အခန်း ၁ ဧကရာဇ်တစ်ပိုင်းအဆင့်သို့ တက်လှမ်းခြင်း

အဆုံးအစမဲ့၍ ကျယ်ပြောလှသော ကြယ်တာရာကောင်းကင်ယံကြီးထဲတွင် ဟောင်းနွမ်းပုပ်ပျက်ခြင်းမရှိသည့် ကမ္ဘာဦးလောကကြီး တည်ရှိသည်။
ထိုလှပသော လောကကြီးကို ဗဟိုပြု၍ ရေတွက်၍မရနိုင်သော နေမင်းကြီးများသည် လှည့်ပတ်တက်ကျနေကြပြီး ကောင်းကင်နှင့်မြေပြင်၏ ဆန်းကြယ်နက်နဲသော လျှို့ဝှက်ချက်များကို ဖုံးကွယ်ထားကြသည်။ ဤကမ္ဘာကြီးသည် စကြဝဠာကြီးတစ်ခုကဲ့သို့ ကျယ်ပြောလှပြီး ယင်း၌ အင်မော်တယ်ဂိုဏ်းကြီး ရှစ်ဂိုဏ်းနှင့် မိစ္ဆာဂိုဏ်းကြီး ဆယ်ဂိုဏ်း တည်ရှိသည်။
ထိုဂိုဏ်းကြီးများသည် လူသားများမှီတင်းနေထိုင်ရာ ကြယ်စုတန်းပေါင်း ဆယ်ဂဏန်းမှ ရာဂဏန်းအထိ စိုးမိုးထားကြပြီး မရေမတွက်နိုင်သော လူသားအင်ပါယာများကို ခြယ်လှယ်ကာ အင်မော်တယ်ဂိုဏ်းများနှင့် မိစ္ဆာလမ်းစဉ်များ၏ အထက်တွင် မားမားမတ်မတ် ရပ်တည်နေကြသည့် ဘီလူးကြီးများ ဖြစ်ကြသည်။
သို့သော် ဤဂိုဏ်းကြီး တစ်ဆယ့်ရှစ်ဂိုဏ်း၏ အထက်တွင်မူ နှစ်ပေါင်းသန်းချီတိုင်အောင် ကမ္ဘာဦးလောကကြီးကို တန်ခိုးအာဏာလွှမ်းမိုး စိုးမိုးထားသည့် ထာဝရအင်အားစုကြီးဖြစ်သော ‘ကမ္ဘာဦးသန့်စင်မြေ’ တည်ရှိသည်။
ကမ္ဘာဦးသန့်စင်မြေသည် လူသားများနေထိုင်ရာ ကြယ်စုတန်းပေါင်း ထောင်ချီကို လွှမ်းခြုံထားပြီး မရေမတွက်နိုင်သော မိစ္ဆာလမ်းစဉ်များကပင် ယင်း၏အောက်တွင် ဒူးထောက်အညံခံထားကြရသည်။
မူလဗဟိုကြယ်ကြီး၏ အတွင်းပိုင်းတွင်မူ ပေပေါင်းသောင်းချီ မြင့်မားသော မြို့ပြကြီးများ တစ်ခုပြီးတစ်ခု တည်ရှိနေပြီး ကျင့်ကြံသူများသည် ထိုမြို့ပြကြီးများ၏ ကောင်းကင်ယံထက်တွင် ဓားများကို စီးနင်းကာ ပျံသန်းနေကြသည်။
ရုတ်တရက်ဆိုသလို ကမ္ဘာဦးသန့်စင်မြေတစ်ခုလုံး လှိုင်းတံပိုးများ ထန်သွားပြီးနောက် ကမ္ဘာမြေကြီးသည် တောက်ပသော အလင်းတန်းများအောက်တွင် နစ်မြုပ်သွားတော့သည်။ လျှပ်စီးများ လက်ဖြာကာ မိုးခြိမ်းသံများ ဟိန်းခဟည်းသွားပြီး ကောင်းကင်နှင့်မြေပြင်၏ ဝိညာဉ်စွမ်းအင်များသည် တစ်ချက်တည်းဖြင့် ဗဟိုချက်တစ်ခုဆီသို့ စုပြုံတိုးဝင်သွားကြသည်။
