အခန်း (၃၂)။ နတ်ဘုရားနှစ်ပါး၏ တိုက်ပွဲ

"ဘယ်လောက်တောင် လောဘကြီးလိုက်သလဲ။ အချင်းချင်း ကောင်းကောင်းမွန်မွန် နေလို့မရဘူးလား။ ငါတို့နှစ်ယောက်စလုံးက တတိယအဆင့် ကြယ်တာရာသခင်တွေပဲ၊ ငါက မင်းကို ပြန်သတ်သွားမှာကို မင်းမကြောက်ဘူးလား"

ဤကြယ်တာရာသခင် ကျိချန်းသည် အကျပ်အတည်းနှင့် ကြုံလာသောအခါ ဤလုယက်စစ်ပွဲကို သူကိုယ်တိုင် အရင်စတင်ခဲ့သည်ဆိုသည်ကို မေ့လျော့နေပုံရသည်။

စစ်ပွဲစသည်နှင့် မင်းသေငါရှင်သာ ရှိတော့သည်။ အခြားသူကို အရှင်လွှတ်လိုက်ခြင်းမှာ နောင်တစ်ချိန်တွင် ထိုသူ အင်အားကြီးလာပါက မိမိအတွက် ရန်သူကို မွေးမြူထားခြင်းနှင့် အတူတူပင် ဖြစ်သည်။ ထို့ကြောင့် အရာအားလုံးကို အစကတည်းက အမြစ်ဖြတ်ပစ်ရမည်။

ကျိချန်းသည် သူ၏ တည်ရှိမှုကို အသည်းအသန် ဖုံးကွယ်ထားသည်။ သူသည် ယခင်က နတ်ဘုရားတန်ခိုးကို သုံး၍ လူသားမျိုးနွယ်၏ နည်းပညာဖြင့် ရှာဖွေမှုများကို ထိရောက်စွာ ရှောင်လွှဲနိုင်ခဲ့သူ ဖြစ်သည်။ ထို့ကြောင့်လည်း ကျောက်ယွမ်မင်တို့ ရာစုနှစ်တစ်ခုနီးပါး ရှာဖွေခဲ့သော်လည်း ဘာမှ ရှာမတွေ့ခဲ့ခြင်း ဖြစ်သည်။ နည်းပညာသည် အရာခပ်သိမ်းကို မတတ်စွမ်းနိုင်သည်မှာ တစ်ခါတစ်ရံတွင် အမှန်ပင် ဖြစ်သဖြင့် ကျန်းဖန်က လူသားမျိုးနွယ်ကို ဆန်းကြယ်သော အင်အားစုများကို ပိုမိုလေ့လာရန် ခိုင်းစေခဲ့ခြင်း ဖြစ်သည်။

ရန်သူ့အကြောင်းနှင့် မိမိအကြောင်းကို သိလျှင် မည်သည့်တိုက်ပွဲတွင်မဆို အောင်နိုင်ပေလိမည်။

ကျန်းဖန်သည် သူ၏ နတ်ဘုရားအာရုံဖြင့် ဂြိုဟ်တစ်ခုလုံးကို အမြန် စကန်ဖတ်လိုက်သော်လည်း တစ်ဖက်လူ၏ သတင်းအချက်အလက်ကို ရှာမတွေ့ခဲ့ပေ။ ၎င်းက သူ့ကို မျက်မှောင်ကြုတ်သွားစေသော်လည်း ချက်ချင်းပင် ပြန်လည် တည်ငြိမ်သွားသည်။ သူ ရှာမတွေ့သည်ကို လူသားတို့ သိသွား၍ မဖြစ်ပေ၊ မဟုတ်ပါက သိက္ခာကျပေလိမည်။

'တောက်... မင်းက ပုန်းနေချင်တယ်ပေါ့ ဟုတ်လား'

"အဟမ်း... ငါ သူ့နေရာကို ရှာတွေ့ပြီ။ အခု သူ့ကို အပြင်ထွက်လာအောင် ငါ လုပ်လိုက်မယ်!"

