အခန်း (၁၀) - လောင်းကစားဘုရင်

ရှီယန် ၏ အပြုအမူက အနည်းငယ် လွန်ကဲသည်ဟု ထင်ရသော်လည်း အမှန်တကယ်တွင် ထိုလူသည် သူနှင့် တစ်ချိန်တည်းမှာပင် အပြင်သို့ လှမ်းထွက်လာခဲ့ခြင်း ဖြစ်ပြီး ။ ဤဟိုတယ်ခန်းထဲတွင် သူကဲ့သို့ပင် တစ်ဦးတည်း ရှိနေသူ ဖြစ်သည်၊ မည်သူမဆို ယင်း၏ နောက်ကွယ်က လျှို့ဝှက်ချက်ကို သတိပြုမိပေလိမ့်မည်။ ထိုလူသည်လည်း ‘ပြိုင်ပွဲဝင်’ ဟု ခေါ်ဆိုသော လူများထဲမှ သူနှင့် လှေကြုံတစ်စီးတည်းစီးလာသူ တစ်ဦး ဖြစ်နေနိုင်ချေ အလွန် များလှသည်။ ရှီယန် သည် ဤနေရာတွင် အတွေ့အကြုံမရှိသေးသူ တစ်ဦး ဖြစ်သော်လည်း ဆိတ်ငြိမ်သော ပတ်ဝန်းကျင်အောက်တွင် ပြိုင်ပွဲဝင်များ သေဆုံးပါက မည်သည့် ပစ္စည်းမျိုးကိုမျှ ကျန်ရစ်စေမည်မဟုတ်ဟူသော စောစောက ရှင်းလင်းချက်ကိုမူ အနည်းဆုံး မှတ်မိနေသေးသည်။

ဤအချက်သည် အဓိက အကြောင်းပြချက်ကို ဖယ်ထုတ်လိုက်ပြီးနောက်တွင်မူ လျှို့ဝှက်ချက် အမှန်တရား နှစ်ခုကို သယ်ဆောင်ထားသည်။ ပြိုင်ပွဲဝင်တစ်ယောက်ကို အမှန်တကယ် သတ်ဖြတ်နိုင်သည်ဟူသော အချက်နှင့် အနာဂတ်တွင် ပြိုင်ပွဲဝင်အချင်းချင်း သတ်ဖြတ်ခြင်းဖြင့် ကြီးမားသော အကျိုးအမြတ်များကို ဆွတ်ခူးနိုင်မည့် ဇာတ်ကွက်များ ရှိလာနိုင်သည်ဟူသော အချက်တို့ ဖြစ်ကြသည်။ အရေးကြီးဆုံးအချက်မှာ ရှီယန် ၏ အဓိက မစ်ရှင်က ၄၈ နာရီအတွင်း အချိန်နှင့်နေရာ ဆုံချက်ကို ဖျက်ဆီးပစ်ရန် ဖြစ်သော်လည်း အကယ်၍ အချိန်နှင့်နေရာ ဆုံချက်က တစ်ခုတည်းသာ ရှိနေမည်ဆိုလျှင် အဘယ်သို့ ဖြစ်လာမည်နည်း။

ဧကန်မုချပင် အခြားသော ပြိုင်ပွဲဝင်များကြားတွင် အကျိုးစီးပွား ပဋိပက္ခများ ဖြစ်ပွားလာပြီး နောက်ဆက်တွဲအားဖြင့် ကြောက်မက်ဖွယ်ရာ အကျိုးဆက်များကို မလွဲမသွေ ဖြစ်ပေါ်စေလိမ့်မည် ဖြစ်သည်။ ဤဖြစ်နိုင်ချေက မကြီးမားလှသော်လည်း သေချာပေါက် ဖြစ်နိုင်ချေ ရှိနေသည်။ ရှီယန် အတွက်မူ မိမိ၏ လက်သီးကိုသာ အားကိုးခြင်းက အကောင်းဆုံး ရွေးချယ်မှု ဖြစ်ပြီး အခြားမရှိတော့ချေ။

