အခန်း ၃၈ - ပါရဂူအဆင့် ကျွမ်းကျင်မှုစာလိပ်

အားလုံးသော အရည်အသွေးများကို ၁ မှတ်စီ တိုးပွားစေနိုင်သည့် ကိုဘော့သံမဏိ အပြင်ဘက် အရိုးစုကိုလည်း စိတ်ဝင်စားသူ အတော်ပင် များပြားလှသည်။ အချို့ကမူ ခေါင်းတခါခါ သက်ပြင်းတချချဖြင့် ဤအရည်အသွေး ၁ မှတ်စီ တိုးပွားစေသော ထူးခြားပြောင်မြောက်သည့် အာနိသင်သာ နာရီပေါ်တွင် ရှိခဲ့ပါက ထိုနာရီမှာ ကောင်းကင်ဘုံထိ ဈေးနှုန်း ကြီးမြင့်သွားလိမ့်မည်ဟု ပြောဆိုကြသည်။ လူအနည်းငယ်က ရှီယန်နှင့် ကျွမ်းကျင်မှုစာလိပ်အကြောင်း စတင်ညှိနှိုင်းကြသော်လည်း သူတို့ ကမ်းလှမ်းသော အချက်အလက်များမှာ ရှီယန် မျှော်မှန်းထားသည်နှင့် အလွန်အမင်း ကွာဟနေခဲ့သည်။ သူတို့က နှိမ်ဈေးဖြင့် ရယူရန် ကြိုးပမ်းကြသဖြင့် ရှီယန်လည်း လဲလှယ်ရန် စိတ်မပါတော့ချေ။

လူတို့၏ အာရုံစိုက်မှုများ တဖြည်းဖြည်း လျော့ပါးသွားခဲ့ပြီး ရှီယန်၏ ဘေးပတ်ဝန်းကျင်တွင် ပြန်လည် တိတ်ဆိတ်သွားခဲ့သည်။ ဤအခိုက်အတန့်တွင် ဗော့ဒ်ကာပုလင်းတစ်ဝက်ကို ကိုင်ဆောင်ထားသော လူပုလေးတစ်ဦး လျှောက်လှမ်းလာပြီး ပေါ့ပေါ့ပါးပါးပင် စကားဆိုလာခဲ့သည် ။

ဟေး.. မိတ်ဆွေ၊ မင်း မကြာသေးခင်ကမှ မင်းရဲ့ ပထမဆုံး စွန့်စားခန်းခရီးစဉ်ကို အောင်အောင်မြင်မြင် ကျော်ဖြတ်လာနိုင်ခဲ့တာ တူတယ်နော်။

ထိုလူပုလေးတွင် ပြင်းထန်ပြီး ဂျာမန် လေယူလေသိမ်း ရှိနေခဲ့သည်။ သို့သော်လည်း အိပ်မက်ဆိုး တံဆိပ်ခတ်နှိပ်မှု၌ ဘာသာပြန်စွမ်းရည် ရှိသဖြင့် ရှီယန် သူ ပြောသည်ကို နားလည်နိုင်ခဲ့ကာ ခေါင်းငြိမ့်ပြရင်း ပြန်လည်ပြောကြားလိုက်သည် ။

အင်း... ဟုတ်တယ်။

ထိုလူပုလေးသည် ရှီယန်၏ ကုန်ပစ္စည်းများကို စစ်ဆေးကြည့်ရှုလိုက်ပြီး ခေါင်းငြိမ့်ကာ ပြောကြားလိုက်ပြန်သည် ။

ကိုဘော့သံမဏိ အပြင်ဘက် အရိုးစုလက်၊ ရွှေရောင် ဖုံးလွှမ်းထားတဲ့ လက်ပတ်နာရီ၊ သေဆုံးသွားတဲ့ စစ်သားတစ်ဦးရဲ့ စစ်သားအသိအမှတ်ပြု တံဆိပ်၊ အင်း... ပြီးတော့ ပေါ့ပါးတဲ့ မီးခတ်သေနတ် ကျွမ်းကျင်မှု စာလိပ်၊ မင်း အဲ့ဒီ ကြောက်မက်ဖွယ်ကောင်းတဲ့ တာမီနေတာ ကမ္ဘာကနေ ပြန်လာတာ သေချာသလောက် ရှိပြီပဲ။ ဒီလို ရတနာအမြောက်အမြားကို ဆုလာဘ်အဖြစ် ရရှိဖို့ဆိုတာ မလွယ်ကူလှဘူး၊ မင်း တော်တော်ကောင်းတဲ့ အဖွဲ့တစ်ခုနဲ့ ဆုံခဲ့တာ ဖြစ်ရမယ်။

