အခန်း ၄၈။ ငါ့ကို ကခိုင်းတာလား... လုံးဝမဖြစ်နိုင်ဘူး

စကားသံ ဆုံးသွားသည်နှင့် တစ်ပြိုင်နက် ပိုင်ရင်းရှို့၏ အခန်းတံခါး ပွင့်ဟသွားရာ လင်းဖုန်းနှင့် လိုက်ဖ်လွှင့်ခန်းအတွင်းရှိ အခြားသော ပရိသတ်များအားလုံး ပါးစပ်အဟောင်းသား ဖြစ်သွားကြရတော့တယ်။ ဘာလို့လဲဆိုတော့ တံခါးကို တွန်းဖွင့်ပြီး ဝင်လာသူက နောက်ထပ် ပိုင်ရင်းရှို့တစ်ယောက် ဖြစ်နေသောကြောင့်ပင်!

အခန်းတံခါး ပွင့်သွားသည့်အခါ ပိုင်ရင်းရှို့ လန့်ဖျန့်သွားပြီး သူမ၏ စစ်တပ်သုံး လက်ဝှေ့ကွက် လှုပ်ရှားမှုများလည်း တန့်သွားခဲ့ရတယ်။

"အစ်မ? အစ်မက ဘယ်လိုလုပ် ဝင်လာတာလဲ။ ညီမက... ညီမက..."

ဒီဇာတ်ကောင်အသစ် 'ပိုင်ရင်းရှို့' (အစ်မဖြစ်သူ) က ညအိပ်ဝတ်စုံကို ဝတ်ဆင်ထားတယ်။ သူမ၏ ဝတ်ဆင်ပုံက ပေါ့ပေါ့ပါးပါး ရှိလှသော်လည်း ပိုင်ရင်းရှို့နှင့် ပုံစံတူ ထွက်လာသည့် သူမ၏ ထူးခြားလှပသော ရုပ်ရည်ကိုမူ အနည်းငယ်မျှ ထိခိုက်ခြင်း မရှိပေ။

သူမက ပိုင်ရင်းရှို့နှင့် တစ်ပုံစံတည်း တူရုံတင်မကဘဲ အရပ်အမောင်းနှင့် သူမ၏ ပြားချပ်နေသော ရင်အုပ်အချိုးအစားကအစ ခွဲမရအောင် တူညီနေတာ ဖြစ်တယ်။ တကယ်လို့ သူတို့နှစ်ဦး၏ အသံနေအသံထား အနည်းငယ် ကွဲပြားမှုကိုသာ သတိမပြုမိပါက မည်သူမဆို ဤလူသစ်အား ပိုင်ရင်းရှို့၏ ကလုန်း ဟု ထင်မှတ်မှားကြပေလိမ့်မည်။

အခန်းထဲ ဝင်လာသူကတော့ အခြားသူမဟုတ်ဘဲ ပိုင်ရင်းရှို့၏ အမြွာအစ်မဖြစ်သူ 'ပိုင်ရင်းခဲ' ပင် ဖြစ်တော့တယ်။

ပိုင်ရင်းခဲက စုစုစပ်စပ်ဖြင့် ခေါင်းလေးပြူကာ အခန်းထဲ လှမ်းဝင်လာပြီး ပိုင်ရင်းရှို့၏ အနားသို့ လျှောက်လာခဲ့တယ်။

"နင် ဒီထဲမှာ ဘာတွေ လုပ်နေတာလဲ။ ငါ အပြင်ကနေ နားထောင်နေတာ ကြာပြီ။ နင့်ဘာသာနင် တိုးတိုးတိုးတိုးနဲ့ ဘယ်သူနဲ့ စကားပြောနေတာလဲ။ နင်... ဒါ လိုက်ဖ်လွှင့်နေတာလား။ နင် တရားမဝင်တဲ့ အလုပ်တွေ ဘာတွေ လုပ်နေတာတော့ မဟုတ်ပါဘူးနော်"