ထို့ကြောင့်ပင် ရှီယန် မိမိကိုယ်ကိုယ် အဖြစ်မှန် မပေါ်စေရန် မဝံ့မရဲ ဖြစ်နေခြင်း ဖြစ်သည်။ ဤမုတ်ဆိတ်မွေးနှင့် အမျိုးသားသည်လည်း ထွက်ခွာသွားရန် ရည်ရွယ်ချက် မရှိပုံရချေ။ အကြောင်းမှာ အကယ်၍ သူက ကျောခိုင်းလှည့်ထွက်သွားမည်ဆိုပါက သူ၏ ကျောပြင်တစ်ခုလုံးကို လှစ်ဟပြလိုက်သကဲ့သို့ ဖြစ်သွားမည်ဖြစ်ရာ ရှီယန် ၌ ရန်လိုစိတ် မရှိပါစေနှင့်ဟုသာ ဆုတောင်းနေရုံမှတစ်ပါး အခြားမရှိချေ။ အကယ်၍ ရှီယန် သာ ရန်လိုခဲ့မည်ဆိုလျှင် သူသည် အလွန် ကံဆိုးမိုးမှောင်ကျပြီး မတရားသဖြင့် သေဆုံးသွားရပေလိမ့်မည်။

သူတို့နှစ်ဦးစလုံးသည် တစ်ယောက်ကိုတစ်ယောက် အကဲခတ်ရင်း၊ အခြားတစ်ယောက်၏ အကြံအစည်ကို အဖြေရှာရန် ကြိုးစားရင်း လျောက်လမ်းထဲတွင် လှုပ်ရှားမှုမရှိဘဲ ရပ်တန့်နေကြသော်လည်း နှစ်ဦးစလုံးက ဦးစွာ စတင် တိုက်ခိုက်ရန် ဝံ့ရဲခြင်း မရှိကြချေ။ အကြောင်းမှာ နှစ်ဦးစလုံးက မိမိတို့၏ ကိုယ်ပိုင် အောင်ပွဲအပေါ် ယုံကြည်ချက် မရှိကြသောကြောင့် ဖြစ်သည်။ သူတို့ကို အခြားသူများက ချောင်းမြောင်း စောင့်ကြည့်နေမည်ကို စိုးရိမ်သဖြင့် ရှီယန် ခဏမျှ စဉ်းစားလိုက်ပြီး သူ၏ ကုတ်အင်္ကျီအိတ်ထဲမှ စီကရက်တစ်လိပ်ကို ဖြည်းညှင်းစွာ ထုတ်ယူကာ မီးညှိပြီး တစ်ချက် ရှိုက်ဖွာလိုက်သည်။ စီကရက်၏ အရသာကို ခံစားနေသကဲ့သို့ မျက်လုံးများကို မှေးစင်းထားရင်း သူ၏ ဘယ်ဘက်လက်ကို ဖြည်းညှင်းစွာ ဆန့်ထုတ်ကာ ဆွေးမြည့်နေသော သစ်သားလက်ရန်းပေါ်သို့ တင်လိုက်သည်။

ရှီယန် ၏ လှုပ်ရှားမှုများက အလွန် နှေးကွေးပြီး အေးဆေးတည်ငြိမ်လှရာ အခြားတစ်ဖက်လူအနေဖြင့် သူ၏ ရုတ်တရက် လှုပ်ရှားမှုအပေါ် အထင်အမြင်လွဲမှားခြင်း မရှိစေရန် ကာကွယ်ခြင်း ဖြစ်သည်။ သူ လက်ရန်းပေါ်သို့ ပိုမို ပြင်းထန်စွာ ဖိချလိုက်သောအခါ ရုတ်တရက်ပင် ယိုင်နဲ့နေပြီးသားဖြစ်သော ဤလက်ရန်းက ဝုန်းခနဲ လုံးဝ ကျိုးပျက်သွားတော့သည်။ သူသည် အလောတကြီး ဖြစ်သွားဟန် ဆောင်ကာ ဒုတိယထပ်မှနေ၍ အောက်သို့ ပြုတ်ကျသွားခဲ့သည်။ ဒါက ဒုတိယထပ်မျှသာ ဖြစ်သဖြင့် ရှီယန် အလွယ်တကူပင် လေထဲတွင် တစ်ပတ်ဂျွမ်းပစ်ကာ ကြမ်းပြင်ပေါ်သို့ ဘေးကင်းစွာ ဆင်းသက်နိုင်ခဲ့သည်။ သူ မော့ကြည့်လိုက်ပြီး ထိုမုတ်ဆိတ်မွေးနှင့် အမျိုးသားကို သေချာစွာ စိုက်ကြည့်လိုက်သည်။ ထို့နောက် သူ၏ လမ်းကို ပိတ်ဆို့ထားသော စောင်း‌ နေတဲ့ခုံတန်းလျား နှစ်လုံးကို ကန်ထုတ်ပစ်လိုက်ပြီး ပင်မတံခါးကြီးကို တွန်းဖွင့်ကာ လမ်းမများပေါ်သို့ လှမ်းထွက်ခဲ့တော့သည်။