ကမ္ဘာဦးသန့်စင်မြေရှိ ကျင့်ကြံသူအားလုံးသည် ထိတ်လန့်တုန်လှုပ်စွာဖြင့် ပေပေါင်းသောင်းချီ မြင့်မားသော သန့်စင်သောတောင်ကြီးဆီသို့ လှမ်းမျှော်ကြည့်လိုက်ကြသည်။
"ဒါ... ဒါက သန့်စင်သောအရှင်ရဲ့ တန်ခိုးကြောင့်လား... သူ ထပ်ပြီး အဆင့်တက်ပြန်ပြီလား"
"ဘယ်လိုလုပ်ဖြစ်နိုင်မှာလဲ... အရှင်က လွန်ခဲ့တဲ့ နှစ်နှစ်ရာကမှ မဟာသူတော်စင်အဆင့်ကို တက်လှမ်းထားတာလေ... အခု သူက ဧကရာဇ်တစ်ပိုင်းအဆင့်ကို ထပ်ပြီး တက်လှမ်းတော့မှာလား"
"ဟုတ်တယ်... ဒါဟာ ဧကရာဇ်တစ်ပိုင်းအဆင့်ရဲ့ ကောင်းကင်ဘေးဒဏ်ပဲ"
ခန့်ညားထည်ဝါလှသော သန့်စင်သောတောင်ကြီးမှ အလင်းတန်းပေါင်း ထောင်သောင်းမက ဖြာထွက်လာပြီး လောကတစ်ခုလုံး၏ ဝိညာဉ်စွမ်းအင်များသည် တောင်ထိပ်ဆီသို့ စုရုံးရောက်ရှိလာသည်။
တောင်ထိပ်တွင် ဝတ်ရုံပြာကို ဆင်မြန်းထားသည့် အရပ်ရှည်ရှည်နှင့် လူရိပ်တစ်ဦးသည် တင်ပျဉ်ခွေထိုင်ကာ ပြင်းထန်စွာ အသက်ရှူသွင်းရှူထုတ် လုပ်နေသည်ကို ဝေဝေဝါးဝါး မြင်တွေ့နေရသည်။ သူ၏ ရှေ့မှောက်တွင် အမျိုးမျိုးသော တာအိုနိယာမများနှင့် စကြဝဠာကြယ်တာရာများ ရွေ့လျားဖြစ်ပေါ်နေသည်။
ကောင်းကင်ယံထက်မှကြီးမားလှသော ဘေးဒဏ်ဆိုးမိုးတိမ်တိုက်ကြီးများမှာ ဖရိုဖရဲ ပျက်စီးသွားခဲ့ရပြီး ကောင်းကင်နှင့်မြေပြင်၏ မရေမတွက်နိုင်သော ဝိညာဉ်စွမ်းအင်များသည် သူ၏ခန္ဓာကိုယ်အတွင်းသို့ စီးဝင်ကာ တာအိုနိယာမများအဖြစ်သို့ ချက်ချင်း ပြောင်းလဲသွားတော့သည်။
လွန်စွာအစွမ်းထက်လှသော အရှိန်အဝါတစ်ခုသည် သူ၏ခန္ဓာကိုယ်မှ ဖြာထွက်လာပြီး ကမ္ဘာဦးသန့်စင်မြေ၏ ကြယ်စုတန်းအသီးသီးဆီသို့သာမက ကမ္ဘာဦးလောကကြီးတစ်ခုလုံးဆီသို့ပါ ရိုက်ခတ်သွားသည်။
