အခန်း ၈၅ — လူအုပ်ကြီး

"ဟုတ်တာပေါ့! ကျွန်တော်တို့အားလုံးက ​လောကီဆရာသခင်တွေပဲလေ၊ မိသားစုတွေပဲပေါ့။ မင်းရဲ့ဂုဏ်ပြုပွဲကို ငါတို့က ဘယ်လိုလုပ် မလာဘဲ နေမလဲ!"
စီယန်သည် စကားပြောရင်း သူ၏အစ်ကိုဖြစ်သူကို ဖော်ကောင်လုပ်မိမှန်းပင် မသိဘဲ ချူလျိုယွဲ့နားသို့ ခုန်ပေါက်ရောက်ရှိလာပြီး အရာအားလုံးကို အံ့ဩတကြီး ကြည့်ရှုနေသည်။
"ဒါနဲ့ ပြောရဦးမယ်... မင်းက တကယ်ကို လက်ကြီးတာပဲ! ဒါတွေအားလုံးအတွက် ဖီးနစ် စားသောက်ဆိုင် တစ်ဆိုင်လုံးကို သိမ်းကျုံးငှားလိုက်တာလား။ အကုန်အကျတော့ တော်တော်များမှာပဲနော်!"
စီမိသားစု၏ ပဉ္စမမြောက်သခင်လေး ဖြစ်သည့်တိုင် သူကိုယ်တိုင်ပင်လျှင် ဤနေရာသို့ လာချင်တိုင်း လာ၍မရချေ။ ချူလျိုယွဲ့က ယန်​ကောကို တစ်ချက်ကြည့်လိုက်သည်။
"တကယ်တော့... ဒါတွေအားလုံးအတွက် ကျိန်းပေါင်ဆောင်က ဒုတိယသခင်ကြီး ယန်ကိုပဲ ကျေးဇူးတင်ရမှာပါ"
ချူလျိုယွဲ့က ကျိန်းပေါင်ဆောင်အမည်ကို မြွက်ဟလိုက်သည်နှင့် စီယန်နှင့် ကျန်ရှိသူများမှာ ဆွံ့အသွားကြသည်။ ထိုအခါမှသာ ဘေးတွင် ရပ်နေသော ယန်​ကောကို သူတို့ သတိပြုမိကြတော့သည်။ သူတို့အားလုံး ချက်ချင်းပင် နှုတ်ဆက်လိုက်ကြ၏။
"ဒုတိယသခင်ကြီး ယန်!"
ယန်​ကောက လက်ကာပြရင်း ကျယ်လောင်စွာ ရယ်မောလိုက်သည်။ "အားနာမနေကြပါနဲ့ လူငယ်တို့ရာ။ ဒီနေ့ရဲ့ ကြယ်ပွင့်က သခင်မလေး လျိုယွဲ့ပါပဲ။ ကျွန်တော်က ကျိန်းပေါင်ဆောင်ကိုယ်စား လာပြီး ဂုဏ်ပြုပေးရုံသက်သက်ပါ!"
