အခန်း (၇၅) ရေပန်းစားမှုက အနေတော်ပဲ
ကျန်းဟွိုင်မင်ကလည်း ဝင်ပြောလာသည်။ [အဘိုးကြီးကျိုး ပြောတာမှန်တယ်။ မစိုးရိမ်ကြနဲ့။ အရေးတကြီး လုပ်ရမှာက ရှောင်ကျန်းကို လူထုအမြင် ထိန်းချုပ်နိုင်အောင် ကူညီပေးဖို့ပဲ...]
လင်ရူ - [အဆင့်သုံးဆင့် ချဉ်းကပ်ဖို့ ကျွန်မ အကြံပြုချင်တယ်။ ၁။ ညွှန်ကြားရေးမှူးကျန်းရဲ့ အကောင့်မှာ အပြုသဘောဆောင်တဲ့ ကွန်မန့်တွေပေးဖို့ ပရိသတ်တွေကို စုစည်းမယ်။ ၂။ အထောက်အထားတွေ စုဆောင်းပြီး ဥပဒေကြောင်းအရ အရေးယူမယ်။ ၃။ ဒီကိစ္စရဲ့ နောက်ကွယ်မှာ ဘယ်သူရှိနေလဲဆိုတာကို ရှာဖွေမယ်...]
ကျောက်ဟုန်က စာရွက်စာတမ်းတစ်ခုကို တင်လိုက်၏။ [လူထုအမြင်ကို တုံ့ပြန်မယ့် အစီအစဉ်တစ်ခု ကျွန်တော် အခုလေးတင် ပြင်ဆင်ပြီးသွားပြီ... ကျေးဇူးပြုပြီး ကြည့်လိုက်ကြပါ။ အဓိကအချက်က ဆွေးနွေးမှုတွေကို ဗီဒီယိုအကြောင်းအရာဆီ ပြန်လှည့်သွားအောင် လုပ်ဖို့ပဲ...]
အရေးပါအရာရောက်သူကြီးများအားလုံးမှာ အရာရာကို သူတို့ချည်း တစ်ဦးတည်း သိမ်းကျုံးမလုပ်ချင်သော ရိုးသားသူများ ဖြစ်ကြသည်။ သူတို့ဘာသာ ကိုယ်တိုင် ဖြေရှင်းပေးလိုက်လျှင် ကျန်းယဲ့ထံမှ မျက်နှာရနိုင်ကြောင်း လူတိုင်း သိကြသည်။
သို့သော် ရယူစရာ မျက်နှာသာပေးမှုဟူ၍ တစ်ခုသာရှိသဖြင့် နောက်ဆုံးတွင် လူတိုင်းက ကိုယ်စီ မျှဝေလုပ်ဆောင်ကာ အားလုံးအတွက် အကျိုးရှိသည့် အခြေအနေတစ်ခုကို ဖန်တီးလိုက်ကြ၏။
ဂရုချက်ထဲရှိ လူများက ကျန်းယဲ့အတွက် လူထုအမြင်ကို ထိန်းချုပ်ပေးရန် အလုပ်များနေချိန်တွင် ကျန်းယဲ့ကမူ သူ မသိလိုက်ဘဲ အသရေဖျက်ခံလိုက်ရကြောင်းကို လုံးဝ သတိမထားမိချေ။
ကျန်းယဲ့က အချိန်ကို တစ်ချက်ကြည့်လိုက်ပြီး အိပ်ရာဝင်ရန် ပြင်ဆင်နေခဲ့သည်။
ဘာပဲဖြစ်ဖြစ် ညဉ့်နက်တဲ့အထိ နေခြင်းက သက်တမ်းကို တိုစေနိုင်သည်မဟုတ်လော။
ယခုအချိန်တွင် ကျန်းယဲ့၏ အကြီးမားဆုံး လိုအပ်ချက်မှာ သက်တမ်းတိုးရန်ဖြစ်သဖြင့် သူ၏အသက်ကို ကယ်တင်ရန်အတွက် ပြတ်ပြတ်သားသားပင် အိပ်ရာဝင်ရန် ဆုံးဖြတ်လိုက်၏။
သူ လှဲချလိုက်ပြီး အိပ်ပျော်တော့မည့်ဆဲဆဲတွင် စနစ်၏အသံက သူ၏စိတ်ထဲ၌ ထွက်ပေါ်လာချေသည်။
[ဒင်... အဆင့်မြှင့်တင်ခြင်း အောင်မြင်ပါသည်...]
