အခန်း ၆၈ — အကောင့်ဟောင်းများ ရှင်းလင်းခြင်း

သူမ၏ ကြေညာချက်ကြောင့် လူအုပ်ကြီးကြားတွင် ရုတ်ရုတ်သဲသဲ ဖြစ်သွားရသည်။ ချူလျိုယွဲ့ ဘာပြောလိုက်တာလဲ? ချူမိသားစုနဲ့ အဆက်အသွယ် အားလုံးဖြတ်တောက်မယ် ဟုတ်လား? သူမ ရူးသွားပြီလား?

"မင်း... မင်း ဘာပြောလိုက်တာလဲ"

ပထမအကြီးအကဲက အံ့အားသင့်လွန်းသဖြင့် မသိစိတ်ဖြင့်ပင် ပြန်မေးမိသည်။ ချူလျိုယွဲ့၏ ပြတ်သားသော အကြည့်နှင့် ဟိန်းထွက်လာသော စကားလုံးတို့မှာ လူတိုင်း၏ နားစည်ကို မိုးကြိုးပစ်ချလိုက်သကဲ့သို့ပင်။

"ဒီနေ့ကစပြီး ကျွန်မနဲ့ ကျွန်မအဖေဟာ ချူမိသားစုနဲ့ ဘာမှမပတ်သက်တော့ဘူးလို့ ပြောတာ! ရှင်းပြီလား"

"မင်း ဘာတွေပြောနေလဲဆိုတာရော သိရဲ့လား"

ပထမအကြီးအကဲက မယုံကြည်နိုင်စွာ စိုက်ကြည့်နေမိသည်။ သူမသည် ဤကဲ့သို့သော စကားမျိုးကို ပြောထွက်လိမ့်မည်ဟု သူ တစ်ခါမှ မတွေးမိခဲ့ပေ။

"မင်းတို့နှစ်ယောက်လုံးရဲ့ ကိုယ်ထဲမှာ ချူမိသားစုရဲ့ သွေးတွေ စီးဆင်းနေတာ။ အခုလို ပြောတာဟာ မိသားစုအပေါ် လုံးဝကို ရိုင်းပျစော်ကားရာ ရောက်တယ်။ ထျန်းလုအကယ်ဒမီကို တက်ခွင့်ရတာနဲ့ ငါတို့ကို ပြန်လှည့်တိုက်တော့မယ်ဆိုတာ ငါ သိပြီးသားပဲ!"

ပထမအကြီးအကဲသာမက ချူမိသားစုတစ်ခုလုံး ထိတ်လန့်တုန်လှုပ်နေကြသည်။ ချူလျိုယွဲ့သည် ဘဝသစ်တစ်ခုကို စတင်နိုင်သည်နှင့် တစ်ပြိုင်နက် အတိတ်ကကိစ္စများအတွက် သူမ ကလဲ့စားချေလာနိုင်သည်ဟု သူတို့ တွေးမိခဲ့ကြသော်လည်း၊ ဤမျှ ပြတ်ပြတ်သားသားဖြင့် မိသားစုမှ ထွက်သွားရန် ဆုံးဖြတ်လိမ့်မည်ဟု မည်သူမျှ မထင်ထားခဲ့ကြပေ။ သူမသည် ပါရမီရှင်တစ်ယောက် ဖြစ်လာခဲ့လျှင်ပင် ချူမိသားစုတစ်ခုလုံးကို ယှဉ်တိုက်နိုင်မည်ဟု ယူဆထားခြင်းမှာ စိတ်ကူးယဉ်ဆန်လွန်းရာ ကျသည်မဟုတ်ပါလား။

ချူမိသားစုသည် မြို့တော်၏ အထင်ကရ မိသားစုကြီးလေးစုထဲမှ တစ်ခုဖြစ်ပြီး အဆင့်အတန်း မြင့်မားလှသည်။ လူပေါင်းမည်မျှကများ သူတို့နှင့် ပတ်သက်ခွင့်ရရန် မျှော်လင့်နေကြသနည်း။ သူမက အဘယ်ကြောင့် ဤကဲ့သို့ ဆုံးဖြတ်ချက်မျိုးကို ချနိုင်ရသနည်း။

"ကျွန်မက ဒီကို လာဆွေးနွေးတာမဟုတ်ဘူး၊ အသိပေးတာ"

