အခန်း (၅၄) အက်ဒဝပ်၏ ပဉ္စမမြောက်ထုတ် ရွှေဒင်္ဂါး (ပေါင်စတာလင်)

“ဒိုက်စ် ကောက်တ်စ်” က မကြားချင်ယောင်ဆောင်ကာ နှာခေါင်းတစ်ချက်ရှုံ့ပြီး ရှေ့သို့ တိုးလာခဲ့သည်။ ယှဉ်ပြိုင်သူ၏ မျက်ဝန်းများထဲတွင် မျှော်လင့်ချက်ကင်းမဲ့မှုများ ပြည့်နှက်နေပြီး ခုခံသည့်အနေဖြင့် သူ၏ဓားမြှောင်ကို ရမ်းခါနေရင်း နောက်ဆုံးတွင် ရန်သူ၏လက်မောင်းကို တစ်ချက် ထိမှန်သွားစေခဲ့သည်။ သို့သော် ဤအရာက ကင်းလှည့်ရဲ၏ ရိုးရိုင်းကြမ်းတုတ်သော စိတ်ဓာတ်ကို ပိုမိုဆွပေးလိုက်သလိုဖြစ်သွားပြီး လက်သီးဖြင့်ထိုး၊ ခြေထောက်ဖြင့်ကန်ကာ ပြင်းထန်သော ရိုက်နှက်မှုများကို ရွာကျသလို ရွာချလိုက်လေသည်။ ဤယှဉ်ပြိုင်သူသည် အနီးကပ်တိုက်ခိုက်ရေးစွမ်းရည် များပြားစွာမရှိသည်မှာ သိသာလှပြီး၊ သူ အကောင်းဆုံး ခုခံကာကွယ်ရန်နှင့် ရှောင်တိမ်းရန် ကြိုးစားသော်လည်းဖူးရောင်အောင် ရိုက်နှက်ခြင်းကို ခံလိုက်ရသည်။ သူ၏မျက်နှာတစ်ခုလုံး ညိုမဲစုတ်ပြတ်သွားကာ မျက်နှာပြင်မှ သွေးများ စီးကျလာပြီး သနားစဖွယ် အော်ဟစ်ညည်းတွားနေရှာသည်။

နောက်ဆုံးတွင် “ဒိုက်စ် ကောက်တ်စ်” စိတ်မရှည်တော့ဘဲ သူ၏ခါးမှ ပင်လယ်ဓားမြသုံး ဓားကောက်ကို တစ်ဖန်ပြန်ထုတ်ကာ ညှာတာမှုကင်းမဲ့စွာ ပိုင်းချလိုက်သည်။ ဆုတ်ဖြဲလိုက်သည့် အသံနှင့်အတူ ယှဉ်ပြိုင်သူ၏လက်တွင် ကြီးမားသော ဒဏ်ရာတစ်ခု ပွင့်ထွက်သွားပြီး လတ်ဆတ်သော သွေးများ စီးကျလာကာ သူ၏အင်္ကျီကို စိုရွှဲသွားစေသည်။

ယှဉ်ပြိုင်သူသည် မအော်ဟစ်နိုင်သေးခင်မှာပင် ဒုတိယမြောက် ဓားချက်က ချက်ချင်းဆိုသလို ထပ်မံကျရောက်လာပြန်ရာ ယှဉ်ပြိုင်သူသည် လိမ့်၍ရှောင်ရန် ကြိုးစားလိုက်သည်။ ဤတစ်ကြိမ်တွင်မူ ပြင်းထန်လှသော ဝေဒနာကြောင့် အော်ဟစ်လိုက်ရပြီး သူ၏ကျောပြင်မှာ ပြင်းထန်စွာ အပိုင်းခံလိုက်ရကာ ခေါင်းကိုမော့၍ မျှော်လင့်ချက်မဲ့စွာ အော်ဟစ်လိုက်လေသည် ။