နီယွန်မီးရောင်စုံများ လင်းထိန်နေသော လမ်းကြားတစ်ခုကို ဖြတ်လျှောက်ရင်း ၇၀-၈၀ ခုနှစ်များက ပတ်ဝန်းကျင် ဗိသုကာလက်ရာများနှင့် ခေတ်ဟောင်းမော်တော်ကားများကို ကြည့်ကာ ရှီယန် သက်ပြင်းတစ်ချက် ချလိုက်မိသည်။ သမိုင်းကြောင်းကို ပြန်လည် ရေးသားရခြင်းနှင့် ပတ်သက်၍ သူ၏ နှလုံးသားထဲတွင် အနည်းငယ် စိတ်မသက်မသာ ဖြစ်မိသော်လည်း သူ၏ မျက်နှာအမူအရာကမူ ရှည်လျားပြီး ပြည့်စုံသော ဘဝတစ်ခုကို ဖြတ်သန်းခဲ့ဖူးသကဲ့သို့ အေးချမ်းတည်ငြိမ်နေသည်။

မြို့ကြီးက စည်ကားလှပြီး သူ၏ စိတ်ထဲတွင်လည်း တွေးတောစရာများစွာ ရှိနေသည် ။ ဤတောင်းဆိုချက်ကို လက်ခံလိုက်ခြင်းက ပုန်းအောင်းနေသော အန္တရာယ်များကို သူ အပြည့်အဝ သတိပြုမိသွားခြင်းပင် ဖြစ်သည်။ ပထမဆုံး လုပ်ဆောင်ရမည့်အရာမှာ ပတ်ဝန်းကျင်နှင့် ရင်းနှီးကျွမ်းဝင်အောင် လုပ်ဆောင်ရန်ဖြစ်ပြီး အချိန်နှင့်နေရာ ဆုံချက်ကို ရှာဖွေဖျက်ဆီးရန် မစဉ်းစားမီ မိမိအတွက် အသုံးဝင်မည့် ပစ္စည်းကိရိယာများ သို့မဟုတ် လက်နက်အချို့ကို ရှာဖွေနိုင်လျှင် အကောင်းဆုံး ဖြစ်သည်။ မည်သည့်အချိန်တွင်မဆို မိမိကိုယ်ကိုယ် ကာကွယ်ရန်အတွက် မိမိကိုယ်ကိုယ်သာ အားကိုးရမည် ဖြစ်သည်။

ဤရည်မှန်းချက်ကို အောင်မြင်ရန်အတွက် အမြန်ဆုံး လမ်းကြောင်းမှာ ရာဇဝတ်မှု ကျူးလွန်ခြင်း ဖြစ်သည်။ ငယ်စဉ်ကတည်းကပင် ဆင်းရဲမွဲတေစွာ နေထိုင်ခဲ့ရသဖြင့် ရှီယန် သည် လုယက်ခြင်းနှင့် ခိုးယူခြင်း အတတ်ပညာများကို အလွန် ကျွမ်းကျင်လှသည်။ သို့သော်လည်း သူသည် ထိုကဲ့သို့သော အပြုအမူမျိုးကို စိတ်ထဲကနေ တိတ်တဆိတ် အထင်သေးတတ်သူ ဖြစ်ရာ ထို့ကြောင့်ပင် ရှီယန် ဤဖြတ်လမ်းကို စွန့်လွှတ်ရန် ဆုံးဖြတ်လိုက်ခြင်း ဖြစ်သည်။

