အခန်း (၉၅) ခုခေတ်လူလိမ်တွေက ညီကိုချင်းတောင် လိမ်နေကြပြီလား...

​ကျန်းယဲ့တွင် ဖောက်သည်ရှာရန် နှစ်ရက် အချိန်ရသေးသဖြင့် အွန်လိုင်းတွင် လူစိတ်ဝင်စားမှု ရအောင်လုပ်ရန် မလောချေ။

​ထို့အပြင် မင်မင်းဆက်နှင့် ပတ်သက်သော ဗီဒီယို အထောက်အထားများ မရှိသော်လည်း ကြိုတင် ကြော်ငြာရန် မလိုအပ်တော့ပေ။

​သို့သော်လည်း စနစ်က အွန်လိုင်းအရောင်းလမ်းကြောင်းများကို ဖွင့်ပေးလိုက်ကတည်းက ကြီးမားသည့် အစီအစဉ်တစ်ခု ရှိနေမည်ဟု ကျန်းယဲ့ အမြဲတမ်း ခံစားနေရ၏။

​'အကိုစနစ်... မင်း ဘာတွေ ကြံစည်နေတာလဲ....'

​ကျန်းယဲ့က အချိန်ကို တစ်ချက်ကြည့်လိုက်၏။ 

၁၀း၄၀ နာရီ...

​အချိန်လင့်နေပြီဖြစ်၍ မျက်နှာသစ်၊ သွားတိုက်ပြီး အိပ်ရာဝင်ရန် အချိန်ရောက်ချေပြီ။

​'ငါ့ရဲ့ အသက်ရှင်သန်မှုက ပိုအရေးကြီးတယ်....'

​ဖုန်ချန် အငှားအိမ်ရာ....

​ချန်မော့ဟာ ကွန်ပျူတာရှေ့တွင် ထိုင်နေပြီး ဟီးရိုးများ၏တိုက်ပွဲဂိမ်းအုပ်စု၏ ချတ်ဝင်းဒိုးက တောက်လျှောက် လင်းလက်နေခဲ့သည်။

​[ဂရုအက်ဒမင်] အိုကေ - ကျစ်.... တစ်စောင်မှ မရလိုက်ဘူး..... ထန်မင်းဆက်အဖွဲ့ လက်မှတ် ရလိုက်တဲ့သူ ရှိလား....

​[အက်ဒမင်] ဘစ်ဘတ် - ဘယ်သူမှ ဝယ်မှာမဟုတ်ဘူး ထင်နေတာ... ဒါပေမယ့် စက္ကန့်ပိုင်းအတွင်း ရောင်းကုန်သွားတယ်....  ဒီလိုမျိုးကို ယုံတဲ့ အရူးတွေက ဘယ်သူတွေလဲကွ.....

​[အဖွဲ့ဝင်] ဘရားသားလင်း - တခြားလူတွေလည်း ငါတို့လိုပဲ အပျော်သဘော ဝင်လုကြတာများလား.....

​[အဖွဲ့ဝင်] အာဖေး - @ဆိုင်းလန့်စ်အစ်စ်ဂိုးဒင်း.... အစ်ကိုမော့... ခင်ဗျား အောင်မြင်သွားလား.....

​ချန်မော့က လက်ထဲရှိ ကြေးပြားအကြွေစေ့ကို ချလိုက်ပြီး စာတစ်ကြောင်း ရိုက်လိုက်၏။

​[ဆိုင်းလန့်စ်အစ်စ်ဂိုးဒင်း] - ငါ ရလိုက်တယ်.....

​ဂရုချတ်တစ်ခုလုံး ချက်ချင်း ပေါက်ကွဲသွားခေသည်။

​[ဂရုအက်ဒမင်] အိုကေ - ဟာ.... လက်မြန်တာ လျှပ်စီးပဲ....

​[အက်ဒမင်] ဘစ်ဘတ် - မိုက်တယ်.... လိမ်ခံရမယ့်သူ တစ်ယောက် လျော့သွားတာပေါ့....

​[အဖွဲ့ဝင်] အာဖေး - အစ်ကိုမော့က ကုသိုလ်တွေ အများကြီး လုပ်လိုက်တာပဲ....