အတူတူ သေကြစို့ကွာ။

သူ အော်ဟစ်ပြီးနောက် လက်နှစ်ဖက်လုံးကို ဆန့်တန်းလိုက်သည့် ဤအရေးကြီးသော အချိန်အခါ၌ အခြားသော လူရိပ်တစ်ခုက သစ်သားတဲအိမ်၏ နံရံကို ဖြတ်ကျော်ဝင်ရောက်ကာ တဲအိမ်ထဲသို့ အရှိန်ဖြင့် ဝင်ဆောင့်လာခဲ့သည်။ ထိုလူရိပ်သည် “ဒိုက်စ် ကောက်တ်စ်” ပေါ်သို့ ခုန်အုပ်လိုက်ပြီး သူ့ကို ကြမ်းပြင်ပေါ်သို့ လှဲချကာ အပြန်အလှန် လုံးထွေးသတ်ပုတ်ကြတော့သည်။ ထို့နောက်တွင်မူ သစ်သားတဲအိမ်တစ်ခုလုံး ချက်ချင်း ပြိုကျသွားပြီး ဖုန်မှုန့်များနှင့် အပျက်အစီးများကြားတွင် သူတို့နှစ်ဦးကို အောက်ခြေ၌ အတင်းအကျပ် ဖိမိသွားစေခဲ့သည်။

အတွင်းသို့ ပြေးဝင်လာသူမှာ ရှီယန် ဖြစ်ပြီး၊ သူသည် ယခုကဲ့သို့ အရေးကြီးသောအချိန်၌ ဝင်ရောက်ရန် ကြိုတင်တွက်ချက်ထားပြီးသား ဖြစ်သည်။ သူသည် အခြေခံကျွမ်းကျင်မှု အားလုံးတွင် ပိုမိုသန်မာပြီး မိမိအတွက် အကျိုးရှိမည့် ပတ်ဝန်းကျင်ကို ရွေးချယ်ကာ တိုက်ပွဲကို စတင်ခဲ့ခြင်းဖြစ်သည်။ လှဲချလိုက်ပြီးနောက် ပင်လယ်ဓားမြသုံး ဓားကောက်ကို လွှင့်ပစ်လိုက်သည်။ သို့သော် ရှီယန် အံ့အားသင့်သွားသည်မှာ “ဒိုက်စ် ကောက်တ်စ်” ၏ အနီးကပ်တိုက်ခိုက်ရေးစွမ်းရည်မှာ အတော်အတန် ပြင်းထန်လှပြီး၊ ထို့အပြင် သူ၏ မြင့်မားလှသော အသက်သွေး ၂၅၀ မှတ်ကြောင့် တိုက်ခိုက်သူကို အားကိုးရာမဲ့သလို ခံစားရစေသည်။ ကံကောင်းထောက်မစွာဖြင့် ဤကောင်သည် တစ်ယောက်တည်း တိုက်ခိုက်နေခြင်း ဖြစ်ပြီး၊ အကယ်၍ သူနှင့်အတူ မဟာမိတ်များသာ ရှိနေပါက ကင်းလှည့်ရဲ၏ အထူးနောက်ခံစွမ်းရည်ဖြစ်သော ‘အဖွဲ့အစည်းဖြင့် လုပ်ဆောင်ခြင်း’ စတင် အသက်ဝင်သွားပေလိမ့်မည်။ အကယ်၍ ထိုသို့သာ ဖြစ်လာပါက ရှီယန်ပင်လျှင် လွတ်မြောက်နိုင်ရန် လွယ်ကူမည်မဟုတ်ချေ။

လောလောဆယ်တွင် သူ၏ဘယ်ဘက်လက်၌ တပ်ဆင်ထားသော ‘ကိုဘော့စတီးလ် အပြင်ပန်းအရိုးစုလက်’ စက်ပစ္စည်းမှာ နောက်ဆုံးတွင် အသုံးဝင်လာခဲ့ပြီဖြစ်သည်။ သူသည် ရန်သူ၏ ကာကွယ်ရေးစွမ်းအားကို လျှော့ချကာ ဒဏ်ရာရရှိစေနိုင်ပြီး၊ ဤလက်နက်သည် တည်ငြိမ်သော ၁၈ မှ ၁၉ ပွိုင့်ကြား အနာတရဖြစ်မှုကို ပေးစွမ်းနိုင်ကာ အပြောင်းအလဲဖြစ်နိုင်ခြေကို များစွာ လျှော့ချပေးနိုင်သည်။ သို့သော်ငြားလည်း “ဒိုက်စ် ကောက်တ်စ်” ၏ လက်သီးများသည် ရှီယန်၏ သွေးများဖြင့် စွန်းထင်းနေပြီး ရှီယန်၏ ခန္ဓာကိုယ်ကို ညိုမဲဒဏ်ရာများ ရရှိစေခဲ့သည်။ သို့သော်လည်း “ခံနိုင်ရည်”အလိုလိုပါလာသော စွမ်းရည်ကြောင့် ၎င်း၏ ခြိမ်းခြောက်မှုအဆင့်မှာ လက်ခံနိုင်သော အဆင့်အထိ လျော့ကျသွားခဲ့သည်။

