အခန်း (၁၀)။ ရှင့်နောက်မှာ တစ်ယောက်ယောက် ရှိနေတယ်

လင်းမြောင်မြောင်ဆိုတာ လင်းဖန်ရဲ့ အကြီးဆုံးဦးလေးဖြစ်သူ လင်းယန် အသက် ၄၅ နှစ်အရွယ်မှာ အမှိုက်ပုံးထဲကနေ ကောက်ရခဲ့တဲ့ ကလေးတစ်ယောက်ပါ၊၊ လင်းယန်ဟာ မွေးရာပါ မျိုးမအောင်တဲ့ ဝေဒနာကြောင့် တစ်သက်လုံး အိမ်ထောင်မပြုခဲ့တဲ့သူပါ၊၊

လင်းမြောင်မြောင်ကို ကောက်ရပြီးတဲ့နောက်မှာတော့ ကလေးမလေးဟာ ဖျားနာနေပြီး ခွဲစိတ်ဖို့ လိုအပ်နေတာကို လင်းယန် သိလိုက်ရပါတယ်၊၊ ဒါဟာ သူမ စွန့်ပစ်ခံရတဲ့ အကြောင်းရင်းလည်း ဖြစ်နိုင်ပါတယ်၊၊ ဒါကြောင့် လင်းယန်ဟာ လင်းမြောင်မြောင်ရဲ့ ခွဲစိတ်မှုအတွက် သူ့ရဲ့အိမ်ကို ရောင်းချခဲ့ရပြီး ကံကောင်းစွာနဲ့ပဲ ခွဲစိတ်မှုဟာ အောင်မြင်ခဲ့ပါတယ်၊၊

စွန့်ပစ်ခံရစဉ်က လင်းမြောင်မြောင်ဟာ ၄ နှစ်တောင် မပြည့်သေးပေမဲ့ အရာရာကို စတင်မှတ်မိနေပြီဖြစ်လို့ သူမဟာ သူမရဲ့ ဘဝမှန်ကို အမြဲတမ်း သိနေခဲ့ပါတယ်၊၊ ဒါပေမဲ့ ကောင်းသောနေ့ရက်တွေက ကြာရှည်မခံခဲ့ပါဘူး၊၊ လင်းမြောင်မြောင် အသက် ၁၀ နှစ်အရွယ်မှာ လင်းယန်ဟာ ကားအက်စီးဒင့်နဲ့ ဆုံးပါးသွားခဲ့ပါတယ်၊၊

အဲဒီနှစ်မှာ လင်းဖန်က အသက် ၇ နှစ်ပဲ ရှိပါသေးတယ်၊၊

အဲဒီအချိန်ကစပြီး လင်းမြောင်မြောင်ဟာ လင်းဖန်တို့ မိသားစုဝင်တစ်ယောက် ဖြစ်လာခဲ့ပါတယ်၊၊ လင်းဖန်က ၇ နှစ်၊ လင်းမြောင်မြောင်က ၁၀ နှစ်နဲ့ သူတို့နှစ်ယောက်ဟာ ၈ နှစ်ကြာ အတူတူ နေထိုင်ခဲ့ကြပါတယ်၊၊ ဒီ ၈ နှစ်တာအတွင်းမှာ လင်းမြောင်မြောင်ဟာ သဘောကောင်းတဲ့ အစ်မကြီးတစ်ယောက်လို လင်းဖန်ကို အရမ်းအလိုလိုက်ခဲ့ပါတယ်၊၊

သွေးသားမတော်စပ်ပေမဲ့ သူတို့ရဲ့ ဆက်ဆံရေးဟာ သာမန်မောင်နှမတွေထက်တောင် ပိုပြီး နက်ရှိုင်းပါတယ်၊၊ လင်းထျန်းယာနဲ့ ဂျန်ယွီတို့ကလည်း လင်းမြောင်မြောင်ဟာ သူတို့ရဲ့ ရင်းချာမဟုတ်လို့ဆိုပြီး ခွဲခြားဆက်ဆံတာမျိုး မရှိဘဲ သမီးအရင်းလိုပဲ ကောင်းကောင်းမွန်မွန် ဆက်ဆံခဲ့ကြတာကြောင့် မိသားစုဆက်ဆံရေးဟာ အရမ်းကို သာယာလှပါတယ်၊၊