အင်မော်တယ်ဂိုဏ်းကြီး ရှစ်ဂိုဏ်းနှင့် မိစ္ဆာဂိုဏ်းကြီး ဆယ်ဂိုဏ်းတို့မှ အစွမ်းထက်ပုဂ္ဂိုလ်ကြီးများအားလုံး တုန်လှုပ်ချောက်ချားသွားကြရသည်။
"ဒါက ဧကရာဇ်တစ်ပိုင်းအဆင့်ရဲ့ အရှိန်အဝါပဲ... ကမ္ဘာဦးသန့်စင်မြေရဲ့ မဟာအကြီးအကဲတစ်ယောက် အဆင့်တက်သွားတာလား"
"ဘယ်လိုလုပ်ဖြစ်နိုင်မှာလဲ... ဒီသတင်းက ကမ္ဘာဦးသန့်စင်မြေရဲ့ အရှင် ရွှီချန်ချင်းဆီက လာတာ"
"သူ ကျင့်ကြံခဲ့တာ နှစ်ပေါင်းသုံးရာပဲ ရှိသေးတာကို... ဧကရာဇ်တစ်ပိုင်းအဆင့်ကိုတောင် ရောက်သွားပြီလား"
"ကမ္ဘာဦးသန့်စင်မြေက လွန်ခဲ့တဲ့ နှစ်ပေါင်းနှစ်သိန်းက မဟာကပ်ဘေးတစ်ခုနဲ့ ကြုံခဲ့ရပြီးကတည်းက ဆုတ်ယုတ်လာခဲ့တာ... ငါတို့ အင်မော်တယ်ဂိုဏ်းတွေနဲ့ မိစ္ဆာဂိုဏ်းတွေက အစားထိုးဖို့ ကြံစည်နေကြတာကို... ဒီ ရွှီချန်ချင်းက ကောင်းကင်က ရွေးချယ်လိုက်တဲ့သူ ဖြစ်နေတာလား"
ကမ္ဘာဦးလောကကြီးတစ်ခုလုံး လှုပ်လှုပ်ရှားရှား ဖြစ်သွားတော့သည်။
မဟာဧကရာဇ်အဆင့်ရှိသူ မရှိတော့သည့် ဤခေတ်ကာလတွင် ဧကရာဇ်တစ်ပိုင်းအဆင့်သည် အထွတ်အထိပ် အစွမ်းအစပင် ဖြစ်သည်။
တောင်ထိပ်တွင်မူ ဝိညာဉ်စွမ်းအင်အားလုံး ပျောက်ကွယ်သွားခဲ့ပြီ ဖြစ်သည်။ ဝတ်ရုံပြာနှင့် လူငယ်လေးသည် ခန္ဓာကိုယ်တွင်းမှ ညစ်ညမ်းသော လေအိုကြီးကို ဖြည်းညှင်းစွာ မှုတ်ထုတ်လိုက်ပြီးနောက် မျက်လုံးများကို ဖွင့်လိုက်သည်။ သူ၏မျက်ဝန်းအစုံတွင် ကြယ်တာရာပေါင်းမြောက်မြားစွာ လင်းလက်နေသကဲ့သို့ ရှိပြီး သူ၏တစ်ကိုယ်လုံးသည် ကောင်းကင်နှင့်မြေပြင်နှင့် တစ်သားတည်း ဖြစ်သွားသကဲ့သို့ ခံစားရစေသည်။
"နောက်ဆုံးတော့ ငါ ကောင်းကင်ဘုံရဲ့ အနုစိတ်နိယာမကို ဆုပ်ကိုင်နိုင်ပြီး ဧကရာဇ်တစ်ပိုင်းအဆင့်ကို ရောက်ရှိသွားခဲ့ပြီပေါ့"
ရွှီချန်ချင်းဟု အမည်ရသည့် ဤလူငယ်သည် လွန်ခဲ့သော နှစ်ပေါင်းသုံးရာက ကမ္ဘာဦးလောကကြီးသို့ ကူးပြောင်းရောက်ရှိလာခဲ့သူ ဖြစ်သည်။