"အစ်မကလည်း... ဒါက တရားဝင် လိုက်ဖ်လွှင့်တဲ့ အခန်းပါနော်။ အစ်မ ညဘက်ကျရင် စောင်ခြုံထဲမှာ ခိုးခိုးကြည့်တတ်တဲ့ အရာမျိုး မဟုတ်ပါဘူး"

ပိုင်ရင်းခဲ ချက်ချင်းပဲ ပြာယာခတ်သွားပြီး - "နင် ဘာတွေ လျှောက်ပြောနေတာလဲ။ ငါက ဘယ်တုန်းက ကြောင်ဗီဒီယို (ညစ်ညမ်းဗီဒီယို) တွေ လိုက်ကြည့်လို့လဲ။ ဒါက တမင်သက်သက် နာမည်ဖျက်တာပဲ!"

"တွေ့လား... အစ်မကတော့ ကိုယ့်ဘာသာကိုယ် ဝန်ခံလိုက်ပြီပဲ။ ဘာကြည့်လဲဆိုတာကိုပါ တန်းပြောတာပဲဥစ္စာ!"

ပိုင်ရင်းခဲ : "..."

အမြွာညီအစ်မနှစ်ယောက် စကားနိုင်လုနေကြစဉ်မှာတော့ သူတို့နှစ်ဦးစလုံး လက်ရှိ လိုက်ဖ်လွှင့်နေဆဲ ဖြစ်သည်ကို လုံးဝ မေ့လျော့နေခဲ့ကြတယ်။

လိုက်ဖ်ခန်းအတွင်းရှိ ပရိသတ်များကမူ တစ်ပုံစံတည်း တူညီလှသော အမြွာညီအစ်မနှစ်ယောက်ကို မြင်လိုက်ရသည့်အခါ ချက်ချင်းပင် အုတ်အော်သောင်းနင်း ဖြစ်သွားကြတော့တယ်။

နတ်ဆိုးကြီး တျောက်ချန်း : "ဒါက ပျော်ရွှင်မှု နှစ်ဆတိုးတာမျိုး မလား။ အကြိုက်ဆုံးပဲ!"

အဆိပ်အတောက် အီးထုပ် : "အမြွာပန်းလေးတွေပါလား! ဒါက ငါ ရုပ်ရှင်ကြည့်ရင် အကြိုက်ဆုံး အမျိုးအစားပဲဟေ့!"

စကားတစ်ခွန်း ပြောပြီးရင် ကားမောင်းမယ် : "မင်းပြောတဲ့ ရုပ်ရှင်က တရားဝင် ရုပ်ရှင်ကော ဟုတ်ရဲ့လား"

အဆိပ်အတောက် အီးထုပ် : "ဒါက တရားဝင်လား၊ မဝင်ဘူးလားဆိုတာ အဓိက မဟုတ်ဘူးကွ။ ဒါက ကုန်ကျစရိတ် အနည်းဆုံးနဲ့ ရိုက်ကူးထားတဲ့ ရုပ်ရှင်အမျိုးအစားမျိုးလေ။ ရုပ်ရှင်တစ်ကားလုံးမှာ သရုပ်ဆောင် သုံးယောက်နဲ့ အခန်းတစ်ခန်းပဲ လိုအပ်ပြီး မင်းအနေနဲ့ သရုပ်ဆောင် နှစ်ယောက်စာ လစာပဲ ပေးဖို့လိုတယ်၊ ဘာလို့လဲဆိုတော့ အဲဒီလို ရုပ်ရှင်မျိုးမှာ သရုပ်ဆောင်ချင်တဲ့ မင်းသားတွေက ပါဝင်ခွင့်ရဖို့အတွက် ပိုက်ဆံပြန်ပေးပြီး ရိုက်ရလို့ပဲဥစ္စာ!"

ထိပ်ပြောင်တဲ့လူက အမြဲတမ်း တောက်ပနေမှာပဲ : "ငါက ငါ့သူငယ်ချင်းအတွက် ကိုယ်စား မေးပေးတာပါနော်၊ မင်းပြောတဲ့ ရိုးရှင်းတဲ့ အခန်းအပြင်အဆင်နဲ့ ရုပ်ရှင်မျိုးမှာ မင်းသားတွေ ထပ်လိုသေးလားဟင်။ ငါ... အော် မှားလို့၊ ငါ့သူငယ်ချင်းက မစောင့်နိုင်တော့လို့ပါ။ သူ ဒီရက်ပိုင်း သရုပ်ဆောင်ချင်စိတ်တွေ အရမ်း ထကြွနေလို့ပါဗျာ!"

