အခန်း (၃၂) - အသေအလဲ လိုက်လံအမဲလိုက်ခြင်း

ထိုစကားကို ကြားလိုက်ရသည့်အခါ ပတ်ဝန်းကျင်ရှိ FBI အေးဂျင့်များ၏ မျက်နှာတွင် မချိတင်ကဲ အံ့အားသင့်သွားသည့် အရိပ်အယောင်များ မလွှဲမရှောင်သာ ပေါ်ထွက်လာခဲ့သည်။ ယခုအချိန်ကား ၁၉၈၄ ခုနှစ်ဖြစ်ပြီး အမေရိကန်ပြည်ထောင်စုသည် ဒီမိုကရေစီစနစ်နှင့် နိုင်ငံသားတို့၏ ရပိုင်ခွင့်များကို လေးစားတန်ဖိုးထားမှုကြောင့် လူသိများသော်လည်း FBI ဟူသည် အစိုးရ၏ လျှို့ဝှက်ဆန်းကြယ်သော လက်နက်တစ်ခု ဖြစ်နေဆဲပင်။ ၁၉၇၄ ခုနှစ်တွင် အမေရိကန်သမ္မတ ရစ်ချက်နစ်ဆင်သည် ဝါးတားဂိတ် သတင်းပေါက်ကြားမှု အရှုပ်တော်ပုံကြောင့် ရာထူးမှ နုတ်ထွက်ခဲ့ရပြီး ယင်းကိစ္စသည် FBIမှ အဆင့်မြင့်အရာရှိအချို့နှင့် ဆက်စပ်နေခဲ့သည်။ သမ္မတတစ်ဦးကိုပင် ရာထူးမှ ဆွဲချနိုင်ခဲ့သည်အထိ FBI၏ စွမ်းအင်မှာ အဆမတန် ကြီးမားလာခဲ့ပြီး လက်ရှိအချိန်တွင် သူတို့၏ သြဇာအာဏာမှာ ထိပ်ဆုံးသို့ ရောက်ရှိနေသည့် အချိန်ကာလလည်း ဖြစ်သည်။ ထိုသို့သော အခြေအနေမျိုးတွင် ရှီယန်သည် သူတို့၏ ရှေ့မှောက်၌ နိုင်ငံသားတစ်ဦး၏ အခွင့်အရေးကို သုံးစွဲလျက် ရှေ့နေခေါ်ရန် ရဲရဲဝံ့ဝံ့ တောင်းဆိုရဲသည် တကား။

နှာခေါင်းနီ အေးဂျင့်သည် ခဏမျှ ကြောင်အသွားခဲ့သည်။ ထို့နောက် သူသည် သူ၏ ခြောက်လုံးပြူးသေနတ်ပြောင်းဝကို ရှီယန်၏ မျက်နှာထံသို့ တိုက်ရိုက် ပြောင်းရွှေ့ ချိန်ရွယ်လိုက်ရင်း ခက်ထန်သော အမူအရာဖြင့် အော်ဟစ်လိုက်တော့သည် ။

ကောင်စုတ်လေး ၊ ငါ မင်းကို ကြည့်မရဘူးကွ၊ မင်းသာ အဓိပ္ပာယ်မရှိတာတွေ ဆက်ပြောနေဦးမယ်ဆိုရင် မင်းကို အခြောက်တွေနဲ့ တစ်ခန်းတည်း ထည့်ပိတ်ထားလိုက်မယ်။ အဲဒီကောင်တွေက မင်းရဲ့ ဖင်ကို စိတ်ဝင်စားကြလိမ့်မယ်။ အခုချက်ချင်း ဒူးထောက်စမ်း။

ရှီယန်၏ မျက်ဝန်းအစုံတွင် အေးစက်လှသော အလင်းတန်းတစ်ခု ဖြတ်သန်းသွားခဲ့သော်လည်း သူ၏ မျက်နှာမှာမူ မည်သည့် ခံစားချက်မျှ မရှိဘဲ တည်ငြိမ်နေဆဲပင် ဖြစ်ကာ ဦးခေါင်းကို ဖြည်းညှင်းစွာ ရမ်းလိုက်သည်။ သူသည် နှာခေါင်းရှုံ့လိုက်ရင်း ဖြည်းညှင်းစွာ ဒူးထောက်ချလိုက်တော့သည်။ သူ၏ ခန္ဓာကိုယ်မှာ ကြောက်ရွံ့လွန်း၍ တုန်လှုပ်ချောက်ချားနေသည့်အလား အလွန်အမင်း တုန်ရီနေခဲ့ရာ ပတ်ဝန်းကျင်ရှိ FBI အေးဂျင့်များမှာ ရက်စက်စွာဖြင့် လှောင်ပြုံး ပြုံးလိုက်ကြသည်။ သူ၏ ဘယ်ဘက်လက်ကို အသာအယာ တွန်းပို့လိုက်သည့်အခါ ကိုဘော့သံမဏိ ပြင်ပအရိုးစု ပါဝင်သော ထိုနက်မှောင်လှသော စာရွက်စာတမ်းသေတ္တာမှာ သူ၏ ဘေးနားရှိ ကြမ်းပြင်ပေါ်သို့ တိုက်ရိုက် ကျရောက်သွားခဲ့သည်။

