အခန်း ၉၄ အိပ်မက်ဆိုးနောက်သို့ လိုက်လံခြင်း [အပိုင်း ၂]

နိုက်မဲယားမြင်း၏ ကျယ်လောင်သော ဟီသံကြောင့် လူတိုင်းမှာ စတင်တော့မည့် တိုက်ပွဲဆီသို့ အာရုံရောက်သွားကြသည်။

ဒီယာဘလိုသည် လက်တစ်ဖက်စီတွင် ဓားတစ်လက်နှင့် ဒိုင်းတစ်ခုကို ကိုင်ဆောင်ထားကာ ခုခံသည့်အနေအထားဖြင့် နက်မှောင်သော စစ်သည်တော်ကြီးတစ်ဦးအလား ရပ်နေသည်။

နက်ဗရီရယ်လ်သည် လပ်စ်၏ ဆင့်ခေါ်ကောင်ကို ကြည့်ရင်း ခေါင်းကို ကုတ်လိုက်မိသည်။ ထို့နောက် အရိုးစုလေးကို အားပေးနေသော ဟာ့ဖ်အယ်ဖ်လေးနှင့် သူ၏ခေါင်းပေါ်ရှိ စလိုင်း လေးကို တစ်ချက်လှမ်းကြည့်လိုက်သည်။

"ဒါက မင်း နိုက်မဲယားကို ယဉ်ပါးအောင်လုပ်မယ့် နည်းလမ်းပေါ့ ဟုတ်လား" ဟု နက်ဗရီရယ်လ်က ကြောင်တောင်တောင် မျက်နှာပေးဖြင့် မေးလိုက်သည်။

"အင်း" လပ်စ်က အသံပြုလိုက်ရင်း "ဘယ်သူ့ကိုမှ မပြောနဲ့ဦး။ ဒါက လျှို့ဝှက်ချက်ပဲ" ဟု ဆိုသည်။

"ဘာတွေ လျှောက်ပြောနေတာလဲ"

"စိတ်အေးအေးထားပါ။ ကြည့်နေရုံပဲ ကြည့်နေ"

လပ်စ်သည် အပြင်ပန်းတွင် ယုံကြည်ချက်ရှိပုံပေါ်သော်လည်း စိတ်ထဲတွင်မူ ရိုင်းစိုင်းသော နိုက်မဲယားကို ယဉ်ပါးအောင်လုပ်မည့် ဒီယာဘလို၏ နည်းဗျူဟာ အလုပ်ဖြစ်ပါ့မလားဟု တွေးပူနေမိသည်။

မီးလျှံမြင်းသည် အဆင့် (၂) ရှိသော သတ္တဝါဖြစ်ပြီး ဒီယာဘလိုနှင့် အဆင့်တူဖြစ်သည်။ နှစ်ကောင်စလုံးမှာ အင်အားချင်း မျှနိုင်သည်ဟု လပ်စ်က ယူဆချင်သော်လည်း ပြဿနာတစ်ခု ရှိနေသည်။ အရိုးစုများသည် မီး၊ အသက်စွမ်းအား၊ ကုသခြင်းနှင့် မြင့်မြတ်သော မှော်ပညာများကို ခံနိုင်ရည်မရှိကြပေ။

နိုက်မဲယားသည် တိုက်ပွဲအတွင်း ခရမ်းရောင်မီးလျှံများကို ဖန်တီးနိုင်စွမ်းရှိရာ ၎င်းမှာ ဒီယာဘလိုအတွက် အဆိုးဝါးဆုံး ပြိုင်ဘက်ဖြစ်သည်။ သို့သော်လည်း အရေးကြီးသည့်အချိန်တိုင်းတွင် သူ၏ အမည်ပေးထားသော သတ္တဝါ သည် သူ့ကို တစ်ခါမျှ စိတ်ပျက်အောင် မလုပ်ခဲ့ဖူးသဖြင့် အရာအားလုံး အဆင်ပြေသွားမည်ဟု သူ ခံစားနေရသည်။