ရန်သူသည် ဤဂြိုဟ်ပေါ်မှာ ရှိနေသည်မှာ သေချာသဖြင့် ကျန်းဖန် သုံးမည့် နည်းလမ်းမှာ ရိုးရှင်းပါသည် - ၎င်းမှာ နေရာအနှံ့ကို တိုက်ခိုက်ခြင်းပင်။ ထူးခြားသော အရာတစ်ခုခု ပေါ်လာသည့် နေရာမှာ ရန်သူ ရှိနေသည့် နေရာပင် ဖြစ်သည်။

"နတ်ဘုရားပြစ်ဒဏ် - သက်ရှိအားလုံးကို ချေမှုန်းမည့် မိုးကြိုး!"

"ကျဆင်းစေ!"

"ဝုန်း...!!!"

ခဏချင်းမှာပင် ဂြိုဟ်တစ်ခုလုံး၌ မိုးကြိုးများ တဖြည်းဖြည်း ပစ်ချလာတော့သည်။ လူသားမျိုးနွယ် ရှိသည့် နေရာမှအပ ကျန်ရှိသော နေရာအားလုံးကို မိုးကြိုးများက ရက်စက်စွာ ပစ်ခတ်လေတော့သည်။ ဤမိုးကြိုးမှာ သာမန်မိုးကြိုးမဟုတ်ဘဲ ကြောက်မက်ဖွယ်ရာ နတ်ဘုရားတန်ခိုးများ ပါဝင်နေသည်။

ကျိချန်း၏ မျက်နှာမှာ သိသိသာသာ ပျက်သွားတော့သည် - "တောက်... အယုတ်တမာကောင်!"

သူသည် နတ်ဘုရားတန်ခိုးကို အမြန်သုံး၍ အကာအကွယ် ဒိုင်းလွှားကို အသက်သွင်းကာ မိမိကိုယ်ကို တင်းကျပ်စွာ ကာကွယ်လိုက်ရသည်။

"မိပြီ!"

ကျန်းဖန်၏ မျက်လုံးများ ဝင်းလက်သွားသည်။ ကျိချန်းက နတ်ဘုရားတန်ခိုးကို သုံးလိုက်သည်နှင့် သူ၏ သတင်းအချက်အလက်များမှာ ပေါ်ထွက်လာပြီး သူ့ကို အမြဲစောင့်ကြည့်နေသော ကျန်းဖန်က ချက်ချင်း ရှာတွေ့သွားခြင်း ဖြစ်သည်။

မိသွားပြီဖြစ်ကြောင်း သိလိုက်ရသောအခါ ကျိချန်းလည်း ဆက်ပြီး ပုန်းမနေတော့ဘဲ မီတာ ရာနှင့်ချီ မြင့်သော တောက်ပသည့် ပုံရိပ်ကြီးအဖြစ် ပြောင်းလဲကာ ကိုယ်ထင်ပြလိုက်တော့သည်။ ဂေါ့ဘလင် ယဉ်ကျေးမှုမှာလည်း ချက်ချင်းပင် ဒူးထောက် ဝတ်ပြုကြတော့၏။

"အို... ကျွန်ုပ်တို့၏ နတ်ဘုရား။ ကျွန်ုပ်တို့ကို ကယ်တင်တော်မူပါ!"

......

ကျိချန်း၏ မျက်နှာမှာ မကောင်းလှသော်လည်း ဤဂေါ့ဘလင်များမှာ အသုံးဝင်နေသေးသဖြင့် သူက ဟန်ဆောင်ကာ ဆိုလိုက်သည် - "ငါ အပြည့်အဝ ပြန်လည် ကျန်းမာလာပြီ။ မင်းတို့ကို ဒုက္ခကနေ ကယ်တင်ဖို့ ငါ ရောက်လာတာပဲ"

"ကျေးဇူးတင်လှပါတယ် အရှင်မင်းကြီး! နောက်လိုက်တွေဟာ အရှင်မင်းကြီးနောက်ကို ထာဝရ လိုက်ပါပါ့မယ်!" ဂေါ့ဘလင်များမှာ ဝမ်းသာလွန်း၍ မျက်ရည်ပင် ကျကာ ဦးတိုက် ဂါရဝပြုကြတော့သည်။

အခြားတစ်ဖက်တွင်မူ။

"စိတ်ဝင်စားစရာပဲ..."

