အခန်း ၄၇ - လက်မောင်းလှဲယှဉ်ပြိုင်ခြင်း

ဘားဆိုင်အတွင်းပိုင်းသည် မီးရောင်မှိန်မှိန်သာ ရှိပြီး မျက်နှာကျက်မှာ နိမ့်လွန်းလှသည့်အပြင် တိုင်များပေါ်မှ ဆေးသုတ်လွှာများပင် ကွာကျနေခဲ့ပြီ ဖြစ်သည်။ မျက်နှာကျက်မှ ကြိုးအချို့ တွဲလောင်းကျနေပြီး ထိုကြိုးများ၏ အောက်ခြေတွင် ထူးဆန်းသော အရာဝတ္ထုမျိုးစုံကို ကျပန်းချည်နှောင်ထားကြသည်။ ဥပမာအားဖြင့် ဘီယာပုလင်းများ၊ အိုးခွက်များ၊ သစ်တုံးများ၊ သစ်သားပန်းပုရုပ်များနှင့် ကျောက်တုံးများပင် ပါဝင်သည်။ ဤအရာဝတ္ထုများသည် ရေလုပ်သားများနှင့် ပင်လယ်ဓားမြများ အန္တရာယ်များလှသော ခရီးစဉ်များမထွက်ခွာမီ ၎င်းတို့၏ မျှော်လင့်ချက်ဆန္ဒများကို ဖော်ညွှန်းသည့်အနေဖြင့် ချိတ်ဆွဲထားခဲ့ကြခြင်း ဖြစ်ပေလိမ့်မည်။

ဘားဆိုင်၏ အစွန်ဆုံးဘက်တွင်မူ ဆွေးမြည့်ဟောင်းနွမ်းနေသော ဝက်သစ်ချသား စည်ပိုင်းအချို့ ရှိနေသည်။ လူအချို့သည် ထိုစည်ပိုင်းများကို ဝိုင်းအုံလျက် စကားစမြည်ပြောဆိုရင်း တဟားဟား ရယ်မောနေကြသည်။ ဘားဆိုင်ရှိ စားပွဲများမှာ နိမ့်ပြီး ခိုင်ခံ့လေးလံလှကာ အချိန်ကြာမြင့်စွာ အသုံးပြုမှုကြောင့် ပြောင်ချောနေသော မီးခိုးရောင်သန်းသည့် အရောင်အသွေး ထွက်ပေါ်နေသည်။ စားပွဲပေါ်တွင်မူ သေသေချာချာ ပွတ်တိုက်ထားသဖြင့် တောက်ပနေသော ကြေးဝါဖယောင်းတိုင်ခုံတစ်ခုံနှင့် ဆီမီးခွက်တစ်ခွက် ရှိနေသည်။ စားပွဲများကို ဝိုင်းထိုင်နေကြသော ရေလုပ်သားများနှင့် ပင်လယ်ဓားမြအများစုမှာ စုတ်ပြတ်ပြီး အရောင်လွင့်နေသော အဝတ်ဟောင်းများကို ဝတ်ဆင်ထားကြသည်။ အချို့မှာ ဆံပင်ကို ကျစ်ဆံမြီးကျစ်ထားပြီး ၎င်းပေါ်တွင် ဖန်ပုတီးစေ့များ ဆင်ယင်ထားကြကာ အများစုမှာမူ ရှုပ်ပွနေသော မုတ်ဆိတ်မွေးများနှင့် ဆံပင်များ ရှိကြသည်။

ရှီယန် ဝင်ရောက်လာသည့်အခါ လူအနည်းငယ်သာ သူ့ကို အာရုံစိုက်မိကြသည်။ ယင်းမှာ သူ ကွမ်းသီးဝါးနေသော ပုံစံမှာ ဤနေရာတွင် အတွေ့ရများသော မြင်ကွင်းတစ်ခု ဖြစ်သောကြောင့် ဖြစ်ပေလိမ့်မည်။ သူသည် အရောင်းကောင်တာဆီသို့ လျှောက်လှမ်းသွားခဲ့ရာ ဘားအထိန်းက ဘာမှမပြောဘဲ သံကွင်းများပတ်ထားသည့် သစ်သားဘီယာခွက်တစ်ခွက်ကို လှမ်း၍ လျှောတိုက်ပေးလိုက်သည်။ ၎င်းအတွင်းရှိ ရမ်အရက်မှာ ထူးဆန်းစွာပင် ဖိတ်စင်သွားခြင်းမရှိချေ။

