အခန်း ၄၂ - မျှော်လင့်မထားဘဲ ရိတ်သိမ်းရရှိခြင်း

ဖူးလစ်ရှ် ကပ်ဘ် မှာ မခံမရပ်နိုင်လောက်အောင် ပြင်းထန်လှသော နာကျင်မှုကြောင့် ချွေးစေးများ တဖြန်းဖြန်း ထွက်နေပြီး အာရုံများ ဝေဝါးနေခဲ့ရာ ဘာပြန်ပြောရမှန်းပင် မသိတော့ချေ။ ရှီယန် ကိုယ်တိုင်ကလည်း သူ့ထံမှ အဖြေကို နားထောင်ရန် ရည်ရွယ်ချက် မရှိသဖြင့် ထိုကောင်၏ ကျောရိုးပေါ်သို့ ခြေထောက်ဖြင့် အားကုန် ထပ်မံနင်းခြေလိုက်ပြီးနောက် သူ၏ ဆံပင်များကို ဆွဲကိုင်ကာ မျက်နှာကို အပေါ်သို့ ပင့်တင်ပြီး ကွန်ကရစ် ကြမ်းပြင်ပေါ်သို့ ပြင်းထန်စွာ ဆောင့်ချလိုက်တော့သည်

အောက်ထပ်တွင် စောင့်ကြည့်ကျန်ရစ်ခဲ့သော လူမိုက် ၃ ဦးမှာ ဟွာရှန်းဖေး၏ အဖွဲ့အစည်းအတွင်း အဆင့်အတန်း နိမ့်ကျသူများဟု ဆိုနိုင်သည်။ အလွယ်ပြောရလျှင် သူတို့မှာ ဟွာရှန်းဖေး၏ အာရုံစိုက်မှုကို ခံရလောက်အောင် အရေးမပါသလို၊ ဖူးလစ်ရှ် ကပ်ဘ် ၏ အမြင်ကြည်ခြင်းကိုလည်း မခံရသည့်အပြင် ယခင်က သေဆုံးသွားခဲ့သော လူမိုက်ခေါင်းဆောင်၏ တန်ဖိုးထားမှုကိုလည်း မရရှိခဲ့ကြသူများ ဖြစ်သည်။ သူတို့သည် အစောပိုင်းက ဖူးလစ်ရှ် ကပ်ဘ် ၏ လောဘဇောတိုက်ပြီး အပိုင်စီးသည့် လုပ်ရပ်အပေါ်တွင်လည်း မည်သို့မျှ တုံ့ပြန်နိုင်စွမ်း မရှိဘဲ ငြိမ်ခံခဲ့ကြရသည်။ သူတို့သည် အောက်ထပ်တွင် စကားစမြည် ပြောဆိုနေကြစဉ် စိုးရိမ်စိတ်များဖြင့် ပြည့်နှက်နေခဲ့ပြီး နောက်ဆုံးတွင်မူ စိတ်မကျေမနပ် ဖြစ်နေကာ ပါးစပ်သရမ်းတတ်သော ဖိလစ်ဆစ် က စတင်၍ ပြောဆိုလိုက်သည် ။

အပေါ်ကို လိုက်မသွားရတာ မဆိုးဘူးလို့ ပြောရမယ်။ အဲ့ဒီ ရှီယန် ဆိုတဲ့ ကောင်စုတ်လေးက ထူးဆန်းပြီး ယုတ်မာလွန်းတယ်။ စဉ်းစားကြည့်လေ ငါတို့ရဲ့ လူမိုက်ခေါင်းဆောင်က အစ်ကိုကြီး ဟွာရှန်း နောက်ကို လိုက်ခဲ့တာ ၁၀ နှစ်တောင် ရှိပြီ၊ သူ မဖြတ်သန်းခဲ့ဖူးတဲ့ လှိုင်းတံပိုးမျိုး ရှိလို့လား။ တောက်! အဲ့လို လူတောင်မှ ဝမ်းဗိုက်ကနေ အပေါ်အထိ တစ်ချက်တည်းနဲ့ အပြတ်ရှင်းခံလိုက်ရတာ။ဟူး... ကြောက်စရာကြီး။

