အခန်း ၁၃။ ဝိညာဉ်ပိုးကောင် ဆေးလုံးနှင့် သစ်အယ်သီး အသားမုန့်လုံးများ။ လှဲလျောင်းနေရင်းပင် အဆင့်တက်လှမ်းခြင်း။

[အဆိပ်သီး။ စားသုံးမိပါက ဧကန်မုချ သေဆုံးစေမည်။ လုံးဝ မစားသုံးပါနှင့်]

တကယ့်ကို ဂရုတစိုက်ရှိလှတဲ့ သတိပေးချက်ပါလားဟု စုလီက တွေးတောရင်း ကျေနပ်စွာ ဖြင့်ခေါင်းညိတ်လိုက်သည်။ လောလောဆယ်တွင် သူသည် ဤပစ္စည်းနှစ်မျိုးကိုသာ စမ်းသပ်နိုင်သေးပြီး ထို့နောက်တွင် စုလီသည် ခိုင်ခံ့သော သစ်သားခုတင်ကြီးကို မီးဖို၏ အခြားတစ်ဖက်သို့ ရွှေ့လိုက်သည်။ ကြမ်းပြင်ပေါ်တွင် ခင်းထားသော အူလာမြက်ခြောက်များကို ခုတင်ပေါ်သို့ ပြောင်းရွှေ့ခင်းကျင်းပြီးမှသာ သက်သောင့်သက်သာ လှဲလျောင်းလိုက်တော့သည်။ စုလီသည် ခုတင်ပေါ်တွင် လှဲချလိုက်သည်နှင့် တစ်ပြိုင်နက် ပြင်းပြသော အိပ်ချင်စိတ်က လွှမ်းမိုးသွားကာ ချက်ချင်းပင် အိပ်ပျော်သွားတော့သည်။

အချိန်မည်မျှ ကုန်ဆုံးသွားသည်ကိုပင် သူ မသိလိုက်ပေ။ စုလီသည် အလိုအလျောက် နိုးလာသောအခါ ဂေဟာ၏ အလင်းဖောက် ပြတင်းပေါက်မှာ ပိတ်ထားဆဲ ဖြစ်သဖြင့် မိုးမလင်းသေးကြောင်း သိလိုက်ရသည်။ ငါ တစ်နာရီလောက်ပဲ အိပ်လိုက်ရသလားဟု စုလီက ခုတင်ပေါ်တွင် လှဲလျောင်းရင်း တွေးတောနေမိသည်။ သူသည် မိမိ၏ အခြေအနေပြ မှတ်တမ်းကို အရင်ဆုံး ကြည့်လိုက်သောအခါ အတွေ့အကြုံ တစ်မှတ် တိုးလာသည်ကို တွေ့ရသည်။

[အဆင့် ၁ (၁ / ၁၀)]

ငါ့ထင်မြင်ချက်က တကယ်ပဲ မှန်ကန်နေတာပဲဟု စုလီက အချိန်ကို တွက်ချက်ရင်း တွေးလိုက်သည်။ သူသည် အိပ်ရာမှထကာ ခုတင်ပေါ်မှ ဆင်းလိုက်သည်။ သူသည် သန့်စင်ပြီးသား သစ်အယ်သီးများကို နတ်ဘုရားအဆင့်ရှိ သစ်အယ်သီးကြီးများ ဖြစ်လာအောင် အရင်ဆုံး မြှင့်တင်လိုက်ပြီးနောက် အချို့ကို ခုတင်ပေါ်သို့ ယူဆောင်လာခဲ့သည်။ ထို့နောက် ကျန်ရှိနေသော မိစ္ဆာ ပုံဆောင်ခဲ သုံးခုကိုလည်း ခုတင်ပေါ်သို့ ယူလာခဲ့သည်။

