အခန်း (၆၃) - ဂြိုဟ်အဆင့်မြှင့်ကတ်နှင့် ပါရမီပေါင်းစပ်ကတ်

နောက်ထပ် SSS အဆင့်ရှိသော ပါရမီဉာဏ်တစ်ခုကို ထပ်မံရရှိလိုက်သည်ကို ကြည့်ရင်း ကျန်းဖန်သည် အလွန်ပင် စိတ်ကျေနပ်သွားခဲ့ရသည်။ ယခုအခါ သူပိုင်ဆိုင်ထားသော ပါရမီဉာဏ်များမှာ များပြားလွန်းလှသဖြင့် သူကိုယ်တိုင်ပင် အကုန်အစင် ရေတွက်ရန် ခက်ခဲနေချေပြီ။

ဤ 'အရာခပ်သိမ်းအား သက်ရှိအသွင်ပြောင်းခြင်း' ဟူသော ပါရမီဉာဏ်သည် စာသားအရကြည့်လျှင် သာမန်ကာလျှံကာဟု ထင်ရသော်လည်း ၎င်းမှာ ယင်း၏စစ်မှန်သော အသုံးဝင်ပုံကို မရှာဖွေရသေးသောကြောင့်သာ ဖြစ်သည်။ သူ၏စိတ်ထဲ၌ ဤပါရမီဉာဏ်သည် အနာဂတ်တွင် သေချာပေါက် ကြီးမားသောအခန်းကဏ္ဍမှ ပါဝင်လာလိမ့်မည်ဟူသော အသိတစ်ခု ရှိနေခဲ့သည်။

ကျန်းဖန်သည် သူ၏စနစ်မျက်နှာပြင်ကို ဖွင့်လှစ်၍ ခဏမျှ အားရကျေနပ်စွာဖြင့် ကြည့်ရှုလိုက်မိသည်။

【အိမ်ရှင် - ကျန်းဖန်】

【အဆင့် - အဆင့် ၇ ကြယ်တာရာအရှင်သခင်】

【ချိတ်ဆက်ထားသောဂြိုဟ် - ကမ္ဘာမြေဂြိုဟ် (အဆင့် ၇ ဂြိုဟ်)】

【ပါရမီဉာဏ်များ - ကြွယ်ဝသော ကြယ်တာရာ (A အဆင့်)၊ ယဉ်ကျေးမှု ဆင့်ကဲပြောင်းလဲခြင်း (A အဆင့်)၊ လောဘ (S အဆင့်)၊ နတ်ဘုရားဆင်းသက်ခြင်း (S အဆင့်)၊ ရာသီဥတုကောင်းမွန်ခြင်း (A အဆင့်)၊ မော်ဒန်မှော်လမ်းစဉ် (SS အဆင့်၊ အဆင့်မြှင့်တင်နိုင်သည်)၊ နည်းပညာမဟာလမ်းစဉ် (နတ်ဘုရားအဆင့်)၊ နည်းပညာပေါက်ကွဲမှု (SS အဆင့်)၊ အလုံးစုံသိမြင်ခြင်းနှင့် အလုံးစုံစွမ်းဆောင်နိုင်ခြင်း (SS အဆင့်)၊ အရာခပ်သိမ်းအား သက်ရှိအသွင်ပြောင်းခြင်း (SSS အဆင့်)...】

【လက်အောက်ခံ ယဉ်ကျေးမှု - လူသားမျိုးနွယ် (နည်းပညာပေါက်ကွဲမှု ဖြစ်ပေါ်နေဆဲ)】

【ယဉ်ကျေးမှုအဆင့် - ၂.၆】

【စနစ်လုပ်ဆောင်ချက်များ - လုယက်ခြင်း၊ အရာခပ်သိမ်း တိုးပွားစေခြင်း (ဆယ်ဆ)၊ ကမ္ဘာတစ်ခုနှင့်တစ်ခု ကူးသန်းဆင့်ခေါ်ခြင်း】

