အခန်း ၅၈။ မမချိုး ပြန်ပေးဆွဲခံရခြင်း

လင်းဖုန်း စိတ်အာရုံကို စနစ်ထဲ နစ်မြုပ်စေပြီး မေးမြန်းလိုက်သည်— "လတ်တလောမှာ တစ်စုံတစ်ယောက်က ငါ့ကို လုပ်ကြံဖို့ ကြံစည်နေလို့လား။ အဲ့ဒါကြောင့်ပဲ မင်း ငါ့ကို ဒီလုံခြုံရေးကုမ္ပဏီ ပေးခဲ့တာလား"

"အနည်းဆုံးတော့ အိမ်ရှင်အနေနဲ့ မကြာခင်မှာ အသုံးပြုရတော့မှာမလို့ပါပဲ"

လင်းဖုန်း မျက်ခုံးပင့်လိုက်မိရင်း "ဘယ်ကောင်က ငါ့ကို လာထိချင်နေတာလဲ။ ငါ့မှာ အခု ရန်သူအများကြီး မရှိပါဘူး၊ လျှိုရှုကလွဲလို့ တခြားဘယ်သူ့ကိုမှ စဉ်းစားလို့မရဘူး။ အခြေအနေတွေ ဒီအဆင့်အထိ ရောက်နေတာတောင် သူက ငါ့ကို လာပြီး လက်စွမ်းပြရဲသေးတယ် ဟုတ်လား။ သတ္တိကတော့ ကောင်းလွန်းလှပါလား!"

လင်းဖုန်း နှာခေါင်းရှုံ့ကာ လှောင်ပြောင်လိုက်ပြီးနောက် ထိုအကြောင်းကို ဆက်ပြီး ဂရုမစိုက်တော့ပေ။ စနစ်က သူ့ကို ဒီလုံခြုံရေးကုမ္ပဏီ ပေးထားမှတော့ သေချာပေါက် အသုံးဝင်မည့်နေရာ ရှိလိမ့်မည်။ ထို့အပြင် ဇာတ်လိုက်အရှိန်အဝါ ရှိနေသည့် သူ့အနေဖြင့် ဘယ်လိုမှ ဒုက္ခမကြုံနိုင်တာမို့ လုံးဝ စိုးရိမ်ပူပန်နေစရာ မလိုပေ။

လုံခြုံရေးကုမ္ပဏီအကြောင်းကို ဆက်မတွေးတော့ဘဲ လင်းဖုန်း ဒူယင်း အက်ပ်ကို ဖွင့်ကြည့်လိုက်ရာ ရုတ်တရက် လန့်ဖျတ်သွားခဲ့ရသည်။

"ဖော်လိုဝါ နှစ်သန်းတောင် ဟုတ်လား။ ငါ မှတ်မိသလောက်တော့ ထိုနေ့က ပိုင်ရင်းရို့ ညီအစ်မနှစ်ယောက်ကို ဆုကြေးငွေတွေ သွားကြဲတုန်းက ငါ့မှာ ဖော်လိုဝါ ထောင်ဂဏန်းလေးပဲ ရှိတာ မဟုတ်ဘူးလား။ ဒီလို တိုးတက်မှုနှုန်းက တကယ်ကို အံ့ဩစရာ ကောင်းလွန်းလှပါလား။ ပြီးတော့ သီးသန့်စာ ပို့ထားတာက တစ်သိန်းကျော်တောင်? အမလေး …ဘုရားရေ!"