ရမ်အရက်ပွဲတော်မှာ ပျော်ရွှင်ပါစေဗျာ။ ပထမဆုံးတစ်ခွက်က အခမဲ့ပဲ၊ နောက်တစ်ခွက်ကျရင်တော့ မင်းရဲ့ သျှီလင်တွေကို အဆင်သင့်ပြင်ထားလိုက်တော့ ကောင်လေး။

ရှီယန်သည် လမ်းကို အတော်ကြာ လျှောက်လှမ်းခဲ့ရသည့်အပြင် ထိုအဖိုးအိုနှင့်လည်း အချိန်ဆွဲကာ စကားပြောခဲ့ရသဖြင့် အတော်လေး ရေငတ်နေခဲ့သည်။ သူသည် ခွက်ကိုမကာ တစ်ငုံသောက်လိုက်ပြီး ခဏမျှ စိတ်ကူးယဉ်လိုက်မိသည်။ ယခင် သူအလုပ်လုပ်ခဲ့ဖူးသော လက်ရှိကမ္ဘာတွင် သူသောက်ခဲ့ဖူးသော ရမ်အရက်သည် ကမ္ဘာပေါ်တွင် အပြင်းဆုံးသော အရက် ၆ မျိုးထဲမှ တစ်မျိုး ဖြစ်သည်။ ရမ်အရက်သည် ပါးစပ်အတွင်းသို့ ဝင်ရောက်သွားသည်နှင့်တစ်ပြိုင်နက် ဝမ်းဗိုက်အတွင်းသို့ မီးလျှံတန်းတစ်ခု ဝင်ရောက်သွားသည့်အလား ခံစားရစေပြီး အဆုံးသတ်တွင်မှသာ အနည်းငယ် ချိုမြိန်သော အရသာကို ခံစားရလေ့ရှိသည်။ သူ၏ အရက်သောက်နိုင်စွမ်းဖြင့်ပင် ထိုစဉ်က ခွက်တစ်ဝက်ခန့်သာ ရဲရဲဝံဝံ သောက်ရဲခဲ့သည်။

သို့သော်လည်း သူ့ရှေ့ရှိ ခွက်အတွင်းမှ အရက်မှာမူ ကြံရည်ကဲ့သို့သော ချိုမြိန်မှုများဖြင့် ပြည့်နှက်နေပြီး ယင်းအပြင် အနည်းငယ်မျှသော အရက်အရသာကိုသာ ခံစားရသည်။ ယင်းကို ဘီယာနှင့်ပင် နှိုင်းယှဉ်၍မရနိုင်ဘဲ အရက်အရသာ အနည်းငယ်ပါဝင်သော အချိုရည်တစ်ခွက်နှင့်သာ အနီးစပ်ဆုံး တူညီလှပေသည်။ ယင်းမှာ ဤအရက်ကို ချက်လုပ်အချဉ်ဖောက်ရာတွင် နည်းပညာ လိုအပ်ချက်များကြောင့် ဖြစ်နိုင်သလို၊ ဤဘားဆိုင်၏ ကပ်စေးနည်းလှသော သူဌေးက ရမ်အရက်ကို ရေရော၍ ကျဲစေခဲ့ခြင်းကြောင့်လည်း ဖြစ်နိုင်သည်။

ထိုသို့ဖြစ်လင့်ကစား ရှီယန်သည် ထိုရမ်အရက်ခွက်ကြီးတစ်ခွက်လုံးကို တစ်ကျိုက်တည်းဖြင့် ကုန်စင်အောင် မော့ချလိုက်သည်။ ထို့နောက် သူ၏ နှုတ်ခမ်းများကို လျှာဖြင့်သပ်လိုက်ပြီး သူ၏ ပိုက်ဆံအိတ်ကို ထုတ်ကာ ဆက်တိုက်ဆိုသလို ပြောလိုက်တော့သည် ။