သူသည် ထာဝရ ရတနာ သွန်းလုပ်ခြင်း စွမ်းရည်ကို စတင် အသုံးပြုလိုက်သည်။ ထိုစွမ်းရည်၏ စာရင်းတွင် သူ အသုံးပြုခဲ့ဖူးသော ပုံစံငယ်များ ပေါ်လာသည်။ ၎င်းတို့မှာ နတ်ဘုရား အဆင့်ရှိသော သစ်သားခုတင်နှင့် နတ်ရှစ်ပါးနတ်စင် စားပွဲကြီးများပင် ဖြစ်သည်။ လိုအပ်သော ကုန်ကြမ်းများမှာလည်း အတူတူပင် ဖြစ်နေသည်။

ကောင်းပြီ စုလီသည် ပြုံးလိုက်မိသည်။ ဤသည်မှာ နောင်တစ်ချိန်တွင် သူသည် ပုံစံငယ် တစ်ခု ရရှိရုံဖြင့် ထိုအရာကို စိတ်ကြိုက် ထုတ်လုပ်နိုင်တော့မည်ဟု အဓိပ္ပာယ်ရသည်။ ဤသည်မှာ အလွန် တန်ဖိုးရှိသော စီးပွားရေး လမ်းစပင် ဖြစ်တော့သည်။ သူသည် အပြင်ထွက်ကာ အရင်းအမြစ်များရှာဖွေရန်မလိုဘဲဂေဟာအတွင်း လှဲလျောင်းနေရင်းပင် အရာအားလုံးကို ရရှိနိုင်မည် ဖြစ်သည်။

ထို့နောက် စုလီသည် ဒုတိယ စွမ်းရည်ဖြစ်သော အလိုအလျောက် ရတနာ သွန်းလုပ်ခြင်းကို အသုံးပြုလိုက်သည်။ လိုအပ်ချက်များအတိုင်း နတ်ဘုရားအဆင့်ရှိ မိစ္ဆာ ပုံဆောင် ခဲ တစ်ခုနှင့် ခရမ်းရောင် အဆင့်ရှိ အူလာမြက်ခြောက် တစ်ဆုပ်ကို ပေါင်းစပ်ကာ စွမ်းရည်ကို အသုံးပြုလိုက်သည်။

ရှစ်ပါး ရတနာ မီးဖိုပုံသဏ္ဌာန် အရိပ်တစ်ခု လေထုထဲတွင် ပေါ်လာပြီး မိစ္ဆာ ပုံဆောင်ခဲနှင့် မြက်ခြောက်များကို စုပ်ယူသွားသည်။ ၁ မိနစ် ခန့်အကြာတွင် အလင်းဖြူလေးများ ဖြာထွက်နေသော ကြိုးတစ်ချောင်း ခုတင်ပေါ်တွင် ပေါ်လာပြီး မီးဖို ပုံစံအရိပ်မှာလည်း ပျောက်ကွယ်သွားသည်။ ၎င်းမှာ အူလာမြက်ဖြင့် ကျစ်ထားသော ၃ မီတာရှည်သည့် ကြိုးဖြစ်ပြီး လက်သန်းခန့်သာ အထူရှိသော်လည်း မျက်နှာပြင်မှ ထွက်ပေါ်နေသော အလင်းတန်းများက ထိုကြိုး၏ ထူးခြားမှုကို ဖော်ပြနေသည်။ စုလီသည် အူလာမြက်ကြိုး၏ အခြေအနေကို ကြည့်လိုက်သည်။

[အူလာမြက်ကြိုး။ နတ်ဘုရားအဆင့်။ မည်သည့်အခါမျှ မပြတ်တောက်နိုင်သော ကြိုး]

[စွမ်းရည်။ စိတ်ကြိုက် ကျုံ့နိုင် ဆန့်နိုင်ခြင်း။ အမိန့်ပေးရုံဖြင့် ကြိုး၏ အရှည်ကို ထိန်းချုပ်နိုင်သည်။]

[စွမ်းရည်။ မည်သည့်အခါမျှ ဟောင်းနွမ်း ပျက်စီးခြင်း မရှိခြင်း။ မြူခိုးကမ္ဘာ၏ နိယာမ အစအနများ ပါဝင်နေသဖြင့် ပျက်စီးခြင်း မရှိပေ။]

[စွမ်းရည်။ အလိုအလျောက် ချည်နှောင်နိုင်ခြင်း။ မည်သည့် အရာဝတ္ထုကိုမဆို အလိုအလျောက် ချည်နှောင်ရန် အမိန့်ပေးနိုင်သည်။]

