အခန်း ၇၈ — ကျွန်ုပ်၏ အရှင်သခင်

အချက်အလက်အားလုံးကို စုစည်းချိတ်ဆက်ကြည့်ပြီးနောက် ချူလျိုယွဲ့တစ်ယောက် အရာအားလုံးကို ရှင်းရှင်းလင်းလင်း သဘောပေါက်သွားတော့သည်။ ခုနက ဖြစ်ပေါ်ခဲ့သော ပေါက်ကွဲမှုအရ သူမသည် အိုင်ထဲမှ စွမ်းအားများကို အမှန်တကယ် အသုံးချနိုင်ကြောင်းနှင့် ထိုစွမ်းအားများသည် အနှစ်သာရပုလဲ (Pearl of Essence) ၏ စွမ်းအားနှင့် တစ်ထပ်တည်းကျကြောင်း သက်သေပြနေသည်။ ထို့အပြင် ထိုအိုင်ထဲရှိ စွမ်းအင်များသည် အနှစ်သာရပုလဲထက် အဆပေါင်းများစွာ ပိုမိုပြင်းထန်ကြောင်းလည်း သူမ သိရှိသွားခဲ့သည်။ ရေလှိုင်းအနည်းငယ်မျှ ကြွယ်ဝရုံဖြင့်ပင် ထိုမျှ ပြင်းထန်သော ပေါက်ကွဲမှုကို ဖြစ်စေနိုင်သည်ဆိုလျှင် သူမသာ အင်အားအကုန် အသုံးချလိုက်ပါက မည်မျှအထိ အစွမ်းထက်မည်နည်း။ ဤအရာသာ သူမ၏ ဒန်ထျန်း (စွမ်းအင်သို​လှောင်ရာ​နေရာ) ထဲတွင် ရှိနေသရွေ့ အနှစ်သာရပုလဲ သီးသန့်ဖွဲ့စည်းရန် မလိုတော့ပေ။ တစ်ခုတည်းသော နည်းလမ်းမှာ ဤအိုင်ကိုပင် သူမ၏ အနှစ်သာရပုလဲအဖြစ် သဘောထားရန်သာ ရှိတော့သည်။

သို့သော် ပြဿနာတစ်ခုမှာ ဤအရာသည် ကိုယ်ပိုင်အသိစိတ် ရှိနေခြင်းပင်။ ၎င်းက သူမ၏ အမိန့်ကို အပြည့်အဝ နာခံခြင်းမရှိပေ။ အကယ်၍ သူမသာ သတိမမူမိပါက ဒုက္ခများစွာ ပေးနိုင်လေသည်။ ထိုစဉ် ချူလျိုယွဲ့သည် သူမ၏ ခန္ဓာကိုယ်အတွင်း ထူးခြားသော ပြောင်းလဲမှုကို ရုတ်တရက် ခံစားလိုက်ရသည်။ သူမ စိတ်ကို တည်ငြိမ်အောင်ထားပြီး ဒန်ထျန်(စွမ်းအင်သို​လှောင်ရာ​နေရာ)ဆီသို့ အာရုံစိုက်ကြည့်လိုက်ရာ... ထိုအိုင်သည် ထူးဆန်းသော ပန်းနွယ်ပုံစံများပါရှိသည့် ဧရာမ ရေစက်ကြီးတစ်ခုအဖြစ် တဖြည်းဖြည်း ပြောင်းလဲသွားသည်ကို တွေ့လိုက်ရ၏။ ၎င်းမှာ ချူလျိုယွဲ့၏ လက်ဖဝါးပေါ်တွင် အစောပိုင်းက ပေါ်ပေါက်ခဲ့သော ပန်းနွယ်ပုံစံပင် ဖြစ်သည်။

ထိုခဏ၌ပင် ချူလျိုယွဲ့သည် သူမနှင့် ထိုရေစက်ကြီးအကြား ထူးခြားသော ဆက်နွှယ်မှုတစ်ခုကို ခံစားလိုက်ရသည်။ ထိုရေစက်သည် သူမ၏ ခန္ဓာကိုယ် အစိတ်အပိုင်းတစ်ခု ဖြစ်သွားသကဲ့သို့ပင်။ ချူလျိုယွဲ့သည် စိတ်အာရုံကို အသုံးပြုကာ ထိုရေစက်မှ စွမ်းအားအချို့ကို ထုတ်ယူရန် ကြိုးစားကြည့်လိုက်သည်။ အစောပိုင်းကထက် များစွာအားနည်းသော ရေလှိုင်းတစ်ခု ပေါ်ထွက်လာပြီး စွမ်းအားများသည် သူမ၏ ခန္ဓာကိုယ်အနှံ့ စီးဆင်းသွားသည်။ ရေစက်နှင့် ဆက်နွှယ်နေမှုကြောင့် ဤတစ်ကြိမ်တွင်မူ စွမ်းအားကို ပိုမိုကောင်းမွန်စွာ ထိန်းချုပ်နိုင်ကြောင်း သူမ သိသိသာသာ ခံစားလိုက်ရသည်။ ၎င်းသည် သူမ၏ ခန္ဓာကိုယ်နှင့် တစ်သားတည်း ဖြစ်နေသကဲ့သို့ပင်။

