ဝင်ချက်ပေးပါ့မယ်။

အခန်း (၆၈) - စမ်းသပ်ခြင်း

"ငါတို့တွေ အလုပ်ခိုးလုပ်ပြီး ကပ်သီးကပ်သတ် လုပ်ကြမလို့လား"

ဤစကားကို ကြားလိုက်ရသောအခါ ပညာရှိအရှင်၏ မျက်သူငယ်အိမ်များ ကျုံ့ဝင်သွားခဲ့သည်။ သူသည် လက်တစ်ဖက်ကို မြှောက်လိုက်ရာ စုန်းကဝေအတတ်တစ်ခုက ထိုစကားပြောသူကို ချက်ချင်းပင် အမှုန့်ဖြစ်အောင် ချေမှုန်းပစ်လိုက်တော့သည်။

"လူမိုက်! အရှင်မြတ်ရဲ့ မျက်စိအောက်မှာ ဒီလောက်တောင် ရိုင်းစိုင်းတဲ့စကားတွေကို ပြောရဲတယ်ပေါ့! ဘယ်သူက အလုပ်ခိုးလုပ်မယ်လို့ ပြောလို့လဲ။ ငါတို့က သတ်မှတ်ထားတဲ့ ပမာဏပြည့်မီအောင် လုပ်ဖို့ပဲ လိုတာ။ ငါတို့တွေ ပြိုင်ဆိုင်နေကြတယ်ဆိုပေမဲ့ တစ်ဖက်တည်းသားတွေပဲလေ!"

ပညာရှိအရှင်၏ စကားများမှာ တရားမျှတဟန်ရှိသော်လည်း၊ သေဆုံးသွားသူမှာမူ ထိုစကားများကို ကြားခွင့်မရှိတော့ချေ။ ပညာရှိအရှင်ကမူ ထိုအရာကို ဂရုမစိုက်ဘဲ ပတ်ဝန်းကျင်မှ လေထုကို သန့်စင်ရန် စုန်းကဝေအတတ်တစ်ခုကို အသုံးပြုလိုက်ပြီး - "သူ့နေရာမှာ အစားထိုးဖို့ တစ်ယောက်ကို လွှတ်လိုက်စမ်း" ဟု အမိန့်ပေးလိုက်သည်။

အခြားသူများမှာမူ အသက်ပြင်းပြင်းပင် မရှူရဲကြတော့ချေ။ ဤစုန်းကဝေမျှော်စင်၏ အရှင်သခင်မှာ ဤပညာရှိအရှင်ဖြစ်ပြီး အတွင်း၌ နေထိုင်ကြသော စုန်းကဝေအားလုံးမှာ ဤပညာရှိအရှင်၏ အစေအပါးများသာ ဖြစ်ကြသည်။ ဤစုန်းကဝေမျှော်စင်သည် အကျယ်အဝန်း အလင်းနှစ် သန်းငါးရာ ရှိပြီး အမြင့်မှာမူ အလင်းနှစ် နှစ်ဘီလီယံအထိ ရှိကြောင်း သိထားရမည် ဖြစ်သည်။ အတွင်းရှိ စုန်းကဝေ အရေအတွက်မှာလည်း ထရီလီယံပေါင်းများစွာ ရှိပေသည်။

မကြာမီမှာပင် စုန်းကဝေတစ်ဦး ရောက်ရှိလာခဲ့သည်။

"ပညာရှိအရှင်အား ဂါရဝပြုပါတယ်ခင်ဗျာ။"

"အင်း... ကြိုးကြိုးစားစား လုပ်စမ်း... အရင်လူလို စကားကို မဆင်မခြင် မပြောမိစေနဲ့။"

ပညာရှိအရှင်၏ မျက်ဝန်းများ မှေးစိုက်သွားပြီး ကြောက်မက်ဖွယ်ကောင်းသော အရှိန်အဝါတစ်ခု ဖြာထွက်လာခဲ့ရာ၊ လူတိုင်း၏ ရင်ဘတ်ကို ဖိနှိပ်ထားသကဲ့သို့ ဖြစ်နေပြီး အသက်ရှူရကျပ်မတတ် ခံစားလိုက်ရသည်။ သူသည် လူတစ်ယောက်တည်းကိုသာ ပြောနေခြင်းဟု ထင်ရသော်လည်း အခြားသူများကမူ ဤအရာသည် ၎င်းတို့အားလုံးအတွက် သတိပေးချက်ဖြစ်ကြောင်း သိရှိကြသည်။ အတော်ကြာပြီးနောက်တွင်မူ ပညာရှိအရှင်က သူ၏အရှိန်အဝါကို ပြန်လည်ရုပ်သိမ်းလိုက်သဖြင့် လူတိုင်း အသက်ပြန်ရှူနိုင်ကြတော့သည်။

"နားလည်ပါပြီ..."

