အခန်း (၈၃) - အရှိန်အဟုန်ဖြင့် တိုးတက်လာခြင်း

သုံးရက်တာ အချိန်မှာ မျက်စိတစ်မှိတ်အတွင်း ကုန်ဆုံးသွားခဲ့သည်။ ကျန်းမုသည် တောင်တန်းများကြားတွင် တည်ရှိနေသော အဆောက်အအုံများကို ကြည့်ကာ ရှေ့သို့ လှမ်းတက်ခဲ့သည်။

သူသည် အိမ်ရှေ့ရင်ပြင်သို့ ရောက်ရှိသောအခါ ဂိုဏ်းသားအချို့က တားဆီးကာ မေးမြန်းကြသည်။ "မင်းက ဘယ်သူလဲ၊ ဒီကို ဘာကိစ္စနဲ့ လာတာလဲ။"

ကျန်းမုက လက်ဝါးချင်းယှက် ဂါရဝပြုကာ "ကျွန်တော့်နာမည် ကျန်းမုပါ၊ ချင်းယွမ်ဂိုဏ်းကို ဝင်ချင်လို့ လာခဲ့တာပါ" ဟု ပြန်လည်ဖြေကြားလိုက်သည်။

"ငါတို့ဂိုဏ်းထဲ ဝင်ချင်တာလား။" ထိုဂိုဏ်းသားမှာ အံ့သြသွားပြီးမှ "ငါတို့ ချင်းယွမ်ဂိုဏ်းက ဂိုဏ်းကြီးတစ်ခု မဟုတ်ပေမယ့် တပည့်လက်ခံတဲ့နေရာမှာ သတ်မှတ်ချက်တွေ ရှိတယ်။ မင်း ဂိုဏ်းထဲဝင်ဖို့ အရည်အချင်း ပြည့်မီ၊ မပြည့်မီ အရင်ဆုံး စစ်ဆေးမှုကို ဖြတ်ကျော်ရမယ်" ဟု ဆိုသည်။

"ဒါဆိုရင် ဒီအစ်ကိုလေးပဲ လမ်းပြပေးပါဦး။ ကျွန်တော် အရည်အချင်း ပြည့်မီမယ်လို့ ယုံကြည်ပါတယ်" ဟု ကျန်းမုက ယုံကြည်မှုအပြည့်ဖြင့် ပြောလိုက်သည်။

"ကောင်းပြီ၊ မင်းရဲ့ ရုပ်ရည်ကလည်း ခန့်ညားတည်ကြည်တယ်၊ လျှောက်ပြောမယ့်သူမျိုးတော့ မဟုတ်ပါဘူး။ ငါနဲ့ လိုက်ခဲ့ပါ" ထိုသူက ခေါင်းငြိမ့်ကာ ကျန်းမုကို ဂိုဏ်းအတွင်းသို့ ခေါ်ဆောင်သွားလေသည်။

မြင်ကွင်းက ပြောင်းလဲသွားခဲ့သည်။

"ဆရာကြီး... ဒီလူငယ်က ကျွန်တော်တို့ ချင်းယွမ်ဂိုဏ်းကို ဝင်ချင်လို့တဲ့၊ သူ့ရဲ့ ပါရမီကို စစ်ဆေးပေးဖို့ ခေါ်လာတာပါ"

အကြီးအကဲ ဖန်းရှန့်မင်က ကျန်းမုကို မော့ကြည့်လိုက်သည်။ ချင်းယွမ်ဂိုဏ်း၏ တရားဝင် တပည့်သစ် ခေါ်ယူမည့်အချိန် ရောက်ရန် လိုသေးသော်လည်း ဤကာလအတွင်း အချို့သောသူများမှာ တောင်ပေါ်သို့ ကြိုတင်လာရောက်ကာ ဂိုဏ်းဝင်ရန် ကြိုးစားလေ့ရှိကြသည်။ အရည်အချင်း စစ်ဆေးမှု အောင်မြင်ပါက ၎င်းတို့ကို လက်ခံလေ့ရှိသည်။

"သိပြီ၊ မင်း သွားလို့ရပြီ။ လူငယ်လေး... ရှေ့ကို တိုးခဲ့ပါဦး" ဖန်းရှန့်မင်က ဆိုသည်။

ထိုဂိုဏ်းသား ထွက်ခွာသွားသောအခါ ကျန်းမုက ရှေ့သို့ လှမ်းတက်လိုက်သည်။

"အသက်?"

