အခန်း ၆၇ ငွေကို ငါ ရှင်းပေးမယ်

လျှိုမူဟွမ်သည် ထိုဒီဇိုင်နာကို ရှာဖွေကာ စာရင်းရှင်းရန် ကြံစည်ခဲ့သော်လည်း သတိဝင်လာသည့် အချိန်တွင်တော့ ထိုဒီဇိုင်နာနှင့်အတူ ကုမ္ပဏီအတွင်းရှိ ပုံတူကူးချမှု ကို စစ်ဆေးရမည့် တာဝန်ခံအဖွဲ့တစ်ခုလုံးပါ ကြိုတင်၍ ပျောက်ကွယ်သွားခဲ့ကြပြီ ဖြစ်သည်။

ထိုအချိန်မှသာ လျှိုမူဟွမ်တစ်ယောက် မိမိတို့ကုမ္ပဏီသည် တစ်စုံတစ်ဦး၏ တမင်တကာ ပစ်မှတ်ထား နှိပ်ကွပ်ခြင်းကို ခံလိုက်ရမှန်း သဘောပေါက်သွားတော့သည်။

သို့သော်လည်း ပစ်မှတ်ထားခံရမှန်း သိလိုက်ရရုံဖြင့် ဘာမှမထူးခြားတော့ချေ၊ သိုလှောင်ရုံကြီးတစ်ခုလုံးတွင် ရောင်းမထွက်သည့် အဝတ်အထည်များက တောင်လိုပုံနေဆဲပင် ဖြစ်၏။

ယခုတစ်ကြိမ် ဆုံးရှုံးမှုပမာဏမှာ အနည်းဆုံး ယွမ်သုံးသန်းခန့် ရှိပေသည်။

၎င်းမှာ စတင်တည်ထောင်ခါစသာ ရှိသေးသည့် ကုမ္ပဏီငယ်လေးတစ်ခုအတွက်တော့ နျူကလီးယားဗုံးတစ်လုံး ကျရောက်လာသကဲ့သို့ ပြင်းထန်လှသော ထိုးနှက်ချက်ကြီး ဖြစ်ပေသည်။

ကုမ္ပဏီ၏ တန်ဖိုးမှာ သန်းတစ်ရာကျော် ရှိသည်ဆိုသော်လည်း ကုမ္ပဏီတွင် တကယ့်လက်တွေ့ ငွေသား ထိုမျှပမာဏ ရှိနေခြင်း မဟုတ်ဘဲ ပြင်ပမှ ခန့်မှန်းတွက်ချက်ထားသည့် အနာဂတ်စွမ်းဆောင်ရည် သတ်မှတ်ချက် မျှသာ ဖြစ်ပေသည်။

ထို့ကြောင့် ကုမ္ပဏီ၏ ဘဏ်စာရင်းတွင် အမှန်တကယ် လှည့်ပတ်နိုင်သည့် အမြင့်ဆုံး အရင်းအနှီးမှာ ယွမ်ငါးသန်းကျော် မျှသာရှိရာ သုံးသန်းခန့် ဆုံးရှုံးသွားခြင်းမှာ ကုမ္ပဏီအတွက် တကယ့်ကို သေလုမျောပါး ဖြစ်သွားစေသည့် အကျပ်အတည်းကြီး ဖြစ်၏။

လောလောဆယ်တွင် လျှိုမူဟွမ်၏ ကုမ္ပဏီစာရင်း၌ ကျန်ရှိနေသော ငွေကြေးမှာ ဝန်ထမ်းအားလုံးကို လစာနှစ်လစာ ထုတ်ပေးရန်ပင် မနည်းအနိုင်အနင်း တွက်ချက်နေရပြီး အကယ်၍ ရံပုံငွေများ ပြန်လည်မစီးဆင်းနိုင်ပါက ကုမ္ပဏီသည် လူမွဲခံယူကာ ဒေဝါလီခံရမည့် အန္တရာယ်နှင့် ရင်ဆိုင်နေရပြီ ဖြစ်သည်။

လျှိုမူဟွမ်သည် မိမိသိသမျှ လူများအားလုံးထံသို့ အကူအညီတောင်းခံရန် ရှာဖွေခဲ့သော်လည်း ထိုကုမ္ပဏီများအားလုံးက တညီတညွတ်တည်း ငြင်းဆန်ခဲ့ကြပေသည်။

