အခန်း ၅၅ - အကြောင်းပြချက်

လောလောဆယ်တွင် အခြားဆိပ်ကမ်းကင်းလှည့်ရဲများမှာ ကုန်းမြင့်ဘက်သို့ အာရုံမရောက်သေးပေ။ သို့သော် ဒိုက်စ် ကောက်တ်စ်တစ်ယောက် ပြန်လာချိန် နောက်ကျသွားသည်နှင့် သူတို့ ချက်ချင်းပင် လူလွှတ်၍ စုံစမ်းစစ်ဆေးတော့မည် ဖြစ်သည်။ ထို့ကြောင့် ခရစ်အနေဖြင့် တော်ကျူဂါဆိပ်ကမ်း၏ အင်အားကို ခန့်မှန်းတွက်ချက်ကြည့်ပြီးနောက် ရန်သူများကို ရင်ဆိုင်ရန် ကြိုတင်ပြင်ဆင်ထားသည်ဖြစ်စေ၊ ဆက်၍ ပုန်းအောင်းနေသည်ဖြစ်စေ သူတို့က ဤနေရာတစ်ခုလုံးကို ဇောက်ထိုးမိုးမျှော် ရှာဖွေကြတော့မည်ကို ကောင်းကောင်းရိပ်မိထားသည်။ ထို့ပြင် သူ၏လက်ရှိအခြေအနေမှာ အလွန်ဆိုးရွားနေပြီး ဒဏ်ရာမရထားလျှင်ပင် အဖမ်းခံရဖို့ ရာခိုင်နှုန်း အလွန်များနေသည်။ ဤမျှ ကြမ်းတမ်းသော်လည်း အမှန်တရားမြတ်နိုးသည့် လူတစ်ယောက်နှင့် ဆုံတွေ့ရခဲလှရာ သူက မည်သို့ပင် အလွယ်တကူ လက်လွှတ်ခံနိုင်မည်နည်း။

ရှီယန်က သူ၏အော်ဟစ်သံကို ကြားသဖြင့် လှည့်ကြည့်ကာ မေးလိုက်သည်။

“မင်း ဘာလိုချင်သေးလို့လဲ”

ခရစ်က မျက်ရည်ဝဲလျက် ပြန်ဖြေ၏။

လေးစားရတဲ့ ယန် ကျွန်တော့်အခြေအနေကိုလည်း ကြည့်ပါဦး၊ ဘယ်လိုလုပ်ပြီး ထွက်ပြေးနိုင်မှာလဲ။ တကယ်လို့ ခင်ဗျားက ကျွန်တော့်ကို သေဖို့ပဲ ဒီမှာထားခဲ့မယ်ဆိုရင် စောစောကတည်းက မကယ်ခဲ့သင့်ဘူးဗျာ။

ရှီယန်က ပုခုံးတွန့်ပြကာ ပြောလိုက်သည်။

မင်းစကားအရဆိုရင် မင်းမှာ အဖွဲ့ ရှိတယ်မဟုတ်လား။ မင်းရဲ့ ရဲဘော်ရဲဘက်တွေက မင်းကို မကယ်နိုင်ကြဘူးလား။

ခရစ်က ခေါင်းခါရင်း ငြင်းဆိုလိုက်သည်။

သူတို့တွေ ရွက်လွှင့်သွားလောက်ပြီ ထင်တယ်။ ခေါင်းဆောင် နစ်ခ်ရဲ့ လှေက ရေအောက်ထဲ ငုပ်လျှိုးသွားနိုင်လို့ အာရုံခံမိမှာမဟုတ်ဘူး။ ဟူး ၊ မနေ့ကသာဆိုရင် သူတို့ ကျွန်တော့်ကို ကယ်ရင်ကယ်လိမ့်မယ်။ ဒါပေမဲ့ ကျွန်တော့်ရဲ့ လက်ရှိအခြေအနေနဲ့ ဘာမှ သိပ်မလုပ်နိုင်တော့ဘူးလေ၊ သူတို့ ကျွန်တော့်ကို စွန့်ပစ်သွားကြမှာ သေချာတယ်။

