အခန်း ၃၇ အတွင်းလောကနှင့် ဂူဗိမာန်ကောင်းကင်၏ ကြောက်မက်ဖွယ်ရာ စွမ်းပကား

ရွှီချန်ချင်း၏ ဧကရာဇ်တစ်ပိုင်း နဝမအလွှာသို့ ဖောက်ထွက်မှုသည် ကြယ်ပြာစင်စကြဝဠာအတွင်း၌ ဖြစ်ပွားခဲ့ခြင်းဖြစ်ရာ ကမ္ဘာဦးသန့်စင်သောမြေမှ အစွမ်းထက်ပုဂ္ဂိုလ်ကြီးများအနေဖြင့် သိရှိခဲ့ကြခြင်း မရှိချေ။

ယခုအခါတွင် ကျန်းခုန်း သက်ကြီးဝါရင့်၏ သတင်းစကားကို ကြားလိုက်ရခြင်းသည် လူတိုင်း၏ ခေါင်းပေါ်သို့ မိုးကြိုးပစ်ချလိုက်သကဲ့သို့ ဖြစ်သွားစေခဲ့ပြီး ဆက်တိုက်ဆိုသလို အဆင့်ဆင့် ဖောက်ထွက်သွားခဲ့သည်ဟူသော အချက်ကြောင့် ဆွံ့အကုန်ကြသည်။

၎င်းတို့မျိုးဆက်၏ သန့်စင်သောမြေအရှင်သည် မည်မျှအထိ ထူးဆန်းဆန်းကြယ်သော ပါရမီရှင်မျိုး ဖြစ်နေရသနည်း။

လူတိုင်း၏ အသက်ရှူသံများ မြန်ဆန်လာခဲ့ကြပြီး ၎င်းတို့၏ စိတ်လှုပ်ရှားမှုများသည်လည်း တိုတောင်းလှသော အချိန်အတွင်း၌ ပြန်လည်တည်ငြိမ်သွားခြင်း မရှိခဲ့ချေ။

အချို့သောသူများသည် ရွှီချန်ချင်းအနေဖြင့် ကမ္ဘာဦးလောကကြီးမှ မည်သို့ ထွက်ခွာသွားနိုင်ခဲ့သနည်းဟူသော အချက်ကို တွေးတောမိကြသည်။

သို့သော်လည်း ဤသည်မှာ ရွှီချန်ချင်း၏ ကိုယ်ပိုင်လျှို့ဝှက်ချက်ဖြစ်ပြီး အကယ်၍ သူကိုယ်တိုင် ဖွင့်ဟပြောဆိုခြင်း မရှိပါက စီနီယာများအနေဖြင့် လိုက်လံစုံစမ်းမေးမြန်းနေကြမည် မဟုတ်ပေ။

အဆုံးတွင်တော့ ရွှီချန်ချင်းသာ မရှိခဲ့လျှင် ကမ္ဘာဦးသန့်စင်သောမြေသည်လည်း တည်ရှိနေတော့မည် မဟုတ်ချေ။

ပို၍ အာရုံစိုက်စရာကောင်းသည်မှာ ကောင်းကင်ချောက်နက်မျိုးနွယ်စုများ အစုလိုက်အပြုံလိုက် ဆုတ်ခွာသွားရခြင်းမှာ ရွှီချန်ချင်းကြောင့်သာ ဖြစ်နေခြင်းပင်။

၎င်းတို့အားလုံးသည် ရွှီချန်ချင်းကြောင့် ဘေးကင်းလွတ်မြောက်ခဲ့ရခြင်း ဖြစ်သည်။ ကောင်းကင်နိယာမတရား၏ အာရုံသိသည် မှန်ကန်လှပေရာ ရွှီချန်ချင်းသည် ၎င်းတို့၏ အလှည့်အပြောင်း ဖြစ်ပေသည်။

"သန့်စင်သောမြေအရှင်က ကောင်းကင်ချောက်နက်မြေပြင်ဆီကို သွားနှင့်နေပြီ၊ သူ အခု ဘယ်နေရာမှာ ရှိနေလဲဆိုတာ ငါတို့ မသိရသေးဘူး"