ကျွမ်းကျင်သော လမ်းပြတစ်ယောက်ကို ရှာဖွေခြင်းက ရွေးချယ်စရာများထဲမှ တစ်ခု ဖြစ်ပြီး လမ်းပြကို ဦးဆောင်ခိုင်းကာ သူက ခြိမ်းခြောက်မှု အနည်းငယ် သို့မဟုတ် ဆုလာဘ်များ ပေးမည်ဟု ကတိပြုရုံမျှသာ ဖြစ်သည်။ သို့သော်လည်း ခြိမ်းခြောက်မှုများက ဓားသွားနှစ်ဖက်ရှိသော ဓားကဲ့သို့ ဖြစ်ရာ အကယ်၍ တစ်ဦးတစ်ယောက်တွင် လွှမ်းမိုးချုပ်ကိုင်နိုင်သော စွမ်းအားများ မရှိပါက မိမိကိုယ်ကိုယ် အလွယ်တကူ ပြန်လည် ထိခိုက်စေနိုင်သည်။ ထို့ကြောင့် အတွေ့အကြုံမရှိသေးသော ရှီယန် အတွက်မူ အကောင်းဆုံး အကြံဉာဏ်မှာ ဆုလာဘ်များကို အစာအဖြစ် အသုံးပြုရန် ဖြစ်သည်။

သူ၏ အိတ်ကပ်ထဲသို့ နက်ရှိုင်းစွာ နှိုက်ကြည့်လိုက်ရာ သနားစရာကောင်းလှသော ၅ ဒေါ်လာတန် နှစ်ရွက်ကိုသာ တွေ့ရှိရသည်။ ဤပိုက်ဆံအနည်းငယ်က ထမင်းတစ်နပ်စာအတွက်သာ လုံလောက်ရုံရှိရာ အခြားတစ်ယောက်ကို ကူညီပေးရန်အတွက် မည်သို့ စည်းရုံးနိုင်မည်နည်း။ ဤကမ္ဘာတွင် ၁၀ ဒေါ်လာကို ရာဂဏန်း သို့မဟုတ် ထောင်ဂဏန်းအဖြစ် ပြောင်းလဲရန်မှာ အလွန် ခက်ခဲပြီး ရှားပါးလှသည်။ သို့သော်လည်း ရှီယန် သိရှိထားသော အန္တရာယ်များလှသည့် နည်းလမ်းတစ်ခု ရှိနေသည်။လောင်းကစားလုပ်ခြင်းပင်ဖြစ်သည်။

သူ၏ ယခင်ကမ္ဘာတွင် ရှီယန် သည် အသက်မွေးဝမ်းကျောင်းအတွက် ကမ္ဘာတစ်ဝန်းရှိ မတူညီသော ဆိပ်ကမ်းများစွာသို့ သွားရောက်ခဲ့ရသဖြင့် မတူညီသော တရားမဝင် ဖျော်ဖြေရေး အမျိုးအစားများစွာကို ဖြတ်သန်းဖူးခဲ့သည်။ သူ၏ မှတ်ဉာဏ်များကို ပြန်လည် တူးဆွကြည့်လိုက်ရာ သူသည် လောင်းကစားဝိုင်းများတွင် များစွာ အနိုင်ရရှိရန်အတွက် သူ၏ ထက်မြက်လှသော အာရုံခံစားမှုကို အမှန်တကယ်ပင် အားကိုးခဲ့ဖူးသည်။ သို့သော်လည်း ရှီယန် သည် မည်သည့်အချိန်တွင် ရပ်တန့်ရမည်ကို သိရှိသူဖြစ်ပြီး လောင်းကစားလုပ်ခြင်းကို သူ၏ ဝါသနာ သို့မဟုတ် အသက်မွေးဝမ်းကျောင်းအလုပ်အဖြစ် ပြုလုပ်ရန် ဘယ်သောအခါမျှ မရည်ရွယ်ခဲ့ချေ။ သူသည် နာမည်ကျော်ကြားသူတစ်ဦး မဟုတ်သော်လည်း သူ၏ လောင်းကစား နည်းဗျူဟာများနှင့် စွမ်းရည်များကမူ အံ့မခန်းစရာ အရာတစ်ခု ဖြစ်သည်။

