အခန်း (၇၃) - လှိုင်းလေထန်လှသော ဂလက်ဆီတွင်း ပြည်တွင်းစစ်ကြီး
"ပုရောဟိတ်မင်းကြီး ပြောတာမှန်ပါတယ်၊ အခြားတစ်ဖက်ကကောင်တွေ အခုအချိန်မှာတော့ တကယ့်ကို ခေါင်းခဲနေလောက်ပြီဖြစ်ပြီး ဘယ်လိုမျိုး တန်ပြန်အစီအမံတွေ ထုတ်သုံးရမလဲဆိုတာ သိမှာမဟုတ်တော့ပါဘူး။"
"ဟမ်း... သူတို့က ငါတို့ အရင်က ကြုံတွေ့ခဲ့ဖူးတဲ့ ယဉ်ကျေးမှုအဖွဲ့တွေထက် နည်းနည်းလေး ပိုပြီး သန်မာရုံတင်မလား။ ငါတို့တွေ ဖျက်ဆီးခဲ့ဖူးတာပဲဟာ။ ၎င်းတို့ရဲ့ ကမ္ဘာဦးဖန်ဆင်းရှင် နတ်ဘုရားက ခုနကတင်ပဲ လှုပ်ရှားသွားခဲ့တာမလား။ ဘာရလဒ် ထွက်လာလို့လဲ။ နောက်ဆုံးတော့လည်း ရှုံးနိမ့်သွားခဲ့တာပဲ မဟုတ်လား!" ကျောက်ယွမ်မင်က မထီမဲ့မြင်ပြုဟန်ဖြင့် ပြောဆိုလိုက်သည်။
...
"ကျွန်ုပ်၏ အရှင်မြတ်ဘုရား... ယခုတစ်ကြိမ်မှာတော့ ကျွန်တော်တို့ဘက်က သေကျေပျက်စီးမှု အလွန်တရာ များပြားလှပါတယ်။ လေးဆယ့်ငါးလွှာမြောက် ကမ္ဘာအတွင်းရှိ စုန်းကဝေအားလုံးနီးပါး သေဆုံးသွားခဲ့ကြရပြီး၊ အဲဒီတိုက်ခိုက်မှုဟာ အခုအချိန်အထိ ပြင်ပဆီကို အစဉ်မပြတ် ဆက်လက်တိုးဝင်နေဆဲ ပါပဲ။" အန့်ရှင်းယောင်က ခါးသီးစွာ လျှောက်တင်လိုက်သည်၊ အခြေအနေက ယခုကဲ့သို့ ဖြစ်သွားလိမ့်မည်ဟု မည်သူက ထင်မှတ်ထားပါမည်နည်း။ စုန်းကဝေမျှော်စင် နှစ်ခုကို ပေါင်းစပ်ပြီး ၎င်းတို့၏နတ်ဘုရားကိုယ်တိုင်ပါ ဝင်ရောက်ကူညီခဲ့ပါလျက်နှင့်၊ ၎င်းတို့ ရှုံးနိမ့်ခဲ့ရဆဲပင်...
