိရှိပြီးနောက်မှာတော့ သူတို့ သုံးယောက်စလုံး ပူးပေါင်းပြီး မူလအိမ်ရှင်ကို နှိပ်ကွပ်ဖို့ လုပ်ဆောင်လာခဲ့ကြတာ။
လက်ရှိအချိန်အထိ ကုချန်အပေါ် ဖိအားပေးမှုတွေအားလုံးက ဒီအမျိုးသမီး သုံးယောက်ရဲ့ လက်ချက်တွေချည်းပဲ ဖြစ်ပြီး... ယဲ့ချန်းကိုယ်တိုင်ကတော့ ဘာအန္တရာယ်မှ မပေးနိုင်သေးဘူး။
ယဲ့ချန်း ဆိုတဲ့ကောင်က... တကယ့်ကို ကံကောင်းလို့ နိုင်နေတဲ့ အကောင်သက်သက်ပဲ