"ရှစ်နှစ်ပါ။"

"ရှစ်နှစ် ဟုတ်လား!"

ဖန်းရှန့်မင် ရုတ်တရက် မော့ကြည့်လိုက်ပြီး "မင်းရဲ့ ရုပ်ရည်က ဒီလောက်ထိ ရှိနေတာကို ရှစ်နှစ်ပဲ ရှိသေးတယ်လို့ ပြောတာလား။ ငါ့ကို လာမလိမ်နဲ့၊ ငါက အရိုးသက်တမ်းကို ကြည့်ပြီး သိနိုင်တယ်။ တကယ်လို့ လိမ်တာဆိုရင် ချင်းယွမ်ဂိုဏ်းကို လုံးဝ ဝင်ခွင့်ရမှာ မဟုတ်ဘူး"

ကျန်းမု၏ နှုတ်ခမ်းများ အနည်းငယ် တွန့်သွားသည်။ သူက အမှန်တကယ်ပင် ရှစ်နှစ်သား မဟုတ်ပါလော။ "ဆရာကြီး... ကျွန်တော် မလိမ်ပါဘူး၊ ကျွန်တော် တကယ်ပဲ ရှစ်နှစ်ရှိပါပြီ။"

ဖန်းရှန့်မင်က မယုံကြည်နိုင်သေးဟန်ဖြင့် ထရပ်ကာ ကျန်းမု၏ အရိုးများကို စမ်းသပ်ကြည့်တော့သည်။ ခဏအကြာတွင် -

"သူ တကယ်ပဲ ရှစ်နှစ် ရှိသေးတာပဲ!"

ဖန်းရှန့်မင် အလွန်အံ့အားသင့်သွားရသည်။ ထို့အပြင် ကျန်းမု၏ ခွန်အားမှာ ပြင်ပအား အဆင့်သို့ပင် ရောက်ရှိနေသည်ကို တွေ့လိုက်ရသောအခါ -

"ပါရမီရှင်လေးပဲ!" ဟု ရေရွတ်ရင်း မျက်နှာတွင် ဝမ်းသာလုံးဆို့သွားတော့သည်။

"တွေ့လား... ကျွန်တော် မလိမ်ပါဘူးလို့ ပြောသားပဲ။ အခု စစ်ဆေးမှုကို ဆက်လုပ်လို့ ရပြီလား" ဟု ကျန်းမုက မတတ်သာသည့်လေသံဖြင့် မေးလိုက်သည်။

"ရတာပေါ့၊ ရတာပေါ့၊ မင်း ငါ့ကို မလိမ်ပါဘူး။ ကဲ... ချင်းယွမ်ဂိုဏ်းကို ဝင်ခွင့်ရတဲ့အတွက် ဂုဏ်ယူပါတယ်" ဖန်းရှန့်မင်က ပြုံးလျက် ဆိုသည်။

"ဗျာ? ကျွန်တော် စစ်ဆေးမှု မခံယူရတော့ဘူးလား" ကျန်းမု ကြောင်သွားရသည်။

"ဘာကို ထပ်စစ်ဆေးရဦးမှာလဲ။ ဒီအသက်အရွယ်နဲ့ ဒီလောက်ခွန်အားရှိနေမှတော့ မင်းသာ အရည်အချင်းမရှိရင် တခြားဘယ်သူကမှ ချင်းယွမ်ဂိုဏ်းကို ဝင်ဖို့ စိတ်မကူးနဲ့တော့" ဖန်းရှန့်မင်က လက်ကာပြလိုက်သည်။