သူ၏စကားကြောင့် လူတိုင်း တိတ်တဆိတ် ထိတ်လန့်သွားကြသည်။ မြို့တော်တွင် ကျိန်းပေါင်ဆောင်၏ အဆင့်အတန်းမှာ မည်သို့ရှိသနည်း။ သူတို့ကို ရန်စရဲသူမှာ လက်ချိုးရေတွက်၍ပင် ရသည်။ ပြီးခဲ့သည့်ညက ကျိန်းပေါင်ဆောင်သည် မိသားစုကြီးများကို ချိန်းဆိုထားပြီးမှ ဖျက်သိမ်းလိုက်သော်လည်း သူတို့ကို မည်သူမျှ ဘာမှမလုပ်ရဲခဲ့ကြောင်း ကောလာဟလများ ထွက်ပေါ်နေသည်။
ယခု ကျိန်းပေါင်ဆောင်ကိုယ်စား လာရောက်ဂုဏ်ပြုသည်ဟူသော စကားမှာ ရိုးရှင်းလှသည်ဟု ထင်ရသော်လည်း၊ လက်တွေ့တွင်မူ ကျိန်းပေါင်ဆောင်သည် ချူလျိုယွဲ့၏ ကျောထောက်နောက်ခံဖြစ်ကြောင်း မြို့တော်သို့ ဗြောင်ကျကျ ကြေညာလိုက်ခြင်းပင် ဖြစ်သည်။
စီယန်နှင့် အခြားသူများသည် ချူလျိုယွဲ့ကို အသစ်တစ်ဖန် ပြန်လည် အကဲခတ်လိုက်ကြသည်။ လူတိုင်းက ချူလျိုယွဲ့ကို အသုံးမကျသူဟု ပြောဆိုခဲ့ကြသော်လည်း သူမသည် ထူးချွန်သော ရလဒ်များဖြင့် ထျန်းလုအကယ်ဒမီသို့ တက်ရောက်နိုင်ခဲ့သည်။ ချူမိသားစုနှင့် အဆက်အသွယ် ဖြတ်တောက်လိုက်သော်လည်း မျက်စိတစ်မှိတ်အတွင်းမှာပင် ကျိန်းပေါင်ဆောင်ကဲ့သို့သော ကျောထောက်နောက်ခံကို ရရှိသွားခဲ့ပြန်သည်။ ချူလျိုယွဲ့နှင့် ပတ်သက်သည့် ကောလာဟလများမှာ အမှန်တရားနှင့် ဝေးကွာနေပုံရပြီး သူမတွင် ဖုံးကွယ်ထားသော လျှို့ဝှက်ချက်များ မည်မျှရှိနေဦးမည်နည်း။
"စီယန်... ဘာတွေ ကြောင်နေတာလဲ။ ငါတို့ကို မိတ်မဆက်ပေးတော့ဘူးလား" ဘေးမှ လူငယ်တစ်ဦးက စီယန်ကို လက်တို့ကာ အရိပ်အကဲ ပြလိုက်သည်။ "အဲဒီနေ့က မင်းနဲ့ စီထင်ပဲ သူမနဲ့ တွေ့ခဲ့တာလေ။ ငါတို့က နောက်မှာ ကျန်နေခဲ့လို့ သေချာ မမြင်လိုက်ရဘူး!"
"လာ... လာ! ငါ တစ်ယောက်ချင်းစီ မိတ်ဆက်ပေးမယ်။ ဒါက အိုးကျန်း!"
စီယန်က သတိပြန်ဝင်လာပြီး ချူလျိုယွဲ့ကို တစ်ဦးချင်းစီ မိတ်ဆက်ပေးတော့သည်။ မိတ်ဆက်ခြင်း လုပ်ငန်းစဉ် ပြီးဆုံးသည်နှင့် အပြင်ဘက်မှ လူငယ်အုပ်စုအချို့ ထပ်မံ ဝင်ရောက်လာပြန်သည်။ သေချာသည်မှာ သူတို့သည် စီယန် သို့မဟုတ် စီထင်ကြောင့် ရောက်လာကြခြင်း ဖြစ်သည်။ သူတို့အားလုံးမှာ အကယ်ဒမီ၏ ​လောကီဆရာသခင် အတန်းဖော်များ ဖြစ်ကြသော်လည်း သူတို့၏ နောက်ခံအသိုင်းအဝိုင်းမှာ သေးငယ်လှသည်မဟုတ်။