ဟုတ်ပြီ၊ နောက်ထပ်တစ်ခွက် ပေးဦး။

ရှီယန်သည် ရုတ်တရက် တစ်ခုခုကို သတိရသွားပြီး ချက်ချင်းပင် ထပ်မံဖြည့်စွက်ပြောလိုက်သည် ။

“၄ သျှီလင်တန်ပဲ ပေးပါ၊ ပိုလည်းမပိုနဲ့ လျော့လည်းမလျော့နဲ့။”

လက်ရှိတွင် ရှီယန်၌ ငွေကြေးပြတ်လပ်နေသဖြင့် သူသည် စင်စစ် ခြိုးခြံချွေတာရန် လိုအပ်လှပေသည်။ ရှီယန်က ခွက်တစ်ခွက်လုံးကို တစ်ကျိုက်တည်း မော့ချလိုက်သည်ကို မြင်သောအခါ ဘားအထိန်းမှာ အနည်းငယ် အံ့အားသင့်သွားခဲ့ရသည်။ ရမ်အရက်ခွက်ကြီးတစ်ခွက်ကို ကုန်အောင်သောက်နိုင်သူများမှာ အတွေ့ရမများလှသော်လည်း၊ သောက်ပြီးသည်နှင့် ချက်ချင်းပင် ထို့ထက်ပိုမိုကြီးမားသော ခွက်ကို ထပ်မံတောင်းဆိုသူမျိုးမှာမူ အလွန်တရာ တွေ့ရခဲလှပေသည်။ ရှီယန် ယခင်က ရေလုပ်သားအဖြစ် အလုပ်လုပ်ကိုင်စဉ်က ရုရှားနိုင်ငံကို ဖြတ်သန်းခဲ့ဖူးပြီး ဆိုက်ဘေးရီးယား၏ အလွန်အမင်းအေးစက်လှသော ရာသီဥတုအောက်တွင် အအေးဒဏ်ကို အန်တုရန် သန့်စင်မှုမြင့်မားသော ဗော့ဒ်ကာအရက်မှာ မရှိမဖြစ်လိုအပ်ကြောင်းကို ထိုဘားအထိန်း မသိရှိခဲ့ချေ။ ထို့ကြောင့် ဤကဲ့သို့သော အခြေအနေများအောက်တွင် သူ၏ အရက်သောက်နိုင်စွမ်းမှာ ပိုမိုတိုးတက်လာခဲ့ပြီး ဘီယာဆိုသည်မှာ သူ့အတွက် ရေကဲ့သို့ပင် ဖြစ်နေကာ သောက်သလောက် ပြန်ဆီးသွားနိုင်စွမ်း ရှိပေသည်။ ယင်းက ဘားအထိန်းကို ပါးစပ်အဟောင်းသား ဖြစ်သွားစေခဲ့ရသည်။

ပစ္စည်းဖိုးပေးမှ ပစ္စည်းရသည်မှာ ထုံးစံဖြစ်ရာ ငွေပေးချေလိုက်သော ရမ်အရက်ခွက်မှာ အခမဲ့ရသော ခွက်ထက် ပမာဏအဆမတန် ပိုမိုများပြားလှသည်။ သူသည် ဒုတိယမြောက် ရမ်အရက်ခွက်ကြီးကိုပါ ဆက်တိုက်ဆိုသလို တစ်ကျိုက်တည်း မော့ချလိုက်ပြီးနောက်တွင်မူ၊ သူသည် ပတ်ဝန်းကျင်ရှိ လူတိုင်း၏ အံ့အားသင့်ဖွယ်ရာ အာရုံစိုက်မှုများကို အလိုလို ရရှိသွားခဲ့ပြီ ဖြစ်သည်။ သူသည် ကျေနပ်အားရစွာဖြင့် ခေါင်းညိတ်လိုက်ရာ အိပ်မက်ဆိုး တံဆိပ်ခတ်နှိပ်မှုက အကြောင်းကြားစာတစ်ခု ပေးပို့လာခဲ့သည် ။အရက်သမား မစ်ရှင် ပြီးမြောက်မှု ၁/၁၀၀။ ထို့နောက် သူသည် ထိုင်ရန်အတွက် စားပွဲတစ်လုံးကို ရှာဖွေလိုက်သည်။ သူ၏ဘေးတွင် အရပ်ရှည်ရှည်နှင့် ပိန်ပိန်ပါးပါး လူတစ်ယောက် ရှိနေပြီး ကြည့်ရသည်မှာ အတော်အတန် ရင်းနှီးပုံရကာ၊ သူက ရှီယန်ထံသို့ သူ၏ခွက်ကို မြှောက်ပြရင်း ရယ်မောကာ ပြောလိုက်သည် ။