ထိုမျှအထိ ပြောပြီးနောက် ဖိလစ်ဆစ် တစ်ယောက် နှုတ်ဆိတ်သွားခဲ့သည်၊ အကြောင်းမှာ သူကိုယ်တိုင်ပင် အခြေအနေများက တစ်ခုခု လွဲမှားနေသည်ဟု ခံစားလိုက်ရသောကြောင့် ဖြစ်သည်။ အချက်ပေးသံကဲ့သို့ပင် ထိုအခိုက်အတန့်၌ အပေါ်ထပ်မှနေ၍ အော်ဟစ်ညည်းတွားသံတစ်ခု စူးရှစွာ ထွက်ပေါ်လာခဲ့သည်။ ထိုလူ ၃ ဦးသည် တစ်ဦးကိုတစ်ဦး လှမ်းကြည့်လိုက်ကြပြီး နောက်ဆုံးတွင်မူ အကြောက်တတ်ဆုံး တစ်ယောက်က တုန်တုန်ရီရီဖြင့် ပြောလိုက်သည် ။

အဲ့ဒါ... အဲ့ဒီအသံက ဆော့ဖ် ရိုက်စ် အစ်ကိုကြီးရဲ့ အသံနဲ့ တူတယ်။

လျှောက်မပြောနဲ့

အဓိပ္ပာယ်မရှိတာ

ကျန်ရှိသော ထိတ်လန့်နေသည့် လူနှစ်ဦးက ဒေါသတကြီးဖြင့် ပြန်လည် တုံ့ပြန်လိုက်ကြသည် ။

အဲ့ဒါက အဲ့ဒီ ကောင်စုတ်လေးရဲ့ နာကျင်စွာ အော်ဟစ်သံ ဖြစ်ရမယ်။

မကြာမီ အချိန်အတွင်းမှာပင် နောက်ထပ် အော်ဟစ်သံတစ်ခု ထပ်မံ ထွက်ပေါ်လာခဲ့ပြန်သည်၊ ဤတစ်ကြိမ်တွင်မူ ဖူးလစ်ရှ် ကပ်ဘ် အစ်ကိုကြီး၏ ပြင်းထန်လှသော နာကျင်စွာ အော်ဟစ်သံ ဖြစ်ကြောင်း အထင်အရှား သိသာလှပေသည်။ ထို့နောက်တွင်မူ ဒုန်း... ဒုန်း... ဒုန်း... ဟူသော ပြင်းထန်လှသည့် ထုရိုက်သံများကို ကြားလိုက်ရသည်။ ထိုအသံမှာ အလွန်တရာ စည်းချက်ကျလှပြီး အင်အားများ ပြည့်နှက်နေခဲ့သည်။ ယင်းက ထိုလူ ၃ ဦးအား စိုးရိမ်တုန်လှုပ်မှုကြောင့် ကြက်သီးများ ထသွားစေခဲ့ရပြီး၊ သူတို့ ချမ်းနေ၍လား သို့မဟုတ် ကြောက်လန့်နေ၍လား ဆိုသည်ကိုပင် မခွဲခြားနိုင်တော့ချေ။

