အခန်း (၇၀) လောင်းကစားပွဲ
သင်္ဘောခန်းအတွင်းသို့ ဝင်ရောက်လာသည်နှင့် ရှီယန်သည် သူ၏နောက်ကွယ်တွင် ပုန်းအောင်းနေသော ခရစ် ကို ဆွဲထုတ်လိုက်ပြီး တစ်လုံးချင်း ပြတ်ပြတ်သားသား မေးမြန်းလိုက်သည်။
“အစက မင်းနဲ့ လောင်းကစားလုပ်ခဲ့တဲ့သူက ဘယ်သူလဲ”
ခရစ်က သူ၏ လက်ညှိုးဖြင့် ထိုးပြရင်း ပြောလိုက်သည်။
“သူ၊ သူ… ပြီးတော့ ဟို မျက်လုံးတစ်ဖက်လပ်ကောင်”
ရှီယန်သည် မျက်လုံးများကို စူးစိုက်လိုက်ပြီး တိုးတိုးလေး ပြောလိုက်သည်။
“အော်… မင်းတို့ကောင်တွေပဲကို။ သူတို့ဆီကနေ လိမ်ညာပြီး နိုင်ထားတဲ့ ပစ္စည်းတွေကို အခုချက်ချင်း ပြန်ပေးလိုက်စမ်း။ ဒါဆိုရင် ဒီနေ့ဖြစ်ပျက်ခဲ့တာတွေကို ဘာမှမဖြစ်ခဲ့သလို သဘောထားပေးမယ်”
ထိုလူ ၃ ဦးသည် တစ်ဦးကိုတစ်ဦး အကြည့်ချင်း ဖလှယ်လိုက်ကြပြီးနောက်၊ မျက်လုံးတစ်ဖက်လပ်ကောင်က ဦးဆောင်၍ ပျင်းရိပျင်းတွဲ လေသံဖြင့် ပြောလိုက်သည်။
“ဘုရားသခင် သက်သေထူပါစေဗျာ! လောင်းကစားလုပ်ရင် နိုင်တာရှုံးတာကို လက်ခံရမယ်ဆိုတာ ရာစုနှစ်ပေါင်းများစွာကတည်းက ရှိလာခဲ့တဲ့ စည်းမျဥ်းပဲ။ ငါတို့က ခရစ် ရဲ့ ပစ္စည်းတွေကို အတင်းအဓမ္မ လုယူခဲ့တာ မဟုတ်ဘူး၊ ငါတို့လည်း ကိုယ်ပိုင် ရွှေတွေ ငွေတွေကို လောင်းကြေးအဖြစ် ထုတ်ခဲ့တာပဲ။ အကယ်၍ ငါတို့သာ ရှုံးခဲ့မယ်ဆိုရင်လည်း ငါတို့ပစ္စည်းတွေကို သေချာပေါက် ပေးအပ်မှာဖြစ်ပြီး၊ ဒီကောင်လိုမျိုး သစ္စာဖောက်ပြီး ကတိဖျက်မှာ မဟုတ်ဘူး။ ဒီလို ယုတ္တိဗေဒမျိုးကို လူတိုင်း သိကြပါတယ်၊ မဟုတ်ရင် ငါတို့ အရာရှိချုပ် ဒါမှမဟုတ် လမ်းပြဆီ သွားပြီး အဆုံးအဖြတ် ခံယူမလား။ အကယ်၍ သူတို့နှစ်ယောက်စလုံးက ခေါင်းညိတ်မယ်ဆိုရင် ငါတို့နိုင်ထားတဲ့ ပစ္စည်းတွေကို ကိုယ်တိုင်ပဲ ပြန်ပေးပါ့မယ်!”