ကျန်းဖန်သည် တစ်ဖက်လူ၏ ဟန်ဆောင်မှုကို ကြည့်ကာ ပြုံးနေမိသော်လည်း ဖော်မထုတ်ခဲ့ပေ။ အားလုံးကလည်း တစ်မျိုးမဟုတ် တစ်မျိုးတော့ ဟန်ဆောင်တတ်ကြသူများ မဟုတ်ပါလား။

တစ်ဖက်လူ၏ ရည်ရွယ်ချက်ကို သူ တစ်ချက်ကြည့်ရုံနှင့် သိလိုက်သည်။ ၎င်းတို့မှာ ယဉ်ကျေးမှု၏ နောက်ဆုံး ကျန်ရှိနေသော တန်ဖိုးကို အသုံးချရန် ကြိုးစားနေခြင်းသာ ဖြစ်သည်။ ၎င်းတို့၏ နည်းလမ်းအချို့မှာ ယဉ်ကျေးမှု၏ ဝိညာဉ်နှင့် အသက်များကို စတေးရခြင်းဖြစ်ပြီး အလွန်အမင်း အကျပ်အတည်းဖြစ်မှသာ သုံးလေ့ရှိသည့် နည်းလမ်းများ ဖြစ်သည်။

"အရှင်မင်းကြီး... နောက်လိုက်တွေဟာ အချိန်မရွေး တိုက်ခိုက်ဖို့ အဆင်သင့်ပါပဲ!" ကျောက်ယွမ်မင်က ဒူးတစ်ဖက် ထောက်ကာ လျှောက်ထားလိုက်သည်။

"အင်း... အစွမ်းကုန် လုပ်ကြစမ်း။ ဒီတိုက်ပွဲမှာ ငါ မင်းတို့ကို ကာကွယ်ပေးထားမယ်!"

"နတ်ဘုရားဗျာဒိတ်တော်အတိုင်း နာခံပါမည်!"

ကျောက်ယွမ်မင်သည် စစ်ဌာနချုပ်သို့ ပြန်သွားကာ အမိန့်များ စတင် ထုတ်ပြန်တော့သည်။ တစ်ဖက်လူမှာ နတ်ဘုရားတစ်ပါး ဖြစ်သောကြောင့် သာမန်နည်းလမ်းများ သုံးနေရန် မလိုပေ။

"အမှောင်ဒြပ် နျူကလီးယားဗုံး အဆင်သင့်လုပ်!"

"ယဇ်ပုရောဟိတ်မင်းကို သတင်းပို့ပါတယ်။ လောလောဆယ် ကျွန်တော်တို့ဆီမှာ အမှောင်ဒြပ် နျူကလီးယားဗုံး တစ်ထောင်ကျော်နဲ့ ဆန့်ကျင်ဘက်ဒြပ်ဝတ္ထု နျူကလီးယားဗုံး တစ်ရာကျော် ရှိပါတယ်။ နျူကလီးယား လက်နက်အားလုံး အဆင်သင့်ပါပဲ!"

"ဒါဆိုရင် ငါတို့ရဲ့ နတ်ဘုရားကို မီးရှူးမီးပန်း ပြတဲ့အနေနဲ့ အမှောင်ဒြပ် နျူကလီးယားဗုံး ဆယ်လုံး အရင် ပစ်လွှတ်လိုက်စမ်း!"

"မှန်လှပါ!"