ရုတ်တရက်ပင် တတိယထပ်မှနေ၍ ပြတင်းပေါက် မှန်ချပ်များ ကွဲကြေသွားသည့် အသံတစ်ခု ထွက်ပေါ်လာခဲ့သည်။ လွင့်စင်လာသော မှန်ကွဲစများကြားမှနေ၍ မည်းမှောင်သော ပုံရိပ်တစ်ခု အပြင်သို့ လွှင့်ပစ်ခြင်း ခံလိုက်ရပြီး အပြင်ဘက်ရှိ ရွှံ့နွံများ ထူထပ်နေသော ရေကွက်အတွင်းသို့ ပြုတ်ကျသွားခဲ့သည်။ ထိုပုံရိပ်မှာ ထိုလူ ၃ ဦးနှင့် ၅-၆ မီတာခန့် အကွာအဝေးသို့ ပြုတ်ကျခဲ့ခြင်း ဖြစ်ပြီး တစ်ကိုယ်လုံးတွင် လတ်ဆတ်သော သွေးများဖြင့် ပေကျံနေခဲ့သည်။ ထိုပုံရိပ်မှာ ထွားကျိုင်းသန်မာလှပြီး သူ၏ ဆံပင်များမှာမူ တစ်စုံတစ်ဦးက အားဖြင့် ဆွဲနှုတ်ထားသည့်အလား ပုံပျက်ပန်းပျက် ဖြစ်နေခဲ့သည်။ ရှုပ်ပွနေသော ဆံပင်များအောက်ရှိ နဖူးပြင်တွင်မူ ကြီးမားလှသော ဖူးရောင်မှုကြီးတစ်ခု ဖြစ်ပေါ်နေခဲ့သည်။ ထိုပုံရိပ်၏ မျက်နှာတစ်ခုလုံးမှာ လုံးဝ ပုံပျက်ပန်းပျက် ဖြစ်နေခဲ့ပြီး သွားများ၊ မျက်လုံးများ၊ ဆံပင်များနှင့် သွေးများမှာ ရောနှောကာ စုတ်ပြတ်နေခဲ့သည်။ လျှာ၏ တစ်ဝက်ခန့်မှာ ပါးရိုးပေါ်သို့ ထွက်နေခဲ့ပြီး၊ ယင်းမှာ သူ၏ မျက်နှာကို ကြမ်းတမ်းလှသော လမ်းမပေါ်တွင် မီတာရာဂဏန်းခန့် အတင်းအကျပ် ဆွဲပွတ်ထားသည့်အလား ထင်မှတ်ရပေသည်။

ဤကဲ့သို့သော ကြေကွဲစရာ မြင်ကွင်းကို ကြည့်ရင်း ယင်းမှာ ဖူးလစ်ရှ် ကပ်ဘ် အစ်ကိုကြီး ဖြစ်ကြောင်း ခွဲခြားရန် ခဲယဉ်းလှပေသည်။ အကယ်၍ ဖူးလစ်ရှ် ကပ်ဘ် အစ်ကိုကြီးသည် ပန်းပွင့်ပုံစံ လည်စီးနှင့် ညှပ်ဖိနပ်တို့ကို တွဲဖက်ဝတ်ဆင်တတ်သည့် တစ်ဦးတည်းသောလူ မဟုတ်ပါက ဤလူမှာ မည်သူမည်ဝါ ဖြစ်ကြောင်း ချက်ချင်း သိရှိရန် လုံးဝ မဖြစ်နိုင်ချေ။ ထို့နောက်တွင်မူ အခြားသော ပုံရိပ်နှစ်ခုမှာလည်း အပေါ်ထပ်မှနေ၍ မြေပြင်ပေါ်သို့ ပြုတ်ကျလာခဲ့ပြန်သည်။ ယင်းတို့မှာ လစ်တဲလ် နီးဒဲလ် နှင့် ဆော့ဖ် ရိုက်စ် တို့၏ ရုပ်အလောင်းများ ဖြစ်ကြပြီး၊ သူတို့၏ မျက်နှာအမူအရာများမှာ မကျေမနပ်ဖြင့် သေဆုံးသွားခဲ့ရသည့်အလား ထိတ်လန့်စရာ ကောင်းလှပေသည်။

မိမိတို့၏ ရှေ့မှောက်ရှိ သွေးစွန်းနေသော သက်သေ သုံးခုကို ကြည့်ရင်း ထိုလူ ၃ ဦးမှာ အလွန်တရာ ထိတ်လန့်တုန်လှုပ်သွားခဲ့ကြရပြီး၊ သူတို့၏ ရင်ဘတ်ကို ကြီးမားလှသော ကျောက်ဆောင်ကြီးတစ်ခုဖြင့် ဖိနှိပ်ထားသည့်အလား အသက်ရှူရန်ပင် ခက်ခဲလာခဲ့ကြသည်။ ထိုအခိုက်အတန့်တွင် ရှီယန်သည် ဒုတိယထပ်ရှိ ဝရံတာတစ်ခုမှနေ၍ ထွက်ပေါ်လာခဲ့ပြီး လက်နှစ်ဖက်ကို ရင်ဘတ်ပေါ်တွင် ပိုက်ထားကာ အေးစက်စွာ ပြုံးနေခဲ့သည်။ ထူးဆန်းစွာ တည်ငြိမ်လှသော အကြည့်များဖြင့် အောက်သို့ စိုက်ကြည့်ရင်း သူက ရယ်မောလိုက်ပြီး၊ သူ၏ ညာလက်ကို အသုံးပြု၍ လည်လှီးပြသည့် အမူအရာကို ပြုလုပ်လိုက်တော့သည်။