ရှီယန် ရယ်မောလိုက်ပြီး တိုးညင်းစွာဖြင့် ပြောကြားလိုက်သည် ။

ကျွန်တော့်ရဲ့ ကံတရားက အနည်းငယ် ပိုကောင်းသွားခဲ့ရုံပါပဲ။

ထိုလူပုလေးသည် သူ၏ ဗော့ဒ်ကာပုလင်းကို လှုပ်ယမ်းလိုက်ရင်း ပြန်လည်ပြောကြားလိုက်သည် ။

အစောပိုင်းကတည်းက လူအချို့ မင်းရဲ့ ကုန်ပစ္စည်းတွေကို တကယ်ပဲ ဝယ်ယူဖို့ ကြိုးစားနေတာ ငါ တွေ့ပါတယ်၊ သူတို့ ကမ်းလှမ်းတဲ့ ဈေးနှုန်းတွေက မနည်းလှပေမယ့် မင်း ကုန်သွယ်မှု မလုပ်ခဲ့ဘူး။ ဒါဆို မင်း လက်ရှိမှာ အသုံးချမှတ် အမြောက်အမြားကို အရေးတကြီး လိုအပ်နေလို့လား။ ဒါမှမဟုတ် စိတ်ဝင်စားစရာကောင်းတဲ့ တစ်စုံတစ်ခုနဲ့ လဲလှယ်ချင်လို့လား။

ရှီယန် သူ၏ စိတ်ထဲတွင် လှုပ်ရှားသွားခဲ့ရပြီး မေးမြန်းလိုက်သည် ။

ဘာကို ဆိုလိုတာလဲ

လူပုလေးက တဟားဟား ရယ်မောရင်း ပြောကြားလိုက်သည် ။

မင်းမှာ ရှိတဲ့ အရာအားလုံးကို ငါ ယူမယ်၊ အသုံးချမှတ် ၃၀၀၀ ဆိုရင် ဘယ်လိုလဲ။

ရှီယန် ပြုံးလိုက်ရင်း ခေါင်းရမ်းပြလိုက်ရာ ထိုလူပုလေး၏ မျက်နှာအမူအရာ ပြောင်းလဲသွားခဲ့ပြီး ဆက်လက်၍ စည်းရုံးပြောဆိုလာခဲ့သည် ။

အို... မိတ်ဆွေ၊ ဒါက တကယ်ကို မျှတတဲ့ ကမ်းလှမ်းမှုတစ်ခုပါ၊ မင်း ဘယ်လောက်အထိ မျှော်လင့်ထားလို့လဲ။ ဒါမှမဟုတ် မင်း တစ်ခုခုနဲ့ လဲလှယ်ချင်လို့လား။

ရှီယန်သည် မိမိ၏ လျှိုဝှက်ချက်အားလုံးကို လုံးဝ ထုတ်မပြသင့်ကြောင်း သိရှိထားသဖြင့် ခပ်ဖွဖွ ရယ်မောရင်း ရှေ့နောက်မညီသော စကားများကိုသာ လျှောက်ပြောနေခဲ့သည်။ ဤလူပုလေး သူ၏ ကမ်းလှမ်းမှုအားလုံးကို ထုတ်ပြလာသည့်တိုင်အောင် စကားဝိုင်းမှာ ဟိုရောက်ဒီရောက် ဖြစ်နေခဲ့ပြီး၊ နောက်ဆုံးတွင်မှ ရှီယန်က အသာအယာ ထုတ်ဖော်မေးမြန်းလိုက်တော့သည် ။

ကိုယ်ခန္ဓာ တည်ဆောက်ပုံ + ၃ ပေးတဲ့ လက်စွပ်တစ်ကွင်းရဲ့ တန်ဖိုးက ဘယ်လောက် ရှိလဲ ။

ရှီယန်က သူ၏ ကမ်းလှမ်းမှုအားလုံးကို ငြင်းပယ်ခဲ့သဖြင့် ထိုလူပုလေးသည် ရှီယန်၏ ရည်ရွယ်ချက်ကို ရေရေရာရာ မခန့်မှန်းနိုင်တော့ဘဲ သူ၏ မျက်ခုံးများကိုသာ ပင့်တင်လိုက်ရင်း ပြောကြားလိုက်တော့သည်။