လွန်ခဲ့သော နှစ်ပေါင်းသုံးရာက သူသည် ကမ္ဘာဦးသန့်စင်မြေ၏ တပည့်တစ်ဦး ဖြစ်လာခဲ့ပြီး ထိုအချိန်မှစ၍ သူ၏လမ်းခရီးသည် အစဉ်အမြဲ အောင်မြင်ချောမွေ့ခဲ့သည်။
အပြင်စည်းတပည့်ဘဝမှ စတင်ကာ မရေမတွက်နိုင်သော အတွင်းစည်းတပည့်များ၊ တပည့်ရင်းများ၊ သန့်စင်သောသားတော်များနှင့် သန့်စင်သောသမီးတော်များကို အချိန်တိုအတွင်း ကျော်ဖြတ်ကာ ဖိနှိပ်နိုင်ခဲ့သည်။
ထို့နောက်တွင်မူ သူ့ထက် သက်ကြီးဝါကြီး အစဉ်အဆက်က မဟာအကြီးအကဲအဆင့် ကျွမ်းကျင်သူများကိုပင် ကျော်တက်နိုင်ခဲ့သည်။
လွန်ခဲ့သော နှစ်နှစ်ရာက သူသည် မဟာသူတော်စင်အဆင့်သို့ တက်လှမ်းနိုင်ခဲ့ပြီး ဆရာဖြစ်သူ ထျန်းယန်၏ သန့်စင်သောအရှင်မြတ်ရာထူးကို ဆက်ခံခဲ့သည်။
သူသည် ကမ္ဘာဦးသန့်စင်မြေ၏ နှစ်ပေါင်းသန်းချီသမိုင်းတွင် အသက်အငယ်ဆုံး သန့်စင်သောအရှင်မြတ် ဖြစ်လာခဲ့သည်။
နှစ်ပေါင်းနှစ်ရာတိုင်တိုင် ပင်ပန်းကြီးစွာ ကျင့်ကြံအားထုတ်ပြီးနောက် ယခုအခါတွင်မူ သူသည် ဧကရာဇ်တစ်ပိုင်းအဆင့် ကောင်းကင်ဘေးဒဏ်ကို ကျော်လွှားနိုင်ခဲ့ပြီး ကောင်းကင်ဘုံအဆင့်နိယာမကို နားလည်သဘောပေါက်ကာ ဧကရာဇ်တစ်ပိုင်းအဆင့် ဖြစ်လာခဲ့ပြီ ဖြစ်သည်။ သူသည် လက်ချောင်းတစ်ချက်တောက်ရုံဖြင့် ကြယ်စုတန်းတစ်ခုကို ဖျက်ဆီးပစ်နိုင်ပြီး သက်တမ်းမှာလည်း နှစ်ပေါင်းသိန်းချီတိုင်အောင် ရှည်ကြာနိုင်ပြီ ဖြစ်သည်။
တစ်လောကလုံးရှိ လူသူမသိ တစ်ကိုယ်တော်ကျင့်ကြံနေကြသည့် အဘိုးအိုကြီးများကို ဖယ်ထုတ်လိုက်လျှင် ရွှီချန်ချင်းသည် ကမ္ဘာဦးလောကကြီး၏ ထိပ်ဆုံးတွင် အခိုင်အမာ ရပ်တည်နေနိုင်ပြီ ဖြစ်သည်။
သို့သော် ရွှီချန်ချင်းသည် သက်ပြင်းတစ်ချက်ကို ခိုး၍ချလိုက်မိသည်။
"ငါ့ရဲ့ ပါရမီနဲ့တင် ဧကရာဇ်တစ်ပိုင်းအဆင့် ကိုးထပ်ကောင်းကင်ကို ရောက်ဖို့ဆိုရင် အနည်းဆုံး နှစ်ပေါင်းရာချီ လိုဦးမယ်... ကံကောင်းခြင်း အခွင့်အလမ်းတွေကို ဆက်တိုက်မရဘူးဆိုရင်ပေါ့"
