အခန်း (၁၁) - စည်းမျဉ်းအခြေပြု စနစ်လုပ်ဆောင်ချက်၏ ပုံမှန်မဟုတ်သော စွမ်းပကား

ပြင်ပကမ္ဘာ၌ -

လီဇီမု ကွယ်လွန်သွားပြီးနောက် ကျန်းဖန်သည် လီဇီမု၏ လျင်မြန်စွာ လွင့်ပျယ်ပျောက်ကွယ်တော့မည့် ဝိညာဉ်ကို ထိန်းသိမ်းစောင့်ရှောက်ရန်အတွက် ဖန်ဆင်းခြင်းအမှတ်အချို့ကို ချက်ချင်းပင် အသုံးပြုလိုက်သည်။

"ဟူး... မင်း တကယ်ပဲ ပင်ပန်းခဲ့ရပါပြီ..."

ကျန်းဖန်၏ စိတ်ထဲတွင် ခံစားချက်များစွာ ထက်သန်လာခဲ့ရသည်။ ဘာပဲဖြစ်ဖြစ် ဤရလဒ် ဖြစ်ပေါ်လာရခြင်း၏ အကြီးမားဆုံးသော အကြောင်းရင်းမှာ သူကိုယ်တိုင်ပင် ဖြစ်သည်မဟုတ်ပါလော။ အကယ်၍ သူသာ လီဇီမုအား ကမ္ဘာကူးပြောင်းမလာစေခဲ့ပါက လီဇီမုလည်း ယခုကဲ့သို့ သေဆုံးရလိမ့်မည်မဟုတ်ပေ။

ထို့ကြောင့်ပင် သူသည် လီဇီမုကို ကာကွယ်ရန်အတွက် ဖန်ဆင်းခြင်းအမှတ်များကို သုံးစွဲခဲ့ခြင်း ဖြစ်သည်။

"စနစ်... သူ့ကို မူလနေရာကို ပြန်ပို့ပေးလို့ရမလား"

ကျန်းဖန် မေးမြန်းလိုက်သည်။

【ဒင်။ ရပါသည် အိမ်ရှင်။ သို့သော်လည်း ဤလူ၏ ရုပ်ပိုင်းဆိုင်ရာ ခန္ဓာကိုယ်မှာ ပျက်စီးသွားခဲ့ပြီဖြစ်၍ အသစ်ပြန်လည် ပုံဖော်ပေးရန် လိုအပ်ပါသည်】

ရဲယွီက ပြန်လည်ဖြေကြားလိုက်သည်။ သူကိုယ်တိုင်လည်း လီဇီမုကို အလွန်ပင် လေးစားမိပေသည်။ ၎င်းက မိမိတို့အား ယခုမျှအထိ ကူညီပေးခဲ့သည်ဖြစ်ရာ ၎င်းကို ယခုအတိုင်း သေဆုံးပျက်စီးသွားခွင့်ပြုရန် မိမိတို့လည်း ထိုမျှအထိ ရက်စက်ကြလိမ့်မည် မဟုတ်ပေ။

【သို့သော်လည်း အိမ်ရှင်... ရုပ်ခန္ဓာကို အသစ်ပြန်လည်ပုံဖော်ရန်အတွက် စနစ်အမှတ်များ ကုန်ကျပါလိမ့်မည်ု】

ရဲယွီက သတိပေးလိုက်သည်။

"ဘယ်လောက်အထိ လိုမှာလဲ"

ကျန်းဖန်တွင် လက်ရှိ၌ စနစ်အမှတ် ငါးထောင်သာ ကျန်ရှိတော့သည်။ အကယ်၍ ထိုပမာဏထက် ကျော်လွန်သွားပါက သူ တတ်နိုင်တော့မည်မဟုတ်ပေ။