စွမ်းရည် ၃ မျိုးတောင် ပါတာလားဟု စုလီက အံ့အားသင့်စွာ ပြော လိုက်ရင်း ထိုကြိုးကို ထပ်မံ မြှင့်တင်လိုက်သည်။ မကြာမီတွင် ထိုကြိုးမှာ ၃ ကြိမ်မြောက် မြှင့်တင်ပြီးနောက်တွင် ထပ်မံ မြှင့်တင်၍ မရတော့ဘဲ စွမ်းရည်သစ် ၂ မျိုး ထပ်တိုးလာသည်။

[စွမ်းရည်။ အလိုအလျောက် ထုံးဖွဲ့နိုင်ခြင်း။ ကြိုးကို မတူညီသော အထုံးအဖွဲ့များဖြင့် ချည်နှောင်ရန် အမိန့်ပေးနိုင်သည်။]

[စွမ်းရည်။ သခင်ကို မှတ်မိခြင်း။ သွေးဖြင့် သစ္စာပြုထားသူ၏ စကားကိုသာ နားထောင်လိမ့်မည်။]

ဤအူလာမြက်ကြိုးနှင့် ပရိဘောဂများမှာ စွမ်းရည် ၅ မျိုးစီ ရှိကြပြီး ထုတ်လုပ်ပြီးမှသာ အပြည့်အဝ မြှင့်တင်နိုင်ခြင်း ဖြစ်သည်။ သို့သော် ယခင်က ရရှိခဲ့သော ကျောက်ပုဆိန်နှင့် မိစ္စာတူတို့မှာမူ (tn ဝံပုလွေစွယ်တူနဲ့ မိစ္စာတူနဲ့တူတူပါပဲ မူရင်းက ကိုပြောင်းချင်သလိုပြောင်းနေတာပါ)နတ်ဘုရားအဆင့် ရောက်ရှိပြီးနောက် ထပ်မံ မြှင့်တင်၍ မရတော့ပေ။

ဤသည်မှာ မိမိကိုယ်တိုင် ထုတ်လုပ်သော ပစ္စည်းများသာလျှင် အမြင့်ဆုံး အဆင့်သို့ ရောက်ရှိပြီးနောက် စွမ်းရည် ၅ မျိုးအထိ ရရှိနိုင်သည့် ပုံစံဖြစ်နိုင်သည်ဟု စုလီက တွေးတောမိသည်။ မြူခိုးကမ္ဘာ၏ နိယာမအရ ဆုလာဘ်အဖြစ် ရရှိသော ပစ္စည်းများတွင်မူ ဤကဲ့သို့သော စွမ်းအားမျိုး မရှိပေ။

ဤသည်မှာ နောက်ထပ် ထူးခြားသော တွေ့ရှိချက်တစ်ခုပင် ဖြစ်သည်။ သူသည် ချက်ချင်းပင် မိစ္ဆာစွယ်တူဖြင့် မိမိ၏ လက်ချောင်းကို ဖောက်ကာ သွေးတစ်စက် ချလိုက်သောအခါ ကြိုးနှင့် သူ၏ကြားတွင် ထူးဆန်းသော ဆက်နွှယ်မှုတစ်ခု ဖြစ်ပေါ်လာသည်။ စုလီသည် ကြိုးကို စမ်းသပ်ရန် အမိန့်ပေးလိုက်သည်။ ကြိုး။ ငါ့ခြေထောက်ကို လိပ်ပြာပုံစံ လှလှလေး ထုံးပေးစမ်း။

အူလာမြက်ကြိုးမှာ သက်ရှိတစ်ခုကဲ့သို့ လှုပ်ရှားသွားကာ မြွေတစ်ကောင်ကဲ့သို့ သူ၏ ခြေထောက်ဆီသို့ တွားသွားကာ ၁၃ စက္ကန့်အတွင်းမှာပင် လှပသော လိပ်ပြာပုံစံ ထုံးဖွဲ့ပေးလိုက်သည်။ စုလီသည် ကြိုး၏ အခြားစွမ်းရည်များကိုလည်း စမ်းသပ်ကြည့်ပြီးနောက် ကျေနပ်အားရစွာဖြင့် ကြိုးကို ဘေးသို့ ဖယ်ထားလိုက်သည်။