သူမ အကြိမ်အနည်းငယ် ထပ်မံစမ်းသပ်ကြည့်ပြီးနောက် ထိုရေစက်နှင့် သူမအကြား ဆက်ဆံရေးတစ်မျိုး တည်ဆောက်မိသွားပြီဖြစ်ကြောင်း အတည်ပြုနိုင်ခဲ့သည်။ ထိုစဉ် ရှေးဟောင်းကာလဆီမှ လွင့်ပျံ့လာသကဲ့သို့ ခန့်ညားနက်ရှိုင်းသော အသံကြီးတစ်ခု သူမ၏ ဦးနှောက်ထဲတွင် ဟိန်းထွက်လာတော့သည်။

"လောကသုံးပါး၊ ရှုပ်ထွေးလှသော ကောင်းကင်ဘုံ... ငါ၏ အရှင်သခင်သာလျှင် အောင်နိုင်လိမ့်မည်!"

...

ထိုအသံကို ကြားပြီးနောက် ချူလျိုယွဲ့တစ်ယောက် အတန်ကြာအောင် ငိုင်ကျသွားသည်။ ထိုစကားလုံးများသည် အတိုင်းအထက်အလွန် မောက်မာလွန်းလှသည်! သူမ၏ ယခင်ဘဝတွင် အစွမ်းထက်လှသော သူရဲကောင်းများစွာကို တွေ့ခဲ့ဖူးသော်လည်း မည်သူမျှ ဤကဲ့သို့ စကားမျိုးကို မပြောရဲခဲ့ကြပေ။ရွှမ်ဝူတိုက်ကြီးသည် အဆုံးအစမဲ့ ကျယ်ပြောလှပြီး မရေမတွက်နိုင်သော မျိုးနွယ်စုများ ရှိနေသည်ဖြစ်ရာ မည်သူက ထိပ်ဆုံးသို့ ရောက်နိုင်မည်နည်း။ ပြီးတော့ "ငါ၏ အရှင်သခင်" ဟု ပြောသွားခြင်းမှာ သူမကို ရည်ညွှန်းနေခြင်း မဟုတ်ပါလား။ ဤသည်မှာ အနည်းငယ်တော့ ရယ်စရာကောင်းလှသည်။

ထိုအသံ ပျောက်ကွယ်သွားသည်နှင့် ဒန်ထျန်း(စွမ်းအင်သို​လှောင်ရာ​နေရာ)အတွင်း၌ ဧရာမရေစက်ကြီးသာ ငြိမ်သက်စွာ ရှိနေတော့သည်။ ခုနက ဖြစ်ပျက်ခဲ့သမျှသည် အိမ်မက်တစ်ခုကဲ့သို့ပင်။ ချူလျိုယွဲ့သည် ထိုစကားကို လျစ်လျူရှုထားချင်သော်လည်း ထိုအသံမှာ သူမ၏ ဦးနှောက်ထဲတွင် ဖျောက်ဖျက်မရအောင် စွဲထင်နေခဲ့သည်။ သူမ ခဏမျှ စောင့်ကြည့်ပြီးနောက် ဆက်မတွေးရန်သာ ဆုံးဖြတ်လိုက်သည်။ ဤအရာက သူမကို သခင်အဖြစ် အသိအမှတ်ပြုထားမှတော့ သူမကို အန္တရာယ်ပြုမည် မဟုတ်ပေ။ ထိုသို့ဆိုလျှင် ၎င်းကိုပင် အနှစ်သာရပုလဲအဖြစ် လောလောဆယ် အသုံးပြုရတော့မည်။