ဤအမူအရာကြောင့် ထိုလူ ၃ ဦးမှာ မြှားတစ်စင်းဖြင့် ထိုးစိုက်ခံလိုက်ရသည့်အလား တုန်လှုပ်ကာ ခုန်တက်သွားခဲ့ကြရသည်။ သူတို့သည် ထူးဆန်းသော အော်ဟစ်သံများကို ထုတ်ဖော်ရင်း ကိုယ်ကို လှည့်၍ ထွက်ပြေးကြတော့သည်။ ယင်းမှာ ရှီယန် အလိုရှိနေသည့် အရာပင် ဖြစ်သည်။ သူသည် ဒုတိယထပ်မှနေ၍ ရဲရဲဝံ့ဝံ့ ခုန်ချလိုက်ပြီး ဖိလစ်ဆစ် ထွက်ပြေးရာ လမ်းကြောင်းအတိုင်း ဆက်လက် လိုက်လံဖမ်းဆီးခဲ့တော့သည်။ ထိုလူမိုက် ၃ ဦးစလုံးတွင် တူညီသော အတွေးတစ်ခု ရှိနေကြပြီး ၃ လမ်းခွဲ၍ ထွက်ပြေးကြရာ ရှီယန်အနေဖြင့် ၎င်းတို့ထဲမှ တစ်ဦးကိုသာ လိုက်လံဖမ်းဆီးနိုင်မည် ဖြစ်သည်။ သို့သော်လည်း သူတို့ မစဉ်းစားမိသော အချက်တစ်ခု ရှိနေသည်။ ယင်းမှာ သူတို့ တစ်ဦးချင်းစီ၏ ကိုယ်ခန္ဓာ ကြံ့ခိုင်မှုပင် ဖြစ်ပေသည်။

ထိုလူ ၃ ဦးသည် ရှီယန်၏ နောက်သို့ မိုးသည်းထန်စွာ ရွာသွန်းပြီး ရွှံ့နွံများ ထူထပ်နေသည့် ကြားမှ ကီလိုမီတာ အနည်းငယ်ခန့်အထိ လိုက်လံဖမ်းဆီးခဲ့ကြရခြင်း ဖြစ်ပြီး၊ ထို့နောက်တွင်လည်း ဆောက်လုပ်ရေး အဆောက်အအုံများအတွင်း အထက်အောက် ရှေ့နောက် ပြေးလွှားခဲ့ကြရသည်။ သူတို့သည် ရေတစ်ငုံ သောက်ရန်ပင် အချိန်မရခဲ့ကြချေ၊ အဆောက်အအုံအောက်တွင် ၁၀ မိနစ်ခန့် နားနေခဲ့ရသည့်တိုင်အောင် သူတို့သည် ချမ်းအေးပြီး ဆာလောင်နေခဲ့ကြရာ သူတို့၏ အင်အားများ မည်ကဲ့သို့ ပြန်လည်ပြည့်ဖြိုးနိုင်ပါမည်နည်း။ မီတာ ၃၀ မျှပင် မပြေးရသေးခင်မှာပင် ရှီယန်က လိုက်မှီသွားခဲ့ပြီး အမြန်ဆုံး ပြေးနေသော ကောင်ကို အပြတ်ရှင်းလိုက်ကာ၊ ချက်ချင်းပင် အနောက်ဘက်သို့ ကိုယ်ကို လှည့်၍ နောက်ထပ် မီတာ ၁၀၀ ခန့် ဆက်လက် လိုက်လံဖမ်းဆီးခဲ့သည်။ ခုခံနိုင်စွမ်းမရှိသော ဖိလစ်ဆစ် ကို အလွယ်တကူပင် သတိလစ်သွားအောင် ပြုလုပ်လိုက်ပြီးနောက် နောက်ဆုံးကျန်ရှိနေသော လူကို ဆက်လက် ဖမ်းဆီးခဲ့သည်။ ဤကောင်မှာ လုံးဝ အသုံးမဝင်သူ ဖြစ်ပြီး ရှီယန် နီးကပ်လာသည်ကို မြင်လိုက်ရသည့်အခါ သူသည် ထိတ်လန့်တကြားဖြင့် ဒူးထောက်လိုက်ကာ ငိုကြွေးလေတော့သည်။

