အခန်း (၂၄) - အလံလုပွဲ

သူမ စင်မြင့်ထက်တွင် ပျံဝဲနေစဉ်၊ သူတို့ ကိုယ့်ကိုယ်ကို မသတ်သေရန် ဆုံးဖြတ်လိုက်ကြသည်ကို သိရှိလိုက်ရသဖြင့် သူမ၏ မျက်နှာထား တင်းမာသွားသည်။

"တောက်" သူမ လျှာတစ်ချက် ခေါက်လိုက်သည်။ သူတို့ ပထမလမ်းကို ရွေးချယ်လိုက်သည့်အတွက် သူမ ဒေါသထွက်နေသည်မှာ ထင်ရှားသည်။

"သင်တို့အားလုံး လှိုင်းတွေကို ရင်ဆိုင်ဖို့ ရွေးချယ်လိုက်ကြတာလား" တစ်ထပ်လုံးကို မျက်လုံးဝေ့ကြည့်ရင်း သူမ မေးလိုက်သည်။ သို့သော် မည်သူကမျှ ပြန်မဖြေကြပေ။ သူတို့၏ မျက်နှာများသည် နာကျင်မှု၊ ဒေါသများနှင့်အတူ ခေါင်းငိုက်စိုက် ကျနေကြသည်။

ဒါကို မြင်လိုက်ရသည့်အခါ တစ်စုံတစ်ခု ဖြစ်ပျက်ခဲ့မှန်း သူမ သိလိုက်သည်။ ဘာဖြစ်ခဲ့သလဲ ဆိုတာ အတိအကျ သိနိုင်ရန် သူမ မျက်လုံးများကို မှိတ်လိုက်ပြီး သူမ မရှိခိုက် ဖြစ်ပျက်ခဲ့သော မြင်ကွင်းများကို ပြန်လည် ကြည့်ရှုလိုက်သည်။ သူမ မျက်လုံးပြန်ဖွင့်လိုက်သည့်အခါ အာရန်ကို စိုက်ကြည့်ရင်း ဒေါသအရိပ်အယောင်တစ်ခု မျက်လုံးထဲတွင် လက်ခနဲ ဖြတ်ပြေးသွားသည်။ သူမ ထိုအမူအရာကို အလျင်အမြန် ဖျောက်ဖျက်လိုက်ပြီး သာမန် မျက်နှာထားကို ပြန်လည် ပြင်ဆင်လိုက်သည်။

"လူတိုင်း ပထမရွေးချယ်မှုမှာ ရပ်တည်အောင် မင်း လုပ်နိုင်ခဲ့တာပဲ။ အထင်ကြီးစရာပါပဲ" သူမ ပြောလိုက်သည်။

အာရန် ပြန်မဖြေပေ။ သူမ တစ်ခုခု လုပ်လာခဲ့လျှင် ချက်ချင်း လှုပ်ရှားရန် အသင့်ပြင်ထားပြီး သတိကြီးစွာဖြင့် သူမကို ကြည့်နေလိုက်သည်။ သို့သော် သူမ ဘာမှ မလုပ်ခဲ့ပေ။

ထိုအစား သူမ လက်ခုပ်တစ်ချက် တီးလိုက်သည်။ ချက်ချင်းပင် စင်မြင့်တစ်ခုလုံး အနက်ရောင် အကွက်များအဖြစ် ပြောင်းလဲသွားသည်။ သေစေနိုင်သော အဖြူရောင် အကွက်များ မရှိတော့ပေ။

"သင်တို့အားလုံးကို ဂုဏ်ယူပါတယ်။ သင်တို့ စမ်းသပ်မှုရဲ့ ဒုတိယအဆင့်ကို အောင်မြင်သွားပါပြီ" သူမ ပြောလိုက်သည်။

သူမ မျက်နှာပေါ်တွင် နူးညံ့သော အပြုံးတစ်ခု ဖြစ်ပေါ်လာသည်။ တောက်ပပြီး လှပနေသော်လည်း၊ သူမ သူတို့ကို လုပ်ခဲ့သမျှအရာများပြီးနောက် မည်သူကမျှ သူမကို လှပသည်ဟု မမြင်နိုင်ကြတော့ပေ။

သူတို့ အောင်မြင်သွားပြီဟု သူမ ပြောလိုက်သည့်အခါ သူတို့အားလုံး အံ့အားသင့်သွားကြသည်။ သူတို့ နားမလည်နိုင်သော မျက်လုံးများဖြင့် သူမကို စိုက်ကြည့်နေမိသည်။ လှိုင်းဆယ်ခုလုံးကို ဖြတ်ကျော် တိုက်ခိုက်ရမည်ဟု သူမ ပြောခဲ့သည် မဟုတ်ပါလော။