ဟေ့ ကောင်လေး၊ မင်း တကယ် သောက်နိုင်တာပဲ ဟဲဟဲ။

ရှီယန် ရယ်မောလိုက်ပြီး အဝေးတစ်နေရာရှိ စည်ပိုင်းများကို ဝိုင်းအုံနေကြသော လူအုပ်ကြီးဆီသို့ လှမ်းကြည့်ကာ မေးလိုက်သည် ။

အဲဒီမှာ အတော်လေး ပျော်စရာကောင်းနေပုံပဲ၊ သူတို့ ဘာလုပ်နေကြတာလဲ။

ထိုလူပိန်က ပခုံးတွန့်ပြကာ မကျေမနပ်ဖြင့် ပြောလိုက်သည် ။

အမာရွတ်မျက်နှာနဲ့ ဟာရီက လက်‌မောင်းလှဲပြိုင်ပွဲမှာ ထပ်ပြီး လောင်းကြေးထပ်နေတာလေ။ ဒီလို ဦးနှောက်မရှိဘဲ ခွန်အားပဲရှိတဲ့ ကောင်က ဒီထက် ပိုပြီး ယဉ်ကျေးတဲ့ ဖျော်ဖြေမှုမျိုးကို မရွေးချယ်တတ်ဘူးလား မသိဘူး။

ရှီယန်သည် ငွေကြေး အသည်းအသန် လိုအပ်နေပြီး၊ အရက်သမား မစ်ရှင်ကို အောင်မြင်ရန်အတွက် အနည်းဆုံးတော့ ခွက်ပေါင်း ၉၉ ခွက်စာ ငွေကြေး လိုအပ်လှပေသည်။ ပေါင်စတာလင် ၂၀ ဆိုသည်မှာ စုဆောင်းရန် ကြီးမားလှသော ငွေပမာဏ ဖြစ်သည်။ ထို့ကြောင့် “လောင်းကြေး” ဟူသော စကားလုံးကို ကြားလိုက်ရသည်နှင့်တစ်ပြိုင်နက် ရှီယန်၏ မျက်လုံးများမှာ ဝင်းခနဲ ဖြစ်သွားခဲ့ရပြီး ချက်ချင်းပင် ရှေ့သို့ ခြေလှမ်းလှမ်းခဲ့တော့သည်။

အမာရွတ်မျက်နှာနှင့် ဟာရီသည် ကျောက်တုံးကြီးတစ်တုံးကဲ့သို့ပင် ထွားကျိုင်းလှပြီး သူ၏မျက်နှာသွင်ပြင်မှာ ထင်ရှားလှသော စကင်ဒီနေဗီးယား ဗိုက်ကင်းလူမျိုးများ၏ လက္ခဏာရပ်များ ရှိနေသည်။ သူ၏မျက်နှာပေါ်တွင် ကန်တော့ကောင်တစ်ကောင်နှင့်တူသော ၅ စင်တီမီတာခန့် ရှိသည့် အမာရွတ်ကြီးတစ်ခု ရှိနေပြီး ဦးခေါင်းထိပ်မှာမူ ပြောင်ပြောင်တင်းတင်း ဖြစ်နေသည်။ မုတ်ဆိတ်မွေး ထူထူကြီးနှင့် ထိုလူကြီးတွင် တောက်ပသော အပြုံးတစ်ခု ရှိနေပြီး၊ ယင်း၏ ရောင်ပြန်ဟပ်မှုကြောင့် ပတ်ဝန်းကျင်ရှိ လွင့်ပျံနေသော ဖုန်မှုန့်များကိုပင် အထင်အရှား မြင်တွေ့နေရသည့်အလား ထင်မှတ်ရပေသည်။ သို့သော်လည်း သူ၏ စရိုက်သဘာဝမှာ သဘောကောင်းပုံရပြီး ငွေကြေး ရှုံးနိမ့်သည့်တိုင်အောင် အော်ဟစ်ဆူပူခြင်းမရှိဘဲ ဒေါသထွက်သည့် အရိပ်အယောင်မျှပင် မပြချေ။ ရှီယန် ရှေ့သို့ လျှောက်လှမ်းသွားစဉ် ဖျတ်ခနဲပင် သူ၏ အကဲခတ်ခြင်း စွမ်းရည်ကို အသက်သွင်းလိုက်သည်။