လင်းဖုန်း သီးသန့်စာဝင်သမျှအားလုံးကို တစ်ချက်တည်းဖြင့် လုံးဝ ပိတ်ဆို့ ပစ်လိုက်ပြီးနောက် ဗီဒီယိုများကို ဆက်လက် လှည့်ပတ်ကြည့်ရှုနေလိုက်သည်။

ရုတ်တရက်ဆိုသလို လင်းဖုန်း သတိပြုမိလိုက်သည်မှာ ယနေ့တွင် လျှိုရှုအမှုနှင့် ပတ်သက်သည့် ဗီဒီယိုများစွာ ထွက်ပေါ်နေရုံတင်မကဘဲ တိုက်ရိုက်ထုတ်လွှင့်မှု များတွင်ပါ ဤအကြောင်းအရာကို အကျအန ဆွေးနွေးနေကြခြင်း ဖြစ်သည်။

လင်းဖုန်းသည် လျှိုရှုအမှုကို ဝေဖန်ဆန်းစစ်နေကြသည့် တိုက်ရိုက်ထုတ်လွှင့်သူ အများအပြားကို ဆက်တိုက်ဆိုသလို ရွှေ့ပြောင်းကြည့်ရှုလိုက်သည်။ အချို့သူများမှာဆိုလျှင် ဥပဒေကြောင်းအရ စာရွက်စာတမ်းမျိုးစုံကို ရှာဖွေကိုးကားပြီး လျှိုရှုသာ အဖမ်းခံရပါက ဘယ်လိုမျိုး ပြစ်ဒဏ်ကံကြမ္မာနဲ့ ရင်ဆိုင်ရမလဲဆိုသည်ကိုပါ အကျယ်တဝင့် ဆွေးနွေးနေကြဆဲ ဖြစ်သည်။

ဝေဖန်ဆွေးနွေးမှုများ အရှိန်အဟုန် မည်မျှပြင်းထန်နေသည်ကို မြင်တွေ့ရသဖြင့် လင်းဖုန်းသည် မီးလောင်ရာလေပင့်ပေးသည့် အနေဖြင့် ဒူယင်းပေါ်တွင် ရှောင်စန်းနှင့် လျှိုရှု၏ ဒုက္ခပေးခြင်းခံခဲ့ရသူများဘက်က ရပ်တည်ပြောဆိုပေးနေသည့် တိုက်ရိုက်ထုတ်လွှင့်မှု သို့မဟုတ် ဗီဒီယိုအားလုံးကို ဆုကြေးငွေများ လိုက်လံ ကြဲချပေးလိုက်တော့သည်။

သူ့အကောင့်ထဲတွင် ကျန်ရှိနေသည့် ဒူယင်းဒင်္ဂါး များအားလုံး ကုန်ဆုံးသွားသည့် အချိန်ကျမှသာ သူ လက်ကို ရပ်လိုက်တော့သည်။

ပြီးခဲ့သည့်အကြိမ်က ပိုင်ရင်းရို့အား နောက်ဆုံး ဆုကြေးပေးပြီးနောက်တွင် လင်းဖုန်း၏ အကောင့်ထဲ၌ ဒူယင်းဒင်္ဂါး သန်း ၅၀ ကျော် ကျန်ရှိနေသေးခြင်း ဖြစ်ကာ ၎င်းကို ယွမ်ငွေကြေးဖြင့် တွက်ချက်လျှင် ယွမ် ၅ သန်းကျော် တန်ဖိုးရှိသည်။ အခုတော့ ထိုငွေအားလုံးကို လင်းဖုန်းတစ်ယောက် တစ်ပြားမကျန် အကုန်သုံးစွဲပစ်လိုက်ပြီ ဖြစ်သည်။

ငွေတွေအားလုံး သုံးစွဲပြီးနောက် လင်းဖုန်း အေးဆေး အိပ်ပျော်သွားခဲ့သော်လည်း မနက် မိုးမလင်းခင် ငါးနာရီ အချိန်ခန့်တွင် ဆုယွီရှုထံမှ ရုတ်တရက် ဖုန်းဆက်လာသဖြင့် လင်းဖုန်း လန့်နိုးသွားခဲ့ရသည်။

လင်းဖုန်း ဖုန်းကို အမြန်ကိုင်လိုက်ရာ ဖုန်းအခြားတစ်ဖက်ကနေ ဆုယွီရှု၏ အလွန်အမင်း စိုးရိမ်သောကရောက်နေသည့် လေသံကြီး ထွက်ပေါ်လာခဲ့သည်— "လင်းဖုန်း... ပြဿနာတက်ပြီ! မမချိုးနဲ့ ရှောင်ချန်တို့ ပြန်ပေးဆွဲခံလိုက်ရပြီ!"

