အခန်း ၉၆ အော့ခ်တို့၏ စိုးမိုးနယ်မြေ

"ဒါနဲ့ မင်းတို့ ငါနဲ့အတူ C-အဆင့် ဂူဗိမာန် တစ်ခုကို သွားပြီး စိန်ခေါ်ချင်ကြလား?"

နေ့လယ်ခင်း လက်ဖက်ရည် အတူသောက်နေကြသည့် လူပု လေးများကို လတ်စ်က လှမ်းမေးလိုက်သည်။

"ဟင်?" ကိုလက်က မျက်တောင်တဖျပ်ဖျပ်ခတ်ပြီးနောက် ခေါင်းလေးစောင်းကာ "C-အဆင့် ဂူဗိမာန် ဟုတ်လား?" ဟု ပြန်မေး၏။

လတ်စ်က ခေါင်းညိတ်ပြလိုက်သည်။ "ဟုတ်တယ်။ အဲဒါ နိုရီယာခံတပ် ပိုင်တဲ့ ဂူဗိမာန်ပဲ။ သူတို့ဆီက ထိပ်သီးစစ်သည်တော်တွေပဲ ဝင်ခွင့်ရှိတာ။ ကံကောင်းချင်တော့ ငါ အဲဒီကို စိန်ခေါ်ဖို့ ခွင့်ပြုချက် ရထားတယ်။ ဒါနဲ့ မင်းတို့ လိုက်ခဲ့မလား၊ မလိုက်ဘူးလား?"

အီကိုကို လက်ထဲတွင် ပွေ့ချီထားသည့် ဟယ်လင်က လတ်စ်ကို မျက်လုံးအပြူးသားဖြင့် ကြည့်လိုက်သည်။

"အစ်ကိုကြီး၊ C-အဆင့် ဂူဗိမာန်ဆိုတာ ကျွန်မတို့ လက်ရှိအဆင့်တွေနဲ့ဆိုရင် အရမ်းမြင့်လွန်းမနေဘူးလား?" ဟယ်လင်က စိုးရိမ်တကြီး မေးလေသည်။ "ကျွန်မတို့ အပေါ့ဆယ် (တမန်တော်) အဆင့်တောင် မရောက်သေးဘူးလေ။ ကျွန်မ မှတ်မိသလောက်ဆိုရင် C-အဆင့် ဂူဗိမာန်ထဲက သားရဲတွေက အဆင့် ၂ ကနေ အဆင့် ၃ အထိ ရှိတတ်ကြတာ။ သူတို့ရဲ့ ဘော့စ် တွေဆိုရင် အဆင့် ၃ အယ်လ်ဖာ သားရဲတွေ ဖြစ်မှာပဲ။ ကျွန်မတို့ ရင်ဆိုင်နိုင်မယ် မထင်ဘူး။"

"မဟုတ်ဘူး ဟယ်လင်၊ နင် မှားနေတယ်" ဟု မက်တီက ဝင်ပြောလိုက်သည်။ "အဲဒါက C-အဆင့် ဂူဗိမာန်ရဲ့ သာမန်အဆင့် မှာပဲ ရှိတာ။ အိပ်မက်ဆိုးအဆင့် မှာဆိုရင်တော့ သားရဲအားလုံးက အဆင့် ၃ တွေ ဖြစ်ကုန်ပြီး ဘော့စ်က အဆင့် ၄ အယ်လ်ဖာ သားရဲကြီး ဖြစ်သွားမှာ။"

ထိုလူပုကောင်လေးက လတ်စ်ကို တည်ကြည်သော မျက်နှာထားဖြင့် ကြည့်လိုက်ပြီး "သူသာ ငါတို့နဲ့ အတူရှိနေရင် သာမန်အဆင့်ကို ဖြတ်ကျော်ဖို့ ဖြစ်နိုင်ချေ ရှိပါတယ်။ ဒါပေမဲ့ အိပ်မက်ဆိုးအဆင့်ကတော့ ကိုယ့်ကိုယ်ကိုယ် သတ်သေတာနဲ့ အတူတူပဲ။"

