ခန်း (၇၀) - အခြားစနစ်တစ်ခု ပေါ်ထွက်လာခြင်း

"ဘာဖြစ်တယ်!"

"ပညာရှိအရှင်... တိုက်ခိုက်မှုက အာနိသင်မရှိပါဘူး..."

စုန်းကဝေများသည် ယခုကဲ့သို့သော အခြေအနေမျိုးနှင့် ပထမဆုံးအကြိမ် ဆုံတွေ့ဖူးခြင်းဖြစ်ရာ အနည်းငယ် မှင်တက်သွားခဲ့ကြရသည်။

"မကောင်းတော့ဘူး! ကာကွယ်ရေးအဆင့်ကို မြှင့်တင်လိုက်စမ်း! စက်ကွင်းကိုးကွင်း ကာကွယ်ရေးစုန်းကဝေအတတ် ကို အသက်သွင်းစမ်း! ဟင်းလင်းပြင်စုန်းကဝေအတတ် ပိတ်ဆို့မှုကို စတင်လိုက်စမ်း!"

ပညာရှိအရှင်သည် တည်ငြိမ်မှု ကင်းမဲ့သွားခဲ့ချေပြီဖြစ်ရာ အမိန့်များကို တစ်ခုပြီးတစ်ခု ဆက်တိုက် ထုတ်ပြန်လိုက်တော့သည်။ စုန်းကဝေများသည်လည်း စုန်းကဝေမျှော်စင်ကြီးကို လျင်မြန်စွာ အသက်သွင်းလိုက်ကြသည်။ ကြီးမားလှသော အလင်းစက်ကွင်းများသည် စုန်းကဝေမျှော်စင်၏ အောက်ခြေမှနေ၍ တစ်ခုပြီးတစ်ခု မြင့်တက်လာခဲ့ချေပြီ။ စကြာဝဠာကြီးအတွင်း၌ အလင်းစက်ကွင်း ကိုးကွင်းတိတိ လွင့်မျောနေခဲ့ကြပြီး၊ ကြောက်မက်ဖွယ်ကောင်းသော စုန်းကဝေအင်အားစွမ်းအင်များကို စုစည်းနေကြသည်ဖြစ်ရာ တကယ့်ကို ရင်သပ်ရှုမောဖွယ် မြင်ကွင်းကြီးတစ်ခုပင် ဖြစ်သည်။

နှစ်ဘက်မြင်စက္ကူပြား အရှိန်ပြင်းစွာ ချီတက်နေသော ဟင်းလင်းပြင်အတွင်း တုန်ခါမှုများ ဖြစ်ပေါ်လာခဲ့ပြီး ဤနယ်ပယ်တစ်ခုလုံးကို ချက်ချင်းပင် ကန့်သတ်ပိတ်ဆို့ထားလိုက်တော့သည်။ ထို့နောက် ချက်ချင်းဆိုသလိုပင် အဖြူရောင် အလင်းကန့်လန့်ကာကြီးတစ်ခုက စုန်းကဝေမျှော်စင်ကို ပတ်ပတ်လည် ဝိုင်းအုံကာ လွှမ်းခြုံသွားခဲ့သည်။ သို့သော်လည်း နှစ်ဘက်မြင်စက္ကူပြားသည် ထိုဟင်းလင်းပြင်ပိတ်ဆို့မှုကို ရင်ဆိုင်ရသည့်တိုင် ယင်း၏အရှိန်အဟုန် လုံးဝလျော့ကျသွားခြင်းမရှိချေ၊ အကြောင်းမှာ သုံးဘက်မြင် ဟင်းလင်းပြင်ပိတ်ဆို့မှုဟူသည် နှစ်ဘက်မြင် ပြန့်ပြူးသည့် မျက်နှာပြင်တစ်ခုအပေါ်၌ မည်သည့်အကျိုးသက်ရောက်မှုမျှ မရှိနိုင်သောကြောင့် ဖြစ်သည်။