ချောင်မို သူ၏လက်နှစ်ဖက်ကို နောက်ပစ်လျက် တင်းကျပ်စွာ ဆုပ်ကိုင်ထားခဲ့သည် - "ဒါဟာ အခြားပြိုင်ဘက်ရဲ့ နောက်ဆုံးပိတ် ဝှက်ဖဲဖြစ်ဖို့ များပါတယ်။ စွမ်းပကားက ပိုပြီး ကြီးမားနေတာက ပုံမှန်ပါပဲ။ နောက်ပိုင်းကျရင်တော့ ငါတို့တွေ သူတို့နဲ့အတူ အင်အားပြုန်းတီးရေး စစ်ပွဲ ကို ဆင်နွှဲကြရတော့မယ်။"
အန့်ရှင်းယောင် သူ၏ခေါင်းကို မော့လိုက်မိသည်၊ ယခုကဲ့သို့ အခြေအနေမျိုးအထိ ဖြစ်နေတာတောင် ဆက်ပြီး စစ်တိုက်ရဦးမယ် ဟုတ်လား။ ငါတို့ ထွက်ပြေးလို့မရဘူးလား။ ဘာပဲဖြစ်ဖြစ် စုန်းကဝေမျှော်စင်က လွတ်လပ်စွာ ရွေ့လျားနိုင်တာပဲဟာ။
သို့သော်လည်း ချောင်မိုရော ကျန်းဖန်ပါ နှစ်ဖက်စလုံး၌ အခြားပြိုင်ဘက်ကို အပြတ်သတ် သတ်ဖြတ်ပစ်လိုသော စိတ်နှလုံး ရှိနေကြသည်ကို သူ မည်သို့ သိနိုင်ပါမည်နည်း။ နောက်ဆုတ်မယ် ဟုတ်လား။ ၎င်းက လုံးဝ မဖြစ်နိုင်ချေ၊ ဒါက အသေအလဲ တိုက်ခိုက်ရမယ့် စစ်ပွဲကြီး ဖြစ်ပေသည်!
အန့်ရှင်းယောင်သည် ချောင်မို၏ စကားကို မလွန်ဆန်ရဲသဖြင့် နာခံရန်သာ ရှိတော့သည်။
ထို့ကြောင့်ပင် လာမည့်နှစ်များအတွင်း၌ လူသားမျိုးနွယ်နှင့် စုန်းကဝေယဉ်ကျေးမှုအဖွဲ့တို့သည် နှစ်ပေါင်းရာချီတိုင်အောင် ကြာမြင့်မည့် စစ်ပွဲကြီးတစ်ခုကို စတင်ဆင်နွှဲခဲ့ကြတော့သည်။ ဤစစ်ပွဲကြီးက ဂလက်ဆီတစ်ခုလုံးနီးပါးကို ရိုက်ခတ်သွားခဲ့ချေပြီ!
နှစ်ဖက်စလုံး၏ ရှင်းလင်းခြင်းကို မခံရသေးဘဲ ကျန်ရှိနေသေးသော ယဉ်ကျေးမှုအဖွဲ့များသည် တုန်လှုပ်ခြောက်ခြားနေခဲ့ကြရပြီး၊ စကြာဝဠာအတွင်းရှိ ထိုအံ့ဩစရာကောင်းလှသော လှုပ်ရှားမှုကြီးများကို ကြည့်ကာ တစ်နေ့တာလုံး အိပ်မပျော်နိုင် ဖြစ်နေခဲ့ကြရသည်။ သေးငယ်လှသော နောက်ဆက်တွဲ ရိုက်ခတ်မှုလှိုင်းတစ်ခုကြောင့်ပင် မိမိတို့ အိပ်ပျော်နေစဉ်အတွင်း သေဆုံးသွားရမည်ကို အလွန်ပင် ကြောက်ရွံ့နေကြခြင်း ဖြစ်သည်။