လင်းဖုန်းတစ်ယောက် ချက်ချင်းဆိုသလို အိပ်ချင်စိတ်တွေ လုံးဝ လွင့်ပြယ်သွားခဲ့ရပြီး ကုတင်ပေါ်ကနေ ဝုန်းခနဲ ထထိုင်လိုက်ရင်း— "စိတ်မလောပါနဲ့ဦး၊ အေးဆေး ဖြည်းဖြည်းချင်းပြောပြပါ!"

ဖုန်းအခြားတစ်ဖက်က ဆုယွီရှုသည် စိတ်ကို အနည်းငယ် တည်ငြိမ်အောင် ထိန်းချုပ်လိုက်ပြီးနောက် ဖြစ်ပျက်ခဲ့သမျှကို အစအဆုံး ပြန်လည် ဖောက်သည်ချတော့သည်။

သူမသည် ခုနတင်ပဲ အမည်မဖော်လိုသူတစ်ဦးထံမှ ဖုန်းခေါ်ဆိုမှုကို လက်ခံရရှိခဲ့ခြင်း ဖြစ်သည်။ ဖုန်းထဲက လူက လင်းဖုန်းကို သူ့ဆီ ပြန်လည် ဖုန်းဆက်ခိုင်းရန် ပြောကြားခဲ့ပြီး၊ တကယ်လို့ ပြန်မဆက်ဘူးဆိုလျှင် ချန်ရန်ချိုး (မမချိုး) နှင့် ချန်ရိဟယ် (ရှောင်ချန်) တို့နှစ်ယောက်စလုံး၏ အသက်ဇီဝိန် အဆုံးသတ်သွားစေရမည်ဟု ခြိမ်းခြောက်ခဲ့ခြင်း ဖြစ်သည်။

အမည်မသိ ခေါ်ဆိုသူသည် ထိုစကားကို ပြောကြားပြီးသည်နှင့် ဖုန်းကို ချက်ချင်း ချပစ်လိုက်ပြီးနောက်၊ ချန်ရန်ချိုးနှင့် ချန်ရိဟယ်တို့နှစ်ယောက် ကြိုးများဖြင့် အတင်းတုတ်နှောင်ခံထားရသည့် ဓာတ်ပုံများကို စာတို  အဖြစ် ချက်ချင်း ပေးပို့လာခဲ့ခြင်း ဖြစ်သည်။

ဆုယွီရှုသည် ထိုဓာတ်ပုံများကို လင်းဖုန်းထံသို့ တဆင့် ပြန်လည် ပေးပို့လိုက်သည်။

လင်းဖုန်း ထိုဓာတ်ပုံများကို ကြည့်ရှုလိုက်ရင်း မျက်လုံးအစုံကို မသိမသာ မှေးစိုက်လိုက်မိသည်— "ငါ နောက်ဆုံးတော့ သဘောပေါက်သွားပြီ၊ စနစ်က ငါ့ကို ဘာဖြစ်လို့ လုံခြုံရေးကုမ္ပဏီတစ်ခု ပေးခဲ့တာလဲဆိုတာ။ ဪ... ဒီအတွက်ကိုး!"