လင်းမြောင်မြောင်ကတော့ သူမနဲ့ လင်းဖန်ဟာ ဒီလိုပဲ တစ်သက်လုံး အတူတူ နေသွားရမယ်လို့ ထင်ထားခဲ့ပေမဲ့ သူမ တက္ကသိုလ်ဝင်ခွင့်စာမေးပွဲ ဖြေတဲ့နှစ်မှာတော့ အပြောင်းအလဲတစ်ခု ဖြစ်ပေါ်ခဲ့ပါတယ်၊၊

စာမေးပွဲဖြေပြီးတဲ့နောက် လူတစ်စု လင်းဖန်တို့အိမ်ကို ရောက်လာခဲ့ကြပါတယ်၊၊ အဲဒီလူတွေက သူတို့ဟာ လင်းမြောင်မြောင်ရဲ့ မိဘအရင်းတွေဖြစ်ပြီး သူမကို ပြန်လာခေါ်တာလို့ ပြောကြပါတယ်၊၊ တကယ်တော့ လင်းမြောင်မြောင်ကို စွန့်ပစ်ခဲ့တာက သူမရဲ့ အဘွားဖြစ်သူပါ၊၊ မိဘတွေကတော့ အဲဒါကို မသိဘဲ ကလေးပျောက်သွားတယ်အောက်မေ့ပြီး ဒီနှစ်တွေအထိ လိုက်ရှာနေခဲ့ကြတာပါ၊၊

လင်းမြောင်မြောင်ရဲ့ အဘွားအရင်း သေခါနီးမှပဲ အမှန်တရားကို ဖွင့်ပြောခဲ့တာဖြစ်ပါတယ်၊၊ နောက်ဆုံးမှာတော့ နှစ်ဖက်မိဘတွေ ဆွေးနွေးပြီးတဲ့နောက် လင်းမြောင်မြောင်ဟာ သူမရဲ့ မိဘအရင်းတွေဆီကို ပြန်သွားဖို့ ဆုံးဖြတ်ခဲ့ပါတယ်၊၊ ဒါပေမဲ့ လင်းမြောင်မြောင်ဟာ အရွယ်ရောက်ပြီးသူ ဖြစ်တာကြောင့် မိဘအရင်းတွေက သူမကို လင်းဖန်တို့ဆီ ပြန်လာတာကိုတော့ တားဆီးလို့ မရပါဘူး၊၊

ခွဲခွာရမယ့်အချိန်မှာ လင်းဖန်ကတော့ သူမကို လုံးဝ မလွှတ်ချင်ခဲ့ပါဘူး၊၊ နှုတ်ဆက်တဲ့အချိန်မှာ လင်းမြောင်မြောင်က လင်းဖန်ရဲ့ နားနားကို ကပ်ပြီး အချိန်ရတာနဲ့ သူရှိရာကို မဖြစ်ဖြစ်အောင် ပြန်လာခဲ့မယ်လို့ ကတိပေးခဲ့ပါတယ်၊၊

လင်းမြောင်မြောင်ဟာ သူမရဲ့ ကတိအတိုင်း ပျမ်းမျှအားဖြင့် ၂ လ တစ်ကြိမ် အိမ်ကို ပြန်လာတတ်ပါတယ်၊၊ လင်းဖန် တက္ကသိုလ်တက်တဲ့အခါမှာလည်း သူမဟာ နွေရာသီနဲ့ ဆောင်းရာသီ ကျောင်းပိတ်ရက်တိုင်းမှာ လင်းဖန်နဲ့ အတူရှိပေးဖို့ အိမ်မှာ လာနေတတ်ပါတယ်၊၊

လင်းဖန်ရဲ့ စိတ်ထဲမှာတော့ လင်းမြောင်မြောင်ကို တစ်သက်လုံး မိသားစုဝင်အဖြစ် သတ်မှတ်ထားပြီးသားပါ၊၊ ဒါကြောင့် ဂျန်ယွီက လင်းမြောင်မြောင် ဒီနေ့ ပြန်လာမယ်လို့ ပြောလိုက်တဲ့အခါ လင်းဖန် ဒီလောက်အထိ ပျော်ရွှင်သွားရတာ ဖြစ်ပါတယ်၊၊