ရှီယန်က နှုတ်ခမ်းကို တွန့်ရုံမျှ ပြုံးလိုက်ပြီး ဆို၏။

မင်းကို ငါ တစ်ခါ ကယ်ပြီးပြီ မဟုတ်လား။ ပိုအရေးကြီးတာက မင်းကို ကယ်ဖို့က ငါ့ရဲ့ အဓိကရည်ရွယ်ချက် မဟုတ်ဘူး။ ငါ အဲဒီကင်းသမားကို ဖြုတ်ချနိုင်မယ်လို့ သေချာတွက်ချက်မထားရင် လှုပ်ရှားမှာ မဟုတ်ဘူး။ အခု တော်ကျူဂါဆိပ်ကမ်းတစ်ခုလုံးမှာ လူတွေအကြီးအကျယ် လိုက်လံအမဲလိုက် ရှာဖွေနေကြတာ။ ငါသာ မင်းကို ထပ်ကူညီရင် ကိုယ့်ခြေထောက်ကိုယ် ကျောက်ခဲနဲ့ ထုသလို ဖြစ်သွားမှာပေါ့။ ငါ အဲဒီလိုလုပ်ဖို့အတွက် ခိုင်လုံတဲ့ အကြောင်းပြချက်တစ်ခု ပေးစမ်းပါ။

ရှီယန်၏ စကားက အလွန်ပင် ယုတ္တိရှိလှသည်။ အကယ်၍ သူက ချက်ချင်း လက်ခံလိုက်ပါက ခရစ်အနေဖြင့် တစ်စုံတစ်ခုကို သံသယဝင်သွားနိုင်သည်။ ထို့ကြောင့် ထိုလူက ပွင့်ပွင့်လင်းလင်းပင် ပြန်ပြောလိုက်၏။

ခင်ဗျား တစ်ယောက်တည်းပဲ မဟုတ်လား။ ကျွန်တော်တို့ အဖွဲ့ထဲဝင်ဖို့ ခင်ဗျားကို ထောက်ခံပေးနိုင်တယ်။

ရှီယန်သည် မိမိနှလုံးသားထဲမှ ဝေဝေဝါးဝါးနှင့် မှုန်ဝါးဝါး သံသယစိတ်များ ပေါ်ထွက်လာသည်ကို ခံစားလိုက်ရပြီး နောက်ထပ်တစ်ချက်ဆိုလျှင် ကွင်းကွင်းကွက်ကွက် မြင်သာသွားတော့မည့်အတိုင်းပင်။ သို့သော် သူက တမင်တကာ ဂရုမစိုက်ဟန် ဆောင်ကာ ပြောလိုက်သည်။

မင်းတို့အဖွဲ့ထဲ ဝင်ရမယ် ဟုတ်လား။ တကယ်လို့ မင်းတို့အဖွဲ့က အဲဒီလောက် ယုံကြည်စိတ်ချရတယ်ဆိုရင် မင်းက ဘာလို့ ငါ့ကို အကူအညီတောင်းပြီး အသနားခံနေရတာလဲ။

ခရစ်၏မျက်နှာ နီမြန်းသွားသော်လည်း သူက ရိုးရိုးသားသားပင် ပြန်ဖြေရှာသည်။

မစ္စတာယန် ခင်ဗျား နားလည်ထားရမှာက အဖွဲ့အစည်းတစ်ခုရဲ့ အင်အားက တစ်ကိုယ်တော်လူနဲ့ ယှဉ်လို့မရဘူးဆိုတာပဲ။ အိပ်မက်ဆိုးနယ်ပယ်လို အန္တရာယ်များပြီး ထူးဆန်းတဲ့နေရာမျိုးမှာ လူတစ်ယောက်ချင်းစီရဲ့ စွမ်းအားက အလွန် သေးငယ်လွန်းပါတယ်။ အဖွဲ့အစည်းတစ်ခုတည်းကသာ တစ်ယောက်ကို ရှင်သန်နိုင်မယ့် အခွင့်အရေး ပိုပေးနိုင်တာ။ ဒီတစ်ကြိမ်ကတော့ မတော်တဆဖြစ်သွားလို့ပါ။ ဝါကာသာ ငတုံးလို လျှို့ဝှက်မစ်ရှင်ကို သွားမလုပ်မိဘဲ အခက်အခဲအဆင့်ကို မမြှင့်ခဲ့ရင် ကျွန်တော်တို့ အခုအချိန်မှာ လက်ရှိကမ္ဘာရဲ့ ဒူဘိုင်းက ဇိမ်ခံရွက်လှေပေါ်မှာ အဆင့်မြင့် ငါးဥအနှစ်တွေစားပြီး ဝိုင်သောက်ရင်း ပျော်ပါးနေလောက်ပြီ။