"ငါက ဘာမကောင်းမှုတွေ ပြုလုပ်ခဲ့မိလို့များ ဒီဂလက်ဆီထဲမှာ လာပြီး မှီတင်းနေထိုင်မိရတာလဲ! ဒီသတ္တဝါဆန်း ယဉ်ကျေးမှုကြီး နှစ်ခုကတော့ တကယ်ပဲ!" ကြယ်တာရာအရှင်သခင်တစ်ဦးက ဒေါသတကြီး ဆဲရေးတိုင်းထွာလိုက်မိသည်၊ သူကဲ့သို့သော ကြယ်တာရာအရှင်သခင်ပေါင်းမှာ ရေတွက်၍မရနိုင်ချေ။ ယဉ်ကျေးမှုကြီး နှစ်ခုကြားရှိ တိုက်ပွဲကြီးကို အခြားသော ကြယ်တာရာအရှင်သခင်များ လုံးဝ ဖုံးကွယ်ထား၍ မရနိုင်ချေ။
အခြေအနေကို လာရောက်ကြည့်ရှုကြသော အမြော်အမြင်နည်းပါးလှသည့် ယဉ်ကျေးမှုအချို့ပင် ရှိခဲ့ဖူးသော်လည်း၊ ၎င်းတို့သည် အနီးသို့ပင် မချဉ်းကပ်နိုင်ခင်မှာတင် မသိရသော တိုက်ခိုက်မှုတစ်ခုကြောင့် လုံးဝဥဿုံ ပြာကျပျက်စီးသွားခဲ့ကြရသည်။
အလင်းနှစ် သန်းတစ်ရာအတွင်းရှိ ပတ်ဝန်းကျင်မှ ယဉ်ကျေးမှုအဖွဲ့အားလုံးသည် စတင်၍ ပြောင်းရွှေ့ပုန်းအောင်းကြတော့သည်။
သို့သော်လည်း လူသားမျိုးနွယ်နှင့် စုန်းကဝေယဉ်ကျေးမှုအဖွဲ့တို့သည် အဆက်မပြတ် ဖြစ်ပွားနေသော စစ်ပွဲကြီးအတွင်းမှာပင် ၎င်းတို့၏ နယ်မြေချဲ့ထွင်မှုကို ရပ်တန့်ခဲ့ခြင်း မရှိကြချေ။ နှစ်ပေါင်းတစ်ရာမျှအတွင်းမှာတင် လူသားမျိုးနွယ်သည် အလင်းနှစ် သန်းခြောက်ရာရှိသော နယ်မြေကို ထိန်းချုပ်နိုင်ခဲ့ပြီး၊ စုန်းကဝေယဉ်ကျေးမှုအဖွဲ့ကမူ စုန်းကဝေမျှော်စင် နှစ်ခုကို အားကိုး၍ အလင်းနှစ် သန်းလေးရာရှိသော နယ်မြေကို ထိန်းချုပ်ထားနိုင်ခဲ့သည်။
မူလက စုန်းကဝေယဉ်ကျေးမှုအဖွဲ့၏ တတိယမြောက် စုန်းကဝေမျှော်စင်ကို ဆောက်လုပ်နေခြင်း ဖြစ်သော်လည်း၊ ယင်းက လူသားမျိုးနွယ်တို့၏ လက်ချက်ဖြင့် အဖူးအငုံဘဝမှာတင် ဆိတ်သတ်ဖျက်ဆီးခြင်း ခံလိုက်ရသည်။ ထို့ကြောင့် နှစ်ဖက်စလုံး ဒေါသများ အပြည့်အဝ ထွက်နေခဲ့ကြရသည်။ ဒီနေ့ မင်း ငါ့နယ်မြေကို ဗုံးကြဲရင်၊ မနက်ဖြန် ငါ မင်းရဲ့ အိမ်ကို ချုံခိုဝင်ရောက် တိုက်ခိုက်ဖျက်ဆီးပစ်မယ် ဆိုတာမျိုး ဖြစ်နေခဲ့ကြသည်။
နတ်ဘုရားကောင်းချီး ကာလအပိုင်းအခြား နှစ် ၁၁၀၀ တွင် လူသားမျိုးနွယ်၏ ယဉ်ကျေးမှုအဆင့်အတန်းသည် အဆင့် ၄ ယဉ်ကျေးမှုအဆင့်အတွင်းသို့ အောင်မြင်စွာ ခြေချနိုင်ခဲ့ပြီး၊ စုန်းကဝေယဉ်ကျေးမှုနှင့် ဖြစ်ပွားခဲ့သော စစ်ပွဲမှာလည်း နှစ်ပေါင်းတစ်ရာ့ကိုးဆယ်တိတိ ကြာမြင့်ခဲ့ပြီ ဖြစ်သည်။ နှစ်ပေါင်းများစွာ စစ်မက်ဖြစ်ပွားခဲ့မှုကြောင့် ဂလက်ဆီတစ်ခုလုံး ပြိုကျပျက်စီးလုနီးပါး ဖြစ်ခဲ့ရချေပြီ။