အရှင်တျန်ယန်နှင့် အခြားသူများ၏ အမူအရာများ ပြောင်းလဲသွားခဲ့သည်။

"ဒုက္ခပဲ... ချန်ချင်းက ကောင်းကင်ချောက်နက်မြေပြင်မှာ ဖြစ်ပေါ်နေတဲ့ အပြောင်းအလဲတွေကို မသိသေးဘူး။ မကြာသေးခင်ကပဲ ကောင်းကင်ချောက်နက် နတ်ဘုရားစစ်သေနာပတိအချို့က မဟာဧကရာဇ်အဆင့်ကို ဖောက်ထွက်သွားကြတာ"

"ဒါကြောင့်မလို့ပဲ ငါတို့ ကမ္ဘာဦးသန့်စင်သောမြေရဲ့ အစွမ်းထက်အင်အားစုအားလုံး ခြေမှုန်းခံခဲ့ရတာ"

ယခင်က မဟာဧကရာဇ်အဆင့်ရှိသော အစွမ်းထက်ပုဂ္ဂိုလ်ကြီးတစ်ဦး ရုတ်တရက် ဝင်ရောက်စွက်ဖက်ခဲ့ပြီး ဘိုးဘေးကြီးနှင့် ချူထိုက် ဘိုးဘေးဟောင်းကြီး နှစ်ဦးကို တိုက်ရိုက် ဖိနှိပ်ခဲ့ခြင်း ဖြစ်သည်။ အကယ်၍ အထွတ်အထိပ် မဟာဧကရာဇ် လက်နက်ဆန်းဖြစ်သော ယင်ယန်အသက်နှင့်သေခြင်းတရားပုံရိပ်သာ မရှိခဲ့လျှင် ၎င်းတို့သည် ဟိုးယခင်ကတည်းက ပျောက်ကွယ်သွားခဲ့ကြပြီ ဖြစ်သည်။

ကျန်းခုန်း သက်ကြီးဝါရင့်၊ ဆုချင်းရွှယ်နှင့် အခြားသူများ ထိတ်လန့်တုန်လှုပ်သွားကြသည်။ ကောင်းကင်ချောက်နက်တွင် မဟာဧကရာဇ်တစ်ပါး အမှန်တကယ် ပေါ်ထွက်လာခဲ့ပြီ ဟုတ်လား။

ဆုထျန်းကော တစ်ဦးတည်းသာလျှင် မထုတ္ထေးသော အမူအရာဖြင့် "မဟာဧကရာဇ် ဖြစ်တော့ ဘာဖြစ်လဲ။ ငါ့ရဲ့ ဆရာက အနှိုင်းမဲ့ပဲ။ မဟာဧကရာဇ်တောင် ဒူးထောက်ရလိမ့်မယ်" ဟု ပြောလိုက်သည်။

ယခင်တိုက်ပွဲပြီးနောက်တွင် ဆုထျန်းကောသည် ရွှီချန်ချင်းအပေါ် မည်သည့်သံသယမျှ မရှိတော့ဘဲ သူ၏ ဆရာသည် အနှိုင်းမဲ့ အခြေအနေတွင် ရှိနေကြောင်း ပိုမို၍ ယုံကြည်သွားခဲ့သည်။

မဟာဧကရာဇ်တစ်ပါး ဖြစ်နေပါစေဦးတော့ သူ၏ ဆရာသည် ကြောက်ရွံ့လိမ့်မည်မဟုတ်ဟု သူ ယုံကြည်နေသည်။

ဘိုးဘေးကြီးအပါအဝင် ဧကရာဇ်တစ်ပိုင်းအားလုံးသည် ဆုထျန်းကောကို မယုံကြည်နိုင်သော မျက်လုံးများဖြင့် စိုက်ကြည့်လိုက်ကြသည်။ ဤသူက ယခုခေတ်၏ သန့်စင်သောသားတော် ဟုတ်လား။