FBI အဖွဲ့ဝင်များသည် မာနထောင်လွှားမှုများ ပြည့်နှက်နေသော်လည်း ရှီယန်၏ လက်ထဲရှိ သက်သေအထောက်အထား များမှာ အလွန်တရာ အရေးကြီးလှသဖြင့် ပျက်စီးသွား၍ မဖြစ်မှန်း သူတို့ ကောင်းစွာ နားလည်ထားကြသည်။ အကယ်၍ တစ်စုံတစ်ခု မှားယွင်းသွားပါက သူတို့အနေဖြင့် နောက်လာမည့် နှစ်အနည်းငယ်အတွင်း ရာထူးတိုးရန် စိတ်ကူးပင် ယဉ်နိုင်တော့မည် မဟုတ်ချေ။ ထို့ကြောင့် သူတို့သည် ချက်ချင်းပင် အာရုံစိုက်လိုက်ကြရင်း ထိုသေတ္တာထံသို့ ခန္ဓာကိုယ်ကို ကိုင်းညွတ်လိုက်ကြတော့သည်။ ဤအခိုက်အတန့်တွင် ရှီယန်၏ ဒေါသနှင့် မကျေနပ်မှုများကို သူ၏ ထူထဲလှသော မျက်ခုံးမွှေးများ ကျုံ့ဝင်သွားမှုမှတစ်ဆင့် ထင်ရှားစွာ မြင်တွေ့နိုင်ပေသည်။ သူသည် လက်နှစ်ဖက်ကို မြှောက်ထားလျက် တည်ငြိမ်သော အနေအထားကို ထိန်းသိမ်းထားရင်း ဦးခေါင်းကို နောက်သို့ အားယူ ဝှေ့ယမ်းလိုက်ကာ သူ၏ နဖူးဖြင့် နှာခေါင်းနီ၏ ရင်ဘတ်တည့်တည့်သို့ ပြင်းထန်စွာ ဆောင့်ချလိုက်တော့သည်။

ရှီယန်၏ လှုပ်ရှားမှုမှာ အလွန်တရာ ရုတ်တရက် ဆန်လွန်းလှရာ ယင်းက ရှောင်လင်ကျောင်းတော်၏ သံနဖူးဖြင့် တိုက်ခိုက်သည့် ကွက်ကဲ့သို့ပင် ဖြစ်ပေသည်။ ဤ FBI အေးဂျင့်အနည်းငယ်သည် တရုတ်ပြည်၏ သိုင်းပညာရပ်များကို ကျွမ်းကျင်နားလည်ခြင်း မရှိကြသဖြင့် ဤကဲ့သို့သော ရုတ်တရက် ဆန်ပြီး ဆန်းကြယ်လှသော တိုက်ကွက်မျိုးအတွက် မည်သို့မျှ ပြင်ဆင်ထားခြင်း မရှိခဲ့ကြချေ။

လူတစ်ဦး၏ နဖူးသည် ခန္ဓာကိုယ်တွင် အမာကျောဆုံး အရိုးအပိုင်းအစ ဖြစ်သည့်အပြင် ရှီယန်၏ အနှိုင်းမဲ့လှသော ခွန်အားစွမ်းပကားများ ပေါင်းစပ်ပါဝင်နေသဖြင့် သူသည် နှာခေါင်းနီထံသို့ ပြင်းထန်စွာ ထိမှန်သွားခဲ့သည်။ နှာခေါင်းနီသည် အသက်ရှူပင် ကျပ်သွားခဲ့ရပြီး သူ၏ မျက်နှာမှာ ပြာနှမ်းသွားကာ မျက်ဝန်းအစုံမှာလည်း အပြင်သို့ ပြူးထွက်လာတော့မည့်အလား ဖောင်းကြွလာခဲ့သည်။ သူ ယခင်က စားသောက်ထားသော အစားအစာများနှင့် သွေးစိမ်းရှင်ရှင်များမှာ လည်ချောင်းဝသို့ ဆန်တက်လာခဲ့ပြီး နောက်ဆုံးတွင် ပါးစပ်မှတစ်ဆင့် အန်ထုတ်လိုက်ရတော့သည်။