ပညာရှိအရှင်သည် လူတိုင်း၏ အမူအရာကို ကြည့်ကာ ကျေနပ်စွာ ခေါင်းငြိမ့်လိုက်ပြီး - "ပတ်ဝန်းကျင်က ကြယ်စုတန်းနယ်မြေတွေကို ဆက်ပြီး စောင့်ကြည့်နေကြစို့။ တစ်စုံတစ်ရာ ထူးခြားတာနဲ့ ငါ့ကို ချက်ချင်း အသိပေး" ဟု အမိန့်ပေးလိုက်သည်။

......

ကမ္ဘာမြေဂြိုဟ် ကွပ်ကဲမှုဗဟိုဌာန။

လူတိုင်းသည် ဝေဝါးနေသော ပုံရိပ်ကိုကြည့်ကာ တွေးတောနေကြသည်။ တိုက်ခိုက်မှုက မြန်ဆန်လွန်းလှသဖြင့် လူသားမျိုးနွယ်အနေဖြင့် အသုံးဝင်သော အချက်အလက်များစွာကို မစုဆောင်းနိုင်ခဲ့ချေ။

"တည်နေရာကို ရှာတွေ့ပြီဆိုတော့ ကျန်တာက လွယ်သွားပါပြီ။ သူတို့ကိုပဲ ဆက်ပြီး စူးစမ်းခိုင်းထားလိုက်၊ ငါတို့ကတော့ ဘေးကနေ ဝင်ပြီး တိုက်ခိုက်ပေးမယ်" ဟု ကျောက်ယွမ်မင်က ပြောလိုက်သည်။ မကြာမီ လုပ်ဆောင်ရမည့် အစီအစဉ်များကို တစ်ခုပြီးတစ်ခု ချမှတ်လိုက်တော့သည်။

ဝန်ထမ်းအားလုံး စတင်လှုပ်ရှားကြပြီ ဖြစ်သည်။ ဤတိုက်ပွဲသည် ရန်သူ့ယဉ်ကျေးမှုကို စမ်းသပ်ခြင်းဖြစ်သလို ရန်သူ့ယဉ်ကျေးမှုနှင့် ပတ်သက်သည့် သတင်းအချက်အလက်များကို စုဆောင်းသည့် တိုက်ပွဲလည်း ဖြစ်သည်။

"လေးဘက်မြင်ဟင်းလင်းပြင်ထဲကို ဝင်ပြီး ပုန်းအောင်းလိုက်ကြ!"

"ဟင်းလင်းပြင်ထဲမှာရှိတဲ့ ငါတို့နဲ့ပတ်သက်တဲ့ ဒြပ်ဝတ္ထုဆိုင်ရာ အချက်အလက်အားလုံးကို နှောင့်ယှက်ပစ်လိုက်!"

"မှော်ယဉ်ကျေးမှုအဖွဲ့ရဲ့ အချက်အလက်တွေကို ပြုပြင်ပြောင်းလဲပစ်လိုက်!"

ကျောက်ယွမ်မင်က အမိန့်များကို တစ်ဆင့်ပြီးတစ်ဆင့် ထုတ်ပြန်လိုက်သည်။

အရာအားလုံးသည် စနစ်တကျ ဖြစ်ပေါ်နေခဲ့သည်။ ရုပ်သေးယဉ်ကျေးမှုအဖွဲ့သည် စစ်မျက်နှာကို ထိုစုန်းကဝေမျှော်စင်၏ ပတ်ဝန်းကျင်ရှိ ကြယ်စုတန်းနယ်မြေများအထိ ချဲ့ထွင်လိုက်သည်။ ၎င်းတို့သည် တစ်နေရာတည်းတွင် စုမနေဘဲ ခွဲခြား၍ တိုက်ခိုက်ခဲ့ကြသည်။ ယခုကဲ့သို့သော လှုပ်ရှားမှုကြီးကို စဉ်ဆက်မပြတ် ထောက်လှမ်းနေသော စုန်းကဝေမျှော်စင်က သဘာဝကျကျပင် ရှာဖွေတွေ့ရှိသွားခဲ့သည်။