ပါရမီတော့ ရှိပါရဲ့၊ ဒါပေမဲ့ ဦးနှောက်က သိပ်အလုပ်လုပ်ပုံမရဘူး။

မဟာဧကရာဇ်ဆိုတာ မုန်လာဥလိုမျိုး အလွယ်တကူ တွေ့နိုင်တဲ့အရာလို့ ထင်နေတာလား။

မင်းရဲ့ ဆရာက ပါရမီရှင် ဖြစ်နေရင်တောင် မဟာဧကရာဇ်အဆင့်နဲ့ ဆိုရင်တော့ အလှမ်းဝေးပါသေးတယ်တကား။

ဆုချင်းရွှယ်က ရှေ့သို့ လှမ်းတက်လိုက်ပြီး ဆုထျန်းကော၏ ခေါင်းနောက်စေ့ကို ရိုက်ချလိုက်ကာ "ပါးစပ်ပိတ်ထားစမ်း... ဒီနေရာက မင်း စကားပြောရမယ့် နေရာ ဟုတ်လို့လား" ဟု ငေါက်လိုက်သည်။

ဆုထျန်းကောက မကျေမနပ်ဖြင့် "မင်းတို့ မျက်စိကန်းနေတဲ့ လူတွေ... ဆရာက မင်းတို့ မျက်နှာတွေကို ရိုက်ပြတဲ့အထိပဲ စောင့်ကြည့်လိုက်ကြစမ်းပါ" ဟု ပြောလိုက်တော့သည်။

ဘိုးဘေးကြီးနှင့် ချူထိုက် ဘိုးဘေးဟောင်းကြီး နှစ်ဦးသည် ရုတ်တရက် လက်ဝဲလိုက်ကြသည်။

"ကောင်းကင်ချောက်နက်မြေပြင်ဆီကို သွားကြစို့၊ သန့်စင်သောမြေအရှင် ရွှီချန်ချင်းကို သွားပြီး ကူညီကြရအောင်"

ဘိုးဘေးကြီးနှင့် ချူထိုက် ဘိုးဘေးဟောင်းကြီး နှစ်ဦးပင်လျှင် ယခုအခါတွင် ရွှီချန်ချင်းကို ရိုသေလေးစားသော ဘွဲ့အမည်ဖြင့် ခေါ်ဆိုလိုက်ကြပြီ ဖြစ်သည်။ အကြောင်းမူကား ရွှီချန်ချင်းသည် ယခုအခါ ဧကရာဇ်တစ်ပိုင်း နဝမအလွှာ၏ အထွတ်အထိပ် အစွမ်းထက်ပုဂ္ဂိုလ်ကြီး ဖြစ်နေခြင်းကြောင့်ပင်။

သို့သော်လည်း ဧကရာဇ်တစ်ပိုင်းတစ်ဦးက အနည်းငယ် တွန့်ဆုတ်စွာဖြင့် "ဘိုးဘေးဟောင်းကြီး... ကမ္ဘာဦးလောကကြီးကို စောင့်ရှောက်ဖို့ လူအချို့ ချန်ထားခဲ့သင့်လား။ တင်လာဂိုဏ်းလိုမျိုး ဖြစ်ရပ်တွေ ထပ်မဖြစ်အောင်လို့ပါ" ဟု မေးမြန်းလိုက်သည်။

ယခင်က ၎င်းတို့ ဧကရာဇ်တစ်ပိုင်းအားလုံး ကောင်းကင်ချောက်နက်မြေပြင်တွင် ပိတ်မိနေခဲ့သဖြင့် တင်္နလာဂိုဏ်းကို အခွင့်အရေး ပေးလိုက်သကဲ့သို့ ဖြစ်ခဲ့ရသည်။

အကယ်၍ ရွှီချန်ချင်းသာ မရှိခဲ့လျှင် ကမ္ဘာဦးသန့်စင်သောမြေ၏ နှစ်ပေါင်းသန်းချီသော သမိုင်းကြောင်းသည် ဖျက်ဆီးခံလိုက်ရပြီ ဖြစ်သည်။