သူသည် ထာဝရ ရတနာ သွန်းလုပ်ခြင်း စွမ်းရည်ကို ပြန်ကြည့်လိုက်သောအခါ ရင်ခုန်သွားမိသည်။ အကြောင်းမှာ ယခုလေးတင် သူ ဖန်တီးခဲ့သော အူလာမြက်ကြိုးမှာ ပုံစံငယ် စာရင်းထဲတွင် ရောက်ရှိနေသောကြောင့် ဖြစ်သည်။ လိုအပ်သော ကုန်ကြမ်းများမှာ မိစ္ဆာသလင်းခဲ (ပုံဆောင်ခဲ=သလင်းခဲ တူတူပါပဲ) ၁ ခုနှင့် အူလာမြက် ၁ ဆုပ်ပင် ဖြစ်သည်။ ဤနည်းအတိုင်းဆိုလျှင် အလိုအလျောက် ရတနာ သွန်းလုပ်ခြင်းမှ ရရှိသမျှ အရာအားလုံးကို ပြုလုပ်မှုပုံစံမလိုဘဲထာဝရ ထုတ်လုပ်နိုင်တော့မည် မဟုတ်ပါလား။ စုလီ၏ ရင်ခုန်သံများ မြန်ဆန်လာသည်။ ဤနည်းလမ်းသည် သူ့အတွက် ပုံစံငယ်များစွာ ရရှိစေမည့် နည်းလမ်းပင် ဖြစ်သည်။

ထို့နောက် စုလီသည် နောက်ထပ် မိစ္ဆာ သလင်းခဲ ၁ ခုနှင့် အဆိပ် သစ်သီးကို ပေါင်းစပ်ကာ စွမ်းရည်ကို ထပ်မံ အသုံးပြုလိုက်ပြန်သည်။ ရှစ်ပါး ရတနာ မီးဖိုပုံရိပ် ပေါ်လာပြီးနောက် အဆိပ်သီးမှာ အနီရောင် အလင်းများ ဖြာထွက်နေသော ဆေးလုံးတစ်လုံးအဖြစ် ပြောင်းလဲသွားသည်။ ဤအရာက ဘာပါလိမ့်ဟု စုလီက စူးစမ်းကြည့်လိုက်သည်။

[ဝိညာဉ်ပိုးကောင် ဆေးလုံး။ ထူးခြားဆန်းပြားသော အဆင့်။ စားသုံးပါက စိတ်ဝိညာဉ် အင်အား ၁၀ မှတ် တိုးစေမည်]

စိတ်ဝိညာဉ် အင်အား တိုးပေးမယ့် ဆေးလုံးကို ငါ တကယ် ဖော်စပ်နိုင်ခဲ့တာလားဟု စုလီ အံ့အားသင့်သွားသည်။ အကြောင်းမှာ မိစ္ဆာသလင်းခဲနှင့် အဆိပ်သစ်သီး ၂ မျိုးလုံးမှာ လူသားများအတွက် အကျိုးမရှိသော အရာများ ဖြစ်သောကြောင့် ဖြစ်သည်။ အထူးသဖြင့် အဆိပ်သီးမှာ စားသုံးမိပါက သေချာပေါက် သေစေနိုင်သော အသီးဖြစ်သည်။ သို့သော် ထိုအသီးမှ ဆေးလုံး ဖြစ်လာခြင်းက သူ့ကို အမှန်တကယ် တုန်လှုပ်စေသည်။ စုလီသည် ထိုဆေးလုံးကို ၅ ကြိမ်တိုင်တိုင် ထပ်မံ မြှင့်တင်လိုက်သောအခါ ၁၀ မှတ်မှသည် ၁၀၀ မှတ်အထိ တိုးပွားစေသော ဆေးလုံး ဖြစ်သွားသည်။