နောက်ဆုံးတွင်တော့ လျှိုမူဟွမ်၌ အခြားရွေးချယ်စရာမရှိဘဲ ကုမ္ပဏီကို ရောင်းချပစ်ရန်အထိ စဉ်းစားနေခဲ့စဉ်မှာပင် လျှိုမိသားစု၏ မျက်စိရှေ့မှောက်သို့ လူတစ်ယောက် ရောက်ရှိလာခဲ့သည်။

ထိုလူမှာ 'ကျုံးရန်ယောင်' ဖြစ်၏။ လျှိုနန်ချင်း ပြန်လည်တွေးမိသည်မှာ လွန်ခဲ့သော ရက်ပိုင်းက လမ်းပေါ်တွင် ထိုလူနှင့် မမျှော်လင့်ဘဲ ဆုံတွေ့ခဲ့ဖူးပြီး သူက ဆက်သွယ်ရန် လိပ်စာတောင်းခဲ့သော်လည်း သူမက မပေးခဲ့ချေ။ လျှိုနန်ချင်းကတော့ ထိုစဉ်က လမ်းဘေးက လော်လီသည့် လူတစ်ယောက်အဖြစ်သာ သဘောထားကာ မေ့ပစ်လိုက်သည်။

သို့သော်လည်း နောက်ပိုင်းတွင် ထိုလူကို မိမိ၏ အိမ်ဧည့်ခန်းထဲ၌ တစ်ဖန် ပြန်လည်တွေ့ရှိရလိမ့်မည်ဟု သူမ ဘယ်တုန်းကမှ ထင်မှတ်မထားခဲ့မိပေ။

ကျုံးရန်ယောင်သည် ကျန်ချွမ်းပြည်နယ်၏ အကြီးဆုံး အထည်အလိပ်လုပ်ငန်းစုကြီးဖြစ်သော 'ကျုံးရှီဂရု' ၏ ဥက္ကဋ္ဌကြီး ကျုံး၏ တစ်ဦးတည်းသော သားရတနာ ဖြစ်ပေသည်။

ထိုစဉ်က ကျုံးရန်ယောင်နှင့် ဥက္ကဋ္ဌကြီးကျုံးတို့သည် လျှိုမူဟွမ်၏ အိမ်သို့ ရောက်ရှိလာပြီး သွယ်ဝိုက်သော နည်းလမ်းဖြင့် သူတို့၏ သဘောထားကို ဖော်ပြခဲ့ကြသည်—အကယ်၍ လျှိုနန်ချင်းသာ ကျုံးရန်ယောင်နှင့် လက်ထပ်ရန် သဘောတူမည်ဆိုပါက ကျုံးရှီဂရုသည် လျှိုမူဟွမ်၏ ကုမ္ပဏီအတွက် ရံပုံငွေများ ကူညီပံ့ပိုးပေးမည်ဖြစ်ပြီး ကုမ္ပဏီကို ရောင်းချစရာ မလိုတော့ဟု ဆို၏။

လျှိုမူဟွမ်က ထိုတောင်းဆိုချက်ကို ပြတ်ပြတ်သားသား ငြင်းဆန်ခဲ့သည်၊ သူသည် မိမိ၏ ကုမ္ပဏီ ရှင်သန်ရေးအတွက်သမီးဖြစ်သူ၏ ဘဝတစ်ခုလုံးစာ ပျော်ရွှင်မှုကို လုံးဝ အနစ်နာခံမည့်ဖခင်မျိုး မဟုတ်ပေ။

သို့သော်လည်း ကျုံးရန်ယောင်ဟူသော လူယုတ်မာမှာ အပေါ်ယံတွင်တော့ သူသည် လျှိုနန်ချင်းကို သဘောကျရုံ သက်သက်သာဖြစ်ပြီး လျှိုမူဟွမ်က ငြင်းပယ်လျှင်လည်း အတင်းအကျပ် မလုပ်ပါဘူးဟု ယဉ်ကျေးပြခဲ့သော်လည်း နောက်ကွယ်တွင်မူ လျှိုမူဟွမ်၏ ကုမ္ပဏီကို မကောင်းကြံ စဖျက်ဆီးခဲ့တော့သည်။