ဘိုးဘေးကြီးက အေးစက်စွာဖြင့် "ဘာလို့ ချန်ထားခဲ့ရမှာလဲ။ ငါတို့မှာ နောက်ဆုတ်ဖို့ လမ်း ရှိလို့လား"

"အကယ်၍ ငါတို့ ကောင်းကင်ချောက်နက်မြေပြင်ကို မအနိုင်ယူနိုင်ဘူးဆိုရင်၊ ပြီးတော့ ငါတို့ကို ကာကွယ်ပေးမယ့် အစွမ်းထက် မဟာဧကရာဇ်တစ်ပါးသာ မရှိဘူးဆိုရင် ငါတို့ဟာ စောစောစီးစီး ကောင်းကင်ချောက်နက်ရဲ့ ဝါးမြိုခြင်းကို ခံရမှာပဲ"

ကမ္ဘာဦးလောကကြီးသည် တစ်နည်းအားဖြင့် လှောင်အိမ်တစ်ခု ဖြစ်ပြီး ၎င်းတို့၏ တစ်ခုတည်းသော ကံကြမ္မာမှာ ကောင်းကင်ချောက်နက်မြေပြင်၏ အစိတ်အပိုင်းတစ်ခု ဖြစ်လာရန်သာ ဖြစ်သည်။ လောကနိယာမတရားများသည် ကောင်းကင်ချောက်နက်နိယာမတရားများဖြင့် လုံးဝ အစားထိုးခြင်း ခံရမည် ဖြစ်သည်။

ထို့ကြောင့် ရွှီချန်ချင်းအနေဖြင့် သေဆုံး၍ မဖြစ်ရုံသာမက ၎င်းတို့သည် ကမ္ဘာဦးသန့်စင်သောမြေ၏ အရင်းအမြစ်အားလုံးကို အသုံးချပြီး မဟာဧကရာဇ်တစ်ပါး ပေါ်ထွက်လာစေရန် စွမ်းဆောင်ရမည် ဖြစ်သည်။

ဤနည်းလမ်းဖြင့်သာ ကောင်းကင်ချောက်နက်မြေပြင်နှင့် ယှဉ်ပြိုင်နိုင်မည်ဖြစ်ပြီး ယခင်ကကဲ့သို့ မျှခြေကို ထိန်းသိမ်းနိုင်မည် ဖြစ်သည်။

"မကြောက်ကြနဲ့... ကောင်းကင်ချောက်နက်ရဲ့ မဟာဧကရာဇ်က တခြားအရေးကြီးတဲ့ ကိစ္စတွေ ရှိနေပုံရလို့ ငါတို့ကို လောလောဆယ် ဂရုမစိုက်နိုင်သေးတာပဲ"

"ကျန်းခုန်း... သန့်စင်သောသမီးတော်... မင်းတို့ ကမ္ဘာဦးလောကကြီးမှာပဲ နေခဲ့ကြ"

ဘိုးဘေးကြီးက လက်ကို ရုတ်တရက် ဝှေ့ယမ်းလိုက်ရာ ဧကရာဇ်တစ်ပိုင်း အုပ်စုသည် ထပ်မံ၍ ပျောက်ကွယ်သွားခဲ့ပြီး နောက်တစ်ခဏတွင် ကောင်းကင်ချောက်နက်မြေပြင်၌ ပေါ်လာခဲ့ကြပြန်သည်။

အရှင်တျန်ယန်သည် သူ၏ လက်ထဲတွင် မဟာတာအိုနိယာမတရားများကို အဆက်မပြတ် လည်ပတ်စေရင်း "ချန်ချင်းက အဲဒီနေရာမှာ ရှိနေရမယ်..." ဟု ပြောလိုက်သည်။

သူ စကားပြော၍ မဆုံးသေးမီမှာပင် ကောင်းကင်ချောက်နက်မြေပြင်တစ်ခုလုံး တုန်ခါသွားခဲ့သည်။