ဖုန်းအခြားတစ်ဖက်က ဆုယွီရှုမှာတော့ အလွန်အမင်း သောကရောက်နေရှာသည်— "လင်းဖုန်း... တို့တွေ အခု ဘာဆက်လုပ်ကြမလဲ။ မမချိုးတို့တွေ ဘာမှမဖြစ်ဘဲ ဘေးကင်းပါ့မလား။ သူတို့ကို ဘယ်သူကများ ပြန်ပေးဆွဲသွားတာလဲမသိဘူး"

"ယွီရှု... စိုးရိမ်မနေနဲ့ဦး။ ခုနက ဖုန်းဆက်တဲ့ကောင်က ငါ့ကို သူ့ဆီ ဖုန်းပြန်ဆက်ခိုင်းတယ် ဟုတ်လား"

"အင်း... ဖုန်းထဲမှာ အဲ့လိုပဲ ပြောသွားတာ။ ငါ ဘာမှတောင် ပြန်မမေးလိုက်ရသေးဘူး၊ ဖုန်းချသွားတာ"

"အဲ့ဒီလူရဲ့ ဖုန်းနံပါတ်ကို ငါ့ဆီ အခုချက်ချင်း ပေးပို့လိုက်ပါ။ သူက ငါ့ကို လာရှာချင်နေတာ မဟုတ်လား။ ဒါဆိုရင် သူ ဘာကြံစည်နေလဲဆိုတာ ငါ ကိုယ်တိုင် သွားပြီး ကြည့်ရသေးတာပေါ့!"

ဆုယွီရှုတစ်ယောက် တွန့်ဆုတ်မနေဘဲ ခုနက သူမထံ ဖုန်းဆက်ခဲ့သည့် လူ၏ ဖုန်းနံပါတ်ကို လင်းဖုန်းထံသို့ ချက်ချင်း ပေးပို့လိုက်တော့သည်။

ဖုန်းနံပါတ် ရရှိပြီးနောက် လင်းဖုန်းသည် ထိုနံပါတ်ဆီသို့ ချက်ချင်း ပြန်လည် ခေါ်ဆိုလိုက်တော့သည်။

တူ... တူ...

ခဏမျှ ဖုန်းမြည်ပြီးနောက် အခြားတစ်ဖက်ကနေ ဖုန်းကို ကိုင်လိုက်သည်။

"မင်းက ဘယ်သူလဲ။ ငါက လင်းဖုန်းပဲ။ ငါ့ကို ဘာကိစ္စအတွက် လာရှာနေတာလဲ"

"ဟားဟားဟားဟား..."

ဖုန်းအခြားတစ်ဖက်ကနေ ရူးသွပ်ဟန်ရှိသော ရယ်မောသံကြီးတစ်ချက် ဟိန်းထွက်လာခဲ့ရာ လင်းဖုန်း မျက်မှောင်ကြုတ်လိုက်မိသည်။ ဤအသံက?

ဒါ လျှိုရှုရဲ့ အသံ မဟုတ်ပါလား။

လျှိုရှုက မမချိုးနဲ့ ကိုချန်တို့ကို ပြန်ပေးဆွဲသွားတာ ဟုတ်လား။

"လျှိုရှု?... ဒါ မင်းပဲမလား။ ဒီပြန်ပေးဆွဲတဲ့ ကိစ္စက မင်းလက်ချက်ပေါ့ ဟုတ်လား"

"လင်းဖုန်း... မင်းက ငါ့အသံကို အခုထိ မှတ်မိနေသေးတာပဲ၊ ငါက မင်း မေ့သွားပြီ ထင်နေတာ! မနေ့တုန်းက ငါ အဲ့ဒီ ဒုက္ခိတကောင်ဆီ ဖုန်းဆက်တဲ့အချိန်မှာ ပြောခဲ့တဲ့ စကားကို မင်း မှတ်မိသေးလား။ မင်း ငါ့ကို လာပြီး ဆွရဲတယ်ဆိုရင် သေချာပေါက် ကောင်းမွန်တဲ့ အဆုံးသတ် ရှိလာမှာ မဟုတ်ဘူးလို့!"

