အပိုင်း (၇) - အပြင်စည်းပြိုင်ပွဲကြီး

တိမ်ပြာဂိုဏ်း၏ ဗဟိုကွင်းပြင်ကျယ်ကြီးသည် ယနေ့တွင် လူပင်လယ်ကြီးသဖွယ် စည်ကားဆူညံနေသည်။ အပြင်စည်းတပည့် ထောင်ချီသည် ကွင်းပြင်ပတ်ပတ်လည်ရှိ ကျောက်စိမ်းခုံတန်းများတွင် ရင်တမမဖြင့် နေရာယူထားကြပြီး၊ ကွင်းပြင်၏ အလယ်တွင်မူ ကျောက်စိမ်းသွေးကျောက်များဖြင့် တည်ဆောက်ထားသည့် ခန့်ညားထည်ဝါလှသော တိုက်ပွဲစင်မြင့်ကြီး ရှိနေသည်။

စင်မြင့်၏ အထက် ကောင်းကင်ယံတွင် ရစ်ဝဲနေသော တိမ်တိုက်ဖြူကြီးတစ်ခုပေါ်၌ တိမ်ပြာဂိုဏ်း အပြင်

စည်း၏ အာဏာအရှိဆုံး အကြီးအကဲများအဖွဲ့က ခန့်ညားထည်ဝါစွာ နေရာယူထားကြသည်။

အလယ်ဗဟို အမြင့်ဆုံးခုံတွင် ထိုင်နေသူကား အပြင်စည်းတစ်ခုလုံးကို ချုပ်ကိုင်ထားသည့် အကြီးအကဲချုပ် မူရုံထျန်း ဖြစ်သည်။ သူသည် ကျင့်ကြံခြင်းအဆင့်တွင် အောက်ခြေအဆင့်များဖြစ်သော ချီစုဆောင်းခြင်း၊ ချီသန့်စင်ခြင်းတို့ကို လွန်မြောက်ကာ အမြုတေတည်ဆောက်ခြင်းအဆင့် ၉ အထိ ရောက်ရှိထားသူဖြစ်သည်။ သူ့ပတ်ဝန်းကျင်ရှိ လေထုမှာပင် စွမ်းအားများကြောင့် လှိုင်းထနေသကဲ့သို့ ရှိသည်။

သူ့ဘေးတစ်ဖက်တစ်ချက်တွင်မူ ဂိုဏ်း၏ အရေးပါသော ခန်းမဆောင်အသီးသီးကို အုပ်ချုပ်သည့် အကြီးအကဲကြီးများ ဝန်းရံထိုင်နေကြသည်။ ပြိုင်ပွဲကြီးကြပ်ရေးမှူးဖြစ်ပြီး စည်းကမ်းထိန်းသိမ်းရေးခန်းမကို ကိုင်တွယ်

ရသော အမြုတေတည်ဆောက်ခြင်းအဆင့် ၅ ရှိသည့် အကြီးအကဲ မိုချန် ၊ ၎င်းထက် တစ်ဆင့်မြင့်ကာ အဆင့် ၆ အထိ ရောက်ရှိထားသည့် ဓားခန်းမဆောင် အကြီးအကဲ ဖန်ကျိ တို့အပြင်၊ ဆေးလုံးခန်းမဆောင် အကြီးအကဲ ဟန်ပင်း (အမြုတေတည်ဆောက်ခြင်းအဆင့် ၅) နှင့် မစ်ရှင်ခန်းမဆောင် အကြီးအကဲ ဝူချန် 

(အမြုတေတည်ဆောက်ခြင်းအဆင့် ၆) တို့လည်း စုံစုံလင်လင် တက်ရောက်ကာ ပါရမီရှင်အသစ်များကို အကဲခတ်ရန် စောင့်ကြည့်နေကြသည်။ ဤမျှ စွမ်းအားကြီးမားလှသော အကြီးအကဲအဖွဲ့ကြီး၏ ဖိအားကြောင့် အောက်ခြေရှိ တပည့်များမှာ လေပင် ဝဝမရှူရဲကြချေ။

ထိုအကြီးအကဲကြီးများ၏ အောက်ခြေ၊ စင်မြင့်ဘေးက ခန့်ညားသော ခုံတန်းတစ်န်းတွင်မူ အပြင်စည်း ထိပ်သီးဆယ်ဦးက မောက်မာဝင့်ကြွားစွာ ထိုင်နေကြသည်။ ၎င်းတို့ထဲတွင် အပြင်စည်း၏ ဘုရင်ဟု သတ်မှတ်ခံထားရပြီး အပြင်စည်း၏ အမြင့်ဆုံးအတားအဆီးဖြစ်သည့် ချီစုဆောင်းခြင်းအဆင့် ၉ အထိ ရောက်ရှိနေသည့် နံပါတ် ၁ ပါရမီရှင် ယီမင်း က အလယ်တွင် ထိုင်နေပြီး၊ လင်