လူသားမျိုးနွယ်သည် စကြာဝဠာကြီး၏ ရှုထောင့်လျှော့ချခြင်း ခံရမှုကို လုံးဝ ဂရုမစိုက်ကြချေ။ နှစ်ဘက်မြင်စက္ကူပြားများကို အလွန်အကျွံ သုံးစွဲခဲ့ကြမှုကြောင့် စုန်းကဝေယဉ်ကျေးမှုအဖွဲ့အား အလွန်တရာ ဒုက္ခရောက်စေခဲ့သည်။
ချောင်မိုပင်လျှင် မတတ်နိုင်တော့ချေ။ သူသည် မိမိ၏ ပါရမီဉာဏ်များကိုသာ ဆက်တိုက် စွန့်လွှတ်နေ၍ မဖြစ်နိုင်ပါဘူးမလား။ သူ၏ အမှိုက်ပါရမီဉာဏ်အားလုံးနီးပါး စွန့်လွှတ်ပြီးခဲ့ပြီဖြစ်ရာ၊ ကျန်ရှိနေသေးသော ပါရမီဉာဏ်များကိုမူ သူ လုံးဝ နှမြောနေခဲ့ချေပြီ။
ခိုကိုးရာမဲ့စွာဖြင့် စုန်းကဝေယဉ်ကျေးမှုအဖွဲ့သည် ဘုရင်ကို ကယ်တင်ရန်အတွက် ရုပ်သေးနယ်မြေများကိုသာ စတေးလိုက်ရုံမှတစ်ပါး အခြားမရှိတော့ပေ။ လူသားမျိုးနွယ်၏ နှစ်ဘက်မြင်စက္ကူပြား ဘက်မြင်လျှော့ချတိုက်ခိုက်မှုကို ရင်ဆိုင်ရသည့်အခါ ၎င်းတို့ ရှောင်ကွင်းထွက်ပြေးရုံသာ တတ်နိုင်တော့သည်။
သို့သော်လည်း စုန်းကဝေယဉ်ကျေးမှုအဖွဲ့၌လည်း ဖြေရှင်းနည်း ရှိနေခဲ့သည်။ မင်းက ရှုထောင့်လျှော့ချတိုက်ခိုက်မှုကို သုံးရတာ နှစ်သက်တယ် ဟုတ်လား။ ကောင်းပြီလေ၊ ဒါဆိုရင် ငါက စစ်မြေပြင်ကို မင်းရဲ့ နယ်မြေထဲအထိ ချဲ့ထွင်ပစ်မယ်! မင်းမှာ သတ္တိရှိရင် မင်းရဲ့ ကိုယ်ပိုင်အိမ်ကိုပါ ရှုထောင့်လျှော့ချပစ်လိုက်စမ်း!
သို့သော်လည်း လူသားမျိုးနွယ်သည် စည်းမျဉ်းများအတိုင်း လုံးဝ ကစားခြင်းမရှိသည်ကို မည်သူ သိနိုင်ပါမည်နည်း။ ရှုထောင့်လျှော့ချတာပဲ မဟုတ်လား။ ငါတို့ လေးဘက်မြင်အဆင့်ကို တက်လှမ်းနိုင်တာပဲဟာ! လုံးဝ ကြောက်ရွံ့နေစရာ မလိုချေ! ထို့အပြင် ကျန်းဖန်သည်လည်း ၎င်းတို့အား အနာဂတ်တွင် ဂလက်ဆီကြီးကို မူလအတိုင်း ပြန်လည်ပြုပြင်ပေးနိုင်လိမ့်မည်ဟု ကတိပေးထားခဲ့သည် မဟုတ်ပါလော! ထို့ကြောင့် ၎င်းတို့အတွက် မည်သည့်စိုးရိမ်ပူပန်မှုမျှ ရှိမနေခဲ့ချေ!