ကိုယ်ခန္ဓာ တည်ဆောက်ပုံဆိုတာ ပြိုင်ပွဲဝင်တစ်ဦးအတွက် အရေးအကြီးဆုံး အခြေခံအရည်အသွေး ဖြစ်တယ်၊ ဒါကြောင့် သူ့ရဲ့ တန်ဖိုးက အဆမတန် မြင့်မားတာ သဘာဝပဲ။ ဒါ့အပြင် လက်စွပ်ဆိုတာ မူလကတည်းက ရှားပါးတဲ့ ပစ္စည်းတစ်ခု ဖြစ်တဲ့အတွက် ဒီနေရာမှာ အလွန်ပဲ တန်ဖိုးကြီးလှပါတယ်။ ငါ့စကားကို နားထောင်ပါ မိတ်ဆွေ၊ မင်းရဲ့ ပစ္စည်းတွေအတွက် အသုံးချမှတ် ၃၅၀၀ ဆိုတာ အလွန်တရာကို ရက်ရောလှတဲ့ ကမ်းလှမ်းမှုပါ။

အကဲခတ်ကြည့်ပြီးနောက် ရှီယန်သည် ဤလူပုလေးမှာ အတော်ပင် ပါးနပ်သူတစ်ဦး ဖြစ်ကြောင်း ခံစားလိုက်ရသည်၊ သူ့ထံမှ အခွင့်ကောင်းယူရန် ကြိုးပမ်းမည့် အလားအလာမှာ အလွန်နည်းပါးလှသဖြင့် သူက ပြန်လည်မေးမြန်းလိုက်သည် ။

ကျွန်တော့်ရဲ့ ပေါ့ပါးတဲ့ မီးခတ်သေနတ် ကျွမ်းကျင်မှု စာလိပ်ကို ခင်ဗျား ဘယ်လို မြင်လဲ။

လူပုလေး သူ၏ မျက်လုံးများကို မှေးစိုက်လိုက်ရင်း ပြန်လည်ဖြေကြားလိုက်သည် ။

မင်းက ဒါကိုပဲ ရောင်းဖို့ ရည်ရွယ်ထားတာလား၊ ဒီကျွမ်းကျင်မှုစာလိပ်က အပြာနုရောင် ဖြစ်ပေမယ့် သူက သီးသန့်ဆန်လွန်းတယ်၊ အချို့သော အခြေခံအရည်အသွေးတွေအပေါ်မှာ လိုအပ်ချက် မြင့်မားလွန်းတယ်။ ဒါ့အပြင် ဒါက ကျွမ်းကျင်မှုအဆင့် စာလိပ်သာ ဖြစ်ပြီး ပါရဂူအဆင့် မဟုတ်သေးဘူး။ ထို့နောက် ရှည်လျားလှသော စကားများကို ဆက်လက် ပြောကြားနေခဲ့သည်။

ရှီယန်သည် ဈေးဆတ်ရန်အတွက်သာ ဤကဲ့သို့ ရှည်လျားလှသော စကားများကို နားထောင်လိုခြင်း မရှိသဖြင့် သူ၏ ဦးခေါင်းကို ရမ်းလိုက်ရင်း ထိုလူ၏ စကားကို ရိုင်းစိုင်းစွာဖြင့် ဖြတ်ပြောလိုက်တော့သည် ။

ကဲပါ... ကဲပါ၊ ကျွန်တော့်ကို တည့်တည့်ပဲ ပြောပါ၊ ဤစာလိပ်ကို ခင်ဗျားရဲ့ လက်စွပ်အပြင် ထပ်ဆောင်း အသုံးချမှတ် ၁၀၀၀ နဲ့ လဲလှယ်မယ်ဆိုရင် အဆင်ပြေပါ့မလား။

လူပုလေးမှာ ချက်ချင်းပင် ခေါင်းရမ်းလိုက်ပြီး သူ၏ အကြည့်များအတွင်း၌ ကောက်ကျစ်လှသော အရောင်အသွေးများ ထွက်ပေါ်လာခဲ့ကာ တိုးညင်းစွာ ရေရွတ်လိုက်သည် ။

ဒါက ဘယ်လိုမှ မဖြစ်နိုင်တာ အထင်အရှားပဲ၊ အကယ်၍ မင်းက အဲ့ဒီ ရွှေရောင် ဖုံးလွှမ်းထားတဲ့ လက်ပတ်နာရီကိုပါ ထည့်ပေးမယ်ဆိုရင်တော့ တစ်မျိုးပေါ့။ ပြီးတော့ ထပ်ဆောင်း အသုံးချမှတ် ၅၀၀၀ ပါ ထပ်ပေးရမယ်။