စုလီသည် ပြုံးလိုက်ပြီး ထိုဆေးလုံးကို တစ်လုတ်တည်း စားချလိုက်သည်။ ထိုအခါ သူ၏ စိတ်ဝိညာဉ် အင်အားမှာ ၄၀၀ မှ ၅၀၀ သို့ တိုးသွားပြီး သူ၏ အတွေးအခေါ်များမှာ ယခင်ကထက် ပိုမို ထက်မြက်လာတော့သည်။ သူသည် သစ်အယ်သီးနှင့် မိစ္ဆာသလင်းခဲကို ပေါင်းစပ်ကာ ထပ်မံ ဖော်စပ်လိုက်ရာ လက်သီးဆုပ်ခန့် ရှိသော မုန့်လုံးတစ်ခု ပေါ်လာသည်။

[သစ်အယ်သီး အသားမုန့်လုံး။ နတ်ဘုရားအဆင့်။ စားသုံးပါက တစ်နေ့တာ ဆာလောင်မှုကို ပြေပျောက်စေပြီး လိုအပ်သောအာဟာရများကို ဖြည့်တင်းပေးသည့်အပြင် သက်စောင့်အင်အား ၁၀၀ မှတ် တိုးစေမည်]

[သတိ။ ဗိုက်ဖောင်းပြီး မသေချင်ပါက တစ်နေ့လျှင် ၁ လုံးသာ စားပါ]

နောက်ထပ် အဖိုးတန် ပစ္စည်းတစ်ခုပါလားဟု စုလီက ဝမ်းသာအားရ ရယ်မောလိုက်သည်။ သူသည် ထာဝရ ရတနာ သွန်းလုပ်ခြင်း စာရင်းတွင် ထိုပစ္စည်းများ ပါဝင်သွားခြင်း ရှိမရှိ အရင်စစ်ဆေးပြီးမှ စိတ်အေးသွားတော့သည်။ အစွမ်းထက်လာဖို့က တကယ်ပဲ လွယ်ကူလှပါလားဟု သူ မရယ်ဘဲ မနေနိုင်တော့ပေပေ။

သူသည် သစ်အယ်သီး အသားမုန့်လုံးကို ၅ ကြိမ်တိုင်တိုင် ထပ်မံ မြှင့်တင်လိုက်ရာ သက်စောင့် အင်အား ၁၀၀၀ အထိ တိုးပေးနိုင်သည့်အပြင် ၁ လုံးစားရုံဖြင့် ၃ ရက်တိုင်တိုင် ဆာလောင်ခြင်း မရှိစေရန် စွမ်းအား တိုးသွားသည်။ ယခုအခါ သူ၏ မိစ္ဆာ သလင်းခဲများ ကုန်ဆုံးသွားပြီ ဖြစ်သဖြင့် အရောင်းအဝယ် ဗဟိုဌာနတွင် လိုအပ်သော ပစ္စည်းများကို လဲလှယ်ရန် ကြေညာချက် ၁၀ ခု တင်လိုက်သည်။ သစ်အယ်သီးကြီး ၁၀ လုံးနှင့် မိစ္ဆာသလင်းခဲ ၁ ခု လဲလှယ်ခြင်း ၅ ခုနှင့် သစ်အယ်သီးကြီး ၃ လုံးနှင့် အဆိပ်သီး ၁ လုံး လဲလှယ်ခြင်း ၅ ခု တို့ဖြစ်သည်။

ထိုသို့ တင်လိုက်ပြီးနောက် သူ၏ အတွေ့အကြုံမှာ ၁ မှ ၂ သို့ တိုးသွားသည်။ ၁၀ နာရီခန့် ကြာမြင့်ပြီးနောက်တွင် သူ၏ အတွေ့အကြုံမှာ ပြည့်သွားကာ အဆင့် ၂ သို့ အောင်မြင်စွာ တက်လှမ်းနိုင်ခဲ့ပြီ ဖြစ်သည်။ သူ၏ အတွေ့အကြုံမှာ ၁၀ မှတ် ဖြစ်သွားပြီး အသက်မွေးဝမ်းကျောင်း အဆင့်မှာလည်း အလိုအလျောက် မြင့်တက်သွားတော့သည်။