"ရူးသွပ်ကုန်ပြီ! အားလုံး ရူးသွပ်ကုန်ကြပြီ!" အန့်ရှင်းယောင်၏ မျက်ဝန်းများတွင် ထိတ်လန့်ခြောက်ခြားမှုများဖြင့် ပြည့်နှက်နေခဲ့သည်။ ၎င်းတို့သည် နှစ်ပေါင်းရာချီတိုင်အောင် တိုက်ခိုက်နေခဲ့ကြခြင်း ဖြစ်သည်! ဤနှစ်ပေါင်းရာချီအချိန်ကို ငါ ဘယ်လိုလုပ်ပြီး ဖြတ်သန်းခဲ့ရလဲဆိုတာ မင်းတို့ သိကြလား! ငါ တကယ်ပဲ ကောင်းကောင်း အိပ်မပျော်ခဲ့ရဘူး! ငါ မျက်လုံး မှိတ်လိုက်တာနဲ့ တစ်ပြိုင်နက် တစ်စုံတစ်ယောက်က - "အခြေအနေမကောင်းတော့ဘူး ပညာရှိအရှင်! အခြားပြိုင်ဘက်က နှစ်ဘက်မြင်စက္ကူပြား တိုက်ခိုက်မှုကို ထပ်ပြီး သုံးပြန်ပါပြီ!" ဟု လာရောက် သတင်းပို့လေ့ရှိသည်။
"ဟူး... ဒါဆိုရင် ပြောင်းရွှေ့ကြတာပေါ့..."
မိနစ်အနည်းငယ် ကြာပြီးနောက်တွင်မူ။
"အခြေအနေမကောင်းတော့ဘူး ပညာရှိအရှင်! အခြားပြိုင်ဘက်က နှစ်ဘက်မြင်စက္ကူပြား တိုက်ခိုက်မှုကို ထပ်ပြီးတော့ရော၊ ထပ်ပြီးတော့ရော သုံးနေပြန်ပါပြီ!"
"......"
...
နတ်ဘုရားကောင်းချီး ကာလအပိုင်းအခြား နှစ် ၁၂၀၀ တွင် လူသားမျိုးနွယ်သည် အခြားသော ရှုထောင့်လက်နက် အမျိုးအစားတစ်ခုကို ထပ်မံတီထွင်နိုင်ခဲ့ကြပြန်သော်လည်း၊ ဤရှုထောင့်လက်နက်သည် သုံးဘက်မြင်ဟင်းလင်းပြင်အပေါ်၌ သက်ရောက်ခြင်း မဟုတ်ချေ။ ယင်းက လေးဘက်မြင်ဟင်းလင်းပြင်အပေါ်၌ သက်ရောက်ခြင်းဖြစ်ပြီး၊ ယင်း၏ အမည်မှာ — သုံးဘက်မြင်အုတ်ခဲ ပင် ဖြစ်တော့သည်!!!
ဤအရာသည် လေးဘက်မြင်ဟင်းလင်းပြင်ကို သုံးဘက်မြင်ဟင်းလင်းပြင်အဖြစ်သို့ လျှော့ချပစ်မည့် နည်းလမ်း ဖြစ်သည်။ အကယ်၍ တိုက်ခိုက်ခြင်းခံရသော လေးဘက်မြင်ယဉ်ကျေးမှုအဖွဲ့သည် မိမိကိုယ်ကိုယ် သုံးဘက်မြင်သက်ရှိအဖြစ်သို့ မလျှော့ချပါက ချက်ချင်း သေဆုံးသွားပေလိမ့်မည်။