ရှီယန်က နှာခေါင်းရှုံ့ကာ လှောင်ပြုံးဖြင့် ဆို၏။

လူများလေ၊ အကျိုးအမြတ် နည်းလေပဲ။ ဒါတင်မကသေးဘူး၊ အိပ်မက်ဆိုးနယ်ပယ်က အလွန် ကပ်စေးနှဲတဲ့ နေရာတစ်ခု။ ကြီးမားတဲ့ စွန့်စားမှုတွေ မရှိရင် ရက်ရောတဲ့ ဆုလာဘ်တွေ ရှိလာမှာမဟုတ်ဘူး။ ကိတ်မုန့်တစ်ချပ်တည်းကို လူအများကြီး ခွဲဝေစားနေကြတာ၊ လူတစ်ယောက်ကို ဘယ်လောက်တောင် အဝစားနိုင်မှာမို့လို့လဲ။ ငါ့ရဲ့ ပြီးခဲ့တဲ့ကမ္ဘာက အတွေ့အကြုံကြောင့် ငါ ဝတ်ဆင်စရာပစ္စည်း နှစ်ခု ရခဲ့တယ်။ မစ္စတာခရစ်… မင်းကကော ဘာရလဲ။ ပြီးတော့ ဒီလိုအဖွဲ့မျိုးက သူတို့ရတဲ့ ပစ္စည်းတွေကို မျှမျှတတ ခွဲဝေပေးလိမ့်မယ်လို့ ငါ မယုံဘူး။ အဖိုးတန်ပစ္စည်း ရလေလေ၊ မင်းတို့ခေါင်းဆောင် နစ်ခ်ရဲ့ အိတ်ကပ်ထဲပဲ ရောက်သွားဖို့ များလိမ့်မယ်။

ခရစ်က ချက်ချင်းပင် တုံ့ပြန်ပြောဆိုသည်။

ဟုတ်ပါတယ်၊ ခင်ဗျားပြောတာ မှန်တယ်ဆိုတာ ကျွန်တော် ဝန်ခံပါတယ်။ ဒါပေမဲ့ ဒါကြောင့်မို့လို့ ခင်ဗျားက အဖွဲ့အစည်းရဲ့ အင်အား အရေးပါပုံကို လျစ်လျူရှုမယ်ဆိုရင်တော့ ခင်ဗျားက အမြင်ကျယ်ကျယ် မကြည့်တတ်သေးလို့ပဲ။ အဖွဲ့ထဲမဝင်ခင်က ကျွန်တော့်ရဲ့ ကမ္ဘာအဆုံးသတ် သုံးသပ်ချက်နဲ့ မစ်ရှင်အောင်မြင်မှုနှုန်း ဒါမှမဟုတ် ဘေးထွက်မစ်ရှင်တွေရဲ့ ရမှတ်က အမြဲတမ်း ၅၀ ရာခိုင်နှုန်းအောက်မှာပဲ ရှိခဲ့တာ။ ကျွန်တော်ရတဲ့ အလွတ်သုံး အမှတ်တွေကလည်း အမြဲတမ်း ၁ မှတ်ပဲ ရပြီး ပါဝါအမှတ်နဲ့ အသုံးဝင်မှုအမှတ် ဆုလာဘ်တွေကလည်း သနားစရာကောင်းလောက်အောင် နည်းပါးခဲ့တယ်။ ဒါပေမဲ့ အဖွဲ့ထဲဝင်ပြီးတဲ့နောက်မှာတော့ ရရှိတဲ့ပစ္စည်းတွေကို ခွဲဝေလိုက်လို့ နည်းသွားတယ်ဆိုပေမဲ့ ဇာတ်ကွက်စူးစမ်းလေ့လာမှုနှုန်းနဲ့ မစ်ရှင်အောင်မြင်မှု ရမှတ်တွေက အများကြီး တိုးတက်လာခဲ့တယ်။ အင်အား ပိုများလာတာနဲ့အမျှ မစ်ရှင်ကို ပြီးမြောက်အောင်မြင်ဖို့လည်း ပိုလွယ်ကူလာပြီး အပိုဆောင်းရမယ့် အသုံးဝင်မှုအမှတ် ဆုလာဘ်တွေကလည်း အဆပေါင်းများစွာ တိုးလာခဲ့တယ်။ တကယ်လို့ ကျွန်တော် ဒီတစ်ကြိမ် အသက်ရှင်လျက် ပြန်သွားနိုင်ရင် စုစုပေါင်း အသုံးဝင်မှုအမှတ် ၂၀၀၀ ဒါမှမဟုတ် အဲဒီထက်မက ရနိုင်မှာဗျ။ ခင်ဗျား ပြောကြည့်လေ အဖွဲ့ထဲဝင်ရတာ ထိုက်တန်ရဲ့လား။