ရုတ်တရက် နိုက်မဲယားသည် တစ်ကိုယ်လုံးကို ခရမ်းရောင်မီးလျှံများဖြင့် ဖုံးလွှမ်းလိုက်ပြီး ဒီယာဘလိုကို တိုက်ကြိတ်ရန် အရှိန်ဖြင့် ပြေးဝင်လာသည်။

တိုက်ပွဲကို ကြည့်နေကြသော ဒွာ့ဖ် လူပုလေးများကမူ နိုက်မဲယား၏ တိုက်ခိုက်မှုမှာ အရိုးစုကို အသာလေး ထိမှန်သွားရုံမျှဖြင့်ပင် ထိုအရိုးစုမှာ တစ်စစီ ကြေမွသွားတော့မည်ဟု တွေးကာ ပြုံးစိစိ လုပ်နေကြသည်။

သို့သော် သူတို့အားလုံး အံ့အားသင့်သွားရအောင်ပင် ဒီယာဘလိုက မထင်မှတ်ထားသည်ကို လုပ်ဆောင်လိုက်သည်။

ဒီယာဘလိုသည် လေထဲသို့ မြင့်မားစွာ ခုန်တက်လိုက်ပြီး သူ၏ဒိုင်းကို နိုက်မဲယား၏ ခေါင်းဆီသို့ အလေးပြားတစ်ခုကဲ့သို့ လွှဲပေါက်လိုက်သည်။

ဒိုင်းနှင့် နိုက်မဲယား၏ ခေါင်းတို့ ထိမိသွားသည့်ခဏတွင် သတ္တုချင်း ထိခတ်သံ ကျယ်လောင်စွာ ထွက်ပေါ်လာပြီး နိုက်မဲယား၏ ကိုယ်ပေါ်ရှိ မီးလျှံများမှာလည်း လွင့်စင်ပျောက်ကွယ်သွားသည်။ သို့သော် ဒီယာဘလို၏ တိုက်ခိုက်မှုမှာ မပြီးသေးပေ။ ရှေ့မှ သတ္တဝါကို လမ်းကြောင်းလွဲသွားစေရန် သူ၏ 'ဒေါင်းန်း'အမည်ရ ဒိုင်းကို ပစ်ပေါက်ပြီးနောက် လပ်စ်၏ အရိုးစုသည် သူ၏ အိတ်ကပ်ထဲမှ နောက်ထပ် ဒိုင်းတစ်ခုကို ထုတ်ယူလိုက်ပြန်သည်။

ထို့နောက် သူသည် နိုက်မဲယား၏ ဘေးဘက်သို့ ပြေးဝင်ကာ ကိုယ်ချင်းစောင့်တိုက်လိုက်ရာ နိုက်မဲယားမှာ မီတာအနည်းငယ်ခန့် လွင့်စင်သွားပြီး နာကျင်စွာ ဟီအော်တော့သည်။

အဆင့် (၂) သတ္တဝါဖြစ်သည့်အတိုင်း နိုက်မဲယားမှာ ချက်ချင်းပင် ပြန်လည် ထိန်းချုပ်နိုင်သွားပြီး မီးလှံနှစ်စင်းကို ဖန်တီးကာ ဒီယာဘလိုထံသို့ ပစ်လွှတ်လိုက်သည်။

ဒီယာဘလိုမှာလည်း နောက်မဆုတ်ဘဲ အရိုးလှံနှစ်စင်းကို ဆက်တိုက် ပစ်လွှတ်လိုက်ရာ သူ့ထံသို့ ဦးတည်လာသော တိုက်ခိုက်မှုများကို ချေဖျက်နိုင်ခဲ့သည်။ ကိုဘိုး ဂူအတွင်းရှိ ကိုဘိုးမှော်ဆရာနှင့် တိုက်ခိုက်ခဲ့စဉ်ကတည်းက ဒီယာဘလိုသည် အဝေးပစ်မှော်များကို မည်သို့ တုံ့ပြန်ရမည်ကို သင်ယူပြီးသား ဖြစ်သည်။