အမာရွတ်မျက်နှာနှင့် ဟာရီ (အထူးအဆင့်)

ဖော်ပြချက်: ‘ဘဲလ်နှင့် မတ်ဂ်’ သင်္ဘော၏ အရာရှိချုပ်

အရပ်: ၇ ပေ ၂ လက်မ (၂.၁၅ မီတာ)

အလေးချိန်: ၁၅၈ ကီလိုဂရမ်

ခွန်အား: ၉ မှတ်

ဖျတ်လတ်မှု: ? မှတ်

ကိုယ်ခန္ဓာ ကြံ့ခိုင်မှု: ၃၀ မှတ်

အလိုလိုအသိစိတ်: ? မှတ်

ဆွဲဆောင်မှု: ၁၄ မှတ်

ဉာဏ်ပညာ: ၃ မှတ်

စိတ်ဝိညာဉ်: ? မှတ်

အခြေခံ အနီးကပ်တိုက်ခိုက်ရေး: အဆင့် ၃၊ အခြေခံ ခြေလှမ်းပညာ: အဆင့် ၂၊ အခြေခံ ခံနိုင်ရည်: အဆင့် ၃

အဆင့်မြင့်စွမ်းရည်: ?

သီးသန့်စွမ်းရည်: ?

သီးသန့်စွမ်းရည်: နှလုံးရည်ကြီးမားခြင်း။ အသုံးပြုပါက အပိုဆောင်း သွေးပမာဏ ၁,၀၀၀ ကို ပေးစွမ်းနိုင်သည်။

ဖော်ပြချက်: အမာရွတ်မျက်နှာနှင့် ဟာရီသည် လက်ရှိတွင် ဖျော်ဖြေမှုအတွက် နောက်လိုက်တစ်ဦးတည်းကိုသာ ခေါ်ဆောင်လာခဲ့ခြင်း ဖြစ်သည်။ အကယ်၍ မင်းက ယင်းကို သူ၏ အစစ်အမှန် စွမ်းအားဟု ထင်မှတ်နေပါက၊ မင်းရဲ့ ဦးခေါင်းဟာ မြေပြင်ပေါ်က ပုပ်သိုးနေတဲ့ အုန်းသီးတွေလို ဖြစ်သွားရလိမ့်မယ်။

သူ၏ အရည်အချင်းများကို ကြည့်ရှုပြီးနောက် ရှီယန် အနည်းငယ် စိတ်ပျက်သွားခဲ့ရသော်လည်း၊ သူ၏ ပိုက်ဆံအိတ်ကို လွှင့်ပစ်လိုက်ကာ ရယ်မော၍ ပြောလိုက်သည် ။

၂ ပေါင်၊ မင်းနဲ့ တစ်ချီလောက် ပြိုင်မယ်။

အမာရွတ်မျက်နှာနှင့် ဟာရီက ရယ်မောရင်း ရှီယန်ကို လှမ်းကြည့်လိုက်သည် ။

အဝါရောင်အသားအရေနဲ့ ကောင်လေး၊ မင်း အရက်သောက်နိုင်ရုံနဲ့ မင်းရဲ့ ခွန်အားက ကြီးမားတယ်လို့ ထင်နေရင်တော့ မင်းရဲ့ ပိုက်ဆံတွေ ဆုံးရှုံးဖို့သာ ပြင်ထားလိုက်တော့။

ရှီယန်က ပခုံးတွန့်ပြကာ ပြုံးလိုက်သည် ။

ဒါကတော့ အသေအချာ မပြောနိုင်သေးဘူးလေ။

ဟာရီက တဟားဟား ရယ်မောလိုက်ပြီး တာကီလာအရက်တစ်ခွက်ကို မှာယူကာ သူ၏ ခွန်အားများ ပြန်လည်ပြည့်ဝလာစေရန် သောက်သုံးလိုက်သည်။ ၅ မိနစ်ခန့် ကြာပြီးနောက် သူ၏ လက်ကောက်ဝတ်ကို လှုပ်ခါရင်း ပြောလိုက်သည် ။