ငွေကြေးသည် လူ၏ နှလုံးသားကို လှုပ်ခတ်စေနိုင်သည်၊ ဤလူ ၃ ဦးသည် ရှီယန်၏ အဆင့်အတန်းကို သိရှိထားကြသော်လည်း သူ၏ ‘ဝမ်းကွဲမောင်နှမ’ ကို ရန်စရဲကြသည်မှာ သူတို့သည် သေချာပေါက် ဦးနှောက်မရှိသော လူအနုစားများ မဟုတ်ကြချေ။ ၎င်းတို့အထဲတွင် အရပ်ရှည်ရှည်နှင့် ပိန်ပိန်ပါးပါး လူတစ်ဦးရှိပြီး သူ၏အမည်မှာ ‘ကြွက်’ ရှန်ဒီ ဖြစ်သည်၊ သူသည် ရာသီဥတုကို ခန့်မှန်းရာတွင် အလွန်တရာ ထူးချွန်လှသဖြင့် လမ်းပြ ရှာအာ ၏ ညာလက်ရုံး ဖြစ်လာခဲ့သည်။ ရှာအာ အလုပ်များနေချိန် သို့မဟုတ် တစ်ခုခု ဖြစ်ပွားချိန်တွင် သူသည် လမ်းပြနေရာကို အစားထိုးနိုင်သူဖြစ်သဖြင့် ကပ္ပတိန် အာမန် နှင့် စကားပြောဆိုရာတွင်ပင် သူသည် ကြောက်ရွံ့ခြင်း မရှိချေ။ ထို့ပြင် ထိုမျက်လုံးတစ်ဖက်လပ်ကောင်မှာလည်း ပုံမှန်အားဖြင့် လူလိမ်တစ်ဦးဖြစ်ပြီး မကောင်းမှုမျိုးစုံကို လုပ်ဆောင်တတ်သော်လည်း၊ သူ နှိပ်စက်ခဲ့သော လူများအကြားတွင် လွတ်လပ်စွာ ကျင်လည်ကျက်စားနိုင်ဆဲ ဖြစ်သည်။ အဘယ်ကြောင့်ဆိုသော် သူ၏ မျက်လုံးမှာ အရာရှိချုပ် မျက်နှာမာရွတ်နှင့် ဟာရီ ၏ အသက်ကို ကယ်တင်ရင်း ကွယ်ခဲ့ရခြင်းကြောင့် ဖြစ်သည်။
ဤယုတ်မာသော လူနှစ်ဦးတွင် ရှာအာ နှင့် ဟာရီ ဟူသော ကြီးမားလှသည့် ကျောထောက်နောက်ခံနှစ်ခု ရှိနေကြပြီး၊ ထို့အပြင် အာမန်သည်လည်း ရှီယန်အပေါ် အတော်အတန် မသင်္ကာဖြစ်နေဆဲ ဖြစ်သည်။ ထို့ကြောင့် အကယ်၍ ရှီယန်သာ မိမိစိတ်တိုင်းကျ ဆက်လက်လုပ်ဆောင်နေမည်ဆိုပါက သူသည် ‘ဘဲလ် အန် မတ်ဂ်’ ပေါ်တွင် နောင်တွင် ကြီးမားသော အခက်အခဲများနှင့် ရင်ဆိုင်ရမည်ဖြစ်ပြီး သူ၏ အကျိုးစီးပွားများမှာလည်း ပြင်းထန်စွာ ထိခိုက်ခံရပေလိမ့်မည်။
ရှီယန်အတွက်မူ သူသည် သူ၏ အစွမ်းကုန် ကြိုးစားအားထုတ်မှုနှင့် ကံကောင်းမှုတို့ကြောင့်သာ ဤရာထူးနေရာသို့ တက်လှမ်းနိုင်ခဲ့ခြင်းဖြစ်ရာ၊ ကြီးမားသော ပဋိပက္ခကို ဖြစ်ပေါ်စေမည့် မဆင်မခြင် လှုပ်ရှားမှုမျိုးကို သူ မည်သို့ စွန့်စားလုပ်ဆောင်ပါမည်နည်း။
ထို့ကြောင့် လူအော်ကြီး ဘင်မူဂန် ထံမှ ထိုလူ ၃ ဦးအကြောင်း သတင်းအချက်အလက်များကို စုံစမ်းသိရှိပြီးနောက် ခရစ် ၏ နှလုံးသားထဲတွင် ခေတ္တမျှ ထွက်ပေါ်လာသော မျှော်လင့်ချက်မီးပွားလေးမှာ ထပ်မံ၍ ငြိမ်းသတ်သွားခဲ့ရပြန်သည်။