နောက်ဆုံးတွင်မူ လိုက်လံဖမ်းဆီးခဲ့ကြသော ဟွာရှန်းဖေး၏ နောက်လိုက်များအားလုံး ဖယ်ရှားခြင်း ခံလိုက်ရပြီ ဖြစ်သည်။ ရှင်သန်ကျန်ရစ်သူ နှစ်ဦးတည်းသာ ရှိတော့ပြီး ယင်းတို့မှာ သတိလစ်နေသော ဖိလစ်ဆစ် နှင့် အလွန်အမင်း ကြောက်လန့်နေသော ထိုကောင်စုတ်လေးသာ ဖြစ်ကြသည်။

ရှီယန်သည် အသက်ကို ပြင်းပြင်းရှူသွင်းပြီး ပြန်လည်ထုတ်လွှတ်လိုက်ရာ သူ၏ နှလုံးသားအတွင်း၌ ဖော်ပြ၍ မရနိုင်လောက်အောင် ထူးဆန်းသော လွတ်လပ်ပေါ့ပါးမှုကို ခံစားလိုက်ရသည်။ လက်သီးကို တင်းကြပ်စွာ ဆုပ်ကိုင်လိုက်ရင်း သူသည် သူ၏ ကိုယ်ခန္ဓာ ကြံ့ခိုင်မှုနှင့် အင်အားတို့ကို ခံစားမိလိုက်ပြီး သူ၏ စိတ်အတွင်း၌ ကြီးမားလှသော ရည်မှန်းချက်တစ်ခု ထက်သန်လာခဲ့သည်။ ရုတ်တရက်ပင် သူသည် အိပ်မက်ဆိုး တံဆိပ်ခတ်နှိပ်မှုထံမှ အကြောင်းကြားစာတစ်ခုကို လက်ခံရရှိလိုက်သည် ။

မင်းဟာ လက်ရှိကမ္ဘာမှာ ပြင်းထန်တဲ့ တိုက်ပွဲတစ်ခုကို ဆင်နွှဲခဲ့ပြီး ဖြစ်ပါတယ်၊ မင်းရဲ့ ခွန်အား ၁ မှတ် တိုးတက်လာပါတယ်။

မင်းဟာ လက်ရှိကမ္ဘာမှာ ပြင်းထန်တဲ့ တိုက်ပွဲတစ်ခုကို ဆင်နွှဲခဲ့ပြီး ဖြစ်ပါတယ်၊ မင်းရဲ့ ဖျတ်လတ်မှု ၁ မှတ် တိုးတက်လာပါတယ်။

မင်းဟာ ရန်သူတွေရဲ့ တိုက်ခိုက်ခြင်းကို ခံခဲ့ရပြီး လက်ရှိကမ္ဘာမှာ ပြင်းထန်တဲ့ တိုက်ပွဲတစ်ခုကို ဆင်နွှဲခဲ့ပြီး ဖြစ်ပါတယ်၊ မင်းရဲ့ ကိုယ်ခန္ဓာ ကြံ့ခိုင်မှု ၁ မှတ် တိုးတက်လာပါတယ်။

အကြောင်းကြားစာ စာရင်းကို ကြည့်ရင်း ရှီယန်သည် အမှန်တကယ်ပင် တည်ငြိမ်မှုကို ခံစားလိုက်ရသည်၊ အကြောင်းမှာ သူသည် အခြေအနေကို အသေအချာ နားလည်ထားပြီး ဖြစ်သောကြောင့် ဖြစ်သည် ။ ကနဦး အဆင့်တွင် ပြိုင်ပွဲဝင်တစ်ဦး၏ အရည်အချင်းများသည် လျင်မြန်စွာ အဆင့်မြှင့်တင်မှုကို ပြသမည် ဖြစ်သော်လည်း၊ ကမ္ဘာနှစ်ခုစလုံးကို ကြုံတွေ့ပြီးနောက်တွင်မူ ဤအဆင့်မြှင့်တင်မှုများသည် နောက်ဆုံး၌ ရပ်တန့်သွားမည် ဖြစ်ပြီး အိပ်မက်ဆိုး နယ်ပယ်အတွင်းရှိ လွတ်လပ်သော အရည်အချင်းမှတ်များအပေါ်တွင်သာ မှီခူး၍ အရည်အချင်းများကို မြှင့်တင်နိုင်တော့မည် ဖြစ်သည်။