ဤသို့ဖြင့် ကျန်းမုသည် ချင်းယွမ်ဂိုဏ်းသို့ လွယ်လင့်တကူ ဝင်ရောက်နိုင်ခဲ့သည်။

ဂိုဏ်းသို့ ရောက်ရှိပြီး ပထမနှစ်မှာပင် ဂိုဏ်းချုပ် ချင်းယွမ်ဇီသည် ကျန်းမုမှာ ပါရမီထူးချွန်သူ ဖြစ်ကြောင်း သိရှိသွားခဲ့သည်။ ထို့ကြောင့် သူ့ကို အထူးဂရုစိုက်ကာ သီးသန့်လေ့ကျင့်ပေးခဲ့ပြီး ဂိုဏ်း၏ သိုင်းပညာအားလုံးနီးပါးကို လက်ဆင့်ကမ်း သင်ကြားပေးခဲ့သည်။

ဒုတိယနှစ်တွင် ဂိုဏ်းချုပ်သည် သူ့ကို လျှို့ဝှက်သင်ကြားပေးခြင်း မပြုတော့ဘဲ ကျန်းမုကို သူ၏ တိုက်ရိုက်တပည့် အဖြစ် တရားဝင် သတ်မှတ်လိုက်သည်။ ဂိုဏ်းသို့ ရောက်ရှိသည်မှာ နှစ်နှစ်သာ ရှိသေးသော ကျန်းမုက တိုက်ရိုက်တပည့် ဖြစ်သွားသည်ကို မြင်သောအခါ အခြားဂိုဏ်းသားများမှာ မကျေမနပ် ဖြစ်ကြတော့သည်။

ချင်းယွမ်ဇီက ထိုသူများကို ဂရုမစိုက်သော်လည်း ကျန်းမုကမူ မိမိတွင် အစွမ်းရှိလျှင် သက်သေပြရမည်ဟု ခံယူထားသည်။ မကျေနပ်ကြဘူးလား။ ကောင်းပြီလေ... သိုင်းစင်မြင့်ပေါ်မှာ ယှဉ်ပြိုင်ကြတာပေါ့။

အသက် ဆယ်နှစ်အရွယ်မှာပင် သူသည် အတွင်းအား အဆင့်သို့ ရောက်ရှိနေပြီ ဖြစ်ရာ စီနီယာဂိုဏ်းသားများထက်ပင် ပို၍ အစွမ်းထက်နေပြီ ဖြစ်သည်။ သိုင်းစင်မြင့်ပေါ်တွင် လာရောက်စိန်ခေါ်သော ဂိုဏ်းသားများအနက် တစ်ဦးတစ်ယောက်မျှ ကျန်းမု၏ လက်ကွက် သုံးကွက်ကိုပင် တောင့်မခံနိုင်ကြပေ။ ဤတွင်မှ အားလုံးမှာ ငြိမ်သက်သွားကြပြီး ဝေဖန်သံများလည်း ပျောက်ကွယ်သွားတော့သည်။

စတုတ္ထနှစ်တွင် ကျန်းမု၏ ငယ်စဉ်ကတည်းက သိုင်းကျင့်ခဲ့သည့် အတွေ့အကြုံနှင့် အဘိုးချိုး၏ လမ်းညွှန်မှုများကြောင့် သူ၏ ခွန်အားမှာ အသွင်ပြောင်းနယ်ပယ် သို့ ရောက်ရှိသွားခဲ့သည်။ ဤအဆင့်မှာ အကြီးအကဲ တစ်ဦးအဖြစ် တာဝန်ယူနိုင်ရန် လုံလောက်သော အခြေအနေ ဖြစ်သည်။