အီးပေါက်တတ်တဲ့ မိန်းမလှလေး : "ဟေး... ဟေး... ဟေး၊ နင်တို့တွေ အဓိက အချက်ကို လွဲနေကြပြီ ထင်တယ်။ အဓိက အချက်က ထိုညီမလေး ပြောသွားတဲ့ စောင်ခြုံထဲက ခိုးကြည့်တဲ့ လိုက်ဖ်ဆိုတာကြီး မလား။ ငါ့သူငယ်ချင်းတစ်ယောက်က အဲဒီလင့်ခ်လေး လိုချင်လို့ပါတဲ့ရှင်"

ငါ့ခြေထောက်က ပိုပိုပြီး မွှေးလာတယ် : "အပေါ်ကအတိုင်းပဲ၊ နောက်တစ်ယောက် တိုး!"

ရင်သားနဲ့ ညှပ်စားတဲ့ မုန့်လေး : "အပေါ်ကအတိုင်းပဲ၊ နောက်တစ်ယောက် တိုး!"

...

ပိုင်ရင်းရှို့နှင့် ပိုင်ရင်းခဲတို့ သတိဝင်လာသည့် အချိန်မှာတော့ ကွန်မန့်ကဏ္ဍတစ်ခုလုံး 99+ ဖြစ်နေခဲ့ပြီဖြစ်ပြီး လိုက်ဖ်ခန်းအတွင်းရှိ လူဦးရေမှာလည်း စံချိန်သစ်တစ်ခုကို ထပ်မံချိုးဖျက်ကာ လူဦးရေ လေးသိန်းကျော် (400,000+) အထိ ရောက်ရှိသွားခဲ့ပြီ ဖြစ်တယ်။

ဒီနေရာမှာ သိထားရမှာက လိုက်ဖ်ခန်းအတွင်းရှိ လူဦးရေဆိုသည်မှာ အချို့သော Streamer များ၏ ဖော်လိုဝါ အရေအတွက်ကဲ့သို့ အဆမတန် ဖောင်းပွအောင် လုပ်ထား၍ မရခြင်းပင်။ လိုက်ဖ်ခန်းထဲတွင် ရှိနေသူတိုင်းမှာ အကောင့်အစစ်အမှန် လူသားများ ဖြစ်ကြတယ်။ ပုံမှန်အားဖြင့် ဖော်လိုဝါ သန်းချီရှိသော Streamer အကြီးကြီးများပင် လိုက်ဖ်တစ်ခုတွင် လူဦးရေ လေးသိန်းအထိ တိုက်ရိုက် ကြည့်ရှုအောင် မစွမ်းဆောင်နိုင်ကြပေ။

အနည်းဆုံး ဖော်လိုဝါ သန်းဆယ်ချီ ရှိမှသာ အခုလိုမျိုး အားပေးမည့် ပရိသတ် အရေအတွက်ကို ရရှိနိုင်တာ ဖြစ်တယ်။

အမြွာညီအစ်မနှစ်ယောက်ကို မြင်လိုက်ရပြီးနောက် အနည်းငယ် အိပ်ချင်မူးတူး ဖြစ်နေသော လင်းဖုန်းမှာလည်း ချက်ချင်းပင် စိတ်လှုပ်ရှားကာ မျက်လုံးပွင့်သွားခဲ့ရတယ်။

နတ်ဆိုးကြီး တျောက်ချန်း : "ညီအစ်မနှစ်ယောက် တူတူ တွဲကပြရင် ဘယ်လိုလဲဟင်"