ပြိုင်ပွဲဝင်တစ်ဦး ဖြစ်လာပြီးနောက်တွင် လူတစ်ဦး၏ ကိုယ်ခန္ဓာ အလားအလာများကို အပြည့်အဝ အသက်သွင်းလိုက်ပြီ ဖြစ်ကြောင်းကိုလည်း ပြသနေသည်။ ပြင်းထန်လှသော တိုက်ပွဲများနှင့် လေ့ကျင့်မှုများမှတစ်ဆင့် ကိုယ်ခန္ဓာ၏ အလားအလာများသည် သာမန်လူတစ်ဦး၏ ကန့်သတ်ချက်များသို့ ရောက်ရှိသွားသည်အထိ ဆက်လက် တိုးတက်နေမည် ဖြစ်သည်။ ဤအတားအဆီးသို့ ရောက်ရှိသွားသည့်အခါ ပြိုင်ပွဲဝင်တစ်ဦး၏ ကိုယ်ခန္ဓာသည် ကမ္ဘာ့ချန်ပီယံတစ်ဦး၏ ကိုယ်ခန္ဓာ တည်ဆောက်ပုံနှင့် တူညီသွားမည်ဟု ပြောနိုင်ပြီး လူသားကိုယ်ခန္ဓာ၏ ကဏ္ဍတိုင်းတွင် အမြင့်ဆုံး စွမ်းဆောင်ရည်များသို့ ရောက်ရှိသွားမည် ဖြစ်သည်။ သို့သော်လည်း ဤအခြေအနေတွင် ပြိုင်ပွဲဝင်တစ်ဦးက မည်မျှပင် ပြင်းထန်စွာ လေ့ကျင့်ပါစေ သို့မဟုတ် တိုက်ခိုက်ပါစေ သူ၏ တစ်ဦးချင်းစီ အရည်အချင်းများသည် ၁ မှတ်မျှပင် ဆက်လက် တိုးတက်နိုင်မည် မဟုတ်ချေ။ အကြောင်းမှာ ထိုလူ၏ အလားအလာများ ပြည့်မြောက်သွားခဲ့ပြီ ဖြစ်သောကြောင့် ဖြစ်ပြီး၊ အိပ်မက်ဆိုး နယ်ပယ်မှ သူ၏ အလားအလာမှတ်များကို တိုးမြှင့်ခြင်းဖြင့်သာ သူ၏ အရည်အချင်း အလားအလာ အဆင့်ကို တိုးမြှင့်နိုင်မည် ဖြစ်သည်။

ကနဦး အဆင့်၌ လျင်မြန်စွာ အဆင့်မြှင့်တင်ပေးခြင်းမှာ အိပ်မက်ဆိုး နယ်ပယ်က ပြိုင်ပွဲဝင်များအတွက် ဖန်တီးပေးထားသော ကာကွယ်ရေးစနစ် တစ်ခုဖြစ်သည်။ ရည်ရွယ်ချက်မှာ ၎င်းတို့အား အင်အားပိုင်းဆိုင်ရာ တိုတောင်းသော ကြီးထွားမှု ကာလတစ်ခုကို ပေးစွမ်းရန် ဖြစ်ပြီး၊ ထိုမှတစ်ဆင့် ရက်စက်ကြမ်းကြုတ်လှသော အိပ်မက်ဆိုး ကမ္ဘာများသို့ ပိုမိုကောင်းမွန်စွာ အသားကျစေရန် ဖြစ်သည်။ ပြိုင်ပွဲဝင်တစ်ဦးသည် အိပ်မက်ဆိုး ကမ္ဘာဆီသို့ ထွက်ခွာသွားသည့်အခါ သူ၏ အရည်အချင်းများမှာ ၁.၅ ဆ ထပ်မံ၍ တိုးတက်လာမည် ဖြစ်သည်။ ယင်းမှာ အဖွဲ့ဝင်အသစ်များကို ကာကွယ်ရန် ဖြစ်ပြီး၊ တစ်ပြိုင်နက်တည်းတွင်လည်း ကိုယ်ခန္ဓာက ထုတ်လုပ်ပေးနိုင်သော အင်အားအဆင့်အသစ်များနှင့် ပြိုင်ပွဲဝင်အား အသားကျစေရန် ဖြစ်သည်။