"ပညာရှိအရှင်... အခြေအနေတစ်ခု ရှိနေပါတယ်။ အခြားယဉ်ကျေးမှုအဖွဲ့တစ်ခုက ငါတို့ကို လာရောက်ရန်စနေတယ်။ သူတို့က ငါတို့ကို တိုက်ခိုက်ချင်နေတုန်းပဲ ထင်တယ်"

"အိုး.. ဘယ်ယဉ်ကျေးမှုက ဒီလောက်တောင် သေချင်ဇောနဲ့ ဖြစ်နေရတာလဲ"

ပညာရှိအရှင်သည် သူ၏ ကျင့်ကြံခြင်းမှ ထွက်လာခဲ့ပြီး ပုံရိပ်ထဲရှိ မှော်ယဉ်ကျေးမှုအဖွဲ့ကို ကြည့်လိုက်သည်။

"ခုနကတင် ငါတို့ သုတ်သင်ရှင်းလင်းလိုက်တဲ့ ထောက်လှမ်းရေးယာဉ်စု ပိုင်ဆိုင်တဲ့ ယဉ်ကျေးမှုပဲ ဖြစ်ရမယ်" ဟု တစ်ဦးက ပြောလိုက်သည်။

"၎င်းတို့ကို နောက်တစ်ကြိမ် ထပ်ပြီး သုတ်သင်ရှင်းလင်းပစ်လိုက်" ပညာရှိအရှင်၏ မျက်ဝန်းများမှာ အေးစက်နေခဲ့သည်။

မကြာမီမှာပင် စုန်းကဝေမျှော်စင်သည် တိုက်ခိုက်မှုတစ်ခုကို စတင်ပြင်ဆင်တော့သည်။

"ရှူး..."

ကြောက်မက်ဖွယ်ကောင်းသော တိုက်ခိုက်မှုသည် လူသားမျိုးနွယ်၏ ရုပ်သေးယဉ်ကျေးမှု စခန်းဆီသို့ တိုက်ရိုက် ဦးတည်သွားခဲ့သည်။

"ဂမ်မာရောင်ခြည် ပေါက်ကွဲမှု... ပစ်လွှတ်လိုက်ပြီ!"

"ဝူး..."

ရုပ်သေးယဉ်ကျေးမှုအဖွဲ့ကလည်း တန်ပြန်တိုက်ခိုက်လိုက်သည်။

အလင်းတန်းနှစ်ခုသည် မျက်စိတစ်မှိတ်အတွင်းမှာပင် ထိပ်တိုက်တွေ့ဆုံသွားခဲ့ပြီး ကြောက်မက်ဖွယ်ကောင်းသော တုန်ခါမှုများကို ဖြစ်ပေါ်စေခဲ့သည်။ ပတ်ဝန်းကျင်ရှိ ကြယ်တာရာများသည် ထိုရိုက်ခတ်မှုလှိုင်းများကြောင့် တစ်စစီ ပျက်စီးသွားခဲ့ရတော့သည်။

"သူတို့က တကယ်ပဲ တားဆီးနိုင်ခဲ့တာလား!"

စုန်းကဝေများ အလွန်အမင်း အံ့အားသင့်သွားကြပြီး ပညာရှိအရှင်သည်လည်း အနည်းငယ် စိတ်ဝင်စားသွားခဲ့သည်။ ၎င်းတို့နှင့် ရင်ဆိုင်ယှဉ်ပြိုင်နိုင်သော ယဉ်ကျေးမှုတစ်ခု ပေါ်မလာခဲ့သည်မှာ မည်မျှကြာခဲ့ပြီနည်း။ သူ၏ စုန်းကဝေမျှော်စင်သည် ယနေ့တွင် အဝစားရတော့မည်လားဟု သူ တွေးတောလိုက်မိသည်။