၎င်းတို့အနေဖြင့် ယခုကဲ့သို့သော လက်နက်မျိုးကို အဘယ်ကြောင့် တီထွင်ခဲ့ကြသနည်းဟူလျှင်၊ ဘာပဲဖြစ်ဖြစ် ဤအရာသည် စုန်းကဝေယဉ်ကျေးမှုအဖွဲ့အပေါ်၌ မည်သည့်တိုက်ခိုက်ရေးအကျိုးသက်ရောက်မှုမျှ ရှိမနေခဲ့သည်မှာ မှန်ပေသည်။ သို့သော်လည်း စကြာဝဠာကြီးက ယခုမျှအထိ ကျယ်ပြောလှရာ၊ တစ်နေ့နေ့တွင် လေးဘက်မြင်ယဉ်ကျေးမှုအဖွဲ့တစ်ခုခုနှင့် မဆုံတွေ့နိုင်ဘူးဟု မည်သူမျှ အာမမခံနိုင်ချေ။ ယင်းကို ကြိုတင်၍ တီထွင်ထားခြင်းက မသိရသော ချုံခိုတိုက်ခိုက်မှုများကို ကြောက်ရွံ့နေရန် မလိုတော့ခြင်း ဖြစ်သည်။ လူသားမျိုးနွယ် အမြဲကိုင်စွဲထားသော နိယာမတရားမှာ - ငါ မသုံးဘဲ နေချင်နေနိုင်မယ်၊ ဒါပေမဲ့ ငါ့မှာတော့ သေချာပေါက် ရှိနေရမယ်! ဟူ၍ ဖြစ်သည်။
နည်းပညာသည် အစဉ်မပြတ် တိုးတက်နေခဲ့ပြီး ယဉ်ကျေးမှုသည်လည်း လျင်မြန်စွာ အဆင့်မြင့်လာခဲ့သည်။ သို့သော်လည်း စုန်းကဝေယဉ်ကျေးမှုအဖွဲ့မှာမူ နည်းပညာပေါက်ကွဲမှု ရှိနေသော လူသားမျိုးနွယ်ကဲ့သို့ ယခုမျှအထိ ထူးဆန်းစွာ မဖြစ်ပေါ်နိုင်ခဲ့ချေ။ တိုးတက်မှုနှုန်းမှာ အမြဲတမ်း နှေးကွေးနေခဲ့ပြီး၊ ဤအရာ၏ ရလဒ်အနေဖြင့် ၎င်းတို့နှင့် လူသားမျိုးနွယ် ယဉ်ကျေးမှုကြားရှိ ကွာဟချက်မှာ အစဉ်မပြတ် ပိုမို၍ ဝေးကွာသွားခဲ့ရတော့သည်။ နှစ်ဖက်စလုံးကြားရှိ အခြေအနေမှာ အရင်တုန်းက အကြိတ်အနယ်ရှိခဲ့ခြင်းမှသည်၊ ယခုအခါတွင်မူ တစ်ဖက်ကနေ၍ ဗိုလ်ကျကာ အနင်းခြေခံနေရသည့် အခြေအနေသို့ ရောက်ရှိသွားခဲ့ရတော့သည်။
နတ်ဘုရားကောင်းချီး ကာလအပိုင်းအခြား နှစ် ၁၃၀၀ တွင် လူသားမျိုးနွယ်သည် အံ့ဩစရာကောင်းလှသော စီမံကိန်းကြီးတစ်ခုကို စတင်အကောင်အထည်ဖော်ရန် အကွက်ချစီစဉ်ခဲ့ကြသည်။ ဤစီမံကိန်းသာ အောင်မြင်စွာ အကောင်အထည်ဖော်နိုင်ခဲ့ပါက၊ စုန်းကဝေယဉ်ကျေးမှုအဖွဲ့အနေဖြင့် သေတွင်းကိုသာ ထိုင်စောင့်နေရုံမှတစ်ပါး အခြားမရှိတော့ပေ။
"စီမံကိန်း အကောင်အထည်ဖော်မှုကို စတင်လိုက်ကြစို့! ဤအရာသည် သေချာပေါက် အောင်မြင်ရမည် ဖြစ်ပြီး၊ ကျရှုံး၍ လုံးဝ မဖြစ်ရချေ! ငါတို့ အရှင်မြတ်အတွက်!"
"ငါတို့ အရှင်မြတ်အတွက်!"