သူမ၏ စကားများကြောင့် ဖြစ်ပေါ်လာသည့် ဂယက်ရိုက်ခတ်မှုများကို ချူလျိုယွဲ့က ဂရုမစိုက်သကဲ့သို့ပင်။ သူမ၏ မျက်နှာအမူအရာမှာ တည်ငြိမ်အေးဆေးနေဆဲ ဖြစ်သော်လည်း ပြောလိုက်သည့် စကားလုံးတိုင်းတွင် မည်သူမျှ မငြင်းဆန်နိုင်သော အရှိန်အဝါတို့ ပါဝင်နေသည်။

တတိယအကြီးအကဲက နဖူးကြောများ တွန့်ချိုးလျက် ဝင်ပြောလာသည်။

"လျိုယွဲ့... ဒီလို အဓိပ္ပာယ်မရှိတာတွေ မပြောပါနဲ့။ မင်း စိတ်မကောင်းဖြစ်နေတာ ငါသိပါတယ်၊ ဒါပေမဲ့ မင်း အရမ်း စိတ်လိုက်မာန်ပါ ဖြစ်နေပြီ..."

"တတိယအကြီးအကဲ... ကျွန်မ ဆုံးဖြတ်ချက်ချပြီးပါပြီ"

တတိယအကြီးအကဲကို စကားပြောရာတွင်တော့ ချူလျိုယွဲ့က ယဉ်ယဉ်ကျေးကျေးပင် ရှိနေသေးသည်။ အဘယ်ကြောင့်ဆိုသော် မူလခန္ဓာကိုယ်ပိုင်ရှင်၏ မှတ်ဉာဏ်များအရ တတိယအကြီးအကဲ ချူယင်သည် သူမနှင့် သူမအဖေကို ကူညီခဲ့ဖူးသည့် လူနည်းစုထဲမှ တစ်ယောက် ဖြစ်သောကြောင့်ပင်။ ချူယင်တွင် သားသမီးမရှိဘဲ ချူနင်ကို သားအရင်းသဖွယ် အမြဲတစေ အသိအမှတ်ပြုခဲ့သူ ဖြစ်သည်။ သို့သော် ထိုမတော်တဆမှု ဖြစ်ပြီးနောက်တွင်တော့ သူကူညီချင်သော်လည်း အခြေအနေအရ ဘာမှမတတ်နိုင်ခဲ့ပေ။

တတိယအကြီးအကဲသည် တစ်ခုခုပြောရန် ပြင်လိုက်သော်လည်း ချူလျိုယွဲ့ကို ကြည့်ပြီး သက်ပြင်းသာ ချလိုက်နိုင်သည်။ အဆုံးစွန်ထိတော့ သူကိုယ်တိုင်ကလည်း အခွင့်အာဏာမရှိခဲ့သူ မဟုတ်ပါလား။ အကယ်၍ သူသာ မိသားစုအတွင်း ဩဇာရှိခဲ့ပြီး သူတို့ကို အနည်းငယ် ပိုကူညီပေးနိုင်ခဲ့ပါက ချူနင်နှင့် ချူလျိုယွဲ့တို့သည် ဤမျှအထိ ဆိုးရွားသော အခြေအနေသို့ ရောက်ရှိသွားမည် မဟုတ်ပေ။

အကယ်၍ ချူလျိုယွဲ့သာ ထျန်းလုအကယ်ဒမီကို တက်ခွင့်မရခဲ့ပါက သူမသည် ပထမအကြီးအကဲကို ဤသို့ ရင်ဆိုင်ဝံ့မည် မဟုတ်ပေ။ ဤမိန်းကလေးသည် ချူမိသားစုကို စိတ်ကုန်သွားပြီဖြစ်ကြောင်း ထင်ရှားလှသည်။ သူမကို ဆွဲထားရန်မှာ အလွန်ပင် နောက်ကျသွားချေပြီ။

ဒေါသထွက်နေသော ချူယန်သည်လည်း သတိပြန်ဝင်လာပြီး အလောတကြီး မေးလိုက်သည်။

"ချူလျိုယွဲ့! အခု ချူနင်က ဒီမှာ မရှိဘူး။ မင်း ပြောတဲ့စကားတွေဟာ သူ့ရဲ့ ဆန္ဒအစစ်အမှန်လို့ ပြောနိုင်လို့လား"