လင်းဖုန်း၏ မျက်နှာအမူအရာက တကယ့်ကို အေးစက်တည်တင်းနေခဲ့သည်— "မင်း အဓိက ဘာကို လိုချင်နေတာလဲ"

"ငါ ဘာကို လိုချင်တာလဲလို့ မေးတယ် ဟုတ်လား။ တကယ်လို့ မင်းအနေနဲ့ ငါ့လက်ထဲက ဒီလူနှစ်ယောက်ကို ဘာအန္တရာယ်မှ မဖြစ်စေချင်ဘူးဆိုရင် အဲ့ဒီ ဒုက္ခိတကောင်နဲ့ ငါ့ကို အနိုင်ကျင့်ပါတယ်ဆိုပြီး အွန်လိုင်းပေါ်မှာ ဟောင်နေတဲ့ ခွေးတွေအားလုံးကို အမြန်ဆုံး ပြန်ပြီး ရှင်းလင်းချက်ထုတ်ခိုင်းလိုက်စမ်း! အခုအချိန်မှာ မင်းက ငါ့စကားကိုပဲ နားထောင်ရမယ်။ တကယ်လို့ မင်းသာ နားမထောင်ဘူးဆိုရင် ငါ့ရဲ့ လက်အောက်ငယ်သားတွေက အဲ့ဒီမိန်းမကို ဘာတွေ လုပ်ပစ်မလဲဆိုတာ ငါ ကိုယ်တိုင်တောင် အာမခံချက် မပေးနိုင်ဘူးနော်! ဟားဟားဟားဟား..."

"မင်းသာ တစ်ခုခု ရူးရူးမိုက်မိုက် လုပ်ရဲရင် သေရင်တောင် ကောင်းကောင်း သေရမှာ မဟုတ်ဘူး!"

"အမလေးလေး... မင်းက ငါ့ကို လာပြီး ခြိမ်းခြောက်နေတာလား။ ငါ အရမ်း ကြောက်သွားတာပဲ~ ငါ အခု အရမ်း ကြောက်နေရလို့ စိတ်ထဲက ဒေါသတွေအားလုံးကို အဲ့ဒီမိန်းမပေါ်မှာပဲ ပုံချပြီး ပျော်ပါးပစ်လိုက်တော့မယ်။ ပြီးတော့ မင်း စိတ်မပူပါနဲ့၊ အခုလိုမျိုး ကောင်းမွန်တဲ့ အရာတွေကို မင်းကိုလည်း မျှဝေပေးဖို့ ငါ မမေ့ပါဘူး။ ငါ မင်းအတွက် ဗီဒီယိုမှတ်တမ်း ရိုက်ကူးပြီး ပေးပို့ပေးမယ်၊ အဲ့ဒါမှ မင်းလည်း တူတူ ခံစားလို့ရမှာပေါ့!"

လျှိုရှု၏ စကားလုံးများက တကယ့်ကို ထောင်လွှားရိုင်းစိုင်းလွန်းလှသော်လည်း၊ လင်းဖုန်းအနေဖြင့် ယခုလောလောဆယ် အခြေအနေအရ သူ့ကို ဒေါသထွက်အောင် ဆွပေး၍ မဖြစ်သေးပေ။

"မင်း အမိုက်မှောင် မလုပ်စမ်းပါနဲ့။ မင်းရဲ့ စည်းကမ်းချက်တွေကို ငါ အားလုံး သဘောတူပါတယ်။ ဒါပေမဲ့ တစ်ခုပဲ ရှိတယ်၊ အဲ့ဒီလူနှစ်ယောက်စလုံး ဘာဒဏ်ရာအနာတရမှ မရှိဘဲ လုံးဝ ဥဿုံ ဘေးကင်းနေရမယ်။ တကယ်လို့ မင်းသာ အဆင်အခြင်မဲ့ လုပ်ရပ်တစ်ခုခု လုပ်လိုက်မယ်ဆိုရင် မင်း လိုချင်တဲ့အရာကိုလည်း ရမှာမဟုတ်သလို၊ ငါလည်း မကျေနပ်နိုင်ဘူး ဖြစ်သွားလိမ့်မယ်၊ ဟုတ်တယ်မလား"