ထို့ကြောင့် လူသားမျိုးနွယ်သည် တိတ်တဆိတ် စတင်ပြင်ဆင်ခဲ့ကြတော့သည်။ စုန်းကဝေယဉ်ကျေးမှုအဖွဲ့ သတိမပြုမိနိုင်သော နယ်ပယ်များတွင်၊ ဂလက်ဆီအတွင်းရှိ တွင်းနက်ကြီးများ၏ အရေအတွက်မှာ အစဉ်မပြတ် တိုးပွားလာခဲ့သည်။ ထို့အပြင် ဤတွင်းနက်ကြီးများ၏ အရွယ်အစားမှာ အလွန်တရာ ကြောက်မက်ဖွယ်ကောင်းလှပေသည်။ လူသားမျိုးနွယ် ယဉ်ကျေးမှု၏ နည်းပညာသည် အဆင့် ၄ သို့ ရောက်ရှိနေပြီဖြစ်သော်လည်း ၎င်းတို့ကို ထိန်းချုပ်ရန်မှာမူ အလွန်ပင် ခက်ခဲလှပေသည်။
စုန်းကဝေမျှော်စင်အတွင်း၌မူ။
"ဘာဖြစ်လို့ ဒီနေ့အထိ ဘာလှုပ်ရှားမှုမှ ရှိမနေရတာလဲ။ အခြားပြိုင်ဘက်က သူတို့ရဲ့ စရိုက်ကို ပြောင်းလဲလိုက်တာလား" အန့်ရှင်းယောင်က သံသယဖြစ်စွာဖြင့် မေးမြန်းလိုက်သည်။
"ကျွန်တော်လည်း မသိပါဘူးခင်ဗျာ၊ အခြားပြိုင်ဘက်က နှစ်ဘက်မြင်စက္ကူပြား တိုက်ခိုက်မှုကို သုံးတာကို ရှာဖွေမတွေ့ရှိရပါဘူး။ သူတို့ဆီမှာ ဒီလက်နက် ကုန်သွားတာ ဖြစ်နိုင်မလား" အခြားသော စုန်းကဝေများက ခန့်မှန်းလိုက်ကြသည်။
"ကုန်သွားတယ် ဟုတ်လား။ သူတို့တွေ အရင်တုန်းက မဆင်မခြင် သုံးစွဲခဲ့တာတွေကို မင်းတို့ မမြင်ခဲ့ကြဘူးလား!" အန့်ရှင်းယောင် သွားကြိတ်လိုက်မိသည်။
၎င်းတို့ အမြင့်မားဆုံး အခြေအနေတွင် ရှိစဉ်တုန်းက၊ လူသားမျိုးနွယ်သည် တစ်ရက်တည်းအတွင်းမှာတင် နှစ်ဘက်မြင်စက္ကူပြား ပေါင်းသိန်းချီကို ပစ်ထည့်ခဲ့ကြခြင်း ဖြစ်သည်! ထိုရှုထောင့်လျှော့ချမှုနှုန်းမှာ အလွန်တရာ ကြောက်စရာကောင်းလှပေသည်။ စုန်းကဝေယဉ်ကျေးမှုအဖွဲ့အနေဖြင့် နေ့တိုင်း နေရာပြောင်းရွှေ့နေခဲ့ရသည်ဟု ဆိုနိုင်သည်။ ထိုသို့ဖြစ်ပါလျက်နှင့် စုန်းကဝေမျှော်စင်ကြီးမှာ ပြိုကျပျက်စီးလုနီးပါး ဖြစ်ခဲ့ရချေပြီ။ အခြားသော စုန်းကဝေမျှော်စင်မှာလည်း အခြေအနေ အများကြီး ပိုကောင်းမနေခဲ့ချေ။ ထို့ကြောင့်ပင် စုန်းကဝေယဉ်ကျေးမှုအဖွဲ့သည် စုန်းကဝေမျှော်စင် နှစ်ခုကို တစ်ခုတည်းအဖြစ်သို့ ပေါင်းစပ်ရန် ဆုံးဖြတ်ခဲ့ကြခြင်း ဖြစ်သည်။ ဤနည်းလမ်းဖြင့် ၎င်းတို့အနေဖြင့် အခြားပြိုင်ဘက်၏ စစ်မျက်နှာနှစ်ခုခွဲ၍ တိုက်ခိုက်ခြင်းကို ခံရတော့မည် မဟုတ်ပေ။