ခရစ်၏ စကားကို ကြားပြီးနောက် ရှီယန်၏ စိတ်ထဲတွင် မိုးကြိုးပစ်ချလိုက်သကဲ့သို့ ခံစားလိုက်ရပြီး သူ၏ သံသယနှင့် ဝေခွဲမရဖြစ်မှု မြူခိုးများ အားလုံး ကင်းစင်သွားတော့သည်။ တာမီနေတာ ကမ္ဘာကို ပြီးဆုံးခဲ့ပြီးနောက် သူသည် ဤနောင်တကို အမြဲ ရင်ဝယ်ပိုက်ထားခဲ့ရသည်။သူ၏ တစ်ကိုယ်တော် မစ်ရှင်ပြီးမြောက်မှု ရမှတ်မှာ ၅၃ မှတ်သာ ရှိခဲ့သည်။ ထို့ပြင် ထိုကြောက်မက်ဖွယ်ကောင်းသော T-750 တာမီနေတာ နှစ်ကောင်ကို ရှင်းလင်းရန်အတွက် ရှီယန်သည် မိမိ၏ ရှိသမျှအင်အားအားလုံးကို အသုံးချခဲ့ရသည်။ အကယ်၍ အခြားလူသာဆိုလျှင် သူထက် ပိုကောင်းအောင် လုပ်နိုင်လိမ့်မည်မဟုတ်ပေ။ ဤကဲ့သို့ စွမ်းဆောင်နိုင်မှုကပင် သူ့အား ပြီးမြောက်မှုရမှတ် ၅၃ မှတ်သာ ရစေခဲ့သည်။ ၎င်းမှာ သီသီလေး အောင်မှတ်ရရုံသာ ရှိသေးသည်။ သို့ဆိုလျှင် မည်ကဲ့သို့သော စွမ်းဆောင်ရည်မျိုးကမှ ရမှတ် ၁၀၀ နှင့် ထိုက်တန်ပါမည်နည်း။ ထိုစဉ်က သူသည် အချိန်အတော်ကြာ စဉ်းစားခဲ့သော်လည်း အဖြေရှာမရခဲ့ပေ။ သို့သော် ယခု ရှုထောင့်မှ ကြည့်လိုက်သောအခါ စကားလုံးတစ်လုံးတည်းသာ ရှိတော့သည်။

အဖွဲ့အစည်း

ဒီအပယ်ခံနယ်ပယ်က အဖွဲ့အစည်း ဖွဲ့တာကို အားပေးတယ်၊ ပြိုင်ပွဲဝင်တွေ စည်းလုံး ညီညွတ်ကြဖို့ကို အားပေးနေတာပဲ။

ငါသာ အဲဒီအချိန်တုန်းက သေသွားတဲ့ ကတ်ဇီဒါနဲ့ အဖွဲ့ဖွဲ့ခဲ့ရင်၊

ငါ အိပ်မက်ဆိုးကမ္ဘာထဲကို စတင်ဝင်ရောက်ချင်းမှာပဲ အဲဒီမုတ်ဆိတ်ဗလပွနဲ့ အဖွဲ့ဖွဲ့ပြီး။ သူ့တပ်ပေါင်းစုနဲ့ မဟာမိတ် ဖွဲ့ခဲ့ရင်၊