စကြစို့။

တာကီလာသည် ပြင်းထန်သော အရက်တစ်မျိုးဖြစ်ပြီး အက်ဒရီနလင်းကို လှုံ့ဆော်ပေးနိုင်သော ဒြပ်စင်တစ်ခု ပါဝင်သည်။ အမာရွတ်မျက်နှာနှင့် ဟာရီသည် ကျောက်တုံးကြီးတစ်ခုကဲ့သို့ ထွားကျိုင်းလှသော်လည်း သူ၏ ဦးနှောက်မှာမူ အုံးနောက်မဟုတ်ချေ။ တာကီလာအရက်ကို သောက်ပြီးနောက် သူ၏ ခွန်အားမှာ ၁ မှတ် တိုးတက်သွားခဲ့ပြီး အမြင့်ဆုံး ၁၀ မှတ်အထိ ရောက်ရှိသွားခဲ့သည်။ ရှီယန်ကမူ ဘေးတွင်ထိုင်၍ သူ၏ ရမ်အရက်ကို သောက်နေခဲ့ပြီး အောင်မြင်မှုကို လက်တစ်ကမ်းအတွင်း ရရှိထားသည့်အလား အမူအရာ ရှိနေခဲ့သည်။

ရှီယန်သည် အတော်အတန် ထွားကျိုင်းသည်ဟု ယူဆနိုင်သော်လည်း၊ သူ၏ ညာလက်ကို ဆန့်ထုတ်၍ ဟာရီ၏ လက်ဖဝါးကြီးနှင့် ချိတ်ဆက်လိုက်သည့်အခါ သူသည် သနားစရာကောင်းလောက်အောင် ပိန်ပါးသော ကောင်လေးတစ်ဦးကဲ့သို့ ဖြစ်သွားခဲ့ရသည်။ ခန္ဓာကိုယ် အရွယ်အစားအရ ကြည့်မည်ဆိုပါက ရှီယန်၏ အရပ် ၁.၇၇ မီတာနှင့် အလေးချိန် ၇၅ ကီလိုဂရမ်မှာ ဤကြီးမားလှသော ဘီလူးသတ္တဝါကြီး၏ ရှေ့မှောက်တွင် ကလေးငယ်တစ်ဦးကဲ့သို့ပင်။ ၎င်းတို့နှစ်ဦး စတင်၍ ခွန်အားစိုက်ထုတ်လိုက်သည့်အခါ ရှီယန်သည် သူ၏ လက်ကောက်ဝတ်ပေါ်သို့ သက်ရောက်လာသော ဖော်ပြ၍မရနိုင်လောက်အောင် ကြီးမားလှသည့် အင်အားကို ခံစားလိုက်ရပြီး၊ တစ်ပြိုင်နက်တည်းမှာပင် သူ၏လက်မှာ ပြင်းထန်သော ဖိအားကြောင့် အောက်ဘက်သို့ ၄၅ ဒီဂရီခန့် စောင်းသွားခဲ့ရသည်။ သူ၏ တစ်ကိုယ်လုံးမှာ တုန်လှုပ်နေခဲ့ပြီး မျက်ခုံးများကို အောက်သို့ချကာ သူ၏ အမြင့်ဆုံး ခွန်အားကို အတင်းအကျပ် စိုက်ထုတ်လိုက်တော့သည်။

၎င်းတို့၏ တင်ပါးအောက်ရှိ သစ်သားကုလားထိုင်များထံမှနေ၍ ကျွီကျွီမြည်သံများ ထွက်ပေါ်လာခဲ့ပြီး ကြီးမားလှသော ဖိအားအောက်တွင် အက်ကြောင်းများပင် စတင်ထွက်ပေါ်လာခဲ့သည်။ ထို့သို့မဟုတ်ဘဲ ဟောင်းနွမ်းနေသော သစ်သားစားပွဲမှာမူ အမာရွတ်များဖြင့် ပြည့်နှက်နေသည့်တိုင်အောင် ငြိမ်သက်စွာ ရှိနေခဲ့ပြီး မည်သို့မျှ လှုပ်ရှားခြင်းမရှိချေ။