ချူလျိုယွဲ့နှင့် ချူနင်တို့ ထွက်သွားခြင်းသည် မိသားစုအတွက် မကောင်းနိုင်သော်လည်း ချူယန်နှင့် သူ၏မိသားစုအတွက်မူ အကျိုးအမြတ်ကြီးလှသည်။ နောက်တက်မည့် မိသားစုအကြီးအကဲ နေရာအတွက် ချူနင်နှင့် ယှဉ်ပြိုင်နေစရာ မလိုတော့သလို၊ ချူလျိုယွဲ့ကလည်း မိသားစု၏ အဖိုးတန် အရင်းအမြစ်များကို သုံးစွဲနိုင်တော့မည် မဟုတ်ပေ။ သူတို့ ထွက်သွားသည်နှင့် မိသားစုအတွင်းရှိ အရာအားလုံးမှာ သူ၏လက်ဝယ်သို့ ရောက်ရှိလာတော့မည် ဖြစ်သည်။

သူ့မျက်လုံးထဲမှ အရောင်အဝါများကို မြင်လိုက်သည်နှင့် ချူယန် ဘာတွေးနေသည်ကို ချူလျိုယွဲ့ ခန့်မှန်းမိလိုက်သည်။ သူမက ပြုံးလျက် အေးအေးဆေးဆေးပင် ပြန်ဖြေလိုက်သည်။

"ကျွန်မပြောသမျှဟာ အဖေရဲ့ ဆန္ဒတွေပါပဲ။ စိတ်ချပါ... ကျွန်မတို့ အေးအေးဆေးဆေးပဲ ထွက်သွားမှာပါ။ ဒါပေမဲ့ နောက်ဆုံးကိစ္စလေးတစ်ခုကို ရှင်းပြီးမှ မိသားစုနဲ့ လုံးဝ အဆက်အသွယ် ဖြတ်မှာ ဖြစ်တယ်"

သူမက လက်ညှိုးတစ်ချောင်း ထောင်ပြလိုက်သည်။

"ပထမအချက်... ကျွန်မအမေ အဖေနဲ့ လက်ထပ်တုန်းက တင်တောင်းခဲ့တဲ့ ပစ္စည်းတွေဟာ အလေးချိန် ပိဿာ ၁၂၀ ကျော်ရှိတယ်။ ကျွန်မ မှတ်မိသလောက်ဆိုရင် အဖေ ဒဏ်ရာရခဲ့တုန်းက အဖေ့ကို စိတ်အေးအေးထားပြီး အနားယူစေချင်တယ်ဆိုတဲ့ အကြောင်းပြချက်နဲ့ လုယောင်ကို အဲဒီပစ္စည်းတွေ စီမံခန့်ခွဲခွင့် ပေးခဲ့တယ်မလား။ အခု မိသားစုကနေ ထွက်သွားမှာဆိုတော့ အဲဒီပစ္စည်းတွေကို ကျွန်မဆီ ပြန်ပေးဖို့ အချိန်တန်ပြီ"

ချူယန်နှင့် လုယောင်တို့၏ မျက်နှာများ ပြိုင်တူ ဖြူလျော့သွားကြသည်။

"ဒုတိယအချက်... အဖေဟာ မိသားစုအကြီးအကဲရဲ့ သားတစ်ယောက်ပဲ။ ကျွန်မကလည်း ချူမိသားစုရဲ့ သမီးအကြီးဆုံး ဖြစ်ခဲ့ဖူးတယ်။ အခု မိသားစုရဲ့ ဂိုဏ်းချုပ်ကြီး ဒီမှာ မရှိပေမဲ့၊ ကျွန်မတို့ သားအဖကို လက်ဗလာနဲ့ ထွက်သွားခိုင်းတယ်ဆိုတာ သိရင် သူ စိတ်မကောင်းဖြစ်မှာ သေချာတယ်။ ဒါကြောင့် မိသားစုပိုင်ဆိုင်မှုရဲ့ ငါးပုံတစ်ပုံကို တောင်းတာဟာ မလွန်ဘူးလို့ ထင်တယ်... ဟုတ်တယ်မလား"

"မင်း အိမ်မက်မက်နေတာလား!"