သို့သော်လည်း ဘဝဆိုသည်မှာ အံ့အားသင့်စရာများနှင့် ပြည့်နှက်နေတတ်သည်၊ ဤကဲ့သို့သော အခြေအနေနှင့် ရင်ဆိုင်ရစဉ် ရှီယန်သည် ထိုလူ ၃ ဦးထံသို့ ရဲရဲဝံဝံ လှမ်းလျှောက်သွားခဲ့ပြီး၊ သူတို့ကို စူးစိုက်ကြည့်ကာ မောက်မာစွာ ပြောဆိုလိုက်သည်။
“မင်းတို့ကောင်တွေ ခရစ် ရဲ့ လောင်းကစားဖဲချပ်တွေပေါ်မှာ ဘာလှည့်ကွက်မှ မသုံးခဲ့ဘူးလို့ အသံကျယ်ကျယ်နဲ့ ပြောရဲလား”
ဤလူ ၃ ဦးသည် ခရစ်ကို သေချာပေါက် ပစ်မှတ်ထားပြီး ထောင်ချောက်ဆင်ခဲ့ကြခြင်းဖြစ်ရာ မည်သို့လျှင် လှည့်ကွက်များ မသုံးဘဲ နေပါမည်နည်း။ ရှီယန်က သူတို့ကို အထင်သေးသော အကြည့်ဖြင့် စိုက်ကြည့်လိုက်သည်။
‘ကြွက်’ ရှန်ဒီ နှင့် အခြားလူတစ်ယောက်မှာ တုန်ဆိုင်းသွားပြီး စကားမပြောရဲကြတော့ချေ၊ သို့သော်လည်း ရိုင်းစိုင်းပြီး အကျိုးအကြောင်းမရှိသော လူမိုက်ဖြစ်သည့် မျက်လုံးတစ်ဖက်လပ်ကောင်ကမူ အရက်ရှိန်ဖြင့် စားပွဲခုံကို ဝုန်းကနဲ ရိုက်လိုက်ပြီး သူ၏ ညာဘက်လက်ညှိုးဖြင့် ရှီယန်၏ နှာခေါင်းကို ထိုးကာ အော်ဟစ်ဆဲဆိုတော့သည်။
“ဒီ ကျိန်စာသင့် အဝါရောင်အသားအရေနဲ့ မျောက်ကောင်… ငါ ဘာလှည့်ကွက်မှ မသုံးဘူး၊ မင်း ဘာလုပ်ချင်လဲ”
ရှီယန်၏ မျက်လုံးများထဲတွင် အေးစက်စက် အကြည့်တစ်ခု ဖျတ်ခနဲ လှုပ်ရှားသွားပြီး၊ သူ၏ နှာခေါင်းကို လာရောက်ထိုးနေသော ထိုရိုင်းစိုင်းလှသည့် လက်ညှိုးကို ဒေါသတကြီး ဖမ်းဆွဲကာ အထက်သို့ ခွန်အားသုံး၍ လိမ်ပစ်လိုက်သည်။ သူ၏ လက်ရှိခွန်အားမှာ ၁၄ မှတ်အထိ မြင့်မားနေပြီဖြစ်ရာ၊ မျက်လုံးတစ်ဖက်လပ်ကောင်သည် နာကျင်စွာဖြင့် အော်ဟစ်ရင်း မသိစိတ်မှ မတ်တတ်ရပ်လိုက်ရပြီး သူ၏ ခန္ဓာကိုယ်တစ်ခုလုံးမှာ ထိတ်လန့်တုန်လှုပ်သွားတော့သည်။
ထိုအချိန်တွင် အပြင်ဘက်မှ ရှင်းလင်းပြီး ကျယ်လောင်လှသော အော်ဟစ်သံတစ်ခု ထွက်ပေါ်လာသည်။
“ရပ်လိုက်စမ်း!”
ထိုလေသံမှာ အရာရှိချုပ် ဟာရီ ၏ အသံဖြစ်ကြောင်း ထင်ရှားလှသည်၊ သူ၏ ခြေလှမ်းများမှာ ကျယ်ပြန့်ပြီး လေးလံလှသဖြင့် အလက်စကာဒေသရှိ ဧရာမ သားရဲတိရစ္ဆာန်ဖြစ်သော ဝက်ဝံသေညိုကြီးတစ်ကောင်ကို သတိရမိစေသည်။
သို့သော်လည်း ရှီယန်ကမူ ခွန်အားကို ရက်ရက်စက်စက် ပိုမိုသုံးစွဲလိုက်ပြီ ဖြစ်သည်။
“ဂလတ်!”