လူတိုင်းမှာ စိတ်လှုပ်ရှားစွာဖြင့် ခေါင်းညိတ်ကြသည်။ ၎င်းမှာ အမှောင်ဒြပ် နျူကလီးယားဗုံး၏ အစွမ်းကို မျက်မြင်ကိုယ်တွေ့ ပထမဆုံး မြင်တွေ့ရမည့် အချိန်ပင် ဖြစ်သည်။ စွမ်းအားကြီးလွန်းလို့ ဂြိုဟ်ကြီး ပြိုကွဲပြီး ငါတို့ပါ သေသွားမလားဆိုပြီး ကြောက်မနေကြပါနဲ့။ ငါတို့ အရှင်မင်းကြီး ရှိနေသရွေ့ ဘာမှ ပြဿနာ မရှိဘူး!

"ပစ်လွှတ်!"

"ရှူး...!" "ရှူး...!"

......

မျက်စိတစ်မှိတ်အတွင်းမှာပင် အမှောင်ဒြပ် နျူကလီးယားဗုံး ဆယ်လုံးမှာ ကျိချန်း၏ ခန္ဓာကိုယ်ဆီသို့ တည့်တည့်မတ်မတ် ပျံတက်သွားတော့သည်။ ကျိချန်းသည် ရင်းနှီးနေသော ထိုဗုံးများကို ကြည့်ကာ တစ်ခဏမျှ မှင်သက်သွားပြီးနောက် ချက်ချင်းပင် ထိတ်လန့်သွားတော့သည်။

ဒါဟာ ဟိုတုန်းက သူတို့ကမ္ဘာကို ပျက်စီးလုနီးပါး ဖြစ်စေခဲ့တဲ့ အရာ မဟုတ်လား။ အဲဒီတုန်းက သူဟာ နိယာမစွမ်းအားကို သုံးခဲ့ရလို့ တန်ပြန်သက်ရောက်မှုတောင် ခံခဲ့ရတာ။ သူ မျက်လုံးပြူးသွားမိသည်။ အဲဒီတုန်းက တစ်လုံးတည်းကို သူ ဒဏ်ရာမရဘဲ တောင့်ခံနိုင်ခဲ့ပေမဲ့ အခုက ဆယ်လုံးတောင်ဗျ!

နျူကလီးယားဗုံးများသည် အလွန်မြင့်မားသော အရှိန်ဖြင့် ပျံသန်းလာသည်။ ၎င်းတို့မှာ ကျိချန်းအား ဂေါ့ဘလင်ယဉ်ကျေးမှုကို စတေးပြီး 'နိယာမပိတ်ဆို့ခြင်း' လုပ်ရန် အချိန် လုံးဝ မပေးခဲ့ပေ။

နတ်ဘုရား၏ စောင့်ရှောက်မှု!

ရွှေရောင်အတားအဆီးတစ်ခု ချက်ချင်း ပေါ်ထွက်လာသည်။

"ဒိုင်း...!!!" "ဒိုင်း...!!!"

......

ခဏချင်းမှာပင် အမှောင်ဒြပ် နျူကလီးယားဗုံး ဆယ်လုံး တစ်ပြိုင်နက် ပေါက်ကွဲသွားသဖြင့် အမှောင်ထုက လွှမ်းမိုးသွားကာ ဧရာမ မှိုပွင့်ပုံ တိမ်တိုက်ကြီးမှာ ဂြိုဟ်တစ်ခုလုံးကို တုန်ခါသွားစေတော့သည်။

တကယ့် ကြောက်စရာကောင်းသည့် အချက်မှာ ပေါက်ကွဲမှုကြောင့် အမှောင်ဒြပ် များ အရှိန်အဟုန်ဖြင့် ပြိုကွဲလာခြင်းပင် ဖြစ်သည်။ ဟင်းလင်းပြင်ထဲတွင် အနက်ရောင် အကွက်တစ်ခု ပေါ်လာပြီး ထိုအကွက်မှာ လျင်မြန်စွာ ကျယ်ပြန့်လာတော့သည်။ ပတ်ဝန်းကျင်ရှိ အရာအားလုံးမှာ ပြင်းထန်သော ဆွဲငင်အားကို ခံလိုက်ရသည်။

"အို... ကျွန်ုပ်တို့၏ နတ်ဘုရား။ ကျွန်ုပ်တို့ကို ကယ်တင်တော်မူပါ!"