သင်ခန်းစာ ရရှိသွားခဲ့ကြပြီးနောက်တွင်မူ၊ ၎င်းတို့၏ စုန်းကဝေမျှော်စင်ကို အလွန်ကြီးမားစွာ ထပ်မံမဆောက်လုပ်တော့ဘဲ၊ လွှမ်းမိုးထားသော နယ်ပယ်ကို အတတ်နိုင်ဆုံး လျှော့ချခဲ့ကြသဖြင့် ကာကွယ်ရေးအတွက် ပိုမိုလွယ်ကူသွားစေခဲ့သည်။ မူလ အလင်းနှစ် သန်းနှစ်ရာအထိ ကျယ်ပြန့်လှသော အလျားပမာဏမှနေ၍ အလင်းနှစ် တစ်ထောင်ခန့် အကွာအဝေးအထိ လျှော့ချခဲ့ခြင်း ဖြစ်သည်။ လျှော့ချလိုက်သော နယ်ပယ်ကြောင့် စုန်းကဝေမျှော်စင်အတွင်းရှိ ဟင်းလင်းပြင်မှာ ပိုမို၍ ပြီးပြည့်စုံသွားခဲ့ပြီး ဖောက်ထွက်ရန် ပိုမိုခက်ခဲသွားစေခဲ့သည်။
"မကြာသေးခင်က အခြားပြိုင်ဘက်က ဒီလိုမျိုး အဆုံးစွန်ဆုံး အဖျက်လက်နက်ကြီးကို အသုံးမပြုတာကို မသိရပေမဲ့၊ ဒါက သတင်းကောင်းတော့ လုံးဝ မဟုတ်နိုင်ဘူး။ ပြိုင်ဘက်က တစ်စုံတစ်ရာသော လှုပ်ရှားမှုကြီးကို သေချာပေါက် ပြင်ဆင်နေတာ ဖြစ်ရမယ်! ၎င်းတို့ရဲ့ လှုပ်ရှားမှုတွေကို ပိုပြီးတော့ သီးသန့် အာရုံစိုက်ထားကြစို့!" အန့်ရှင်းယောင်က ပြောလိုက်သည်။
"နားလည်ပါပြီ ပညာရှိအရှင်!" လူတိုင်း ခေါင်းငြိမ့်လိုက်ကြသည်။
ဤအချိန်တွင် နှစ်ဖက်စလုံးကြားရှိ စစ်ပွဲသည် အပြင်းထန်ဆုံးသော အမှတ်သို့ ရောက်ရှိနေခဲ့ပြီ ဖြစ်သည်။ လူသားမျိုးနွယ်သည်ပင်လျှင် ၎င်းတို့၏ မျိုးရိုးဗီဇစစ်သည်တော်များကို စေလွှတ်၍ စုန်းကဝေများနှင့် အစဉ်မပြတ် တိုက်ခိုက်စေခဲ့သည်။ ၎င်းတို့တွင်ရှိသော နတ်ဘုရားအမြုတေ ၏ လျှို့ဝှက်ကုဒ်စွမ်းရည်ကို အားကိုး၍၊ မျိုးရိုးဗီဇစစ်သည်တော် တစ်ဦးချင်းစီတိုင်းမှာ လူသားမျိုးနွယ် ယဉ်ကျေးမှု၏ ပုံစံငယ်လေးတစ်ခုစီ ဖြစ်ကြသည်။
စုန်းကဝေများနှင့် တိုက်ခိုက်သည့်အခါ ၎င်းတို့သည် အခြားပြိုင်ဘက်ကို အမြဲ ဖိနှိပ်ထားနိုင်ခဲ့သည်။ အကယ်၍ အမှန်တကယ် မနိုင်တော့ပါက၊ ၎င်းတို့သည် နတ်ဘုရားအမြုတေ၏ စနစ်ပံ့ပိုးမှုစွမ်းရည်ကို အသုံးပြု၍ လျှို့ဝှက်ကုဒ် ထုတ်သုံးကြတော့သည်! ဟင်... မင်းက ဒါက မတရားဘူးလို့ ပြောချင်တာလား။ ဒါကို သုံးတာက လျှို့ဝှက်ကုဒ် သုံးတာ ဟုတ်လား။ မင်းမှာလည်း စွမ်းရည်ရှိရင် ထုတ်သုံးလိုက်လေ။