【စနစ်အမှတ် - ၂၁,၀၀၀,၀၀၀】

【စနစ်၏ သုံးသပ်ချက် - စနစ်၏ကူညီပံ့ပိုးမှုဖြင့် သင်သည် တိုးတက်လာခဲ့ပြီး ယခုအခါ အရည်အချင်းပြည့်မီသော စနစ်အိမ်ရှင်တစ်ဦး ဖြစ်နေပါပြီ။ ကျေးဇူးပြု၍ အမြန်ဆုံး ပိုမိုသန်မာလာအောင်လုပ်ပြီး ဤကမ္ဘာကြီး၏ အထွတ်အထိပ်၌ မတ်တတ်ရပ်လိုက်ပါ】

နှစ်ပေါင်းရာချီသော တိုက်ခိုက်သိမ်းပိုက်မှုများအပြီးတွင် ကျန်းဖန်၏ ကိုယ်ပိုင်စွမ်းအားသည် အဆင့် ၇ ကြယ်တာရာအရှင်သခင်အဆင့်သို့ ရောက်ရှိလာခဲ့ပြီး အဆင့် ၈ ကြယ်တာရာအရှင်သခင်အဆင့်သို့လည်း လျင်မြန်စွာ ချဉ်းကပ်နေခဲ့ပြီ ဖြစ်သည်။ ဤကာလအတွင်း စနစ်မစ်ရှင်အမြောက်အမြားကိုလည်း လုပ်ဆောင်နိုင်ခဲ့သဖြင့် သူ၏စနစ်အမှတ်မှာ သန်းနှစ်ဆယ့်တစ်သန်းကျော်အထိ ရှိလာခဲ့ချေပြီ။

သူ၏ မှော်လမ်းစဉ်ပါရမီသည်လည်း မှော်ပညာရပ်များကို အစဉ်မပြတ် နက်နက်နဲနဲ လေ့လာဆန်းစစ်ခဲ့မှုကြောင့် SS အဆင့်သို့ တိုးတက်လာခဲ့သည်။ ဤအရာက ကြီးမားသောအထောက်အကူ မပြုနိုင်သော်လည်း မရှိသည်ထက်တော့ အများကြီး ပိုမိုကောင်းမွန်လှပေသည်။

"ဟူး... စနစ်၊ စိန်အဆင့် ကံစမ်းမဲနှိုက်ခွင့် နှစ်ကြိမ် လဲလှယ်ပြီးတော့ မဲနှိုက်မယ်။"

ကျန်းဖန် သက်ပြင်းတစ်ချက်ကို ဝဝချလိုက်မိသည်။ အချိန်အတော်ကြာအောင် စုဆောင်းထားခဲ့သော စနစ်အမှတ်များကို ယခုအခါ သုံးစွဲရမည့်အချိန်သို့ ရောက်ရှိလာခဲ့ပြီ ဖြစ်သည်။ လက်ရှိတွင် စိန်အဆင့်ရှိသော ဆုလာဘ်များကသာ သူ့အား ပိုမိုတိုးတက်လာစေရန် ကူညီပေးနိုင်လိမ့်မည်ဖြစ်ရာ ထို့ကြောင့်ပင် သူသည် ယခုမျှအထိ အောင့်အီးကာ စုဆောင်းထားခဲ့ခြင်း ဖြစ်သည်။ စိန်အဆင့် ကံစမ်းမဲတစ်ကြိမ်အတွက် စနစ်အမှတ် တစ်သန်းမကဘဲ အမှတ်ဆယ်သန်းအထိ အပြည့်အဝ လိုအပ်လှပေသည်။ သို့သော်လည်း ရရှိလာမည့် ဆုလာဘ်များမှာ အနည်းဆုံး S အဆင့်ရှိမည်ဖြစ်ပြီး အမြင့်ဆုံး SSS အဆင့်အထိ ရရှိနိုင်ချေ ရှိသည်။