မိမိအနေဖြင့် ရန်သူကို မကျော်လွှားနိုင်သည်ကို မြင်သောအခါ “ဒိုက်စ် ကောက်တ်စ်” သည် ရူးသွပ်စွာ အော်ဟစ်လိုက်ပြီး သူ၏ညာဘက်လက်ကို အားကုန်ရမ်းကာ တုန်ရီနေသော သူ၏လက်ခလယ်ဖြင့် ရှီယန်၏ ဘယ်ဘက်မျက်လုံးကို အတင်း ထိုးဆွလိုက်တော့သည်။ သူသည် မျက်လုံးအိမ်၏ စိုစွတ်မှုကို ခံစားလိုက်ရပြီး ယခုကဲ့သို့သော အခြေအနေမျိုးတွင် ရန်သူသည် ရှောင်တိမ်းရန် ကြိုးစားလိမ့်မည်၊ ထိုအခါမှ မိမိ လွတ်မြောက်ရန် အခွင့်အရေးရလိမ့်မည်ဟု ယုံကြည်နေခဲ့သည်။ သို့သော်လည်း ရှီယန်၏ မျက်နှာမှာ ကျောက်တုံးကြီးတစ်ခုကဲ့သို့ တည်ငြိမ်မြဲ တည်ငြိမ်နေပြီး ရန်သူက အခြားလူတစ်ယောက်၏ မျက်လုံးအိမ်ကို ထိုးဆွနေသကဲ့သို့ပင်။ သူ၏ဘယ်ဘက်လက်သီးကို မြှောက်လိုက်ရာ စူးရှသော သတ္တုရောင်ခြည်တစ်ခု ဖျတ်ခနဲလင်းလက်သွားပြီး သူ၏ခွန်အားကို အသုံးပြုကာ အောက်သို့ ပြင်းထန်စွာ ထိုးနှက်ပစ်လိုက်သည်။

ပြင်းထန်သော ထုရိုက်သံတစ်ခု ပဲ့တင်ထပ်သွားပြီး၊ ရှီယန်သည် ပျက်စီးသွားသော ရန်သူ၏ လည်ပင်းမှ သူ၏ဘယ်ဘက်လက်သီးကို ဖြည်းညှင်းစွာ မြှောက်လိုက်ရင်း အလိုလိုသိစိတ်အရ သူ၏နီရဲရောင်ကိုင်းနေသော ဘယ်ဘက်မျက်လုံးကို ညာဘက်လက်ဖြင့် နှိပ်နယ်လိုက်သည်။ ရှီယန်၏ ပုံစံမှာ တော်တော်လေး ဆိုးရွားနေပြီး မျက်နှာတစ်ခုလုံးတွင် ညိုမဲဒဏ်ရာများ ကွက်၍ ထွက်နေကာ နှုတ်ခမ်းထောင့်စွန်းမှ လတ်ဆတ်သော သွေးများ စီးကျနေသည်။ သူ၏ အသက်သွေး သည်လည်း ၇၀မှတ်အထိ လျော့နည်းသွားခဲ့ရသည်။ ဤသည်မှာ အဓိကအားဖြင့် “ဒိုက်စ် ကောက်တ်စ်” ၏ အသက်သွေး ၂၀ မှတ်အောက်သို့ ကျဆင်းသွားချိန်တွင် ရုတ်တရက် ရူးသွပ်သွားပြီး ပြန်လည်တိုက်ခိုက်ခဲ့သောကြောင့် ဖြစ်သည်။ ရှီယန်သည် သူ့ကို ထွက်ပြေးခြင်းမှ တားဆီးလိုသောကြောင့် လွယ်ကူစွာ ရှောင်တိမ်းနိုင်မည့် ဒဏ်ရာများကို အမိအရ ခံယူလိုက်ခြင်း ဖြစ်သည်။