သို့သော် ကျန်းမုက ထိုရာထူးဂုဏ်သိမ်များကို ဂရုမစိုက်ပေ။ သူ၏ ခွန်အားကိုသာ ဆက်လက်မြှင့်တင်လိုပြီး အသက် တစ်ဆယ့်ရှစ်နှစ် မပြည့်မီမှာပင် ကောင်းကင်နယ်ပယ် သို့ ရောက်ရှိရန် ရည်မှန်းထားသည်။ တကယ်လို့ မတတ်နိုင်လျှင်လည်း အကူအညီ ဆင့်ခေါ်၍ ရသည်မဟုတ်ပါလော။

ဤနှစ်များအတွင်း ကျန်းမုသည် မိဘများထံသို့လည်း တစ်နှစ်တစ်ခါ ပြန်လည်လည်ပတ်လေ့ရှိသည်။ ထို့အပြင် သူသည် စနစ်၏ အခြားလုပ်ဆောင်ချက်များကိုလည်း ရှာဖွေတွေ့ရှိခဲ့သည်။ 'လုယက်ခြင်း' နှင့် 'ကူးယူခြင်း' လုပ်ဆောင်ချက်များသည် ပါရမီကိုသာမက အခြားသူများ တတ်မြောက်ထားသော သိုင်းပညာများကိုပါ သိမ်းယူနိုင်သည်။

သို့သော် ကူးယူထားသော သိုင်းပညာများသည် မူလပိုင်ရှင်၏ ကျင့်စဉ်အဆင့်အတိုင်း ပါလာခြင်း မဟုတ်ဘဲ မိမိကိုယ်တိုင် အစမှ ပြန်လည်လေ့ကျင့်ရမည် ဖြစ်သည်။ သို့သော်လည်း ၎င်းက အလွန်ပင် အစွမ်းထက်လှသည်။ သူ၏ စနစ်တွင် 'အဆတစ်ရာ တိုးပွားခြင်း' လုပ်ဆောင်ချက် ရှိနေသေးသည်မဟုတ်ပါလား။ ဤနှစ်ခုကို ပေါင်းစပ်လိုက်ခြင်းမှာ ကျားကို အတောင်ပံ တပ်ပေးလိုက်သကဲ့သို့ပင်။ အသုံးမကျသော သိုင်းပညာပင် ဖြစ်ပါစေ၊ အဆတစ်ရာ တိုးပွားစေခြင်းနှင့် တွေ့လျှင် ခံ့ညားထည်ဝါသော ပညာရပ်တစ်ခု ဖြစ်သွားရစမြဲပင်။

ထို့ကြောင့် သူသည် ချင်းယွမ်ဂိုဏ်းအတွင်းမှာပင် အောင်းမနေတော့ဘဲ ဂိုဏ်းပေါင်းစုံသို့ လှည့်လည်ကာ စိန်ခေါ်မှုများ ပြုလုပ်တော့သည်။ သူ၏ မြင့်မားလှသော အစွမ်းကြောင့် လူငယ်မျိုးဆက်များကို စိန်ခေါ်ခြင်းမှာ အပေါ်စီးမှ နှိမ်နင်းခြင်းမျှသာ ဖြစ်တော့သည်။

ခဏချင်းမှာပင် ကျန်းမု၏ အမည်မှာ ကျော်ကြားသွားခဲ့သည်။ သိုင်းလောကတွင် ပါရမီရှင် သိုင်းသမားလေးတစ်ဦး ပေါ်ထွန်းလာပြီဟု လူတိုင်း သိသွားကြသည်။ အသက် တစ်ဆယ့်နှစ်နှစ်အရွယ်မှာပင် သူ၏အဆင့်မှာ အသွင်ပြောင်းနယ်ပယ်သို့ ရောက်ရှိနေပြီဖြစ်ရာ ဂိုဏ်းပေါင်းစုံမှ လူငယ်တပည့်များမှာ သူ့ရှေ့တွင် ပြားပြားဝပ်သွားကြရသည်။