ထို့ပြင် လပ်စ်ကလည်း ဒီယာဘလို၏ ရုပ်ပိုင်းဆိုင်ရာနှင့် မှော်အင်အားကို (၁၀၀) စီ တိုးမြှင့်ပေးသည့် တိုက်ပွဲဝင် စွမ်းရည်ကို သုံးပေးထားသဖြင့် သူ၏ အားနည်းချက်ကို ကျော်လွှားနိုင်ခဲ့သည်။

"လုပ်စမ်း ဒီယာဘလို!" ကိုလက်က လက်သီးလေးကို မြှောက်ပင့်ကာ အားပေးလိုက်သည်။

"ဒီယာဘလို... သွား!" အီကိုသည်လည်း လပ်စ်၏ ခေါင်းပေါ်တွင် ခုန်ပေါက်ရင်း သူမ၏ ပါပါး ၏ သတ္တဝါကို အားပေးနေသည်။

နက်ဗရီရယ်လ်သည် သားရဲခြံထဲရှိ သတ္တဝါနှစ်ကောင်ကို ကြည့်ရင်း မေးစေ့ကို ပွတ်နေမိသည်။

"မဆိုးဘူးပဲ" နက်ဗရီရယ်လ်က မှတ်ချက်ပေးသည်။ "ဖီဂါရို ဖြစ်ရပ်ရဲ့ နောက်ကွယ်က လက်သည်ကို မင်း ဘာလို့ ဖမ်းနိုင်ခဲ့သလဲဆိုတာ အံ့သြစရာ မရှိတော့ပါဘူး"

လပ်စ်က ဘာမျှမပြောဘဲ ပြုံးရုံသာ ပြုံးနေလိုက်သည်။ မျက်နှာတွင် မပြသော်လည်း ဒီယာဘလိုအနေဖြင့် နိုက်မဲယားကို အနိုင်ယူနိုင်ပါ့မလားဟု သူ စိုးရိမ်နေမိဆဲ ဖြစ်သည်။

ထိုအချိန်တွင် မီးလျှံမြင်းသည်လည်း ၎င်း၏ပြိုင်ဘက်မှာ အပျော့စားမဟုတ်ကြောင်း သတိထားမိသွားပြီ ဖြစ်သည်။ သို့သော်လည်း ၎င်း၏ ခေါင်းမာသော သဘာဝကြောင့် ဒီယာဘလိုမှာ ၎င်းထက် ပိုတော်သည်ဆိုသည်ကိုမူ လက်မခံနိုင်သေးပေ။

၎င်း၏ ကိုယ်ပေါ်ရှိ မီးလျှံများမှာ တောက်လောင်လာပြီးနောက် လှံရှစ်စင်းခန့် ၎င်း၏ ဘေးပတ်ပတ်လည်တွင် ပေါ်လာသည်။ လှံဖျားများမှာ ဖျက်ဆီးခံရမည့် ပစ်မှတ်တစ်ခုကဲ့သို့ ငြိမ်သက်စွာ ရပ်နေသော အရိုးစုထံသို့ ဦးတည်နေကြသည်။

သို့သော် နိုက်မဲယားက ထိုလှံများကို မပစ်လွှတ်နိုင်မီမှာပင် ဒီယာဘလိုက သူ၏ဓားဖြင့် နိုက်မဲယားကို ညွှန်ပြလိုက်ရာ နိုက်မဲယား၏ ခန္ဓာကိုယ်မှာ မလိုလားဘဲ ရှေ့သို့ ပြေးဝင်သွားတော့သည်။

အာရုံစူးစိုက်မှု ပျက်ပြားသွားသောကြောင့် ၎င်းဖန်တီးထားသော မီးလှံများမှာလည်း မီးစအနည်းငယ်သာ ကျန်ရစ်ကာ ပျောက်ကွယ်သွားတော့သည်။

ဒီယာဘလိုသည် သူ၏ ပစ်မှတ်ကို သူနှင့် တစ်ကြိမ်စီ တိုက်ခိုက်စေရန် အတင်းအကျပ် ခိုင်းစေသည့် 'စိန်ခေါ်' စွမ်းရည်ကို အသုံးပြုလိုက်ခြင်း ဖြစ်သည်။