ကျုံးရန်ယောင် ထွက်ခွာသွားပြီးနောက် ဒုတိယမြောက်နေ့မှာပင် ကုမ္ပဏီ၏ ဘဏ္ဍာရေးဌာန တာဝန်ခံသည် ကုမ္ပဏီစာရင်းထဲတွင် ကျန်ရှိနေသမျှ ငွေကြေးအားလုံးကို မတရား လိမ်လည်ယူဆောင်ကာ ထွက်ပြေးတိမ်းရှောင်သွားခဲ့ပြီး ဆိုးရွားလှသော ကြွေးမြီအပုပ်အစပ်များကိုသာ ချန်ထားရစ်ခဲ့ရာ အကျပ်ရိုက်နေပြီးသား ကုမ္ပဏီ၏ ဘဏ္ဍာရေးအခြေအနေကို ချောက်ထဲသို့ တွန်းချလိုက်သကဲ့သို့ ဖြစ်သွားခဲ့ရတော့သည်။

၎င်းမှာ ကျုံးရန်ယောင်၏ သွေးထိုးလှုံ့ဆော်မှုကြောင့် ဖြစ်ကြောင်း ခိုင်လုံသော သက်သေအထောက်အထား မရှိသော်လည်း နောက်ပိုင်းတွင် သူ ပြသလာသည့် တုံ့ပြန်မှုများအရ လျှိုနန်ချင်းကို သူ့ထံ ဒူးထောက်အညံခံလာစေရန် တွန်းအားပေးနေသည့် ကိစ္စဖြစ်ကြောင်း လျှိုမိသားစု ကောင်းကောင်း သဘောပေါက်သွားခဲ့ကြသည်။

လျှိုမိသားစုက ဆက်လက်ငြင်းဆန်နေသဖြင့် ကျုံးရန်ယောင်သည်လည်း သူ၏ ယဉ်ကျေးသိမ်မွေ့လှသော မျက်နှာဖုံးကို ခွာချကာ မူလရုပ်ဆိုးကြီးကို ထုတ်ပြလာခဲ့တော့သည်။ လွန်ခဲ့သည့် နှစ်ရက်ခန့်ကပင် ကျုံးရန်ယောင်သည် လျှိုမိသားစုထံသို့ နောက်ဆုံးသတိပေးချက် ထုတ်ပြန်ခဲ့၏။

သူက လျှိုနန်ချင်းကို စဉ်းစားရန် သုံးရက်အချိန်ပေးခဲ့ပြီး အကယ်၍ သူမသာ လက်ထပ်ရန် ဆက်လက်ငြင်းဆန်နေဦးမည်ဆိုပါက လျှိုမူဟွမ်ကို လောကငရဲ ပြပစ်မည်ဟု ခြိမ်းခြောက်ခဲ့သည်။

သူသည် လျှိုမူဟွမ်၏ ကုမ္ပဏီကို ဒေဝါလီခံအောင် လုပ်နိုင်ရုံတင်မကဘဲ လျှိုမူဟွမ်ကိုပါ ဤလောကမြေကြီးပေါ်မှ ထာဝရ ပျောက်ကွယ်သွားအောင် လုပ်ပစ်နိုင်စွမ်း ရှိသည်ဟူ၏။

လျှိုနန်ချင်းသည် လွန်ခဲ့သည့်ရက်ပိုင်းကတည်းက အလွန် လေးနက်စွာ တွေးတောနေခဲ့ခြင်း ဖြစ်သည်။ ဖခင်ဖြစ်သူ အန္တရာယ်မဖြစ်စေရန်အတွက် သူမအနေဖြင့် အလျှော့ပေး အညံခံရန် ဆုံးဖြတ်ခဲ့သည်။ လင်းဖုန်း သူမထံသို့ မက်ဆေ့ခ်ျမပို့မီအချိန်အထိ လင်းဖုန်းကို မည်သို့ ဖွင့်ပြောရမလဲဆိုသည်ကို သူမ အကြာကြီး တွေးတောနေခဲ့ရရှာသည်။

အဘယ်ကြောင့်ဆိုသော် လျှိုနန်ချင်း၏ အမြင်တွင် သူမနှင့် လင်းဖုန်းကြားက ဆက်ဆံရေးမှာ လွန်ခဲ့သည့် ၃၇၆ ရက်က ဝေခွဲမရဖြစ်နေခဲ့သည့် ချစ်တင်းနှောဆဲ ကာလအတိုင်း ရှိနေဆဲဟု ထင်မှတ်နေသောကြောင့် ဖြစ်၏။

