အခန်း (၁၈) - သူဌေးကောင်ကို တိုက်ခိုက်ခြင်း

အခြားလူများအားလုံး ကြီးမားသော ဝံပုလွေကြီးကို ကြောင်ငေးကြည့်နေကြစဉ်မှာပင် အာရန်က လှုပ်ရှားနေပြီ ဖြစ်သည်။ သူသည် အနက်ရောင် အကွက်တစ်ခုမှ တစ်ခုသို့ ခုန်ကူးကာ ရှေ့သို့ ပြေးဝင်သွားသည်။ သူသည် အားကစားသမား တစ်ယောက်ကဲ့သို့ ကျွမ်းကျင်သူမဟုတ်သော်လည်း အဆင့်အနည်းငယ် တက်ပြီးနောက်တွင် သူ့ခန္ဓာကိုယ်သည် ယခင်ကထက် ပိုမို ပေါ့ပါးပြီး သန်မာလာသည်ကို ခံစားလိုက်ရသည်။

လျှပ်စီးများ ဖုံးလွှမ်းနေသော ဝံပုလွေတစ်ကောင် သူ့ဆီသို့ ခုန်အုပ်လိုက်သည်။ အာရန် အံကြိတ်ကာ ဘေးသို့ ရှောင်လိုက်ရာ လျှပ်စီးအက်ကွဲသံများနှင့်အတူ သူ့မျက်နှာဘေးမှ ကပ်လွဲသွားသည်ကို ခံစားလိုက်ရသည်။ ဝံပုလွေသည် အကွက်ပေါ်တွင် လျှောတိုက်ပါသွားပြီး ထပ်မံ ခုန်အုပ်ရန် ပြင်လိုက်သော်လည်း ဖန် (Fang) က ကြားဖြတ်ဝင်ရောက်လာပြီး ဝံပုလွေကို မြေကြီးပေါ်သို့ ဆောင့်ချလိုက်သည်။

နောက်ထပ် ဝံပုလွေတစ်ကောင် အာရန်ဆီသို့ ခုန်ဝင်လာသည်။ 'လက်သည်းကုတ်ချက်' (Claw Strike) ကို သုံးရန် အချိန်နှောင်းသွားပြီဖြစ်၍ ကာကွယ်ရန် လက်မောင်းကိုသာ မြှောက်လိုက်ရသည်။ ၎င်း၏ အစွယ်များသည် သံချပ်ကာ လက်အိတ်နှင့် ရိုက်ခတ်မိပြီး ပြန်ကန်ထွက်သွားကာ ထိုရိုက်ခတ်မှု အရှိန်ကြောင့် ၎င်း၏ ခန္ဓာကိုယ်ပါ တုန်ခါသွားသည်။ အာရန်က ၎င်း၏ လည်ပင်းကို ဖမ်းဆုပ်ပြီး ခေါင်းကို အောက်သို့ ဆောင့်ချလိုက်သည်။

"အာ......."

'ဘုန်း'

သူသည် ဝံပုလွေ၏ ဦးခေါင်းခွံကို မြေကြီးနှင့် ပြင်းထန်စွာ ဆောင့်ချလိုက်သဖြင့် သစ်သီးတစ်လုံးကို ရိုက်ခွဲလိုက်သကဲ့သို့ ခေါင်းကွဲကြေသွားသည်။

[ သင့်အနေဖြင့် ဝိညာဉ်အပိုင်းအစ ၅၀ ရရှိပါသည် ]

အာရန် မျက်တောင်ပင် မခတ်ပေ။ နောက်တစ်ကွက် ရွှေ့ရန်အတွက် နေရာကို အကဲခတ်နေပြီ ဖြစ်သည်။

"စနစ် (System)... အမြန်နှုန်း (Speed) နဲ့ ကိုယ်ခန္ဓာကြံ့ခိုင်မှု (Constitution) ဆီ ၂ မှတ်စီ ပေါင်းထည့်လိုက်" အဖြူကွက် နှစ်ကွက်ကျော်မှ နောက်ထပ် အနက်ရောင် အကွက်တစ်ခုကို လှမ်းမျှော်ကြည့်ရင်း သူ အမိန့်ပေးလိုက်သည်။ တဖြည်းဖြည်း ကျဉ်းမြောင်းလာသော ကြမ်းခင်းပေါ်တွင် ဆက်လက် လှုပ်ရှားနိုင်ရန် သူ့အနေဖြင့် ပိုမိုပေါ့ပါးဖျတ်လတ်မှုနှင့် ခန္ဓာကိုယ်ကို ပိုမိုကောင်းမွန်စွာ ထိန်းချုပ်နိုင်စွမ်း လိုအပ်သည်။