​[အဖွဲ့ဝင်] ဘရားသားလင်း - အစ်ကိုမော့ နောက်ထပ် ကုသိုလ်တစ်ခု လုပ်လိုက်ပြန်ပြီဗျာ.....

​သူ့ကို အားပေးနေသည်များကို ကြည့်ရင်း ချန်မော့ ရင်ထဲ ဆို့နင့်သွားရလေသည်။

​သူက ဂရုထဲတွင် စာသုံးကြောင်းကို လျင်မြန်စွာ ပို့လိုက်၏။

​[ဆိုင်းလန့်စ်အစ်စ်ဂိုးဒင်း] - ငါ အားလုံးကို ရှင်းပြချင်တာတစ်ခု ရှိတယ်....

​[ဆိုင်းလန့်စ်အစ်စ်ဂိုးဒင်း] - ရီယဲ့ ခရီးသွားအေဂျင်စီက လိမ်လည်တာ မဟုတ်ဘူး... ကျန်းယဲ့ကလည်း လိမ်လည်သူ မဟုတ်ဘူး။

​[ဆိုင်းလန့်စ်အစ်စ်ဂိုးဒင်း] - အချိန်ခရီးသွားတာ တကယ်ပဲ.... အန်းရှီးတပ်မတော်ကလည်း တကယ်ပဲ... ပြီးတော့ အရာအားလုံးကလည်း တကယ်အစစ်မှန်ပဲ....

​[ဆိုင်းလန့်စ်အစ်စ်ဂိုးဒင်း] - ငါ အရင်က အမြင်ကျဉ်းပြီး ဗဟုသုတ နည်းခဲ့တယ်... တစ်ဖက်လူကို အထင်လွဲခဲ့မိတယ်။ မင်းတို့ ငါ့ကို ယုံရင် ရီယဲ့ ခရီးသွားအေဂျင်စီရဲ့ အကောင့်အောက်မှာ ကံစမ်းကြည့်လို့ရတယ်... ပြီးရင် ငါပြောတာတွေက အမှန်ဆိုတာ မင်းတို့ သိလာလိမ့်မယ်။

​ဂရုချတ်မှာ ရုတ်တရက် တိတ်ဆိတ်သွားချေသည်။

​စာကြောင်း လေးကြောင်းက ချတ်ဝင်းဒိုးတွင် ရုတ်တရက် ပေါ်လာပြီး လူတိုင်း၏ ပါးစပ်ကို ပိတ်ပစ်လိုက်သကဲ့သို့ ဖြစ်သွားခဲ့သည်။

ထို့နောက် ​ချန်မော့က ဂရုချတ်ကို ပိတ်လိုက်ပြီး ဖုန်းကို ထုတ်ကာ ကျန်းယဲ့၏ ဖုန်းနံပါတ်ကို ရှာလိုက်၏။

​သူ စာရိုက်လိုက်၊ ပြန်ဖျက်လိုက် လုပ်နေပြီး နောက်ဆုံးတွင် ရိုးရှင်းသော စာတစ်ကြောင်းကိုသာ ပို့လိုက်ပေသည်။

​[ဒါရိုက်တာကျန်း... ကျွန်တော် တောင်းပန်ပါတယ်....]

​ကျန်းယဲ့ အိပ်ရာဝင်ရန် ပြင်နေစဉ် ချန်မော့ထံမှ တောင်းပန်စာ ရုတ်တရက် ဝင်လာသဖြင့် လုံးဝ ကြောင်အမ်းသွားရသည်။

​'ဒီကောင်က ဘာတွေလုပ်ပြီး ငါ့ကို စိတ်ဆိုးအောင် လုပ်ခဲ့လို့လဲ... '

​ကျန်းယဲ့က မေးခွန်းထုတ်သည့် သင်္ကေတတစ်ခုကို ပြန်ပို့လိုက်၏။

​ချန်မော့က မိနစ်အနည်းငယ် အကြာတွင် စာပြန်ပို့လိုက်သည်။

​ကျန်းယဲ့က ရှည်လျားသော စာကြောင်းများကို ဖတ်ပြီးနောက် ဇာတ်လမ်းတစ်ခုလုံးကို အကြမ်းဖျင်း နားလည်သွားရသည်။