နံစော်လှသော အနံ့အသက်များ လေထုထဲတွင် ပြည့်နှက်သွားခဲ့ပြီး ထိုအန်ဖတ်များနှင့် သွေးများမှာ ရှီယန်၏ ကျောပြင်ပေါ်သို့ ကျရောက်သွားခဲ့သော်လည်း သူသည် နှာခေါင်းနီကို အကာအကွယ်အဖြစ် အောင်မြင်စွာ အသုံးပြုနိုင်ခဲ့ပြီ ဖြစ်သည်။ ဤအချက်က အခြားသော FBI အေးဂျင့်များကို သေနတ်ပစ်ခတ်ခြင်းမှ တားဆီးပေးထားနိုင်ခဲ့သည်။ သူ၏ ခြေထောက်ကို အသုံးပြု၍ စာရွက်စာတမ်းသေတ္တာကို ချိတ်ဆွဲလိုက်ရင်း လေထဲသို့ မြှောက်ထားဆဲဖြစ်သော သူ၏ ဘယ်ဘက်လက်ဖဝါးအတွင်းသို့ ဖမ်းဆွဲ ထည့်သွင်းလိုက်သည်။ ထို့နောက် ရှီယန်သည် ခြေထောက်နှစ်ဖက်လုံးဖြင့် မြေပြင်ကို ပြင်းထန်စွာ ကန်ကျောက်လိုက်ရင်း ဆိုင်၏ မှန်ပြတင်းပေါက်ကြီးကို အားဖြင့် တိုးဝှေ့လျက် အပြင်သို့ ခုန်ထွက်လိုက်တော့သည်။

ခွမ်း...ညစ်ပတ်စေးပျစ်နေသော မှန်ပြတင်းပေါက်ကြီးမှာ အပိုင်းပိုင်းအစစ ကွဲအက်သွားခဲ့ရသည်။ သူသည် ခန္ဓာကိုယ်ကို နှိမ့်ချလိုက်ရင်း သူ၏ ပခုံးရိုးများကို အသုံးပြု၍ မြေပြင်ပေါ်သို့ ဒလိမ့်ခေါက်ကွေး လိမ့်ဆင်းလိုက်ကာ လမ်းမပေါ်တွင် မတ်တပ်ရပ် လိုက်တော့သည်။ သေနတ်ပစ်ခတ်သံများမှာ ကွဲအက်သွားသော မှန်စများ မြေပြင်ပေါ်သို့ အစိတ်စိတ်အမြွှာမြွှာ ကျရောက်သွားသည့် အသံများနှင့်အတူ ကပ်လျက် ထွက်ပေါ်လာခဲ့သည်။ သူ ခြေလှမ်းအနည်းငယ် ခြေဦးတည့်ရာ ပြေးလွှားပြီးနောက် ခန္ဓာကိုယ်မှာ ယိမ်းထိုးသွားခဲ့ရပြီး ဆိုးရွားလှသော သွေးနီရောင်ရင့်ရင့်များမှာ သူ၏ အပေါ်အင်္ကျီကျောပြင်ကို စိုရွှဲသွားစေခဲ့သည်။

သင်သည် FBI အေးဂျင့် (အထူးအဆင့်) တစ်ဦး၏ တိုက်ခိုက်မှုကို ခံလိုက်ရသဖြင့် သွေးပမာဏ ၁၉ မှတ် (၄၄ - ၂၅) ဆုံးရှုံးသွားခဲ့သည်။

မှတ်ချက် - တိုက်ခိုက်မှုဒဏ် ၄၄ မှတ် - ခံနိုင်ရည်စွမ်းရည်ကြောင့် ဒဏ်ခံနိုင်မှု ၂၅ မှတ်

သင်သည် FBI အေးဂျင့် (အထူးအဆင့်) တစ်ဦး၏ တိုက်ခိုက်မှုကို ခံလိုက်ရသဖြင့် သွေးပမာဏ ၂၁ မှတ် (၄၆ - ၂၅) ဆုံးရှုံးသွားခဲ့သည်။

သင်သည် FBI အေးဂျင့် (အထူးအဆင့်) တစ်ဦး၏ တိုက်ခိုက်မှုကို ခံလိုက်ရသဖြင့် သွေးပမာဏ ၁၇ မှတ် (၄၂ - ၂၅) ဆုံးရှုံးသွားခဲ့သည်။

သင်သည် အလွန်အမင်း သွေးထွက်လွန်နေသဖြင့် ၅ စက္ကန့်လျှင် သွေးပမာဏ ၇ မှတ်စီ ကျဆင်းမည့် ဒဏ်ရာကို ရရှိသွားခဲ့ပြီး ယင်းအာနိသင်သည် စက္ကန့် ၃၀ မျှ ကြာမြင့်လိမ့်မည်။