【ဒင်။ စိန်အဆင့် ကံစမ်းမဲနှိုက်ခွင့် နှစ်ကြိမ်ကို လဲလှယ်ပြီးပါပြီ။ ယခုပဲ မဲနှိုက်ပေးနေပါသည်】

ရဲ့ယွီသည်လည်း သူ၏အိမ်ရှင်က ကံကောင်းလှသော ဥရောပဧကရာဇ် ဖြစ်မလား သို့မဟုတ် ကံဆိုးလှသော အာဖရိကခေါင်းဆောင် ဖြစ်မလားဆိုသည်ကို ကြည့်ချင်နေခဲ့သည်။ မည်သူမျှ အချိန်တိုင်း ကံကောင်းနေနိုင်မည် မဟုတ်ပါလော။

【ဒင်။ အိမ်ရှင်သည် SSS အဆင့်ရှိသော ပစ္စည်း 'ဂြိုဟ်အဆင့်မြှင့်ကတ်' ကို ရရှိသွားသည့်အတွက် ဂုဏ်ယူပါသည်ု】

【ဒင်။ အိမ်ရှင်သည် SSS အဆင့်ရှိသော ပစ္စည်း 'ပါရမီပေါင်းစပ်ကတ်' ကို ရရှိသွားသည့်အတွက် ဂုဏ်ယူပါသည်】

ဂြိုဟ်အဆင့်မြှင့်ကတ် (SSS အဆင့်) - သတ်မှတ်ထားသော ဂြိုဟ်တစ်ခုအား အဆင့် ၉ ဂြိုဟ်အဖြစ်သို့ တိုက်ရိုက် ပြောင်းလဲစေနိုင်သည်။

ပါရမီပေါင်းစပ်ကတ် (SSS အဆင့်) - ပိုင်ဆိုင်ထားသော ပါရမီဉာဏ်များကို အတူတကွ ပေါင်းစပ်နိုင်သည်။ ပါရမီဉာဏ်အသစ်၏ အဆင့်အတန်းနှင့် အကျိုးသက်ရောက်မှုကိုမူ ပေါင်းစပ်မည့် ပါရမီဉာဏ် အရေအတွက်နှင့် အဆင့်အတန်းပေါ် မူတည်၍ ဆုံးဖြတ်မည်ဖြစ်ပြီး အမြင့်ဆုံးအနေဖြင့် နတ်ဘုရားအဆင့် ပါရမီဉာဏ်အထိ ရရှိနိုင်သည်။

တိတ်တဆိတ် စောင့်ကြည့်နေသော ရဲ့ယွီသည် မျက်လုံးများ ပြူးကျယ်သွားခဲ့ရတော့သည်။ အမေရေ... ဒါက တကယ့်ကို ကံကောင်းလွန်းလှတဲ့ အကောင်ပါပဲလား။

ချောင်မို - ငါ့ရဲ့ သွားတွေတောင်မှ ကြိတ်လွန်းလို့ ပြာကျကုန်ပြီ။

ကျန်းဖန်သည်လည်း SSS အဆင့်ရှိသော ပစ္စည်းနှစ်ခုကို ယခုကဲ့သို့ ရရှိလိမ့်မည်ဟု မထင်ထားမိဘဲ၊ အဓိကအကျဆုံးအချက်မှာ ဤအရာများသည် သူ၏ နောက်ဆုံးသော ဖန်ဆင်းခြင်းပစ္စည်းများ မဟုတ်သေးခြင်းပင် ဖြစ်သည်။ မျှော်လင့်ထားသည့်အတိုင်းပင်။

【ဒင်။ SSS အဆင့်ရှိသော ပစ္စည်း 'ဂြိုဟ်အဆင့်မြှင့်ကတ်' သည် ဆယ်ဆတိုးပွားခြင်းကို ခံရသဖြင့် နတ်ဘုရားအဆင့်ရှိသော ပစ္စည်း 'ဂြိုဟ်အဆင့်မြှင့်ကတ်' အဖြစ်သို့ ဆင့်ကဲပြောင်းလဲသွားပါပြီ】