ဖုန်း၏ ရန်သူဟောင်းဖြစ်သူသော ချီစုဆောင်းခြင်းအဆင့် ၆ ပြီးပြည့်စုံခြင်းအဆင့်သို့ ရောက်ရှိနေသည့် နံပါတ် ၁၀ နေရာက ကျောက်လုံ ကတော့ တံတွေးတစ်ထွေးထွေးဖြင့် စောင့်ဆိုင်းနေသည်။

လူအုပ်ကြီးထဲတွင်မူ လင်ဖုန်း၏ တစ်ဦးတည်းသော သူငယ်ချင်းဖြစ်သူ ဝတ်စုံပြာနှင့် လုချန် သည် လက်ဖဝါးထဲ ချွေးပြန်နေအောင် စိုးရိမ်နေမိသည်။ သူသည် လင်ဖုန်းကို လူအုပ်ထဲတွင် လိုက်ရှာရင်း စိတ်ပူစွာ တီးတိုးရေရွတ်နေမိသည်။

"လင်ဖုန်း... မင်း ဘယ်ရောက်နေတာလဲ။ ဒီနေ့ ကျောက်လုံက မင်းကို သတ်ဖို့ စောင့်နေတာ... မလာတာ ပိုကောင်းလိမ့်မယ်"

ထိုစဉ် ပြိုင်ပွဲကြီးကြပ်ရေးမှူး အကြီးအကဲ မိုချန်က လေထဲမှ ဝဲပျံဆင်းသက်လာပြီး ၎င်း၏ ချီစွမ်းအင်ကို သုံး၍ ကြေညာလိုက်သည်။

"ပြိုင်ပွဲ စတင်မယ်...။ စိန်ခေါ်လိုသူ မည်သူမဆို ထိပ်သီး ၁၀ ယောက်ထဲမှ နှစ်သက်ရာ တစ်ဦးကို တိုက်ရိုက် စိန်ခေါ်ခွင့်ရှိတယခ။ ရှုံးတဲ့သူက သူ့နေရာကို ဖယ်ပေးရမယ်!"

"ဟက်... ဘယ်သူမှ မလာရဲကြဘူးလား။ သတ္တိမရှိတဲ့ အမှိုက်တွေပဲ" ကျောက်လုံက ခုံတန်းမှ ဝုန်းခနဲ မတ်တတ်ရပ်ကာ အောက်ကလူများကို လှောင်ပြောင်လိုက်သည်။ ထို့နောက် ၎င်းက လူအုပ်ထဲသို့ စိုက်ကြည့်ရင်း အော်ဟစ်လိုက်သည်။ "လင်ဖုန်း... မင်း ဘယ်မှာ ပုန်းနေလဲ။ ထွက်လာစမ်း... ငါ ကျောက်လုံ မင်းကို အမှုန့်ကြိတ်ပြမယ်!"

"မင်းက သေဖို့အတွက် ဒီလောက်တောင် အလောတကြီး ဖြစ်နေတာလား..."

အေးစက်လှသော အသံတစ်သံနှင့်အတူ လူအုပ်ကြီးသည် ပင်လယ်ရေလှိုင်းများကဲ့သို့ ဘေးဘယ်ညာသို့ အလိုအလျောက် ကွဲထွက်သွားခဲ့သည်။ လူအုပ်ကြားမှ ဝတ်စုံဖြူဝတ်ဆင်ထားပြီး လက်ထဲတွင် အနှီးပတ်ထားသည့် အမည်းရောင် သံဓားကျိုးတစ်လက်ကို ကိုင်ဆောင်ကာ ခြေလှမ်းမှန်မှန်ဖြင့် လျှောက်လှမ်းလာသူမှာ လင်ဖုန်း ပင် ဖြစ်သည်။

"လင်ဖုန်း!" လုချန်တစ်ယောက် လင်ဖုန်းကို မြင်လိုက်ရသဖြင့် အလန့်တကြား အော်မိသွားသည်။ ၎င်းက လင်ဖုန်းကို လှမ်းတားရန် ပြင်သော်လည်း လင်ဖုန်း၏ ကိုယ်ပေါ်က ထွက်ပေါ်နေသော မမြင်ရသည့် အရှိန်အဝါကြောင့် ခြေလှမ်းများ တုံ့ဆိုင်းသွားရသည်။ လင်ဖုန်းက လုချန်ကို ကြည့်ကာ သက်သာရာရစေမည့် အပြုံးတစ်ခုကို ပြလိုက်ပြီး စင်မြင့်ထက်သို့ အေးအေးလူလူ တက်