FBI အေးဂျင့်များ၏ သေနတ်စွမ်းအားမှာ အလွန်တရာ ခြိမ်းခြောက်မှု ရှိလှပြီး လော့စ်အိန်ဂျလိစ် ရဲတပ်ဖွဲ့ဝင်များ၏ တိုက်ခိုက်မှုဒဏ်ထက် များစွာ ကျော်လွန်လှပေသည်။ သူတို့၏ ရန်သူမှာ နိုင်ငံတော်လုံခြုံရေးကို ခြိမ်းခြောက်နေသူဖြစ်သဖြင့် သူတို့သည် ဂလော့ခ်-၁၇ ၉မီလီမီတာ ပစ္စတိုသေနတ်များကို အသုံးပြုနေကြခြင်း ဖြစ်ပြီး သူတို့၏ သေနတ်များမှာ မောင်းတစ်ချက်ဆွဲလျှင် ၃ ချက်ဆင့်ပစ်နိုင်သော စနစ်သို့ ပြောင်းလဲထားခြင်း ဖြစ်သည်။ ရှီယန်သည် အိပ်မက်ဆိုးအမှတ်အသားထံမှ ဆက်တိုက် ထွက်ပေါ်လာသော အသိပေးချက်များကို ကြည့်ရှုလိုက်ရင်း မိမိကိုယ်ကိုယ် ထောင်ချောက်အတွင်း ပိတ်မိနေသော သားရဲတစ်ကောင်ကဲ့သို့ အလိုလို ခံစားလိုက်ရကာ အလွန်အမင်း စိုးရိမ်ပူပန်မှုများ ဖြစ်ပေါ်လာခဲ့သည်။

ရှီယန်၏ လျင်မြန်မှုအဆင့်မှာ မြင့်မားခြင်းမရှိသဖြင့် သူသည် လွတ်မြောက်ရန် အစွမ်းကုန် ကြိုးစားပြေးလွှားနေသော်လည်း လိုက်လံဖမ်းဆီးသူများ၏ နှောင့်ယှက်ခြင်းကို အလွယ်တကူ ခံနေရဆဲပင်။ သူ၏ ကျောပြင်ပေါ်ရှိ ဒဏ်ရာများထံမှ ပြင်းထန်လှသော နာကျင်မှု ဝေဒနာများမှာ သူ့ကို စတင် ဝါးမြိုလာခဲ့ပြီး သူ၏ ကြွက်သားများမှာလည်း သေနတ်ကျည်ဆန်များကို အပြင်သို့ ပြန်လည် တွန်းထုတ်ရန် ကြိုးစားနေခဲ့ကြသည်။ ကံကောင်းထောက်မစွာဖြင့် ဤအချိန်မှာ လူများ အလုပ်ဆင်းချိန်ဖြစ်သဖြင့် ရှီယန်သည် လူအုပ်ကြီးအတွင်းသို့ တိုးဝှေ့ ဝင်ရောက်နိုင်ခဲ့သည်။ သူသည် လူများနှင့် ပစ္စည်းများကို ရူးသွပ်စွာ တွန်းဖယ်လျက် ရှေ့သို့ ပြေးလွှားနေခဲ့ရာ မိမိတို့နောက်မှ အသည်းအသန် လိုက်လံဖမ်းဆီးနေသော အေးဂျင့်များမှာ မည်မျှပင် ဒေါသထွက်နေပါစေ ဤကဲ့သို့သော အခြေအနေမျိုးတွင် သေနတ်ကို ရမ်းသန်း ပစ်ခတ်နိုင်ခြင်း မရှိကြချေ။ အကယ်၍ သူတို့အနေဖြင့် အရပ်သားတစ်ဦးကို မတော်တဆ ထိခိုက်ဒဏ်ရာရစေခဲ့ပါက သူတို့၏ ပြုမူလှုပ်ရှားမှုမှာ အကြမ်းဖက်သမားများနှင့် မည်သို့မျှ ခြားနားတော့မည် မဟုတ်ချေ။

ရှေ့ရှိ လူကူးခုံးကျော်တံတားကြီးကို လှမ်းကြည့်လိုက်ရင်း ရှီယန်၏ မျက်ဝန်းအစုံမှာ တောက်ပသွားခဲ့သည်။ သူ၏ မျက်နှာထက်တွင် သေးငယ်သော အပြုံးတစ်ခု ထွက်ပေါ်လာခဲ့ပြီး ထိုလူကူးခုံးကျော်တံတားဆီသို့ သူ၏ ခြေလှမ်းများကို ပိုမို အရှိန်မြှင့်လိုက်တော့သည်။ တံတားပေါ်သို့ ရောက်ရှိသွားသည့်အခါ သူသည် လက်ရန်းကို လက်ဖြင့် အားပြု တွန်းကန်လိုက်ရင်း အောက်မှ ဖြတ်သန်း မောင်းနှင်လာသော ကုန်ကားတစ်စီးထံသို့ တိကျစွာ ချိန်ရွယ်လျက် အောက်သို့ ခုန်ချလိုက်တော့သည်။ ဤပြုမူလှုပ်ရှားမှုမှာ အလွန်တရာ စွန့်စားမှု ကြီးမားလှပြီး အကယ်၍ သူသာ ပစ်မှတ်ကို လွဲချော်သွားခဲ့ပါက အောက်ရှိ ဆက်တိုက် မောင်းနှင်နေသော ကားတန်းကြီး၏ တိုက်မိမှုကြောင့် သေဆုံးသွားရမည်မှာ မြေကြီးလက်ခတ်မလွဲပင် ဖြစ်ပေသည်။ သို့သော်လည်း သာမန်လူသားတစ်ဦးထက် ခန္ဓာကိုယ်ကြံ့ခိုင်မှု အဆမတန် မြင့်မားလှသော ရှီယန်အတွက်မူ ဤကဲ့သို့သော ခုန်ချမှုမှာ အံ့သြစရာ သို့မဟုတ် စွန့်စားရလွန်းလှသောအရာ မဟုတ်ချေ။ သူသည် အလွန်တရာ ညင်သာစွာဖြင့်ပင် ကုန်ကား၏ နောက်ဘက် ကုန်တင်ခန်းအတွင်းသို့ ဆင်းသက်နိုင်ခဲ့သည်။