【ဒင်။ အများကြီး မလိုပါဘူးခင်ဗျာ။ လီဇီမုသည် မူလက ကမ္ဘာတစ်ခုမှ သာမန်လူသားတစ်ဦးမျှသာ ဖြစ်သဖြင့် ရုပ်ခန္ဓာအသစ်တစ်ခုအတွက် စနစ်အမှတ် တစ်ရာသာ လိုအပ်ပါသည်】

【သို့သော်လည်း စနစ်အနေဖြင့် ဆုလာဘ်အဖြစ် ၎င်းအတွက် ပိုမိုသန်မာသော ရုပ်ခန္ဓာအသစ်တစ်ခု ဖန်တီးပေးရန် စနစ်အမှတ် အနည်းငယ် ပိုမိုသုံးစွဲရန် အကြံပြုပါသည်】

ရဲယွီက အကြံပြုလိုက်သည်။

"ကောင်းပြီ၊ ဒါက လုပ်သင့်လုပ်ထိုက်တဲ့ အရာပဲ။"

ကျန်းဖန်လည်း ကပ်စေးကတ်မနေခဲ့ပေ။ မစ်ရှင်ပြီးမြောက်သွားပါက စနစ်အမှတ် တစ်သိန်းနှင့် ငွေအဆင့် ကံစမ်းမဲနှိုက်ခွင့် တစ်ကြိမ် ပြန်လည်ရရှိမည် မဟုတ်ပါလော။

ဤသို့ဖြင့် ရဲယွီသည် လီဇီမုအတွက် ရုပ်ခန္ဓာအသစ်တစ်ခု ပုံဖော်ပေးရန် စနစ်အမှတ် ငါးရာကို သုံးစွဲလိုက်တော့သည်။

သူ၏ မူလခန္ဓာကိုယ်နှင့် နှိုင်းယှဉ်လျှင် ဤရုပ်ခန္ဓာအသစ်သည် မည်သည့် မတော်တဆမှုမျှ မရှိခဲ့ပါက သဘာဝအတိုင်း အိုမင်း၍ မကွယ်လွန်မချင်း အသက်တစ်ရာ့သုံးဆယ်အထိ အသက်ရှင်သန်နိုင်မည် ဖြစ်သည်။ အိုမင်းရင့်ရော်ချိန်တွင်လည်း သူ၏ အသက်ဇီဝစွမ်းအားမှာ လူငယ်ဘဝအတိုင်းပင် တည်ရှိနေလိမ့်မည် ဖြစ်သည်။

သူ တည်ရှိရာကမ္ဘာမှာ သာမန်ကမ္ဘာတစ်ခုသာ ဖြစ်သည်ကို ထည့်တွက်ရသဖြင့် သက်တမ်းအလွန်ရှည်လျားလွန်းခြင်းက မလိုလားအပ်သော ဒုက္ခများကို ဆောင်ကြဉ်းလာနိုင်သောကြောင့် ရဲယွီက ယခုကဲ့သို့ ပုံစံထုတ်ပေးခဲ့ခြင်း ဖြစ်သည်။

ဒုတိယအချက်အနေဖြင့် ဤခန္ဓာကိုယ်၏ ရုပ်ပိုင်းဆိုင်ရာ ကြံ့ခိုင်မှုမှာ အလွန် အားကောင်းလှပြီး အခြားသူများထက် နှစ်ဆ သို့မဟုတ် သုံးဆခန့် ပိုမိုသန်မာပေသည်။

【ဒင်။ ရုပ်ခန္ဓာကို အသစ်ပြန်လည် ပုံဖော်ပြီးပါပြီ။ အိမ်ရှင်... ကျေးဇူးပြု၍ သူ၏ ဝိညာဉ်ကို ဤခန္ဓာကိုယ်အတွင်းသို့ ထည့်သွင်းပေးပါရန်】