【ဒင်။ SSS အဆင့်ရှိသော ပစ္စည်း 'ပါရမီပေါင်းစပ်ကတ်' သည် ဆယ်ဆတိုးပွားခြင်းကို ခံရသဖြင့် နတ်ဘုရားအဆင့်ရှိသော ပစ္စည်း 'ပါရမီပေါင်းစပ်ကတ်' အဖြစ်သို့ ဆင့်ကဲပြောင်းလဲသွားပါပြီ】

အမည်နာမများမှာ ပြောင်းလဲခြင်းမရှိဟု ထင်ရသော်လည်း ယင်းတို့၏ အကျိုးသက်ရောက်မှုမှာမူ အလွန်တရာ ကြီးမားစွာ ပြောင်းလဲသွားခဲ့ချေပြီ။

ဂြိုဟ်အဆင့်မြှင့်ကတ် (နတ်ဘုရားအဆင့်) - သတ်မှတ်ထားသော ဂြိုဟ်တစ်ခုအား နတ်ဘုရားအဆင့်ရှိသော ဂြိုဟ်အဖြစ်သို့ တိုက်ရိုက် ပြောင်းလဲစေနိုင်သည်။

ပါရမီပေါင်းစပ်ကတ် (နတ်ဘုရားအဆင့်) - ပိုင်ဆိုင်ထားသော ပါရမီဉာဏ်များကို အတူတကွ ပေါင်းစပ်နိုင်သည်။ ပါရမီဉာဏ်အသစ်၏ အဆင့်အတန်းနှင့် အကျိုးသက်ရောက်မှုကို ပေါင်းစပ်မည့် ပါရမီဉာဏ် အရေအတွက်နှင့် အဆင့်အတန်းပေါ် မူတည်၍ ဆုံးဖြတ်မည်ဖြစ်ပြီး ပါရမီဉာဏ်အသစ်၏ အဆင့်အတန်းသည် နတ်ဘုရားအဆင့်ကိုပင် ကျော်လွန်သွားနိုင်သည်။

ကျန်းဖန်သည် ပါရမီပေါင်းစပ်ကတ်နှင့် ပတ်သက်၍ စဉ်းစားလိုက်ပြီး လောလောဆယ်တွင် အသုံးမပြုရန် ဆုံးဖြတ်လိုက်သည်။ လက်ရှိတွင် သူ၌ ပါရမီဉာဏ် ရာဂဏန်းမျှသာ ရှိသေးပြီး အများစုမှာလည်း S+ အဆင့်များသာ ဖြစ်ကြသည်။ သူသည် ဂလက်ဆီတစ်ခုလုံးကို လုံးဝဥဿုံ ထိန်းချုပ်နိုင်သည့်အချိန်ကျမှသာ ယင်းကို အသုံးပြုတော့မည် ဖြစ်သည်။ ထိုအချိန်ကျလျှင် သူ၌ ပါရမီဉာဏ် ပေါင်းသောင်းချီ၍ ရှိနေလိမ့်မည်ဟု ခန့်မှန်းရပြီး ၎င်းတို့ကို ပေါင်းစပ်လိုက်လျှင်မူ... ဟဲဟဲဟဲ...

ကျန်းဖန် တွေးတောရင်းနှင့်ပင် တဟဲဟဲဖြင့် အရူးတစ်ယောက်လို ပြုံးလိုက်မိတော့သည်။

ရဲ့ယွီ - ......