ချင်းယွမ်ဂိုဏ်းကဲ့သို့ သေးငယ်သော ဂိုဏ်းလေးပင် ကျန်းမုကြောင့် နာမည်ကြီးလာခဲ့သည်။ တစ်နှစ်တစ်နှစ် ဂိုဏ်းဝင်လိုသူ ဦးရေမှာ အဆပေါင်းများစွာ တိုးတက်လာခဲ့သည်။ ဤသည်မှာ နာမည်ကျော်ကြားမှု၏ ကြောက်မက်ဖွယ် ကောင်းသော အကျိုးသက်ရောက်မှုပင် ဖြစ်သည်။ ဂိုဏ်းချုပ် ချင်းယွမ်ဇီမှာလည်း မိမိဂိုဏ်း တိုးတက်လာသည်ကို ကြည့်ကာ မပြုံးဘဲ မနေနိုင်တော့ပေ။

ဆဋ္ဌမနှစ်တွင် နှစ်နှစ်တာ တိုးတက်လာသော ချင်းယွမ်ဂိုဏ်းသည် အမည်မသိ ဂိုဏ်းငယ်လေးအဆင့်မှ ထိပ်တန်းဂိုဏ်းကြီး ရှစ်ဂိုဏ်းစာရင်းဝင်အဖြစ် တိုက်ရိုက်ခုန်တက်သွားခဲ့သည်။ ၎င်းမှာ ဂိုဏ်းသားဦးရေ တစ်သိန်းအထိ ရှိလာခဲ့သောကြောင့် ဖြစ်သည်။ ချင်းယွမ်ဂိုဏ်း၏ အင်အားစုစုပေါင်းမှာ ဂိုဏ်းချုပ် (မွေးရာပါနယ်ပယ်) တစ်ဦး၊ အသွင်ပြောင်းနယ်ပယ် အကြီးအကဲ ရှစ်ဦးနှင့် အတွင်းအားအဆင့် ဂိုဏ်းသား ဒါဇင်ပေါင်းများစွာ ရှိနေပြီဖြစ်သည်။

ကျန်းမုမှာမူ ဂိုဏ်းချုပ်၏ တိုက်ရိုက်တပည့်အနေဖြင့် 'မွေးရာပါနယ်ပယ်' သို့ ရောက်ရှိနေပြီ ဖြစ်သည်။ ဤတိုးတက်မှု အရှိန်အဟုန်မှာ အခြားဂိုဏ်းသားများကို ကြောက်ရွံ့သွားစေခဲ့သည်။ သူ့ကဲ့သို့သော ပါရမီရှင်နှင့် ခေတ်ပြိုင်ဖြစ်ရခြင်းမှာ အခြားသူများအတွက် မျှော်လင့်ချက်မဲ့စရာပင်။

ကျန်းမုနှင့် ပတ်သက်သော ဒဏ္ဍာရီများမှာလည်း သိုင်းလောကတွင် ပုံစံအမျိုးမျိုးဖြင့် ပျံ့နှံ့နေခဲ့သည်။ သာမန်လူများကမူ ထိုသတင်းများ အမှန်လား၊ အမှားလား ဆိုသည်ထက် လက်ဖက်ရည်ဝိုင်းများတွင် အမြိန်တဟင်း ပြောဆိုစရာ ခေါင်းစဉ်တစ်ခုအဖြစ် သဘောကျနေကြသည်။

နောက်ထပ် လေးနှစ်မှာ မျက်စိတစ်မှိတ်အတွင်း ကုန်ဆုံးသွားပြန်သည်။ ကျန်းမု ချင်းယွမ်ဂိုဏ်းသို့ ရောက်သည်မှာ ဆယ်နှစ်ရှိသွားပြီဖြစ်ကာ ယခုအခါတွင် လူလားမြောက်သော အရွယ်သို့ ရောက်ရှိခဲ့ပြီ ဖြစ်သည်။