လောလောဆယ်မှာတော့ လင်းမြောင်မြောင်က အလုပ်တွေ အရမ်းများနေတာကြောင့် အိမ်မပြန်ဖြစ်တာ လအနည်းငယ်လောက် ရှိနေပါပြီ၊၊ သူမ နောက်ဆုံးအကြိမ် အိမ်ပြန်လာခဲ့တာက နှစ်သစ်ကူးတုန်းကပါ၊၊

လင်းဖန် ဖုန်းချလိုက်ပြီးတဲ့နောက်မှာတော့ သူ့ဖုန်းထဲမှာ ပါဆယ်ရောက်ကြောင်း အကြောင်းကြားစာတွေနဲ့ လင်းမြောင်မြောင်ဆီက ပေးပို့ထားတဲ့ စာတို အများကြီး ရောက်နေတာကို သတိပြုမိလိုက်ပါတယ်၊၊

“ရှောင်ဖုန်း၊ အမ ဒီနေ့ ပြန်လာမယ်၊၊ အိမ်မှာ လိမ်လိမ်မာမာနဲ့ စောင့်နေနော်၊၊”

လင်းဖန်က ချက်ချင်းပဲ ပြန်စာပို့လိုက်ပါတယ် - “ပြန်လာမှာကို စောင့်နေမယ်၊၊ အခုပဲ အမေ့အတွက် အိပ်ရာ သွားပြင်ပေးထားမယ်၊၊ တကယ်တော့ အမေက အဲဒီအိပ်ရာမှာ အိပ်မှာလည်း မဟုတ်ပါဘူး၊၊ ညသန်းခေါင်ယံရောက်ရင် ကျွန်တော့်အခန်းထဲပဲ အမြဲလာအိပ်တာပဲကို၊၊”

စာပို့ပြီးနောက် လင်းဖန်ဟာ ဖုန်းကို ဘေးချထားလိုက်ပြီး အဝတ်အစားလဲကာ ကိုယ်လက်ဆန့်လိုက်ပါတယ်၊၊

မနေ့က အလုပ်တွေ အချိန်ပိုလုပ်ခဲ့ရတာကြောင့် လျူရှင်းကတော့ အခုထိ မနိုးသေးပါဘူး၊၊ လင်းဖန်က သူအိမ်ပြန်သွားပြီဖြစ်ကြောင်း၊ မနေ့က သူမ တကယ်ကို ကြိုးစားပမ်းစား အလုပ်လုပ်ခဲ့ကြောင်းနဲ့ သူမ အလိုရှိတဲ့အချိန်မှ အလုပ်ပြန်တက်ဖို့ ရက်အနည်းငယ် အားလပ်ရက်ပေးထားကြောင်း စာလေးတစ်စောင် ရေးထားခဲ့ပါတယ်၊၊

စာရေးပြီးတဲ့နောက်မှာတော့ လင်းဖန်က အာ‌ဂျောင်းကို ဖုန်းဆက်ပြီး လျူရှင်းကို ဂရုစိုက်ပေးဖို့ မှာကြားခဲ့ပါတယ်၊၊ အဲဒီနောက်မှာတော့ အိမ်ပြန်ဖို့အတွက် ဓာတ်လှေကားနဲ့ ဆင်းလာခဲ့ပါတယ်၊၊

ဓာတ်လှေကားထဲမှာ ရှိနေတုန်း လင်းဖန်က သူ့ရဲ့ နေ့စဉ်လုပ်ရိုးလုပ်စဉ်ဖြစ်တဲ့ ‘ချက်အင်’ (Check-in) ကို လုပ်လိုက်ပါတယ်၊၊

“ချက်အင်၊၊”

“ဒေါင်၊ ချက်အင် အောင်မြင်ပါတယ်၊၊ ပိုင်ရှင်ကို ဂုဏ်ပြုပါတယ်၊၊ ပိုင်ရှင်ဟာ ကမ္ဘာပေါ်မှာ အကန့်အသတ်နဲ့သာ ထုတ်လုပ်ထားတဲ့၊ အမေရိကန်ဒေါ်လာ ၁၆ သန်း (တရုတ်ယွမ် သန်း ၁၀၀ ခန့်) တန်ကြေးရှိတဲ့ ပါဂါနီ ဇွန်ဒါ ထရိုင်ကိုလိုရီ (Pagani Zonda Tricolore) တစ်စီးကို လက်ဆောင်ရရှိပါတယ်၊၊”