ရှီယန် ဤအရာများကို စဉ်းစားနေစဉ်အတွင်း သူသည် ဖိလစ်ဆစ် နှင့် ကျန်ရှိသော ကောင်စုတ်လေးကို ကြိုးတစ်ချောင်းဖြင့် စတင်၍ တုတ်နှောင်လိုက်သည်။ သနားစရာကောင်းသော ထိုလူနှစ်ဦးမှာ ဆာလောင်မောပန်းနေကြပြီး မကြာသေးခင်က ထိတ်လန့်စရာများကြောင့် နှိပ်စက်ခြင်း ခံထားကြရသည်။ သူတို့သည် မရပ်မနား တုန်ရီနေကြပြီး သူတို့၏ မျက်လုံးများမှာလည်း သက်မဲ့အတိုင်း ဖြစ်နေခဲ့သည်။ သူတို့တွင် ခုခံရန်အတွက် မည်ကဲ့သို့သော အင်အားမျိုး ရှိနိုင်ပါတော့မည်နည်း။ သူတို့ကို တုတ်နှောင်ပြီးနောက် သူသည် ထိုအကြောက်တတ်ဆုံး ကောင်ကို အနီးနားရှိ စက်ရုံအလုပ်ရုံဆီသို့ သယ်ဆောင်သွားခဲ့ပြီး တိတ်ဆိတ်စွာ စောင့်ကြည့်နေခဲ့သည်။ ထိုအကြောက်တတ်ဆုံး ကောင်က ရုတ်တရက် ထပ်မံ၍ အော်ဟစ်ငိုကြွေးလာသည့် အချိန်ကျမှသာ သူက တိုးညင်းစွာ မေးမြန်းလိုက်သည် ။

မင်း အသက်ရှင်ချင်တာလား၊ သေချာချင်တာလား။

ယင်းကို ကြားလိုက်ရသည့်အခါ ထိုအကြောက်တတ်ဆုံး ကောင်သည် သူ၏ အင်အားများကို စုစည်း၍ ပိုမိုကျယ်လောင်စွာ ငိုကြွေးရင်း အော်ဟစ်လိုက်သည် ။

အသေအချာပဲ ကျွန်တော် အသက်ရှင်ချင်တာပေါ့။ ရှီယန် အစ်ကိုကြီး ကျွန်တော့်ကို အသက်ချမ်းသာပေးပါ၊ ဒါတွေက ကျွန်တော်နဲ့ ဘာမှမဆိုင်ပါဘူး။ ကျွန်တော် အစ်ကိုကြီးရဲ့ မိသားစုဝင်တွေရဲ့ ဆံပင်တစ်ပင်ကိုတောင် မထိခိုက်ခဲ့ပါဘူး။

ရှီယန်က ချက်ချင်းပင် ပြန်လည် ဖြေကြားလိုက်သည် ။

မင်း မလုပ်ခဲ့ဘူးဆိုတာ ငါ အသေအချာ သိတာပေါ့၊ မဟုတ်ရင် မင်း ဘာလို့ အခုထိ အသက်ရှင်နေသေးတယ်လို့ ထင်လဲ။ ဟွာရှန်းဖေး နဲ့ ပတ်သက်ပြီး မင်းသိသမျှ အရာအားလုံးကို ငါ့ကို ပြောပြစမ်း၊ မင်းပြောတာတွေကို နောက်မှ ဖိလစ်ဆစ် ရဲ့ ထွက်ဆိုချက်နဲ့ ငါ ပြန်လည် တိုက်ဆိုင်စစ်ဆေးမယ်။ အကယ်၍ မင်းတို့နှစ်ယောက် ပြောတာ ကွာခြားနေရင်တော့။