အလင်းတန်းတစ်ခု ဖြတ်သန်းသွားသည်နှင့်အမျှ လီဇီမု၏ ယခင်ပုံစံနှင့် တစ်ပုံစံတည်း တူညီသော ခန္ဓာကိုယ်တစ်ခု ကျန်းဖန်၏ ရှေ့မှောက်တွင် ပေါ်ထွက်လာခဲ့သည်။

"ကောင်းပြီ။"

ကျန်းဖန် လက်တစ်ချက် ဝှေ့ယမ်းလိုက်သည်နှင့်အတူ လီဇီမု၏ ဝိညာဉ်သည် ထိုခန္ဓာကိုယ်အတွင်းသို့ ဝင်ရောက်သွားခဲ့တော့သည်။

【ကောင်းပါပြီ အိမ်ရှင်... ငါ သူ့ကို အခု ပြန်ပို့ပေးလိုက်ပါ့မယ်】

ပြောပြီးသည်နှင့်အမျှ ရဲယွီသည် ကမ္ဘာ့ဝင်ပေါက်လမ်းကြောင်းကို ထပ်မံဖွင့်လှစ်လိုက်ပြီး လီဇီမုကို သူ၏ မူလကမ္ဘာဆီသို့ ပြန်လည်ခေါ်ဆောင်သွားခဲ့သည်။

ကမ္ဘာနှစ်ခုလုံး၏ အချိန်စီးဆင်းမှုမှာ ဆင်တူလှပေသည်။ လီဇီမု ထွက်ခွာသွားခဲ့သည်မှာ ရက်အနည်းငယ်သာ ရှိသေးသည်ဖြစ်ရာ အကြောင်းမှာ သူသည် အချိန်အရှိန်မြှင့်တင်မှုအောက်ရှိ ကမ္ဘာမြေဂြိုဟ်ပေါ်တွင်သာ နေထိုင်ခဲ့ခြင်း ဖြစ်ပြီး ပြင်ပကမ္ဘာ၌မူ အချိန်များစွာ ကုန်လွန်သွားခဲ့ခြင်း မရှိသောကြောင့် ဖြစ်သည်။

ရဲယွီသည် လီဇီမု ရုတ်တရက် ပျောက်ကွယ်သွားရသည့် အကြောင်းရင်းကို လူအများက ရက်အနည်းငယ်မျှ ခရီးထွက်သွားခဲ့ခြင်းသာဖြစ်သည်ဟု မှားယွင်းထင်မှတ်သွားစေရန်အတွက် စည်းမျဉ်းများ၏ စွမ်းပကားကို အသုံးပြု၍ ပြောင်းလဲပေးလိုက်သည်။

"ဒါက မင်းအတွက် နောက်ထပ် လက်ဆောင်တစ်ခုပဲ။"

ရဲယွီသည် လီဇီမု၏ ဘဏ်အကောင့်ထဲသို့ ငွေကြေး သန်းတစ်ရာကိုလည်း ထည့်သွင်းပေးလိုက်သေးသည်။ ဤငွေကြေးများသည် သဘာဝကျကျပင် တရားဝင်လမ်းကြောင်းမှ ရရှိလာခြင်း ဖြစ်သည်။ စနစ်၏ စည်းမျဉ်းစွမ်းပကားဟူသည် သင် တွေးတောနိုင်သရွေ့ ယင်းက အကောင်အထည်ဖော်ပေးနိုင်စွမ်း ရှိပေသည်။

"ကဲ... မင်းရဲ့ ကျန်ရှိတဲ့ ဘဝသက်တမ်းကို ပျော်ရွှင်စွာ ဖြတ်သန်းနိုင်ပါစေလို့ ဆုတောင်းပေးပါတယ်။"

ရဲယွီသည် လျင်မြန်စွာ လာခဲ့ပြီး လျင်မြန်စွာပင် ပြန်လည်ထွက်ခွာခဲ့သည်။ ကောင်းကင်ဘုံ နိယာမတရားပင်လျှင် သူ ပြန်လည်ရောက်ရှိလာခြင်းကို ရိပ်မိခဲ့ခြင်း မရှိချေ။