တံတားအောက်ရှိ ယာဉ်ကြောပိတ်ဆို့မှုမှာ အလွန်တရာ မြန်ဆန်ပြီး ရှုပ်ထွေးလှသဖြင့် ကုန်ကားဒရိုင်ဘာအနေဖြင့် တစ်စုံတစ်ခုကို သတိပြုမိသွားခဲ့လျှင်ပင် ကားကို ချက်ချင်း ရုတ်တရက် ရပ်တန့်လိုက်ရန် မဖြစ်နိုင်ချေ။ ကုန်တင်ခန်း၏ ထက်ဝက်ခန့်တွင် စက္ကူထုပ်ကြီးများ ပြည့်နှက်နေသဖြင့် ရှီယန်၏ ခုန်ချမှုဒဏ်ကို လုံးဝ စုပ်ယူပေးခဲ့ပြီး အသံကိုပင် တိတ်ဆိတ်သွားစေခဲ့သည်။ ကုန်ကားမှာ အရှိန်လျော့သွားခြင်းမရှိဘဲ တည်ငြိမ်စွာဖြင့် ရှေ့သို့ ဆက်လက် မောင်းနှင်နေခဲ့သည်။ သို့သော်လည်း ဤအခိုက်အတန့်တွင် နက်မှောင်လှသော လူရိပ်တစ်ခုမှာ လျှပ်စီးကဲ့သို့ ဖြတ်သန်းသွားခဲ့ပြီးနောက် ဘုန်း...!ဟူသော အသံတစ်သံ ကပ်လျက် ထွက်ပေါ်လာခဲ့သည်။ ယင်းက အခြားမဟုတ်ဘဲ နှာခေါင်းနီပင် ဖြစ်ပြီး သူသည် ရှီယန်ကို လူကူးခုံးကျော်တံတားထက်မှ အသည်းအသန် လိုက်လံဖမ်းဆီးရန် ဝံ့ရဲခဲ့ကာ တံတား၏ အခြားတစ်ဖက်မှ ခုန်ချလိုက်ခြင်းအားဖြင့် ကုန်ကား၏ ကုန်တင်ခန်းအတွင်းသို့ အောင်မြင်စွာ ဆင်းသက်နိုင်ခဲ့ခြင်း ဖြစ်ပေသည်။

ရှီယန်သည် မျက်မှောင်ကြုတ်လိုက်မိသော်လည်း သူ၏ နှုတ်ခမ်းအစုံမှာမူ ရက်စက်လှသော အပြုံးတစ်ခုအဖြစ် ကွေးညွတ်သွားခဲ့သည်။ သူသည် T-750 တာမီနေတာ ကဲ့သို့သော စက်ရုပ်ကိုပင် တိုက်ရိုက် ရင်ဆိုင်ဝံ့သူ ဖြစ်သည်။ သာမန် FBI အေးဂျင့် (အထူးအဆင့်) တစ်ဦးမျှသာ ဖြစ်သော ဤလူမှာ သူ၏ မျက်စိထဲတွင် ဘာမျှမဟုတ်ချေ။ ၎င်းတို့နှစ်ဦးမှာ ၂ မီတာ သို့မဟုတ် ၃ မီတာခန့်သာ ကွာဝေးကြပြီး နှာခေါင်းနီသည် သေနတ်ကို မြှောက်၍ ချိန်ရွယ်ရန် ပြင်ဆင်လိုက်သော်လည်း ရှီယန်မှာမူ ဒေါသတကြီးဖြင့် ရှေ့သို့ အားထည့် ပြေးဝင်သွားခဲ့ပြီး ဖြစ်သည်။