“အဆိုပါ ယာဉ်ကို ဟွာရုံအဆောက်အအုံရဲ့ မြေအောက်ကားပါကင်မှာ ရပ်နားထားပေးပြီး ဖြစ်ပါတယ်၊၊ ကားသော့ကိုတော့ ပိုင်ရှင်ရဲ့ အိတ်ကပ်ထဲမှာ ထည့်ပေးထားပါတယ်၊၊ ပိုင်ရှင် အနေနဲ့ ကားမောင်းတဲ့အခါ ပိုမိုကောင်းမွန်တဲ့ အတွေ့အကြုံ ရရှိစေဖို့အတွက် ဆရာကြီးအဆင့် မောင်းနှင်မှု အတတ်ပညာကိုပါ ထပ်ဆောင်း လက်ဆောင်ပေးအပ်လိုက်ပါတယ်၊၊”

လင်းဖန်က မျက်ခုံးတစ်ချက် ပင့်လိုက်ပြီး “pagani ကားလား၊၊ သိန်းတစ်ထောင်ကျော် တန်တာပေါ့၊၊ မဆိုးပါဘူး၊၊ တကယ်တော့ နတ်ဘုရားအဆင့် သူဌေးကြီးတစ်ယောက်အနေနဲ့ သင့်တော်တဲ့ ကားတစ်စီး မရှိတာက တကယ်ကို မသင့်တော်ဘူးလေ၊၊ အခုတော့ အားလုံး ပြည့်စုံသွားပြီပေါ့၊၊”

လင်းဖန်ဟာ ဓာတ်လှေကားနဲ့ မြေအောက်ကားပါကင်ကို တိုက်ရိုက် ဆင်းသွားပါတယ်၊၊ ဓာတ်လှေကားထဲက ထွက်လိုက်တာနဲ့ အပြာနုရောင်ရှိတဲ့ အဲဒီ သားရဲကြီးဟာ အဝေးကနေတောင် တောက်ပနေတာကို လင်းဖန် မြင်လိုက်ရပါတယ်၊၊

ဒါပေမဲ့ လင်းဖန် ကားနားကို နီးကပ်သွားတဲ့အခါမှာတော့ ကားဘေးမှာ လူတစ်ယောက် ရှိနေတာကို တွေ့လိုက်ရပါတယ်၊၊ ကြည့်ရတာတော့ လိုက်ဖ် (Live) လွှင့်နေတဲ့သူ တစ်ယောက်နဲ့ တူပါတယ်၊၊

အဲဒီ ပါဂါနီ ကားကြီးရဲ့ ဘေးမှာတော့ လိုလီ (Loli) ပုံစံ မိန်းကလေးတစ်ယောက်ဟာ လိုက်ဖ်လွှင့်တံကို ကိုင်ပြီး ဗီဒီယိုရိုက်နေတာပါ၊၊

“လိုက်ဖ်ထဲက အစ်ကိုတို့ရေ၊ ကျွန်မ ဘာတွေ့လိုက်လဲ သိကြလား၊၊ တကယ်ကို မယုံနိုင်စရာပဲ၊၊ sportကားကြီးဗျ၊၊ အရမ်းကို မိုက်တာပဲ၊၊”

“လာပါ၊ ကျွန်မ ကင်မရာကို လှည့်ပြီး ပြပေးမယ်နော်၊၊”

ပိုင်ယင်းရော့ဟာ လိုက်ဖ်ကြည့်သူ နှစ်ရာကျော်လောက်ပဲရှိတဲ့ လိုက်ဖ်လွှင့်သူ အငယ်စားလေး တစ်ယောက်ပါ၊၊ သာမန်ဆိုရင် မှတ်ချက် (Comment) တွေ သိပ်မရှိတတ်ပါဘူး၊၊

ဒါပေမဲ့ သူမက ရှေ့မှာရှိတဲ့ ပါဂါနီကားကြီးကို ကင်မရာနဲ့ ပြလိုက်တဲ့အခါမှာတော့ မှတ်ချက်တွေက ချက်ချင်းပဲ သွက်လက်လာပါတော့တယ်၊၊