ချက်ချင်းဆိုသလိုပင် သူဟာ တစ်ဝက်အိပ်၊ တစ်ဝက်နိုး အခြေအနေမှနေ၍ လုံးဝ နိုးကြားသွားရတော့သည်။
‘အိုး... အကိုစနစ်ရေ .... ဘာတွေ လုပ်နေတာလဲ’
‘လူတစ်ယောက်ကို အိပ်လို့တောင် မရအောင် လုပ်နေတာလား...’
[လက်ခံသူ... စာရင်းရှင်းချင်ပါသလား]
ဆိုရိုးစကားရှိသည့်အတိုင်း ငွေကြေးက လက်ထဲတွင် ရှိနေခြင်းက အမြဲတမ်း ပိုကောင်းပေသည်။
“စာရင်းရှင်းမယ်...”
[ဒင်... တာဝန်ပြီးမြောက်သွားတဲ့အတွက် လက်ခံသူကို ဂုဏ်ပြုပါတယ်။ ဆုလာဘ်တွေ ထုတ်ပေးလိုက်ပါပြီ]
စနစ်၏ အသိပေးချက် ပျောက်ကွယ်သွားသည်နှင့် တစ်ပြိုင်နက် ကုတင်ဘေးရှိ စားပွဲပေါ်မှ ကျန်းယဲ့၏ဖုန်းက မြည်လာလေသည်။ သူက တစ်ချက်လှမ်းကြည့်လိုက်၏။
ကောင်းလိုက်တာ... သူ့အကောင့်ထဲသို့ ယွမ် တစ်သိန်း ဝင်လာပြီဖြစ်သည်။
“စနစ်အစ်ကို... ဒီတစ်ခေါက် ဘေးထွက်တာဝန်တွေ ဘာမှမပေးဘူးလား....”
ကျန်းယဲ့က ထန်မင်းဆက်ဆီ ရောက်ပြီး အန်းရှီးတပ်မတော်ကို မြင်တွေ့ရချိန်တွင် ဤကိစ္စကို လုံးဝ မေ့သွားခဲ့သည်။ ပြန်ရောက်လာမှသာ စနစ်က မည်သည့် ရှုခင်းကြည့်ခရီးစဉ်တာဝန်များကိုမျှ မပေးခဲ့ကြောင်း သတိပြုမိသွားပေသည်။
[စနစ် အဆင့်မြှင့်တင်နေစဉ်အတွင်း ခရီးစဉ်ကို ယာယီဆိုင်းငံ့ထားပါတယ်...]
ဤရလဒ်ကို ကျန်းယဲ့ မျှော်လင့်ထားပြီးဖြစ်၏။ ယခု အဆင့်မြှင့်တင်မှု ပြီးဆုံးသွားပြီဖြစ်ရာ နောက်တာဝန်မှာ ခရီးသွားခြင်း ဖြစ်ရပေမည်။
ဆုလာဘ်များက အလွန်ဆွဲဆောင်မှုရှိသောကြောင့် ခရီးသွားတာဝန်များ လုပ်ရခြင်းကို သူ အမှန်တကယ် နှစ်သက်နေဆဲဖြစ်၏။
ကျန်းယဲ့၏ ဖုန်းက ရုတ်တရက် တုန်ခါသွားပြီး ရင်းနှီးနေသော စနစ်၏ စက်ရုပ်သံက သူ၏စိတ်ထဲတွင် ထွက်ပေါ်လာခဲ့သည်။
[တာဝန်အသစ် ထုတ်ပြန်ပါသည်- အေဒီ ၇၈၉ ခုနှစ် အန်းရှီးအစောင့်အရှောက်နယ်မြေဆီသို့ တစ်ရက်တာ ခရီးစဉ်အတွက် ခရီးသွား ၁၀ ဦး ရှာဖွေပါ။ ဈေးနှုန်း- တစ်ဦးလျှင် ယွမ် ၂၀၀၀။ ရှာဖွေရမည့်နည်းလမ်း- အွန်လိုင်းမှတစ်ဆင့် ကြိုတင်စာရင်းသွင်းခြင်း။ ရှာဖွေရမည့်ကာလ- ၂၄ နာရီ။ ၂၄ နာရီပြည့်ပြီးနောက် ကြိုတင်စာရင်းသွင်းခြင်းကို ဖွင့်လှစ်ပါမည်]
[တာဝန်ဆုလာဘ်- သက်တမ်း ၁၅ ရက်၊ ယွမ် ၂ သိန်း]