မျက်လုံးတစ်ဖက်လပ်ကောင်သည် နာကျင်လွန်းသဖြင့် စူးစူးဝါးဝါး အော်ဟစ်လိုက်ရသည်၊ သူ၏ လက်ညှိုးမှာ ကန့်သတ်ချက်ထက် ကျော်လွန်၍ ကွေးညွတ်သွားခဲ့ပြီဖြစ်ရာ ရက်ရက်စက်စက် ကျိုးပဲ့သွားခဲ့ပြီ ဖြစ်ကြောင်း ထင်ရှားလှသည်။
အရာရှိချုပ် ဟာရီ သည် ဒေါသတကြီးဖြင့် ဝင်ရောက်လာခဲ့သည်၊ သူသည် အစကတည်းက အရပ်ရှည်ပြီး ထုထည်ကြီးမားသူဖြစ်ရာ၊ ယခုအခါတွင် သူ၏ ခေါင်းလောင်းပုံသဏ္ဌာန် မျက်လုံးကြီးများကို ပြူးကြည့်ရင်း သူ၏ ရက်စက်ကြမ်းကြုတ်သော ပုံစံကို ပြသနေသည်။ သူ၏ ခန္ဓာကိုယ်မှ ဖျော့တော့သော ငွေရောင်အလင်းတန်းတစ်ခု ထွက်ပေါ်လာပြီး၊ သူ၏ လက်သီးကို ကျစ်ကျစ်ပါအောင် ဆုပ်လျက် ခိုင်မာလှသော နံရံကြီးတစ်ချပ်ကဲ့သို့ ပြေးဝင်လာခဲ့သည်။
ဤအချိန်တွင်မှ ဤအရပ်ရှည်ပြီး ပွင့်လင်းလှသော လူကြီးသည် အမှန်စင်စစ် ရက်စက်လှသော လူသတ်စက်ရုပ်ကြီးတစ်ရုပ် ဖြစ်ကြောင်း ရုတ်တရက် သတိပြုမိကြပေလိမ့်မည်။ တစ်ဆက်တည်းမှာပင် ဟာရီ ၏ မျက်လုံးများထဲ၌ ထူထပ်လှသော သွေးကြောနီကြီးများကို ရှီယန် သတိပြုမိလိုက်သည်။
ရှီယန်က သူ၏ လက်ကို ဝှေ့ယမ်းထုတ်လိုက်သည်။
“ဒုန်း!”
သူသည် ဟာရီ ၏ လက်သီးချက်ကို တားဆီးလိုက်သော်လည်း ထိုရိုက်ခတ်မှုကြောင့် ခြေလှမ်းအနည်းငယ် နောက်သို့ ဆုတ်သွားခဲ့ရပြီး၊ ထို့နောက် ထိုလူနှစ်ဦးမှာ တစ်ဦးကိုတစ်ဦး ရက်စက်စွာ စိုက်ကြည့်ရင်း အားပြိုင်နေကြတော့သည်။ သူတို့၏ အကြည့်ချင်း ဆုံတွေ့မှုများအကြား လေထုထဲတွင် မီးပွားများ ထွက်ပေါ်နေသည့်နှယ်ပင်။
ရှီယန်၏ မျက်လုံးများမှာ ဒေါသမီးများ တောက်လောင်နေခဲ့ပြီး သူက အေးစက်စက်ဖြင့် တစ်လုံးချင်း ပြောလိုက်သည်။
“ငါ့ရဲ့ အသားအရေ အရောင်ကို ဘယ်သူမှ မစော်ကားနိုင်ဘူး! ဘယ်သူမှ!”