ငါ့အနေနဲ့ ရန်ပုံငွေ ရှာဖွေဖို့ လောင်းကစားလုပ်ခြင်းကို အားကိုးရမှာဆိုတော့ ပြိုင်ဆိုင်မှုတွေကို ရှောင်လွှဲဖို့ ခက်ခဲလိမ့်မယ်။

အရင်ကဆိုရင် အရွယ်ရောက်ပြီး အမျိုးသား နှစ်ယောက်ကို ရင်ဆိုင်ရတာက ငါ့ရဲ့ ကန့်သတ်ချက်ပဲ။ အရည်အချင်းတွေ မြင့်တက်လာပြီးနောက်မှာတောင် အများဆုံးက အရွယ်ရောက်ပြီး အမျိုးသား ၅-၆ ယောက်ပဲ ဖြစ်လိမ့်မယ်၊ ဒါပေမဲ့ အုပ်စုကြီးတစ်ခုက ငါ့ကို ဝိုင်းရံထားမယ်ဆိုရင်တော့ ငါလည်း အသက်လုပြီး ထွက်ပြေးရမှာပဲ။ ဩော်... ဟုတ်သားပဲ! ငါ့ရဲ့ မွေးရာပါ စွမ်းရည်ဖြစ်တဲ့ ကြံ့ခိုင်မှု က နိုးထလာခဲ့ပြီပဲ၊ ဒါပေမဲ့ ဒီစွမ်းရည်ရဲ့ တကယ့် အစွမ်းက ဘယ်လောက်လဲဆိုတာကိုတော့ မသိရသေးဘူး။

အချိန်က အကန့်အသတ် ရှိနေတယ်၊ ငါ အရင်ဆုံး စမ်းသပ်ကြည့်ရမယ်၊ အကယ်၍ အဆင်မပြေခဲ့ရင်တော့ တခြားနည်းလမ်းကို စဉ်းစားရမှာပဲ။

ရှီယန် သည် ပထမဆုံးအကြိမ်အဖြစ် ပတ်ဝန်းကျင်ကို စစ်ဆေးရန် ဆုံးဖြတ်ရင်း သူ၏ စိတ်ထဲတွင် အစီအစဉ်များ ချမှတ်နေမိသည်။ ထိုမုတ်ဆိတ်မွေးနှင့် အမျိုးသားသည် သူ၏ နောက်သို့ လိုက်ပါလာခြင်း မရှိသည်ကို သိရှိလိုက်ရသောအခါ သူ စိတ်အေးသွားပြီး လမ်းကြားအတိုင်း ဆက်လက် လျှောက်လှမ်းခဲ့ရာ လမ်းဆုံတစ်ခုသို့ ရောက်ရှိသွားခဲ့သည်။ ဘယ်ဘက်တွင်မူ မြင့်မားသောအဆောက်အအုံတစ်ခု၏ မြေညီထပ် ရှိနေပြီး ပျက်စီးယိုယွင်းနေသော နီယွန်ဆိုင်းဘုတ်တစ်ခုက ဒါးလတ်စ် ဘားဆိုင် ဟူသော စကားလုံးများကို ဝေဝါးစွာ ဖော်ပြနေသည်။ ဤနေရာတွင် လူစုလူဝေးက နည်းပါးလှပြီး ပတ်ဝန်းကျင်ကလည်း လူသူကင်းဝေးလှသည်။ ဘားဆိုင်တွင် နောက်ဘက်ထွက်ပေါက် တံခါးငယ်တစ်ခု ရှိနေပြီး ၎င်းကို ထွက်ပြေးရန် လမ်းကြောင်းအဖြစ် အသုံးပြုပုံရကာ ပင်မတံခါးကြီးမှာမူ သံချေးတက်နေသော တွန်းတံခါးတစ်ခု ဖြစ်ပြီး ၎င်းကို တွန်းဖွင့်လိုက်တိုင်း ကျွိကျွိကျွက်ကျွက် မြည်သံများ ထွက်ပေါ်နေသည်။