နိုက်မဲယားက ဒေါသတကြီးဖြင့် ရှေ့သို့ ပြေးဝင်လာစဉ်မှာပင် ဒီယာဘလိုသည် နောက်ဆုံးမိနစ်တွင် လေထဲသို့ ခုန်တက်လိုက်ပြီး ပြိုင်ဘက်၏ နောက်ပိုင်းဆီသို့ အရိုးလှံတစ်စင်းကို ပစ်လွှတ်လိုက်သည်။

ဤမြင်ကွင်းကို ကြည့်နေသူတိုင်းမှာ တွန့်သွားကြပြီး အချို့မှာမူ နာကျင်မှုကို ခံစားလိုက်ရသလို သူတို့၏ နောက်ပိုင်းကို လက်ဖြင့် အလိုလို အုပ်လိုက်ကြသည်။

ဒီယာဘလို၏ အရိုးလှံမှာ မည်သူမဆို ဒူးထောက်ကျသွားစေမည့် ထိုနေရာသို့ ထိုးစိုက်သွားသဖြင့် နိုက်မဲယားမှာ နာကျင်ခြင်းသာမက အရှက်ရစွာဖြင့်ပါ ဟီအော်လိုက်ရသည်။

နက်ဗရီရယ်လ်သည် ဤမျှ အရှက်မရှိသော စွမ်းရည်အသုံးချမှုကို မြင်လိုက်ရသောအခါ နှုတ်ခမ်းထောင့်များ တွန့်သွားသည်။ မည်သူ့ကိုမျှ အညံ့မခံသော တောရိုင်းတိရစ္ဆာန်များကို ယဉ်ပါးအောင်လုပ်ရန် ဤနည်းလမ်းမှာ ထိရောက်သည်ဟု ထင်ရသော်လည်း ဒီယာဘလို၏ နည်းလမ်းမှာ လွန်စွာ ရိုင်းပျပြီး ထူးဆန်းလွန်းသည်ဟု သူ ယူဆနေမိသည်။

'ငါသာ ဒီနည်းလမ်းကို နန်းတွင်းမြင်းဇောင်းထိန်းဆီ ပြောပြလိုက်ရင် သူ ဒေါသတကြီး အော်ဟစ်ပြီး ငါ့ကို အရူးလို့တောင် ခေါ်မှာပဲ' ဟု တွေးကာ နက်ဗရီရယ်လ်မှာ ထိုအတွေးကို ခေါင်းထဲမှ ထုတ်လိုက်သည်။

ထို့နောက် ဒွာ့ဖ်ကြီးသည် ဒီယာဘလိုက မြေပြင်ပေါ်တွင် လဲကျနေသော မြင်းထံသို့ လျှောက်သွားကာ မြင်း၏ နောက်ပိုင်းတွင် စိုက်နေဆဲ ဖြစ်သော အရိုးလှံကို အသာအယာ နင်းလိုက်သည်ကို ကြည့်နေလိုက်သည်။

"ခဲခဲခဲ" ဒီယာဘလိုသည် နိုက်မဲယား၏ အညံ့မခံသော မျက်နှာပေးကို ကြည့်ကာ ခပ်တိုးတိုး ရယ်လိုက်သည်။

သို့သော် ဒီယာဘလို၏ လက်ထဲတွင် နောက်ထပ် အရိုးလှံတစ်စင်း ပေါ်လာသည်ကို မြင်လိုက်ရသောအခါတွင်မူ ထိုခေါင်းမာမှုများမှာ ချက်ချင်း ပျောက်ကွယ်သွားတော့သည်။

သူ၏ပြိုင်ဘက် အညံ့ခံသွားသည်ကို မြင်သောအခါ ဒီယာဘလိုသည် ၎င်း၏ ခေါင်းပေါ်သို့ လက်တင်လိုက်ပြီး ယဉ်ပါးစေသည့် ဂါထာကို ရွတ်ဆိုလိုက်သည်။ နိုက်မဲယားသည် ခရမ်းရောင်အလင်းတန်းများဖြင့် ဖုံးလွှမ်းသွားပြီးနောက် သားရဲခြံအတွင်းမှ ပျောက်ကွယ်သွားသည်။