သူသည် ဤပဋိပက္ခကို လူမျိုးရေးခွဲခြားမှု ပြဿနာအဖြစ် ချက်ချင်းပင် လမ်းကြောင်းပြောင်းပစ်လိုက်ရာ၊ ဟာရီ မှာ စကားအော်အစမရှိ ဆွံ့အသွားခဲ့ရပြီး ထိုအချိန်တွင် လမ်းပြ ရှာအာ လည်း ဤနေရာသို့ အလျင်အမြန် ရောက်ရှိလာခဲ့သည်။ ရှာအာ သည် ဟာရီ တစ်ယောက် ရှီယန်ကို တိုက်ခိုက်မည့်အရေးကို စိတ်အားထက်သန်စွာ မျှော်လင့်ရင်း ဘေးမှနေ၍ ကြည့်ရှုနေခဲ့သည်။
သို့သော်လည်း ဟာရီ သည် အလွန် အတွေ့အကြုံရင့်ကျက်သူဖြစ်ရာ၊ သူက အေးစက်စွာ နှာခေါင်းရှုံ့ရင်း သူ၏ လက်သီးများကို ပြန်လည်ရုပ်သိမ်းလိုက်သဖြင့် ရှာအာ မှာ စိတ်ပျက်သွားခဲ့ရရှာသည်။
‘ကြွက်’ ရှန်ဒီ သည် သူ၏ ကျောထောက်နောက်ခံကို မြင်တွေ့လိုက်ရသောအခါ မီးလောင်ရာလေပင့်ရန် ဆန္ဒကို မထိန်းချုပ်နိုင်တော့ဘဲ ပြောလိုက်သည်။
“သူ စကားမှားသွားတယ်ဆိုရင်တောင် လက်ချောင်းကို ချိုးပစ်လောက်တဲ့အထိတော့ မဖြစ်သင့်ဘူးမလား”
ရှီယန်က သူ၏ ခေါင်းကို လှည့်လိုက်ပြီး အေးစက်စွာ ပြောဆိုလိုက်သည်။
“ဒါဆိုရင် ငါက မင်းကို လူမည်းကောင်လို့ ခေါ်ရင်ကော မင်း စိတ်ထဲ ထားမလား”
ရှန်ဒီ ၏ မျက်နှာအမူအရာမှာ ကြည့်ရဆိုးလောက်အောင် ပျက်ယွင်းသွားခဲ့ပြီး၊ သူ၏ ပုံစံအရ ခါးမှ ဓားကိုဆွဲထုတ်၍ တိုက်ခိုက်တော့မည့်ပုံစံ ရှိနေသော်လည်း ထိုသို့လုပ်ဆောင်ရန် သတ္တိမရှိချေ။
နောက်ဆုံးတွင် ရှာအာ က ဝင်ရောက်စွက်ဖက်ရန် ဆုံးဖြတ်လိုက်ပြီး၊ ရှေ့သို့ လှမ်းထွက်ကာ ဟန်ဆောင်ပန်ဆောင် ပြုံးရင်း ပြောလိုက်သည်။
“သင်္ဘောသား ယန်… မင်းရဲ့ ပါးစပ်ကတော့ ‘လူအော်ကြီး’ ရဲ့ အိမ်သာထက် ဆယ်ဆလောက် ပိုပြီး ညစ်ပတ်တာပဲ”
ရှီယန်က သူ၏ မျက်လုံးထောင့်မှ စောင်းငဲ့ကြည့်လိုက်ပြီး ပြတ်ပြတ်သားသားပင် ပြန်လည်တုံ့ပြန်ခဲ့သည်။
“ကြိုးစင်ပေါ်မှာ ရှိနေသင့်တဲ့ ဒီလို လိမ်လည်လှည့်ဖြားတတ်တဲ့ လူယုတ်မာတွေအတွက် ယဉ်ကျေးပျူငှာနေစရာ မလိုပါဘူး”
ရှာအာ ၏ မျက်နှာမှာ ဒေါသကြောင့် နီမြန်းသွားခဲ့ပြီး သူသည် သူ၏ခါးမှ ဓားကို တစ်ဝက်ခန့် ဆွဲထုတ်လိုက်စဉ်၊ ရုတ်တရက် ဘုန်းကနဲ အသံနှင့်အတူ ငွေရောင်ဓားတစ်လက်မှာ မည်သည့်နေရာမှန်းမသိ လွင့်ပျံလာခဲ့သည်။
“ဒုန်း!”