၎င်းသည် အစောပိုင်းက အိုင်တစ်ခုအဖြစ် ရှိနေခဲ့ပြီး ယခုအခါ သူမကို သခင်အဖြစ် တရားဝင် အသိအမှတ်ပြုလိုက်သောကြောင့် ရေစက်အသွင် ပြောင်းသွားခြင်း ဖြစ်နိုင်သည်။ ချူလျိုယွဲ့သည် သူမ၏ ယွမ်သွေးကြောများကို ပြုပြင်နေစဉ်အတွင်း သူမ၏ ခန္ဓာကိုယ်ထဲသို့ စွမ်းအားအမြောက်အမြား စီးဆင်းစေခဲ့သော အိုင်ထဲမှ ရေစက်လေးတစ်စက်ကို မှတ်မိနေသေးသည်။ သူမ၏ ဒီကျင်း(ဧကရာဇ်​သွေး​ကြော)ယွမ်သွေးကြော (Dijing Yuan Meridian) ကို ပိုင်ဆိုင်နိုင်ခြင်းမှာလည်း ထိုရေစက်လေးကြောင့် ဖြစ်ပုံရသည်။ သို့သော် ထိုရေစက်လေးသည် ယခု သူမ၏ ဒန်ထျန်(စွမ်းအင်သို​လှောင်ရာ​နေရာ)ထဲရှိ ရေစက်ကြီး၏ ထောင်ပုံတစ်ပုံတောင် မရှိနိုင်ပေ။

ထိုစဉ် ရေစက်ကြီးပေါ်တွင် အနီရောင်လှိုင်းများ ရုတ်တရက် ပေါ်လာသည်။ ရေစက်ကြီးကို ကြည်လင်သော အမြှေးပါးတစ်ခုက ဖုံးအုပ်ထားသကဲ့သို့ ရှိပြီး ထိုအမြှေးပါးပေါ်တွင် အနီရောင်လှိုင်းများကို ထွင်းထုထားပုံရသည်။ ရေစက်အတွင်းမှ ရေများသည် လှုပ်ရှားစီးဆင်းနေသော်လည်း အပြင်ဘက်အမြှေးပါးမှာမူ ငြိမ်သက်နေသည်။ ဤအခြေအနေတွင် ရေစက်ကြီးသည် အနှစ်သာရပုလဲနှင့် များစွာတူညီနေသည်။ သာမန်ကျင့်ကြံသူများအတွက်မူ သူတို့၏ အဆင့်တက်လာသည်နှင့်အမျှ အနှစ်သာရပုလဲပေါ်ရှိ အမှတ်အသားများက ပြောင်းလဲသွားလေ့ရှိသည်။ အဆင့်-၁ စစ်သည်တော်များအတွက် အနှစ်သာရပုလဲပေါ်တွင် မျဉ်းတစ်ကြောင်းရှိမည်ဖြစ်ပြီး အဆင့်-၂ ဆိုလျှင် နှစ်ကြောင်း စသည်ဖြင့် အဆင့်အလိုက် တိုးသွားမည်ဖြစ်သည်။

ချူလျိုယွဲ့သည် ထိုရေစက်ကို စိုက်ကြည့်ရင်း လေးလေးနက်နက် တွေးတောနေမိသည်။ ပုံသဏ္ဌာန် အနည်းငယ်ကွဲပြားသည်မှလွဲလျှင် ဤအရာသည် အနှစ်သာရပုလဲနှင့် အတော်လေး ဆင်တူသည်။ ဪ... ၎င်းတွင် ကိုယ်ပိုင်အသိစိတ် ရှိနေသေးသည်ပဲ။ ဒါက သူမအတွက် ပိုတောင် အဆင်ပြေသေးသည်။ ဒါပေမဲ့... ဘာလို့ မျဉ်းတစ်ကြောင်းတည်း ရှိနေရတာလဲ။

ဘာပဲဖြစ်ဖြစ် အခုတော့ သူမမှာ 'အနှစ်သာရပုလဲ' ရှိနေပြီပဲ။ သူမ၏ စွမ်းဆောင်ရည်အရဆိုလျှင် အဆင့်-၃ စစ်သည်တော် ဖြစ်သင့်သည် မဟုတ်ပါလား။ သို့သော် ဘာကြောင့် မျဉ်းတစ်ကြောင်းတည်းသာ ရှိနေရသနည်း။ ချူလျိုယွဲ့သည် မကျေမနပ်ဖြစ်ကာ နောက်ထပ်မျဉ်းတစ်ကြောင်း ထပ်တိုးရန် ကြိုးစားကြည့်သော်လည်း ထိုရေစက်က တုံ့ပြန်မှုပင် မရှိပေ။ ထိုမျဉ်းကို စိုက်ကြည့်ရင်း ချူလျိုယွဲ့တစ်ခုခုကို သတိထားမိသွားသည်။ ဤရေစက်က သူမကို ဒုတိယမျဉ်းအတွက် အရည်အချင်းမပြည့်မီဘူးလို့ ထင်နေတာလား။