"ဒါက သာမန်ကာလျှံကာ တိုက်ခိုက်မှုတစ်ခုပဲ ရှိသေးတာ။ သူတို့ကို နောက်ထပ် အနည်းငယ်လောက် ထပ်ပေးလိုက်စမ်း။ သူတို့ ဘယ်လောက်အထိ တောင့်ခံနိုင်မလဲဆိုတာ ငါ သိချင်တယ်" ဟု ပညာရှိအရှင်က အမိန့်ပေးလိုက်သည်။ အခြားသော စုန်းကဝေများမှာလည်း နှောင့်နှေးခြင်းမရှိဘဲ အဆက်မပြတ် တိုက်ခိုက်မှုများကို စတင်တော့သည်။

လူသားမျိုးနွယ်ဘက်ကမူ ၎င်းတို့၏ နည်းဗျူဟာကို ပြောင်းလဲခြင်း မရှိခဲ့ချေ။ ၎င်းတို့သည် ထိပ်တိုက်ရင်ဆိုင်ပြီး အခြားပြိုင်ဘက်၏ နည်းလမ်းအားလုံးကို အတင်းအကြပ် ဖော်ထုတ်စေလိုခြင်း ဖြစ်သည်။

"တိုက်ခိုက်ရေးနည်းလမ်းချင်း ပြိုင်ဆိုင်တာပဲဟာ... ငါတို့ ဘယ်သူ့ကိုမှ မကြောက်ဘူး!"

"ဂမ်မာရောင်ခြည် ပေါက်ကွဲမှုကို ဆက်ပြီး တိုက်ခိုက်စမ်း!"

တွင်းနက်ကြီးများထဲမှ အင်အားစွမ်းအင်များကို ရယူနိုင်သည့် နည်းပညာရှိထားသဖြင့် လူသားမျိုးနွယ်သည် အင်အားကုန်ခမ်းသွားမည်ကို လုံးဝ စိုးရိမ်စရာမရှိချေ။ ထို့အပြင် ၎င်းတို့သည် အလင်းနှစ် သန်းငါးရာရှိသော နယ်မြေကို အုပ်စိုးထားသည်မဟုတ်ပါလော။

နှစ်ဖက်စလုံးသည် ပြင်းထန်စွာ တိုက်ခိုက်နေကြသဖြင့် ပတ်ဝန်းကျင်ရှိ ကြယ်စုတန်းနယ်မြေအားလုံး အဆက်မပြတ် တုန်ခါနေခဲ့ရသည်။ အကယ်၍ အနီးအနား၌ အခြားသော ယဉ်ကျေးမှုများသာ ရှိနေပါက ထိုရိုက်ခတ်မှုလှိုင်းများဖြင့်တင် ထိုယဉ်ကျေးမှုများ အကြိမ်ကြိမ် ပျက်စီးသွားလောက်ပေသည်။

"ပညာရှိအရှင်... သာမန်နည်းလမ်းတွေနဲ့တော့ ပြိုင်ဘက်ကို အနိုင်မရနိုင်ပုံပဲ။ ပြိုင်ဘက်ရဲ့ ယဉ်ကျေးမှုအဆင့်အတန်းက မနိမ့်ပါဘူး၊ အနည်းဆုံးတော့ အဆင့် ၂ ယဉ်ကျေးမှုပဲ"

"ဒါဆိုရင် တိုက်ခိုက်မှုအဆင့်ကို မြှင့်တင်လိုက်ပြီး 'စက်ကွင်းအဆင့်' တိုက်ခိုက်မှုတွေကို သုံးစမ်း!" ဟု ပညာရှိအရှင်က ပြောလိုက်သည်။

စက်ကွင်းအဆင့် တိုက်ခိုက်မှုဟူသည် 'ကြယ်စုတန်းအဆင့်' တိုက်ခိုက်မှုဟုလည်း လူသိများသည်။ တစ်ချက်တည်းနှင့်ပင် ကြယ်စုတန်းနယ်မြေတစ်ခုကို ဖျက်ဆီးပစ်ရန် လုံလောက်လှပေသည်။ ဤအရာသည် ၎င်းတို့ယဉ်ကျေးမှု၏ သီးသန့်ဝေါဟာရ ဖြစ်သည်။ တိုက်ခိုက်မှုပြင်းအားကို 'သာမန်အဆင့်' နှင့် 'စက်ကွင်းအဆင့်' ဟူ၍ ခွဲခြားထားသည်။ စက်ကွင်းအဆင့်တွင် အဆင့်ကိုးဆင့်ရှိပြီး စုန်းကဝေများ၏ နယ်မြေကိုးခုနှင့် ကိုက်ညီပေရာ၊ ၎င်းမှာ 'စက်ကွင်းတစ်ကွင်း စုန်းကဝေ' မှသည် 'စက်ကွင်းကိုးကွင်း စုန်းကဝေ' အထိ ဖြစ်သည်။