စကော်ပီရိုရာသီဖွား မိန်းကလေးတွေကတော့ တကယ့်ကို ကြောက်စရာကောင်းလိုက်တာ။

လင်းဖုန်း လျှိုနန်ချင်း၏ ရှင်းပြချက်ကို နားထောင်ပြီးနောက် မျက်ဝန်းအစုံ ကျဉ်းမြောင်းသွားခဲ့ရသည်။ "မျှော်လင့်ထားတဲ့အတိုင်းပဲ... ငါက ဇာတ်လိုက်ဆိုတော့ ဘယ်နေရာသွားသွား ဘေးထွက်တာဝန်တွေ အမြဲ ပွင့်လာတတ်တာပဲ။ ငါ သိလိုက်ရပြီဆိုမှတော့ ဒီအတိုင်း လက်ပိုက်ကြည့်မနေနိုင်ဘူး။ လျှိုနန်ချင်းကို သိမ်းပိုက်နိုင်ဖို့ဆိုရင် ဒီဘေးထွက်တာဝန်ကို ငါ ဧကန်မုချ အောင်မြင်အောင် လုပ်ရမယ်!"

"နန်ချင်း... ဘာမှ စိုးရိမ်မနေနဲ့တော့။ ပြောစမ်းပါဦး... နင့်အဖေရဲ့ ကုမ္ပဏီကို ပုံမှန်အတိုင်း ပြန်လည်လည်ပတ်နိုင်ဖို့ အခု လောလောဆယ် ငွေဘယ်လောက် လိုအပ်နေတာလဲ"

"ငါလည်း အတိအကျတော့ မသိဘူး၊ ဒါပေမဲ့ လတ်တလောမှာ ငါ့အဖေ တစ်ယောက်တည်း ညည်းတွားနေတာ ကြားရသလောက်တော့ ယွမ် ရှစ်သန်းကျော်လောက် လိုမယ် ထင်တယ်..."

"ကောင်းပြီလေ... အဲဒီရှစ်သန်းကို ငါ ရှင်းပေးမယ်! ပြီးတော့ အခု ချက်ချင်းပဲ နင်တို့ဆီလာမယ့် လေယာဉ်လက်မှတ်ကို ငါ ဝယ်လိုက်တော့မယ်။ နင်က ငါ့ရဲ့ လူပဲဥစ္စာ... ဘယ်သူကများ နင့်ကို မကောင်းကြံရဲရတာလဲ၊ ငါ သူ့ကို နောင်တရစေရမယ်!" လင်းဖုန်းက အာဏာစက်အပြည့်ဖြင့် ကြုံးဝါးလိုက်သည်။

လင်းဖုန်း၏ စကားလုံးများကို ကြားလိုက်ရသည့်အခါ လျှိုနန်ချင်း၏ ရင်ထဲတွင် နွေးထွေးမှုလှိုင်းလုံးလေးတစ်ခု ဖြတ်သန်းသွားခဲ့ရသည်။

လင်းဖုန်းနှင့် အဆက်အသွယ်ပြတ်တောက်နေခဲ့သည့် ၃၇၆ ရက်လုံးလုံး သူမသည် လင်းဖုန်းကို တစ်ခါမျှ မမေ့လျော့ခဲ့ဖူးချေ။ သို့သော်လည်း သူမ၏ စကော်ပီရိုရာသီဖွား ပင်ကိုယ်စရိုက်ကြောင့် လင်းဖုန်းဘက်က အရင် ပြန်လာပြီး ချဉ်းကပ်လာမည့်အချိန်ကိုသာ ခေါင်းမာမာဖြင့် စောင့်ဆိုင်းနေခဲ့ခြင်း ဖြစ်ပေသည်။

အဘယ်ကြောင့်ဆိုသော် ထိုစဉ်က သူတို့နှစ်ဦး၏ စာတိုမှတ်တမ်းတွင် နောက်ဆုံးမက်ဆေ့ခ်ျကို သူမဘက်က ပို့ထားခဲ့သောကြောင့် ဖြစ်၏။

(စကော်တဲ့နော် ကြည့်ရှောင်ကြ)

၎င်းမှာ လူသိများသည့် ဟာသဟောင်းတစ်ခုကဲ့သို့ပင်—စကော်ပီရိုရာသီဖွား မိန်းကလေးတစ်ယောက်နှင့် မိန်ရာသီဖွား ယောက်ျားလေးတစ်ယောက်တို့ ချစ်သူဖြစ်ကြပြီး တစ်ခါတွင် ရန်ဖြစ်ကာ တစ်ပတ်ခန့် အဆက်အသွယ် ပြတ်တောက်သွားခဲ့သည်။