ရွှေရောင် ဖုံးလွှမ်းထားတဲ့ လက်ပတ်နာရီ၊ နောက်ထပ်လည်း အဲ့ဒီ ရွှေရောင် ဖုံးလွှမ်းထားတဲ့ လက်ပတ်နာရီပဲ။ ရှီယန်၏ နှလုံးသားမှာ ရုတ်တရက် တုန်လှုပ်သွားခဲ့ရသည်၊ သူ မသိရှိသေးသော ကွယ်ဝှက်ထားသည့် တန်ဖိုးတစ်ခု ဤအရာတွင် ရှိနေနိုင်ကြောင်း သူ သဘောပေါက်လိုက်မိသည်။ သူက ချက်ချင်းပင် ပြောကြားလိုက်တော့သည် ။

အဆင်မပြေဘူး၊ မလဲနိုင်ဘူး။

ဤအခိုက်အတန့်တွင် အဝေးတစ်နေရာ၌ အုတ်အော်သောင်းနင်း ဖြစ်ပွားမှုအချို့ ရှိနေခဲ့ပြီး၊ လူအနည်းငယ်မှာ သူတို့၏ ကိုယ်ပိုင်အခန်းများမှ ထွက်ခွာလာခဲ့ကြကာ ဈေးကွက်အတွင်းသို့ ဝင်ရောက်လာခဲ့ကြသည်။ သူတို့အထဲတွင် လူနှစ်ဦးမှာ အတင်းအကျပ် ပြေးထွက်လာခဲ့ကြပြီး အလျင်အမြန်ပင် ဆိုင်ခန်းများအကြား ဖြတ်သန်းသွားလာနေကြသည်။ သူတို့ ဝယ်ယူလိုသော ပစ္စည်းမှာ အလွန်တရာ အရေးကြီးပုံရပေသည်။ ထို့အပြင် ဤကဲ့သို့သော ဝယ်ယူမှုပုံစံမျိုးကို ပြသနေသည့် လူများသည် ပုံမှန်အားဖြင့် အသေးစိတ် အဆင်မပြေမှုများကို ဂရုစိုက်လေ့မရှိကြဘဲ၊ အနည်းငယ်မျှ လှည့်စားခြင်းခံရသည့်တိုင်အောင် စိတ်ထဲထားလေ့ မရှိကြချေ။

သူတို့ ပတ်ဝန်းကျင်သို့ လှည့်ပတ်ကြည့်ရှုနေစဉ်အတွင်း ရှီယန်၏ ဆိုင်ခန်းရှေ့၌ ရုတ်တရက် ရပ်တန့်သွားခဲ့ကြပြီး၊ အတော်ပင် သေးသွယ်လှပသော ရုပ်သွင်တစ်ခုက လှမ်းကြည့်လိုက်ကာ နောက်ဆုံးတွင် စိတ်လှုပ်ရှားစွာဖြင့် အော်ဟစ်လိုက်တော့သည်။ သူမသည် ရှီယန် ရောင်းချနေသော ပေါ့ပါးသော မီးခတ်သေနတ် ကျွမ်းကျင်မှု စာလိပ်ကို လှမ်း၍ ဆုပ်ကိုင်လိုက်သော်လည်း ချက်ချင်းပင် သက်ပြင်းချလိုက်မိသည် ။

နှမြောစရာပဲ၊ ဒါက နောက်ထပ် ကျွမ်းကျင်မှုအဆင့် စာလိပ်တစ်ခု ဖြစ်နေပြန်ပြီ။

သို့သော်လည်း သူမသည် ထိုလိပ်စာစာလိပ်ကို ဆက်လက် ဆုပ်ကိုင်ထားဆဲဖြစ်ရာ သူမ၏ ဘေးရှိ ကြီးမား ထည်ဝါလှသော ရုပ်သွင်က စတင်၍ စကားဆိုလာခဲ့သည်။ သူ၏ အသံမှာ နက်ရှိုင်းပြီး တုန်ခါနေကာ ခန့်ညားထည်ဝါမှု ခံစားချက်ကို ပေးစွမ်းသည် ။