"နားလည်ပါပြီ။"

စုန်းကဝေအားလုံး လှုပ်ရှားကြပြီး စုန်းကဝေမျှော်စင်အတွင်းရှိ အင်အားစွမ်းအင်များကို စုစည်းကာ တိုက်ခိုက်ရန် ပြင်ဆင်တော့သည်။

အပြင်ဘက်၌မူ -

လူသားမျိုးနွယ်၏ မျက်နှာပြင်တွင် စုန်းကဝေမျှော်စင်၏ အောက်ခြေမှနေ၍ အဖြူရောင် အလင်းစက်ကွင်းတစ်ခု ဖြည်းညှင်းစွာ မြင့်တက်လာသည်ကို မြင်တွေ့လိုက်ရသည်။ ကြောက်မက်ဖွယ်ကောင်းသော အရှိန်အဝါတစ်ခုသည် ပတ်ဝန်းကျင်ရှိ ကြယ်စုတန်းနယ်မြေအားလုံးဆီသို့ ဖြာထွက်သွားခဲ့သည်။ ဤအလင်းစက်ကွင်း၏ အချင်းဝက်မှာ စုန်းကဝေမျှော်စင်၏ အောက်ခြေအချင်းဝက်နှင့် ညီမျှနေပြီး အလင်းနှစ် သန်းငါးဆယ်အထိ ရှိပေသည်!

"တကယ့်ကို ကြီးမားလှတဲ့ အလင်းစက်ကွင်းပါပဲလား!"

လေးဘက်မြင်ဟင်းလင်းပြင်ရှိ လူသားမျိုးနွယ်သည် အနည်းငယ် အံ့အားသင့်သွားကြသော်လည်း အလွန်အမင်း ထိတ်လန့်နေခြင်း မရှိခဲ့ချေ။ ဤအလင်းစက်ကွင်းသည် ကြည့်ရသည်မှာ ကြောက်စရာကောင်းသော်လည်း၊ ယခုကဲ့သို့ ကျယ်ပြန့်သော ဧရိယာကို လွှမ်းခြုံထားသော အလင်းစက်ကွင်းတွင် ကြယ်တာရာပေါင်း ဆယ်သန်းခန့်၏ အင်အားစွမ်းအင်သာ ပါရှိပေသည်။ ဤအလင်းစက်ကွင်းမှာ စုန်းကဝေမျှော်စင်၏ စွမ်းအင်သိုလှောင်ရာနေရာဖြစ်နိုင်ကြောင်း ၎င်းတို့ ခန့်မှန်းလိုက်ကြသော်လည်း ယခုကဲ့သို့ ကြီးမားလှသော စုန်းကဝေမျှော်စင်တွင် ထိုကဲ့သို့သော အလင်းစက်ကွင်းပေါင်း မည်မျှအထိ ရှိနေမည်လဲဆိုသည်ကိုမူ ၎င်းတို့ မသိရှိကြချေ။

"ပုရောဟိတ်မင်းကြီး... ပြိုင်ဘက်က တိုက်ခိုက်မှုပြင်းအားကို မြှင့်တင်ဖို့ ပြင်ဆင်နေပုံရတယ်။ ငါတို့ မှော်ယဉ်ကျေးမှုအဖွဲ့ကို ပေးထားတဲ့ နည်းပညာတွေနဲ့တော့ တားဆီးနိုင်မှာ မဟုတ်ဘူး" ဟု တစ်ဦးက ပြောလိုက်သည်။

ကျောက်ယွမ်မင်ကလည်း သဘာဝကျကျပင် သိရှိထားပြီးသားဖြစ်သည် - "ဒါဆိုရင် ငါတို့က သူတို့အစား ဝင်ပြီး လှုပ်ရှားပေးရမှာပေါ့၊ ပြီးတော့ မှော်ယဉ်ကျေးမှုအဖွဲ့က တိုက်ခိုက်လိုက်တာလို့ပဲ ဟန်ဆောင်ခိုင်းလိုက်။ ဟင်းလင်းပြင် သယ်ယူပို့ဆောင်ရေးကို စတင်လိုက်ကြစို့၊ ပြိုင်ဘက်ကို မီးရှူးမီးပန်းတွေအဖြစ် စူပါနိုဗာအချို့ ပေးလိုက်ကြမယ်!"