လင်းဖုန်းသည် ပိုင်ရင်းရှို့၏ လိုက်ဖ်ခန်းတွင် လက်ဆောင်များ ပေးလွန်း၍ သူ၏ လယ်ဗယ်မှာ ၅၀ နီးပါးအထိ တက်လှမ်းသွားခဲ့ပြီ ဖြစ်တယ်။ ထို့ကြောင့် သူ ပေးပို့လိုက်သည့် ကွန်မန့်တိုင်းမှာ အပေါ်ဆုံးတွင် နှစ်မိနစ်ခန့်အထိ တပ်ဆင်ထားပေးသည့်အပြင် အထူးအကျိုးသက်ရောက်မှု များပါ ပါဝင်နေသဖြင့် မည်သူမျှ မျက်ကွယ်ပြု၍ မရနိုင်ပေ။

အကြောင်းပြချက်ကို မမေးပါနှင့်၊ ဒါက ငွေကြေး၏ စွမ်းပကားဟုသာ မှတ်ယူလိုက်ပါ။

ပိုင်ရင်းခဲက ပိုင်ရင်းရှို့၏ ဖုန်းမျက်နှာပြင်ကို လှမ်းကြည့်လိုက်ပြီး လင်းဖုန်း ပေးပို့ထားသည့် ကွန်မန့်ကို မြင်လိုက်ရသည့်အခါ မျက်မှောင်ကြုတ်ကာ ပိုင်ရင်းရှို့ကို ကြည့်လိုက်ရင်း - "နင် စောစောက လိုက်ဖ်ထဲမှာ ကပြနေတာလား။ ပြီးတော့ ငါ့ကိုပါ လာကခိုင်းနေတာလား။ ဘယ်လိုလုပ် ဖြစ်နိုင်မှာလဲ။ ငါ အခု ကွန်မန့်ပို့ထားတဲ့ 'တျောက်ချန်း' ဆိုတဲ့လူကို တစ်ခွန်းပဲ ပြောလိုက်မယ်၊ မင်း လူမှားနေပြီ!"

"ငါနဲ့ ငါ့ညီမက လုံးဝ မတူဘူး။ မင်း လက်ဆောင်တွေ ဘယ်လောက်ပဲ ပစ်ပေးပစ်ပေး၊ ဘယ်လောက်ပဲ များများ ငါ လုံးဝ ကမှာ မဟုတ်ဘူး! ဘယ်လိုမှ မဖြစ်နိုင်ဘူး၊ ငါ ပိုင်ရင်းခဲက အဲလိုမျိုး ပိုက်ဆံမက်တဲ့ လူစားမျိုး မဟုတ်ဘူး!"

လင်းဖုန်းတစ်ယောက် မနေနိုင်ဘဲ တဟားဟား ရယ်မောလိုက်မိတော့တယ်။

အလို ဘုရားရေ!

ဒီလိုမျိုး ရင်းနှီးနေတဲ့ ဇာတ်ကွက်ကြီးက လွန်ခဲ့တဲ့ မိနစ်အနည်းငယ်ကတင်ပဲ တစ်ခေါက် ဖြစ်ပျက်သွားခဲ့သေးတာ မလား။

ဒီညီအစ်မနှစ်ယောက်က တကယ့်ကို အမြွာတွေပဲ ဖြစ်တယ်၊ သူတို့၏ ခေါင်းမာပုံကအစ တစ်ပုံစံတည်း တူညီလွန်းလှတယ်။

သို့သော်လည်း လင်းဖုန်းက ကာနီဗယ် လက်ဆောင်ကို အသုံးပြုပြီး ပိုင်ရင်းခဲ၏ ရင်ထဲက အမှန်တရားကို ဖော်ထုတ်ပေးလိုက်ဦးမည် ဖြစ်တယ်။

ငါ့ရဲ့ တျောက်ချန်းက ငါ့ခါးပေါ်မှာ : "နင် တကယ် မကဘူးလို့ သေချာလား"

ပိုင်ရင်းခဲ နှာခေါင်းရှုံ့လိုက်ပြီး - "မင်းက တော်တော်လေး ရယ်ရတာပဲ။ ငါ မကဘူးပြောရင် မကဘူးပဲ။ တကယ်လို့ မင်းသာ ငါ့စိတ်ကို ပြောင်းလဲအောင် လုပ်နိုင်ရင် ငါ မင်းစိတ်ကြိုက် အသုံးတော်ခံမယ်။ မင်း ခိုင်းတာမှန်သမျှ အကုန်လုပ်ပေးမယ်!"