အဆင့် ၃ သားရဲများမှာ သန်မာသော်လည်း 'လွင်ပြင်' တွင် သူတို့ တိုက်ခိုက်ခဲ့ရသည့် ကာဘန်ကယ်လ် ထက်တော့ အားနည်းကြသည်။ သာမန်အဆင့်ကိုသာ ဝင်မည်ဆိုလျှင် သူတို့ကို အနိုင်ယူနိုင်စွမ်း ရှိသည်ဟု မက်တီ ယုံကြည်သည်။ တစ်ခုတည်းသော ပြဿနာမှာ ဘော့စ်သားရဲ ဖြစ်သည်။ ၎င်းမှာ အဆင့် ၃ အယ်လ်ဖာသားရဲဖြစ်ပြီး သူတို့၏ လက်ရှိစွမ်းအားဖြင့် လုံးဝမယှဉ်နိုင်သော 'မျက်လုံးနီ ပုစဉ်းရင်ကွဲ' ထက်ပင် ပိုမိုသန်မာသည်။

"အ-အစ်ကိုကြီး၊ အစ်ကိုကြီးက အိပ်မက်ဆိုးအဆင့်ကို စိန်ခေါ်မလို့လား?" ကိုးးလက်က စိုးရိမ်တကြီး မေးလိုက်သည်။

"မဟုတ်ပါဘူး" လတ်စ်က ခေါင်းခါပြလိုက်သည်။ "ငါ အဲလောက်တော့ မအပါဘူး။"

'အော့ခ်ပိုင်နက်' ၏ အိပ်မက်ဆိုးအဆင့်ကို စိန်ခေါ်ခြင်းမှာ အမှန်တကယ်ပင် သတ်သေခြင်းဖြစ်ကြောင်း လတ်စ် သိရှိထားသည်။ သို့သော်လည်း နောင်တစ်ချိန်တွင် စိန်ခေါ်မည်မဟုတ်ဟုတော့ ဆိုလိုခြင်း မဟုတ်ပေ။ 'အော့ခ်ပိုင်နက်' ထဲတွင် သာမန်အဆင့်၌ပင် ရရှိနိုင်သည့် မစ်ရှင် တစ်ခု ရှိကြောင်း အီလီစီယမ်ကျမ်းစာ က သူ့ကို အသိပေးထားသည်။

ရရှိမည့် ဆုလာဘ်များမှာလည်း အလွန်ကောင်းမွန်လှသော်လည်း ဤအခွင့်အရေးမှာ တစ်ကြိမ်တစ်ခါတည်းသာ ရနိုင်သော အခွင့်အရေး ဖြစ်သည်။ အကယ်၍ တစ်စုံတစ်ယောက်က ထိုမစ်ရှင်ကို အောင်မြင်ထားပြီးပါက ဆုလာဘ်မှာ ထာဝရ ပျောက်ကွယ်သွားပေလိမ့်မည်။ ထိုလျှို့ဝှက်မစ်ရှင်ကို တစ်စုံတစ်ယောက် ပြီးမြောက်ထားခြင်း ရှိ၊ မရှိ လတ်စ် သိချင်နေသည်။ အကယ်၍ မရှိသေးပါက ထိုဆုလာဘ်များကို သူငယ်ချင်းများနှင့် မျှဝေခံစားရန် သူ အသင့်ရှိနေသည်။

"စိတ်မပူကြပါနဲ့" ဟု လတ်စ်က သူတို့ကို အားပေးလိုက်သည်။ "အကယ်၍ ငါတို့ မနိုင်တော့ဘူးဆိုရင် ဂူဗိမာန်ထဲကနေ ထွက်ဖို့ တယ်လီပို့ ပုံဆောင်ခဲ တွေကို သုံးလို့ရတာပဲ။"

မက်တီက ရင်ဘတ်ပေါ် လက်ပိုက်လိုက်ပြီး "သားရဲအမြုတေ တွေနဲ့ ရလာမယ့် ပစ္စည်းတွေကို ဘယ်လို ခွဲမှာလဲ?" ဟု မေးသည်။

ပြင်ပကမ္ဘာရှိ သားရဲများနှင့်မတူဘဲ ဂူဗိမာန်အတွင်းရှိ သားရဲများ သေဆုံးသွားပါက ၎င်းတို့၏ ခန္ဓာကိုယ်များ ပျောက်ကွယ်သွားပြီး သားရဲအမြုတေ၊ လက်နက်များနှင့် အခြားသော ပစ္စည်းများကို ချန်ထားရစ်လေ့ ရှိသည်။

"မက်တီ!" ကိုလက်က ထိုကောင်လေးကို မျက်စောင်းထိုးလိုက်သော်လည်း မက်တီကတော့ အလျှော့မပေးပေ။