အမှန်တရားကို ပြောရလျှင် ‘မျက်နှာအမာရွတ်နှင့် ဟာရီ’ ၏ စကားများသည် တော်တော်လေး တိကျလှသည်၊ လောလောဆယ် ရှီယန်အတွက်မူ သင့်တော်သော တိုက်ခိုက်ရေးနည်းလမ်း မရှိခြင်းက အမြဲတမ်း သူ၏အကြီးမားဆုံး အားနည်းချက်များထဲမှ တစ်ခု ဖြစ်နေခဲ့သည်။ အကယ်၍ သူသည် အစီအစဉ်ဆွဲရာတွင် ထက်မြက်ခြင်းမရှိဘဲ မိမိအတွက် အကျိုးရှိမည့် လမ်းစကို အစဉ်တစိုက် မဖော်ဆောင်နိုင်ခဲ့ပါက၊ ဤကမ္ဘာတွင် ယခုကဲ့သို့ အကြိမ်ကြိမ် အလွယ်တကူ သက်သာရာရခဲ့လိမ့်မည် မဟုတ်ပေ။

ဤတော်ကျူဂါ ကင်းလှည့်ရဲကို သတ်ဖြတ်ပြီးနောက်၊ ရှီယန်သည် သူ၏ ပင်လယ်ဓားမြကမ္ဘာ ကျော်ကြားမှု အမှတ် ၅၀ တိုးလာသည်ကို ခံစားလိုက်ရသည်။ ကင်းလှည့်ရဲ ချန်ထားခဲ့သော သော့ချက်ကျသည့် ပစ္စည်းကို အသုံးပြုကာ ရှီယန်သည် သက်ဆိုင်ရာ သေတ္တာကို ဖွင့်လိုက်သည်။ ထိုသေတ္တာတွင် ထူးခြားသော ပင်လယ်ဓားမြခေတ်၏ အငွေ့အသက်များ၊ ဝက်သစ်ချသား မျက်နှာပြင်များ ရှိနေပြီး ၎င်း၏မျက်နှာပြင်ပေါ်တွင် ဓားဖြင့် မွှန်းထားသော ဖြတ်ရာအချို့ ရှိနေကာ ဟောင်းနွမ်းနေသော ကြေးသော့ခတ်တစ်ခု ရှိနေသည်။

ရှီယန်သည် သေတ္တာကို အေးအေးလူလူပင် ဖွင့်လိုက်ရာ အတွင်းဘက် ထောင့်စွန်းတွင် ဟောင်းနွမ်းနေသော လီနင်ပိုက်ဆံအိတ်လေးတစ်ခုသာ ရှိပြီး၊ ထိုပိုက်ဆံအိတ်၏ အောက်တွင် ကြေးဝါလက်စွပ်တစ်ကွင်း ရှိနေသည်။ ပိုက်ဆံအိတ်မှာ အလွန် ခြောက်ကပ်ပိန်လှီနေပုံရသည်။ ရှီယန်က ၎င်းကို ကောက်ယူကာ ကြည့်လိုက်သော်လည်း ဒင်္ဂါးပြားများ မြည်လာသည့် သာယာသော အသံကိုပင် မကြားရချေ။ ဤအခိုက်အတန့်တွင် ရှီယန်သည် ဤကင်းလှည့်ရဲ၏ နာမည်ကို ရုတ်တရက် သတိရသွားသည် ။ “ဒိုက်စ် ကောက်တ်စ်”။

တောက်… ဒီကောင်စုတ်လေး၊ သူပိုင်ဆိုင်သမျှ အကုန်ရှုံးလို့ အလုပ်ထွက်လုပ်နေတာ ထင်တယ်‌နော်။