အခြား နိုးထသူ (Awakened) အချို့လည်း အခြေအနေကို သဘောပေါက်လာကြသည်။ သူတို့၏ မျက်လုံးများက အလယ်ဗဟိုမှ ကြီးမားသော ဝံပုလွေကြီးဆီသို့ ရောက်သွားကြသည်။ ၎င်းကို သတ်ဖြတ်နိုင်လျှင် မယုံနိုင်လောက်အောင် များပြားသော ဝိညာဉ်အပိုင်းအစများနှင့် ဝိညာဉ်စွမ်းအင်များကိုပါ ရရှိနိုင်မည်မှာ သေချာသည်။

သို့သော် ထိုကဲ့သို့ သတ္တဝါကြီးဆီသို့ ပြေးသွားရန် လူတိုင်း သတ္တိမရှိကြပေ။ လုပ်ရဲသူများကသာ စင်မြင့်များကို ဖြတ်ကျော်ကာ ထိုဘီလူးကြီးရှိရာသို့ အပြေးအလွှား ခုန်ကူးသွားကြသည်။

သူဌေးကောင် ဝံပုလွေကြီး (Boss wolf) သည် အာရန် ချဉ်းကပ်လာသည်ကို သတိထားမိလိုက်ပြီး စင်မြင့်တစ်ခုလုံး တုန်ခါသွားစေသည့် ဟိန်းဟောက်သံနိမ့်နိမ့်ကို ပြုလုပ်လိုက်သည်။ အနီးနားရှိ ဝံပုလွေများသည် အမွှေးများကြားတွင် လျှပ်စီးများ တဖျစ်ဖျစ် မြည်လျက် အာရန်ဆီသို့ ပြေးဝင်လာကြသည်။

ဖန်သည် သူ့ပြိုင်ဘက်ကို အဆုံးသတ်လိုက်ပြီး ကူညီရန် ပြေးလာသော်လည်း အချိန်မီ ရောက်လာနိုင်မည် မဟုတ်ပေ။

အာရန် သူ့ဝိညာဉ်စွမ်းအင် နည်းနေပြီဖြစ်ကြောင်း သိသည်။ သူ အရိပ်များကို အများကြီး မဆင့်ခေါ်နိုင်သလို၊ တစ်ယောက်တည်း တိုက်ခိုက်ရန်လည်း မဖြစ်နိုင်ပေ။ ထို့ကြောင့် သူ လောင်းကြေးထပ်လိုက်သည်။ ပေါင်းစည်းထားသော ဝံပုလွေ (Merged wolf) ကို သူ ဆင့်ခေါ်လိုက်သည်။

ကြီးမားသော အရိပ်ဝံပုလွေကြီး ပေါ်လာသည်နှင့် အာရန် ၎င်း၏ ကျောပေါ်သို့ ချက်ချင်း ခုန်တက်လိုက်သည်။ ထိုသတ္တဝါကြီးက မိုးကြိုးပစ်သံကဲ့သို့ ကျယ်လောင်စွာ ဟိန်းဟောက်လိုက်ရာ အခြား ဝံပုလွေများ တုန်လှုပ်သွားပြီး ခေတ္တမျှ တုန့်ဆိုင်းသွားသော်လည်း ဆက်လက် ဝင်ရောက်လာကြသည်။