ပါရဂူအဆင့် ကျွမ်းကျင်မှုစာလိပ်တွေကို ရှာဖွေဖို့ဆိုတာ မလွယ်ကူလှဘူး၊ နောက်ထပ် ကြုံတွေ့ရမယ့် ကမ္ဘာက အတော်လေး အန္တရာယ်များပြီး မင်းကို ငါ ကာကွယ်ပေးနိုင်ဖို့ အပြည့်အဝ ယုံကြည်ချက် မရှိဘူး။ အဲ့ဒီကမ္ဘာထဲကို မဝင်ခင်မှာ မင်းရဲ့ ကိုယ်ပိုင်စွမ်းအားတွေကို အဆင့်မြှင့်တင်ပြီး အားဖြည့်ထားရမယ်။ အကယ်၍ မင်းအနေနဲ့ ပေါ့ပါးတဲ့ မီးခတ်သေနတ် ပါရဂူအဆင့် ကျွမ်းကျင်မှုစာလိပ်ကို မရရှိနိုင်ဘူးဆိုရင်လည်း ဤပေါ့ပါးတဲ့ မီးခတ်သေနတ် ကျွမ်းကျင်မှုအဆင့် လိပ်စာစာလိပ်နဲ့ပဲ ဖြစ်သလို အသုံးပြုရတော့မှာပဲ။

ထိုအမျိုးသမီးမှာ ထိုအမျိုးသားကို အပြည့်အဝ ယုံကြည်ထားပုံရပြီး၊ သူမ၏ ဦးခေါင်းကို ဖြည်းညှင်းစွာ ငြိမ့်ပြရင်း ရှီယန်နှင့် စတင်၍ ဈေးနှုန်းညှိနှိုင်းတော့သည်။ ရှီယန်သည် အမျိုးသမီးများအပေါ် အလျှော့ပေးတတ်သည့် လူစားမျိုး မဟုတ်သည့်အပြင်၊ သူ့တွင်လည်း ကိုယ်ပိုင် ဈေးနှုန်းသတ်မှတ်ချက် ရှိပြီးသားဖြစ်ရာ ချက်ချင်းပင် ထုတ်ဖော်ပြောကြားလိုက်တော့သည် ။

တစ်သောင်း!

ထိုလူပုလေးသည် လက်ရှိတွင် ဗော့ဒ်ကာကို ပါးစပ်အပြည့် ငုံ့သောက်နေဆဲ ဖြစ်သော်လည်း ရှီယန်၏ စကားကို ကြားလိုက်ရသည်နှင့် တစ်ပြိုင်နက် ချက်ချင်းပင် သီးသွားခဲ့ရပြီး သူ၏ ပါးစပ်အတွင်းမှ ဗော့ဒ်ကာများမှာ ပန်းထွက်သွားခဲ့ရသည်။ သူသည် ရှီယန်ကို အားကိုးရာမဲ့စွာဖြင့် ကြည့်ရှုလိုက်ပြီး သူ၏ ပုခုံးများကို တွန့်ပြရင်း ဘေးရှိ စုံတွဲကို မည်သည့်စကားမျှ မဆိုဘဲ ထွက်ခွာသွားခဲ့တော့သည်။

ရှီယန်သည် အလွန်တရာ တည်ငြိမ်နေခဲ့သည်၊ ဤအရာမှာ ဤနေရာတွင် အတော်ပင် ရှားပါးလှပုံရသော်လည်း၊ အစောပိုင်းက ဈေးကွက်အတွင်း လှည့်ပတ်ကြည့်ရှုခဲ့သည့် အတွေ့အကြုံအရ သူ တစ်ခုကို သဘောပေါက်ထားခဲ့သည်။ ဤနေရာတွင် အခြားသော ပေါ့ပါးသော မီးခတ်သေနတ် ကျွမ်းကျင်မှု စာလိပ်များကို ရောင်းချနေခြင်း မရှိကြချေ၊ ၎င်းကို တစ်ဦးတည်း ပိုင်ဆိုင်ထားသူ ဖြစ်သဖြင့် သူသည် ကျားတစ်ကောင်ကဲ့သို့ ရဲရဲဝံဝံ ရှိနေခဲ့ခြင်း ဖြစ်သည်။

မကြာမီအချိန်အတွင်း ထိုစုံတွဲမှာ ပြန်လှည့်လာခဲ့ကြသည်။ ထိုအမျိုးသားသည် ရှီယန်က သူ၏ လက်မောင်းများကို ရင်ဘတ်ပေါ်တွင် ပိုက်ထားသည်ကို မြင်တွေ့လိုက်ရသောအခါ သူ၏ မျက်ခုံးများကို ပင့်တင်လိုက်ရင်း တည်ကြည်စွာဖြင့် ပြောကြားလိုက်သည် ။