အကယ်၍ ဤစကားကို အခြားသူများ ကြားသွားပါက ရင်ဘတ်စေ့ကာ သေကြောင်းကြံစည်မိကြပေလိမ့်မည်။
ဤကမ္ဘာတွင် ကျင့်ကြံခြင်းအဆင့်အတန်းများကို ခန္ဓာကိုယ် သန့်စင်ခြင်းအဆင့်၊ မွေးရာပါအဆင့်၊ ဝိညာဉ်စစ်စစ်အဆင့်၊ အမြုတေဖွဲ့စည်းခြင်းအဆင့်၊ ကောင်းကင်ဘုံအဆင့်၊ စည်းလုံးခြင်းအဆင့်၊ နိဗ္ဗာန်အဆင့်၊ ဘုရင်အဆင့်၊ သူတော်စင်အဆင့်၊ မဟာသူတော်စင်အဆင့်၊ ဧကရာဇ်တစ်ပိုင်းအဆင့်နှင့် မဟာဧကရာဇ်အဆင့် ဟူ၍ အကြမ်းဖျင်း ပိုင်းခြားထားသည်။
ဧကရာဇ်တစ်ပိုင်းအဆင့်သည် ကျင့်ကြံခြင်းအဆင့် တစ်ဆယ့်နှစ်ဆင့်အနက် တစ်ဆယ့်တစ်ဆင့်မြောက် အဆင့်ဖြစ်သည်။ သာမန်မဟာသူတော်စင်များသည် နှစ်ပေါင်းသောင်းချီတိုင်အောင် ကျင့်ကြံမှသာ ဧကရာဇ်တစ်ပိုင်းအဆင့်ဖြစ်ရန် အခွင့်အရေး အနည်းငယ်မျှ ရှိတတ်ကြသော်လည်း ရွှီချန်ချင်းမှာမူ နှစ်ပေါင်းနှစ်ရာသာ အချိန်ယူခဲ့ရသည်။
လွန်ခဲ့သော နှစ်များတစ်လျှောက် သူသည် မရေမတွက်နိုင်သော ပါရမီရှင်များကို ကျော်ဖြတ်ကာ ထူးကဲလှသော ပါရမီကို ပြသခဲ့ပြီး ခေတ်တစ်ခေတ်လုံးကို စိုးမိုးထားနိုင်ခဲ့ကာ တဖြည်းဖြည်း ဆုတ်ယုတ်လာနေသည့် ကမ္ဘာဦးသန့်စင်မြေ၏ ဂုဏ်သိက္ခာကို ပြန်လည် ဆယ်တင်ပေးနိုင်ခဲ့သည်။
ရွှီချန်ချင်းသည် အချိန်သာ အလုံအလောက်ရပါက မဟာဧကရာဇ်အဆင့်သို့ တက်လှမ်းနိုင်မည်ဟု ယုံကြည်ချက် အပြည့်ရှိသည်။
သို့သော် လွန်ခဲ့သော နှစ်ပေါင်းနှစ်သိန်းပတ်လုံး ဤကမ္ဘာဦးလောကကြီးတစ်ခုလုံးတွင် မည်သူမျှ မဟာဧကရာဇ် ဖြစ်မလာခဲ့ကြချေ။
"နှမြောစရာကောင်းတာက မဟာကပ်ဘေးကြီးက နီးကပ်နေပြီ... ငါ့မှာ နှစ်ပေါင်းရာချီ စောင့်နေဖို့ အချိန်မရှိဘူး"
ဧကရာဇ်တစ်ပိုင်းအဆင့်သည် ကောင်းကင်နှင့်မြေပြင်၏ မဟာတာအိုနှင့် ဆက်သွယ်နိုင်ရန်၊ ကောင်းကင်ဘုံနိယာမကို နားလည်ရန်နှင့် အခြားသူများ၏ အနာဂတ်ကို ဟောကိန်းထုတ်ရန်အပြင် မိမိကိုယ်ပိုင် လျှို့ဝှက်ချက်များကို ဖုံးကွယ်ရန်အတွက် အလုံအလောက် အစွမ်းထက်နေပြီ ဖြစ်သည်။