ရေတွက်၍မရနိုင်သော မြေပြင်များသည် ပြိုလဲပျက်စီးလုနီးပါး ဖြစ်သွားခဲ့ရသည်။

တစ်ချိန်တည်းမှာပင် ဟိန်းဟောက်သံတစ်ခုသည် လူတိုင်း၏ စိတ်ထဲတွင် ပဲ့တင်ထပ်သွားခဲ့သည်။

"မင်းက ဘယ်သူမလို့ ငါ့ရဲ့ ကောင်းကင်ချောက်နက်လောကကြီးကို ဖျက်ဆီးပြီး နိယာမတရား စွမ်းအားတွေကို လုယူရဲတာလဲ"

ဘိုးဘေးကြီးနှင့် အခြားသူများ၏ အမြင်တွင် မရေတွက်နိုင်သော ကြယ်စင်စုများ၏ ဟိုးအလွန် စကြဝဠာကြယ်ပွင့်ကောင်းကင်ယံ၌ ခရမ်းပြာရောင် ဝတ်စုံဝတ်ဆင်ထားသော ပုံရိပ်တစ်ခု ပေါ်ထွက်နေသည်ကို မြင်တွေ့လိုက်ရသည်။

သူ၏ ခန္ဓာကိုယ်မှ ထွက်ပေါ်နေသော မဟာတာအိုနိယာမတရားများသည် အသက်ရှူကျပ်မတတ် ဖျက်ဆီးခြင်း အရှိန်အဝါများကို ထုတ်လွှတ်နေပြီး သူ၏ လက်ယာဘက်လက်ကို အောက်သို့ ဖိချလိုက်သည့်အခါ ကောင်းကင်ချောက်နက်မြေပြင် အမြောက်အမြား ပျက်စီးသွားခဲ့ရသည်။

၎င်းတို့ ကောင်းစွာ သိရှိထားကြသော ကောင်းကင်ချောက်နက်မြေပြင်သည် ယခုအခါတွင် ရွှီချန်ချင်း၏ လက်ချက်ဖြင့် လုံးဝနီးပါး ဖျက်ဆီးခြင်း ခံလိုက်ရပြီ ဖြစ်သည်။

လူတိုင်း၏ မျက်ခွံများ တုန်ယင်သွားခဲ့ကြသည်။ အရှင်တျန်ယန်သည် သူ၏ တပည့်ဖြစ်သူက ဤမျှအထိ သတ္တိပြောင်မြောက်လိမ့်မည်ဟု မထင်မှတ်ထားခဲ့ချေ။ ဤသည်မှာ ကမ္ဘာဦးလောကကြီးအတွင်းရှိ ကမ္ဘာဦးသန့်စင်သောမြေကို ဖျက်ဆီးပစ်သည်နှင့် အလားတူပေသည်။

ကောင်းကင်ချောက်နက်လောကကြီးတစ်ခုလုံး သေချာပေါက် ဆူပူသောင်းကျန်းနေခဲ့ပြီ ဖြစ်သည်။

ရွှီချန်ချင်း၏ လက်ဝဲဘက်လက်တွင် သက်စွမ်းအင်များ ဖြာထွက်နေသော သစ်ကိုင်းတစ်ခုကို ကိုင်ဆောင်ထားပြီး ၎င်းအပေါ်တွင် ရေတွက်၍မရနိုင်သော နိယာမတရား စွမ်းအားများ စုစည်းနေခဲ့သည်။

ဤသစ်ကိုင်းက ပေးစွမ်းနေသော ခံစားချက်သည် အထွတ်အထိပ် မဟာဧကရာဇ် လက်နက်ဆန်းထက်ပင် ပိုမိုကြီးမားလှပေသည်။

ခရမ်းပြာရောင် ဝတ်စုံဝတ်ဆင်ထားသော ပုံရိပ်သည် ကောင်းကင်ချောက်နက်လောက၏ နတ်ဘုရားစစ်သေနာပတိများ ဝိုင်းရံခြင်းကို ခံထားရပြီး ၎င်းတို့ထဲတွင် ဧကရာဇ်တစ်ပိုင်း အယောက် ငါးဆယ်အထိ ပါဝင်နေသည်။