နှစ်ဘက်မြင်စက္ကူပြားသည် ဟင်းလင်းပြင်စုန်းကဝေအတတ် ပိတ်ဆို့မှုကို တိုက်ရိုက်ပင် ဥပေက္ခာပြုလိုက်ပြီး၊ ဤနယ်ပယ်ကို ဖြတ်သန်းကာ စုန်းကဝေမျှော်စင်ဆီသို့ အရှိန်ပြင်းစွာ ဆက်လက်ဦးတည်သွားခဲ့သည်။ စုန်းကဝေများမှာမူ ကမောက်ကမ ဖြစ်ကုန်ကြချေပြီ၊ ဤစက္ကူကဲ့သို့ ပါးလွှာလှသောအရာဝတ္ထုသည် ကြည့်ရသည်မှာ အန္တရာယ်မရှိသကဲ့သို့ ထင်ရသော်လည်း၊ ၎င်းမှာ ရန်သူက ထုတ်လွှတ်လိုက်သော တိုက်ခိုက်မှုဖြစ်သည်ဖြစ်ရာ လျှော့တွက်၍ လုံးဝမရနိုင်ချေ။

"အခြားမှော်အတတ်တွေနဲ့ ဆက်ပြီး တိုက်ခိုက်ကြည့်စမ်း!" ပညာရှိအရှင်က အမိန့်ပေးလိုက်သည်။ စုန်းကဝေမျှော်စင်သည် ကြောက်မက်ဖွယ်ကောင်းသော ထုတ်လွှတ်မှုမုဒ်ကို အသက်သွင်းလိုက်ပြီး အရပ်ရပ်မျက်နှာစာအားလုံးဆီသို့ အဆက်မပြတ် ဗုံးကြဲတိုက်ခိုက်တော့သည်။ သို့သော်လည်း နှစ်ဘက်မြင်စက္ကူပြားသည် ဤတိုက်ခိုက်မှုများကို 'လှည့်ပင်မကြည့်' ခဲ့ချေ။ တစ်မိနစ်တိတိ ပျံသန်းပြီးနောက်တွင်မူ နောက်ဆုံး၌ စုန်းကဝေမျှော်စင်၏ အနီးအနားဆီသို့ ရောက်ရှိသွားခဲ့တော့သည်။ နှစ်ဘက်မြင်စက္ကူပြား တစ်ချပ်ချင်းစီသည် စုန်းကဝေမျှော်စင်၏ အထက်၊ အောက်၊ ဝဲ၊ ယာတို့တွင် တိတ်ဆိတ်စွာဖြင့် ဆိုင်းငံ့နေခဲ့ကြသည်။

တိုက်ခိုက်မှု ရောက်ရှိမလာသေးသည်ကို မြင်တွေ့ရသောအခါ စုန်းကဝေများသည် လင်းလက်နေသော ထိုစက္ကူပြားလေးများကို ဖမ်းချုပ်ရန် စိတ်ကူးလိုက်ကြသော်လည်း၊ မည်သည့်ခြွင်းချက်မျှမရှိဘဲ ၎င်းတို့၏ နည်းလမ်းအားလုံး တစ်ခုပြီးတစ်ခု ဆက်တိုက် ကျရှုံးသွားခဲ့ရတော့သည်။

"ဝူး... ဝူး... ဝူး..."

အချိန်များ ကုန်လွန်သွားခဲ့သည်နှင့်အမျှ နှစ်ဘက်မြင်စက္ကူပြားသည် လျှပ်ခနဲ လျှပ်ခနဲ စတင်ဖြစ်ပေါ်လာခဲ့သည်။ စုန်းကဝေများ၏ စိတ်နှလုံးသည်လည်း တင်းကျပ်သွားခဲ့ရပြီး မမှိတ်မသုန် စိုက်ကြည့်နေခဲ့ကြသည်။

"နောက်ထပ် စက်ကွင်းကိုးကွင်း ကာကွယ်ရေးစုန်းကဝေအတတ်တစ်ခုကို ထပ်ပြီး အသက်သွင်းစမ်း!" ဘေးကင်းစေရန်အတွက် ပညာရှိအရှင်သည် ကာကွယ်ရေးစွမ်းအားကို ထပ်မံမြှင့်တင်လိုက်ခြင်း ဖြစ်သည်။ ခဏအကြာတွင် အခြားသော အဖြူရောင်ကောင်းကင်ကန့်လန့်ကာကြီးတစ်ခုက စုန်းကဝေမျှော်စင်ကို ထပ်မံလွှမ်းခြုံသွားခဲ့ပြန်သည်။