လပ်စ်သည် သူ၏ ဝိညာဉ်စာအုပ်ကို ဆင့်ခေါ်လိုက်ပြီး ဒီယာဘလို၏ စာမျက်နှာတွင် မြင်း၏ အခြေအနေကို စစ်ဆေးလိုက်သည်။

အံ့သြစရာကောင်းသည်မှာ ထိုစီးတော်မြင်းအတွက် သီးသန့်စာမျက်နှာတစ်ခု ပေါ်လာပြီး ၎င်း၏ စွမ်းရည်များနှင့် အချက်အလက်များကို ဖော်ပြထားသည်။ ဒီယာဘလိုကလည်း လပ်စ်၏ ဘေးသို့ လျှောက်လာကာ သူ၏ လက်တွဲဖော်သစ်ကို စာအုပ်ထဲတွင် လိုက်ကြည့်နေသည်။

"သူ့ကို နာမည်တစ်ခု ပေးချင်လား" ဟု လပ်စ်က မေးလိုက်သည်။ နိုက်မဲယား၏ စာမျက်နှာတွင် ဒီယာဘလို၏ စီးတော်မြင်းအတွက် နာမည်ပေးရန် ခွင့်ပြုထားခြင်းကြောင့် ဖြစ်သည်။

ဒီယာဘလိုက မေးစေ့ကို ပွတ်ကာ စဉ်းစားပြီးနောက် ခေါင်းညိတ်ပြသည်။ ထို့နောက် လပ်စ်၏ ရင်ဘတ်ကို နှစ်ချက်ပုတ်ကာ နိုက်မဲယား၏ ပုံကို ပြန်ထောက်ပြလိုက်သည်။ ၎င်းမှာ သူ၏ သခင်ကိုသာ နာမည်ရွေးခိုင်းသည့် သဘောဖြစ်သည်။

"နားလည်ပြီ" လပ်စ်က ခေါင်းညိတ်လိုက်ပြီး ယခင်က မည်သူမျှ ယဉ်ပါးအောင် မလုပ်နိုင်ခဲ့သော ခေါင်းမာသည့် မြင်းအတွက် သင့်တော်မည့် နာမည်ကို စဉ်းစားလိုက်သည်။

မိနစ်အနည်းငယ် ကြာပြီးနောက် လပ်စ်သည် နိုက်မဲယား၏ စာမျက်နှာပေါ်တွင် သူစဉ်းစားထားသော နာမည်ကို လက်ဖြင့် ရေးလိုက်သည်။

"အရီယွန်" ဟု လပ်စ်က တိုးတိုးလေး ပြောလိုက်သည်။ "ဒီနေ့ကစပြီး မင်းရဲ့ နာမည်က အရီယွန် ဖြစ်မယ်။ သူရဲကောင်းတွေ တိုက်ပွဲဝင်တဲ့အခါ စီးနင်းခဲ့တဲ့ အစွမ်းထက်တဲ့ မြင်းကြီးပေါ့"

ဒီယာဘလိုသည် ကျေနပ်သည့်သဘောဖြင့် ခေါင်းညိတ်လိုက်ပြီး အလင်းစက်များအဖြစ် ပြောင်းလဲကာ ပျောက်ကွယ်သွားသည်။ ယခုအခါ တိုက်ပွဲထဲသို့ သယ်ဆောင်သွားမည့် ကိုယ်ပိုင်စီးတော်မြင်း ရှိလာပြီဖြစ်ရာ လပ်စ်က သူ့အား အပ်နှင်းထားသော 'အရိုးစုမြင်းစီးသူရဲကောင်း' အတန်းအစား၏ အစွမ်းအစ အပြည့်အဝကို သူ နောက်ဆုံးတွင် ထုတ်ဖော်ပြသနိုင်တော့မည် ဖြစ်သည်။