“အွန်လိုင်းကနေ မှာရမယ်” ကျန်းယဲ့ဟာ ဆိုဖာပေါ်တွင် ရုတ်တရက် မတ်မတ်ထိုင်လိုက်၏။
ယခင်က စနစ်က သီးသန့်နယ်ပယ်များကိုသာ သတ်မှတ်ပေးခဲ့သော်လည်း ဤတစ်ကြိမ်တွင်မူ အများပြည်သူထံ လက်မှတ်ရောင်းချရန် တိုက်ရိုက် တောင်းဆိုလာချေသည်။
စနစ်ကလည်း ခေတ်နှင့်အညီ လိုက်လျောညီထွေ ပြောင်းလဲလာပုံရ၏။
သူက တိုရင်ကိုဖွင့်ကာ အချိန်အတော်ကြာ အသုံးမပြုဘဲ ထားထားသော ရီယဲ့ခရီးသွားအေဂျင်စီ၏ အကောင့်ထဲသို့ ဝင်ရောက်လိုက်သည်။
ဤအကောင့်တွင် ဈေးဆိုင်လုပ်ဆောင်ချက်ကို ဖွင့်ထားသော်လည်း လုံးဝနီးပါး လျစ်လျူရှုခံထားရပြီး ကွန်မန့်များ သို့မဟုတ် မက်ဆေ့ချ်များ အလွန်နည်းပါးလှ၏။
ယခုမူ အသိပေးချက်ကဏ္ဍက အရူးအမူး ခုန်ပေါက်နေချေသည်။
ကွန်မန့်များနှင့် မန်းရှင်းခေါ်မှု ၉၉ ကျော် ရှိနေခဲ့သည်။
ထို့ကြောင့် ကျန်းယဲ့မှာ အံ့အားသင့်သွားရသည်။ ‘ဘာတွေ ဖြစ်ကုန်တာလဲ’
ကျန်းယဲ့သည် မက်ဆေ့ချ်များကို ဖွင့်ကြည့်လိုက်ရာ ထင်ရှားသော သရော်လှောင်ပြောင်မှုများဖြင့် ပြည့်နှက်နေသည်ကို တွေ့လိုက်ရပေသည်။
[လိမ်လည်တဲ့သူတွေက အခုဆို သူတို့ရဲ့ နည်းလမ်းတွေကို အဆင့်မြှင့်လိုက်ပြီပဲ... အင်တာနက်က နာမည်ကြီးတွေနဲ့ ပေါင်းပြီး ရိုးသားတဲ့သူတွေကို သားကောင်လုပ်ဖို့ မြန်မာနိုင်ငံ မြောက်ပိုင်းက ဝေးလံခေါင်ဖျားတဲ့ ဒေသတွေဆီတောင် ဖြားယောင်းခေါ်ဆောင်သွားကြတယ်...]
[အရင်ကလည်း ယောက်ျားလေး အင်တာနက်ဆယ်လီတစ်ယောက်က သူ့ပရိသတ်တွေကို မြန်မာနိုင်ငံ မြောက်ပိုင်းကို သွားဖို့ လှည့်စားခဲ့ပြီး အဲဒီပရိသတ်တွေ ပျောက်ဆုံးသွားတယ်လို့ ဖော်ထုတ်ခံခဲ့ရတယ်]
[ကျွန်တော် ရဲရဲဝံ့ဝံ့ ခန့်မှန်းလိုက်မယ်- နောက်ဆို သူတို့က အွန်လိုင်းလိမ်လည်မှုတစ်ခု စတင်ပြီးတော့ အချိန်ခရီးသွားတာကို ယုံကြည်တဲ့ ပရိသတ်တွေကို ဒီခရီးစဉ်အတွက် စာရင်းသွင်းဖို့ ဖြားယောင်းမယ်... ပြီးရင် သူတို့ကို မြန်မာနိုင်ငံ မြောက်ပိုင်းက ကာယောင်ဇီဆီ ခေါ်သွားလိမ့်မယ်။ ဒီပို့စ်က သက်သေပါပဲ... ဒါက စောက်ရူးလုပ်တာ မဟုတ်ပါဘူး]
[အပေါ်ကလူက အလကားလာပြီး အာရုံစိုက်ခံချင်နေတာပဲ...]