ဂေါ့ဘလင်များမှာ တွင်းနက်ထဲသို့ တစ်ကောင်ပြီးတစ်ကောင် ရက်စက်စွာ ဆွဲသွင်းခံလိုက်ရသည်။ အဝေးမှာရှိသော ကျောက်ယွမ်မင်တို့ပင်လျှင် ထိုဧရာမ ဆွဲငင်အားကို ခံစားနေရသည်။ လူသားများမှာလည်း ထိုဘက်သို့ ထိန်းမနိုင်သိမ်းမရ လွင့်ပါသွားကြတော့မည့်ဆဲဆဲ...

ကံကောင်းထောက်မစွာဖြင့် ကျန်းဖန်က လျင်မြန်စွာ တုံ့ပြန်လိုက်ကာ ကြီးမားလှသော နတ်ဘုရားတန်ခိုးဖြင့် ထိုနယ်မြေကို လွှမ်းခြုံလိုက်သဖြင့် လူသားတို့မှာ တွင်းနက်ထဲ ဆွဲသွင်းခံရမည့် အန္တရာယ်မှ လွတ်မြောက်သွားခဲ့သည်။

အားလုံးက ၎င်းတို့ရှေ့တွင် ဖြစ်ပျက်နေသည်ကို မယုံနိုင်လောက်အောင် ငေးကြည့်နေမိကြသည်။ ကျန်းဖန်ကိုယ်တိုင်ပင်လျှင် အံ့ဩသွားမိသည် - ဤစွမ်းအားမှာ အမှန်တကယ်ပင် ကြီးမားလွန်းလှပေသည်။

စစ်ဌာနချုပ်အတွင်းမှာလည်း တိတ်ဆိတ်ငြိမ်သက်သွား၏။ လူတိုင်း ဖန်သားပြင်ကို ကြောင်ကြည့်နေကြသည်။

"ငါ... တို့... အရှင်... မင်းကြီး... ရဲ့... တန်ခိုး..."

ကျောက်ယွမ်မင်က တုန်ယင်နေသော သူ၏ လက်များကို ဖိထားရင်း တီးတိုး ရေရွတ်လိုက်သည်။ ဤမျှ စွမ်းအားကြီးလိမ့်မည်ဟု သူ မမျှော်လင့်ထားခဲ့ပေ။ တွင်းနက် (Black Hole) ဆိုသည်ကိုလည်း ၎င်းတို့ ပထမဆုံး မြင်ဖူးခြင်း ဖြစ်သည်။ တွင်းနက်ဆိုသည်မှာ သီအိုရီအရသာ ရှိခဲ့ဖူးပြီး ယခုကဲ့သို့ မျက်မြင်တွေ့ရှိရခြင်းမှာ များစွာ ပို၍ တုန်လှုပ်စရာ ကောင်းလှပေသည်။

၎င်းတို့မှာ အတော်ကြာအောင် မှင်သက်နေပြီးမှ သတိပြန်ဝင်လာကြသည်။

"ယဇ်ပုရောဟိတ်မင်း... အကယ်၍ ငါတို့ သိုလှောင်ထားတဲ့ အမှောင်ဒြပ် နျူကလီးယားဗုံး တစ်ထောင်လောက်က ငါတို့ကမ္ဘာမှာများ မတော်တဆ ပေါက်ကွဲရင်..."