ရှီယန်၏ စိတ်ထဲတွင် ထိုအတွေးနှစ်ခုက တဝီဝီလည်နေပြီးနောက် သူသည် မိမိ၏ ဆုံးဖြတ်ချက်ကို အလွန်လွယ်ကူစွာ အတည်ပြုလိုက်နိုင်တော့သည်။ သို့ဆိုလျှင် သူသည် လက်ရှိထက် များစွာ ပိုမိုပြီးမြောက်အောင်မြင်နိုင်ခဲ့မည် ဖြစ်သည်။ သို့သော်လည်း၊ ငါ ရင်ဆိုင်ခဲ့ရတဲ့ အန္တရာယ်အားလုံးက အသေအချာ ပိုတိုးလာလိမ့်မယ်၊ ငါ့ရဲ့ ကျောပြင်ကို အဲဒီလူယုတ်မာ နှစ်ယောက်ဆီ ယုံကြည်စိတ်ချစွာ ပုံအပ်ခဲ့ရမှာလား။ ပြီးတော့ ငါ ပင်ပင်ပန်းပန်း တိုက်ခိုက်ပြီး ရယူခဲ့ရတဲ့ ဆုလာဘ်တွေကို သူတို့နဲ့ အညီအမျှ ခွဲဝေပေးရမှာလား အိပ်မက်ပဲ မက်နေလိုက်။

သူ့နှလုံးသားထဲတွင် သံသယတစ်ခု ဖြတ်ခနဲ ပေါ်လာသည်။အကယ်၍ ပါဝါအမှတ်များနှင့် အသုံးဝင်မှုအမှတ်များသည် မစ်ရှင်ပြီးမြောက်မှုနှုန်းနှင့် ရမှတ်တို့အပေါ် တိုက်ရိုက်ဆက်စပ်ပြီး ဆုံးဖြတ်ခြင်းခံရသည်ဆိုလျှင် အခြေခံ အလွတ်သုံး အမှတ်များကို ပေးအပ်ခြင်းကမူ ဘာအပေါ်မှာ မူတည်ပြီး ဆုံးဖြတ်တာလဲ။

ခရစ်သည် ရှီယန် တွေးတောငေးငိုင်နေသည်ကို မြင်သောအခါ မိမိက သူ့ကို ဆွဲဆောင်စည်းရုံးနိုင်ခဲ့ပြီဟု ထင်မှတ်ကာ ချက်ချင်းပင် ဆက်လက် အားပေးစကား ဆိုလိုက်သည်။

ဟုတ်တယ်၊ အဖွဲ့ဝင်အသစ်တစ်ယောက် အနေနဲ့ ဝင်ချင်ရင် မစ်ရှင်တစ်ခု ပြီးဆုံးတိုင်း သူတို့ရဲ့ အသုံးဝင်မှုအမှတ် ၅၀ ရာခိုင်နှုန်းနဲ့ ပါဝါအမှတ် ၅၀ ရာခိုင်နှုန်းကို ပေးသွင်းရလိမ့်မယ်။ ဒါပေမဲ့ ခင်ဗျား ရင်ဆိုင်ရမယ့် အန္တရာယ်တွေက အများကြီး လျော့နည်းသွားမှာ ဖြစ်ပြီး တစ်ကိုယ်တော် သွားတာထက်တော့ ဘယ်တော့မှ မကြီးမားနိုင်ပါဘူး။ ဒါတင်မကသေးဘူး၊ ခင်ဗျားမှာ ကြီးမားတဲ့ အင်အားရှိတယ်ဆိုတာ သက်သေပြနိုင်ရင် ခင်ဗျားရဲ့ လုပ်ပိုင်ခွင့်အတိုင်းအတာနဲ့ အထူးအခွင့်အရေးတွေကလည်း ထို့အတူ တိုးတက်လာမှာပါ။ ဥပမာအားဖြင့် ကျွန်တော်ဆိုရင် အသုံးဝင်မှုအမှတ်တွေ ပေးသွင်းဖို့ မလိုတော့ဘူး။ ပြီးတော့ ရုန်းတော်ထဲကို ခိုးဝင်တဲ့ မစ်ရှင်မှာ ကျွန်တော့်ရဲ့ ပံ့ပိုးကူညီမှုက အလွန်ကြီးမားခဲ့တာမို့လို့ ကျွန်တော်သာ အသက်ရှင်လျက် ပြန်နိုင်ရင် အပိုဆုကြေး အမြတ်ဝေစုတွေမှာ ပါဝင်နိုင်ပြီး အဆင့်အနိမ့်ဆုံး အဖွဲ့ဝင်တွေရဲ့ အသုံးဝင်မှုအမှတ်တွေကို ရယူနိုင်မှာ ဖြစ်တယ်။ ယန်၊ ခင်ဗျားရဲ့ အနီးကပ် တိုက်ခိုက်ရေးစွမ်းရည်က အလွန်ကြီးမားတာပဲ၊ ခါးလ်ဒတ်စ် သေဆုံးသွားလို့ လစ်လပ်သွားတဲ့နေရာကို ခင်ဗျား ဝင်ဖြည့်နိုင်တယ်။ ကျွန်တော့်ကို ယုံကြည်လိုက်ပါ၊ လာပါဗျာ။