ဇဝေဇဝါ ဖြစ်နေကြသည်ကို မြင်လိုက်ရသဖြင့် သူမ ဆက်ပြောသည်။

"သင်တို့ကို ငါပေးခဲ့တဲ့ ကမ်းလှမ်းမှုက အမှန် မဟုတ်ပါဘူး။ တကယ်လို့ သင်တို့သာ လူတစ်ရာကို သတ်ဖို့ ဆုံးဖြတ်ခဲ့မယ်ဆိုရင် ကျန်ရစ်ခဲ့တဲ့သူတွေက ရှေ့ဆက်သွားနိုင်မှာ ဖြစ်ပေမယ့်၊ ရနိုင်သမျှ ဆုလာဘ်တွေ အကုန်လုံးကို ဆုံးရှုံးရမှာပါ။"

"ဒါပေမဲ့ ပထမလမ်းကို ရွေးချယ်ခဲ့ခြင်းက သင်တို့အားလုံးကို ရှေ့ဆက်သွားခွင့် ရစေသလို၊ အဆုံးသတ်မှာ ဆုလာဘ်တွေလည်း ရရှိစေမှာ ဖြစ်ပါတယ်။ ဒီစမ်းသပ်မှုက သင်တို့ နိုးထသူတွေကို ကိုယ်တိုင် ဝေဖန်ပိုင်းခြားနိုင်စွမ်း ရှိစေချင်သလို၊ အရေးကြီးတဲ့ အချိန်တွေမှာ တန်ဖိုးရှိကြောင်း ပြသစေချင်တာပါ။ နာခံမှုက ကောင်းမွန်ပေမယ့်၊ မဖြစ်နိုင်တဲ့ အရာတွေကို ဆန့်ကျင်တိုက်ခိုက်ရဲတဲ့ စွမ်းရည်က ပိုပြီး မြင့်မြတ်ပါတယ်"

"ဒီသဘောတရားတွေက ဘာလို့ အရေးပါလဲဆိုတာ သင်တို့ အခု နားမလည်နိုင်ပေမယ့်၊ အချိန်တန်ရင် နားလည်လာပါလိမ့်မယ်"

သူမ၏ စကားလုံးများ နစ်ဝင်သွားသည့်အခါ သူမ ဖွင့်ဟလိုက်သည့် အမှန်တရား၏ လေးနက်မှုကို လူတိုင်း ခံစားလိုက်ရသည်။ တကယ်လို့သာ သူတို့ လူတစ်ရာကို သတ်ပစ်ခဲ့မိရင် အဲဒါတွေက အလကား ဖြစ်သွားမှာပေါ့။ လူသတ်ဖို့ ဘယ်လောက်လွယ်လွယ်ကူကူ စဉ်းစားခဲ့မိလဲ ဆိုတာ၊ သတ်ဖြတ်ခြင်းက ဘယ်လောက်တောင် လက်ခံနိုင်စရာ ဖြစ်လာခဲ့လဲ ဆိုတာကို တွေးမိပြီး သူတို့ လည်ချောင်းထဲတွင် ဆို့နင့်လာသည်။

"သင်တို့အားလုံး သူ့ကို ကျေးဇူးတင်သင့်တယ်" အာရန်ကို လက်ညှိုးထိုးပြပြီး သူမ ပြောလိုက်သည်။ "ဘယ်လို အကြောင်းပြချက်နဲ့ပဲ သူ တားခဲ့တားခဲ့၊ သူက သင်တို့အားလုံးကို ဒီအဆင့်အတွက် အကောင်းဆုံး ဇာတ်သိမ်းတစ်ခု ရရှိအောင် လုပ်ပေးနိုင်ခဲ့တာပဲ"

"ကဲ... အချိန်မဆွဲတော့ဘဲ ကောင်းကင်တမန် တံဆိပ် (Angel Seal) ငါးခုကို ပေးအပ်ဖို့ အချိန်ရောက်ပါပြီ" အယ်လ်တန် ပြောလိုက်သည်။

သူမ လက်ကို မြှောက်လိုက်ရာ သူမအထက်တွင် တံဆိပ်ငါးခု ပေါ်လာသည်။ ထိုနေရာတွင် ရပ်နေသူတိုင်း၏ စိတ်နှလုံးထဲတွင် လိုချင်တပ်မက်မှု၊ ဆာလောင်မှုများ ဖြစ်ပေါ်လာသော်လည်း၊ သူတို့အများစုကတော့ ထိုအရာကို ရလောက်အောင် စွမ်းဆောင်ရည် မကောင်းခဲ့မှန်း ကိုယ့်ကိုယ်ကို သိကြသည်။