ဧကရာဇ်တစ်ပိုင်းအဆင့်သို့ ရောက်ရှိသွားသော ရွှီချန်ချင်းသည် ကောင်းကင်ဘုံနိယာမမှတစ်ဆင့် မိမိကိုယ်တိုင်သည် နှစ်ပေါင်းရာဂဏန်းအတွင်း မဟာကပ်ဘေးတစ်ခုနှင့် ကြုံတွေ့ရတော့မည်ကို သိရှိလိုက်ရသည်။ သူ တစ်ဦးတည်းသာမက ကမ္ဘာဦးသန့်စင်မြေတစ်ခုလုံးနှင့် ကမ္ဘာဦးလောကကြီးတစ်ခုလုံးသည်လည်း ထိုမဟာကပ်ဘေးကြီးကို ကြုံတွေ့ရမည် ဖြစ်သည်။
အကယ်၍ ထိုဘေးဒဏ်ကို မကျော်လွှားနိုင်ပါက သေချာပေါက် ပျက်စီးကြရပေလိမ့်မည်။
[တီ... ပိုင်ရှင်ရဲ့ အစွမ်းက လိုအပ်ချက်နဲ့ ကိုက်ညီသွားပါပြီ... စကြဝဠာအနှံ့ မှတ်တမ်းတင်ခြင်းစနစ်ကို စတင်လိုက်ပါပြီ]
[မရေမတွက်နိုင်တဲ့ လောကကမ္ဘာတွေထဲကို ဝင်ရောက်ပြီး နေ့စဉ် သွားရောက်မှတ်တမ်းတင်တာ ဒါမှမဟုတ် တခြား စနစ်လုပ်ဆောင်ချက်တွေကို အောင်မြင်အောင် လုပ်ဆောင်ခြင်းအားဖြင့် များပြားလှတဲ့ ဆုလာဘ်တွေကို ရရှိနိုင်မှာ ဖြစ်ပါတယ်]
ထိုစဉ်မှာပင် အေးစက်စက် အသိပေးသံတစ်ခု ရွှီချန်ချင်း၏ စိတ်ထဲတွင် ထွက်ပေါ်လာသည်။
ရွှီချန်ချင်း မျက်ခုံးပင့်လိုက်မိပြီး မျက်နှာတွင် အံ့သြသွားသည့် အရိပ်အယောင်များ ထင်ဟပ်သွားသည်။
စကြဝဠာအနှံ့ မှတ်တမ်းတင်ခြင်းစနစ် ဟုတ်လား။
ရွှီချန်ချင်း ဤကျယ်ပြောလှသော ကမ္ဘာကြီးသို့ ကူးပြောင်းရောက်ရှိလာစဥ်က သူသည်လည်း စနစ်တစ်ခုခုကို ရရှိလာလိမ့်မည်ဟု စိတ်ကူးယဉ်ခဲ့ဖူးသည်။
သို့သော် နောက်ပိုင်းတွင် သူ ဂရုမစိုက်တော့ချေ။ သူ၏ပါရမီမှာ မကြုံစဖူး ထူးကဲလှပြီး သူ၏ကံတရားမှာလည်း လမ်းလျှောက်နေရင်းပင် ရတနာများကို ရှာဖွေတွေ့ရှိနိုင်လောက်အောင် ကောင်းမွန်လွန်းနေသောကြောင့် ဖြစ်သည်။
ဤစနစ်က သူ ဧကရာဇ်တစ်ပိုင်းအဆင့် ရောက်မှသာ စတင် အသက်ဝင်လာရသလား။
ရွှီချန်ချင်း မျက်လုံးများကို မှိတ်လိုက်ပြီး မဟာတာအိုနိယာမများကို သူ၏လက်ချောင်းများကြားတွင် အစဉ်မပြတ် လည်ပတ်စေကာ ဧကရာဇ်တစ်ပိုင်းအဆင့်၏ ကောင်းကင်ဘုံနိယာမကို အသုံးပြု၍ သူ၏စိတ်အာရုံထဲရှိ ဤစနစ်၏ မြစ်ဖျားခံရာကို ရှာဖွေရန် ကြိုးပမ်းလိုက်သည်။