ရှီယန်က ခေတ္တမျှ တွေဝေသွားပြီး ခေါင်းငုံ့ကာ ပြောလိုက်သည်။

မင်းပြောတာတွေက အမှန်တရားဖြစ်မှန်း ငါ ဘယ်လိုလုပ် သိနိုင်မှာလဲ။

ခရစ်က ပျာပျာသလဲ ပြန်ဖြေ၏။

ဘယ်လိုလုပ်ပြီး အလိမ်အညာ ဖြစ်နိုင်မှာလဲ။ ရုန်းတော်ထဲမှာ အဲဒီလို ပေါက်ကွဲမှုကြီး ဖြစ်အောင် လူတစ်ယောက်တည်း လုပ်နိုင်တယ်လို့ ခင်ဗျား မယုံဘူးမလား။ အဲဒီနေရာမှာ လျှို့ဝှက်ချက်တွေ အများကြီး ပုန်းကွယ်နေပြီး ရတနာတွေတောင် ရှိသေးတယ်။

ရှီယန်က ခရစ်ကို စူးစိုက်ကြည့်လိုက်သည်။

ရတနာတွေ ဟုတ်လား

ခရစ်က ခေါင်းညိတ်ကာ ရိုးရိုးသားသားပင် ဆို၏။

ဒီလိုလုပ်ရအောင်၊ တကယ်လို့ ခင်ဗျား ကျွန်တော့်ကို ကယ်ဖို့ သဘောတူရင် ကျွန်တော်တို့ရဲ့ 3k ပါတီထဲ ဝင်ဖို့ ထောက်ခံပေးမယ့်အပြင် တန်ဖိုးကြီးတဲ့ အစီရင်ခံစာတစ်ခုကိုလည်း ခင်ဗျားကို ပြပေးမယ်။ ဒီအစီရင်ခံစာက ခင်ဗျားကို B အဆင့် အခက်အခဲရှိတဲ့ လျှို့ဝှက်မစ်ရှင်တစ်ခုကို ရရှိစေလိမ့်မယ်။

ရှီယန်က ခေါင်းညိတ်ရန် ငြင်းဆန်ဆဲ ဖြစ်သည်။

ခရစ်က အံကြိတ်ကာ တောက်ပနေသော ဝါကျင်ကျင် ကျည်ဆန်တစ်တောင့်ကို ထုတ်ယူလိုက်ပြီး ပြော၏။

ခင်ဗျား နိုင်ပါတယ်ဗျာ။ ကျွန်တော် ဒါကိုပါ ထပ်ပေါင်းပေးမယ်။

ရှီယန်သည် ထိုပစ္စည်း၏ အချက်အလက်များကို တစ်ပြိုင်နက်တည်း ရရှိလိုက်သည်။

သပ်ရပ်လှပသော ၇.၆၂ မီလီမီတာ ကျည်ဆန် (အခြေအနေ - အလွန်ကောင်းမွန်)