သူသည် ကိုလက်ကို အလွန်နှစ်သက်သော်လည်း သူတစ်ပါးက သူမ၏ စိတ်ကောင်းစေတနာကို အခွင့်ကောင်းယူသွားမည်ကိုတော့ အဖြစ်မခံနိုင်ပေ။

"ရလာတဲ့ ဆုလာဘ်တွေကို အားလုံး ညီတူညီမျှ ခွဲကြမှာပါ" လတ်စ်က ပြုံးလျက် ဖြေကြားလိုက်သည်။ သားရဲများထံမှ ရလာသည့် ပစ္စည်းအားလုံးကို သူတစ်ယောက်တည်း သိမ်းပိုက်ရန် ရည်ရွယ်ချက် မရှိပေ။ သူ အမှန်တကယ် လိုချင်သည်မှာ ၎င်းမစ်ရှင်ကို ပထမဆုံး ပြီးမြောက်သူများသာ ရရှိမည့် လျှို့ဝှက်မစ်ရှင်၏ ရက်ရောသော ဆုလာဘ်များသာ ဖြစ်သည်။

—-

**လျှို့ဝှက်မစ်ရှင် - ငါ အင်ပါယာကို အုပ်စိုးလိုသည်**

– လွန်ခဲ့သော နှစ်ပေါင်းရာချီက ဤအင်ပါယာကို တည်ထောင်ခဲ့သည့် ပထမဆုံး အော့ခ်မျိုးနွယ်စုခေါင်းဆောင်သည် သူ၏ အမွေအနှစ်များကို သူ၏ နယ်မြေအနှံ့တွင် ပြန့်ကျဲထားရစ်ခဲ့သည်။ ထိုအမွေအနှစ်များကို ကံကောင်းထောက်မစွာ ရှာဖွေတွေ့ရှိသူများသည် နောင်လာနောက်သားများအတွက် သူ ချန်ထားရစ်ခဲ့သည့် ရတနာများကို ရရှိကြလိမ့်မည်။

**ဆုလာဘ်များ -**

– **သက်စောင့်စွမ်းအားဆေးရည် ** ဤဆေးရည်သည် သောက်သုံးသူ၏ သက်စောင့်စွမ်းအား ကို ၅၀ အထိ အမြဲတမ်း တိုးမြှင့်ပေးမည်ဖြစ်သည်။ တစ်သက်တာတွင် တစ်ကြိမ်သာ သောက်သုံးနိုင်သည်။

– **မိမိစိတ်ကြိုက် အဆင့် ၃ စွမ်းရည်စာအုပ် ** အော့ခ်အင်ပါယာ၏ ရတနာတိုက်ထဲမှ အဆင့် ၃ နှင့် အောက်ရှိသည့် မည်သည့်စွမ်းရည်ကိုမဆို ရွေးချယ်နိုင်မည်ဖြစ်သည်။

– **??? (လျှို့ဝှက်ဆုလာဘ်)**

—---

ဤအရာများသည် 'အော့ခ်ပိုင်နက်' ဂူဗိမာန်အတွင်းရှိ လျှို့ဝှက်မစ်ရှင်မှ ရရှိနိုင်မည့် ဆုလာဘ်များ ဖြစ်သည်။

လတ်စ် ဤအကြောင်းကို သိလိုက်ရကတည်းက ထိုမစ်ရှင် ရှိ၊ မရှိ စစ်ဆေးရန် သူ ဆုံးဖြတ်ပြီးသား ဖြစ်သည်။ သက်စောင့်စွမ်းအားဆေးရည်မှာ သာမန်ဟု ထင်ရသော်လည်း အီလီစီယမ်တွင် ခရီးစတင်နေသူများအတွက်မူ အလွန်ပင် တန်ဖိုးရှိလှသည်။

သို့သော် လတ်စ် အမှန်တကယ် မက်မောသည်မှာ မိမိစိတ်ကြိုက် ရွေးချယ်နိုင်သည့် အဆင့် ၃ စွမ်းရည်စာအုပ် ဖြစ်သည်။ သူ၏ အထူးစွမ်းရည်ဖြစ်သော 'စွမ်းရည်ဆင့်ကဲပြောင်းလဲခြင်း နှင့် ပေါင်းစပ်လိုက်ပါက သာမန်စွမ်းရည်တစ်ခုသည် အဆင့်တစ်ခု ပိုမြင့်သွားကာ ပိုမို အစွမ်းထက်လာမည် ဖြစ်သည်။