လင်းဖုန်း ကျေနပ် အားရသော အပြုံးတစ်ခုကို ပြသလိုက်ရင်း - "ငါက မင်းရဲ့ အခုလိုမျိုး မာနထောင်လွှားနေတဲ့ ပုံစံကိုပဲ လိုချင်တာ။ ကာနီဗယ် အခုတစ်ရာ ပေးပြီးတဲ့ အခါကျရင်လည်း မင်း ဒီပုံစံအတိုင်း ရှိနေဦးမယ်လို့ ငါ မျှော်လင့်ပါတယ်"

ထို့နောက် လင်းဖုန်းသည် ပိုက်ဆံများ သယ်ဆောင်လာသော သူ၏ လက်ချောင်းလေးများကို ထပ်မံ လှုပ်ရှားလိုက်ပြန်တယ်။ ရင်းနှီးနေကျ ဇာတ်ကွက်၊ ရင်းနှီးနေကျ အရသာအတိုင်းပင်!

[နတ်ဆိုးကြီး တျောက်ချန်း က ရှောင်ပိုင်၏ လိုက်ဖ်ခန်းတွင် ကာနီဗယ် လက်ဆောင် ၁၀၀ ခု ပေးပို့လိုက်ပါသည်]

လိုက်ဖ်လွှင့်ခန်းအတွင်းရှိ ပရိသတ်များမှာမူ အခုအချိန်တွင် ထုံထိုင်းသွားကြပြီ ဖြစ်တယ်။

မူလက ကာနီဗယ် အခုနှစ်ရာ ပေးပို့ခဲ့စဉ်ကတည်းက ပရိသတ်များ၏ မျှော်လင့်ချက်အဆင့်မှာ မြင့်မားသွားခဲ့သဖြင့် အချို့က ကာနီဗယ် အခုတစ်ရာကို ထူးထူးခြားခြား မဟုတ်တော့ဟုပင် ခံစားနေကြရတယ်။

ပိုင်ရင်းခဲက ဖုန်းမျက်နှာပြင်ပေါ်တွင် ဆက်တိုက် ပေါ်ထွက်နေသော လက်ဆောင် အကျိုးသက်ရောက်မှုများကို စူးစမ်းစွာ ကြည့်ရှုရင်း ဘေးနားက ပိုင်ရင်းရှို့ကို တံတောင်နှင့် အသာတို့လိုက်တယ်။

"ဒါတွေက ဘာတွေလဲဟင်။ လက်ဆောင်တွေလား"

ပိုင်ရင်းရှို့က ပိုင်ရင်းခဲကို မချိုမချဉ် အပြုံးတစ်ခုဖြင့် လှမ်းကြည့်လိုက်တယ်။ သူမ မိမိကိုယ်တိုင် စောစောက 'တကယ့်ကို မွှေးကြိုင်လှပါတယ်' ဆိုပြီး မျက်နှာပြောင်းခဲ့ရသည့် အခိုက်အတန့်ကို ပြန်လည် မြင်ယောင်ရင်း ပိုင်ရင်းခဲတစ်ယောက် မည်သို့ အရှက်ကွဲမည်ကို စောင့်ကြည့်ရန် ပြင်ဆင်လိုက်တာ ဖြစ်တယ်။

"ဟုတ်တယ်၊ ဒါက စောစောက ကွန်မန့်ပို့ထားတဲ့လူ ပစ်ပေးတဲ့ လက်ဆောင်တွေလေ။ ကာနီဗယ်လို့ ခေါ်တယ်"

"ကာနီဗယ် ဟုတ်လား။ ငါက လိုက်ဖ်တွေ သိပ်မကြည့်တော့ ဒီလက်ဆောင်တွေက ဘာကို ဆိုလိုမှန်း မသိဘူး။ နင် ငါ့ကို ရှင်းပြစမ်းပါဦး၊ ကာနီဗယ် တစ်ခုကို ဘယ်လောက် ပေးရလဲလို့။ အခု သူက တစ်ရာတောင် ပို့ထားတာဆိုတော့"