ဤအခိုက်အတန့်တွင်ပင် ဟင်းလင်းပြင်အစစ်ပူဖောင်းကို ပိတ်လှောင်ထားသော စွမ်းအားစက်ကွင်း ကန့်သတ်ချက် ပျောက်ကွယ်သွားခဲ့ပြီး၊ ကြောက်မက်ဖွယ်ကောင်းလှသည့် ရှုထောင့်လျှော့ချတိုက်ခိုက်မှုကြီး စတင်သက်ရောက်လာခဲ့တော့သည်။ ဟင်းလင်းပြင်သည် နှစ်ဘက်မြင်စက္ကူပြား၏ နှစ်ဘက်မြင်မျက်နှာပြင်ဆီသို့ တရွေ့ရွေ့နှင့် ပြိုလဲပျက်စီးလာခဲ့ရသည်။ ထိုဟင်းလင်းပြင်အတွင်းရှိ ဒြပ်ပစ္စည်းအားလုံး စုပ်ယူခြင်း ခံလိုက်ရပြီး၊ နှစ်ဘက်မြင်စက္ကူပြား၏ ပြန့်ပွားမှုအရှိန်နှုန်းကို မြှင့်တင်ရန်အတွက် အင်အားစွမ်းအင်အမြောက်အမြားကို လျှံထွက်စေခဲ့သည်။

နှစ်ဘက်မြင်စက္ကူပြား ပေါင်းတစ်သောင်းသည် ကြောက်မက်ဖွယ်ကောင်းသော 'ဝါးမြိုခြင်း' ခရီးစဉ်ကို စတင်ခဲ့ကြချေပြီ။ ၎င်းတို့ဖြတ်သန်းရာ လမ်းကြောင်းပေါ်ရှိ မည်သည့်ဒြပ်ပစ္စည်းမျှ လွတ်မြောက်နိုင်ခြင်း မရှိခဲ့ချေ။ စုန်းကဝေတို့ ဂုဏ်ယူဝင့်ကြွားနေခဲ့ကြသော စက်ကွင်းကိုးကွင်း ကာကွယ်ရေးကောင်းကင်ကန့်လန့်ကာကြီးသည်လည်း နှစ်ဘက်မြင်စက္ကူပြားများ၏ တိုက်စားမှုကို တရွေ့ရွေ့နှင့် အဆက်မပြတ် ခံနေရချေပြီ။

"ဒါက ဘယ်လိုမျိုး နည်းလမ်းလဲ!" စုန်းကဝေများ၏ မျက်နှာတွင် ထိတ်လန့်ခြောက်ခြားမှု အမူအရာများ ပေါ်ထွက်လာခဲ့ကြသည်။ ပညာရှိအရှင်မှာမူ ပို၍ပင် တည်ငြိမ်မှု ကင်းမဲ့သွားခဲ့ရသည် - "မြန်မြန်... မြန်မြန်လုပ်ကြစို့! ဟင်းလင်းပြင်တိုက်စားမှု ပြန့်ပွားလာတာကို ချက်ချင်း တားဆီးကြစမ်း!" စုန်းကဝေမျှော်စင်၏ အလင်းစက်ကွင်းများ လင်းလက်လာခဲ့ပြီး ကျယ်ပြန့်လှသော ဟင်းလင်းပြင်စုန်းကဝေအတတ်ကို အသက်သွင်းကာ၊ ဟင်းလင်းပြင်ကို ထိန်းချုပ်ပိတ်ဆို့ထားရန်နှင့် နှစ်ဘက်မြင်စက္ကူပြားက သုံးဘက်မြင်ဟင်းလင်းပြင်ကို တိုက်စားနေမှုကို တားဆီးရန် ကြိုးပမ်းတော့သည်။