အဝင်ဝသို့ လျှောက်လှမ်းသွားစဉ် တန်ဖိုးနည်း အလှကုန်များ၊ ဘီယာများနှင့် ချွေးနံ့များ ရော‌‌နှောနေသော အနံ့ဆိုးတစ်ခုကို ရရှိလိုက်သဖြင့် ရှီယန် နှစ်ကြိမ်တိုင်တိုင် နှာချေလိုက်မိသည်။ ဘားဆိုင်၏ အတွင်းပိုင်းက ဖရိုဖရဲ ဖြစ်နေပြီး ကျယ်လောင်လှသော ဂီတသံများက လေထုထဲတွင် ပြည့်နှက်နေကာ နံရံများတွင်လည်း အက်ကွဲကြောင်းများ၊ ဖျက်ဆီးထားမှုများနှင့် ညစ်ညမ်းသော ပန်းချီကားများဖြင့် အလှဆင်ထားသည်။

မီးရောင်အောက်တွင် ဖုန်မှုန့်များ နေရာအနှံ့ ရှိနေသည်ကို အလွယ်တကူ သတိပြုမိနိုင်သည်။ ဘယ်ဘက်တွင်မူ ကောင်တာတစ်ခု ရှိနေပြီး သစ်သားပြားက ကွဲအက်နေကာ ကောင်တာ၏ အထက်တွင်မူ နံရံတစ်လျှောက် သံမဏိတန်းတစ်ခုပေါ်တွင် ချိတ်ဆွဲထားသော ဘီယာပုလင်းများစွာ ရှိနေသည်။ နံရံတွင် သစ်သားပြားတစ်ခုကို သံရိုက်ထားပြီး ၎င်း၏အပေါ်တွင် ဖန်ပုလင်း အနည်းငယ်နှင့် ကျော်ကြားသူများ၏ ဓာတ်ပုံများ ရှိနေသည်။ ထိုဖန်ပုလင်းများထဲတွင် အနီရောင်နှင့် အစိမ်းရောင် ဝီစကီများနှင့် အခြားသော အရက်များ ရောနှောလျက် ရှိနေသည်။

ဘားဆိုင်ပိုင်ရှင်က ထိပ်ပြောင်ပြောင်နှင့် အမျိုးသားတစ်ဦး ဖြစ်ပြီး သူ၏ လက်များကို ရင်ဘတ်ပေါ်တွင် ပိုက်ထားသည်။ သူသည် မြင်းမျက်နှာကဲ့သို့ ရှည်မြောမြော မျက်နှာကို ပိုင်ဆိုင်ထားပြီး သေးငယ်သော မျက်လုံးတစ်စုံက စိမ်းသက်နေသော ရှီယန် ကို သတိကြီးစွာဖြင့် စိုက်ကြည့်နေသည်။ ရှီယန် ကောင်တာဆီသို့ လျှောက်လှမ်းသွားပြီး လိပ်ထားသော ၅ ဒေါ်လာတန် တစ်ရွက်ကို သဘာဝကျကျ ထုတ်ယူကာ စိတ်မရှည်သော လေသံဖြင့် ပြောကြားလိုက်သည် ။

ဟေး... ဆိုင်ရှင်၊ ငါ့ကို ဘီယာတစ်ခွက် ပေးစမ်း။

ဘားဆိုင်ပိုင်ရှင်က ပိုက်ဆံကို ယူလိုက်ပြီး သူ၏ ကျွမ်းကျင်လှသော လက်များဖြင့် ဘီယာခွက်ကြီးတစ်ခွက်ကို ငှဲ့ပေးရင်း သူ၏ မျက်နှာအမူအရာက အနည်းငယ် ပြေလျော့သွားကာ တည်ငြိမ်စွာ ပြန်လည် ဖြေကြားလိုက်သည် ။