​သူက ဂရုမစိုက်စွာဖြင့် ချန်မော့ကို အရေးမစိုက်သည့် အီမိုဂျီတစ်ခု ပြန်ပို့ကာ နှုတ်ဆက်ပြီး အိပ်ရာဝင်သွားလေသည်။

​မည်သို့ပင်ဖြစ်စေ ကိုယ့်အသက်ကို ကယ်တင်ခြင်းက အရေးကြီးဆုံးပဲလေ။

​ကျန်းယဲ့၏ ပြန်စာကို ဖတ်ပြီးနောက် ချန်မော့ အနည်းငယ် သက်ပြင်းချလိုက်နိုင်လေသည်။

ထို့နောက် ​သူက ရေချိုးခန်းထဲသို့ ဝင်သွားလိုက်သည်။ ဆယ်မိနစ်အကြာတွင် ရေချိုးခန်းထဲမှ ပြန်ထွက်လာပြီး စိုနေသော ဆံပင်ကို သုတ်နေစဉ် ဖုန်းက ခုတင်ဘေးစားပွဲပေါ်တွင် တုန်ခါနေဆဲဖြစ်သည်။

​ချန်မော့က ဖုန်းကို ကောက်ကိုင်လိုက်ရာ မျက်နှာပြင်တွင် မဖတ်ရသေးသော မက်ဆေ့ချ် ၉၉ ကျော် စုပုံနေပြီး အားလုံးမှာ ဟီးရိုးများ၏ တိုက်ပွဲ ဂရုမှပင်။

​[ဂရုအက်ဒမင်] အိုကေ - @ဆိုင်းလန့်စ်အစ်စ်ဂိုးဒင်း အစ်ကို... အတည်ပြောနေတာလား....

​[အက်ဒမင်] ဘစ်ဘတ် - ဟာ... အစ်ကိုမော့ အကောင့် အဟက်ခံရတာလား....

​[အဖွဲ့ဝင်] အာဖေး - ဟားဟားဟား.... ဒီနောက်ပြောင်မှုက နည်းနည်း လွန်သွားပြီနော်......

​သူ ရှင်းပြရန် စာရိုက်မည် ပြင်နေစဉ်မှာပင် မျက်စိကျိန်းလောက်သော စာသားများ ဆက်တိုက် ပေါ်လာလေသည်။

​[ချင်လုံ] - အိုး... ငါတို့ရဲ့ လက်မြန်ဘုရင် ပြန်ရောက်လာပြီလား.....

​[ချင်လုံ] - @ဆိုင်းလန့်စ်အစ်စ်ဂိုးဒင်း၊ မင်းနဲ့ ကျန်းယဲ့ ပူးပေါင်းပြီး ညီအစ်ကိုတွေကို ထောင်ချောက်ဆင်ဖို့ လုပ်နေတာလား.... မင်းမှာ လိပ်ပြာလုံစိတ် လုံးဝမရှိတော့ဘူးလားကွ.... 

​[ရှောင်လုံမန်] - ဟုတ်တယ်... ဘာတဲ့... အချိန်ခရီးသွားတယ်ဆိုတဲ့ ဇာတ်လမ်းက ဘာလဲ.... ငါတို့ကို သုံးနှစ်သား ကလေးတွေလို့ ထင်နေတာလားဟ... 

​[ချင်လုံ] - အားလုံးပဲ ကြည့်ကြပါ.... ဒါက ငါတို့ ဂရုရဲ့ အဖွဲ့ဝင်ဟောင်း တစ်ယောက်ပါ။ သူက ကော်မရှင်လေး နည်းနည်းအတွက်နဲ့ ဘာမဆိုလုပ်ရဲလောက်အောင် အရှက်မရှိတဲ့ကောင်ပဲ.....

​ချင်လုံကို မြင်သည်နှင့် ချန်မော့ မျက်မှောင်ကြုတ်သွားရသည်။

​အရွယ်ရောက်ခါစ ကောင်မလေးတစ်ယောက်ကို လိမ်လည်ရာတွင် ကူညီရန် ငြင်းဆန်ခဲ့သဖြင့် သူတို့နှစ်ယောက် အဆင်မပြေ ဖြစ်ခဲ့ကြသည်။

​'ဟက်.... အခု ငါ့ကို အခွင့်အရေးရရင် ကိုက်တော့မယ်ပေါ့လေ...'