မိန်ရာသီဖွားက သူတို့ လမ်းခွဲလိုက်ကြပြီဟု ထင်မှတ်ကာ မိဘများ၏ စကားကို နားထောင်ပြီး အောင်သွယ်ပေးသည့် မိန်းကလေးနှင့် ချိန်းတွေ့သွားခဲ့သည်။

နှစ်နှစ်ခန့် ကြာပြီးနောက် ထိုယောင်္ကျားလေး လက်ထပ်ရန် ပြင်ဆင်နေခဲ့သည်။ မင်္ဂလာဆောင်မည့်ရက် မတိုင်မီ တစ်ရက်အလိုတွင်တော့ စကော်ပီရိုရာသီဖွား မိန်းကလေးထံမှ မက်ဆေ့ခ်ျတစ်ခု ရုတ်တရက် ဝင်လာခဲ့သည်မှာ-

【နင် နင့်ရဲ့အပြစ်ကို သိပြီလား】

ဤဟာသမှာ အနည်းငယ် ချဲ့ကားထားသည်ဟု ထင်ရသော်လည်း လျှိုနန်ချင်း၏ ခေါင်းမာပြီး စောင့်ဆိုင်းတတ်သည့် စရိုက်ကို တိုက်ရိုက် ထင်ဟပ်နေခြင်း ဖြစ်ပေသည်။

လျှိုနန်ချင်း လင်းဖုန်း၏ စကားကြောင့် ရင်ထဲ နွေးထွေးသွားရသော်လည်း လင်းဖုန်း၏ မိသားစုအခြေအနေကို သူမ ကောင်းကောင်းသိသည်။ အလွန် ချမ်းသာကြွယ်ဝခြင်းမရှိသည့် သာမန်မိသားစုမျှသာ ဖြစ်ရာ လင်းဖုန်းအနေဖြင့် ယွမ် ရှစ်သန်းကို ချက်ချင်း ထုတ်ပေးနိုင်မည်ဆိုသည်မှာ စိတ်ကူးယဉ်အိမ်မက်သက်သက်သာ ဖြစ်ပေလိမ့်မည်။

"လင်းဖုန်း... နင် ငါ့ကို နှစ်သိမ့်ပေးချင်တာကို ငါ သိပါတယ်၊ ဒါပေမဲ့ ရှစ်သန်းဆိုတာ အရမ်းများလွန်းတဲ့ ပမာဏကြီးလေ။ နင်က..."

"နန်ချင်း... ငါ ချက်ချင်း ရှစ်သန်း ထုတ်ပေးနိုင်တယ်လို့ ပြောလိုက်တော့ နင် မယုံဘူးဆိုတာ ငါ သိပါတယ်။ ဒါပေမဲ့ အခုလောလောဆယ် ရှင်းပြနေဖို့ အချိန်မရှိတော့ဘူး။ ငါ ကျန်ချွမ်းပြည်နယ်ကို ရောက်တဲ့အခါကျမှ ဖြည်းဖြည်းချင်း ရှင်းပြမယ်။ အခု နင့်ရဲ့ ဘဏ်အကောင့်နံပါတ်ကို ငါ့ဆီ ချက်ချင်း ပို့ပေး၊ ငါ အခုပဲ ငွေလွှဲပေးမယ်!"

လျှိုနန်ချင်း တစ်စုံတစ်ခု ထပ်မံပြောဆိုချင်သေးသော်လည်း လင်းဖုန်းက စကားဖြတ်လိုက်လေသည်။ နောက်ဆုံးတွင်တော့ လျှိုနန်ချင်း၌ အခြားရွေးချယ်စရာမရှိဘဲ လင်းဖုန်းထံသို့ ဘဏ်အကောင့်နံပါတ် ပို့ပေးလိုက်ရသော်လည်း စိတ်ထဲတွင်တော့ မည်သည့် မျှော်လင့်ချက်မျှ ထားရှိမနေခဲ့ချေ။

အတိတ်က စွဲထင်ခဲ့သည့် အထင်အမြင်က နက်ရှိုင်းလွန်းလှရာ မိမိမျက်စိဖြင့် တကယ့်လက်တွေ့ မမြင်ရသရွေ့တော့ ပြောင်းလဲရန် လွန်စွာ ခက်ခဲလှပေသည်။