တံဆိပ်များသည် လေထုထဲသို့ ပျံဝဲသွားကြသည်။ တစ်ခုက အယ်လီနာဆီသို့၊ တစ်ခုက လီယွန်ဆီသို့၊ တစ်ခုက ဆံပင်ရွှေရောင် ကောင်လေးဆီသို့၊ တစ်ခုက B အဆင့် ဆံပင်နက် ကောင်မလေးတစ်ယောက်ဆီသို့၊ ပြီးတော့ နောက်ဆုံးတစ်ခုက အာရန်ဆီသို့ ရောက်ရှိသွားသည်။

အာရန်က သူ့လက်ကို ထိသည်နှင့် တံဆိပ်ကို ဖမ်းဆုပ်လိုက်သည်။

[ သင့်အနေဖြင့် ကောင်းကင်တမန် တံဆိပ်တစ်ခု ရရှိပါသည် ]

တံဆိပ်မရလိုက်သူများသည် ရလဒ်အပေါ် ဒေါသထွက်ကြသော်လည်း၊ အခြားကိစ္စများစွာလိုပင် သူတို့၏ ဒေါသကို မျိုသိပ်လိုက်ကြရသည်။ အဘယ်ကြောင့်ဆိုသော် B အဆင့် ကောင်မလေးမှလွဲ၍ ကျန်ရရှိသွားသူများကို သွားရောက် ယှဉ်ပြိုင်တိုက်ခိုက်ရန် သူတို့ အိပ်မက်ပင် မမက်ရဲကြသောကြောင့် ဖြစ်သည်။

ဒီအဆင့်၏ ကမ်းလှမ်းချက်များ ပြီးဆုံးသွားပြီ ဖြစ်သဖြင့် နောက်တစ်ဆင့်သို့ သွားရန် အချိန်ရောက်ပြီ ဖြစ်သည်။ အယ်လ်တန်က ခရစ္စတယ်ကို ညွှန်ပြလိုက်သည်။

"အခု သင်တို့အားလုံး ခရစ္စတယ်ဆီသွားပြီး နောက်ထပ် အထပ်ဆီကို သွားနိုင်ပါပြီ။ ငါ အဲဒီမှာ စောင့်နေမယ်" သူမ ပြောလိုက်သည်။

သူတို့ တစ်ယောက်ပြီးတစ်ယောက် ခရစ္စတယ်ဆီ လျှောက်သွားပြီး လက်တင်လိုက်ကြသည်။ ထိလိုက်သည်နှင့် ချက်ချင်းပင် တယ်လီပို့ (Teleport) လုပ်ခြင်း ခံလိုက်ရသည်။

သူတို့ မျက်လုံးဖွင့်ကြည့်လိုက်သည့်အခါ ကြီးမားကျယ်ပြန့်သော မြေအောက် စခန်းချရာနေရာကြီး တစ်ခုကဲ့သို့သော နေရာတွင် ရောက်ရှိနေသည်ကို တွေ့လိုက်ရသည်။ ကျောက်ဆောင်ကြမ်းပြင်ပေါ်တွင် ကြီးမားသော တဲပေါင်း ရာနှင့်ချီ၍ ရှိနေပြီး၊ နေရာတစ်ခုလုံးကို ဤဂူကြီး၏ မျက်နှာကြက်မှ တွဲလောင်းကျနေသော တောက်ပသည့် ခရစ္စတယ် အသေးလေးများဖြင့် အလင်းပေးထားသည်။

ဂူတစ်ခု ဖြစ်လင့်ကစား အလွန် ကျယ်ဝန်းလှသည်။ လေထုက အေးမြပြီး နူးညံ့သော လေပြေလေညှင်း တိုက်ခတ်နေသည်။

စခန်းအတွင်းတွင် သိုလှောင်သေတ္တာများစွာကို စီထားပြီး၊ အလယ်ဗဟိုတွင် ခရစ္စတယ် ကျောက်တိုင်တစ်ခု ရှိနေသည်။

လူတိုင်း ဤအံ့သြဖွယ်နေရာသို့ ရောက်ရှိလာပြီးနောက် အယ်လ်တန် ပေါ်လာသည်။ သူတို့ ရောက်ရှိနေသော နေရာကို အံ့သြမှင်သက်စွာ ကြည့်ရှုနေကြသော လူများကို သူမ ကြည့်လိုက်သည်။

"ဒါက စမ်းသပ်မှုရဲ့ နောက်တစ်ဆင့်ပါ။ ဒီအဆင့်အတွက်တော့ အခြေအနေတွေက တော်တော်လေး ကွဲပြားသွားပါပြီ" သူမ ပြောရင်း လက်ကို မြှောက်ကာ လက်နှစ်ချောင်း ထောင်ပြလိုက်သည်။