ရှီယန်သည် စိုးရိမ်စိတ်အပြည့်ဖြင့် ပိုက်ဆံအိတ်ကြိုးကို ဖြေလိုက်ပြီး ပိုက်ဆံအိတ်ကို ဇောက်ထိုးလှန်ချလိုက်ရာ တစ်ချိန်တည်းမှာပင် သတ္တုပစ္စည်းအချို့ တစ်ခုနှင့်တစ်ခု ထိခိုက်မိပြီး ချောက်ချောက်ချက်ချက် အသံမြည်ကာ ပြုတ်ကျလာသည်ကို ခံစားလိုက်ရသည်။ ရှီယန်သည် ရုတ်တရက် ဝမ်းသာသွားမိသည်၊ အဘယ်ကြောင့်ဆိုသော် ပဲနိ ၅ ပြား ၆ ပြားနှင့် ၃ သျှီလင်တို့၏ အောက်တွင် ရွှေဒင်္ဂါးတစ်ပြား ရှိနေသောကြောင့် ဖြစ်သည်။ ဤရွှေဒင်္ဂါးသည် တောက်ပသော ရောင်ခြည်များဖြင့် လင်းလက်နေပြီး အသစ်စက်စက်အတိုင်း ရှိနေကာ သာမန်ပစ္စည်းတစ်ခုနှင့် လုံးဝမတူပေ။ ဤရွှေဒင်္ဂါးပေါ်တွင် ရှုပ်ထွေးသော စာလုံးအချို့ကို ထွင်းထုထားပြီး အခြားတစ်ဖက်တွင်မူ မြင်းစီးသူရဲတစ်ဦးက ခန့်ညားထည်ဝါသော ပုံစံဖြင့် ဓားကို မြှောက်ထားသည်။ ထို့နောက် ရှီယန်သည် အသိပေးချက်တစ်ခုကို လက်ခံရရှိခဲ့သည် ။

သင်သည် ‘အက်ဒဝပ်၏ ပဉ္စမမြောက်ထုတ် ရွှေဒင်္ဂါး (ပေါင်စတာလင်)’ တစ်ပြားကို ရရှိပါပြီ။

အက်ဒဝပ်၏ ပဉ္စမမြောက်ထုတ် ရွှေဒင်္ဂါး (ပေါင်စတာလင်) - အဖိုးတန်ပစ္စည်း၊ တန်ဖိုးရှိသော ငွေကြေးဖြစ်ပြီး စုဆောင်းမှုတန်ဖိုး ရှိသည်။ အချို့သော ဇာတ်လမ်းနောက်ခံ ဇာတ်ကောင်များသည် ၎င်းကို နှစ်သက်ကြလိမ့်မည်။ ၂၂ ကာရက်ရွှေဖြင့် သွန်းလုပ်ထားပြီး ၎င်း၏တန်ဖိုးမှာ သာမန် ပေါင်စတာလင်ထက် ၁၀ ဆ ရှိသည်။ သင်သည် ဤအရာကို သာမန်ငွေကြေးအဖြစ် အသုံးပြုနိုင်ပြီး ဤကမ္ဘာမှ သယ်ဆောင်သွားကာ ‘အိပ်မက်ဆိုးနယ်ပယ်’ တွင် အသုံးဝင်မှုအမှတ် ၄၀၀ နှင့် လဲလှယ်နိုင်သည်။

ထို့နောက်တွင် ရှီယန်သည် ထိုကြေးဝါလက်စွပ်ကို ကောက်ယူလိုက်ရာ ၎င်း၏အနောက်တွင် (ခွဲခြား၍မရသေးပါ) ဟု ရေးသားထားသည်ကို သတိပြုမိလိုက်သည်။ သူသည် တော်တော်လေး အံ့အားသင့်သွားရသည်၊ အဘယ်ကြောင့်ဆိုသော် ယခင်က သူသည် ယခုကဲ့သို့ ခွဲခြားသတ်မှတ်ရန် လိုအပ်သော လက်စွပ်အမျိုးအစား အသုံးအဆောင်ပစ္စည်းမျိုးနှင့် တစ်ခါမျှ မကြုံဖူးခဲ့သောကြောင့် ဖြစ်သည်။ သူသည် လက်စွပ်ကို ချက်ချင်း သိမ်းဆည်းလိုက်ပြီး သူ၏ပတ်ဝန်းကျင်ကို တစ်ချက်ကြည့်ကာ နှာခေါင်းတစ်ချက်ရှုံ့ရင်း ဆက်လက် လိုက်လံရှာဖွေခဲ့သည်။