မူရင်းဒေသ - အမေရိကန်ပြည်ထောင်စု၊ အိုဟိုင်းယိုးပြည်နယ်၊ စပရင်းဖီးလ်ဒ် ခဲယမ်းမီးကျောက်စက်ရုံ

ပစ္စည်းအဆင့်အတန်း - အပြာနုရောင်

သေနတ်ထဲသို့ ကျည်ဖြည့်ပြီးနောက် -ခင်ဗျား၏ နောက်ထပ် အဝေးပစ်တိုက်ခိုက်မှုကို အမှတ် ၃၀ တိုးမြှင့်ပေးသည်။

အသုံးပြုပုံ (အနီးအနားတွင် မီးလောင်လွယ်သော ပစ္စည်းလိုအပ်သည်) - အသုံးပြုသူ၏ သွေးပမာဏ မှ ၁၀ မှတ် နှုတ်ယူပြီး အသုံးပြုသူ၏ ခန္ဓာကိုယ်ပေါ်မှ သွေးစွန်းမှုများကို ဖယ်ရှားပေးကာ မူးဝေခြင်း အကျိုးသက်ရောက်မှုကို ပေးသည်။

ဖော်ပြချက် - ကျွန်တော်တို့ တိုင်းပြည်ကို ချစ်သလိုမျိုး ကျွန်တော်တို့ တိုင်းပြည်ကလည်း ကျွန်တော်တို့ကို ပြန်ချစ်ပါစေကြောင်း ဆုတောင်းပါတယ်။

ပစ္စည်း၏ တိုက်ခိုက်ရေးရမှတ် - ၅

ရှီယန်သည် ခရစ်ကို ခေတ္တမျှ စိုက်ကြည့်ပြီးနောက် လက်ကို ဆန့်ထုတ်ကာ ပြောလိုက်သည်။

သဘောတူပြီ

ဤအချိန်တွင် ဆိပ်ကမ်း၏ ကင်းလှည့်ရဲများသည် သူတို့၏ လူရှာဖွေမှုကို နိဂုံးချုပ်လိုက်ကြပြီဖြစ်ကာ တစ်စုံတစ်ယောက်ကို ဖမ်းဆီးရမိပြီး အောင်ပွဲခံကာ ပြန်လာကြသဖြင့် လက်ဗလာဖြင့် မဟုတ်ပေ။ သူတို့သည် ဒိုက်စ် ကောက်တ်စ် ပျောက်ဆုံးနေသည်ကို အကြမ်းဖျင်း သိရှိသွားကြပြီး ကုန်းမြင့်ပေါ်သို့ တက်ရောက်ရှာဖွေရန် လူများကို ပြင်ဆင်နေကြပြီ ဖြစ်သည်။ ရှီယန်သည် ဖမ်းဆီးခြင်းခံလိုက်ရသည့် ထိုကံဆိုးမိုးမှောင်ကျသော ကောင်လေးကို အဝေးမှ လှမ်းမြင်နေရသည်။

အဲဒီကောင်က မင်းတို့အကြောင်းကို ဖွင့်ပြောလိုက်ရင် ဘယ်လိုလုပ်မလဲ။

ခရစ်က ထိတ်လန့်သွားပြီး ပြန်ဖြေ၏။

အိပ်မက်ဆိုးနယ်ပယ်ရဲ့ သက်ဆိုင်ရာ အချက်အလက်တွေကို ကမ္ဘာ့ဇာတ်ကောင်တွေဆီ ပေါက်ကြားအောင်လုပ်မိရင် ပေးမယ့် အပြစ်ဒဏ်ကို ခင်ဗျား မသိဘူးလို့တော့ မပြောနဲ့နော်။ ဒါက အိပ်မက်ဆိုးနယ်ပယ်က ရလာတဲ့ စွမ်းရည်တွေကို လက်ရှိကမ္ဘာမှာ အသုံးပြုတာနဲ့ အတူတူပဲ၊ အပြစ်ဒဏ်တွေက အလွန် ပြင်းထန်လှပါတယ်။ ကျွန်တော့်ကို ယုံပါ၊ ခင်ဗျား အဲဒီလို အပြစ်ဒဏ်မျိုးကို ဘယ်တော့မှ လက်ခံချင်မှာ မဟုတ်ဘူး။ အို၊ သောက်ကျိုးနည်း၊ သူတို့ ဒီဘက်ကို ဦးတည်ပြီး ချီတက်လာကြပြီ။ ယန်! ကျွန်တော်တို့ရဲ့ သဘောတူညီချက်ကို ဘယ်တော့မှ မမေ့နဲ့ဦး။