"အဟမ်း... စနစ်၊ ဂြိုဟ်အဆင့်မြှင့်ကတ်ကို အသုံးပြုမယ်။ ပစ်မှတ်က ကမ္ဘာမြေဂြိုဟ်။"

【ဒင်။ အသုံးပြုပြီးပါပြီ။ ပြောင်းလဲမှုသည် ဆယ်နှစ်အတွင်း ပြီးပြည့်စုံလိမ့်မည်ဟု ခန့်မှန်းရပါသည်】

ကျန်းဖန် နားလည်စွာဖြင့် ခေါင်းငြိမ့်လိုက်ပြီးနောက် နတ်ဘုရားအမိန့်တော် တစ်ရပ်ကို ထုတ်ပြန်လိုက်သည် - "ငါသည် ကြီးမားလှသော နတ်ဘုရားစွမ်းပကားကို အသုံးပြု၍ ကမ္ဘာမြေဂြိုဟ်အား ဆက်လက်မြှင့်တင်တော့မည် ဖြစ်သည်။ ယခုတစ်ကြိမ်တွင် ကမ္ဘာမြေဂြိုဟ်သည် ကြီးမားလှသော တိုးတက်မှုကို ရရှိလိမ့်မည်။ လုံးဝဥဿုံ ပြောင်းလဲသွားရန်အတွက် ဆယ်နှစ် အချိန်ကြာမြင့်မည် ဖြစ်သည်။ သင်တို့အားလုံး အပြည့်အဝ ပြင်ဆင်ထားကြလော့။"

"ကျွန်တော်မျိုးတို့ နတ်ဘုရားအမိန့်တော်ကို ရိုသေလေးမြတ်စွာ နာခံပါသည်!"

နတ်ဘုရားကောင်းချီး ကာလအပိုင်းအခြား နှစ် ၃၆၆ တွင် လူသားမျိုးနွယ်သည် ကျန်းဖန်၏ နတ်ဘုရားအမိန့်တော်အတွက် ကြိုတင်ပြင်ဆင်ထားခဲ့ကြသော်လည်း အမှန်တကယ် ဖြစ်ပျက်လာသည့်အခါတွင်မူ တုန်လှုပ်ခြောက်ခြားသွားခဲ့ရဆဲ ဖြစ်သည်။ ကမ္ဘာမြေဂြိုဟ်၏ ပြောင်းလဲမှုက ကြီးမားလွန်းလှပေသည်။ တစ်နှစ်အတွင်းမှာတင် ယင်း၏ ထုထည်ပမာဏတစ်ခုတည်းပင်လျှင် ဆန်းသစ်စွာဖြင့် ဆယ်သန်းမက ဆထက်ထည်း တိုးပွားလာခဲ့ချေပြီ။ ဤအရာက မည်မျှအထိ လွန်ကဲလှသော အယူအဆ ဖြစ်သနည်း။

အဆင့် ၇ ရှိသော ကမ္ဘာမြေဂြိုဟ်သည်ပင်လျှင် ယခင် နေမင်းကြီး၏ ထုထည်ပမာဏခန့် ရှိနှင့်ပြီးသားဖြစ်ရာ၊ ဆိုလိုသည်မှာ ပြောင်းလဲမှု တစ်နှစ်အပြီးတွင် ကမ္ဘာမြေဂြိုဟ်၏ ထုထည်မှာ နေမင်းကြီးထက် အဆပေါင်း ဆယ်သန်းမက ကြီးမားသွားခဲ့ခြင်း ဖြစ်သည်။ ဒါတင်မကသေးဘဲ ဤအရာသည် နောက်ဆုံးပိတ် ထုထည်ပမာဏ မဟုတ်သေးချေ။

နတ်ဘုရားကောင်းချီး ကာလအပိုင်းအခြား နှစ် ၃၇၀ တွင် ငါးနှစ် ကုန်လွန်သွားခဲ့ပြီးနောက် ကမ္ဘာမြေဂြိုဟ်သည် မူလထုထည်ထက် အဆပေါင်း သန်းငါးဆယ်အထိ ကြီးမားကျယ်ပြန့်လာခဲ့ချေပြီ။ ထိုအလွန်ကြီးမားလှသော ဒြပ်ထုနှင့် ဆွဲငင်အားကြောင့် ဖြစ်ပေါ်လာသည့် စွမ်းပကားသည် ကမ္ဘာမြေဂြိုဟ် တည်ရှိရာ ကြယ်စုတန်းနယ်မြေ၏ ပြောင်းလဲမှုများကိုပါ စတင်ရိုက်ခတ်လာခဲ့တော့သည်။