ထိုအချိန်တွင် ရှီယန်သည် သူ၏ အပြုံးကို မထိန်းချုပ်နိုင်တော့ဘဲ စကားပြောခြင်းကို ရပ်တန့်လိုက်သည်။ ထိုအကြောက်တတ်ဆုံး ကောင်မှာ တုန်လှုပ်သွားခဲ့ရပြီး ဖူးလစ်ရှ် ကပ်ဘ် ၏ သွေးစွန်းပြီး ပုံပျက်ပန်းပျက် ဖြစ်နေသော မျက်နှာကို ရုတ်တရက် သတိရမိသွားကာ ခေါင်းကို အသည်းအသန် ညိတ်ရင်း အော်ဟစ်လိုက်သည် ။

ကျွန်တော် ပြောပါ့မယ်၊ ကျွန်တော် ပြောပါ့မယ်။

နာရီဝက်ခန့် ကြာပြီးနောက် ရှီယန်သည် အလုပ်ရုံအတွင်းမှ လျှောက်လှမ်းထွက်ခွာလာခဲ့သည်။ သူသည် သူအလိုရှိသော အရာကို ရရှိခဲ့ပြီ ဖြစ်သည်။ ဖိလစ်ဆစ် သည် ယခင်က ဦးလေး ဒါစီ အား တစ်ကြိမ် ရိုက်နှက်ခဲ့သဖြင့် ရှီယန်က သူ၏ လက်တစ်ဖက်ကို ယူလိုက်သည်။ အကြောက်တတ်ဆုံး ကောင်မှာမူ ကံကောင်းထောက်မစွာဖြင့် ဒဏ်ရာအနာတရ မရှိဘဲ လွတ်မြောက်လာခဲ့သည်။ သို့သော်လည်း ရှီယန်၏ မျက်နှာအမူအရာမှာမူ လုံးဝ ပေါ့ပါးခြင်း မရှိချေ၊ အကြောင်းမှာ သူသည် ဟွာရှန်းဖေး၏ စွမ်းဆောင်ရည်များကို အထင်သေးခဲ့မိကြောင်း သူ သဘောပေါက်လိုက်သောကြောင့် ဖြစ်သည်။ ဤကောင်၏ အဆင့်အတန်းမှာ ‘သရဲတစ္ဆေဂိုဏ်း’ အတွင်း၌ သာမန် အမာခံအဆင့်မှနေ၍ ဂိုဏ်းခေါင်းဆောင်၏ ရာထူးအထိ မြင့်မားသွားခဲ့ပြီ ဖြစ်သည်။ ဂိုဏ်းချုပ် ဖြစ်သော “ဘလက် ဒီဗယ်” ပင်လျှင် ယခုအခါ သူနှင့် တူညီသော အာဏာအဆင့်အတန်းကို ခွဲဝေယူထားရပြီ ဖြစ်သည်။ ဆိုလိုသည်မှာ ရှီဒေ သေဆုံးသွားခဲ့သည့်တိုင်အောင် ဘလက် ဒီဗယ် ကိုယ်တိုင်ပင် သူ့ကို မထိရဲချေ။

ရှီယန်သည် ဤမြေအောက် လောကကိစ္စရပ်များနှင့် ပတ်သက်မှု မရှိသော်လည်း ယခင်က သရဲတစ္ဆေဂိုဏ်းနှင့် ပတ်သက်သော ကောလာဟလများကို ကြားဖူးခဲ့သည်။ ဟွာရှန်းဖေးသည် ဂိုဏ်းချုပ်နှင့် တူညီသော အဆင့်အတန်းကို ရရှိသွားခဲ့ပြီ ဖြစ်ရာ သူ၏ စကားလုံးများသည် အလွန်တရာ ဩဇာညောင်းပြီး အစွမ်းထက်လှပေသည်။ မည်သည့် အရေးကြီးသော အခြေအနေမျိုးတွင်မဆို ဗီယက်နမ်နိုင်ငံမှနေ၍ သေနတ်များကို သယ်ဆောင်လာရန်မှာ မဖြစ်နိုင်သောအရာ မဟုတ်ချေ၊ ယင်းက ရှီယန်အတွက်မူ အလွန်တရာ ဆိုးရွားလှသော သတင်းဆိုးပင် ဖြစ်တော့သည်။