ရပါသည်။ အာရန်တွင် အခြား အစီအစဉ် ရှိသည်။

အရိပ်ဝံပုလွေ၏ ကျောပေါ်တွင် မတ်တပ်ရပ်လျက် သူ ကွင်းပြင်ကို အကဲခတ်လိုက်သည်။ သူဌေးကောင်နှင့် အနီးဆုံး အနက်ရောင် အကွက်ကို တွေ့လိုက်ရသည့်အခါ သူ ခုန်ထွက်လိုက်သည်။ ဝင်လာနေသော ဝံပုလွေ ငါးကောင်ကို ကျော်လွှားကာ ပျံသန်းသွားပြီး ပြင်းထန်စွာ ဆင်းသက်လိုက်သည်။ အကွက်အစွန်းမှ ပြုတ်ကျလုနီးပါး ဖြစ်သွားသော်လည်း အဖြူရောင်အကွက်ကို မထိမိခင်လေးတွင် ထိန်းလိုက်နိုင်ခဲ့သည်။

သူ အသက်ကို မြန်မြန်တစ်ချက် ရှူလိုက်ပြီး နောက်လှည့်ကြည့်လိုက်သည်။ သူ့အရိပ်နှစ်ကောင်သည် ဝံပုလွေများကို ကိုက်ဖြတ်တိုက်ခိုက်နေကြပြီ ဖြစ်သဖြင့် သူ့အတွက် လိုအပ်သော နေရာလွတ်ကို ရရှိသွားစေသည်။

ယခု သူ သူဌေးကောင်ကို အာရုံစိုက်လိုက်သည်။

ကြီးမားသော ဝံပုလွေကြီးသည် အာရန်နှင့် မျက်လုံးချင်း ဆုံလိုက်သည်။ ၎င်း၏ အကြည့်သည် ယခုအခါ ပြောင်းလဲသွားပြီး ပိုမို စူးရှကာ အာရုံစိုက်လာသည်။ နောက်ဆုံးတွင် အာရန်ကို စစ်မှန်သော ခြိမ်းခြောက်မှုတစ်ခုအဖြစ် အသိအမှတ်ပြုလိုက်ပြီ ဖြစ်သည်။

၎င်းသည် မိုးကြိုးပစ်သံကဲ့သို့ ဟိန်းဟောက်လိုက်သည်။ အနက်ရောင် လျှပ်စီးတန်းများ ပေါက်ကွဲထွက်ပေါ်လာပြီး စင်မြင့်ကို ဖျက်ဆီးပစ်မည့် လမ်းကြောင်းများအဖြစ် ထိုးခွင်းသွားသည်။

အာရန် ရပ်နေသော နေရာကို လျှပ်စီးများ မဖျက်ဆီးမီလေးမှာပင် သူသည် နောက်ထပ် အနက်ရောင် အကွက်တစ်ခုဆီသို့ ခုန်ကူးလိုက်သည်။ သူ မြေကြီးပေါ် ခြေချလိုက်သည်နှင့် ဝံပုလွေအငယ် နှစ်ကောင် သူ့ဆီ ပြေးဝင်လာသည်။

သူ 'လက်သည်းကုတ်ချက်' ကို အသက်သွင်းလိုက်ပြီး ဝံပုလွေတစ်ကောင်၏ ခြေထောက်များကို ပိုင်းဖြတ်လိုက်ရာ ၎င်းလဲကျသွားသည်။ ဒုတိယမြောက် ဝံပုလွေသည် ပါးစပ်ထဲတွင် လျှပ်စီးများ ပြည့်နှက်လျက် ခုန်အုပ်လိုက်သည်။ အာရန် လက်မောင်းဖြင့် ကာကွယ်ပြီး ကိုက်ချက်ကို တားဆီးလိုက်ကာ ၎င်း၏ ခေါင်းကို အရှိန်ဖြင့် လှည့်ချိုးပစ်လိုက်သည်။

'ဂျွတ်'

[ သင့်အနေဖြင့် ဝိညာဉ်အပိုင်းအစ ၅၀ ရရှိပါသည် ]

သူ ထပ်မံ ခုန်လိုက်ပြီး အခြား အနက်ရောင် အကွက်တစ်ခုပေါ်သို့ ရောက်ရှိသွားရာ သူဌေးကောင်နှင့် ပိုမို နီးကပ်သွားသည်။

အခြား နိုးထသူများသည်လည်း သူဌေးကောင် ဝံပုလွေရှိရာသို့ ဦးတည်လာနေကြသည်။ S အဆင့် နှစ်ယောက်နှင့် A အဆင့်တို့လည်း ထိုအထဲတွင် ပါဝင်ပြီး လမ်းကြောင်းရှင်းရန် သူတို့၏ စွမ်းအားများကို အသုံးပြုနေကြသည်။