ရှီယန်က တိုးတိုးလေး ပြန်ပြောလိုက်သည်။

မမေ့ပါဘူး၊ သွားကြစို့။ ကုန်းမြင့်ဘေးပတ်ပတ်လည်ကနေ ကွေ့ပတ်သွားကြမယ်၊ ဆိပ်ကမ်းရဲ့ ဆိပ်ခံတံတားဆီ အရင်ဆုံး ပြန်ရောက်မှပဲ ကြည့်ကြသေးတာပေါ့။

ခရစ်က အံ့အားသင့်တကြီးဖြင့် အော်ဟစ်လိုက်၏။

ခင်ဗျား ဘာတွေ တွေးနေတာလဲ

ရှီယန်က မေးလိုက်သည်။

ဒီနေ့ မွန်းလွဲပိုင်းမတိုင်ခင် အလုပ်တစ်ခု ရှာရမယ့် အဓိကမစ်ရှင်ကို မင်း မရထားဘူးလို့တော့ မပြောနဲ့နော်။

ခရစ်က ပုခုံးတွန့်ပြသည်။

ရထားတာပေါ့၊ ဒါပေမဲ့ စိတ်ပျက်စရာကောင်းတာက ကျွန်တော်တို့ အစွမ်းကုန် ကြိုးစားခဲ့ပေမဲ့ နာမည်ကျော်ကြားမှုမရှိတဲ့ နာမည်မရှိ လူတစ်ယောက်ဖြစ်တဲ့ ကပ္ပတိန် ဟုခ် ကိုပဲ ကျွန်တော်တို့ကို လက်ခံဖို့ ဆွဲဆောင်နိုင်ခဲ့တယ်။ ဒါပေမဲ့ သူ့ရဲ့ အစုတ်ပလုတ်သင်္ဘောက လူ ၁၀ ယောက်ပဲ တင်နိုင်တာလေ။ သူက သင်္ဘောစီးခတောင် တောင်းသေးတယ်။ ဒါကြောင့် ကပ္ပတိန် ဟုခ်ရဲ့ အလောင်းကတော့ အခုအချိန်မှာ ပင်လယ်ပြင်ထဲ မိုင်ပေါင်းရာချီ ဝေးတဲ့နေရာဆီ မျောပါသွားလောက်ပြီ”

ရှီယန်က ခေါင်းညိတ်ကာ ပြောလိုက်သည်။

ငါ့ရဲ့ အခြား အထောက်အထားတစ်ခုက ‘ဘဲလ် အန် မတ်ဂ်’ ရဲ့ သင်္ဘောသားတစ်ယောက်ပဲ။ ငါက သင်္ဘောရဲ့ သင်္ဘောသားခေါင်းဆောင်ကို ဖယ်ရှားပစ်ခဲ့လို့ လေးစားရတဲ့ ကပ္ပတိန် အာမန်က ငါ့ကို သူ့နေရာမှာ အစားထိုးဖို့ ကြေညာခဲ့တယ်။

ခရစ်၏မျက်လုံးများမှာ အံ့အားသင့်မှုကြောင့် ပြူးကျယ်သွားပြီး တံတွေးပင် မြိုချရခက်ခဲနေကာ

အာမန် ဟုတ်လား။ အဲဒီ အာမန်လား

ရှီယန်က တည်ငြိမ်စွာပင် ပြန်ဖြေလိုက်သည်။

ဟုတ်တယ်၊ အဲဒီ အာမန်ပဲ။ အနာဂတ်ရဲ့ ပင်လယ်ဓားမြ သူရဲကောင်း ခုနစ်ယောက်ထဲက တစ်ယောက်ဖြစ်တဲ့၊ ပင်လယ်နက်ရဲ့ ပင်လယ်ဓားမြ သူရဲကောင်းဖြစ်လာမယ့် အဲဒီ အာမန်ပဲ။