၎င်းဓားမှာ သူတို့နှစ်ဦးအကြားရှိ နံရာပေါ်တွင် သွားရောက်စိုက်ဝင်သွားခဲ့ပြီး အဆက်မပြတ် တုန်ခါနေခဲ့ရာ၊ ဓားတစ်ခုလုံးတွင် တောက်ပလှသော အရောင်အဝါများ ဖုံးလွှမ်းနေခဲ့သည်။ ၎င်းမှာ သံသယဖြစ်စရာမလိုဘဲ အာမန်၏ ရက်စက်လှသော မိခင်ဓား ဖြစ်သည်။
ထို့နောက် အာမန်သည် ခြေလှမ်းကြီးများဖြင့် လှမ်းဝင်လာခဲ့ပြီး သူ၏ ထက်မြက်သော မျက်လုံးများဖြင့် ပတ်ဝန်းကျင်ကို ဝေ့ဝဲကြည့်ရှုကာ လေသံနှိမ့်၍ ပြောလိုက်သည်။
“ဘာတွေဖြစ်နေလဲဆိုတာ ငါ့ကို ဘယ်သူ ပြောပြနိုင်မလဲ”
မည်သူမျှ ပြန်မဖြေကြချေ။
အာမန်က ရုတ်တရက် ဒေါသထွက်သွားပြီး သူ၏ရှေ့ရှိ စားပွဲခုံကို လက်သီးဖြင့် ထိုးချလိုက်ရာ စားပွဲခုံမှာ အပိုင်းပိုင်းကျိုးပဲ့လျက် လွင့်စင်သွားတော့သည်။ သူက ကျယ်လောင်စွာ ဟောက်လိုက်သည်။
“ဘာတွေဖြစ်နေတာလဲ! ဘာဖြစ်နေလဲဆိုတာ ငါ့ကို ပြောစမ်း! ဟာ့ဘ်ကျွန်း ကို ရောက်ဖို့ နာရီဝက်ပဲ လိုတော့တယ်၊ ဒါပေမဲ့ ‘ဘဲလ် အန် မတ်ဂ်’ ရဲ့ အဖွဲ့ခေါင်းဆောင်၊ အရာရှိချုပ်နဲ့ လမ်းပြတို့က အတွင်းစည်း လူသတ်ပွဲ ဆင်နွှဲနေကြတယ်ပေါ့ဟုတ်လား! မင်းတို့က တခြားပင်လယ်ဓားမြတွေရဲ့ ရှေ့မှာ ငါ့မျက်နှာကို အိုးမည်းသုတ်ချင်ကြတာလား”
ထိုအခါ ဟာရီ က ရှေ့သို့ လှမ်းထွက်လိုက်ပြီး နာကျင်စွာ ခံစားနေရသော မျက်လုံးတစ်ဖက်လပ်ကောင်ကို ကျော်ဖြတ်ကာ၊ အခြေအနေမှန်ကို သိရှိနိုင်ရန်အတွက် အခြားပင်လယ်ဓားမြများကို အသေးစိတ် မေးမြန်းစုံစမ်းလိုက်သည်။ ထို့နောက် သူက အာမန်၏ နားအနီးတွင် စကားအချို့ကို တိုးတိုးလေး ကပ်ပြောလိုက်သည်။
ဟာရီ ၏ စကားကို နားထောင်ပြီးနောက် အာမန်၏ မျက်နှာအမူအရာမှာ ရှင်းလင်းသွားခဲ့ပြီး၊ သူက ရှီယန်ထံသို့ အေးစက်စက် အကြည့်တစ်ချက် ပေးရင်း ပြောလိုက်သည်။
“မင်းက သူ့အတွက် တကယ်ပဲ မတ်တတ်ရပ်ပေးချင်တာလား”
ထိုစကားကို ကြားရသောအခါ ခရစ် ၏ ခန္ဓာကိုယ်တစ်ခုလုံး တုန်လှုပ်သွားခဲ့ရသည်၊ အာမန်သည် ရှီယန်အပေါ်တွင် ကြီးမားသော မသင်္ကာမှုများ ထားရှိနေကြောင်း မျက်မမြင်တစ်ဦးပင် သိရှိနိုင်သည်။ လက်ရှိတွင် အာမန်သည် ရှီယန်ကို ကြီးမားသော ပေးဆပ်မှုမျိုး ပြုလုပ်စေချင်နေသော်လည်း၊ ရှီယန်က တုံ့ဆိုင်းခြင်းမရှိဘဲ ပြန်လည်ဖြေကြားခဲ့သည်။
“ကျွန်တော်တို့ရဲ့ ခန္ဓာကိုယ်ထဲမှာ တူညီတဲ့ သွေးတွေ စီးဆင်းနေပါတယ်၊ ပြီးတော့ ကျွန်တော် သူ့အပေါ်မှာ အသက်ကြွေးတစ်ခု တင်ရှိနေလို့ပါ! ကပ္ပတိန်!”