ဤခံစားချက်မှာ ငယ်ငယ်တုန်းက အတူတူ ဆော့ကစားခဲ့ဖူးပြီး တစ်နှစ်ခန့် အဆက်အသွယ်ပြတ်သွားသည့် သူငယ်ချင်းတစ်ယောက်က ရုတ်တရက် ပြန်ဆုံချိန်တွင် မိမိထံ၌ ငွေရှစ်သန်း အလွယ်တကူ ရှိသည်ဟု ပြောလာခြင်းနှင့် တူပေသည်။ မင်းဆိုရင်ကော ယုံမလား။

မင်းလည်း ဧကန်မုချ ယုံမှာ မဟုတ်ဘူး မဟုတ်လား။

လင်းဖုန်းလည်း ဤအချက်ကို ကောင်းကောင်းသိသည်။ အကယ်၍ လျှိုနန်ချင်းသာ ဗီလိန်တစ်ယောက် ဖြစ်နေပါက လင်းဖုန်းအနေဖြင့် ဝက်ဟန်ဆောင်ပြီး ကျားကိုစား သည့်ပုံစံမျိုးဖြင့် ကြွားဝါပြဦးမည် ဖြစ်သော်လည်း အခု လျှိုမိသားစုတွင် ငွေကြေး လွန်စွာ အရေးပေါ် လိုအပ်နေသဖြင့် ငွေကို တိုက်ရိုက် လွှဲပေးလိုက်ခြင်းကသာ အရေးကြီးဆုံး ကိစ္စ ဖြစ်ပေသည်။

လျှိုနန်ချင်း ဘဏ်အကောင့် ပို့ပေးပြီးနောက်တွင်တော့ လင်းဖုန်းသည် ယွမ် ဆယ်သန်းကို တိုက်ရိုက် လွှဲပြောင်းပေးလိုက်တော့သည်။

ကျန်ချွမ်းပြည်နယ်၊ ကန်လင်မြို့ဝယ်...

လျှိုနန်ချင်း၏ ဖုန်းထဲသို့ ဘဏ်မှ မက်ဆေ့ခ်ျတစ်ခု ချက်ချင်း ဝင်ရောက်လာခဲ့သည်။

【နံပါတ် ၂၇၇၀ ဖြင့် ဆုံးသော သင်၏ ဘဏ်ကတ်အတွင်းသို့ ယွမ် ၁,၀၀၀,၀၀၀,၀၀၀.၀၀ (သိန်းတစ်ထောင်) ဝင်ရောက်လာပါပြီ။ လက်ရှိ လက်ကျန်ငွေ- ၁,၀၀၀,၀၀၃,၆၇၅.၂၃ ယွမ် ဖြစ်ပါသည်】

လျှိုနန်ချင်း မျက်လုံးအစုံ ဝိုင်းသွားခဲ့ရပြီး အသက်ရှူပင် မှားမတတ် မိမိ၏ မျက်စိကိုယ်မိမိပင် မယုံကြည်နိုင်လောက်အောင် ဖြစ်သွားရရှာသည်။

"ငါ ငွေလွှဲပေးလိုက်ပြီနော်။ ရပြီလား"

ဖုန်းထဲမှ လင်းဖုန်း၏ အသံ ထွက်ပေါ်လာခဲ့မှသာ လျှိုနန်ချင်းတစ်ယောက် ရင်သပ်ရှုမောဖြစ်နေသည့် အခြေအနေမှ ပြန်လည် နိုးထလာခဲ့တော့သည်။ "လင်း... လင်းဖုန်း၊ ဒါ... ဒါ တကယ်ပဲ နင် လွှဲပေးလိုက်တာလား"

"ဟုတ်တာပေါ့၊ ဒီငွေပမာဏဆိုရင် နင့်အဖေရဲ့ ကုမ္ပဏီ ပြဿနာတွေကို ဖြေရှင်းဖို့ လောက်လောက်ငင ရှိလောက်တယ် မဟုတ်လား"

လျှိုနန်ချင်း မိမိ၏ မျက်လုံးများကို လက်ဖြင့် ပွတ်သပ်ကာ မမှားနိုင်ကြောင်း ထပ်မံအတည်ပြုပြီးနောက် ဂဏန်းများကို တစ်လုံးချင်းစီ ရေတွက်လိုက်မိသည်။

"ခု၊ ဆယ်၊ ရာ၊ ထောင်၊ သောင်း၊ သိန်း၊ သန်း၊ ကုဋေ... ဘုရားရေ... ဒါ သိန်းတစ်ရာ (ဆယ်သန်း) တောင်ပါလား"