နှာခေါင်းနီသည် ပြင်းထန်လှသော ပြေးဝင် တိုက်ခိုက်မှုဒဏ်ကို အနည်းငယ် ရှောင်တိမ်းလိုက်ပြီးနောက် နောက်သို့ ဒလိမ့်ခေါက်ကွေး လိမ့်ဆင်းလိုက်ရင်း အကွာအဝေးတစ်ခုကို ဖန်တီးကာ သေနတ်ကို စတင် ပစ်ခတ်လိုက်တော့သည်။ လက်ရှိတွင် သူတို့သည် အရှိန်ပြင်းစွာ မောင်းနှင်နေသော ကားတစ်စီးပေါ်၌ ရှိနေကြခြင်းဖြစ်ရာ အကယ်၍ နှာခေါင်းနီသာ သေနတ်ထိမှန်သွားခဲ့ပါက သူသည် သဘာဝကျစွာပင် ကုန်ကားပေါ်မှ အောက်သို့ ပြုတ်ကျသွားပေလိမ့်မည်။ အရှိန်ပြင်းလှသော လမ်းမပေါ်သို့ ပြုတ်ကျသွားပြီး ခြေလက်တစ်ဖက်နှစ်ဖက် ခန့်သာ ကျိုးပဲ့သွားခြင်းမှာ ဤကဲ့သို့သော အခြေအနေမျိုးအတွက် အကောင်းဆုံးသော ရလဒ်ပင် ဖြစ်ပေလိမ့်မည်။

ဤ FBI အေးဂျင့်သည် သေနတ်ပစ်ခတ်ရန် စိတ်ကူးကို စွန့်လွှတ်လိုက်ရုံမှတစ်ပါး အခြားရွေးချယ်စရာ မရှိတော့ဘဲ သူ၏ ခန္ဓာကိုယ်ကို လှည့်ပတ်လျက် ရှေ့မှ ဝင်ရောက်လာသော တိုက်ကွက်ကို ရှောင်တိမ်းကာ တန်ပြန်တိုက်ခိုက်ရန် ကြိုးစားလိုက်တော့သည်။ ဤကမ္ဘာအတွင်းသို့ ဝင်ရောက်လာခဲ့ကတည်းက ရှီယန်သည် အမြဲတစေ ပါးနပ်ပြီး ကြိုတင်ပြင်ဆင်မှု ကောင်းမွန်သူဖြစ်ရာ သူသည် ထိုအေးဂျင့်၏ တုံ့ပြန်မှုကို ကောင်းစွာ တွက်ချက်ထားပြီး ဖြစ်သည်။ သူ၏ ယခင် ပြေးဝင်တိုက်ခိုက်မှုပုံစံမှာ အလွန်တရာ ရိုးရှင်းလှသော်လည်း သူသည် သူ၏ ခွန်အား ၃၀ ရာခိုင်နှုန်းခန့်ကိုသာ အသုံးပြုထားခဲ့ခြင်း ဖြစ်သည်။ နှာခေါင်းနီ ရှောင်တိမ်းလိုက်သည်နှင့်တစ်ပြိုင်နက် သူသည် ထိုလူ၏ လှုပ်ရှားမှုများနောက်သို့ မဆုတ်မနစ် လိုက်လံရင်း လက်နှစ်ဖက်လုံးကို နှာခေါင်းနီ၏ ဘေးတစ်ဖက်တစ်ချက်စီတွင် ပိတ်ဆို့ ထားလိုက်တော့သည်။

၎င်းတို့နှစ်ဦးသည် ဤမျှလောက် တိုတောင်းလှသော အကွာအဝေးအတွင်း တစ်ဦး၏ အသက်ရှူသံကို တစ်ဦး ကောင်းစွာ ကြားနေရသည်။ နှာခေါင်းနီသည် FBIအဖွဲ့မှ အထူး ရွေးချယ်ပြီး ပြင်းထန်စွာ လေ့ကျင့်ပေးထားသော လူတစ်ဦးဖြစ်ရာ အကယ်၍ သူသည် လက်ရှိအချိန်တွင် ပစ္စတိုသေနတ်ကို ဆက်လက် အသုံးပြုရန် ကြိုးစားနေဦးမည်ဆိုပါက သူ၏ ရန်သူသည် သူ၏ လက်ကောက်ဝတ်ကို ဖမ်းဆွဲလျက် သူ့ကို ချေမှုန်းပစ်လိမ့်မည် ဖြစ်ကြောင်း ကောင်းစွာ သဘောပေါက်ထားသည်။ ထို့ကြောင့် သူသည် မည်သည့် တုံ့ဆိုင်းမှုမျှမရှိဘဲ သူ၏ ပစ္စတိုသေနတ်ကို အသုံးပြု၍ သူ၏ ရှေ့မှောက်ရှိ ရက်စက်လှသော ရန်သူထံသို့ ပြင်းထန်စွာ ဆောင့်ချလိုက်တော့သည်။ နှာခေါင်းနီ၏ မျက်ဝန်းအစုံတွင် ရက်စက်မှုများ ပြည့်နှက်နေခဲ့သည်။ သူတို့ အသုံးပြုသော ဂလော့ခ်-၁၇ ပစ္စတိုသေနတ်မှာ အထူး ပြုပြင်ထားခြင်းဖြစ်ပြီး ကျည်ဆန် ၃၁ တောင့်အထိ ဆံ့ပေသည်။ ယင်းကို အသုံးပြု၍ တစ်စုံတစ်ခုကို ထုရိုက်လိုက်ပါက ထွက်ပေါ်လာမည့် ခြိမ်းခြောက်မှု စွမ်းအားမှာ အုတ်ခဲတစ်ခဲဖြင့် ထုရိုက်လိုက်သကဲ့သို့ပင် ပြင်းထန်လှပေသည်။