အားလုံး ထိတ်လန့်သွားကြသည်။ ဒါဟာ အမှန်တကယ်ကို ကြောက်စရာကောင်းလှပြီး တစ်နေ့မှာ မတော်တဆမှုတစ်ခုခုကြောင့် သူတို့ကိုယ်တိုင် ပေါက်ကွဲသွားမလားဆိုပြီး စိုးရိမ်လာကြသည်။

"ဒါကတော့..."

ကျောက်ယွမ်မင်လည်း အနည်းငယ် ကြောက်သွားမိသော်လည်း ချက်ချင်းပင် စိတ်ကို ထိန်းလိုက်သည် - "မစိုးရိမ်ကြပါနဲ့။ အရှင်မင်းကြီး ရှိနေသရွေ့ ဘာမတော်တဆမှုမှ ဖြစ်လာမှာ မဟုတ်ဘူး"

"မှန်ပါပေတယ်။ ကျွန်တော်တို့ စိတ်ဓာတ်တွေ ပျော့ညံ့သွားမိပါတယ်။ ကိုယ့်လက်နက်ကိုယ် ကြောက်နေရင် ဒီထက်ပိုပြီး အစွမ်းထက်တဲ့ လက်နက်တွေ ထုတ်ဖို့ ဘယ်လို ယုံကြည်ချက် ရှိတော့မှာလဲ။ အဲဒီလိုဆိုရင် အရှင်မင်းကြီးအတွက် ဘယ်လို တိုက်ပွဲဝင်ပေးနိုင်တော့မှာလဲ"

"ဟုတ်ပါတယ်၊ မှန်ပါတယ်။ ဒါပေမဲ့ ကျွန်တော်တို့ ပြန်ရောက်ရင် ဒီဖျက်အားပြင်း လက်နက်တွေရဲ့ လုံခြုံရေးကို ပိုပြီး တင်းကျပ်ရပါမယ်။ အရှင်မင်းကြီး ရှိလို့ မတော်တဆမှုကို မစိုးရိမ်ရဘူးဆိုပေမဲ့ အရှင်မင်းကြီးကို အလုပ်မရှုပ်စေသင့်ဘူး မဟုတ်လား"

"မှန်လှပါ!" အားလုံး ခေါင်းညိတ်ကြသည်။

စောင့်ကြည့်ရေး ဗီဒီယိုထဲတွင်။

တဖြည်းဖြည်း ဖြစ်ပေါ်လာသော သေးငယ်သည့် တွင်းနက်ရှေ့တွင် ကျိချန်းသည် ဤဒုက္ခတွင်းမှ အမြန်ဆုံး ထွက်ပြေးချင်နေတော့သည်။ သို့သော် ကျန်းဖန်က သူ့ကို အလွတ်မပေးပေ။ တစ်ဖက်လူက နတ်ဘုရားတန်ခိုးသုံးပြီး တွင်းနက်၏ ဆွဲငင်အားမှ လွတ်မြောက်ရန် ကြိုးစားလိုက်တိုင်း ကျန်းဖန်က ချက်ချင်း ဝင်ရောက် နှောင့်ယှက်လိုက်သည်။

တစ်ဖက်လူ၏ နည်းလမ်းများကို အကျိုးမသက်ရောက်အောင် လုပ်ဆောင်ခြင်းဖြင့် သူ့ကို ဆွဲငင်အားအတွင်းမှာပဲ ပိတ်မိနေစေခြင်း ဖြစ်သည်။

"အယုတ်တမာကောင်!"

ကျိချန်းမှာ ဒေါသထွက်လွန်းသဖြင့် ကျန်းဖန်ကို အရှက်မရှိ ဆဲဆိုတော့သည်။ ကျန်းဖန်ကတော့ အေးအေးဆေးဆေးပင် ပြုံးနေ၏။ ဘယ်လိုပဲဖြစ်ဖြစ် တွင်းနက်က သူ့နားမှာ ရှိတာမဟုတ်ဘဲ သူက ပွဲကြည့်နေရတာဆိုတော့ တစ်ဖက်လူက သူ့ကို ဘာလုပ်နိုင်မှာလဲ။