ဖုန်းအခြားတစ်ဖက်က လျှိုရှု နှာခေါင်းရှုံ့လိုက်ရင်း— "သေချာတာပေါ့... အဲ့ဒါကို ငါလည်း သိတာပေါ့၊ မဟုတ်ရင် အဲ့ဒီမိန်းမကို ငါ စောစောစီးစီး အတင်းအကျပ် သိမ်းပိုက်ပစ်လိုက်ပြီပေါ့! လင်းဖုန်း... မင်း ငါ့စကားကို သေသေချာချာ နားထောင်စမ်း၊ ငါ မင်းကို အချိန် တစ်နာရီပဲ ပေးမယ်။ တကယ်လို့ တစ်နာရီအတွင်းမှာ အွန်လိုင်းပေါ်မှာ ငါ့အတွက် ပြန်လည် ရှင်းလင်းချက်ထုတ်ပေးထားတဲ့ သတင်းတွေကို မမြင်ရဘူးဆိုရင်တော့... မင်း အဲ့ဒီမိန်းမနဲ့ ငါနဲ့ကြားထဲက အချစ်ဗီဒီယိုဇာတ်လမ်းတိုလေးကိုပဲ ထိုင်ပြီး စောင့်ကြည့်ဖို့ ပြင်ထားလိုက်တော့!"

လင်းဖုန်း အသက်ကို ပြင်းပြင်းတစ်ချက် ရှူသွင်းလိုက်ရင်း— "ကောင်းပြီ!... ဒါပေမဲ့ ငါ အခု အချက်တစ်ခုကိုတော့ အတည်ပြုဖို့ လိုအပ်တယ်"

"ဘာကို အတည်ပြုချင်တာလဲ"

"မင်း ပြန်ပေးဆွဲသွားတဲ့ လူနှစ်ယောက်စလုံး အခုလောလောဆယ် ဘာအန္တရာယ်မှမရှိဘဲ ဘေးကင်းနေတယ်ဆိုတာကို အတည်ပြုချင်တာ။ ဗီဒီယိုတစ်ခု ရိုက်ကူးပြီး ငါ့ဆီ ပို့ပေးစမ်းပါ။ သူတို့ရဲ့ အခြေအနေ ဘယ်လိုရှိလဲဆိုတာ ငါ မြင်တွေ့ချင်လို့"

"ကောင်းပြီ... စောင့်နေလိုက်!"

ဖုန်းချပြီးနောက် သိပ်မကြာခင်မှာပဲ လင်းဖုန်း ဗီဒီယိုဖိုင်တစ်ခုကို လက်ခံရရှိခဲ့သည်။

ဗီဒီယိုအတွင်း၌ ချန်ရန်ချိုးနှင့် ချန်ရိဟယ်တို့နှစ်ယောက်စလုံးသည် ကျောချင်းကပ်လျက် တိုင်လုံးကြီးတစ်ခုတွင် ကြိုးများဖြင့် တင်းတင်းကျပ်ကျပ် ချည်နှောင်ခြင်း ခံထားရရှာသည်။ သူတို့၏ ဘောင်းဘီအောက်နားတွင် ဖုန်မှုန့်အချို့ ပေကျံနေသည်ကလွဲ၍ ကျန်သည့်နေရာများတွင် ဒဏ်ရာအနာတရ မရှိကြဘဲ နှိပ်စက်ညှင်းပန်းခံထားရသည့် အရိပ်အယောင်လည်း မတွေ့ရပေ။