ချူယန်က ချက်ချင်းပင် ကန့်ကွက်တော့သည်။

"မိသားစုမှာ သားသမီးတွေ အများကြီးရှိတာ။ မင်းတို့ သားအဖက ပိုင်ဆိုင်မှု ငါးပုံတစ်ပုံကို အလကားရမယ်လို့ ထင်နေတာလား"

ချူလျိုယွဲ့က ပွင့်ပွင့်လင်းလင်းပင် ဆိုလိုက်သည်။

"နှစ်ပေါင်းများစွာအတွင်း အဖေဟာ ချူမိသားစုအတွက် ဘယ်လောက်တောင် ပေးဆပ်ခဲ့လဲဆိုတာ ရှင်တို့အကုန်လုံး မျက်မြင်ပါပဲ။ မပေးချင်လည်း ရပါတယ်။ ကျွန်မ ဧကရာဇ်မင်းမြတ်ဆီ သွားပြီး တရားမျှတမှု တောင်းခံလိုက်မယ်။ ကျွန်မတို့ ရသင့်ရထိုက်တာကို ရမရဆိုတာ အဲဒီကျမှ ကြည့်ကြတာပေါ့"

ချူယန်၏ ပါးစပ်မှာ ချက်ချင်းပင် ပိတ်သွားတော့သည်။ ချူနင်သည် လွန်ခဲ့သော နှစ်ပေါင်းများစွာက ဧကရာဇ်ကို ကာကွယ်ရင်း ဒဏ်ရာရခဲ့ခြင်းဖြစ်ကြောင်း လူတိုင်းသိကြသည်။ အကယ်၍ ဤကိစ္စသာ ဧကရာဇ်မင်းမြတ်ထံ ရောက်သွားပါက ဧကရာဇ်သည် သူ၏ ဂုဏ်သိက္ခာအတွက်ကြောင့်ပင် ချူနင်အား တရားမျှတစွာ ဆောင်ရွက်ပေးလိမ့်မည် ဖြစ်သည်။ ထိုသို့ဖြစ်လာပါက ချူမိသားစုအတွက်သာ အရှက်ရစရာ ဖြစ်ပေလိမ့်မည်။

ပထမအကြီးအကဲသည် ဒေါသထွက်လွန်းသဖြင့် ရယ်ပင်ရယ်မိသွားသည်။

"ကောင်းပြီ! ကောင်းပြီ! မင်း အစအဆုံး အကွက်ချထားပြီးသားပဲကိုး။ ဒီလိုဖြစ်မှတော့ မင်းတို့နှစ်ယောက်လုံး ဒီနေ့ကစပြီး ချူမိသားစုရဲ့ မြေပေါ်ကို ခြေတစ်ဖက်တောင် မချကြနဲ့တော့။ မြို့တော်ထဲမှာ မင်းတို့ ဘယ်လိုရှင်သန်မလဲဆိုတာ ငါ စောင့်ကြည့်ဦးမယ်!"

ချူမိသားစု၏ ကျောထောက်နောက်ခံမရှိဘဲ သူတို့ နေစရာနေရာပင် ရှိမည်မဟုတ်ဟု သူ ယူဆထားသည်။

ချူလျိုယွဲ့က မျက်တောင်လေး ခတ်လျက် ပြုံးလိုက်သည်။

"ပထမအကြီးအကဲ ကျွန်မတို့အတွက် စိတ်မပူပါနဲ့။ လွန်ခဲ့တဲ့ ရက်အနည်းငယ်ကပဲ ကျွန်မ အနောက်လမ်းမမှာ အိမ်အသစ်တစ်လုံး ဝယ်ထားပြီးသားပါ။ ချူမိသားစုရဲ့ အိမ်တော်ကြီးလောက် မကြီးပေမဲ့ အရမ်းကို သန့်ရှင်းသပ်ရပ်ပြီး အပိုပြဿနာတွေ မရှိတဲ့ နေရာလေးပေါ့။ ဒီနေ့က ရှစ်လပိုင်းရဲ့ ၁၀ ရက်နေ့ဆိုတော့... အမှိုက်ဟောင်းတွေကို ရှင်းထုတ်ပြီး နေရာသစ်ကို ပြောင်းဖို့ အကောင်းဆုံးနေ့ပဲ မဟုတ်လားရှင်!"