သို့သော်လည်း လက်တွေ့မြေပြင်ကြီးက ၎င်းတို့အား ပြင်းထန်လှသော ထိုးနှက်ချက်တစ်ခု ပေးအပ်ခဲ့ချေပြီ၊ ၎င်းတို့ မည်သို့ပင် တားဆီးရန် ကြိုးပမ်းပါစေ မည်သည့်အကျိုးသက်ရောက်မှုမျှ အနည်းငယ်မျှပင် ရှိမနေခဲ့ချေ။ ၎င်းတို့အနေဖြင့် နှစ်ဘက်မြင်စက္ကူပြားသည် စုန်းကဝေမျှော်စင်၏ အစွန်းဘက်ဆီသို့ အစဉ်မပြတ် ပြန့်ပွားလာနေသည်ကို ခိုကိုးရာမဲ့စွာဖြင့် ထိုင်ကြည့်နေရုံမှတစ်ပါး အခြားမရှိတော့ပေ။

ရုတ်တရက် လူတိုင်း၏ စိတ်နှလုံး ထပ်မံ၍ တင်းကျပ်သွားခဲ့ရပြန်သည်။ အကယ်၍ စုန်းကဝေမျှော်စင်ကြီးပင်လျှင် တောင့်မခံနိုင်တော့ပါက၊ ၎င်းတို့အနေဖြင့် ထွက်ပြေးတိမ်းရှောင်ရန်အတွက် စတင်စုစည်းရတော့မည် ဖြစ်သည်။ မကြာမီ အလင်း၏ အရှိန်နှုန်းဖြင့် ပြိုလဲပျက်စီးနေသော နှစ်ဘက်မြင်စက္ကူပြားသည် စုန်းကဝေမျှော်စင်၏ အစွန်းဘက်နှင့် ထိတွေ့သွားခဲ့ချေပြီ။ စုန်းကဝေများ၏ စိုက်ကြည့်မှုအောက်တွင်ပင် စုန်းကဝေမျှော်စင်ကြီးသည် မည်သည့်ခုခံနိုင်စွမ်းမျှမရှိဘဲ နှစ်ဘက်မြင်မျက်နှာပြင်တစ်ခုအဖြစ်သို့ မျက်စိတစ်မှိတ်အတွင်း ပြိုလဲပြားချပ်သွားခဲ့ရတော့သည်။

"ပညာရှိအရှင်! ငါတို့တွေ ထပ်ပြီး စောင့်ဆိုင်းနေလို့ မဖြစ်တော့ဘူး။ ငါတို့ စက္ကန့်ပိုင်းမျှ စောင့်လိုက်တိုင်း စုန်းကဝေ သန်းပေါင်းရာချီ သေဆုံးနေရတာပါ! မြန်မြန်... အရှင်မြတ်ကို အကြောင်းကြားလိုက်ပါတော့!" ပညာရှိအရှင်၏ မျက်နှာမှာ အလွန်တရာ ဆိုးရွားနေခဲ့သော်လည်း၊ ယခုကဲ့သို့သောအခြေအနေမျိုးတွင်မူ ၎င်းတို့၏ ကိုးကွယ်ရာနတ်ဘုရားကိုသာ လှမ်း၍ခေါ်ရုံမှတစ်ပါး အခြားမရှိတော့ချေ၊ သို့မဟုတ်ပါက စုန်းကဝေမျှော်စင်ကြီးတစ်ခုလုံးသည် နောက်ဆုံးတွင် နှစ်ဘက်မြင် ဆီဆေးပန်းချီကားတစ်ချပ်အဖြစ် ပြားချပ်သွားရလိမ့်မည် ဖြစ်သည်။

ကံကောင်းလှသည်မှာ စုန်းကဝေမျှော်စင်ကြီးသည် အလွန်တရာ ကြီးမားလှပြီး အကျယ်အဝန်း အလင်းနှစ် သန်းတစ်ရာ ရှိပေသည်။ အကယ်၍ နှစ်ဘက်မြင်စက္ကူပြားက ယင်းကို လုံးဝဥဿုံ ဝါးမြိုပစ်ချင်လျှင်ပင် နှစ်ပေါင်း သန်းတစ်ရာခန့် အချိန်ကြာမြင့်ဦးမည် ဖြစ်သည်!