ရှီယန်၏ ပစ်မှတ်မှာ သူကယ်တင်ခဲ့သော ယှဉ်ပြိုင်သူ ဖြစ်သည်မှာ သံသယဖြစ်ဖွယ် မရှိပေ။ ထိုကောင်သည် ကျေးဇူးသိတတ်စိတ် အလျဉ်းမရှိဘဲ ထွက်ပြေးသွားခဲ့ပြီ ဖြစ်သော်လည်း သူ၏ခန္ဓာကိုယ် ကြံ့ခိုင်မှုမှာ သိပ်မကောင်းလှသလို သူ၏ပြန်လည်ပြည့်ဖြိုးမြဲစွမ်းအားမှာလည်း မသန်မာချေ၊ ကောက်တ်စ်၏ ဓားဖြင့် အပိုင်းခံရပြီးနောက် သူသည် တုန်တုန်ချည့်ချည့်ဖြင့်သာ ထွက်ပြေးနိုင်ခဲ့ပြီး ဝေးဝေးလံလံသို့ မရောက်ရှိနိုင်ခဲ့ပေ။

ရှီယန်သည် တည်မှုံသော မျက်နှာဖြင့် အပြေးအလွှား လိုက်လာခဲ့ရာ ထိုယှဉ်ပြိုင်သူမှာ ပျာပျာသလဲ ဖြစ်နေဆဲပင်။ ထို့အပြင် သူသည် ခြေထောက်ဒဏ်ရာအပြင် ကင်းလှည့်ရဲများကိုပါ အစဉ်တစိုက် သတိထားနေရသဖြင့် ရှီယန် သူ့နောက်သို့ မှီလာချိန်တွင် သူသည် ယိုင်တိုင်တိုင် ဖြစ်နေခဲ့ပြီဖြစ်သည်။ သူသည် မိမိအနေဖြင့် ထပ်မံ၍ မလွတ်မြောက်နိုင်တော့သည်ကို သိရှိသွားသောအခါ ကြမ်းပြင်ပေါ်သို့ ထိုင်ချလိုက်ပြီး မျက်နှာတွင် အတင်းအကျပ် အပြုံးတစ်ခုကို ဖန်တီးကာ ပြောလိုက်သည် ။

ဟေး မိတ်‌ဆွေ မင်း အဆင်ပြေတာ ကောင်းတာပေါ့။ ငါက ခြေကျိုးလက်ကျိုးနဲ့ အဲဒီမှာ နေခဲ့လည်း ဘာမှ အသုံးဝင်မှာမဟုတ်ဘူးလေ၊ ဒါကြောင့် ငါ အရင် ထွက်လာခဲ့တာ။

ရှီယန်က သူ့ကို အေးစက်စွာ စိုက်ကြည့်ပြီး ပြန်လည်ဖြေကြားခဲ့သည် ။

မင်းရဲ့ ကယ်တင်ရှင်ကို မင်း ဆက်ဆံတာ ဒီလိုမျိုးလား။

ဤယှဉ်ပြိုင်သူ၏ မျက်နှာမှာ ဖြူလျော်သွားပြီး စကားလုံးများကို ထစ်ထစ်ငေါ့ငေါ့ဖြင့် ပြောလိုက်ရှာသည် ။

မင်း ငါ့ကို အပြစ်တင်လို့မရဘူးလေ။ ကာဒတ်စ်လို သန်မာတဲ့လူတောင်မှ ဒီကင်းလှည့်ရဲတွေ အုပ်စုလိုက် ဝိုင်းရိုက်တာနဲ့တင် သေသွားတာ၊ မင်း ဒီလောက် သန်မာလိမ့်မယ်လို့ ငါ ဘယ်လိုလုပ် သိမှာလဲ။ မင်းက ကင်းလှည့်ရဲကို ဆုတ်ခွာသွားအောင် တကယ် လုပ်နိုင်ခဲ့ပြီး သူ့ကို အပြတ်ရှင်းပစ်လိုက်နိုင်တာပဲ။”