ဘိုးဘေးကြီးနှင့် ချူထိုက် အပါအဝင် အခြားသော ဧကရာဇ်တစ်ပိုင်းများသည် ၎င်းတို့၏ အမူအရာများ ပြင်းထန်စွာ ပြောင်းလဲသွားခဲ့ကြရသည်။ ကောင်းကင်ချောက်နက်တွင် ဤမျှလောက် များပြားလှသော ဧကရာဇ်တစ်ပိုင်းများ ရှိနေသည် ဟုတ်လား။

အစောပိုင်းက ၎င်းတို့ကို တိုက်ခိုက်ခဲ့သည်မှာ သုံးပုံတစ်ပုံမျှသာ ရှိသေးပြီး အခြားသော ဧကရာဇ်တစ်ပိုင်းများသည် ပေါ်ပင်မလာခဲ့ကြချေ။

ဤမျှများပြားလှသော ဧကရာဇ်တစ်ပိုင်းများနှင့် ဆိုလျှင် ဧကရာဇ်တစ်ပိုင်း နဝမအလွှာမှ ရွှီချန်ချင်း ဖြစ်နေပါစေဦးတော့ ရင်ဆိုင်ရန် ခက်ခဲလိမ့်မည် ဖြစ်သည်။

ဤကောင်းကင်ချောက်နက်မျိုးနွယ်စုများသည် ငါတို့ ကမ္ဘာဦးသန့်စင်သောမြေ၏ သန့်စင်သောမြေအရှင်ကို တိုက်ခိုက်နေကြခြင်း ဖြစ်ပေသည်။

"သန့်စင်သောမြေအရှင် ရွှီချန်ချင်းကို ကူညီဖို့ ပြင်ကြစို့"

မရေတွက်နိုင်သော ဂလက်ဆီအကွာအဝေးများ ခြားနားနေသော်လည်း ဧကရာဇ်တစ်ပိုင်းအဆင့် အစွမ်းထက်ပုဂ္ဂိုလ်ကြီးများသည် ဂရုမစိုက်နိုင်ကြတော့ချေ။ ပထမဦးစွာ ဧကရာဇ်တစ်ပိုင်း နဝမအလွှာမှ အစွမ်းထက်ပုဂ္ဂိုလ်ကြီး နှစ်ဦးဖြစ်သော ဘိုးဘေးကြီးနှင့် ချူထိုက်တို့၏ အသိစိတ်များသည် ဟင်းလင်းပြင်အက်ကွဲကြောင်းအတွင်းသို့ နက်ရှိုင်းစွာ ထိုးဖောက်ဝင်ရောက်သွားခဲ့သည်။

ထို့နောက် ၎င်းတို့သည် ရွှီချန်ချင်းကို ကူညီရန်အတွက် ရှေ့သို့ အဟုန်ပြင်းစွာ တိုးဝင်လိုက်ကြသည်။

သို့သော်လည်း မကြာမီမှာပင် ၎င်းတို့၏ လှုပ်ရှားမှုများ တောင့်ခဲသွားခဲ့ရပြီး ၎င်းတို့၏ အသိစိတ်အားလုံးသည် ဟင်းလင်းပြင်အက်ကွဲကြောင်းတွင် ရပ်တန့်သွားခဲ့ရတော့သည်။

၎င်းတို့၏ အမြင်တွင် ရွှီချန်ချင်းသည် များပြားလှသော ဧကရာဇ်တစ်ပိုင်းများ၏ တိုက်ခိုက်မှုများကို လုံးဝ ဂရုစိုက်ပုံမရချေ။

သူ၏ ခန္ဓာကိုယ်သည် ရုတ်တရက် လောကကြီးတစ်ခုကဲ့သို့သော ကြီးမားလှသည့် ဝဲကရက်ကြီးတစ်ခုအဖြစ်သို့ ပြောင်းလဲသွားခဲ့ပြီး တိုက်ခိုက်မှုအားလုံးသည် ထိုဝဲကရက်အတွင်း၌ ကွေးညွတ်ပျောက်ကွယ်သွားခဲ့ရသည်။