"ကျွန်ုပ်၏ အရှင်မြတ်ဘုရား... ကျွန်တော်မျိုးတို့ရဲ့ စုန်းကဝေမျှော်စင်ဟာ မသိရတဲ့ ယဉ်ကျေးမှုအဖွဲ့တစ်ခုရဲ့ တိုက်ခိုက်ခြင်းကို ခံနေရပါပြီ။ အခြားပြိုင်ဘက်က ကျွန်တော်မျိုးတို့ လုံးဝမခုခံနိုင်တဲ့ ထူးခြားတဲ့နည်းလမ်းတွေကို အသုံးပြုသွားခဲ့တာပါ။ စုန်းကဝေအမြောက်အမြားလည်း အစဉ်မပြတ် သေဆုံးနေရပါပြီ။ ကျေးဇူးပြုပြီး ကျွန်တော်မျိုးတို့ကို ကယ်တင်ပေးဖို့ အရှင်မြတ်ကိုယ်တိုင် လှုပ်ရှားပေးပါရန် တောင်းဆုပြုပါတယ်!" ပညာရှိအရှင်သည် နတ်ဘုရားရုပ်ထု၏ ရှေ့မှောက်တွင် ဒူးထောက်လှက် လေးနက်တည်ကြည်စွာဖြင့် ဆုတောင်းလိုက်တော့သည်။

မကြာမီမှာပင် နတ်ဘုရားရုပ်ထုသည် တုံ့ပြန်မှု ရှိလာခဲ့သည်။ နတ်ဘုရားအလင်းတန်းတစ်ခု ကျရောက်လာခဲ့သည်နှင့်အမျှ ထိုအလင်းတန်းထဲမှနေ၍ ပုံရိပ်တစ်ခု လှမ်းလှည့်ထွက်ပေါ်လာခဲ့ချေပြီ။

"ဘာကိစ္စလဲ။" ချောင်မို ပတ်ဝန်းကျင်ကို ဝေ့ဝဲကြည့်ရှုရင်း မေးမြန်းလိုက်သည်။ အန့်ရှင်းယောင်သည် 'မှတ်ဉာဏ်ကူးယူခြင်း စုန်းကဝေအတတ်' ကို လျင်မြန်စွာ အသက်သွင်းလိုက်ပြီး ယင်းကို အလင်းလုံးလေးတစ်ခုအတွင်း သိုလှောင်ကာ ဆက်သလိုက်သည်။ ချောင်မို ၎င်းကို လှမ်းယူ၍ ညှစ်ခြေလိုက်ရာ၊ မျက်စိတစ်မှိတ်အတွင်းမှာပင် မကြာသေးခင်က ဖြစ်ပျက်ခဲ့သမျှ အရာအားလုံးကို သူ အပြည့်အဝ သိရှိသွားခဲ့တော့သည်။

"မသိရတဲ့ ယဉ်ကျေးမှုအဖွဲ့... အဆင့်မြင့် တိုက်ခိုက်ရေးနည်းလမ်းတွေ..." ချောင်‌မို၏ မျက်ဝန်းများ လက်ခနဲ ဖြစ်သွားခဲ့သည်။ သူ၏ ပုံရိပ်သည် လျှပ်ခနဲဖြစ်သွားပြီး ပြင်ပသို့ ပေါ်ထွက်လာခဲ့သည်။ အစဉ်မပြတ် ပြိုလဲပျက်စီးနေသော ဟင်းလင်းပြင်ကို ကြည့်ရင်း သူ၏ အမူအရာသည် လေးနက်တည်ကြည်သွားခဲ့ရသည်။ ဤနည်းလမ်းက တကယ့်ကို ကြောက်စရာကောင်းလှပေသည်။ အကယ်၍ အဆင့် ၇ ကြယ်တာရာအရှင်သခင်၏ နတ်ဘုရားခန္ဓာကိုယ် စွမ်းအားမျိုးမရှိပါက၊ ယခုကဲ့သို့သော တိုက်ခိုက်မှုနှင့် ဝါးမြိုမှုဘေးမှ ရှောင်ကွင်းနိုင်ရန် မည်သို့မျှ မဖြစ်နိုင်ချေ။ ထို့အပြင် တိုက်ခိုက်မှုပြုလုပ်ထားသော နေရာပေါင်းမှာ တစ်သောင်းတိတိ ရှိနေခဲ့သည်။ ဤအရာက အဆင့် ၂ ယဉ်ကျေးမှုတစ်ခု အကောင်အထည်ဖော်နိုင်မည့် နည်းလမ်းမျိုး လုံးဝ မဟုတ်ချေ။