​ချန်မော့က သူ့ကို အလိုမလိုက်တော့ဘဲ လက်ချောင်းများက ကီးဘုတ်ပေါ်တွင် လျင်မြန်စွာ ရွေ့လျားသွားခဲ့သည်။

​[ဆိုင်းလန့်စ်အစ်စ်ဂိုးဒင်း] - @ချင်လုံ၊ မင်းကို ထောင်ချောက်ဆင်ရအောင် မင်းဆီမှာ ပိုက်ဆံ ဘယ်လောက်ရှိလို့လဲ။ မင်းကို ငါက ထောင်ချောက်ဆင်ရမယ်ပေါ့ ထွီး...

​[ဆိုင်းလန့်စ်အစ်စ်ဂိုးဒင်း] - ဒါက ယုံနိုင်စရာမရှိဘူးဆိုတာ ငါသိတယ်... ပြီးတော့ မင်းတို့ထဲက အများစုကလည်း အဓိပ္ပာယ်မရှိဘူးလို့ ထင်ကြမှာပဲ...  ရတယ်... ရွှေစစ်ရင် မီးကို မကြောက်ဘူးလေ.... အချိန်က စကားပြောသွားလိမ့်မယ်။ အသင်းဖော်ဟောင်း တစ်ယောက်အနေနဲ့ ငါ့ရဲ့ အကျင့်စရိုက်ကို မင်းတို့ ယုံကြည်တယ်ဆိုရင် ဘာလို့ တစ်ခါလောက် မစမ်းကြည့်တာလဲ....

​ရီယဲ့ ခရီးသွားအေဂျင်စီသည် ယခုမှ စတင်နေခြင်းသာဖြစ်ပြီး နာမည်ကြီးလာသည်နှင့် ဤကဲ့သို့ အခွင့်အရေးမျိုး ထပ်ရရန် မဖြစ်နိုင်တော့ကြောင်း ချန်မော့ ကောင်းစွာ သိပေသည်။

​သူတို့အားလုံးက သူနှင့်အတူ ဂိမ်းဆော့ဖော်ဆော့ဖက် သူငယ်ချင်းကောင်းများ ဖြစ်သောကြောင့် သူက စေတနာဖြင့် သတိပေးခြင်းသာ။

​ယုံသည်ဖြစ်စေ၊ မယုံသည်ဖြစ်စေ သူတို့၏ ကံတရားအပေါ်တွင်သာ မူတည်ချေသည်။

​မည်သို့ပင်ဆိုစေ အတင်းအကျပ် ခူးဆွတ်သော အသီးသည် မချိုမြိန်သကဲ့သို့ နွားကို ရေအတင်းတိုက်၍လည်း မရချေ။

​ဤစာကို ပို့ပြီးနောက် သူက ဂရုချတ်မှ ထွက်လိုက်ပြီး ဖုန်းကို ခုတင်ပေါ်သို့ ပစ်တင်လိုက်၏။

​အရင်ကဆိုလျှင် ချန်မော့သည် ချင်လုံနှင့် အပြိုင်အဆိုင် ဖြစ်ရန် သေချာပေါက် အားထုတ်ပေလိမ့်မည်။

​သို့သော် ယနေ့တွင် အကြောင်းပြချက် တစ်စုံတစ်ရာကြောင့် သူ စိတ်ဝင်စားမှုကို အနည်းငယ်မျှပင် မရှာဖွေနိုင်တော့။

​၎င်းက လွန်ခဲ့သော နှစ်ပေါင်းတစ်ထောင်က အနောက်တိုင်းဒေသသို့ ခရီးစဉ်တစ်ခုမျှသာ ဖြစ်ပြီး နားထင်၌ ဆံပင်ဖြူနေသော စစ်သည်တစ်စုနှင့် တွေ့ဆုံခြင်းမျှသာ ဖြစ်သော်လည်း သူ၏ ရင်ထဲမှ အချို့သော စွဲလမ်းမှုများက ရုတ်တရက် မှေးမှိန်သွားခဲ့ရသည်။

​ချန်မော့ တိတ်ဆိတ်သွားသော်လည်း ချင်လုံကမူ သူ့ကို အလွတ်မပေးသေးဘဲ ဂရုချတ်ထဲတွင် မက်ဆေ့ချ်များ ဆက်တိုက် ပို့နေဆဲပင်။

​[ချင်လုံ] - @ဆိုင်းလန့်စ်အစ်စ်ဂိုးဒင်း၊ သေချင်ယောင် ဆောင်နေတာလား...

