အခန်း (၆၀) ထန်မင်းဆက်သို့ ရောက်ရှိခြင်း
ချန်ရွှဲလင်းက ကားပေါ်သို့ ပထမဆုံးတက်သွားသူဖြစ်သည်။ ဝင်ဝင်ချင်းပင် အတွင်း၌ မြင်လိုက်ရသည့် မြင်ကွင်းကြောင့် သူ အလွန်အံ့သြသွားရသည်။ ရှေ့တန်းရှိ ထိုင်ခုံငါးခုံမှလွဲ၍ ကျောဘက်အခန်းတစ်ခုလုံးတွင် နားမလည်နိုင်သော ထောက်ပံ့ရေးပစ္စည်းများဖြင့် ပြည့်နှက်နေချေသည်။
ဆန်နှင့် ဂျုံအိတ်များကို သပ်ရပ်စွာ စီရီထားပြီး ဆီပုံးများကို တုန်ခါမှုဒဏ်ခံ ဖော့ပြားများဖြင့် ခိုင်ခံ့စွာ ပတ်ချည်ထား၏။
ကြက်ခြေနီအမှတ်အသားပါသော ရှေးဦးသူနာပြုသေတ္တာပုံဘေးတွင် အစိုဓာတ်ခံစက္ကူဖြင့် ထုပ်ပိုးထားသော အတောင့်များ ရှိနေခဲ့သည်။ ၎င်းတို့၏ ထူးခြားသောပုံစံနှင့် သေနတ်ယမ်းနံ့သင်းသင်းကြောင့် ချန်ရွှဲလင်းမှာ ချက်ချင်းပင် ခါးမတ်သွားရသည်။
ကားစင်္ကြံလမ်းတွင် အလုံပိတ်သတ္တုသေတ္တာများ ပြန့်ကျဲနေပြီး ၎င်းတို့ပေါ်တွင် မီးလောင်လွယ်ပြီး ပေါက်ကွဲနိုင်သည်ဟူသော သတိပေးဆိုင်းဘုတ်များကို မှုန်ဝါးဝါး ရိုက်နှိပ်ထားလေသည်။
“ဒါက...” နောက်မှ ကပ်လျက်လိုက်လာသော ဟယ်ရွှိကလည်း ကားအတွင်းရှိ မြင်ကွင်းကြောင့် အံ့အားသင့်သွားရသည်။
ယန်ဖန် ကားအတွင်းသို့ လှမ်းဝင်လာချိန်တွင် အတွင်းရှိ ဆန်၊ ဂျုံနှင့် ဟင်းချက်ဆီပုံများကို အကဲခတ်မိသော်လည်း သူမ အံ့သြမသွားခဲ့ချေ။
သို့သော် တောက်ပသော အနီရောင်ဖြင့် မီးလောင်လွယ်ပြီး ပေါက်ကွဲနိုင်သည်ဟု ရေးသားထားသော သတ္တုသေတ္တာများပေါ်သို့ သူမ၏အကြည့်များ ကျရောက်သွားသောအခါ အသက်ရှူမှားသွားခဲ့ရသည်။
‘သူ ဒီပစ္စည်းတွေကို ဘယ်ကရလာတာလဲ...’