အများစုမှာ မှူးမတ်မျိုးနွယ်များ ဖြစ်ကြသည်။ အချို့မှာ မြို့တော်ပြင်ပမှ လာရောက်ကြသူများ ဖြစ်သော်လည်း သူတို့နောက်တွင် ခိုင်မာသော မိသားစု အင်အားစုများ ရှိနေကြသည်။ အဘယ်ကြောင့်ဆိုသော် ​လောကီဆရာသခင်တစ်ဦး ဖြစ်လာရန်အတွက် အရင်းအမြစ်နှင့် ထောက်ပံ့မှု အမြောက်အမြား လိုအပ်သောကြောင့် ဖြစ်သည်။ သာမန်မိသားစုများမှာ ထိုအရာများကို မတတ်နိုင်ကြချေ။ ထို့ကြောင့် သူတို့ ဤနေရာသို့ ရောက်ရှိလာခြင်းမှာ သူတို့မိသားစုများ၏ သဘောထားကို ကိုယ်စားပြုနေခြင်းလည်း ဖြစ်နိုင်သည်။
သို့သော် ချူလျိုယွဲ့သည် သူမ၏ ​လောကီဆရာသခင် ဂုဏ်ပုဒ်တစ်ခုတည်းဖြင့် ဤသူများ၏ ထောက်ခံမှုကို ရရှိနိုင်သည်ဟု ယုံကြည်လောက်အောင် ကလေးမဆန်လှချေ။ ဤသူများသည် စီယန်နှင့် စီထင်တို့၏ မျက်နှာကြောင့် လာကြခြင်း ဖြစ်ပေလိမ့်မည်။ အထူးသဖြင့် စီထင်၏ သဘောထားမှာ စီမိသားစု၏ သဘောထားပင် ဖြစ်သည်။
စီယန်မှာ ဖော်ရွေသွက်လက်သူ ဖြစ်သဖြင့် ဝိုင်းကို စည်ကားအောင် လုပ်နိုင်စွမ်းရှိသည်။ ချူလျိုယွဲ့သည် ဤသူများကို ကြိုတင်မသိသော်လည်း စီယန်ကြောင့် လျင်မြန်စွာပင် ရင်းနှီးသွားကြသည်။
ချူလျိုယွဲ့သည် လူအများအပြား ရောက်ရှိလာသဖြင့် အံ့ဩနေသော်လည်း ယန်​ကော ရှိနေခြင်းက ကျန်ရှိသူများကို ပို၍ အံ့အားသင့်စေသည်။ သူတို့သည် စီထင်နှင့် စီမိသားစုကြောင့် ရောက်လာကြခြင်း ဖြစ်သော်လည်း ကျိန်းပေါင်ဆောင်၏ ဒုတိယအကြီးအကဲမှာ သူတို့ထက်ပင် အရင်ရောက်နေလိမ့်မည်ဟု မထင်ထားခဲ့ကြချေ။ ချူလျိုယွဲ့အနေဖြင့် ချူမိသားစုနှင့် အဆက်အသွယ် ဖြတ်ဝံ့သည်မှာ မဆန်းတော့ချေ။ ကျိန်းပေါင်ဆောင် ရှိနေသရွေ့ ချူမိသားစုသည် သူမကို စိတ်တိုင်းကျ နှိပ်ကွပ်၍ ရတော့မည်မဟုတ်။
"ဒုတိယထပ်က အခန်းတွေကို ပြင်ဆင်ပြီးပါပြီ။ ကြွကြပါဦး..."
စုဟွေးက ပို၍ပင် ပျူငှာစွာ ပြုံးပြလိုက်သည်။ စီယန်နှင့် အခြားသူများမှာ အံ့အားသင့်သွားကြသည်။ "ဒုတိယထပ်က အခန်းတွေ ဟုတ်လား။ အဲဒီနေရာတွေက အပြင်လူကို ပုံမှန်ဆို မဖွင့်ပေးဘူး မဟုတ်လား"
သာမန်လူများ ဖီးနစ် စားသောက်ဆိုင်သို့ လာပါက ပထမထပ်တွင်သာ နေခွင့်ရှိသည်။ ဒုတိယထပ်ရှိ အခန်းများမှာ ဈေးနှုန်း အလွန်ကြီးမြင့်လှပြီး ဘွတ်ကင်လုပ်ရန် ခက်ခဲလှသည်ဟု ကောလာဟလများ ရှိသည်။