"ဟင်... ဒီစနစ်က တကယ်ကို ထူးခြားတာပဲ... ငါ ဧကရာဇ်တစ်ပိုင်းအဆင့် ဖြစ်နေတာတောင် ယင်းရဲ့ မြစ်ဖျားခံရာကို ရှာမတွေ့နိုင်ဘူး"
ရွှီချန်ချင်း မျက်လုံးများကို ပြန်ဖွင့်လိုက်ရာ မျက်ဝန်းထဲတွင် အဆုံးမဲ့သော ကြယ်တာရာအလင်းတန်းများ ဖြာထွက်လာသည်။
ဒီစနစ်က သူ့ကို ကျင့်ကြံခြင်းအဆင့်အတန်း လျင်မြန်စွာ တက်လှမ်းနိုင်ဖို့ ကူညီပေးနိုင်ပြီး နီးကပ်လာနေတဲ့ ကပ်ဘေးကြီးကို ရင်ဆိုင်ဖို့ အားကိုးရာ ဖြစ်လာနိုင်မလား။
"စနစ်... မင်းက ဘာအတွက်လဲ"
[တီ... ပိုင်ရှင်အနေနဲ့ သတ်မှတ်ထားတဲ့ လောကကမ္ဘာတွေထဲကို ဝင်ရောက်ပြီး မှတ်တမ်းတင်တာ ဒါမှမဟုတ် တခြား သတ်မှတ်ထားတဲ့ လုပ်ဆောင်ချက်တွေကို ပြီးမြောက်အောင် လုပ်ဆောင်နိုင်ပါတယ်]
[ကျင့်ကြံခြင်းအဆင့် တိုးတက်မှု၊ အထွတ်အထိပ် တာအိုဧကရာဇ်လက်နက်၊ လောကနိယာမ၊ မြတ်လှစွာသော အင်မော်တယ်ဆေးလုံး၊ မသေမျိုးစစ်စစ် အဆောင်လက်ဖွဲ့ စတဲ့ အမျိုးမျိုးသော ဆုလာဘ်တွေကို ရရှိနိုင်မှာ ဖြစ်ပြီး အခြား လောကကမ္ဘာတွေကို ဖွင့်လှစ်ဖို့အတွက် လောကမှတ်ကျောက်တွေကိုလည်း ရရှိမှာ ဖြစ်ပါတယ်]
မရေမတွက်နိုင်သော လောကကမ္ဘာများ ဟုတ်လား။
အေးစက်စက် အသိပေးသံများသည် ရွှီချန်ချင်း၏ စိတ်ထဲတွင် တစ်ခုပြီးတစ်ခု ထွက်ပေါ်လာပြီးနောက် သူ၏ရှေ့မှောက်တွင် အလင်းမျက်နှာပြင်များစွာ ပေါ်လာသည်။
မျက်နှာပြင်တစ်ခုစီတွင် ကျယ်ပြောလှသော လောကကြီးတစ်ခုစီ၏ ပုံရိပ်များ ရှိနေသည်။
ပုံရိပ်တိုင်းသည် ထိုလောကကမ္ဘာများ ခံစားနေရသည့် ကြောက်မက်ဖွယ်ရာ ဒုက္ခဝေဒနာများကို ဖော်ပြနေကြသည်။
ထိုကျယ်ပြောလှသော လောကကမ္ဘာများကို စနစ်က ကြယ်တစ်ပွင့်မှ ကြယ်တစ်ဆယ်ပွင့်အထိ အဆင့်ခွဲခြားထားသည်။