ဤနှစ်များအတွင်း ဖြစ်ပေါ်လာသော ပြောင်းလဲမှုများသည် စိတ်ကူးပုံဖော်ရန်ပင် ခက်ခဲလှပေသည်။ ယခင်က ကမ္ဘာမြေဂြိုဟ်သည် ကြယ်ကြီးကို ဗဟိုပြု၍ လှည့်ပတ်နေခဲ့ခြင်း ဖြစ်သည်။ သို့သော် ယခုအခါတွင်မူ အခြေအနေမှာ ပြောင်းပြန် ဖြစ်သွားခဲ့ချေပြီ။ ထိုကြယ်ကြီးသည် ကမ္ဘာမြေဂြိုဟ်၏ ကြီးမားလှသော ဆွဲငင်အား၏ ဖမ်းချုပ်ခြင်းကို ခံလိုက်ရတော့သည်။ ယင်းက ကမ္ဘာမြေဂြိုဟ်ကို ဗဟိုပြု၍ ပြန်လည်လှည့်ပတ်နေရချေပြီ။ ပတ်ဝန်းကျင်ရှိ ကောင်းကင်အရာဝတ္ထုအားလုံးသည်လည်း ကမ္ဘာမြေဂြိုဟ်၏ ဆွဲငင်အားဖြင့် တစ်ခုပြီးတစ်ခု ဖမ်းချုပ်ခြင်းကို ခံလိုက်ရပြီး ကမ္ဘာမြေဂြိုဟ်ကိုသာ ဗဟိုပြု၍ လှည့်ပတ်နေကြရတော့သည်။

"ပုရောဟိတ်မင်းကြီး... အခြေအနေမကောင်းတော့ဘူး။ အကယ်၍ ဒီအတိုင်းသာ ဆက်ပြီး ဖြစ်နေရင် ကျွန်တော်တို့ရဲ့ ခိုင်မာတောင့်တင်းတဲ့ ခန္ဓာကိုယ်တွေနဲ့တောင်မှ ဒီလိုမျိုး ပေါက်ကွဲထွက်မတတ် တိုးပွားလာနေတဲ့ ဆွဲငင်အားဒဏ်ကို တောင့်ခံနိုင်တော့မှာ မဟုတ်ပါဘူး..." လူတိုင်း အနည်းငယ် စိုးရိမ်ပူပန်လာကြသည်။

"ဟူး... ငါတို့ အရှင်၏ နတ်ဘုရားစွမ်းပကားကို လျှော့တွက်မိခဲ့ကြတာပဲ... ငါက အနည်းဆုံး အဆပေါင်း တစ်သန်းလောက်ပဲ တိုးပွားလာလိမ့်မယ်လို့ ထင်မှတ်ထားခဲ့တာ... ဒါပေမဲ့ လက်ရှိ တိုးပွားနှုန်းအရဆိုရင်တော့ အဆပေါင်း သန်းတစ်ရာလောက်အထိ ရှိလာလိမ့်မယ်လို့ ခန့်မှန်းရတယ်!" ကျောက်ယွမ်မင် အနည်းငယ် စိတ်လှုပ်ရှားစွာဖြင့် ရေရွတ်လိုက်မိသည်။ မျှော်လင့်ထားသည့်အတိုင်းပင် ငါတို့အရှင်၏ နတ်ဘုရားအရှိန်အဝါဟူသည် အနှိုင်းမဲ့လှပေသည်။ သေးငယ်သော စွမ်းအားပြသမှုမျှပင်လျှင် ၎င်းတို့အနေဖြင့် လုံးဝ ဉာဏ်မမီနိုင်သောအရာ ဖြစ်သည်။