ငါနာမည်က မာတင်ပါ။အားပေးမှုအတွက် ကျေးဇူးပါပဲ။

ရှီယန် ဘီယာကို တစ်ငုံ သောက်လိုက်ရင်း သူ၏ ပတ်ဝန်းကျင်ကို လှည့်ပတ်ကြည့်ရှုလိုက်သည်။ လူ ၅-၆ ယောက်ခန့် စုဝေးနေကြသည်ကို သူ သတိပြုမိလိုက်သည်။ သူတို့ထဲမှ အများစုမှာ လောင်းကစားလုပ်နေကြခြင်း ဖြစ်ပြီး ပန်းပွင့်ပုံစံပါ‌သောအဝတ်အစားများ ဝတ်ဆင်ထားသော အမျိုးသမီး နှစ်ဦးက ဧည့်သည်များကို ဖျော်ဖြေရန်အတွက် ဟိုဟိုဒီဒီ လျှောက်လှမ်းနေကြသည်။ ဘီယာခွက်များကို တည်ခင်းခြင်းနှင့် သိမ်းဆည်းခြင်းအပြင် ၎င်းတို့သည် ဖောက်သည်များထံမှ မုန့်ဖိုးငွေများ ရရှိရန်အတွက် ၎င်းတို့၏ နက်ရှိုင်းလှသော ရင်သားအစုံကို အသုံးချနေကြသည်။

ရှီယန် လှည့်ပတ်ကြည့်ရှုရင်း သူတို့၏ လောင်းကစားနည်းများကို ပိုမို ရှင်းလင်းစွာ နားလည်သဘောပေါက်သွားခဲ့သည်။ သူသည် လူစုတစ်ခု၏ ဘေးတွင် ဝိုင်းရံကာ သူတို့နှင့်အတူ အော်ဟစ်အားပေးရင်း ဝိုင်းထဲသို့ ရောနှောဝင်ရောက်သွားခဲ့ပြီး သူ၏ ကုတ်အင်္ကျီထဲမှ ၅ ဒေါ်လာတန်ကို ထုတ်ယူလိုက်သည်။ ယခုအကြိမ် လောင်းကြေးက ၅ ဒေါ်လာမျှသာ ဖြစ်သော်လည်း ရှီယန် ၏ နှလုံးသားထဲတွင်မူ အနည်းငယ် စိုးရိမ်စိတ်များနှင့် အနိုင်ရလိုသော ပြင်းပြ‌နေသည့် ဆန္ဒတစ်ခု ဖြစ်ပေါ်နေသည်၊ အကြောင်းမှာဒီ‌ငွေပမာဏက သူ၏ လက်ကျန်‌ငွေဖြစ်သောကြောင့် ဖြစ်သည်။

ရှီယန် ၏ မြင့်မားလှသော အာရုံခံစားမှုက အလွန် အကျိုးရှိကြောင်း ထပ်မံ သက်သေပြနိုင်ခဲ့သည်။ ၅ ဒေါ်လာက ၁၀ ဒေါ်လာ ဖြစ်လာခဲ့ပြီးနောက် သူ ၃ ဒေါ်လာ ပြန်လည် ရှုံးနိမ့်ခဲ့ကာ မိနစ် ၂၀ အကြာတွင်မူ သူ၏ ၅ ဒေါ်လာက ၆ ဆခန့် မြင့်တက်သွားခဲ့ပြီ ဖြစ်သည်။ ထို့နောက် ရှီယန် သည် တက္ကဆက်စ် ပိုကာ ကစားနေသော အခြား လောင်းကစားဝိုင်းတစ်ခုသို့ ပြောင်းလဲသွားခဲ့သည်။ ပုံမှန်အားဖြင့် ဤကစားနည်းက နိုင်ခြေထက် ရှုံးခြေက ပိုမို မြင့်မားသော်လည်း တစ်ပွဲချင်းစီ၏ အနိုင်ရရှိမှုက ရှုံးနိမ့်မှုပမာဏထက် များစွာ သာလွန်လှရာ နာရီဝက်မျှအကြာတွင် သူ၏ အရင်းအနှီးက ဂဏန်း ၄ လုံးအထိ မြင့်တက်သွားခဲ့ပြီး သူ၏ ပတ်ဝန်းကျင်ရှိ လောင်းကစားသမားများအားလုံးမှာ အလွန် ရုပ်ဆိုးလှသော မျက်နှာအမူအရာများ ဖြစ်ပေါ်နေကြသည်။ ဧကန်မုချပင် ရှီယန် ၏ အကြည့်ကလည်း အခြေအနေနှင့်အညီ ပြောင်းလဲသွားခဲ့ပြီ ဖြစ်သည်။