သူသည် ကြယ်တစ်ပွင့်အဆင့်ရှိ နည်းပညာလောကတစ်ခုကို မြင်တွေ့လိုက်ရပြီး ယင်းကို အဆင့်မြင့်ယဉ်ကျေးမှုတစ်ခုက ကျူးကျော်ဝင်ရောက်ထားကာ လူသားမျိုးနွယ်စုမှာ ကျွန်များ ဖြစ်နေကြရပြီး ၎င်းတို့ မှီတင်းနေထိုင်ရာ ဂြိုဟ်ကြီးကိုလည်း ထိုအဆင့်မြင့်ယဉ်ကျေးမှုက သိမ်းပိုက်ထားသည်။
အခြား ကြယ်သုံးပွင့်အဆင့်ရှိ မိစ္ဆာလောကတစ်ခုတွင်မူ မိစ္ဆာများ နိုးထလာကြပြီး လူသားများကို အစာအဖြစ် စားသုံးနေကြကာ လောကတစ်ခုလုံးကို ငရဲအလား ဖြစ်အောင် ဖန်တီးထားကြသည်။
အခြား အဆင့်မြင့်ကိုယ်ခံပညာလောကတစ်ခုတွင်မူ အထွတ်အထိပ်ကိုယ်ခံပညာရှင်များ တိုက်ခိုက်ကြသည့် နောက်ဆက်တွဲအရှိန်ကြောင့် ဂြိုဟ်ကြီးမှာ နှစ်ခြမ်းကွဲသွားခဲ့ရသည်။
အခြား ကြယ်ခြောက်ပွင့်အဆင့်ရှိ ကောင်းကင်တာအိုလောကတစ်ခုတွင်မူ ကောင်းကင်တာအိုသည် သနားညှာတာမှုကင်းမဲ့စွာဖြင့် သက်ရှိအားလုံးကို မျက်ကွယ်ပြုထားသည်...။
လောကကမ္ဘာများ၏ အဆင့်မြင့်မားလာသည်နှင့်အမျှ ယင်းတို့အတွင်းရှိ အစွမ်းထက်ပုဂ္ဂိုလ်များမှာလည်း ပိုမိုအစွမ်းထက်လာကြသည်။
သို့သော် ရွှီချန်ချင်း၏ မျက်နှာအမူအရာမှာ များစွာပြောင်းလဲခြင်းမရှိချေ။ ဤပြသထားသော လောကများနှင့် ကွယ်ရာမှ ကြိုးကိုင်သူများသည် ရွှီချန်ချင်းအတွက် ဘာမှမဟုတ်ချေ။
စနစ်မျက်နှာပြင်ထက်တွင် ကြယ်ခုနစ်ပွင့် အထွတ်အထိပ်အဆင့်ရှိသော စိတ်ကူးယဉ်လောကတစ်ခု ပေါ်လာသည့်အချိန်အထိပင် ဖြစ်သည်။ ရွှီချန်ချင်း၏ မျက်နှာအမူအရာသည် ရုတ်တရက် တင်းမာသွားခဲ့ရသည်။
ထိုစိတ်ကူးယဉ်လောကတွင် အမှောင်တားမြစ်နယ်မြေ၏ အထွတ်အထိပ်အရှင်သခင်သည် နိုးထလာခဲ့ပြီး လက်ဟန်တစ်ချက်ဖြင့် ဂြိုဟ်တစ်ခုလုံးကို ဖျက်ဆီးပစ်ကာ မရေမတွက်နိုင်သော လူသားများကို ၎င်းတို့၏ ဝိညာဉ်စွမ်းအင်များ ပြန်လည်ဖြည့်တင်းရန်အတွက် အစာအဖြစ် အသုံးပြုနေကြသည်။
"စိတ်ဝင်စားဖို့ကောင်းသားပဲ... ဒီလောက်အဆင့်ရှိတဲ့ ကျွမ်းကျင်သူမျိုးကတော့ ငါ့ကို အနည်းငယ် ခြိမ်းခြောက်နိုင်စွမ်း ရှိတယ်"