ဤဆုလာဘ်များသည် လူတိုင်းအတွက် ရရှိနိုင်မည်ဖြစ်သဖြင့် ကိုလက်နှင့် အခြားသူများမှာလည်း သက်စောင့်စွမ်းအားဆေးရည်နှင့် မိမိတို့စိတ်ကြိုက် အဆင့် ၃ စွမ်းရည်များကို ရရှိကြမည် ဖြစ်သည်။ အပိုဆုလာဘ်များကကော? C-အဆင့် ဂူဗိမာန်၏ လျှို့ဝှက်မစ်ရှင်မှ မည်သို့သော ဆုလာဘ်မျိုး ရနိုင်မည်ကိုလည်း လတ်စ် အလွန်ပင် စိတ်ဝင်စားနေသည်။

"ကျွန်မ လိုက်မယ် အစ်ကိုကြီး!" ကိုလက်က အဆင်သင့်ပင် လက်မြှောက်လိုက်သည်။

"ကျွန်မလည်း လိုက်မယ်!" ဟယ်လင်ကလည်း ပြုံးလျက် လက်မြှောက်လိုက်သည်။ သူမ၏ သူငယ်ချင်းများကို ကယ်တင်ပေးခဲ့သည့် လတ်စ်၏ ကျေးဇူးကို သူမ မဆပ်ရသေးသဖြင့် ဤခရီးတွင် အတူလိုက်ပါရန် အသင့်ရှိနေသည်။

"အီး!" ဟယ်လင်၏ လက်ဖဝါးပေါ်တွင် အီကိုးလေးကလည်း ဟုန်ခနဲ ခုန်ပေါက်နေသည်။ ၎င်းမှာ သူမလည်း လိုက်ချင်ကြောင်း လတ်စ်ကို အသိပေးသည့် နည်းလမ်းပင် ဖြစ်သည်။

အန်ဒီနှင့် အက်ဆဲလ်တို့ကလည်း ခေါင်းညိတ်လိုက်ကြသည်။ မက်တီအတွက်မူ... ကိုလက်နောက် တကောက်ကောက်လိုက်နေသည့် ထိုကောင်လေး လိုက်၊ မလိုက်ကို လတ်စ် မေးနေစရာပင် မလိုတော့ပေ။ ကိုလက် သွားမည်ဆိုလျှင် ထိုဒွပ်ဖ်ကောင်လေးကတော့ မဖြစ်မနေ လိုက်မည်သာ ဖြစ်သည်။

"ကောင်းပြီ၊ ဒါဆို သွားကြရအောင်" လတ်စ်က ပြုံးလျက် ပြောလိုက်သည်။

အားလုံးက သူတို့၏ ကိရိယာတန်ဆာပလာများကို ပြင်ဆင်ပြီးနောက် နက်ဗရီယယ်ကို သွားရောက်ရှာဖွေကြသည်။ နက်ဗရီယယ်က သူတို့ကို စစ်တန်းလျားအတွင်းရှိ မြေအောက်သို့ ဦးတည်နေသော လျှို့ဝှက်တံခါးတစ်ခုဆီသို့ ခေါ်ဆောင်သွားသည်။

မိနစ်အနည်းငယ်ကြာ လမ်းလျှောက်ပြီးနောက် 'နိုရီယာမြင်းစီးသူရဲ' တစ်ဒါဇင်ခန့် စောင့်ကြပ်နေသည့် ငွေရောင်တံခါးကြီးတစ်ခုဆီသို့ ရောက်ရှိလာခဲ့သည်။

သေချာကြည့်မည်ဆိုလျှင် တံခါး၏ မျက်နှာပြင်ပေါ်တွင် အော့ခ်တစ်ဦး၏ မျက်နှာကို ထွင်းထုထားသည်ကို တွေ့ရမည်ဖြစ်သည်။ ၎င်းမှာ ထိုနယ်မြေသို့ ကျူးကျော်ဝင်ရောက်လိုသူများကို ခြိမ်းခြောက်နေသည့် ကြောက်မက်ဖွယ်ကောင်းသော ပုံရိပ်တစ်ခု ဖြစ်သည်။