"သိပ်တော့ ဈေးမကြီးပါဘူး၊ တစ်ခုကို သုံးထောင်ပဲ" ပိုင်ရင်းရှို့ သူမ၏ ရယ်ချင်စိတ်ကို အတတ်နိုင်ဆုံး အောင့်ထားရင်း ပြောလိုက်တယ်။

"သုံးထောင် ဟုတ်လား" ပိုင်ရင်းခဲ အစပိုင်းတွင် အနည်းငယ် လန့်သွားသော်လည်း နောက်မှ တစ်ခုခုကို သတိရသွားဟန်ဖြင့် အမြန်ပဲ ပြန်လည် တည်ငြိမ်သွားခဲ့တယ် - "နင် ဆိုလိုတာက ဒူယင်းဒင်္ဂါး သုံးထောင်ကို ပြောတာမလား။ ငါ မေးတာက ဒါက တရုတ်ငွေ အစစ်နဲ့ တွက်ရင် ဘယ်လောက်တန်လဲလို့ မေးတာ"

ပိုင်ရင်းရှို့က ပိုင်ရင်းခဲကို တည်ငြိမ်စွာ ကြည့်လိုက်ရင်း - "ငါ ပြောတာက ငွေသားအစစ်နဲ့ လဲလှယ်ပြီးသား တန်ဖိုးကို ပြောတာလေ။ ကာနီဗယ် တစ်ခုကို ယွမ် သုံးထောင်!"

ပိုင်ရင်းခဲတစ်ယောက် နေရာမှာတင် ဆွံ့အ တောင့်တင်းသွားခဲ့ရပြီး သူမ၏ မျက်ဝန်းများနှင့် ပါးစပ်မှာလည်း အံ့ဩလွန်း၍ အဟောင်းသား ဖြစ်သွားခဲ့ရတော့တယ်။

"သ... သုံးထောင်၊ ကာနီဗယ် တစ်ခုကို သုံးထောင်ဆိုတော့... ဒါဆို အခုတစ်ရာဆိုရင်..."

ပိုင်ရင်းခဲ ခေါင်းမော့လိုက်ပြီး အသက်ကို ပြင်းပြင်းရှူကာ - "ယွမ် သုံးသိန်း တောင်လား!"

ပိုင်ရင်းရှို့ ခေါင်းညိတ်ပြလိုက်ရင်း - "ဟုတ်တယ်၊ ယွမ် သုံးသိန်း!"

ထိုအချိန်တွင် လင်းဖုန်းက နောက်ထပ် ကွန်မန့်တစ်ခုကို ထပ်မံ ပေးပို့လိုက်ပြန်တယ် -

နတ်ဆိုးကြီး တျောက်ချန်း : "အခုကော စိတ်ကူးပြောင်းသွားပြီလား။ ကမှာလား၊ မကဘူးလား"

ပိုင်ရင်းခဲသည် မျက်နှာပြောင်း အတတ်ပညာရှင်ကြီး တစ်ဦးကဲ့သို့ပင် ပိုင်ရင်းရှို့၏ လက်ကို ချက်ချင်း အတင်းဆွဲလိုက်ပြီး - "နင်က ဘာတွေ ငေးကြည့်နေတာလဲ။ မြန်မြန် ကလေ! ကိုကြီးကို ဒီလောက်အထိ အကြာကြီး အစောင့်မခိုင်းနဲ့လေ!"

"ပထမဆုံးလကတော့ နှစ်သစ်ကူးပါရှင်~ နှစ်သစ်ကူးရဲ့ ပထမဆုံးရက်လေးမှာ~"

"ကျွန်မတို့ရဲ့ အိမ်လေးကတော့ မြောက်လွတ်ပိုင်းက စုန့်ဟွာမြစ်ကမ်းနားမှာပါရှင်~"

"ကိုကြီးရေ... ညီမလေး ကတာ အဆင်ပြေရဲ့လားဟင်။ ညီမလေးက ကျောင်းက အကအသင်း ကပါနော်၊ ဟီးဟီး!"