မင်း တကယ်ပဲ ဒီစာလိပ်ကို ရောင်းချဖို့ စိတ်ပါဝင်စားရဲ့လား။ ငါ ဝယ်ယူဖို့ စိတ်ဝင်စားပေမယ့် မင်းရဲ့ အလွန်အမင်း ကြီးမားလှတဲ့ ဈေးနှုန်းကြောင့် ငါ့မှာ ရွေးချယ်စရာ မရှိတော့ဘူး။ ဟိုဘက်မှာတော့ အခြားလူတစ်ယောက်က ပေါ့ပါးတဲ့ မီးခတ်သေနတ် အခြေခံ ကျွမ်းကျင်မှု စာလိပ်ကို ရောင်းချနေတယ်၊ ၎င်းရဲ့ အာနိသင်က ပိုပြီး ညံ့ဖျင်းပေမယ့် အနည်းဆုံးတော့ ယင်းက တန်ဖိုးတစ်ခု ရှိနေဆဲပဲ။

ရှီယန်သည် အလွန်တရာ လျင်မြန်စွာ တုံ့ပြန်တတ်သူ ဖြစ်ရာ၊ အစောပိုင်းက သူ၏ ရဲရဲဝံဝံ ဈေးနှုန်းသတ်မှတ်မှုမှာ တစ်ဖက်လူက နှိမ်ဈေးဖြင့် ဝယ်ယူရန် ကြိုးပမ်းခြင်းကို တားဆီးရန်နှင့် သူတို့၏ အမှန်တကယ် ဝယ်ယူလိုစိတ်ကို စမ်းသပ်ရန်အတွက်သာ ဖြစ်ပေသည်။ ထိုလူက ရှီယန်နှင့် ဆက်လက် ဆွေးနွေးလာခဲ့သည် ။

မင်းက ဒီပေါ့ပါးတဲ့ မီးခတ်သေနတ် ကျွမ်းကျင်မှု စာလိပ်ကို ကိုယ်တိုင် မလေ့လာဘဲ ရောင်းချနေတာဆိုတော့ မင်းက အနီးကပ်တိုက်ခိုက်မှု အမျိုးအစား ဖြစ်ရမယ်။ မင်း ဒီအဆင့်မြင့် စွမ်းရည်ကို လေ့လာပြီးပြီလား။

ဤသို့ ပြောကြားရင်း သူသည် နက်မှောင်လှသော အပြာရောင် စာလိပ်တစ်ခုကို ထုတ်ပြလိုက်တော့သည် ။

အနီးကပ်လုံးထွေးတိုက်ခိုက်မှု ပါရဂူအဆင့် ကျွမ်းကျင်မှုစာလိပ်

ရှားပါးမှု: အပြာရင့်ရောင်

အသုံးပြု သက်ရောက်မှု: မင်းကို အခြေခံ အဆင့်မြင့် ကျွမ်းကျင်မှု ဖြစ်တဲ့: ပါရဂူအဆင့် အနီးကပ်လုံးထွေးတိုက်ခိုက်မှု အဆင့် ၁ ကို လေ့လာနိုင်စေပါတယ်။

အသုံးပြုမှု လိုအပ်ချက်များ: ခွန်အား ၈ မှတ်၊ ကိုယ်ခန္ဓာ တည်ဆောက်ပုံ ၁၀ မှတ်

ဖော်ပြချက်: အခြေခံ ကျွမ်းကျင်မှု စာလိပ်များကို အခြေခံ၊ ကျွမ်းကျင်မှုအဆင့် ၊ ပါရဂူ ကျွမ်းကျင်မှုအဆင့် ဟူ၍ အမျိုးအစား ၃ မျိုး ခွဲခြားထားသည်။ ပါရဂူကျွမ်းကျင်မှုအဆင့် စာလိပ်မှာ အရှားပါးဆုံး ဖြစ်သော်လည်း ၎င်း၏ အာနိသင်မှာ အကောင်းမွန်ဆုံး ဖြစ်ပေသည်။

ထပ်ဆောင်း ဖော်ပြချက်: ပါရဂူအဆင့် အနီးကပ်လုံးထွေးတိုက်ခိုက်မှု အဆင့် ၁ သည် မင်းကို အနီးကပ်တိုက်ခိုက်မှု လုံးထွေးတိုက်ခိုက်ခြင်း နည်းစနစ်များကို ကျွမ်းကျင်စွာ ဆုပ်ကိုင်နိုင်စေသည်။ မင်း၏ အနီးကပ်တိုက်ခိုက်မှုများကို ၇ မှတ်၊ ရှောင်တိမ်းမှုကို ၇ မှတ်၊ ခုခံမှုကို ၇ မှတ်နှင့် ကြံ့ကြံ့ခံနိုင်မှုကို ၇ မှတ်စီ တိုးပွားစေသည်။ အကယ်၍ ယင်းက အခြေခံ အနီးကပ်လုံးထွေးတိုက်ခိုက်မှု သာ ဖြစ်ပါက ထပ်ဆောင်း ဆုလာဘ်မှာ ၅ မှတ်အထိသာ ရရှိမည် ဖြစ်သည်။