မကြာမီမှာပင် အချိန်စီးဆင်းမှုနှင့်အတူ လီဇီမုသည် တဖြည်းဖြည်းနှင့် သတိပြန်လည်လာခဲ့သည်။

ရင်းနှီးနေသော အိမ်မျက်နှာကြက်ကို ကြည့်ရင်း သူ ခဏမျှ မှင်တက်သွားမိသည်။ အသက်ရှူရုံမျှ အချိန်အတွင်းမှာပင် သူ ရုတ်တရက် ဝုန်းကနဲ ထထိုင်လိုက်မိသည်။

"ငါ... ငါ သေသွားတာ မဟုတ်ဘူးလား?!"

လီဇီမု မျက်လုံးများ ပြူးကျယ်သွားခဲ့ရပြီး သူ၏ ခန္ဓာကိုယ်ကို အလောတကြီး အနှံ့အပြား စမ်းသပ်ကြည့်လိုက်ရာ သူ အမှန်တကယ်ပင် အသက်ရှင်နေသေးကြောင်း အတည်ပြုနိုင်ခဲ့သည်။ တစ်ခဏမျှ သူ ဘာပြောရမှန်းပင် မသိအောင် ဖြစ်သွားခဲ့ရသည်။

သူ ကုတင်ဘေးရှိ ဖုန်းကို ကောက်ကိုင်ကာ မက်ဆေ့ခ်ျများကို စစ်ဆေးလိုက်ရာ - "သုံးရက်ပဲ ကုန်လွန်သွားတာ ဟုတ်လား"

လီဇီမု အတန်ငယ် အံ့အားသင့်သွားခဲ့ရသည်၊ သူသည် ကမ္ဘာမြေဂြိုဟ်ပေါ်တွင် ဆယ်နှစ်ကျော်တိုင်တိုင် နေထိုင်ခဲ့ရခြင်း ဖြစ်သည်မဟုတ်ပါလော။

"သူတို့ရဲ့ အနာဂတ်က ဘယ်လိုဖြစ်လာမလဲဆိုတာ မသိဘူး..."

သူ ပြန်လည်အသက်ရှင်လာခြင်းအပေါ် အနည်းငယ် အံ့ဩမိသော်လည်း ကမ္ဘာကူးပြောင်းခြင်းကိုပင် ကြုံတွေ့ခဲ့ဖူးပြီဖြစ်ရာ ဤအရာသည်လည်း ထူးဆန်းစရာ မဟုတ်တော့ပေ။

"ဒါပေမဲ့ ငါ မသေခင်မှာ ပြင်ဆင်သင့်တာတွေအကုန် ပြင်ဆင်ပေးခဲ့တာပဲ၊ ငါ့ရဲ့ တာဝန်ကို ပြီးပြည့်စုံအောင် ထမ်းဆောင်ခဲ့ပါပြီ... နောက်ပိုင်းတော့ သူတို့ဘာသာပဲ ရုန်းကန်ကြရတော့မှာပေါ့..."

သူ သက်ပြင်းအရှည်ကြီး တစ်ချက် ချလိုက်မိသည်။

"အလီပေးမှ ငွေကြေး ယွမ် သန်းတစ်ရာ လက်ခံရရှိပါသည်!"

...

【ဒင်။ ကမ္ဘာကူးပြောင်းသူကို ပြန်လည် ပို့ဆောင်ပေးပြီးပါပြီ】

"သိပါပြီ။"

ကျန်းဖန် ခေါင်းငြိမ့်လိုက်သည်။

ကပ်ဘေးနှစ်ခုကို ကျော်လွှားနိုင်ခဲ့ချေပြီ။ ကျန်ရှိနေသော အချိန်များသည် လူသားမျိုးနွယ် ဖွံ့ဖြိုးတိုးတက်ရန်အတွက်သာ ဖြစ်သည်။