အဖွဲ့ထဲတွင် အကြောက်အလန့်ဆုံး ဖြစ်သည့် ဟယ်လင်မှာ တံခါးပေါ်မှ ပုံရိပ်ကို မြင်လိုက်ရသောအခါ တွန့်ခနဲ ဖြစ်သွားသည်။ ၎င်းကို မြင်လိုက်သော ကိုလက်က ဟယ်လင်၏ လက်ကို ချက်ချင်း ဆုပ်ကိုင်လိုက်ပြီး အားပေးသည့်အနေဖြင့် ခပ်ဖွဖွ ညှစ်လိုက်သည်။ ထိုမြင်ကွင်းကို မြင်လိုက်ရသော လတ်စ်က ပြုံးလိုက်မိပြီး ကိုလက်သည် ခေါင်းဆောင်ကောင်းတစ်ဦး ဖြစ်လာနိုင်ကြောင်း အသိအမှတ်ပြုလိုက်သည်။

သူမ၏ ထက်မြက်သော အကဲခတ်နိုင်စွမ်းကြောင့် သူငယ်ချင်းများ၏ ကိုယ်ဟန်အမူအရာ အနည်းငယ် ပြောင်းလဲသွားသည်ကိုပင် သတိပြုမိပြီး သင့်တော်သော နည်းလမ်းဖြင့် ဖြေရှင်းပေးနိုင်ခဲ့သည်။

ထို့နောက် လပ်စ်က နက်ဗရီယယ်နှင့် ဤဂူဗိမာန်ကို စောင့်ကြပ်နေသည့် လူပုဗိုလ်ကြီးကို အာရုံစိုက်လိုက်သည်။ နိုရီယာမြင်းစီးသူရဲများသာ သီးသန့်အသုံးပြုသည့် ဤဂူဗိမာန်ကို စိန်ခေါ်ခွင့်ရရန် နက်ဗရီယယ်အနေဖြင့် အတော်လေး ကြိုးစားပေးခဲ့ရမည်ကို သူ သိရှိသည်။

"သခင်နက်ဗရီယယ်၊ သူတို့က 'အော့ခ်ပိုင်နက်' ကို စိန်ခေါ်မယ့်သူတွေလား?" ဂူဗိမာန်ဝင်ပေါက်ကို စောင့်ကြပ်ရန် တာဝန်ကျထားသည့် လူပုဗိုလ်ကြီးက မေးလိုက်သည်။

"ဟုတ်တယ်" နက်ဗရီယယ်က ခေါင်းညိတ်သည်။

ဒွါ့ဖ်ဗိုလ်ကြီးက လူတစ်ပိုင်း နတ်တစ်ပိုင်း လေးနှင့် ဒွါ့ဖ်ကလေးများကို ခက်ခဲသော မျက်နှာထားဖြင့် ကြည့်လိုက်သည်။

"ဒါပေမဲ့ သူတို့က (တမန်တော်)အဆင့်တောင် မရှိကြသေးဘူးပဲ" ဟု ဒွါ့ဖ်ဗိုလ်ကြီးက မှတ်ချက်ပေးသည်။ "ပြီးတော့ ခြောက်ယောက်ပဲ ရှိသေးတယ်။ ဒီဂူဗိမာန်က တစ်ကြိမ်မှာ ၁၂ ယောက် ဝင်ဖို့ သတ်မှတ်ထားတာ။ သူတို့ ဒီဂူဗိမာန်ကို စိန်ခေါ်ဖို့ ကြံ့ခိုင်မှု မရှိသေးဘူးလို့ ကျွန်တော် ထင်ပါတယ်။"

နက်ဗရီယယ် မျက်မှောင်ကြုတ်သွားသည်။ ဤအချက်ကို သူလည်း နားလည်ထားပြီး လပ်စ်အနေဖြင့် သူ မတတ်နိုင်သည့်အရာကို ကြိုးစားနေခြင်းလောဟု တွေးမိသည်။ သို့သော် သူ ဘာမှ ပြန်မပြောနိုင်ခင်မှာပင် လပ်စ်က ရှေ့သို့ လှမ်းတက်လိုက်ပြီး အစောင့်ကို ပြုံးပြလိုက်သည်။