[အချိန်ခရီးသွားတာကို ယုံလောက်အောင်အထိ ဘယ်သူကမှ ဒီလောက် မတုံးအပါဘူး။ တကယ်လို့ ယုံတယ်ဆိုရင်တောင် သူတို့က အရမ်းကို ရိုးအလွန်းလို့ အလိမ်ခံရတာ တန်ပါတယ်....]
[အပေါ်ကလူ... ခင်ဗျားပြောတာ အရမ်းလွန်သွားပြီ။ လိမ်တဲ့သူရဲ့ အပြစ်ကို အသိအမှတ်မပြုဘဲ ခံရတဲ့သူကို အပြစ်တင်နေတယ်။ ခင်ဗျားရဲ့ စိတ်ထားက တကယ့်ကို ညစ်ပတ်လွန်းတယ်ကွာ....]
...
ကျန်းယဲ့၏ လက်ချောင်းများက ဖန်သားပြင်ပေါ်တွင် အမြန်ပွတ်ဆွဲသွားပြီး မကြာမီမှာပင် ဇာစ်မြစ်ကို ရှာဖွေတွေ့ရှိသွားလေသည်။
ဖျော်ဖြေရေး အတင်းအဖျင်းဘုရင်ဟုခေါ်သော မားကတ်တင်း အကောင့်တစ်ခုက နှိုင်းယှဉ်ပြထားသော ဗီဒီယိုတစ်ခုကို တင်ထားပြီး ကျန်းထောင်၏ ချင်မင်းဆက် ခရီးသွားလာရေး အရောင်းမြှင့်တင်ရေး ဗီဒီယိုနှင့် သမိုင်းဝင် ဇာတ်လမ်းတွဲတစ်ခုမှ အပိုင်းတစ်ပိုင်းကို ပေါင်းစပ်ကာ သူ့ကို လှောင်ပြောင်ထားခြင်းဖြစ်၏။
သို့သော် ထိပ်ဆုံးတွင် တင်ထားသော ကွန်မန့်မှာမူ သူ၏ ခရီးသွားအေဂျင်စီ၏ အကောင့်အချက်အလက်များဖြစ်ပြီး လိမ်လည်သူ၏ ဇာစ်မြစ်ကို တိုက်ရိုက် ထောက်ပြထားခဲ့သည်။
“သြော်... ဒီလိုကိုး”
ကျန်းယဲ့သည် အကောင့်အောက်ရှိ ရှုပ်ပွနေမှုများကို ကြည့်လိုက်၏။
အခြေအနေတွေ ရှုပ်ထွေးနေသော်လည်း လူသိများမှုကတော့ တကယ့်ကို အံ့မခန်းပင်။ ပထမဆုံး ဗီဒီယိုပေါ်ရှိ ကွန်မန့်နှင့် ဝင်ကြည့်သူအရေအတွက်က ဤအကောင့်ရှိ ဗီဒီယိုအားလုံးအတွက် စုစုပေါင်း ကွန်မန့်နှင့် ဝင်ကြည့်သူအရေအတွက်ထက်ပင် ကျော်လွန်နေခဲ့သည်။
သူ ဝီချက်ကို ဖွင့်လိုက်ရာ ချင်မင်းဆက် ခရီးသွားအဖွဲ့ဂရုချက်က စိတ်လှုပ်ရှားမှုများဖြင့် ဆူညံနေပြီဖြစ်ကြောင်း တွေ့လိုက်ရ၏။
ကျန်းထောင် - [အားလုံးပဲ... ပြဿနာကြီးတစ်ခု ဖြစ်နေပြီ] ထို့နောက် ငိုနေသော အီမိုဂျီ သုံးခုကို ဆက်တိုက် ပို့ထားခဲ့သည်။
ဖုန်းယီမင် - [.......]
...