ရှီယန်က အေးစက်စွာ ပြန်ပြောခဲ့သည် ။

အဲဒီ ကာဒတ်စ် ဆိုတဲ့လူက ဘယ်လောက်တောင် သန်မာလို့လဲ။

ထိုကောင်က တိုးတိုးတိတ်တိတ်ဖြင့် ပြန်လည်ဖြေကြားခဲ့သည် ။

သူက ဘယ်လိုလုပ် မသန်မာဘဲ နေမှာလဲ။ သူက ‘ခေါင်းဆောင် နစ်ခ်’ နဲ့ အတူတူ စတင်ခဲ့တဲ့လူလေ၊ သတင်းတွေအရဆို သူ ရုပ်ရှင်ကမ္ဘာ ၆ ခုနီးပါးကို ဖြတ်သန်းခဲ့ပြီးပြီတဲ့။ သူက ခွန်အား ၂၃ မှတ်ထက် ကျော်လွန်တဲ့ သားရဲတစ်ကောင်ပဲ။ ဒါပေမဲ့ ငါတို့ အခြေအနေ အမိခံလိုက်ရတုန်းက သူက ဒီဆိပ်ကမ်း ကင်းလှည့်ရဲတွေကို ၁ မိနစ်တောင် မအောင့်နိုင်ခဲ့ဘူး၊ ထွက်ပြေးဖို့ အခွင့်အရေးတောင် မရခဲ့ဘူး။

ရှီယန်၏ နှလုံးသားမှာ ဒိတ်ခနဲ ဖြစ်သွားပြီး ရယ်မောကာ ပြန်လည်မေးမြန်းလိုက်သည် ။

သူတို့က ရဲ ဘယ်နှယောက်နဲ့ ရင်ဆိုင်ခဲ့ရတာလဲ။

ဤယှဉ်ပြိုင်သူသည် ကြောင်အမ်းသွားပြီးနောက် ပြန်လည်ဖြေကြားခဲ့သည် ။

အဲဒါ အုပ်စုလိုက်ကြီးလေ။ အဲဒီအချိန်တုန်းက ကာဒတ်စ်က ရုန်းရင်းဆန်ခတ်ဖြစ်ပြီး ရဲတိုက်ရဲ့ အနောက်တံခါး ပွင့်သွားပြီးတဲ့နောက် ခုခံဖို့ တာဝန်ယူခဲ့တာ။ အပြင်ကို ထွက်ပြေးဖို့ လမ်းက ကျဉ်းမြောင်းပြီး မတ်စောက်တဲ့ ကွေ့ကောက်တဲ့ လမ်းလေးတင် ရှိတာ၊ အဲဒီဘေးမှာက လျှော‌ စောက်ကြီး။ ငါတို့နောက်ကို လိုက်နေတဲ့ ကင်းလှည့်ရဲတွေ အများကြီး ရှိပေမဲ့ အဲဒီလမ်းကို တစ်ကြိမ်မှာ တစ်ယောက်ပဲ ဖြတ်လို့ရတာ။ ကာဒတ်စ်က ဒီလောက် မြန်မြန်ဆန်ဆန် ရှုံးနိမ့်သွားလိမ့်မယ်လို့ ဘယ်တုန်းကမှ မထင်ခဲ့ဘူး၊ ငါတို့လည်း ပေါက်ကွဲမှုဖြစ်ပြီးနောက် ဒီလောက်အထိ သနားစဖွယ် အခြေအနေမျိုးနဲ့ ဖြတ်သန်းရလိမ့်မယ် မဟုတ်ဘူး။

ရှီယန်က လှောင်ပြောင်သလို ရယ်မောလိုက်ပြီး ပြောလိုက်သည် ။

ဒါဆို မင်းပြောချင်တာက သူက ကင်းလှည့်ရဲ တစ်ယောက်တည်းနဲ့ ရင်ဆိုင်ခဲ့ရတာ ဖြစ်ပေမဲ့၊ အဲဒီကင်းလှည့်ရဲရဲ့ နောက်ကွယ်မှာ အခြားလူတွေ အများကြီး ရှိနေတာပေါ့ ဟုတ်လား။