"ဒါက မင်းပဲလား..." မျက်စိတစ်မှိတ်အတွင်းမှာပင် ချောင်‌မို၏ နှလုံးသားထဲ၌ ခန့်မှန်းချက်အချို့ ရှိနေခဲ့ပြီ ဖြစ်သည်။ သူ ထပ်မံအချိန်ဆွဲမနေတော့ဘဲ စည်းမျဉ်းများ၏ စွမ်းပကားနှင့် ချက်ချင်း ဆက်သွယ်လိုက်တော့သည်။ သူ၏ လက်အောက်ရှိ အမှိုက်ပါရမီဉာဏ်အချို့ကို တန်ဖိုးအဖြစ် စနစ်တကျ စွန့်လွှတ်လိုက်ပြီးနောက်မှသာ၊ စည်းမျဉ်းများ၏ စွမ်းပကားကို လှုပ်ရှားပေးရန် လဲလှယ်နိုင်ခဲ့ခြင်း ဖြစ်သည်။

မျက်စိတစ်မှိတ်အတွင်းမှာပင် ကြောက်မက်ဖွယ်ကောင်းသော စည်းမျဉ်းများ၏ စွမ်းပကား သက်ရောက်လာခဲ့ချေပြီ။ အစဉ်မပြတ် ပြိုလဲပျက်စီးနေခဲ့သော ဟင်းလင်းပြင်သည် ချက်ချင်းပင် ရပ်တန့်သွားခဲ့တော့သည်။ ယခုအချိန်တွင် နှစ်ဘက်မြင်စက္ကူပြား၏ တိုက်ခိုက်မှုမှာ ပျောက်ကွယ်သွားခဲ့ပြီဖြစ်သော်လည်း၊ စည်းမျဉ်းများ၏ စွမ်းပကားသည် ပြိုလဲပျက်စီးသွားခဲ့ပြီးဖြစ်သော ဟင်းလင်းပြင်ကိုမူ မူလအတိုင်း ပြန်လည်မပြုပြင်ပေးခဲ့ချေ၊ ဘာပဲဖြစ်ဖြစ် ချောင်‌မို ပေးအပ်ခဲ့သော တန်ဖိုးမှာ ထိုမျှအထိ မလုံလောက်သောကြောင့် ဖြစ်သည်။ သို့သော်လည်း ချောင်‌မိုသည် ဤအရာကို ဂရုမစိုက်ပေ။ ဟင်းလင်းပြင်ကို မူလအတိုင်း ပြန်မပြုပြင်နိုင်လျှင်လည်း ဘာဖြစ်သနည်း။ စွန့်ပစ်လိုက်ရုံသာရှိသည်။ စကြာဝဠာကြီးက ယခုမျှအထိ ကျယ်ပြောလှရာ ဤမျှလောက်သော နယ်ပယ်လေး ပျက်စီးသွားခြင်းက ကြီးမားသော ကိစ္စတစ်ခု မဟုတ်ချေ။

...

"ပုရောဟိတ်မင်းကြီး... ပြိုင်ဘက်ရဲ့ ကမ္ဘာဦးဖန်ဆင်းရှင် နတ်ဘုရားက လှုပ်ရှားသွားခဲ့ပါပြီ။ သူ၏ နည်းလမ်းက တကယ့်ကို ကြောက်စရာကောင်းလှပါတယ်၊ နှစ်ဘက်မြင်စက္ကူပြားရဲ့ တိုက်ခိုက်မှုကိုတောင်မှ အမှန်တကယ် ရပ်တန့်သွားစေနိုင်ခဲ့တာပါ" လူသားမျိုးနွယ်သည် အနည်းငယ် တုန်လှုပ်ခြောက်ခြားသွားခဲ့ကြရသည်။ စည်းမျဉ်းများ၏ စွမ်းပကားဟူသည် အရာခပ်သိမ်း၏ အထက်မှာ တည်ရှိနေခြင်းဖြစ်ရာ ၎င်းတို့အနေဖြင့် အလွန်ပင် စိုးရိမ်ပူပန်သွားခဲ့ကြခြင်း ဖြစ်သည်။