သူသည် အရပ် ၁.၉ မီတာ (၆ ပေ ၃ လက်မခန့်) ရှိပြီး ချောမောခန့်ညားသော လူငယ်တစ်ဦး ဖြစ်လာသည်။ အမျိုးသမီး မြောက်မြားစွာမှာ သူ့ကိုမြင်သည်နှင့် စွဲလမ်းသွားကြပြီး တစ်သက်လုံး သူနှင့်သာ လက်ထပ်မည်ဟုပင် သစ္စာဆိုကြလေသည်။

"ဟူး... နောက်ဆုံးတော့ ဒီနေ့ကို ရောက်လာပြီပဲ။" ကျန်းမု သက်ပြင်းတစ်ချက် ချလိုက်သည်။ ဆယ်နှစ်! ဆယ်နှစ်တိတိ! သူသည် ဂိုဏ်းကြီးများသို့ လှည့်လည်ကာ ၎င်းတို့၏ သိုင်းပညာအားလုံးနီးပါးကို ကူးယူ၍ လေ့ကျင့်ခဲ့သည်။

ဤအချက်က သူ၏ သိုင်းပညာကို အဆင့်သစ်တစ်ခုသို့ ပို့ဆောင်ပေးခဲ့ပြီး သိုင်းပညာအားလုံးကို ပေါင်းစပ်ကာ 'စိတ်ဆန္ဒ' အဆင့်သို့ ရောက်ရှိစေခဲ့သည်။ သူ၏ ကိုယ်ပိုင်အဆင့်မှာလည်း 'မွေးရာပါနယ်ပယ်' ၏ ထိပ်ဆုံးသို့ ရောက်နေပြီဖြစ်သည်။ ကောင်းကင်နယ်ပယ် သို့ ရောက်ရန် အခွင့်အရေးတစ်ခုသာ လိုတော့သည်ဟု သူခံစားနေရသည်။

"ငါ ကောင်းကင်နယ်ပယ်ကို မရောက်သေးပေမယ့်၊ အခု ငါ့ရဲ့ အစွမ်းက မွေးရာပါနယ်ပယ် ကျွမ်းကျင်သူ အနည်းငယ်ကိုတောင် ကြက်ကလေး၊ ငှက်ကလေးတွေလို သတ်ပစ်ဖို့ လုံလောက်နေပြီ" ဟု ကျန်းမုက ပြုံးလျက် တွေးလိုက်သည်။ ၎င်းမှာ ကြွားလုံးထုတ်ခြင်း မဟုတ်ပေ။

ဤနှစ်များအတွင်း သူသည် အခြားဂိုဏ်းမှ တပည့်များကိုသာမက ဂိုဏ်းချုပ်များကိုပါ ချန်မထားဘဲ စိန်ခေါ်ခဲ့သည်။ လက်ကွက် အနည်းငယ်အတွင်းမှာပင် မွေးရာပါနယ်ပယ်ရှိ ဂိုဏ်းချုပ်များအားလုံးမှာ သူ့ကို ရှုံးနိမ့်ခဲ့ကြသည်။ သို့သော် ထိုဂိုဏ်းချုပ်များမှာ အရှက်ရမည်စိုးသဖြင့် သတင်းများကို ပိတ်ထားခဲ့ကြခြင်းသာ ဖြစ်သည်။

"အချိန်တွက်ကြည့်ရင်တော့ ချင်းယွမ်ဂိုဏ်းကို လာတိုက်မယ့်သူတွေ ဒီနေ့ ရောက်လာကြတော့မယ်။"

ကျန်းမုသည် ထရပ်လိုက်ပြီး ဂိုဏ်း၏ အရှေ့တံခါးဝတွင် စောင့်ဆိုင်းနေလိုက်သည်။ ထိုလူအားလုံးကို ဂိုဏ်းအပြင်ဘက်မှာပင် တားဆီးရန် သူပြင်ဆင်ထားသည်။ သူ၏ လက်ရှိအစွမ်းနှင့်ဆို

လျှင် ၎င်းမှာ လုံလောက်သည်ထက်ပင် ပိုနေပေတော့သည်။