"ဗိုလ်ကြီး၊ ကျွန်တော်တို့က ပိုမိုသန်မာတဲ့ ပြိုင်ဘက်တွေနဲ့ တိုက်ခိုက်ရတာ ဘယ်လိုမျိုးလဲဆိုတာ သိချင်လို့ လာခဲ့တာပါ" လပ်စ်က ရှင်းပြသည်။ "တောထဲတောင်ထဲမှာ ကျွန်တော်တို့ အဆင့်နဲ့ တူတဲ့ သားရဲတွေနဲ့ တွေ့တဲ့အခါ ဘာတွေလုပ်နိုင်မလဲဆိုတာ သိချင်လို့ပါ။ ဗိုလ်ကြီး သိတဲ့အတိုင်း တစ်ခါတလေကျရင် ကျွန်တော်တို့ထက် အဆင့်တွေ အများကြီး မြင့်တဲ့ သားရဲတွေနဲ့ ကြုံရတတ်တာမျိုး ရှိတယ်လေ။"

"ကျွန်တော့် သူငယ်ချင်းတွေနဲ့ ကျွန်တော်ဟာ အဲဒီလို သားရဲမျိုးတွေနဲ့ ရင်ဆိုင်ရတာ ဘယ်လိုမျိုးလဲဆိုတာ ကြိုပြီး တွေ့ကြုံထားချင်ပါတယ်။ ဒါမှ နောင်တစ်ချိန်မှာ အဲဒီလို အခြေအနေမျိုးနဲ့ ကြုံလာရရင် ကြောက်လန့်တကြားနဲ့ တောင့်တောင့်ကြီး ဖြစ်မနေမှာပါ။ အခု ကြားရတာက ရယ်စရာကောင်းကောင်း ဖြစ်နေနိုင်ပေမဲ့ အဲဒီလို အခြေအနေတွေကို လိုက်လျောညီထွေဖြစ်အောင် လုပ်နိုင်တဲ့ စွမ်းရည်ဟာ နောင်မှာ ကျွန်တော်တို့ရဲ့ အသက်တွေကို ကယ်တင်ပေးလိမ့်မယ်လို့ ကျွန်တော် ယုံကြည်ပါတယ်။"

ဝင်ပေါက်ကို စောင့်ကြပ်နေကြသည့် အစောင့်များမှာလည်း ထိုစကားကို သဘောတူသည့်အနေဖြင့် ခေါင်းညိတ်လိုက်ကြသည်။ နိုင်ငံတော်၏ စစ်သည်များအနေဖြင့် နိုရီယာနယ်မြေကို အန္တရာယ်အားလုံးမှ ကာကွယ်ရန် သူတို့တွင် တာဝန်ရှိသည်။

ရုတ်တရက် သားရဲများ သောင်းကျန်းလာသည့် အချိန်မျိုးတွင် သန္ဓေပြောင်း သားရဲကြီးများသည် မည်သည့်နေရာမှမဆို ပေါ်လာတတ်ပြီး လူတိုင်းအတွက် အန္တရာယ်ကြီးမားလှသည်။ အသက်နှင့် သေခြင်းကြား အခြေအနေများတွင် လျင်မြန်စွာ ဆုံးဖြတ်ချက်ချနိုင်သည့် စွမ်းရည်မှာ အသက်ရှင်သန်နိုင်ခြေကို အမှန်တကယ် တိုးမြှင့်ပေးနိုင်သည်။

"ကောင်းပြီလေ" ဒွါ့ဖ်ဗိုလ်ကြီးက လတ်စ်၏ ရှင်းပြချက်ကို လက်ခံသည့်အနေဖြင့် ခေါင်းညိတ်လိုက်သည်။ "မင်းတို့ တစ်ယောက်ချင်းစီတိုင်း ဒီဂူဗိမာန်အတွက် သီးသန့်ဖြစ်တဲ့ တယ်လီပို့ ပုံဆောင်ခဲ တစ်ခုစီ ယူထားကြ။"

"တကယ်လို့ မင်းတို့ ဆက်မတိုက်နိုင်တော့ဘူးဆိုရင် အဲဒါကို သုံးလိုက်ပါ။ ခေါင်းမာနေတာက သေခြင်းတရားကိုပဲ ခေါ်ဆောင်လာလိမ့်မယ်။ အဲဒီလိုဖြစ်ရင် ဂူဗိမာန်ထဲကနေ အလိုအလျောက် အထုတ်ခံရလိမ့်မယ်။ အဲဒီအတွက် ပေးရမယ့် ဒဏ်ကြေးက ကြီးမားပေမဲ့ တကယ့်ဘဝမှာ သေဆုံးရတာနဲ့ ယှဉ်ရင်တော့ အများကြီး တန်ပါသေးတယ်။"