အာရန် လျှာတစ်ချက် ခေါက်လိုက်သည်။ "တောက်" ဒီအကောင်ကို သတ်ဖြတ်ခြင်းက သူ့လက်ချက်သာ ဖြစ်ရမည်။ နောက်ဆုံး အဆုံးသတ်တိုက်ချက် (Final blow) ကို ဘယ်သူ့ကိုမှ အပါမခံနိုင်။

ဝံပုလွေအငယ် အားလုံးနီးပါး သေဆုံးကုန်ပြီ။ ထို့ကြောင့် သူဌေးကောင်ဆီ သွားရသည်မှာ ပိုလွယ်ကူလာသည်။ သို့သော် သူဌေးကောင် ဝံပုလွေက ၎င်းအတွက် လက်ပါးစေများ မလိုအပ်ကြောင်း သက်သေပြလိုက်သည်။

၎င်း၏ ခန္ဓာကိုယ်တစ်ခုလုံး အနက်ရောင် လျှပ်စီးများဖြင့် တောက်လောင်လာပြီး အရပ်မျက်နှာ အနှံ့သို့ လျှပ်စီးတန်းများ ပစ်လွှတ်လိုက်သည်။ ဝေးဝေးနေလေ ပိုဘေးကင်းလေ ဖြစ်သည်။ သို့သော် အလယ်ဗဟိုတွင် ရောက်နေသော အာရန်ကဲ့သို့ လူများအတွက်မူ လုံးဝ သေလမ်းပင်။

အယ်လီနာက ဦးစွာ လှုပ်ရှားလိုက်သည်။ သူမ လက်များကို ဖြန့်ကားလိုက်ပြီး ဆွဲငင်အား (Gravity) တိုက်ခိုက်မှုကို ထုတ်လွှတ်ကာ သူဌေးကောင် ဝံပုလွေ၏ ခန္ဓာကိုယ်ပေါ်သို့ ကြီးမားသော ဖိအားဖြင့် ဖိချလိုက်သည်။ ဝံပုလွေ၏ ခြေထောက်များ ကွေးညွှတ်သွားပြီး စက္ကန့်အနည်းငယ်ကြာ ဝပ်ဆင်းသွားစေသည်။

သို့သော် စက္ကန့်အနည်းငယ်သာ ခံသည်။

၎င်းသည် ဒေါသတကြီး ဟိန်းဟောက်လျက် ပြန်ထလာပြီး သူမရှိရာသို့ တည့်တည့်မတ်မတ် ကြီးမားသော လျှပ်စီးမှုတ်ချက် (Lightning breath) ဖြင့် မှုတ်ထုတ်လိုက်သည်။ နိုးထသူများ ကြောက်လန့်တကြား ထွက်ပြေးကြသည်။ အယ်လီနာသည် သူမ၏ ခန္ဓာကိုယ်ကို ပေါ့ပါးအောင် ပြုလုပ်ပြီး လေပေါ်သို့ မြင့်မားစွာ ခုန်တက်လိုက်သဖြင့် ပေါက်ကွဲမှုကို သီသီလေး ရှောင်လွှဲနိုင်လိုက်သည်။

ဝံပုလွေက ခေါင်းကို မော့လိုက်ပြီး ထပ်မံ ပစ်လွှတ်ရန် ပြင်လိုက်သည်။

ထိုသို့ မလုပ်နိုင်ခင်မှာပင် ကြီးမားသော သတ္ထုဓားတစ်လက်သည် လေထုကို ခွင်းလျက် ၎င်း၏ ဘေးဘက်သို့ စိုက်ဝင်သွားသည်။ လျှပ်စီးများ တောက်ပသွားသော်လည်း ဓားသွားသည် ၎င်း၏ အရေခွံထဲသို့ တစ်ဝက်တစ်ပျက် စိုက်ဝင်သွားသည်။ အာရန် အောက်ဘက်သို့ ကြည့်လိုက်ရာ လီယွန်ကို တွေ့လိုက်ရသည်။ လီယွန်သည် လက်များကို ဆန့်တန်းထားပြီး သူ့အနောက်တွင် သတ္ထုဓားများစွာ ဖြစ်ပေါ်နေသည်။