ဗီဒီယိုကို ကြည့်ရှုပြီးနောက် လင်းဖုန်းသည် သူ၏ လုံခြုံရေးကုမ္ပဏီ အကြီးအကဲဖြစ်သူ 'လီဟွိုင်း' ဆီသို့ ချက်ချင်း ဆက်သွယ်လိုက်တော့သည်။

"လင်းဒါရိုက်တာကြီး... ကျွန်တော် လီဟွိုင်း ပါ။ အခုအချိန်ကစပြီး ဒါရိုက်တာကြီးရဲ့ လုံခြုံရေး အဝဝကို ကျွန်တော်တို့အဖွဲ့ကပဲ တာဝန်ယူ စောင့်ရှောက်ပေးသွားပါ့မယ်!"

လင်းဖုန်း အပိုစကားများ ပြောမနေဘဲ တိုက်ရိုက်အချက်သို့ ဝင်လိုက်သည်— "ငါ မင်းဆီကို အခု ဗီဒီယိုတစ်ခု ပို့ပေးလိုက်မယ်။ မင်း အဲ့ဒီဗီဒီယိုရဲ့ နောက်ခံ မြင်ကွင်းတွေကို ကြည့်ပြီး သူတို့ ရှိနေတဲ့ တိကျတဲ့ တည်နေရာကို ရှာဖွေပေးနိုင်မလား"

"သီအိုရီအရဆိုရင်တော့ ဗီဒီယိုထဲမှာ ထူးခြားထင်ရှားတဲ့ နောက်ခံအဆောက်အအုံ သို့မဟုတ် အမှတ်အသားတွေ လုံလုံလောက်လောက် ရှိနေမယ်ဆိုရင် ရှာဖွေနိုင်စွမ်း ရှိပါတယ်၊ ဒါပေမဲ့ လုံလောက်တဲ့ အချိန်တစ်ခုတော့ လိုအပ်ပါလိမ့်မယ်!"

"မင်းတို့ ချီကျိုးမြို့ ဧရိယာအတွင်းမှာတင် ရှာဖွေရုံပဲ။ ငါ ဗီဒီယို ပို့လိုက်ပြီ။ ဘယ်လောက်အထိ အချိန်ကြာမလဲဆိုတာ ကြည့်ပေးစမ်းပါ။ အခု အခြေအနေက အရမ်းကို စိုးရိမ်ရတယ်၊ တကယ်လို့ အချိန် တစ်နာရီထက် ကျော်လွန်သွားမယ်ဆိုရင် ကိစ္စရပ်တွေအားလုံးက ကိုင်တွယ်ရ ခက်ခဲသွားလိမ့်မယ်!"

"လင်းဒါရိုက်တာကြီး ခဏလောက် စောင့်ပေးပါဦး။ ကျွန်တော်နဲ့ ညီအစ်ကိုတွေ အမြန်ဆုံး စစ်ဆေးကြည့်လိုက်ပါ့မယ်"

ဆယ်မိနစ်ခန့် ကြာမြင့်ပြီးနောက် ဖုန်းအခြားတစ်ဖက်ကနေ လီဟွိုင်း၏ အသံကြီး ထပ်မံ ထွက်ပေါ်လာခဲ့တော့သည်။

"လင်းဒါရိုက်တာကြီး... ကျွန်တော်တို့ ရှာဖွေမှုကို ချီကျိုးမြို့ ဧရိယာအတွင်းမှာပဲ ကန့်သတ်ပြီး ရှာဖွေလိုက်တာမို့လို့ ခြေရာခံဖို့က ပိုပြီးတော့ အဆင်ပြေသွားပါတယ်။ အစောပိုင်း သုံးဖက်မြင် တည်နေရာ တွက်ချက်မှုတွေအရဆိုရင် အခု ပြန်ပေးဆွဲခံထားရသူတွေ ရှိနိုင်တဲ့ ပစ်မှတ် တည်နေရာ သုံးခုအထိကို တို့တွေ ကျဉ်းမြောင်းပစ်လိုက်နိုင်ပါပြီ !”