"ဟင်းလင်းပြင် သယ်ယူပို့ဆောင်ရေးကို စတင်နေပါသည်..."

"ပစ်မှတ်ရဲ့ ပတ်ဝန်းကျင်က ဟင်းလင်းပြင်ကို ပြိုင်ဘက်က ပိတ်ဆို့ပြီး အေးခဲထားတယ်လို့ ယူဆရပါတယ်..."

"ကုဒ်ဖြည်ခြင်းကို စတင်နေပါသည်..."

"ကုဒ်ဖြည်မှု အောင်မြင်ပါပြီ... ဟင်းလင်းပြင်အခြေအနေ ချိတ်ဆက်မှုကို စတင်နေပါသည်!"

ဤအချိန်တွင် စုန်းကဝေမျှော်စင်သည် အင်အားစွမ်းအင်များကို စုပ်ယူလျက် တိုက်ခိုက်ရန် ပြင်ဆင်နေဆဲဖြစ်သော်လည်း၊ ရုတ်တရက် စုန်းကဝေတစ်ဦးက အော်ဟစ်လိုက်သည်။

"ပညာရှိအရှင်... ပတ်ဝန်းကျင်က ဟင်းလင်းပြင်က ထိန်းချုပ်မှု လွတ်သွားပါပြီ။ ပြိုင်ဘက်က ဟင်းလင်းပြင်တိုက်ခိုက်မှုတစ်ခုကို ပြင်ဆင်နေတာလို့ ယူဆရပါတယ်!"

"အဆင့် ၂ ယဉ်ကျေးမှုတစ်ခုမှာ ဒီလိုမျိုး နည်းပညာရှိနေတာလား"

ပညာရှိအရှင်သည် ပထမဆုံးအကြိမ်အဖြစ် ထိတ်လန့်သွားသော အမူအရာကို ပြသလိုက်သည်။ ၎င်းတို့၏ လက်ထဲမှနေ၍ ဟင်းလင်းပြင်ထိန်းချုပ်မှုကို ရယူနိုင်သည်ဆိုလျှင် အခြားပြိုင်ဘက်မှာ သာမန်အဆင့် ၂ ယဉ်ကျေးမှု မဟုတ်နိုင်တော့ချေ။

"မြန်မြန် ပစ်လွှတ်လိုက်..."

ပညာရှိအရှင် စကားမဆုံးခင်မှာပင်၊ နောက်တစ်စက္ကန့်၌ မျက်စိတစ်မှိတ်အတွင်းမှာပင် စုန်းကဝေမျှော်စင်၏ ပတ်ဝန်းကျင်၌ စူပါနိုဗာ ကိုးစင်း ပေါ်ထွက်လာခဲ့တော့သည်။ ဤစူပါနိုဗာများ၏ အရွယ်အစားမှာ အလင်းနှစ် သန်းတစ်ရာရှိသော စုန်းကဝေမျှော်စင်နှင့် နှိုင်းယှဉ်လျှင် အလွန်ပင် သေးငယ်လှပေသည်။

သို့သော်လည်း စုန်းကဝေများမှာမူ အလွန်ပင် ထိတ်လန့်သွားကြသည်။ ယခုကဲ့သို့ ကြယ်တာရာများ ပေါက်ကွဲခြင်း၏ စွမ်းပကားမှာ 'စက်ကွင်းခုနစ်ကွင်း' တိုက်ခိုက်မှုနှင့် နှိုင်းယှဉ်နိုင်သောကြောင့် ဖြစ်သည်။ စုန်းကဝေမျှော်စင်သည် စကြာဝဠာအတွင်းရှိ ဒြပ်ပစ္စည်းများဖြင့် တည်ဆောက်ထားခြင်းဖြစ်ရာ ယခုကဲ့သို့သော ပေါက်ကွဲမှုဒဏ်ကို တောင့်ခံနိုင်မည် မဟုတ်ချေ!