"လက်ရှိမှာ ဒီဂူထဲရဲ့ ဆန့်ကျင်ဘက် အစွန်းတစ်ဖက်စီမှာ ခရစ္စတယ် နှစ်တိုင် ရှိနေပါတယ်။ အဲဒီနှစ်ခုကြားမှာတော့ ပုံစံမျိုးစုံရှိတဲ့ ဂူဖွဲ့စည်းပုံ ကွန်ရက်တစ်ခု ရှိနေပါတယ်"

"ခရစ္စတယ်နှစ်ခုရဲ့ ပန်းတိုင်က ဘာလဲ။ ရိုးရှင်းပါတယ်၊ ဒါက အလံလုပွဲ (Capture the flag) ကစားနည်းပါပဲ။ အခြား နယ်ပယ် (Sector) တစ်ခုက လာတဲ့ နောက်ထပ် နိုးထသူအုပ်စု တစ်စု ရှိပါတယ်။ သူတို့ကလည်း ဒုတိယအဆင့်ကို ပြီးမြောက်ထားပြီး အလံလုပွဲ ကစားဖို့ အခု ဒီကို ရောက်နေကြပါပြီ"

"ဒီကစားပွဲရဲ့ ပန်းတိုင်ကတော့ ရန်သူ့ ခရစ္စတယ်ကို အရင် ဖျက်ဆီးပစ်ဖို့ပါပဲ။ အဲဒါဆိုရင် သင်တို့ အနိုင်ရပြီး နောက်တစ်ဆင့်ကို တက်လှမ်းနိုင်ပါလိမ့်မယ်"

"ဒီစမ်းသပ်မှုအတွက် အချိန်ကန့်သတ်ချက် မရှိပါဘူး။ မတိုက်ခိုက်ခင် သင်တို့ ဘယ်ရောက်နေလဲဆိုတာ ပိုကောင်းကောင်း နားလည်ဖို့အတွက် အစီအစဉ်ချတာ၊ ကင်းထောက်တာတွေ လုပ်ဖို့ အချိန်ယူတာက ပိုကောင်းပါလိမ့်မယ်။ ပတ်ဝန်းကျင် အနေအထား တစ်ခုလုံးကို ဘယ်လို အသုံးချရမလဲ သိမယ်ဆိုရင် သင်တို့အတွက် အားသာချက် ဖြစ်လာနိုင်ပါတယ်"

သူမ ရှင်းပြပြီးနောက်၊ နောက်ထပ် နိုးထသူ အဖွဲ့တစ်ဖွဲ့နှင့် ယှဉ်ပြိုင်ရမည်ကို သိလိုက်ရသဖြင့် သူတို့၏ မျက်နှာများ လေးလံသွားကြသည်။ ဒါက သေချာပေါက် အလွန် အန္တရာယ်များသော အဆင့်တစ်ခု ဖြစ်လာပေတော့မည်။

သူတို့၏ မျက်နှာထားများကို ကြည့်ပြီး အယ်လ်တန် နူးညံ့စွာ ပြုံးလိုက်သည်။ သူမ ပြောလို့ မပြီးသေးပေ။ "ဝမ်းနည်းစရာကတော့၊ ဒီနေရာမှာ သင်တို့ စိတ်ပူရမယ့်အရာက တခြား နိုးထသူအဖွဲ့ တစ်ခုတည်း မဟုတ်ပါဘူး။ နောက်ထပ် ရှိပါသေးတယ်"

"ဒီအထပ်တစ်ခုလုံးက အင်းဆက်ပုံသဏ္ဍာန် ဘီလူးမျိုးနွယ် (Insectoid monster races) တွေ အများကြီး နေထိုင်တဲ့ ဂေဟစနစ်ကြီးတစ်ခု ဖြစ်ပါတယ်။ သူတို့က အသံနဲ့ ခန္ဓာကိုယ် အပူချိန်ကို တိုက်ခိုက်တတ်ပြီး လူသားအသားကို နှစ်သက်ကြတယ်။ သူတို့ရဲ့ ခွန်အားကတော့ အလွန် အားနည်းတာကနေ မြို့တစ်မြို့ကို ဖျက်ဆီးပစ်နိုင်လောက်အောင် သန်မာတာတွေအထိ ရှိပါတယ်။ အဲဒါက သင်တို့ ဘယ်ကောင်နဲ့ တွေ့မလဲ၊ ဒါမှမဟုတ် ဘယ်ကောင်က သင်တို့ဆီ လာမလဲ ဆိုတာအပေါ် မူတည်ပါတယ်"