လှမ်းသွားခဲ့သည်။

တိမ်တိုက်ပေါ်ရှိ အပြင်စည်းအကြီးအကဲချုပ် မူရုံထျန်းသည် လင်ဖုန်းကို မြင်သည်နှင့် မျက်ခုံးပင့်သွားသည်။ တခြား ဆေးလုံးခန်းမဆောင်နှင့် မစ်ရှင်ခန်းမဆောင်က အကြီးအကဲများလည်း တစ်ယောက်ကိုတစ်ယောက် ကြည့်ကာ အံ့ဩကုန်ကြသည်။

"ဒီကောင်လေး... တစ်လအတွင်းမှာပဲ ချီစုဆောင်းခြင်းအဆင့် ၆ ကို ရောက်သွားတာလား။ ဘယ်လို သိပ်သည်းပြီး နက်ရှိုင်းတဲ့ ချီစွမ်းအင်မျိုးလဲ။ သာမန် ချီစုဆောင်းခြင်းအဆင့်နဲ့ လုံးဝမတူဘူး"

"လင်ဖုန်း... မင်းရဲ့ ကျင့်ကြံမှုက အဆင့် ၆ ရောက်လာတာကို ငါအသိအမှတ်ပြုပါတယ်။ ဒါပေမဲ့ ငါ့ရဲ့ အလတ်တန်းစား ဝိညာဉ်လက်နက် ကျောက်စိမ်းနဂါးဓားအောက်မှာတော့ မင်းက ဒူးထောက်ရမှာပဲ။ သေစမ်း!" 

ကျောက်လုံသည် မြေကမ္ဘာအဆင့်၏ အစပြုအဆင့်

ဖြစ်သော မြေငလျင်ဓားကွက်ကို ထုတ်ဖော်ကာ လင်ဖုန်းထံသို့ ဝုန်းခနဲ ပြေးဝင်လာသည်။ ပြင်းထန်သော ဓားချီများက လင်ဖုန်းကို ဝါးမြိုရန် အရှိန်အဟုန်ဖြင့် ပြေးဝင်သွားသည်။

လင်ဖုန်းသည် ရွေ့ပင်မရွေ့ဘဲ တည်ငြိမ်စွာ မတ်တတ်ရပ်နေဆဲဖြစ်သည်။ ဓားချက်က သူ့ဦးခေါင်းထံသို့ ရောက်ခါနီး မျက်တောင်တစ်ခတ်အတွင်းမှာပင် လင်ဖုန်းသည် ဧကရာဇ်အဆင့်ရှိသည့် အမြင့်မြတ်ဆုံး ကောင်းကင်ဘုံအလိုတော် ကျင့်စဉ်ကို ခန္ဓာကိုယ်ထဲတွင် ရာနှုန်းပြည့် နှိုးဆွလိုက်သည်။

"ဝုန်း!!"

ရုတ်တရက် လင်ဖုန်း၏ ခန္ဓာကိုယ်မှ ကြောက်မက်ဖွယ်ကောင်းသော ရွှေရောင် ဧကရာဇ်အရှိန်အဝါများ ဝုန်းခနဲ ပေါက်ကွဲထွက်လာရာ တိုက်ပွဲစင်မြင့်တစ်ခုလုံး တုန်ခါသွားခဲ့သည်။ ဓားခန်းမဆောင် အကြီးအကဲ ဖန်ကျိနှင့် ဆေးလုံးခန်းမဆောင် အကြီးအကဲ ဟန်ပင်းတို့ပင် ထိုင်ခုံမှ ဆတ်ခနဲ အတူတူ ထရပ်မိသွားကြသည်။

"ဒါ... ဒါ ဘာကျင့်စဉ်ရဲ့ အရှိန်အဝါလဲ။ ဧကရာဇ်တစ်ပါးလို ဖိအားမျိုးပါလား!"

ပြေးဝင်လာသည့် ကျောက်လုံသည် ကောင်းကင်ဘုံကြီးတစ်ခုလုံးက သူ့အပေါ်သို့ ဖိနှိပ်လိုက်သလိုမျိုး ခံစားလိုက်ရပြီး ၎င်း၏ ဓားအရှိန်အဝါများအားလုံး ချက်ချင်း ကြေမွပျက်စီးသွားခဲ့ရသည်။

"မင်းရဲ့ အဆင့်အတန်းက ငါ့ဓားကို အိတ်ထဲကထုတ်ဖို့တောင်မထိုက်တန်ဘူး... ကောင်းကင်ဖြိုခွဲခြင်း ဓားချက်... သွားစမ်း!"