ထို့နောက် ယန်ဖန်က ဆေးသေတ္တာများကို သတိထားမိသွားရာ သူမ၏ မျက်လုံးများထဲတွင် စူးစမ်းလိုစိတ်နှင့် သံသယများ ပိုမိုပြည့်နှက်သွားချေသည်။
ထိုမနက်က ကျန်းယဲ့ပြောခဲ့သည့် စကားများကို သူမ မတွေးဘဲ မနေနိုင်တော့ပေ။
‘ထန်မင်းဆက်ကို အချိန်ခရီးသွားမယ်ဆိုတာ တကယ်ပဲလား’
ထိုအကြံအစည် ခေါင်းထဲရောက်လာသည်နှင့်တပြိုင်နက် ယန်ဖန်က ဤယုံကြည်နိုင်ဖွယ်မရှိသော အတွေးကို သူမ၏စိတ်ထဲမှ အမြန်ဖယ်ထုတ်ပစ်လိုက်၏။
‘ဒါက ဘယ်လိုလုပ် အမှန်ဖြစ်နိုင်မှာလဲ’
‘ကောင်းပြီ... တကယ် ဘာဖြစ်မလဲဆိုတာ ကြည့်ရသေးတာပေါ့’
ဒီတစ်ကြိမ်တွင် အဖွဲ့ဝင်ငါးယောက်ပါဝင်ပြီး သူတို့ထဲမှ တစ်ယောက်က သာမန်မဟုတ်ကြောင်း ယန်ဖန် သတိထားမိလိုက်၏။
သူမ၏အကြည့်က ဝမ်ကျန့်ချင်၏ ဖြောင့်မတ်နေသော ကျောပြင်နှင့် သူ၏လက်ပေါ်ရှိ အသားမာများပေါ်တွင် စက္ကန့်အနည်းငယ်မျှ ကျရောက်သွားခဲ့သည်။
‘ဒီလူက ထူးခြားတဲ့ စစ်သားအသွင်အပြင် ရှိနေတယ်...’
ယင်းက သူမ၏ တင်းမာနေသော အာရုံကြောများကို အနည်းငယ် ပြေလျော့သွားစေရန်လည်း အထောက်အကူဖြစ်စေလေသည်။
‘အနည်းဆုံးတော့ ဒီအဖွဲ့ထဲမှာ ယုံကြည်ရလောက်မယ့်သူ တစ်ယောက်တော့ ရှိသားပဲ..’
ဝမ်ကျန့်ချင်က ကားပေါ်သို့ နောက်ဆုံးတက်လာသူဖြစ်၏။ သူ၏ စူးရှသော အကြည့်များက ထောက်ပံ့ရေးပစ္စည်းများ အပြည့်ပါသော ကားအတွင်းသို့ ဝေ့ဝဲကြည့်လိုက်ပြီး သတ္တုသေတ္တာများပေါ်သို့ ကျရောက်သွားခဲ့သည်။
မှုန်ဝါးနေသော်လည်း အနည်းငယ် ရင်းနှီးနေသည့် ရိုက်နှိပ်ထားသော အမှတ်စဉ်များကြောင့် သူ၏ မျက်ခွံများ ပြင်းထန်စွာ တုန်လှုပ်သွားရသည်။
“သေချာကိုင်ထားကြ..” ကျန်းယဲ့က ယာဉ်မောင်းထိုင်ခုံကို ပုတ်လိုက်ရာ NPC ဦးလေးဝမ်က နားလည်သွားပြီး ကားကို စက်နှိုးလိုက်၏။
ထို့နောက် ကောစတာကားလေးက ဥမင်လိုဏ်ခေါင်းအတွင်းသို့ ချောမွေ့စွာ ဝင်ရောက်သွားပြီး မှိန်ပျပျ နံရံကပ်မီးခွက်များက ပြတင်းပေါက်များပေါ်တွင် ရွေ့လျားနေသော အရိပ်များကို ဖန်တီးပေးနေချေသည်။
ဝမ်ကျန့်ချင်က ရုတ်တရက် မတ်မတ်ထိုင်လိုက်၏။ ဥမင်လိုဏ်ခေါင်း၏ အရှည်နှင့် ကား၏ အမြန်နှုန်းအရဆိုလျှင် သူတို့က စောစောကတည်းက ထွက်ပေါ်လာသင့်ချေပြီ။ သို့သော် ရှေ့ရှိ ဥမင်လိုဏ်ခေါင်းသည် အဆုံးမရှိသော နက်ရှိုင်းပြီး မှောင်မိုက်သည့် လမ်းကြောင်းတစ်ခုကဲ့သို့ အဆုံးမရှိ ရှည်လျားနေပုံရသည်။
“တစ်ခုခုတော့ မှားနေပြီ။” သူ ပါးစပ်ဟရုံသာ ရှိသေး ရှေ့မှ ကျန်းယဲ့၏အသံကို ကြားလိုက်ရခေသည်။ “အားလုံးပဲ လက်ရန်းတွေကို သေချာကိုင်ထားကြ...”