တစ်ချိန်တည်းမှာပင် ကောင်းကင်ချောက်နက် နတ်ဘုရားစစ်သေနာပတိအားလုံး ထိတ်လန့်တုန်လှုပ်သွားကြသည်။

"ဒါက အတွင်းလောကပဲ။ ဒီလူသားက လုံလောက်တဲ့ လောကနိယာမတရား စွမ်းအားတွေကို စုဆောင်းထားပြီးပြီဖြစ်လို့ မဟာဧကရာဇ် ဖြစ်တော့မှာလား"

သူ၏ ခန္ဓာကိုယ်သည် လောကကြီးအဖြစ်သို့ ပြောင်းလဲသွားခဲ့ပြီး ဝဲကရက်အတွင်း၌ ကြယ်စင်များ၊ တွင်းနက်များနှင့် တွင်းဖြူများ ပေါ်ထွက်နေခဲ့သည်။ သူသည် မဟာအောင်မြင်မှုအဆင့်သို့ ရောက်ရှိရန် ဆံခြည်မျှသာ လိုတော့သည့် အခြေအနေတွင် ရှိနေသည်။

ဘိုးဘေးကြီးနှင့် ချူထိုက် ဘိုးဘေးဟောင်းကြီး နှစ်ဦးသည် ၎င်းတို့၏ ခန္ဓာကိုယ်များ တုန်ယင်လျက် အရာအားလုံးကို ကြောင်စီစီဖြင့် စိုက်ကြည့်နေခဲ့ကြသည်။

ကမ္ဘာဦးသန့်စင်သောမြေမှ အခြားသော အစွမ်းထက်ပုဂ္ဂိုလ်ကြီးများသည်လည်း ဟင်းလင်းပြင်အက်ကွဲကြောင်းသို့ ရောက်ရှိလာခဲ့ကြသော်လည်း စစ်မြေပြင်ကို တစ်ချက်မျှ ကြည့်လိုက်ရုံဖြင့် ၎င်းတို့၏ နတ်ဘုရားအသိစိတ်များသည် ချက်ချင်းပင် ဆွံ့အသွားခဲ့ကြရပြန်သည်။

"အတွင်းလောကက ဂူဗိမာန်ကောင်းကင်တစ်ခုအဖြစ် ဖွဲ့စည်းတည်ဆောက်ထားပြီးပြီ၊ လောကနိယာမတရားက ပြည့်စုံလုနီးပါး ဖြစ်နေပြီ ဟုတ်လား။ သန့်စင်သောမြေအရှင်က မဟာဧကရာဇ်တစ်ပါး ဖြစ်တော့မှာလား"

အရှင်တျန်ယန်အပါအဝင် ဧကရာဇ်တစ်ပိုင်းများသည် လောကကြီးတစ်ခုလုံး ပြောင်းပြန်လှန်ခံလိုက်ရသကဲ့သို့ ခံစားလိုက်ကြရသည်။ အနည်းဆုံး နှစ်ပေါင်းသောင်းချီ၍ အသက်ရှင်ခဲ့ကြသော်လည်း ၎င်းတို့၏ အသိစိတ်များသည် လုံးဝ ပရမ်းပတာ ဖြစ်သွားခဲ့ရသည်။

၎င်းတို့ မြင်တွေ့နေရသည့် အရာကို လုံးဝ မယုံကြည်နိုင်ကြချေ။

"ပြေးကြစို့... သူက တခြားနည်းလမ်းနဲ့ တာအိုအခြေပြုထားတဲ့ အစွမ်းထက်ပုဂ္ဂိုလ်ကြီးပဲ၊ ငါတို့ သူ့ကို ဘယ်လိုမှ မယှဉ်နိုင်ဘူး"

"အချိန်ကျောက်ဆူးဆီကို မြန်မြန်သွားကြစို့၊ ငါတို့ မဟာဧကရာဇ် ထော့ယွမ်နဲ့ အခြားသူတွေကို ဆင့်ခေါ်ရမယ်"