ဟုတ်တယ်၊ အဲဒါ အမှန်ပဲဟု ထိုယှဉ်ပြိုင်သူက ပြန်လည်ဖြေကြားခဲ့သည်။

ရှီယန်က ဆက်လက်ပြောကြားသည် ။

ဒီကင်းလှည့်ရဲတွေမှာ နောက်ခံစွမ်းရည်တစ်ခု ရှိတယ်၊ သူတို့ရဲ့ အနီးအနားမှာ မဟာမိတ်တစ်ယောက် ရှိနေတိုင်း သူတို့ရဲ့ တစ်ဦးချင်း အရည်အသွေးတွေက ၁၀ မှတ်စီ တိုးလာတတ်တယ်၊ အမြင့်ဆုံး ရောက်နိုင်တာက ၁၀၀ မှတ်အထိပဲ။ ထုတ်အပြင် ဒါက သာမန် အဆင့် (၂) ကင်းလှည့်ရဲတစ်ယောက်ပဲ ရှိသေးတာ။ အကယ်၍ ကာဒတ်စ်က ပိုမိုမြင့်မားတဲ့ အဆင့်မြင့် ကင်းလှည့်ရဲတွေနဲ့ ရင်ဆိုင်ခဲ့ရရင် သူတို့ရဲ့ နောက်ခံစွမ်းရည် အပိုဆုတွေက သေချာပေါက် ပိုပြီး ရူးသွပ်စရာ ကောင်းလိမ့်မယ်။ ထို့အပြင် ဒီကင်းလှည့်ရဲအချို့က အဝေးတိုက်ခိုက်ရေး စွမ်းရည်တွေပါ ရှိနိုင်သေးတယ်။ ငါ ကြည့်ရသလောက်တော့ ကာဒတ်စ် အဲဒီလောက်အထိ ကြာအောင် ခံနိုင်ခဲ့တာကိုက တော်တော်လေး ရဲရင့်လှပါပြီ။

ယှဉ်ပြိုင်သူသည် ဆွံ့အသွားပြီး ဝေခွဲမရဖြစ်ကာ ပြောလိုက်သည် ။

ဒါဆို၊ ခုနက အဲဒီကင်းလှည့်ရဲက

ရှီယန်က ညင်သာစွာ ပြောလိုက်သည် ။

သူက အဆင့် (၂) ကင်းလှည့်ရဲတစ်ယောက်ပဲ၊ ထို့အပြင် သူက တစ်ယောက်တည်း ရှိနေတာ၊ သူ့ကို ရှင်းပစ်ဖို့က သိပ်ပြီး ခွန်အားစိုက်ထုတ်စရာ မလိုပါဘူး။

လောလောဆယ်တွင် ဤယှဉ်ပြိုင်သူသည် ရှီယန်ကို ထူးဆန်းသော အမူအရာဖြင့် ကြည့်ရှုနေပြီး၊ သံသယဖြစ်ဖွယ်မရှိဘဲ သူသည် ရှီယန်ကို “ရဲရင့်သူ”၊ “အပြင်ပန်း အေးစက်သော်လည်း အတွင်းစိတ် နွေးထွေးသူ”၊ “သတင်းအချက်အလက် စုံလင်သူ” ဟူသော ခံစားချက်များဖြင့် ကြည့်ရှုနေခဲ့ပြီ ဖြစ်သည်။ ခဏမျှ တုံ့ဆိုင်းသွားပြီးနောက် သူ၏လက်ကို ဆန့်တန်းလိုက်ရင်း ၊

စောစောက ဖြစ်ခဲ့တဲ့ကိစ္စအတွက် ငါ တောင်းပန်ပါတယ်၊ ငါ့နာမည်က ခရစ် ပါ၊ မင်းရဲ့နာမည်ကို သိပါရစေ။

ရှီယန်က ရယ်မောကာ ပြန်လည်ဖြေကြားခဲ့သည် ။

မင်း ငါ့ကို ‘သင်္ဘောသား ယန်’ လို့ ခေါ်နိုင်ပါတယ်။ တခြားကိစ္စမရှိရင်တော့ ငါ သွားခွင့်ပြုပါဦး။

မင်းက သွားတော့မလို့လား။ ခရစ်သည် စိတ်ဓာတ်ကျသလို ခံစားလိုက်ရပြီး သူ လိုအပ်သော စကားလုံးများကို ပျာပျာသလဲ ရှာဖွေလိုက်သည်။ ရှီယန် အတော်အတန် ဝေးကွာသော နေရာသို့ လျှောက်လှမ်းသွားချိန်တွင် သူသည် ရုတ်တရက် ရှေ့သို့ အတင်းတိုးကာ အော်ဟစ်လိုက်လေသည် ။နေဦး။ နေဦး။ ငါ့ကို ချန်မထားခဲ့ပါနဲ့။