ထို့ကြောင့် အချိန်မြစ်‌ကြောင်း၏ အရှိန်မြှင့်တင်မှုအောက်တွင် ကမ္ဘာမြေဂြိုဟ်ပေါ်ရှိ လူသားမျိုးနွယ်သည် လျင်မြန်စွာ ဖွံ့ဖြိုးတိုးတက်လာခဲ့သည်။

မျက်စိတစ်မှိတ်အတွင်းမှာပင် နှစ်တစ်ရာ ကုန်လွန်သွားခဲ့ချေပြီ။

【ဂုဏ်ယူပါသည် သင်၏ လက်အောက်ရှိ ယဉ်ကျေးမှုသည် ကပ်ဘေးကို ကျော်လွှားနိုင်ခဲ့ပြီး ယဉ်ကျေးမှုအဆင့် တိုးတက်သွားခဲ့ပါပြီ】

【ယဉ်ကျေးမှုအဆင့် — စိုက်ပျိုးရေးခေတ်ကာလ】

【ယဉ်ကျေးမှုမျိုးနွယ် — လူသားမျိုးနွယ်】

【ကပ်ဘေးအဆင့်သတ်မှတ်ချက်... S...】

【ကြယ်တာရာအရှင်သခင် ဝင်ရောက်စွက်ဖက်ခြင်း မရှိ... အဆင့်သတ်မှတ်ချက် မြင့်တက်လာပါသည်...】

【ခြုံငုံသုံးသပ်ချက်... S+】

နောက်ဆုံး ခြုံငုံသုံးသပ်ချက် ထွက်ပေါ်လာသည်နှင့်အမျှ ကျန်းဖန်သည် တုံ့ပြန်မှုအဖြစ် ဖန်ဆင်းခြင်းအမှတ် အမြောက်အမြားကို ရရှိလိုက်တော့ရာ သူ၏ 'ဆင်းရဲမွဲတေမှု' ဘဝမှာ တစ်ခဏအတွင်း ချမ်းသာကြွယ်ဝမှုအဖြစ်သို့ ကူးပြောင်းသွားခဲ့တော့သည်။

ဤအရာတင်မကသေးပေ။ ယဉ်ကျေးမှု အောင်မြင်စွာ တိုးတက်သွားခြင်းက ကျန်းဖန်၏ ကိုယ်ပိုင်စွမ်းအားကိုလည်း မြင့်တက်လာစေခဲ့သည်။

ဆန်းကြယ်သော စွမ်းအားတစ်ခု၏ ရိုက်ခတ်မှုအောက်တွင် သူ၏ စွမ်းအားမှာ လျင်မြန်စွာ သက်ရောက်မြင့်မားလာခဲ့သည်။

ဤအခိုက်အတန့်တွင် ရဲယွီသည်လည်း သတင်းကောင်းတစ်ခုကို ထပ်မံပို့ဆောင်ပေးလိုက်ပြန်သည်။

【ဒင်။ မစ်ရှင်ကို ပြီးမြောက်ခဲ့သည့်အတွက် အိမ်ရှင်အား ဂုဏ်ယူပါသည်】

【ဆုလာဘ် - စနစ်အမှတ် တစ်သိန်းနှင့် ငွေအဆင့် ကံစမ်းမဲနှိုက်ခွင့် တစ်ကြိမ်】

【အိမ်ရှင် - ကျန်းဖန်】

【အဆင့် - အဆင့် ၂ ကြယ်တာရာအရှင်သခင်】

【ချိတ်ဆက်ထားသောဂြိုဟ် - ကမ္ဘာမြေဂြိုဟ် (ပြောင်းလဲနေဆဲ)】

【ပါရမီဉာဏ်များ - ကြွယ်ဝသော ကြယ်တာရာ (A အဆင့်)၊ ယဉ်ကျေးမှု ဆင့်ကဲပြောင်းလဲခြင်း (A အဆင့်)】