"ဖူးဟောက်စ် " ရှီယန် ၏ လက်က သူ၏ ပြိုင်ဘက်များကို ထပ်မံ ဖျက်ဆီးပစ်လိုက်ပြန်ရာ ဤအခိုက်အတန့်တွင် လူအုပ်ကြီးတစ်ခုက ဤလောင်းကစားဝိုင်း၏ ဘေးတွင် စတင် စုဝေးလာကြတော့သည်။ အထူးသဖြင့် ရှီယန် ၏ ဘယ်ဘက်နှင့် ညာဘက်တွင် မသိမသာ ရပ်တန့်နေသော သန်မာထွားကျိုင်းလှသည့် လူမိုက်နှစ်ဦး ရှိနေပြီး ၎င်းတို့၏ ကြီးမားလှသော လက်မောင်းများပေါ်တွင် အနက်ရောင် တက်တူးများကို ပြသထားကြသည်။ ၎င်းတို့သည် မနေ့ညက လူတစ်ယောက်ကို သေလုမြောပါး ရိုက်နှိပ်ခဲ့သည့်အကြောင်းကို အချင်းချင်း စကားပြောဆိုဟန် ဆောင်နေကြသော်လည်း အမှန်တကယ်တွင်မူ ရှီယန် ကို သွယ်ဝိုက်သောနည်းဖြင့် ဖိအားပေးရန် ကြိုးစားနေကြခြင်း ဖြစ်သည်။

လက်ရှိတွင် ရှီယန် က များစွာ အနိုင်ရရှိထားပြီး ရှုံးနိမ့်မှုက နည်းပါးလှသည်။ မုတ်ဆိတ်မွေး ခပ်ပါးပါးနှင့် လူမိုက်ငယ်တစ်ဦးက ကောင်းဘွိုင်ဦးထုပ်ကို ဝတ်ဆင်ထားပြီး ရှီယန် ၏ ရှေ့တည့်တည့်တွင် ထိုင်နေကာ သူ၏ ရှေ့မှောက်တွင် နေရာလွတ်တစ်ခုသာ ကျန်ရှိတော့သည်အထိ အရာအားလုံးကို လုံးဝ ရှုံးနိမ့်ထားခဲ့ပြီး ဖြစ်သည်။ သို့သော်လည်း ဤလူမိုက်ငယ်သည် သူ၏ ကိုယ်ပိုင် အကျပ်အတည်းကို သတိမပြုမိသကဲ့သို့ လောင်းကစားလုပ်ခြင်းကို မိုက်မိုက်ကန်းကန်း ဆက်လက် ပြုလုပ်နေရင်း အကျယ်ကြီး အော်ပြောလိုက်သည် ။

ဒေါ်လာ ၅၀၀

ရှီယန် ပခုံးနှစ်ဖက်ကို တွန့်လိုက်ရင်း စိတ်မပါသော လေသံဖြင့် ပြောကြားလိုက်သည် ။

မင်းရဲ့ ငွေသားကို အရင်ဆုံး ပြစမ်း။

မုတ်ဆိတ်မွေး ခပ်ပါးပါးနဲ့လူငယ်က မော့ကြည့်လိုက်ပြီး ယုတ်မာစွာ ပြုံးလိုက်သည် ။

မင်းအနေနဲ့ သွေးစွန်းသော ဂျက်ခ် ကို မမှတ်မိပုံရဘူးပဲ။ ကိစ္စမရှိပါဘူး၊ ငါ့မှာ ငွေသားမရှိပေမယ့် ငါ့ရဲ့ လက်ချောင်း နှစ်ချောင်းကို ပေါင်နှံမယ်။

ပြောပြီးနောက် သူသည် သူ၏ သားရေဖိနပ်ထဲမှ တဖျတ်ဖျတ် တောက်ပနေသော ဓားမြှောင်တစ်လက်ကို ဆွဲထုတ်ကာ စားပွဲပေါ်သို့ ဝုန်းခနဲ စိုက်ချလိုက်တော့သည်။