ထပ်ဆောင်း ဖော်ပြချက်: ဤစွမ်းရည်ကို မလေ့လာမီ မင်းအနေဖြင့် အခြေခံ အနီးကပ်တိုက်ခိုက်မှု၊ အခြေခံ ခြေလှမ်း၊ အခြေခံ ခံနိုင်ရည် (ဤအရာမှာ ရှီယန်၏ မွေးရာပါ စွမ်းရည်နှင့် ကွာခြားသည်) တို့ကို ကျွမ်းကျင်စွာ တတ်မြောက်ထားရန် လိုအပ်သည်။

ထပ်ဆောင်း ဖော်ပြချက်: အဆင့်မြင့် စွမ်းရည်ဖြစ်သော ပါရဂူအဆင့် အနီးကပ်လုံးထွေးတိုက်ခိုက်မှု စွမ်းရည်အဆင့်သည် အခြေခံ အနီးကပ်တိုက်ခိုက်မှု၊ အခြေခံ ခြေလှမ်းနှင့် အခြေခံ ခံနိုင်ရည်တို့၏ ကျွမ်းကျင်မှုအဆင့်ထက် ပိုမို၍ မြင့်မားနိုင်မည် မဟုတ်ချေ။ (ဆိုလိုသည်မှာ မင်းအနေဖြင့် အဆင့်မြင့် စွမ်းရည်ကို အဆင့်မမြှင့်တင်မီ အခြားသော အခြေခံ ကျွမ်းကျင်မှုများ၏ အဆင့်များကို အရင်ဆုံး မြှင့်တင်ရမည် ဖြစ်သည်)

ထပ်ဆောင်း ဖော်ပြချက်: ဤစာလိပ်ကို လေ့လာရန်အတွက် အလားအလာမှတ် ၁ မှတ် ဝန်ဆောင်ခ လိုအပ်သည်။

ရှီယန်၏ မူလ ရည်ရွယ်ချက်မှာ မြင့်မားသော ကာကွယ်ရေး ရှိသည့် လက်နက်ကိရိယာ သို့မဟုတ် ဆက်စပ်ပစ္စည်းတစ်ခုနှင့် လဲလှယ်ရန် ဖြစ်ပြီး၊ နောက်တစ်ဆင့် အနေဖြင့် ကိုယ်ခန္ဓာ တည်ဆောက်ပုံကို မြှင့်တင်ပေးသည့် လက်နက်ကိရိယာများနှင့် လဲလှယ်ရန် ဖြစ်သည်။ ထိုလူက ဤကဲ့သို့သော စာလိပ်တစ်ခုကို ထုတ်ပြလိမ့်မည်ဟု သူ လုံးဝ မျှော်လင့်မထားခဲ့ချေ၊ ထို့ပြင် ယင်းက အပြာရင့်ရောင် ပါရဂူကျွမ်းကျင်မှုအဆင့် လိပ်စာစာလိပ်တစ်ခု ဖြစ်နေခဲ့သည်။ သူ၏ နှလုံးသားမှာ လှုပ်ရှားသွားခဲ့ရသော်လည်း၊ ဖော်ပြချက်အရ သူသည် အခြေခံ အနီးကပ်တိုက်ခိုက်မှု၊ ခြေလှမ်းနှင့် ခံနိုင်ရည်တို့ကို ကျွမ်းကျင်စွာ တတ်မြောက်ထားရန် လိုအပ်ကြောင်း သူ နားလည်လိုက်သည်။ သူ စိတ်ပျက်သွားခဲ့ရပြီး ဤစာလိပ်ကို ရေကန်ထဲရှိ လမင်း၏ အရိပ်ကို လှမ်း၍ ဖမ်းဆွဲရန် ကြိုးပမ်းခြင်းကဲ့သို့ (တရုတ်စကားပုံ - မိမိကိုယ်ကိုယ် လှည့်စားခြင်း) ဟုသာ သဘောထားလိုက်တော့သည်။ သူ့ကဲ့သို့သော အသစ် ပြိုင်ပွဲဝင်တစ်ဦးအတွက်မူ ဤအရာက မည်မျှပင် ကောင်းမွန်စေကာမူ တိုတောင်းလှသော အချိန်ကာလအတွင်း ဤကဲ့သို့သော အဆင့်များအထိ လေ့ကျင့်နိုင်ရန်မှာ စိတ်ကူးယဉ်မှု သက်သက်သာ ဖြစ်ပေလိမ့်မည်။ ရှီယန်သည် ဈေးကွက်အတွင်း၌လည်း အနီးကပ်လုံးထွေးတိုက်ခိုက်မှု စာလိပ် အနည်းငယ် ရှိနေခဲ့ကြောင်းကို ပြန်လည် သတိရလိုက်သည်၊ ပါရဂူအဆင့်များ မရှိကြသော်လည်း ကျွမ်းကျင်မှုအဆင့်များစွာ ရှိနေသေးသည်။ ၎င်းတို့၏ ဈေးနှုန်းမှာ မသက်သာသော်လည်း ဈေး‌ ပေးရန်အတွက်မူ အလားအလာ ရှိနေသေးသည်။