ကျောက်ယွမ်မင် တစ်စုံတစ်ရာ ပြောဆိုရန် ပြင်ဆင်လိုက်စဉ်မှာပင်၊ ကွပ်ကဲမှုအခန်းအတွင်းသို့ ကျန်းဖန်၏ ပုံရိပ်သည် အမှန်တကယ်ပင် ပေါ်ထွက်လာခဲ့ချေပြီ။

"အရှင်မြတ်!" လူတိုင်း လျင်မြန်စွာဖြင့် ဦးညွှတ်အလေးပြုလိုက်ကြသည်။ ကျန်းဖန် လက်တစ်ချက် ဝှေ့ယမ်းလိုက်ပြီး ၎င်းတို့နှင့် စကားမ‌ပြောပဲ ပုံရိပ်ထဲရှိ ထိုအမျိုးသားကိုသာ မမှိတ်မသုန် စိုက်ကြည့်နေခဲ့သည်။ အခု‌‌လေးတင်စနစ်က သူ့အား ဤနေရာသို့ လာရောက်ရန် ရုတ်တရက် ပြောဆိုခဲ့ခြင်းဖြစ်ပြီး မည်သည့်အရာ ဖြစ်ပျက်နေသည်ကိုမူ သူ့အား ပြောပြခဲ့ခြင်း မရှိချေ။

မှောင်မိုက်သောအရိပ်ထဲမှ တိတ်တဆိတ် စောင့်ကြည့်နေသော ရဲ့ယွီသည် ပုံရိပ်ထဲရှိ ထိုအမျိုးသားကို ကြည့်လိုက်ပြီးနောက် သူ၏ အရှိန်အဝါကို အာရုံခံကြည့်လိုက်သည်။

မှန်ပေသည်၊ လုံးဝ မမှားနိုင်တော့ချေ... ဒါက မိမိနှင့် မျိုးနွယ်တူဖြစ်သော အရာ၏ အရှိန်အဝါပင် ဖြစ်သည်... ဆိုလိုသည်မှာ အခြားတစ်ဖက်မှ ထိုအမျိုးသားသည်လည်း အခြားစနစ်တစ်ခု၏ အိမ်ရှင်ဖြစ်ပြီး၊ သူ သေချာပေါက် သတ်ဖြတ်ရမည့် စနစ်လည်း ဖြစ်ပေသည်။

"စနစ်... အတိအကျပြောရရင် ဒါက ဘာဖြစ်တာလဲ" ကျန်းဖန် သူ၏ စိတ်ထဲမှနေ၍ မေးမြန်းလိုက်သည်။ သို့သော်လည်း ရဲ့ယွီသည် အချက်အလက်များကို အများကြီး ထုတ်ဖော်ပြောဆို၍မရသဖြင့် သဲလွန်စအချို့ကိုသာ ပေးအပ်နိုင်ခဲ့သည် -

【အိမ်ရှင်... ဤလူကို သတိထားပါ။ ဤလူ၏ ကံတရားနှင့် အခွင့်အလမ်းများသည် သင့်ထက် လုံးဝ နိမ့်ပါးလိမ့်မည် မဟုတ်ပါ။】

ဤသဲလွန်စကို ပေးအပ်ပြီးနောက်တွင်မူ ရဲ့ယွီသည် စည်းမျဉ်းများ၏ သတိပေးချက်ကို ချက်ချင်း ခံလိုက်ရတော့သည်။ သို့သော်လည်း ဤအရာက သာမန်သတိပေးချက်မျှသာ ဖြစ်ပြီး မည်သည့် လက်တွေ့ကျလှသော အပြစ်ပေးမှုမျှ ရှိမနေခဲ့ချေ။ နောင်တွင် ထပ်မံမပြုလုပ်သရွေ့ အဆင်ပြေပေသည်။