အာမန်က နှာခေါင်းရှုံ့လိုက်ပြီး တည်ငြိမ်စွာပင် ဆက်လက်ပြောဆိုခဲ့သည်။
“ဒီကိစ္စက ရိုးရှင်းပါတယ်၊ မင်းက သူတို့ လိမ်လည်လှည့်ဖြားခဲ့တယ်လို့ ထင်နေပေမဲ့ မင်းမှာ ဘာသက်သေမှ မရှိဘူး ဟုတ်တယ်မလား”
ရှီယန်က နှိမ့်ချစွာပင် ပြန်လည်ဖြေကြားခဲ့သည်။ “ဟုတ်ကဲ့ပါ”
အာမန်က ‘ကြွက်’ ရှန်ဒီ နှင့် အခြားလူနှစ်ဦးကို အမှိုက်တစ်ခုကို ကြည့်သည့်နှယ် အေးစက်စွာ ဝေ့ကြည့်လိုက်သည်။
“ဒီလူ ၃ ယောက်ရဲ့ အကျင့်စရိုက်ကို ငါ အရင်ကတည်းက ကြားဖူးပါတယ်။ ဒီလိုလုပ်ရအောင်၊ ငါတို့ ပင်လယ်ဓားမြတွေရဲ့ ထုံးစံအတိုင်းပဲ လုပ်ကြတာပေါ့၊ မင်း ရှုံးခဲ့တဲ့အရာကို ရှုံးခဲ့ပြီလို့ပဲ သတ်မှတ်လိုက်မယ်။ အဲဒီအစား ငါ မင်းကို အဲဒါတွေကို ပြန်ပြီးနိုင်အောင် လုပ်ဖို့ အခွင့်အရေးတစ်ခု ပေးမယ်။ မင်း သူတို့နဲ့ နောက်ထပ် လောင်းကစားပွဲ တစ်ပွဲ ထပ်ကစားရမယ်၊ အကယ်၍ မင်း ရှုံးမယ်ဆိုရင် ဒီကိစ္စက ဒီအတိုင်းပဲ ပြီးသွားမယ်၊ အကယ်၍ မင်း နိုင်မယ်ဆိုရင်တော့ ထိုပစ္စည်းက သူ့ရဲ့ မူလပိုင်ရှင်ဆီ ပြန်ရောက်ရမယ်။ ရလဒ်က ဘယ်လိုပဲဖြစ်ဖြစ် ဒီကိစ္စက အဲဒီမှာတင် အဆုံးသတ်ရမယ်! မင်းတို့အားလုံးကော ဘယ်လိုထင်လဲ”
ဤနည်းလမ်းသည် ရှုံးနိမ့်ခဲ့သောအရာကို ပြန်လည်ရယူခြင်းဟူသည့် ပင်လယ်ဓားမြများ၏ ထုံးစံနှင့် ကိုက်ညီလှသည်။ ရှန်ဒီ နှင့် သူ၏ လူယုတ်မာအုပ်စုအတွက်မူ သူတို့သည် လောင်းကစားပွဲတွင် အပြည့်အဝ ယုံကြည်မှု ရှိနေကြပြီး၊ ထို့ပြင် သူတို့သည် အာမန်၏ မျက်နှာကို မထောက်ထားဘဲ မနေရဲကြသဖြင့် မည်သည့်ကန့်ကွက်မှုမျှမရှိဘဲ သဘောတူညီခဲ့ကြသည်။
ဉာဏ်ရည်ခံစားမှု စွမ်းရည်တွင် ၁၃ မှတ်အထိ ရှိနေသော ရှီယန်အတွက်မူ လောင်းကစားပွဲနှင့် ပတ်သက်၍ သူ၌လည်း မည်သည့်ပြဿနာမျှ မရှိချေ။ ယုတ္တိဗေဒအရ အာမန်၏ ဤနည်းလမ်းမှာ ရှီယန်အပေါ် ဘက်လိုက်ပေးထားခြင်း ဖြစ်သည်၊ အဘယ်ကြောင့်ဆိုသော် ရှီယန်အနေဖြင့် မည်သည့်လောင်းကြေးမျှ ထုတ်ရန် မလိုသောကြောင့် ဖြစ်သည်။ သူ ရှုံးနိမ့်ခဲ့လျှင်ပင် အခြားမည်သည့်အရာကိုမျှ ဆုံးရှုံးရလိမ့်မည် မဟုတ်ချေ။