ကျန်းယဲ့သည် ဂရုချက်မှတ်တမ်းကို အမြန်ကြည့်ရှုလိုက်ပြီး အဖွဲ့ဝင်များက အခြေအနေကို တစ်ယောက်ပြီးတစ်ယောက် ခွဲခြမ်းစိတ်ဖြာနေကြသည်ကို စောင့်ကြည့်လိုက်သည်။
ကျန်းထောင်က ရှင်းဟယ်ယဉ်ကျေးမှု MCN အေဂျင်စီအကြောင်းကို ပြောလိုက်ချိန်တွင် သူ၏ မျက်လုံးများက ထက်မြက်သွားလေသည်။
ဤကုမ္ပဏီအကြောင်းကို သူ ကြားဖူးပေသည်။ သူတို့က ဘလော့ဂါငယ်များထံမှ မူရင်းအကြောင်းအရာများကို ဈေးပေါပေါဖြင့် ဝယ်ယူရန် အထူးပြုလုပ်ထားပြီး အကယ်၍ ပူးပေါင်းဆောင်ရွက်ခြင်းမရှိပါက အင်တာနက်ပေါ်တွင် အသရေဖျက်သည့် လှုပ်ရှားမှုများကို စတင်လေ့ရှိသည်။
ဂရုတွင်းရှိ ဆွေးနွေးမှုများက အရှိန်အဟုန်ပြင်းစွာ ဖြစ်ပေါ်နေချေသည်။
ကျောက်ဟုန် - [လူထုအမြင်ကို တုံ့ပြန်မယ့် အစီအစဉ်တစ်ခု ကျွန်တော် အခုလေးတင် ရေးဆွဲပြီးသွားပြီ...]
လူတိုင်း၏ တက်ကြွမှုကြောင့် ကျန်းယဲ့သည် နွေးထွေးမှုကို ခံစားလိုက်ရပြီး ဂရုအတွင်းသို့ ပထမဆုံး မက်ဆေ့ချ်ကို အမြန်ပို့လိုက်၏။ [အားလုံးပဲ... အခြေအနေကို ကျွန်တော် နားလည်ပါပြီ]
ကျန်းယဲ့ ပေါ်လာသည်ကို မြင်သောအခါ လူတိုင်းက ချက်ချင်းပင် နှုတ်ဆက်စကားများ ဆက်တိုက် ပြောဆိုလာကြသည်။
ကျန်းထောင် - [ညွှန်ကြားရေးမှူးကျန်း... ကျွန်တော် တကယ် တောင်းပန်ပါတယ်။ အားလုံးက ကျွန်တော့်အမှားပါ...]
ကျိုးရှင်းဖူ - [ရှောင်ကျန်း... မင်း ငါတို့ကို ဘာလုပ်ပေးစေချင်လဲဆိုတာသာ ပြောလိုက်ပါ...]
ဝမ်ဟိုင်ဖုန်း - [ဆိုက်ဘာရဲကို ဆက်သွယ်လိုက်ရမလား။ အဲဒီက လူတစ်ယောက်ကို ကျွန်တော် သိတယ်]
ကျန်းယဲ့က အမြန်ရိုက်ထည့်လိုက်၏။ [မလိုပါဘူး၊ ဒီကိစ္စအတွက် စိုးရိမ်မနေပါနဲ့]
ဤမက်ဆေ့ချ်ကို ပို့လိုက်သောအခါ ဂရုအတွင်းရှိ လူတိုင်းမှာ အံ့အားသင့်သွားကြရသည်။
ချောင်ဝမ်ပေါ် - [ညွှန်ကြားရေးမှူးကျန်း... ကျွန်တော်တို့ကို ဒုက္ခပေးရမယ်ဆိုပြီး စိတ်ပူနေစရာ မလိုပါဘူးဗျ... ]
ဝူကျဲ - [ဟုတ်တယ်... ဟုတ်တယ်... ဟုတ်တယ်။ ကျွန်တော်တို့ ကူညီချင်လို့ပါ]
လီချင်းယီ - [ရှောင်ကျန်း... ဒီကိစ္စကို ငါတစ်ယောက်တည်းနဲ့တောင် မင်းအတွက် ဖြေရှင်းပေးနိုင်တယ်။ အားနာမနေပါနဲ့... ဒါက ကိစ္စမရှိပါဘူး]