ပတ်ဝန်းကျင်ရှိ လူများထံမှနေ၍ အံ့ဩတသံများ ထွက်ပေါ်လာခဲ့သည်။ ပုံမှန်အားဖြင့် အမာရွတ်မျက်နှာနှင့် ဟာရီသည် ဤကဲ့သို့သော လှုပ်ရှားမှုများတွင် မည်သူမျှ မယှဉ်နိုင်အောင် စွမ်းဆောင်နိုင်ခဲ့ပြီး တစ်ခုလုံးသော တော်ကျူဂါဆိပ်ကမ်းတွင် ကျော်ကြားလှသူ ဖြစ်သည်။ အကယ်၍ ထိုဂန္ထဝင် စစ်သင်္ဘောကြီး သုံးစင်းမှ အဖွဲ့ဝင်များသာ ပါဝင်ပတ်သက်ခြင်း မရှိပါက သူသည် တစ်ပွဲပြီးတစ်ပွဲ ဆက်တိုက်ဆိုသလို အနိုင်ရရှိလေ့ရှိသည်။ ၎င်းတို့က ရှီယန်သည်လည်း ထိုနည်းတူစွာပင် ရှုံးနိမ့်သွားလိမ့်မည်ဟု ယုံကြည်ထားခဲ့ကြသော်လည်း၊ ရှီယန်သည် ဤကဲ့သို့သော ခွန်အားကို အချိန်အတော်ကြာ ကြံ့ကြံ့ခံကာ တတည်ငြိမ်စွာ ခုခံနိုင်စွမ်းရှိသော ပထမဆုံးသော လူသား ဖြစ်နေခဲ့သည်။

၎င်းတို့နှစ်ဦးစလုံး၏ မျက်နှာများမှာ နီရဲနေခဲ့ပြီး လက်ကောက်ဝတ်များမှ သွေးကြောများမှာ ဖောင်းကြွနေခဲ့ကာ၊ ချိတ်ဆက်ထားသော လက်များမှာလည်း အနည်းငယ်မျှ တုန်ခါနေခဲ့သည်။ ပိုမိုအံ့ဩစရာ ကောင်းသည်မှာ ရှီယန်သည် ထိုလက်ကို တဖြည်းည်း ပြန်လည်တွန်းထုတ်နေခြင်းပင် ဖြစ်သည်။ ဟာရီ၏ မျက်လုံးများမှာ ပြူးကျယ်သွားခဲ့ရပြီး နဖူးပေါ်တွင် ချွေးစက်များ စတင်ထွက်ပေါ်လာခဲ့ကာ၊ သူသည် မိမိ၏ပြိုင်ဘက်က ပြန်လည်တိုက်စစ်ဆင်လာသည်ကို သက်သက်မဲ့ ကြည့်နေရုံမှတစ်ပါး အခြားမရှိတော့ချေ။

ထိုအချိန်တွင် ၎င်းတို့၏ တင်ပါးအောက်ရှိ သစ်သားခုံများမှာ ကြီးမားလှသော ဖိအားကို ဆက်လက်မခံနိုင်တော့ဘဲ ကျယ်လောင်သော အက်ကွဲသံနှင့်အတူ ပျက်စီးသွားခဲ့ရသည်။ ရှီယန်သည် မြေပြင်ပေါ်သို့ တင်ပါးဖြင့် အရင်မကျစေရန်အတွက် ချက်ချင်းပင် သူ၏လက်ကို လွှတ်လိုက်ပြီး မတ်တပ်ရပ်လိုက်သည်။ ဤပွဲစဉ်မှာ အနိုင်အရှုံး မပေါ်ဘဲ ပြီးဆုံးသွားခဲ့သဖြင့် ကြည့်ရှုနေကြသူများမှာ ဤကဲ့သို့သော အံ့ဩဖွယ်ရာ ပွဲကောင်းတစ်ပွဲအတွက် အလွန်တရာ နှမြောတသ ဖြစ်သွားခဲ့ကြရသည်။

သို့သော်လည်း ဟာရီကမူ အလွန်တရာ သဘောထားကြီးစွာဖြင့် တဟားဟား ရယ်မောရင်း ပြောလိုက်သည် ။