"နင်က ငါ့ကို အထင်သေးနေတာလား" ချူလျိုယွဲ့မယုံနိုင်စွာ မေးလိုက်သည်။ "ငါ အနည်းဆုံး မျဉ်းနှစ်ကြောင်းတော့ ရှိသင့်တာ မဟုတ်ဘူးလား"

ဘာလို့ မျဉ်းတစ်ကြောင်းတည်းနဲ့ ရပ်နေရတာလဲ။ ဒီလောက် ဒုက္ခခံထားရတာ နောက်ဆုံးတော့ ငါက အဆင့်-၁ စစ်သည်တော်ပဲလား။ ရေစက်က ဘာမှပြန်မပြောသော်လည်း ချူလျိုယွဲ့မှာမူ အနှိမ်ခံလိုက်ရသလို ခံစားလိုက်ရသည်။ သူမ ထိုရေစက်ကို အတန်ကြာအောင် မျက်စောင်းထိုးကြည့်နေပြီးနောက် နောက်ဆုံးတွင်တော့ စိတ်ပျက်လက်ပျက်ဖြင့်သာ မျက်လုံးဖွင့်လိုက်ရတော့သည်။

"အင်း? အနှစ်သာရပုလဲ ဖွဲ့စည်းလို့ ပြီးပြီလား"

ရုံရှုးသည် သူမ၏ လှုပ်ရှားမှုကို သတိထားမိပြီး ချက်ချင်း လှမ်းကြည့်လိုက်သည်။ တစ်ချက်ကြည့်လိုက်ရုံဖြင့် ချူလျိုယွဲ့ဆီမှ ထွက်ပေါ်နေသော အရှိန်အဝါကို သူ ခံစားလိုက်ရသည်။ သူမက... အဆင့်-၁ စစ်သည်တော်လား။ ရုံရှုး၏ မျက်နှာအမူအရာ အနည်းငယ် တောင့်တင်းသွားပြီး ချူလျိုယွဲ့ကို အတန်ကြာ စိုက်ကြည့်နေပြီးမှ မသေချာသလို မေးလိုက်သည်။

"မင်း... မင်း တကယ်ပဲ ဆက်ပြီး အဆင့်မတက်တော့ဘူးလား"

သူမ၏ စွမ်းဆောင်ရည်အရဆိုလျှင် အဆင့်-၁ ထက် များစွာသာလွန်သင့်သည်မှာ အသေအချာပင်။ ချူလျိုယွဲ့ သွားကြိတ်လိုက်မိသည်။ သူမ၏ 'အနှစ်သာရပုလဲ' ပေါ်မှာ ဒုတိယမျဉ်းကို ထပ်တိုးလို့မရဘူးဆိုတာကို သူမ ဘယ်လိုလုပ် ဝန်ခံနိုင်မှာလဲ။

"အဆင့်-၁ စစ်သည်တော် ဖြစ်တာလည်း ကောင်းတာပဲလေ။ လူမသိသူမသိ နေလို့ရတာပေါ့"

ရုံရှုးက ခပ်ယဲ့ယဲ့ ပြုံးလိုက်ရင်း "မင်း ထျန်းလုအကယ်ဒမီနဲ့ နန်းမြို့တော်တစ်ခုလုံးကို ဆူညံပွက်လောရိုက်အောင် လုပ်ထားပြီးမှ အခုမှ လူမသိသူမသိ နေချင်တာလား။ မင်းကိုယ်တိုင်ပဲ အောင်ပွဲခံစားသောက်ပွဲ လုပ်မယ်လို့ ပြောခဲ့တာ မဟုတ်လား"

ချူလျိုယွဲ့ နှာခေါင်းရှုံ့လိုက်သည်။ "ဒါကတော့ ပြောနေစရာတောင် မလိုဘူးလေ"

သူမသည် ချူမိသားစုနှင့် ပတ်သက်မှုအားလုံးကို ဖြတ်တောက်ရုံသာမက သူမအပေါ် စော်ကားမော်ကား ပြုမူခဲ့သမျှအတွက်ပါ ထိုက်တန်သည့် တန်ဖိုးကို ပြန်ပေးဆပ်ခိုင်းရမည် ဖြစ်သည်။

ရုံရှုးသည် သူမ၏ နှုတ်ခမ်းဆူနေသော ပုံစံကို မြင်သောအခါ မရယ်ဘဲ မနေနိုင်တော့ပေ။ "ကြည့်ရတာ ယွဲ့အာက ငါ့ကို ပွဲကောင်းတစ်ပွဲ ပြတော့မယ့်ပုံပဲ"