သို့သော်လည်း ရှီယန်သည် သူ၏ ဦးခေါင်းကို မြှောက်လိုက်ရင်း သူ၏ ရန်သူထံသို့ နဖူးဖြင့် ထပ်မံ ဆောင့်ချလိုက်တော့သည်။“ဘုန်း...!” သူ၏ နဖူးထက်တွင် ရှည်လျားလှသော သွေးထွက်သံယို ဒဏ်ရာတစ်ခု ထွက်ပေါ်လာခဲ့သော်လည်း ယင်းက အရေပြားမျက်နှာပြင်ပေါ်ရှိ သာမန်ဒဏ်ရာတစ်ခုမျှသာ ဖြစ်သည်။ နှာခေါင်းနီမှာမူ ပြင်းထန်လှသော နာကျင်မှုကြောင့် အကျယ်ကြီး အော်ဟစ်လိုက်ရတော့သည်။ ပြင်းထန်လှသော ခွန်အားစွမ်းပကားများကြောင့် သူ၏ လက်မနှင့် လက်ညှိုးကြားရှိ အရေပြားများမှာ စုတ်ပြဲသွားခဲ့ရပြီး သွေးစိမ်းရှင်ရှင်များ စတင် စီးဆင်းလာခဲ့သည်။ ပစ္စတိုသေနတ်ပင်လျှင် ထိုရိုက်ခတ်မှုဒဏ်ကြောင့် လွင့်စင်သွားခဲ့ရပြီး လမ်းမပေါ်သို့ ကျရောက်သွားသည့်အခါ အလိုအလျောက် ကျည်ဆန်အနည်းငယ် ပေါက်ကွဲ ထွက်ပေါ်သွားခဲ့သည်။

တစ်ချိန်တည်းမှာပင် ရှီယန်သည် အသက်ကို ပြင်းထန်စွာ ရှူရှိုက်လိုက်ရင်း သူ၏ လက်သီးနှစ်ဖက်လုံးကို တင်းကြပ်စွာ ဆုပ်ကိုင်လျက် ရန်သူ၏ နုနယ်လှသော ဝမ်းဗိုက်ဧရိယာထံသို့ ဆက်တိုက် ထိုးနှက်လိုက်တော့သည်။ ဤအရေးကြီးလှသော အခိုက်အတန့်တွင် သူ၏ လက်သီးချက်များမှာ ရန်သူ၏ မာကျောလှသော ကျောရိုးဆီသို့ပင် ထိမှန်သွားသကဲ့သို့ ခံစားလိုက်ရပြီး အတွင်းကလီစာများ မည်မျှအထိ ဖိအားပေးခြင်း ခံလိုက်ရသည်ဟူသော ပမာဏမှာ တွေးတော၍ပင် ရနိုင်လောက်စရာ မရှိချေ။

ဤကဲ့သို့သော ပြင်းထန်လှသော တိုက်ခိုက်မှုဒဏ်ကို ခံလိုက်ရပြီးနောက် ဤ FBI အေးဂျင့်သည် နာကျင်လွန်းသဖြင့် မျက်ဝန်းအစုံ ပြူးထွက်လာခဲ့ရပြီး သူ၏ မျက်နှာမှာ ဖြူလျော်သွားခဲ့ရသည်။ သူသည် ပြင်းထန်လွန်းလှသဖြင့် မျက်စိထဲတွင် ရွှေရောင် ကြယ်ပွင့်များပင် ထွက်ပေါ်လာခဲ့သော်လည်း ဤအခြေအနေမှာ သေရေးရှင်ရေး တမျှ အရေးကြီးလှကြောင်း ကောင်းစွာ နားလည်ထားသဖြင့် အရှုံးမပေးဝံ့ချေ။ သူသည် သွားကို တင်းကြပ်စွာ ကြိတ်လိုက်ရင်း ရှီယန်၏ ဝမ်းဗိုက်အတွင်းသို့ တိုးဝင်လျက် ရှီယန်၏ မျက်နှာထံသို့ သူ၏ လက်သီးကို ပစ်လွှတ်လိုက်တော့သည်။