​[ချင်လုံ] - အပြစ်ရှိသလို ခံစားနေရပြီလား.... မင်းမှာ အဲဒီလောက် စွမ်းဆောင်ရည်ရှိရင် အဲဒီ လိမ်လည်တဲ့ ခရီးသွားလမ်းညွှန်ကို မျက်နှာချင်းဆိုင် ရှင်းဖို့ ခေါ်လာခဲ့လေ....

​...

​မက်ဆေ့ချ်များ ဆက်တိုက် ပေါ်လာသော်လည်း ဂရုချတ်ထဲတွင် လက်အောက်ငယ်သား အနည်းငယ်သာ တုံ့ပြန်ကြပြီး ကျန်သူများမှာ တိတ်ဆိတ်နေကြလေသည်။

​မည်သို့ပင်ဖြစ်စေ ချင်လုံသည် ဤနယ်ပယ်တွင် နာမည်ပျက်ရှိသူ ဖြစ်၏။ သူက ပြဿနာရှာရန်နှင့် ဇာတ်လမ်းဖန်တီးရန် နှစ်သက်ပြီး မည်သူကမျှ သူ့အတွက် အသုံးချခံ လက်နက် မဖြစ်ချင်ကြချေ။

​ချင်လုံ၏ ဖုန်းက တုန်ခါသွားခဲ့သည်။ သူ၏ လက်အောက်ငယ်သား တစ်ယောက်က သူ့ထံ သီးသန့်စာ ပို့လာခြင်းပင်။

​[အစ်ကိုလုံ... ထားလိုက်ပါတော့.... ဂရုထဲမှာ ဘယ်သူမှတောင် ပြန်မပြောကြတော့ဘူး...]

​ချင်လုံက မျက်နှာပြင်ကို စိုက်ကြည့်လိုက်ရာ သူ၏မျက်နှာက ဖြူလျော့သွားပြီးနောက် နီရဲလာကာ နောက်ဆုံးတွင် ဖုန်းကို ဆိုဖာပေါ်သို့ ဆောင့်ချလိုက်လေသည်။

​ချင်လုံသည် တွေးလေလေ ဒေါသထွက်လေလေဖြစ်ပြီး သူ၏ဒေါသကို မျိုမချနိုင်တော့ချေ။

​ဒီဂရုမှာ အဆင်မပြေရင် တခြားဂရုတွေမှာ လုပ်လို့မရဘူးလို့ ဆိုလိုတာလား။

​ချင်လုံက သုံးပြည်ထောင် ဟီးရိုးများဂရု၏ ချတ်အင်တာဖေ့စ်ကို စခရင်ရှော့ ရိုက်ယူလိုက်ပြီးနောက် ၎င်းတို့ကို တခြား ဂိမ်းဂရုများသို့ ပေးပို့လိုက်၏။

​[ချင်လုံ] - ညီအစ်ကိုတို့ကို ရယ်စရာတစ်ခု ပြောပြချင်လို့။ စခရင်ရှော့ကို ကြည့်လိုက်— [ချတ်မှတ်တမ်း စခရင်ရှော့]

​[ချင်လုံ] - ဟားဟား.... တကယ်ပဲ အချိန်ခရီးသွားတာကို ယုံတဲ့သူ ရှိနေသေးတာလား..... ဒီအရူးက သူ့ညီအစ်ကိုတွေကို လှည့်စားဖို့ ဇာတ်လမ်းတစ်ခု ဖန်တီးခဲ့တာ.... တကယ်ကို ယုတ်မာလွန်းတယ်။

​[ရှောင်လုံမန်] - ဟုတ်တယ်.... ဒီခေတ်မှာ လိမ်လည်သူတွေက အရမ်း ကောက်ကျစ်တယ်..... သူတို့ ညီအစ်ကိုအရင်းတွေကိုတောင် လိမ်သေးတယ်ကွာ...