ကျိုးရှင်းဖူ ဒေါသထွက်သွားရသည်။ ‘ဒီအဘိုးကြီးက တကယ်ကို တစ်ယောက်တည်း သိမ်းပိုက်ချင်နေတာပဲ’ [အဘိုးကြီးလီ... ခင်ဗျား ဘာတွေပြောနေတာလဲ။ ဒါကို ဖြေရှင်းဖို့ ကျွန်တော့် အတွင်းရေးမှူးကိုတောင် အကြောင်းကြားပြီးသွားပြီဗျ... ]
အခြားသော အရေးပါအရာရောက်သူကြီးများက အရှက်မရှိသည့် အဘိုးကြီးနှစ်ယောက်ကို သူတို့၏စိတ်ထဲတွင် ကျိန်ဆဲလိုက်ကြ၏။ သူတို့၏ ခံစားချက်များကို ထုတ်ဖော်ပြောဆိုတော့မည့်ဆဲဆဲတွင် ကျန်းယဲ့ထံမှ မက်ဆေ့ချ် ရောက်လာသည်ကို မြင်လိုက်ရလေသည်။
ကျန်းယဲ့ - [အားလုံး နားလည်မှုလွဲနေကြပြီ။ အခုကစပြီး ခရီးသွားဖို့ စာရင်းသွင်းတာကို အွန်လိုင်းကနေ လုပ်ဆောင်တော့မှာမို့ လောလောဆယ် ကျွန်တော့်အကောင့်မှာ လူသိများမှုတွေ မြင့်တက်နေတာပါ...]
စက္ကန့်အနည်းငယ်ကြာ တိတ်ဆိတ်သွားပြီးနောက် ဂရုချက်မှာ “သောက်ကျိုးနည်း” ဟူသော စကားသံများနှင့်အတူ ပေါက်ကွဲထွက်သွားတော့သည်။
ကျောက်လဲ့က ပထမဆုံး သဘောပေါက်သွားသူပင်။ [ဒီတော့... အဲဒီ မုန်းတီးတဲ့သူတွေက တကယ်ပဲ ကျွန်တော်တို့ကို အလကား ကြော်ငြာပေးလိုက်တာပေါ့...]
ဖန်ကောင်းချန် - [ဟားဟားဟား... ရယ်ရလွန်းလို့ သေတော့မယ်။ အဲဒီ လူအတွေက ဒါကို ဘယ်တော့မှ ခန့်မှန်းမိကြမှာ မဟုတ်ဘူး]
ကျိန့်ချန် - [ဒါဆို ကျွန်တော်တို့ ဘာစောင့်နေဦးမလဲ။ ဝယ်ဖို့ လင့်ခ်ကို အမြန်တင်လိုက်ကြရအောင်]
ဤအချက်အလက်များကို မြင်သောအခါ ကျန်းဟွိုင်မင်နှင့် အခြားသော အရေးပါအရာရောက်သူကြီး အချို့မှာ အစပိုင်းတွင် ဝမ်းသာသွားကြသော်လည်း နောက်ပိုင်းတွင် စိုးရိမ်ပူပန်လာကြရသည်။
သူတို့က နေရာတစ်နေရာရရန် အခွင့်အရေးရှိသဖြင့် ဝမ်းသာသွားသော်လည်း လူအများအပြား ရှိနေသဖြင့် သူတို့ရနိုင်မည် မဟုတ်ဟု စိုးရိမ်နေကြခြင်းဖြစ်၏။
ဂရုထဲရှိ လူငယ်များက ဤပြဿနာကို သတိမပြုမိကြသေးသဖြင့် သူတို့ အရမ်းပျော်နေကြခြင်း ဖြစ်ပေမည်။
သူတို့အနေဖြင့် သိရှိသူအရေအတွက် တတ်နိုင်သမျှ နည်းပါးလေလေ ပို၍ ပျော်ရွှင်လေလေပင် ။
ကျိုးရှင်းဖူ - [မင်းတို့က ဘာတွေ အရမ်းပျော်နေကြတာလဲ။ လူတွေ ဒီလောက်များနေတာ မင်းတို့ ရဖို့ အခွင့်အရေး ဘယ်လောက်ရှိမယ်လို့ ထင်နေလဲ...]
ဤစကားကို ပြောလိုက်သည်နှင့် တစ်ပြိုင်နက် စိတ်လှုပ်ရှားနေသော လူငယ်လေးများမှာ ချက်ချင်း တိတ်ကျသွားကြရသည်။