"ပုံမှန်ဆိုရင်တော့ အဲဒီလို စည်းကမ်း ရှိပါတယ်၊ ဒါပေမဲ့ ဒီနေ့တော့ သခင်မလေး လျိုယွဲ့က တစ်ဆိုင်လုံးကို ငှားထားတာဆိုတော့ ဘာပြဿနာမှ မရှိပါဘူး။ အားလုံးက သခင်မလေးရဲ့ အတန်းဖော်တွေဆိုတော့ သေချာပေါက် ထိုင်ခွင့်ရှိတာပေါ့"
စုဟွေးက ဦးညွှတ်လျက် ပြုံးပြသည်။ စီယန်တို့ အုပ်စုမှာ တစ်ဦးကိုတစ်ဦး ကြည့်ရင်း မှင်တက်သွားကြသည်။ ဖီးနစ် စားသောက်ဆိုင်၏ ဒုတိယထပ် အခန်းများ! ၎င်းပြင် မန်နေဂျာ ကိုယ်တိုင်က လမ်းပြပေးနေခြင်း! ဤသည်မှာ မည်သို့သော ဆက်ဆံမှုမျိုးနည်း။
လူငယ်များမှာ ထိုကဲ့သို့ အခြေအနေမျိုးနှင့် မရင်းနှီးကြသေးသဖြင့် စိတ်လှုပ်ရှားစွာဖြင့် စုဟွေး၏ နောက်မှ လိုက်သွားကြတော့သည်။ မကြာမီတွင် ပထမထပ်၌ စီထင် တစ်ဦးတည်းသာ ကျန်ရစ်ခဲ့သည်။ အခြားသူများ ထွက်သွားကြပြီဖြစ်သဖြင့် သူလည်း ဆက်နေရန် မသင့်တော်တော့သဖြင့် ဒုတိယထပ်သို့ တက်ရန် ဟန်ပြင်လိုက်သည်။
"စီထင်... ဒီနေ့အတွက် တကယ်ပဲ ကျေးဇူးတင်ပါတယ်"
ချူလျိုယွဲ့က သူ့ကိုကြည့်ကာ လေးလေးနက်နက် ပြောလိုက်သည်။ စီထင်၏ စီစဉ်မှုသာ မပါပါက ဤလူများ ရောက်လာကြမည်မဟုတ်။ သူမအနေဖြင့် လူမလာသည်ကို ဂရုမစိုက်သော်လည်း စီထင်၏ စေတနာကိုမူ ကျေးဇူးတင်ရမည် ဖြစ်သည်။
စီထင်က သူမကို တစ်ချက် ကြည့်လိုက်သည်။ ချူလျိုယွဲ့၏ တောက်ပသော နက်မှောင်သည့် မျက်ဝန်းများမှာ အရာအားလုံးကို ထိုးဖောက်မြင်နိုင်စွမ်း ရှိပုံရသည်။ သူမသည် အရာအားလုံးကို... သိမြင်နေသကဲ့သို့ပင်။ စီထင်သည် သူ့နှလုံးခုန်သံ မြန်လာသည်ကို ခံစားလိုက်ရသဖြင့် မသိမသာ မျက်နှာလွှဲကာ ဒုတိယထပ်သို့ အမြန် တက်သွားတော့သည်။
"ဘာမှမဟုတ်ပါဘူး။ စိတ်ထဲမထားပါနဲ့"
ချူလျိုယွဲ့က သူထွက်သွားသည်ကို ကြည့်ရင်း မျက်တောင်ခတ်ကာ ရယ်မောလိုက်မိသည်။ စီမိသားစု၏ အေးစက်ပြီး ထက်မြက်လှသော သခင်လေးသည် ရှက်တတ်လိမ့်မည်ဟု သူမ မထင်ထားခဲ့မိချေ။ စီထင်သည် သူမ၏ ရယ်သံကို ကြားလိုက်ရသောအခါ ခြေလှမ်းများ တုံ့သွားပြီး မျက်နှာမှာ ပူထူသွားသည်။ ထိုခဏတွင် သူသည် သူမ၏ ထိုးဖောက်မြင်မှုကို ခံလိုက်ရသကဲ့သို့ ခံစားလိုက်ရပြီး ကိုယ့်ကိုယ်ကိုယ် လုံခြုံမှုမရှိသလို ဖြစ်သွားရသည်။
ယန်​ကောက ရုတ်တရက် မေးလိုက်သည်။ "သခင်မလေး လျိုယွဲ့... ဒီနေ့ အစီအစဉ်တွေကို သဘောကျရဲ့လား"
ချူလျိုယွဲ့က သူမ၏နဖူးကို မတတ်သာသလို ပွတ်လိုက်သည်။ "ဒုတိယသခင်ကြီး ယန်... ရှင့်ရဲ့ ကျေးဇူးတုံ့ပြန်မှုက အရမ်းကို ကြီးကျယ်လွန်းနေပြီ"