လင်ဖုန်းသည် လက်ထဲက အမည်းရောင် သံဓားကျိုးကို တစ်ချက်သာ ဝှေ့ယမ်းလိုက်သည်။ ၎င်းသည် ဓားကျိုးမှ နိုးထလာသော ဧကရာဇ်အဆင့်၏ အစပြုအဆင့်ဖြစ်

သည့် ကောင်းကင်ဖြိုခွဲခြင်း ဓားချက် ပင် ဖြစ်သည်။ ဓားကျိုးမှနေ၍ နက်မှောင်ပြီး ကြောက်မက်ဖွယ်ကောင်းလှသော ပေတစ်ရာကျော်ရှည်သည့် ဓားအလင်းတန်းကြီးတစ်ခု ဗြုန်းခနဲ ထွက်ပေါ်လာပြီး ဟိန်းဟူးသွားခဲ့သည်။

လင်ဖုန်း၏ ဓားကျိုးသည် ပျက်စီးနေသော်လည်း ထိပ်သီး ဝိညာဉ်လက်နက်အဆင့် ဖျက်ဆီးအား ရှိနေသည်မဟုတ်ပါလား။

"ကလင်... ဖလတ်!"

ကျောက်လုံ၏ အလတ်တန်းစား ဝိညာဉ်ဓားသည် ကောက်ရိုးတစ်ပင်ကဲ့သို့ အလယ်ကနေ နှစ်ပိုင်း ပြတ်တောက်သွားခဲ့ရုံတင်မက၊ ပြင်းထန်လှသော ဓားအလင်းတန်းသည် ကျောက်လုံ၏ ခန္ဓာကိုယ်ကို ဖြတ်သန်းသွားခဲ့သည်။

"ဗြုန်း... ဝုန်း!"

ကျောက်လုံသည် ပါးစပ်မှ သွေးများ ပန်းထွက်ကာ စင်မြင့်အောက်သို့ လွင့်စဉ်ကျသွားပြီး ၎င်း၏ ရင်ဘတ်တွင် နက်ရှိုင်းလှသော ဓားဒဏ်ရာကြီးတစ်ခုနှင့်အတူ ချက်ချင်းပင် အသက်ပျောက်သွားလေတော့သည်။ စင်မြင့်ကျောက်ပြားကြီးသည်လည်း လင်ဖုန်း၏ ဓားချက်ကြောင့် အလယ်ကနေ နှစ်ခြမ်းကွဲသွားခဲ့ရသည်။

တစ်ခုပြင်လုံး သုသာန်တစပြင်ကဲ့သို့ တိတ်ဆိတ်သွားခဲ့ရသည်။

သူငယ်ချင်းဖြစ်သူ လုချန်သည် ပါးစပ်အဟောင်းသားဖြင့် ဆွံ့အေနမိသလို၊ ခုံတန်းပေါ်က ထိပ်သီးကိုးယောက်စလုံးလည်း မျက်လုံးပြူးကုန်ကြသည်။ အထူးသဖြင့် နံပါတ် ၁ ယီမင်း၏ မျက်နှာသည် လုံးဝ တုန်လှုပ်ခြောက်ခြားသွားခဲ့သည်။

လင်ဖုန်းကတော့ သွေးစွန်းနေသော ဓားကျိုးကို ပုခုံးပေါ်ထမ်းတင်လိုက်ပြီး ကျန်ရှိနေသည့် အပြင်စည်း ထိပ်သီးကိုးယောက်ကို အေးစက်စွာ ကြည့်ကာ ကြေညာလိုက်သည်။

"တစ်ယောက်ချင်းစီ လာမနေနဲ့တော့... အချိန်ပုပ်တယ်။ အပြင်စည်းရဲ့ နံပါတ် ၁ ကောင် ယီမင်း အပါအဝင် မင်းတို့ ကိုးယောက်စလုံး စင်ပေါ်ကို တစ်ပြိုင်နက်တည်း တက်လာခဲ့ကြစမ်း!"

မောက်မာလှသော လင်ဖုန်း၏ ကြေညာချက်ကြောင့် တစ်ကွင်းပြင်လုံးရှိ လူထောင်ချီနှင့် တိမ်တိုက်ပေါ်က အကြီးအကဲများအဖွဲ့စလုံး မှင်သက်အံ့ဩကုန်ကြတော့သည်။