စကားမဆုံးမီမှာပင် ဥမင်လိုဏ်ခေါင်း၏ အဆုံးမှ မျက်စိကျိန်းလောက်သော အဖြူရောင်အလင်းတန်းတစ်ခု ရုတ်တရက် ထွက်ပေါ်လာပြီး ကားခန်းတစ်ခုလုံးကို ချက်ချင်း ဖုံးလွှမ်းသွားချေသည်။
ထိုအလင်းရောင်က မွန်းတည့်နေကို တိုက်ရိုက်ကြည့်လိုက်ရသကဲ့သို့ ပြင်းထန်လွန်းသဖြင့် အားလုံးက ဗီဇအရ မျက်လုံးများကို မှိတ်လိုက်ကြ၏။
ယန်ဖန် အော်ဟစ်ရန် အချိန်ပင်မရလိုက်ဘဲ ကားတစ်စီးလုံး အဝတ်လျှော်စက်ထဲသို့ ပစ်ချခံလိုက်ရသကဲ့သို့ ခံစားလိုက်ရသည်။ မူးဝေပြီး အလေးချိန်မဲ့နေသော ခံစားချက်ကြောင့် သူမ၏ အစာအိမ်ပင် ကမောက်ကမဖြစ်သွားခဲ့ရသည်။
“ဝုန်း...”
နောက်ခဏ၌ တုံးတိတိ အသံနှင့်အတူ ပြင်းထန်သော တုန်ခါမှုက ရုတ်တရက် ရပ်တန့်သွားခဲ့သည်။
အားလုံးက တုန်ရီစွာဖြင့် မျက်လုံးများကို ဖွင့်ကြည့်လိုက်သောအခါ ကားပြတင်းပေါက်များမှတစ်ဆင့် မြင်လိုက်ရသည့် မြင်ကွင်းက ဥမင်လိုဏ်ခေါင်း၏ ကွန်ကရစ်နံရံများ မဟုတ်တော့ဘဲ အဆုံးမရှိသော ရွှေရောင်သဲပင်လယ်ကြီး ဖြစ်နေချေသည်။
လောင်ကျွမ်းမတတ် ပူပြင်းသော အပူရှိန်က ကားကိုယ်ထည်ကို ရိုက်ခတ်နေပြီး အဝေးရှိ သဲသောင်ပြင်တစ်ခုပေါ်တွင် ညှိုးရော်နေသော ပေါ့ပလာသစ်ပင်တစ်ပင်က သွေးကဲ့သို့ နီရဲနေသော နေဝင်ဆည်းဆာကို အခံပြုကာ ၎င်း၏ လိမ်ကောက်နေသော အရိပ်ကို ထင်ဟပ်နေခဲ့သည်။
“ငါတို့...” ဟယ်ရွှိ၏ လည်စေ့က နိမ့်ချည်မြင့်ချည် ဖြစ်သွားပြီး သူ၏အသံက ပုံမှန်မဟုတ်ဘဲ ခြောက်ကပ်နေ၏။ “ငါတို့ တကယ်ပဲ ထန်မင်းဆက်ကို ရောက်သွားတာလား...”
ကားထဲရှိ လူငါးဦးက ကားပြတင်းပေါက်အပြင်ဘက်ရှိ လုံးဝကွဲပြားခြားနားနေသော မြင်ကွင်းကို မျက်လုံးပြူးကာ စိုက်ကြည့်နေခဲ့ကြသည်။
အနီးနားရှိ သဲသောင်ပြင်ပေါ်တွင် ကန္တာရဖွတ်တစ်ကောင်က ရုတ်တရက် ပေါ်လာသော သံမဏိဘီလူးကြီးကို သတိထားကာ အကဲခတ်နေခဲ့သည်။
၎င်း၏ အခွံမာပေါ်ရှိ သဲများက အနောက်ဘက်ဒေသမှ စစ်မှန်သော သဲပွင့်များပင်။