စုတ်ပြတ်နေတဲ့ ကုလားထိုင်၊ ဘာဖြစ်လို့ ဒီလို အရေးကြီးတဲ့ အချိန်ကျမှ ပျက်စီးသွားရတာလဲ။ ဒီပွဲက ငါရှုံးတယ်လို့ပဲ သတ်မှတ်လိုက်မယ်၊ မာဒီ၊ ၄၀ သျှီလင် ထုတ်ပြီး ဒီ‌ ကောင်‌လေးကို ပေးလိုက်စမ်း။

မာဒီမှာ ဘေးတွင်ရပ်နေသော အသက် ၅၀ ကျော်ခန့် ရှိသည့် ပုပုပြတ်ပြတ်နှင့် ခိုင်ခံ့ထွားကျိုင်းသော လူကြီး ဖြစ်သည်။ သူ၏ ဆံပင်များမှာ အကုန်ဖြူနေခဲ့ပြီး ထိုစကားကို ကြားလိုက်ရသည်နှင့်တစ်ပြိုင်နက် ပေါင်စတာလင် နှစ်ပေါင်ကို ရှီယန်၏ ပိုက်ဆံအိတ်အတွင်းသို့ ချက်ချင်းပင် ထည့်ပေးလိုက်သည်။ ရှီယန် ထွက်မသွားသေးဘဲ ဘားအထိန်းကို လှမ်း၍ အချက်ပြကာ ဤနေရာတွင် ရှိနေသော လူတိုင်းကို ရမ်အရက်တစ်ခွက်စီ တိုက်ရန် ပြောလိုက်သည် ။အသေအချာပင် ၎င်းမှာ ၄ သျှီလင်တန် ခွက်ကြီးအမျိုးအစား ဖြစ်သည်။ ထို့နောက် သူက ကျယ်လောင်စွာ အော်ဟစ်လိုက်တော့သည် ။

ငါက အရှေ့တရုတ်ပင်လယ်က လာတဲ့ ရေလုပ်သား ယန်ပဲ။ လောဘကြီးတဲ့ ကပ္ပတိန်တစ်ယောက်က ငါ့ကို အပိုဆုကြေးတွေ အများကြီး ပေးမယ်လို့ ကတိပေးပြီး ငှားရမ်းခဲ့တာ။ ပင်လယ်ပြင်ထဲမှာ မိုင်ပေါင်းသောင်းချီ ခရီးနှင်ခဲ့ပြီးနောက် သူက သူခေါ်လာတဲ့ ပိုးထည်တွေနဲ့ အိုးခွက်တွေကို အဆပေါင်း နှစ်ဆယ်လောက် အမြတ်ရအောင် အောင်မြင်စွာ ရောင်းချနိုင်ခဲ့တယ်။ ဒါပေမဲ့ ငါ အရက်မူးနေတဲ့အချိန်ကျမှ ဤလှပပြီး စိမ်းသက်လှတဲ့ နေရာမှာ ငါ့ကို စွန့်ပစ်ထားခဲ့တယ်။

ထိုအချိန်တွင် ရှီယန်သည် မိမိ၏ ခွက်ကို အထက်သို့ မြှောက်လိုက်ပြီး

မိစ္ဆာနတ်ဆိုးက သူ့ရဲ့ ဝိညာဉ်ကို ကျိန်စာတိုက်ပါစေ။

လက်ရှိတွင် ပတ်ဝန်းကျင်ရှိ လူများမှာ ရေလုပ်သားများနှင့် ပင်လယ်ဓားမြများ ဖြစ်ကြသဖြင့် ၎င်းတို့သည် မရိုးသားသော စီးပွားရေးသမားများကို မည်သည့်အခါမျှ အမြင်ကြည်လေ့မရှိကြချေ။ ရှီယန်၏ တိုက်ကျွေးမှုကို ခံယူရင်း ၎င်းတို့သည် သူ၏ခံစားချက်ကို ကိုယ်ချင်းစာမိကြသဖြင့် ၎င်းတို့၏ ခွက်များကို တပြိုင်နက်တည်း မြှောက်လိုက်ကြကာ

“မိစ္ဆာနတ်ဆိုးက သူ့ရဲ့ ဝိညာဉ်ကို ကျိန်စာတိုက်ပါစေ!”