အစောင့်တစ်ဦး ပေးအပ်သော တယ်လီပို့ ပုံဆောင်ခဲကို လတ်စ်က ဝမ်းမြောက်စွာ လက်ခံလိုက်သည်။ ၎င်းမှာ ဘေးကင်းလုံခြုံရေးအတွက် ကြိုတင်ပြင်ဆင်မှုဖြစ်ကြောင်း သူ သိရှိသည်။ ခေါင်းမာမှုကြောင့် သူ၏ လက်ရှိ စွမ်းဆောင်ရည် အမှတ်များကို မဆုံးရှုံးလိုပေ။

ကိုလက်နှင့် အခြားသူများကို တယ်လီပို့ ပုံဆောင်ခဲများ ပေးပြီးနောက် ဒွါ့ဖ်ဗိုလ်ကြီးက ဘေးသို့ ဖယ်ပေးကာ လပ်စ်ကို ရှေ့သို့ တက်ရန် အချက်ပြလိုက်သည်။

လပ်စ်က ခေါင်းညိတ်ပြပြီး ဂူဗိမာန်တံခါးပေါ်သို့ သူ၏ လက်ဖဝါးကို တင်လိုက်သည်။ သူ၏ ရှေ့တွင် စာသားတန်းလေးတစ်ခု ပေါ်လာ၏။

—-

– သာမန်

– အိပ်မက်ဆိုး

—-

လတ်စ်က သူ၏ လက်ချောင်းလေးဖြင့် သာမန်အဆင့် ကို နှိပ်မည်အပြုတွင်၊ အီကိုသည် လတ်စ်၏ ခေါင်းပေါ်မှ လတ်စ်၏ လက်ခုံပေါ်သို့ ခုန်ချလိုက်သဖြင့် မှားယွင်းကာ အိပ်မက်ဆိုးအဆင့် ကို နှိပ်မိသွားလေသည်။

ချက်ချင်းပင် သူ၏ အဖွဲ့သားများအားလုံး ဂူဗိမာန်ဝင်ပေါက်မှ ပျောက်ကွယ်သွားကြတော့သည်။

စက္ကန့်အနည်းငယ် ကြာပြီးနောက် နက်ဗရီယယ်၊ ဒွါ့ဖ်ဗိုလ်ကြီးနှင့် အခြား အစောင့်များမှာ အံ့အားသင့်ကာ ပါးစပ်အဟောင်းသား ဖြစ်သွားကြသည်။ အကြောင်းမှာ တံခါးမျက်နှာပြင်တွင် ထွင်းထုထားသည့် အော့ခ်၏ မျက်လုံးများသည် နီရဲတောက်လောင်လာသောကြောင့် ဖြစ်သည်။

၎င်းမှာ အဓိပ္ပာယ် တစ်ခုတည်းသာ ရှိသည်။

"ဒီကလေးကတော့..." ဒွါ့ဖ်ဗိုလ်ကြီးသည် လတ်စ်၏ မိုက်မဲမှုကြောင့် ဒေါသထွက်ရမည်လား၊ ရိုက်ရမည်လား မသိဘဲ စိတ်ပျက်လက်ပျက်ဖြင့် ခေါင်းကို ကုတ်နေမိတော့သည်။

"ကံကောင်းတာက သူတို့လက်ထဲမှာ တယ်လီပို့ ပုံဆောင်ခဲတွေ ရှိနေတာပဲ" နက်ဗရီယယ်က ဒွါ့ဖ်ဗိုလ်ကြီး၏ ပုခုံးကို ပုတ်ကာ စိတ်အေးအေးထားရန် ပြောလိုက်သည်။ "ခဏလောက် စောင့်ကြည့်ရအောင်။ သူတို့ မကြာခင် ပြန်ထွက်လာမှာ သေချာပါတယ်။"

ဒွါ့ဖ်ဗိုလ်ကြီးသည် သက်ပြင်းချကာ ခေါင်းညိတ်လိုက်သည်။ အရာအားလုံးက ဖြစ်ပျက်သွားပြီဖြစ်၍ လတ်စ်တို့အဖွဲ့ 'အော့ခ်ပိုင်နက်' ၏ အိပ်မက်ဆိုးအဆင့်ကို ကြုံတွေ့ပြီး ပြန်လာမည်ကို စောင့်ဆိုင်းနေရုံသာ ရှိတော့သည်။