"ပထမဆုံးအနေနဲ့ နည်းပညာဆိုင်ရာ သုတေသနအားလုံးကို ယာယီရပ်ဆိုင်းထားလိုက်ကြစို့၊ ပြီးတော့ တစ်နိုင်ငံလုံးအတိုင်းအတာနဲ့ မျိုးရိုးဗီဇနိယာမတရား ကျင့်ကြံခြင်း ကို စတင်ကြမယ်။ လက်ရှိမှာ လူသားအများစုက အဆင့် ၃ မျိုးရိုးဗီဇပညာရှင်အဆင့်မှာပဲ ရှိကြသေးတာ။ အမြန်ဆုံး အဆင့် ၅ မျိုးရိုးဗီဇပညာရှင်အဆင့်အထိ ရောက်ရှိသွားအောင် ကြိုးပမ်းကြပါ..."

ကျောက်ယွမ်မင်သည် မျိုးရိုးဗီဇပညာရှင်များ၏ ခန္ဓာကိုယ်ကြံ့ခိုင်မှုကို တွက်ချက်လိုက်ခြင်း ဖြစ်သည်။ သူကိုယ်တိုင်၏ ကျင့်ကြံမှုအရဆိုလျှင် အဆင့် ၅ မျိုးရိုးဗီဇပညာရှင်တစ်ဦး၏ ခန္ဓာကိုယ်ကြံ့ခိုင်မှုသည် ကမ္ဘာမြေဂြိုဟ်၏ ဆွဲငင်အား အဆပေါင်း သန်းတစ်ရာ တိုးပွားသွားပြီးနောက်တွင်ပင်လျှင် မြေပြန့်ပေါ်၌ လျှောက်လှမ်းနေရသကဲ့သို့ သာမန်ကာလျှံကာ တောင့်ခံနိုင်ရန်အတွက် လုံလောက်လှပေသည်။ သူကိုယ်တိုင်ကမူ ယခုအခါ အဆင့် ၇ မျိုးရိုးဗီဇပညာရှင် ဖြစ်နေခဲ့ပြီဖြစ်ရာ မကြာမီ အဆင့် ၈ သို့ ချိုးဖျက်ဝင်ရောက်တော့မည် ဖြစ်သည်။

"နားလည်ပါပြီ။ ကျွန်တော်တို့ အခုပဲ အကောင်အထည်ဖော် ဆောင်ရွက်လိုက်ပါ့မယ်!"

နတ်ဘုရား‌ကောင်းချီး ကာလအပိုင်းအခြား နှစ် ၃၇၁ တွင် အမျိုးမျိုးသော ကျင့်ကြံရေးဆိုင်ရာ လုပ်ဆောင်ချက်များကို ထုတ်ပြန်ကြေညာခဲ့ပြီး တစ်နိုင်ငံလုံးအတိုင်းအတာဖြင့် ကျင့်ကြံခြင်း ရူးသွပ်မှုလှိုင်းလုံးကြီး စတင်ခဲ့ကာ၊ ကျောက်ယွမ်မင်သည် ဤကာလအတွင်း ကလေးမွေးဖွားခြင်းကို တားမြစ်သည့် အမိန့်တစ်ရပ်ကိုပါ ထုတ်ပြန်ခဲ့သည်။

တင်းကျပ်လှသော စောင့်ကြည့်မှုအောက်တွင် အရာအားလုံးသည် စနစ်တကျ ဖြစ်ပေါ်နေခဲ့သည်။ ကျောက်ယွမ်မင်သည်လည်း သူ၏ မျိုးရိုးဗီဇနိယာမတရား ကျင့်ကြံခြင်းဆိုင်ရာ အသိပညာများကို အခြားသော လူသားများနှင့် အတူတကွ မျှဝေပေးခဲ့သဖြင့် ၎င်းတို့အား လျင်မြန်စွာ တိုးတက်လာစေရန် ကူညီပေးခဲ့သည်။

