မွန်းသည် ပါးစပ်ထဲမှ အစားအစာများကို မျိုချပြီးမှ ပြန်ဖြေလိုက်သည်။ "ကျွန်တော် ရုတ်တရတ်တိုက်ခိုက်ရေးသမား မဟုတ်ပါဘူး။ အဆင့်ကွာခြားချက်ကြောင့် ဖြစ်မယ်ထင်တယ်။ ကျွန်တော် အခု အဆင့် (၁၈) ရောက်နေပြီလေ"
ရုတ်တရတ်တိုက်ခိုက်ရေးသမားများ ဆိုသည်မှာ မိမိတို့၏ အဓိက အတတ်ပညာရပ်အပြင် အခြားသော ခွန်အားပိုင်းဆိုင်ရာများကိုပါ လိုက်စားသည့် နိုးထသူများ ဖြစ်ကြသည်။ စစ်သည်များနှင့် ရင်ဘောင်တန်းနိုင်ရန် ကိုယ်ကာယ လေ့ကျင့်သော မှော်ဆရာများ သို့မဟုတ် အခြေခံ ဓားသိုင်းအပြင် မှော်စွမ်းအင်ကိုပါ ထူးချွန်အောင် လေ့ကျင့်ထားသည့် စစ်သည်များကို ဆိုလိုခြင်းဖြစ်သည်။ ထိုလမ်းစဉ်နှစ်ခုလုံးကို တစ်ပြိုင်နက် ထိန်းသိမ်းနိုင်ရန်မှာ စိတ်ရောကိုယ်ပါ နှစ်မြှုပ်ထားရသလို အရင်းအမြစ်များစွာလည်း လိုအပ်သည်။ ရုတ်တရတ်တိုက်ခိုက်ရေးသမားများသည် သူတို့၏ အဓိက အတတ်ပညာရပ် ပြင်ပရှိ ကျွမ်းကျင်မှု (Skill) များကို ရယူနိုင်စွမ်းမရှိသလို ဒုတိယစွမ်းရည်မှာလည်း အလွန်အားနည်းကာ လျစ်လျူရှုထားနိုင်သည့် အဆင့်တွင်သာ ရှိတတ်ကြသည်။ သို့သော်လည်း အချို့ကမူ ထိုသို့ လေ့ကျင့်ခြင်းမှာ အသုံးဝင်သည်ဟု အခိုင်အမာ ယုံကြည်ကြဆဲပင်။
အဲလစ်ဆာ၏ မျက်လုံးများ ချက်ချင်း ဝိုင်းစက်သွားသည်။ "ရှင့်အဆင့်က မြင့်မယ်ဆိုတာ သိထားပေမဲ့... (၁၈) တောင်လား။ ဒါနဲ့ ရှင့်ကို စခန်းမှာ တစ်ခါမှ မမြင်ဖူးပါလား..."
ဝါရင့်စစ်သည် အများစုမှာ အဆင့် (၁၆) နှင့် (၁၇) ဝန်းကျင်သာ ရှိကြသည်။ ထိုအဆင့်သို့ ရောက်ရန် သူတို့အဖို့ တစ်နှစ်ခန့် အချိန်ယူခဲ့ရပြီး လွယ်ကူသော ခရီးတစ်ခု မဟုတ်ခဲ့ပေ။ ပါရမီ၊ အရင်းအမြစ်နှင့် အဆက်အသွယ် ကောင်းမွန်သူများမှာမူ ထိုထက်ပို၍ အချိန်တိုအတွင်း ရောက်ရှိနိုင်သော်လည်း ထိုကဲ့သို့သော သူများသည် နာမည်ကျော်ကြားလေ့ရှိကြသည်။ မွန်းကဲ့သို့ လူမသိသူမသိ မဟုတ်ကြပေ။
မွန်းက အဖြေတစ်ခုကို စဉ်းစားမရမီမှာပင် တပ်စုမှူးက ပြုံးလျက် ဝင်ပြောလိုက်သည်။ "အဲလစ်ဆာ... မင်း ငါတို့ သူငယ်ချင်းအသစ်ကို စစ်မေးနေတာလား။ သူ့ကို အနေခက်အောင် မလုပ်ပါနဲ့ဦး"
အဲလစ်ဆာက မွန်းဘက်သို့ ချက်ချင်းလှည့်ကာ အားနာစပြုနေသော မျက်နှာထားဖြင့် "ကျွန်မ-ကျွန်မ ရည်ရွယ်တာ မဟုတ်ပါဘူး... မွန်း-"