“လန်လင်းသူဌေးလေး - အမလေး၊ ဇိမ်ခံကားကြီးပါလား၊၊ အဲဒါလေး ကျွန်တော့်ကို တစ်စီးလောက် ပေးလို့ရမလား၊ ကျွန်တော်က ကျောင်းသားလေးပါ၊၊”

“ဟင်းလင်းပြင်သမီးတော် - အပေါ်ကလူ၊ ကျောင်းသားမပြောနဲ့၊ နင်က တိရစ္ဆာန်ဖြစ်နေရင်တောင် အဲဒါကို ရမှာမဟုတ်ဘူး၊၊”

“အဆိပ်ဗုံး - လိုက်ဖ်ထဲမှာ အသိပညာရှိတဲ့သူတွေ ရှိလားဟင်၊၊ ဒါက ဘယ်လိုကားမျိုးလဲဆိုတာ သိကြလား၊၊ ကျွန်မရဲ့ တစ်လ လစာ သုံးထောင်နဲ့ဆိုရင် အဲဒါကို ဝယ်နိုင်ဖို့ ဘယ်လောက်ကြာမလဲ၊၊”

“အမှောင်ထဲမှာ လေမလည်တတ်တဲ့ လူရိုး - အပေါ်ကလူ စိတ်မပူပါနဲ့၊၊ မင်းလစာနဲ့ဆိုရင် ငတ်မသေဖို့ပဲ အရင်ပူပါ၊ ဒါမှမဟုတ် ရည်မှန်းချက်သေးသေးလေး ထားပြီး ကောင်းကင်ဘုံဆီကနေ နောက်ထပ် သက်တမ်း အနှစ်ငါးရာလောက် ချေးငှားလိုက်ပါဦး၊၊”

“ကမ္ဘာ့နံပါတ်တစ် အရာရာသိ - အနှစ်ငါးရာက မလောက်သေးဘူး၊၊ အရာရာသိ ရောက်လာပြီ၊ ကျွန်တော့်ကို အပေါ်ရောက်အောင် မြန်မြန်ပို့ပေးကြပါဦး၊၊ ကျွန်တော် ကြည့်တာ မမှားဘူးဆိုရင်တော့ လိုက်ဖ်လွှင့်တဲ့သူရဲ့ ရှေ့ကကားဟာ ကမ္ဘာပေါ်မှာ သုံးစီးပဲရှိတဲ့ ပါဂါနီ ဇွန်ဒါ ထရိုင်ကိုလိုရီ (Pagani Zonda Tricolore) ပါပဲ၊၊”

“အရှက်မရှိတဲ့ စာလုံးရေဖြည့် စာရေးဆရာ - ဒီကားရဲ့ ဈေးနှုန်းက အမေရိကန်ဒေါ်လာ ၁၆ သန်း ရှိပါတယ်၊၊ ဒါဟာ ယွမ်သန်း ၁၀၀ နဲ့ ညီမျှပါတယ်၊၊ ခုနက အဆိပ်ဗုံးဆိုတဲ့ အစ်ကိုကြီး၊ ခင်ဗျား တစ်လ သုံးထောင်၊ တစ်နှစ် သုံးသောင်းခြောက်ထောင် ရမယ်ဆိုရင် အနှစ် ၂၇၇၇ လောက် ကြိုးစားရင်တော့ ဝယ်နိုင်ပါလိမ့်မယ်၊၊”

“အသားညှပ် မုန့် - အမလေး၊ အနှစ် ၂၇၇၇ တဲ့၊၊ ချင်ရှီဟွမ် (Qin Shi Huang) ရဲ့ အဘိုးတောင် မမွေးသေးဘူး၊ ခင်ဗျားက အလုပ် စလုပ်နေရတော့မှာ၊၊”