အမဲလိုက်ကွင်းထဲတွင် အဆင့်မြင့် မိစ္ဆာသားရဲများ ပေါ်လာသည်ဆိုဦးတော့၊ ဖီးနစ် စားသောက်ဆိုင် တစ်ဆိုင်လုံးကို ငှားရမ်းသည့် ကုန်ကျစရိတ်ကို မကာမိနိုင်ချေ။
"သုံးရက်တိတိ ငှားပေးတာတင် ကျေးဇူးတင်လို့ မဆုံးပါဘူး။ အခု မန်နေဂျာစုကိုပါ ပြောပြီး ဒုတိယထပ်က အခန်းတွေကို ဖွင့်ပေးခိုင်းဦးမလို့လား... ကျွန်မ နောက်ထပ် အမဲလိုက်ကွင်းတစ်ခု ရောင်းရင်တောင် ဒီကျေးဇူးကို ဆပ်နိုင်မှာ မဟုတ်ဘူး။ ရှင့်ရဲ့ ကျိန်းပေါင်ဆောင် သခင်ကြီးက ဒီလိုလုပ်တာကို ကန့်ကွက်မှာ မဟုတ်ဘူးဆိုတာ သေချာရဲ့လား"
ယန်​ကောသည် ထိုစကားကို ကြားသောအခါ ခေါင်းကိုက်သွားသလို ခံစားလိုက်ရသည်။ သခင်မလေးရယ်... ကျိန်းပေါင်ဆောင် တစ်ခုလုံးက သခင်မလေး အပိုင်ဖြစ်နေတာကို ဒါတွေ ပြောနေသေးတယ်လား။ သခင်လေးကတော့ လုပ်ဆောင်ချက်တွေ နှေးကွေးနေတုန်းပဲ။ သခင်မလေး မသိသေးတဲ့ ကိစ္စတွေ အများကြီး ရှိပါသေးတယ်...။
သူက ပတ်ဝန်းကျင်ကို ဝေ့ကြည့်ပြီးမှ ပြုံးလိုက်သည်။ "စိတ်မပူပါနဲ့။ အမှန်အတိုင်း ပြောရရင် ဒါတွေအားလုံးက သခင်ကြီးရဲ့ အကြံဉာဏ်တွေပါပဲ"
သူ့အကြံဉာဏ်တွေ?
ချူလျိုယွဲ့ မှင်တက်သွားသည်။ သူမက သတင်းစမ်းရုံသာ စမ်းကြည့်လိုက်ခြင်း ဖြစ်သော်လည်း ယန်​ကောက တိုက်ရိုက် ဝန်ခံလိမ့်မည်ဟု မထင်ထားခဲ့ချေ။ သို့သော်... သူမသည် ကျိန်းပေါင်ဆောင်၏ လျှို့ဝှက်ဆန်းပြားသော သခင်ကြီးကို မသိပါချေ။ သူက သူမကို ဘာကြောင့် ကူညီနေရသနည်း။ အမဲလိုက်ကွင်းကြောင့်သက်သက်ဟု သူမ မယုံကြည်နိုင်ပါချေ။
"ကျွန်မက ကျိန်းပေါင်ဆောင် သခင်ကြီးကို မသိပါဘူး... ဘယ်လိုလုပ်ပြီး..."
"အိုးမိသားစု အကြီးအကဲ 'အိုးရှန့်ထျန်း'၊ စွန်းမိသားစု အကြီးအကဲ 'စွန်းရှ'၊ ကျန့်ပေ့ နယ်စားကြီး 'ကျန်းယွမ်'၊ ရှန့်နန် အုပ်ချုပ်ရေးမှူး 'မိုချင်း'..."
ထိုစဉ် တံခါးဝမှ ကြေညာသံများ ထပ်မံ ထွက်ပေါ်လာပြန်သည်။ ထိုအမည်များကို ကြားလိုက်ရသောအခါ လူတိုင်း မှင်တက်သွားပြီး တံခါးဝသို့ လှည့်ကြည့်လိုက်ကြသည်။
ယန်​ကောသည် လှေကားပေါ် တက်နေသော စီထင် တစ်ကိုယ်လုံး တောင့်တင်းသွားသည်ကို မြင်လိုက်ရသဖြင့် ကျယ်လောင်စွာ ရယ်မောလိုက်ပြီး ပြောလိုက်သည်။
"သခင်ကြီးရဲ့ အမိန့်ကတော့... သခင်မလေးရဲ့ စားသောက်ပွဲကို စည်ကားသထက် စည်ကားအောင် လုပ်ပေးဖို့ပဲ!"