မွန်းက ခေါင်းခါပြရင်း သူမ၏ တောင်းပန်စကားကို ဖြတ်ပြောလိုက်သည်။ "ရပါတယ်... ဘာမှမဖြစ်ဘူး"
စခန်းတွင် သူ့ကို ဘာကြောင့် တစ်ခါမှ မမြင်ဖူးသလဲဟူသော သူမ၏ မမေးရသေးသည့် မေးခွန်းကိုတော့ သူ မဖြေခဲ့ပေ။ တပ်စုမှူး ဝင်ကူလိုက်ခြင်းကြောင့် သူ အခြေအနေတစ်ခုမှ အသာလေး ရှောင်ထွက်ခွင့် ရသွားခဲ့သည်။
သူတို့သည် ဆက်လက် စားသောက်ကြရင်း အရင်က အမဲလိုက်ခဲ့သည့် အကြောင်းများ၊ သေလုမျောပါး အတွေ့အကြုံများနှင့် သူတို့ တွေ့ကြုံခဲ့ဖူးသည့် ထူးဆန်းသော သားရဲများအကြောင်းကို ဟာသနှောကာ ပြောဆိုရင်း ရယ်မောနေကြသည်။ လေထုမှာ ပေါ့ပါးလွတ်လပ်ပြီး သက်သောင့်သက်သာ ရှိလှသည်။ မွန်းကမူ အများအားဖြင့် တိတ်ဆိတ်နေပြီး တစ်ခါတစ်ရံမှသာ စကားဝိုင်းထဲတွင် ပါဝင်လေ့ရှိသည်။
♢ ♢ ♢ ♢
နံနက်ခင်း အလင်းရောင် သစ်ပင်များကြားမှ ဖြာကျလာသောအခါ အဖွဲ့သားများသည် စခန်းရုပ်သိမ်းပြီး သမင်ကြီးကို တွေ့ရှိခဲ့သည့် နေရာသို့ ခရီးဆက်ခဲ့ကြသည်။ လေတိုက်နှုန်း ပြင်းသော်လည်း ခံနိုင်ရည်ရှိသည့် အနေအထားတွင်သာ ရှိသည်။ မြေမျက်နှာသွင်ပြင်မှာ တောအုပ်မှသည် ကွင်းပြင်များဆီသို့ ပြောင်းလဲလာပြီး ကျောက်ဆောင်များ ပိုမိုများပြားလာသည့်တိုင် မြင်းများက တည်ငြိမ်စွာ လျှောက်လှမ်းနေကြသည်။
"ပတ်! ပတ်! ပတ်!"
သူတို့ ပန်းတိုင်နှင့် နီးကပ်လာသည်နှင့်အမျှ ကောင်းကင်ကြီးမှာ မှောင်မိုက်လာသည်။ မိုးတိမ်များက သဘာဝမဟုတ်သော အရှိန်အဟုန်ဖြင့် သက်ရှိတစ်ခုကဲ့သို့ လိပ်တက်လာကြသည်။ ထို့နောက် စက္ကန့်ပိုင်းအတွင်းမှာပင် မိုးစက်မိုးပေါက်အချို့မှသည် သည်းထန်စွာ ရွာသွန်းသော မိုးကြီးအဖြစ်သို့ ပြောင်းလဲသွားတော့သည်။
တပ်စုမှူးက လက်မြှောက်ကာ အရှိန်လျှော့ရန် အချက်ပြလိုက်သည်။ "ဒီနေရာပဲ" ဟု ကျောက်ဆောင်နှင့် မြေပြင်ပေါ်သို့ ရိုက်ခတ်နေသော မိုးသံများကြားမှ သူ အော်ပြောလိုက်သည်။ "ဒါက သမင်ကြီးရဲ့ နယ်မြေပဲ။ သတိထားကြ။ မိုးသံက ငါတို့ရဲ့ အသံတွေကို ဖုံးကွယ်ပေးလိမ့်မယ်၊ ဒါပေမဲ့ သူတို့ဘက်က အသံကိုလည်း ငါတို့ မကြားရနိုင်ဘူး"