ကျန်းဖန် ဤစကားကို ကြားလိုက်ရသဖြင့် လန့်ဖျတ်သွားခဲ့ရပြီး သူ၏ မျက်ဝန်းများတွင် အံ့ဩမှုများဖြင့် ပြည့်နှက်သွားခဲ့ရသည်။ သူသည် အသုံးမကျသူတစ်ဦး ဖြစ်ခဲ့ဖူးသော်လည်း လူအတစ်ယောက်တော့ မဟုတ်ချေ၊ ဤသဲလွန်စ၏ နောက်ကွယ်မှ အဓိပ္ပာယ်ကို သူ ကောင်းမွန်စွာ သဘောပေါက်နားလည်နိုင်သည်။ သူသည် မိမိတည်ရှိနေသော ဤကမ္ဘာကြီးအတွင်း၌ အခြားစနစ်တစ်ခု အမှန်တကယ် ရှိနေလိမ့်မည်ဟု ထင်မှတ်မထားခဲ့ချေ။ ထို့အပြင် ယင်းက သူ၏ မျက်စိအောက်၌ ယခုကဲ့သို့ ဗြောင်ကျကျ ပေါ်ထွက်လာခဲ့ခြင်း ဖြစ်သဖြင့် ခြိမ်းခြောက်မှုအဆင့်အတန်းမှာလည်း အဆုံးမဲ့ မြင့်မားသွားခဲ့ရချေပြီ။

"စနစ်... ငါတို့ ဘာလုပ်ရမလဲ"

ကျန်းဖန် သူ၏ စိတ်ခံစားချက်ကို ပြန်လည်ညှိယူလိုက်ပြီး သူ၏ မျက်ဝန်းများမှာ လေးနက်တည်ကြည်သွားခဲ့သည်။ မျက်စိတစ်မှိတ်အတွင်းမှာပင် သတ်ဖြတ်လိုစိတ်များ ပေါက်ကွဲထွက်လာခဲ့သဖြင့် ပတ်ဝန်းကျင်ရှိ လူသားမျိုးနွယ်ဝင်များအားလုံးကို အလွန်တရာ ထိတ်လန့်တုန်လှုပ်သွားစေခဲ့ပြီး၊ ကျန်းဖန်၏ သတ်ဖြတ်လိုစိတ်က အဘယ်ကြောင့် ယခုမျှအသို့ ပြင်းထန်နေရသည်ကို ၎င်းတို့ လုံးဝ နားမလည်နိုင် ဖြစ်နေခဲ့ကြရသည်။

စကားပုံတစ်ခု ရှိသည်မဟုတ်ပါလော၊ တောင်တစ်တောင်တည်းတွင် ကျားနှစ်ကောင် အတူတကွ မမှီတင်းနိုင်ချေ။ ထိုအခြားစနစ်၏ အိမ်ရှင်ကို သူ သေချာပေါက် သုတ်သင်ရှင်းလင်းပစ်ရမည် ဖြစ်သည်။ သို့မဟုတ်ပါက သူ အိပ်ပျော်နိုင်တော့မည် မဟုတ်ချေ။

【သင်၏ နှလုံးသားဆန္ဒအတိုင်းသာ လုပ်ဆောင်ပါ... စနစ်အနေဖြင့် လိုအပ်သော ကူညီပံ့ပိုးမှုအားလုံးကို အပြည့်အဝ ပေးအပ်ပါမည်။】

ရဲ့ယွီသည်လည်း ကျန်းဖန်၏ ပြတ်သားလှသော အမူအရာအပေါ် အလွန်ပင် ကျေနပ်သွားခဲ့ရသည်။ ကံကောင်းလှသည်မှာ သူ၏ အိမ်ရှင်သည် စိတ်နှလုံး နုနယ်လှသော သူတော်စင်တစ်ဦး မဟုတ်ခဲ့ဘဲ၊ အချင်းချင်း မနှောင့်ယှက်ကြဘဲ ငြိမ်းချမ်းစွာ အတူတကွ နေထိုင်ကြစို့ဟူသော

အတွေးမျိုး ရှိမနေခဲ့ခြင်းပင် ဖြစ်တော့သည်။