​[အဖွဲ့ဝင် က] - ဟားဟားဟား.... ဒီခေတ်မှာ ဒီလိုဟာမျိုးကို ယုံတဲ့သူတွေ ရှိသေးတာလား....

​[အဖွဲ့ဝင် ခ] - ဒီလူက ဂိမ်းဆော့တာကို စွဲလမ်းနေတာလား.....

​ဂိမ်းအုပ်စု အမျိုးမျိုးတွင် မက်ဆေ့ချ်များ ဆက်တိုက် ပြန့်နှံ့သွားချေသည်။

​တုံ့ပြန်သူများ ရှိလာသည်ကို မြင်သောအခါ ချင်လုံဟာ ပို၍ပင် မောက်မာလာပြီး ချန်မော့နှင့် ကျန်းယဲ့တို့ ပူးပေါင်းကာ ငွေလိမ်လည်နေကြောင်း ကောလာဟလများပင် စတင် ဖြန့်ဝေလာခဲ့သည်။

​သို့သော်လည်း လူအများစုမှာ ပွဲကြည့်ရန်အတွက်သာ ဝင်ကြည့်နေကြခြင်း ဖြစ်သည်။

​ဤလူများ၏ သဘောတူညီမှုက ချင်လုံကို ယုံကြည်မှု ပေးလိုက်ခြင်း ဖြစ်ကောင်းဖြစ်နိုင်ပြီး သူက ဂုဏ်ယူဝင့်ကြွားစွာဖြင့် ချတ်မှတ်တမ်း စခရင်ရှော့ကို အထွတ်အထိပ်ဘုရင်များ ဖလှယ်ရေးဂရုဟုခေါ်သော အဆင့်မြင့် e-sports ဂရုတစ်ခုသို့ ထပ်တင်လိုက်ပြန်သည်။

​ဤဂရုတွင် ပရော်ဖက်ရှင်နယ် ကစားသမားများနှင့် နာမည်ကြီး စထရင်းမားများ အပြည့်အနှက် ရှိပေသည်။ သူတို့က အဆင့်မြင့် ပြိုင်ပွဲများနှင့် နည်းဗျူဟာပိုင်း ခွဲခြမ်းစိတ်ဖြာမှုများကိုသာ အဓိက ဆွေးနွေးလေ့ရှိပြီး သာမန် စကားစမြည် ပြောဆိုခြင်းမျိုး အလွန်နည်းပါးလှသည်။

​ချင်လုံသည် ပရော်ဖက်ရှင်နယ် လူငယ်သင်တန်းသားအဖြစ် နှစ်နှစ်ကြာ အလုပ်လုပ်ခဲ့ပြီး စီနီယာတစ်ဦး၏ မိတ်ဆက်ပေးမှုကြောင့်သာ ဤဂရုသို့ ဝင်ရောက်နိုင်ခဲ့ခြင်း ဖြစ်၏။

​သူ၏ မသိနားမလည်မှုများ ပေါ်လွင်သွားမည်ကို စိုးရိမ်သဖြင့် ဂရုထဲတွင် စကားပြောသည့်အခါ သူသည် အမြဲတမ်း အလွန်သတိထားလေ့ရှိလေသည်။

​မက်ဆေ့ချ်ပို့ပြီးနောက် မသင့်လျော်ကြောင်း သူ ရုတ်တရက် သတိပြုမိသွားပြီး ပြန်ဖျက်ရန် ပြင်နေစဉ်မှာပင် ပြန်စာတစ်ခု ပေါ်လာခဲ့သည်။

​[လင်းယုန်] - ဟားဟားဟား... ဒီခေတ် လိမ်လည်သူတွေက ဒီလောက်တောင် ခေတ်မီနေပြီလား....

​ထိုပြန်စာကြောင့် ချင်လုံ ချက်ချင်း တက်ကြွသွားရသည်။

​တခြား ဂရုများတွင် မောက်မာပြီး ဗိုလ်ကျတတ်သော်လည်း ဤနေရာတွင်မူ သူက အထူးတလည် နှိမ့်ချနေလေ့ရှိပေသည်။