【လက်အောက်ခံ ယဉ်ကျေးမှု - လူသားမျိုးနွယ် (စိုက်ပျိုးရေးခေတ်ကာလ)】

【စနစ်လုပ်ဆောင်ချက်များ - လုယက်ခြင်း၊ အရာခပ်သိမ်း တိုးပွားစေခြင်း (ဆယ်ဆ)၊ ကမ္ဘာတစ်ခုနှင့်တစ်ခု ကူးသန်းဆင့်ခေါ်ခြင်း】

【စနစ်အမှတ် - ၁၀၄၅၀၀】

【စနစ်၏ သုံးသပ်ချက် - သင်သည် ငါခေါ်ဆောင်ခဲ့ဖူးသမျှ အိမ်ရှင်များထဲတွင် အဆိုးရွားဆုံး ဖြစ်သည်၊ ကျေးဇူးပြု၍ အမြန်ဆုံး သန်မာလာအောင် လုပ်ပါ။】

မိမိ၏ စနစ်မျက်နှာပြင်ကို ကြည့်ရင်း ကျန်းဖန် အလွန်တရာ ကျေနပ်အားရနေခဲ့သည်။ စနစ် ရှိနေသရွေ့ သူ၏ စွမ်းအား တိုးတက်မှုနှုန်းမှာ အလွန်ပင် မြန်ဆန်လှပေသည်။ သူ၏ အထွတ်အထိပ်သို့ ပြန်လည်ရောက်ရှိရန် မကြာတော့ဟု သူ ယုံကြည်နေသည်။

"စနစ်... ငွေအဆင့် ကံစမ်းမဲနှိုက်ခွင့်ကို အသုံးပြုမယ်။"

သူသည် မိမိ၏ ကံစမ်းမဲနှိုက်ခွင့်ကို မေ့လျော့မနေခဲ့ပေ။ သန်မာလာစေမည့် မည်သည့်အခွင့်အရေးကိုမျှ သူ လက်လွှတ်ခံမည်မဟုတ်ပေ။

【ဒင်။ အိမ်ရှင်သည် A အဆင့်ရှိသော ပါရမီဉာဏ် 'ကပ်စေးကတ်ခြင်း' ကို ရရှိသွားသည့်အတွက် ဂုဏ်ယူပါသည်】

ကျန်းဖန်၏ နှုတ်ခမ်းများ တွန့်ကွေးသွားခဲ့ရသည်။ ဒါက ဘာလဲ။ ကပ်စေးကတ်ခြင်း ဟုတ်လား။

ကပ်စေးကတ်ခြင်း (A အဆင့်) - ကြယ်တာရာအရှင်သခင်က ယဉ်ကျေးမှု ဖွံ့ဖြိုးတိုးတက်ရေးတွင် ရင်းနှီးမြှုပ်နှံရမည့် ဖန်ဆင်းခြင်းအမှတ် ပမာဏကို ၃၀% လျှော့ချပေးလိမ့်မည်။

ကျန်းဖန်သည် ဤပါရမီဉာဏ်၏ စွမ်းဆောင်ရည်ကို ကြည့်ပြီးနောက် စိတ်ထဲ၌ သဘောကျသွားခဲ့သော်လည်း သူ၏စနစ်က မည်သို့လုပ်ဆောင်ပေးဦးမည်နည်းဆိုသည်ကို ပိုမို၍ မျှော်လင့်စောင့်ကြည့်နေခဲ့သည်။ မကြာမီမှာပင် ရဲယွီသည် သူ့ကို စိတ်ပျက်မသွားစေခဲ့ပေ။

【ဒင်။ A အဆင့်ရှိသော ပါရမီဉာဏ် 'ကပ်စေးကတ်ခြင်း' သည် ဆယ်ဆတိုးပွားခြင်းကို ခံရပါပြီ】