“ကမ္ဘာ့နံပါတ်တစ် အရာရာသိ - ဒီပါဂါနီက ဈေးကြီးတယ်ဆိုပေမဲ့ သူ့ရဲ့ စွမ်းဆောင်ရည်နဲ့ တန်ဖိုးကတော့ အဲဒီဈေးနဲ့ လုံးဝကို ထိုက်တန်ပါတယ်၊၊ သူက အေအမ်ဂျီ ၇.၃ လီတာ (AMG 7.3 L V12) အင်ဂျင်ကို သုံးထားပြီး တစ်နာရီ ကီလိုမီတာ ၁၀၀ နှုန်းကို ၃.၄ စက္ကန့်တည်းနဲ့ ရောက်နိုင်ပါတယ်၊၊ အမြန်ဆုံး မောင်းနှင်နိုင်မှုကတော့ တစ်နာရီ ကီလိုမီတာ ၃၅၀ ကျော်ပါတယ်၊၊ အရှိန်တက်တာ မြန်သလိုပဲ ဘရိတ်ဖမ်းတာကလည်း အံ့ဩဖို့ ကောင်းပါတယ်၊၊ ၁၀၀ ကနေ ၀ ကို ရောက်ဖို့ ၂.၁ စက္ကန့်ပဲ ကြာပါတယ်၊၊”

“ကမ္ဘာ့နံပါတ်တစ် အရာရာသိ - ဒီလို စွမ်းဆောင်ရည်မြင့်တဲ့ သားရဲကြီးကို ဘယ်သူက မပိုင်ဆိုင်ချင်ဘဲ နေမှာလဲ၊၊ သန်း ၁၀၀ ဆိုတာ တကယ်တော့ အရမ်းကြီး ဈေးမကြီးပါဘူး၊၊”

“အဆိပ်ဗုံး - ‘သန်း ၁၀၀ ဆိုတာ အရမ်းကြီး ဈေးမကြီးပါဘူး’ တဲ့၊၊ ခင်ဗျား ပြောနေတာကို ခင်ဗျားရော နားထောင်မိရဲ့လား၊၊ ချင်ရှီဟွမ်ရဲ့ အဘိုးအဘွားတွေ လက်ထက်ကတည်းက အလုပ်စလုပ်မှ ဝယ်နိုင်မယ့်ဟာကို ခင်ဗျားက ဈေးမကြီးဘူး ပြောနေတာလား၊၊”

“ဆပ်ပြာတုံး - မင်းတို့တွေ ဆွေးနွေးနေတာနဲ့ လိုက်ဖ်လွှင့်တဲ့သူတောင် လန့်သွားပြီ၊၊ သူမ အနောက်ကို အများကြီး ဆုတ်သွားပြီ၊၊”

မှတ်ချက်တွေ တက်လာကတည်းက ပိုင်ယင်းရော့ဟာ စပ်စုတဲ့ မျက်လုံးလေးတွေနဲ့ စိုက်ကြည့်နေတာပါ၊၊ အကုန်ဖတ်ပြီးသွားတဲ့ အခါမှာတော့ သူမ လျှာလေးသပ်လိုက်မိပြီး အနောက်ကို အမြန်ဆုတ်လိုက်ပါတယ်၊၊ တိုက်တိုက်ဆိုင်ဆိုင် တွေ့လိုက်ရတဲ့ ကားတစ်စီးဟာ သိန်းတစ်ထောင်ကျော် တန်နေလိမ့်မယ်လို့ သူမ လုံးဝ မထင်ထားခဲ့ပါဘူး၊၊

“အစ်ကိုတို့ရေ၊ အစ်ကိုတို့ ပြောနေတာတွေ ကြောင့် ကျွန်မ နည်းနည်း လန့်လာပြီ၊၊ တကယ်လို့ ကျွန်မ ဒီကားကို မတော်တဆ ခြစ်မိသွားရင်တော့ ကျွန်မ တစ်သက်လုံး အကြွေးရိပ်အောက်မှာ နေသွားရတော့မှာ မဟုတ်လား၊၊”

အဲဒီအချိန်မှာပဲ မှတ်ချက်တစ်ခု ထပ်တက်လာပါတယ်၊၊

“အဆိပ်ဗုံး - လိုက်ဖ်လွှင့်တဲ့သူ၊ သတိထားဦး၊၊ ရှင့်ဘေးနားမှာ လူတစ်ယောက် ရှိနေတယ်၊၊ ရှင့်နောက်မှာ တစ်ယောက်ယောက် ရှိနေတယ်၊၊ သူ နီးလာပြီ၊၊”