အာမန်၏ ဤလုပ်ဆောင်ချက်မှာ အများပြည်သူတို့၏ မျှော်လင့်ချက်နှင့် များစွာ ဆန့်ကျင်ကွဲလွဲနေခဲ့သည်။ သို့သော်လည်း သူ၏နောက်သို့ နှစ်ပေါင်းများစွာ လိုက်ပါလာခဲ့သော အရာရှိချုပ် ဟာရီ တစ်ဦးတည်းသာ ၎င်း၏ နောက်ကွယ်မှ အကြောင်းရင်းကို သိရှိထားသည်။
ရှီယန်သည် သူ၏ လုပ်ဆောင်ချက်များကြောင့် သင်္ဘောပေါ်ရှိ လူတိုင်းကို ရန်သူဖြစ်အောင် လုပ်နေသည့်ပုံစံ ပေါက်နေသော်လည်း၊ ၎င်းသည် သူ၌ ကိုယ်ပိုင်အုပ်စု ဖွဲ့စည်းလိုသော ကွယ်ဝှက်ထားသည့် ရည်မှန်းချက်များ မရှိကြောင်း အဓိပ္ပာယ်ရသည်။ ကပ္ပတိန်တစ်ဦးအနေဖြင့် အာမန် အကြောက်ဆုံးအရာမှာ ရည်မှန်းချက်ကြီးမားသော လက်အောက်ခံတစ်ဦး ရှိနေခြင်းပင် ဖြစ်သည်၊ ထိုအခါ သူ၏ ကိုယ်ပိုင်ရာထူးနေရာမှာ ကြီးမားသော ခြိမ်းခြောက်မှုအောက်သို့ ရောက်ရှိသွားမည် ဖြစ်သည်။
အာမန်၏ စိတ်နေသဘောထားအရ သူသည် မည်မျှပင် သဘောထားကြီးသည်ဖြစ်စေ ရှီယန်ကို အလွယ်တကူ လွှတ်ပေးလိမ့်မည် မဟုတ်ချေ။ သို့သော်လည်း လက်ရှိ ဖြစ်ရပ်ကြောင့် အာမန်သည် ရှီယန်ကြောင့် ဒေါသထွက်နေကြသော ရှာအာ နှင့် အခြားပင်လယ်ဓားမြအချို့မှာ ဓားကိုပင် ဆွဲထုတ်လိုကြသည်ကို ကိုယ်တိုင်မြင်တွေ့ခဲ့ရသဖြင့် သူ၏ နှလုံးသားမှာ နောက်ဆုံးတွင် စိတ်အေးသွားခဲ့ရပြီ ဖြစ်သည်။
ခန္ဓာကိုယ်နေရာက အတွေးအခေါ်ကို ဆုံးဖြတ်သည်ဟူသော စကားစုတစ်ခု ရှိသည်၊ ပင်လယ်ပြင်ခုနစ်စင်လုံးကို စိုးမိုးရန် ရည်မှန်းချက်ကြီးမားလှသော အာမန်အတွက်မူ သူ၏ လက်အောက်ခံများသည် ရက်စက်ခြင်း၊ ရိုင်းစိုင်းခြင်း၊ ယုတ်မာခြင်း သို့မဟုတ် လွန်လွန်ကဲကဲ လောဘကြီးခြင်းတို့မှာ အရေးမကြီးလှပေ၊ ၎င်းတို့ကို ကောင်းမွန်သောအချက်များအဖြစ်ပင် သတ်မှတ်နိုင်သည်။ အကယ်၍ မကြာခင်တွင် ပင်လယ်ဓားမြဘုရင် ဖြစ်လာတော့မည့်သူတစ်ဦး၌ မိမိ၏ လက်အောက်ခံများအပေါ် ဤကဲ့သို့သော သဘောထားကြီးမှုမျိုး မရှိခဲ့ပါက သူသည် သိက္ခာရှိရှိပင် အနားယူပြီး၊ ကိုယ်ပိုင်ဘွဲ့အထူးတစ်ခုကို ဝယ်ယူကာ ဘဝကို အေးဆေးစွာ ဖြတ်သန်းသင့်သည်။
ထိုကောင် ယန် အနေဖြင့် အခြားလူများ၏ သစ္စာရှိမှုကို ငွေဝယ်ကျွန်သဖွယ် လိုက်လံဝယ်ယူခြင်း မပြုသရွေ့၊ ဤကဲ့သို့သော ထူးချွန်လှသည့် ပါရမီရှင်တစ်ဦးသည် မည်မျှပင် ခေါင်းမာသည်ဖြစ်စေ သူ၏ ကိုယ်ပိုင် အသုံးချဓားတစ်လက်အဖြစ် ဆက်လက်တည်ရှိနေမည်သာ ဖြစ်တော့သည်။