ရှီယန်သည် ရှောင်တိမ်းရန်ပင် အားမထုတ်တော့ဘဲ မိမိထံသို့ ရောက်ရှိလာသော လက်သီးချက်များကို အသာအယာ ခံယူလိုက်သည်။ သူ၏ ပါးရိုးများမှာ ညိုမည်းသွားခဲ့ရပြီး သူ၏ မျက်ဝန်းအစုံမှလည်း သွေးများ စီးကျလာခဲ့သည်။ သူသည် သူ၏ ခွန်အားအားလုံးကို စုစည်းလိုက်ရင်း တံတောင်ဖြင့် လွှဲရိုက်လိုက်တော့သည်။ သူ၏ ကြီးမားထည်ဝါလှသော ရန်သူ၏ မျက်နှာထည့်ထည့်သို့ ပြင်းထန်စွာ ဆောင့်ချလိုက်ခြင်းပင် ဖြစ်ပေသည်။

ထင်ရှားသည်မှာ ဤFBI အေးဂျင့်၏ တိုက်ခိုက်မှု စွမ်းရည်မှာ ရှီယန်၏ တိုက်ခိုက်မှုဒဏ်နှင့် မည်သို့မျှ နှိုင်းယှဉ်၍ မရနိုင်လောက်အောင် ကွာခြားလှပေသည်။ သူသည် လေထဲတွင် ပျံသန်းနေသော မြှားတစ်စင်း၏ နောက်ဆုံး ကုန်ဆုံးခါနီး အရှိန်အဟုန်ကဲ့သို့ ဖြစ်နေပြီဖြစ်ရာ ဤကဲ့သို့သော ရက်စက်လှသော တိုက်ကွက်ကို ခံလိုက်ရပြီးနောက် နာကျင်စွာဖြင့် အော်ဟစ် ညည်းတွားလိုက်ရတော့သည်။ ခန္ဓာကိုယ်မှာ နောက်သို့ ခြေလှမ်းအနည်းငယ် ယိမ်းထိုးသွားခဲ့ရပြီး သူ၏ ကျောပြင်မှာ ကား၏ ကုန်တင်ခန်းအနားသတ်နှင့် ပြင်းထန်စွာ ရိုက်မိသွားခဲ့သည်။ သူ၏ လက်ဖြင့် မျက်နှာကို တင်းကြပ်စွာ ဖိကပ်ထားခဲ့သော်လည်း မျက်ရည်များနှင့် နှပ်ချေးများမှာ သူ၏ နှာခေါင်းမှတစ်ဆင့် လျင်မြန်စွာ စီးဆင်းလာခဲ့ပြီး သွေးများမှာလည်း လက်ချောင်းများကြားရှိ ဒဏ်ရာမှတစ်ဆင့် အဆက်မပြတ် ထွက်ပေါ်နေခဲ့သည်။

ရှီယန်သည် အေးစက်စွာ အကျယ်ကြီး ရယ်မောလိုက်ရင်း ဦးခေါင်းကို လှည့်၍ နောက်ဘက်သို့ လှမ်းကြည့်လိုက်သည်။ မူလက ခါချပစ်နိုင်ခဲ့ပြီဟု ထင်မှတ်ထားခဲ့သော အခြားသော FBI အေးဂျင့် ၅ ဦးမှာ အပျော်စီး ကားကြီးတစ်စီးကို ရှာဖွေတွေ့ရှိသွားခဲ့ကြပြီး ဂတ်စ်နင်းတံကို အစွမ်းကုန် နင်းလျက် ရှီယန်၏ နောက်သို့ ဒေါသတကြီးဖြင့် လိုက်လံ အမဲလိုက်နေကြပြီ ဖြစ်သည်။ ထို့ပြင် ဤကုန်ကားမှာလည်း လမ်းဘေးတစ်ဖက်သို့ ဦးတည်သွားခဲ့ပြီး ၎င်း၏ မောင်းနှင်မှု အရှိန်အဟုန်မှာ တဖြည်းဖြည်း လျော့နည်းလာခဲ့သည်။ ယင်းက ဒရိုင်ဘာအနေဖြင့် ကုန်တင်ခန်းအတွင်း၌ တစ်စုံတစ်ခု ဖြစ်ပျက်နေသည်ကို ရိပ်မိသွားခြင်းကြောင့် သို့မဟုတ် ၎င်း၏ ပစ်မှတ်နေရာသို့ ရောက်ရှိတော့မည် ဖြစ်ခြင်းကြောင့် ဖြစ်ရမည်။ အကယ်၍ မည်သည့် မတော်တဆမှုမျှ ဖြစ်ပေါ်မလာခဲ့ပါက သူတို့သည် မိနစ်အနည်းငယ်အတွင်း ရှီယန်၏ အနီးသို့ ရောက်ရှိလာကြတော့မည် ဖြစ်ပေသည်။