【A အဆင့်ရှိသော ပါရမီဉာဏ် 'ကပ်စေးကတ်ခြင်း' သည် S အဆင့်ရှိသော ပါရမီဉာဏ် 'လောဘကြီးခြင်း' အဖြစ်သို့ ဆင့်ကဲပြောင်းလဲသွားပါပြီု】

လောဘကြီးခြင်း (S အဆင့်) - ကြယ်တာရာအရှင်သခင်က ယဉ်ကျေးမှု ဖွံ့ဖြိုးတိုးတက်ရေးတွင် ရင်းနှီးမြှုပ်နှံရမည့် ဖန်ဆင်းခြင်းအမှတ် ပမာဏကို ၅၀% လျှော့ချပေးလိမ့်မည်။ ကြယ်တာရာအရှင်သခင်က ယဉ်ကျေးမှု တုံ့ပြန်မှုမှ ရရှိမည့် ဖန်ဆင်းခြင်းအမှတ် ပမာဏမှာ မူလပမာဏ၏ ဆယ်ဆအထိ မြင့်တက်လာလိမ့်မည်။ — လူသားတို့၏ ကြီးမားလှသော အပြစ်တရားခုနစ်ပါးထဲမှ တစ်ခုဖြစ်သည့် 'လောဘကြီးခြင်း'။ မြင်မြင်သမျှ အရာအားလုံးသည် ငါ့အပိုင်သာ ဖြစ်ရမည်။

"အမေရေ... လွန်လှချည်လား။"

ကျန်းဖန်၏ မျက်လုံးများ ပြူးကျယ်သွားခဲ့ရသည်။ ဤပါရမီဉာဏ်က အလွန်တရာ မတရားလွန်းလှပေသည်။ ဤပါရမီဉာဏ် ရှိနေပါက ဝက်တစ်ကောင်ပင်လျှင် ကောင်းကင်သို့ ပျံတက်သွားနိုင်လိမ့်မည် ဖြစ်သည်။

မှန်ပေသည်၊ စနစ်ဟူသည်မှာ မဟာဗြဟ္မာ ကောင်းကင်ဘုံနှင့် ကမ္ဘာပေါင်းစုံအတွင်း၌ အဓိပ္ပာယ်အရှိဆုံးသော အခွင့်ထူးခံ စွမ်းအားကြီးတစ်ခု ဖြစ်သည်။ လျှို့ဝှက်ကုဒ် အသုံးပြုခြင်းနှင့် ပတ်သက်လာလျှင် စနစ်က နံပါတ်တစ်ဟု ဆိုပါက မည်သူက နံပါတ်နှစ်ဟု ဆိုရဲဦးမည်နည်း။

ကျန်းဖန်တင်မကဘဲ ရဲယွီကိုယ်တိုင်ပင် သူ၏ 'အရာခပ်သိမ်း တိုးပွားစေခြင်း' လုပ်ဆောင်ချက်အပေါ် အံ့အားသင့်သွားခဲ့ရသည်။

သူသည် ယခင်က ဤလုပ်ဆောင်ချက်၏ စွမ်းပကားကို လျှော့တွက်မိခဲ့ပုံရသည်။ ဤစည်းမျဉ်းအခြေပြု စနစ်လုပ်ဆောင်ချက်တွင် အကန့်အသတ်မရှိသော ဖြစ်နိုင်ခြေများ ရှိနေသည်မှာ ထင်ရှားလှပေသည်။ ယခင်ကမူ သူသည် အဆင့်နိမ့်ကမ္ဘာများအတွင်းသို့သာ ဝင်ရောက်ခဲ့ဖူးပြီး ထူးခြားသော စွမ်းအားများမှာလည်း အလွန်နည်းပါးလှသဖြင့် ဤလုပ်ဆောင်ချက်၏ စွမ်းပကားကို အပြည့်အဝ မထုတ်ဖော်နိုင်ခဲ့ခြင်းသာ ဖြစ်သည်။