ဝံပုလွေသည် နာကျင်မှုကြောင့် အော်ဟစ်လိုက်ပြီး ၎င်း၏ ခြေသည်းဖြင့် မြေကြီးကို ရိုက်ချလိုက်ရာ လျှပ်စီးလှိုင်း (Shockwave) များ ထွက်ပေါ်လာသည်။ ထိုလှိုင်းများသည် ကြမ်းခင်းပြင်ကို ဖြတ်သန်းသွားသည်။ နိုးထသူ အများအပြားမှာ ရှောင်တိမ်းရန် နှေးကွေးသွားသဖြင့် အဖြူရောင် အကွက်များပေါ်သို့ ရောက်ရှိသွားကာ ချက်ချင်းပင် အလင်းမှုန်များအဖြစ် ပေါက်ကွဲပျောက်ကွယ်သွားကြသည်။

သေဆုံးသွားကြပြီ။

"သောက်ကျိုးနည်း... ဒေါသထွက်သွားပြီဟ" အာရန် တွေးလိုက်သည်။ သူ အခု လှုပ်ရှားမှ ဖြစ်မည်။

[ အဆင့်တက်သွားပါပြီ၊ +၄ အမှတ်များ (Stat points) ရရှိသည် ]

ဖန်နှင့် အရိပ်ဝံပုလွေတို့သည် သူတို့၏ ပြိုင်ဘက်များကို ရှင်းလင်းလိုက်သဖြင့် အာရန် နောက်ထပ် အဆင့်တစ်ခု တက်သွားခြင်း ဖြစ်သည်။ သူ့မျက်နှာပေါ်တွင် အပြုံးတစ်ခု ဖြစ်ပေါ်လာသည်။

"စနစ်... ကာကွယ်မှု (Defense) နဲ့ ခွန်အား (Strength) ဆီ ၂ မှတ်စီ ပေါင်းထည့်" သူ ပြောလိုက်သည်။

သူ့မျက်လုံးများကို သူဌေးကောင်ဆီ စူးစိုက်ထားပြီး အကွက်တစ်ခုမှ တစ်ခုသို့ အလျင်အမြန် ခုန်ကူးသွားလိုက်သည်။ တိုက်ခိုက်နိုင်မည့် အကွာအဝေးသို့ ရောက်သောအခါ သူ လက်သည်းကုတ်ချက်ကို ထုတ်လွှတ်လိုက်သည်။

"အာ......." သူ အသုံးပြုဖူးသမျှထဲတွင် အားအပါဆုံးဖြင့် လက်ကို ဝှေ့ယမ်းလိုက်ရာ ကြီးမားသော လက်သည်းကုတ်ချက် ထွက်ပေါ်လာပြီး ဝံပုလွေဆီသို့ ပြေးဝင်သွားသည်။ သို့သော် ဝံပုလွေက အသင့်ပြင်ထားပြီးဖြစ်သည်။ ၎င်းသည် လမ်းကြောင်းမှ ဖယ်ကာ တိုက်ခိုက်မှုကို ရှောင်တိမ်းလိုက်ပြီးနောက် အာရန်ဆီသို့ ပြန်လည် ခုန်အုပ်လိုက်သည်။ အာရန်၊ လီယွန်နှင့် အယ်လီနာတို့သည် ဤနေရာတွင် အကြီးမားဆုံး ခြိမ်းခြောက်မှုများ ဖြစ်သည်ဟု ၎င်းက ဆုံးဖြတ်လိုက်ခြင်း ဖြစ်သည်။

သို့သော် ဝမ်းနည်းစရာမှာ ထိုသို့ အာရုံစိုက်လိုက်ခြင်းကြောင့် လေပေါ်သို့ ရောက်ရှိနေသော ဆံပင်ရွှေရောင်နှင့် ကောင်လေးကို ၎င်း သတိမထားမိလိုက်ပေ။ ထိုကောင်လေးသည် လက်ထဲတွင် ဓားကို ကိုင်ထားပြီး အားကုန်လွှဲ၍ ခုတ်ချလိုက်တော့သည်။