ရှီယန်က ချက်ချင်းပင် စကားလုံး နှစ်လုံးဖြင့် ပြန်လည်ဖြေကြားလိုက်သည် ။

မလဲဘူး။

ထိုလူကြီးမှာ ရှီယန် မည်ကဲ့သို့ တုံ့ပြန်လိမ့်မည်ကို ကြိုတင်ခန့်မှန်းထားပုံရပြီး သူ၏ မျက်လုံးများကို မှေးစိုက်လိုက်ရင်း ပြောကြားလိုက်သည် ။

ငါ ထပ်ဆောင်း အသုံးချမှတ် ၁၀၀ ထပ်ပေးမယ်။

ဆွေးနွေးညှိနှိုင်းမှုများ ပြုလုပ်ပြီးနောက်တွင်မူ ထိုလူကြီးသည် နောက်ဆုံး၌ သူ၏ စာလိပ်၊ အသုံးချမှတ် ၂၅၀၀ နှင့် စက္ကန့် ၂၀ အတွင်း သွေးပမာဏ ၆၀ အထိ ကုသပေးနိုင်သော ဟမ်ဘာဂါတစ်ခုတို့ဖြင့် လဲလှယ်နိုင်ခဲ့သည်။ ရှီယန်က သူ၏ စာလိပ်နှင့် အကဲမဖြတ်ရသေးသော စစ်သားအသိအမှတ်ပြု တံဆိပ်တို့ကို ပေးအပ်၍ လဲလှယ်လိုက်ခြင်း ဖြစ်သည်။

ရှီယန်သည် ထိုစစ်သားအသိအမှတ်ပြု တံဆိပ်နှင့် ပတ်သက်၍ စုံစမ်းလေ့လာထားခဲ့ပြီး ဖြစ်ရာ ယင်းက အတော်ပင် မကြာခဏ ထွက်ပေါ်လေ့ရှိသည်။ အကဲဖြတ်ပြီးနောက် ယင်းက မင်းကို သေဆုံးသွားသော စစ်သား၏ သေလုဆဲဆဲ အချက်အလက်များကို ပေးစွမ်းလိမ့်မည်။ ထို့နောက် မင်းအနေဖြင့် ဤပစ္စည်းကို ယူဆောင်၍ ထိုလူ၏ မိသားစုကို လိုက်လံရှာဖွေနိုင်ကာ ဆုလာဘ်တစ်ခုကို လက်ခံရရှိနိုင်မည် ဖြစ်သည်။ စစ်သားတိုင်း၏ မိသားစု နောက်ခံသမိုင်းကြောင်းမှာ မတူကွဲပြားကြသဖြင့် မင်း ရရှိမည့် ဆုလာဘ်များမှာလည်း အလွန်တရာ ကွာခြားသွားနိုင်ပေသည်။ အကယ်၍ မင်း ကံကောင်းပါက ကြီးမားလှသော အကျိုးကျေးဇူးများကို ရရှိနိုင်မည် ဖြစ်သည်။ သို့သော်လည်း အကယ်၍ မင်း ကံဆိုးပါက အိမ်ထဲမှပင် မောင်းထုတ်ခြင်း ခံရနိုင်ပေသည်။ ပုံမှန်အားဖြင့်မူ မင်းကို အမေရိကန် ဒေါ်လာ ၁၀၀ မှ ၂၀၀ ခန့် ဆုချီးမြှင့်လိမ့်မည် ဖြစ်ပြီး ယင်းတို့ကို အနည်းဆုံး အသုံးချမှတ် ၁၀၀ နှင့် ပြန်လည် လဲလှယ်နိုင်မည် ဖြစ်သည်။