နတ်ဘုရားကောင်းချီး ကာလအပိုင်းအခြား နှစ် ၃၇၃ တွင် လူသားမျိုးနွယ် အားလုံးနီးပါးသည် အဆင့် ၄ မျိုးရိုးဗီဇပညာရှင်အဆင့်သို့ အောင်မြင်စွာ တိုးတက်ရောက်ရှိသွားခဲ့ကြသည်။

နတ်ဘုရားကောင်းချီး ကာလအပိုင်းအခြား နှစ် ၃၇၅ တွင် ကမ္ဘာမြေဂြိုဟ်၏ ပြောင်းလဲမှုသည် လုံးဝဥဿုံ ပြီးပြည့်စုံသွားခဲ့ပြီး ယင်း၏ ထုထည်ပမာဏမှာ မူလထုထည်ထက် အဆပေါင်း သန်းတစ်ရာအထိ ကြီးမားသွားခဲ့ချေပြီ။ လူသားမျိုးနွယ်သည်လည်း ကျောက်ယွမ်မင် သတ်မှတ်ထားခဲ့သော ရည်မှန်းချက်ကို အောင်မြင်စွာ ပြီးမြောက်ခဲ့ကြပြီး လူတိုင်းသည် အဆင့် ၅ မျိုးရိုးဗီဇပညာရှင်များ ဖြစ်လာခဲ့ကြတော့သည်။

ပါရမီဉာဏ် အထူးကောင်းမွန်သော သူအချို့မှာမူ အဆင့် ၆ မျိုးရိုးဗီဇပညာရှင်အဆင့်သို့ ရောက်ရှိနေခဲ့ကြပြီဖြစ်ပြီး ကျောက်ယွမ်မင်သည်လည်း အဆင့် ၈ မျိုးရိုးဗီဇပညာရှင်အဖြစ်သို့ အောင်မြင်စွာ တိုးတက်သွားခဲ့ချေပြီ။

ကမ္ဘာမြေဂြိုဟ်၏ ပြောင်းလဲမှုသည် ထုထည်ပမာဏ ပြောင်းလဲသွားရုံမျှသာ မဟုတ်ဘဲ ထူးခြားလှသော အင်အားစွမ်းအင်ထုတစ်ခုလည်း ဂြိုဟ်ပေါ်တွင် ပေါ်ထွက်လာခဲ့သည်။ ယင်းကို ရှူရှိုက်ပြီးနောက်တွင် လူသားများသည် ၎င်းတို့၏ ခန္ဓာကိုယ်ကြံ့ခိုင်မှုကို သိသိသာသာ မြှင့်တင်နိုင်ကြပြီး ၎င်းတို့၏ မျိုးရိုးဗီဇ အရည်အသွေးကိုလည်း ပိုမိုကောင်းမွန်လာစေနိုင်သည်။

၎င်းတို့သည် ဤအရာကို - မျိုးရိုးဗီဇအမှုန် အင်အားစွမ်းအင်ထု ဟု အမည်ပေးလိုက်ကြပြီး အတိုကောက်အားဖြင့် မျိုးရိုးဗီဇစွမ်းအင် ဟု ခေါ်ဆိုကြသည်။ ဤစွမ်းအင်ထုသည် ကမ္ဘာမြေဂြိုဟ်ပေါ်တွင်သာ ပေါ်ထွက်လာခြင်းဖြစ်ပြီး လူသားမျိုးနွယ်တို့၏ ကိုယ်ပိုင် စွမ်းအင်စနစ်အဖြစ် သတ်မှတ်ထားကြကာ ၎င်းတို့အတွက်သာ သီးသန့်ဖြစ်တည်နေသောအရာ ဖြစ်သည်။ ထို့အပြင် မျိုးရိုးဗီဇစွမ်းအင်သည် အဆက်မပြတ် ထွက်ပေါ်နေမည်ဖြစ်ရာ ခမ်းခြောက်သွားမည်ကိုလည်း စိုးရိမ်နေရန် လုံးဝ မလိုတော့ပေ။