"မကောင်းတော့ဘူး! စုန်းကဝေအတတ်၊ ဒီကြယ်တွေကို ပိတ်ဆို့လိုက်စမ်း!"

ပညာရှိအရှင်သည် တည်ငြိမ်မှု ကင်းမဲ့သွားခဲ့ချေပြီ။ အခြားပြိုင်ဘက်က ယခုကဲ့သို့ ရက်ရက်စက်စက် ကစားလိမ့်မည်ဟု သူ မည်သို့ သိနိုင်ပါမည်နည်း။ စုန်းကဝေများသည် တိုက်ခိုက်မှုကို ချက်ချင်း ရပ်ဆိုင်းလိုက်ကြပြီး စူပါနိုဗာ ကိုးစင်းကို ပိတ်ဆို့ရန်အတွက် ပစ်မှတ်ထားပြင်ဆင်ကြတော့သည်။

၎င်းတို့ လျင်မြန်စွာ လှုပ်ရှားခဲ့ကြသော်လည်း၊ စူပါနိုဗာ သုံးစင်းမှာမူ အဝေးတစ်နေရာမှနေ၍ လူသားမျိုးနွယ်တို့၏ ဖောက်ခွဲဖျက်ဆီးခြင်းကို ခံလိုက်ရချေပြီ။

"ဝုန်း!!!"

ကြောက်မက်ဖွယ်ကောင်းသော စူပါနိုဗာ ပေါက်ကွဲမှုကြီးသည် စုန်းကဝေမျှော်စင်ပေါ်တွင် ဟာကွက်ကြီး သုံးခုကို ဖြစ်ပေါ်စေခဲ့သည်။ ယင်းကို ဟာကွက် သုံးခုမျှသာဟု မထင်လိုက်ပါနှင့်၊ စုန်းကဝေမျှော်စင်ကြီးက မည်မျှအထိ ကြီးမားသနည်း။ ထိုဟာကွက် သုံးခုကြောင့်ပင်လျှင် အတွင်း၌ နေထိုင်နေကြသော စုန်းကဝေ သန်းပေါင်းရာချီမှာ ထိုကြောက်မက်ဖွယ်ကောင်းသော ပေါက်ကွဲမှုကြီးနှင့်အတူ ချက်ချင်းပင် ပြာကျပျက်စီးသွားခဲ့ရတော့သည်။

"တောက်။ စုန်းကဝေမျှော်စင်ကို အပြည့်အဝ အသက်သွင်းပြီး ဟင်းလင်းပြင်ချိတ်ဆက်မှုကို ဖြတ်တောက်လိုက်စမ်း!"

ပညာရှိအရှင်သည် ပထမဆုံးအကြိမ်အဖြစ် သူ၏ ဒေါသကို မထိန်းနိုင် ဖြစ်သွားခဲ့ရသည်။ လူသားမျိုးနွယ်၏ လက်ထဲမှနေ၍ ထိန်းချုပ်မှုကို ပြန်လည်ရယူရန်အတွက် အားထုတ်မှုများစွာ ပြုလုပ်ခဲ့ရသည်။

ထို့ကြောင့် ပေါက်ကွဲမှုအတွင်း ဖြစ်ပေါ်နေသော တွင်းနက်ကြီးများသည် စုန်းကဝေမျှော်စင်၏ ပတ်ဝန်းကျင်မှ ချက်ချင်း ပျောက်ကွယ်သွားခဲ့သဖြင့် စုန်းကဝေများ သက်ပြင်းချနိုင်ကြတော့သည်။

"စုန်းကဝေအတတ်၊ ပြန်လည်ပြုပြင်စမ်း!"

ခဏအကြာတွင် စုန်းကဝေမျှော်စင်ပေါ်၌ အလင်းစက်ကွင်း သုံးခု လင်းလက်လာခဲ့သည်။ အဖြူရောင်အလင်းတန်း တစ်ချက် လက်သွားပြီးနောက် ထိုဟာကွက် သုံးခုမှာ လုံးဝဥဿုံ ပြန်လည်ကောင်းမွန်သွားခဲ့တော့သည်။