ဝါရင့်စစ်သည်များသည် ရာသီဥတု ဆိုးရွားနေသော်လည်း အုပ်စုမပျက်ဘဲ လက်နက်များကို အသင့်ပြင်ထားကြသည်။ သံချပ်ကာများပေါ်သို့ မိုးရေများ စီးကျနေပြီး ဝတ်ရုံများလည်း စိုရွှဲကုန်သော်လည်း မည်သူမျှ မညည်းညူကြပေ။ ဒါက သူတို့အလုပ်၏ အစိတ်အပိုင်းတစ်ခုပင်။ မွန်းကမူ 'အစွန်းနှစ်ဖက်ဝတ်ရုံ' ကို တင်းတင်းကျပ်ကျပ် စည်းလိုက်သည်။ သည်းထန်သော မိုးဒဏ်ကြားတွင်ပင် သူ့ကို သက်သောင့်သက်သာ ရှိစေသည့် မှော်အစီအရင်ကြောင့် သူ ကျေးဇူးတင်မိသည်။ သူ၏ တုတ်ကောက်မှာမူ မိုးရေမစိုဘဲ လက်ထဲတွင် အသင့်ရှိနေပြီး အချိန်မရွေး မှော်ပညာ အသုံးပြုရန် အသင့်ပင်။
မိုးရေများကြားမှ အဝေးရှိ ပုံရိပ်အချို့ ပေါ်ထွက်လာသည်။ သစ်ပင်များ ကုန်ဆုံးသွားပြီး ကွင်းပြင်တစ်ခု ပေါ်လာရာ ထိုကွင်းပြင်ထဲတွင် သိသာထင်ရှားသော လှုပ်ရှားမှုတစ်ခု ရှိနေသည်။
"ဟိုမှာ!" မားကပ်စ်က လက်ညှိုးထိုးပြရင်း တိုးတိုးလေး ပြောလိုက်သည်။
ဒီလောက် အကွာအဝေးကနေတောင် ဝါရင့်စစ်သည်တွေ ဘာကြောင့် ဒီသမင်ကြီးနောက်ကို သုံးပတ်ကြာအောင် လိုက်နေရသလဲဆိုတာ မွန်း နားလည်သွားသည်။ ၎င်းမှာ အလွန်ပင် ခန့်ညားထည်ဝါလှသည်။ သမင်ကြီးသည် သည်းထန်စွာ ရွာနေသော မိုးအောက်တွင် မတ်တပ်ရပ်နေပြီး ၎င်း၏ ခန္ဓာကိုယ်မှာ သွယ်လျသော်လည်း ကျစ်လျစ်သော ကြွက်သားများဖြင့် ပြည့်နှက်နေသည်။ အမွေးအမှင်များမှာ ညိုနက်ရောင်ရှိပြီး မိုးရေစိုနေသည့်အတွက် အမည်းရောင်နှင့်ပင် ဆင်တူနေသည်။ ၎င်း၏ ဦးခေါင်းပေါ်တွင်မူ လှပကျော့ရှင်းစွာ ဖြာထွက်နေသော ကြီးမားသည့် ဦးချိုကြီးများ ရှိနေသည်။ ၎င်းသည် လက်ရှိတွင် သူသတ်ထားသော သားရဲငယ်တစ်ကောင်ကို စားသောက်နေပြီး အသားကို ခွာယူစားနေပုံမှာ အံ့ဩစရာကောင်းလောက်အောင် သိမ်မွေ့လှသည်။
တပ်စုမှူးက ချက်ချင်းပင် အသံတိတ်ရန် လက်ဖြင့် အချက်ပြလိုက်ပြီး မွန်းကို အနားသို့ လာရန် လက်ဟန်ပြလိုက်သည်။ မွန်းသည် မြင်းပေါ်မှ ဂရုတစိုက် ဆင်းလိုက်ပြီး သမင်ကြီးထံမှ မျက်တောင်မခတ်ဘဲ တပ်စုမှူးရှိရာသို့ ဖြည်းညင်းစွာ လျှောက်သွားသည်။ သူတို့သည် အတော်အတန် ဝေးသော အကွာအဝေးတွင် ရှိနေသဖြင့် အသံထွက်သွားမည်ကို မစိုးရိမ်သော်လည်း ခြေထောက်အောက်တွင် သစ်ကိုင်းခြောက်များ နင်းမိပြီး အသံမြည်သွားမည်ကိုတော့ အထူးသတိထားနေရသည်။
တပ်စုမှူး၏ တိုးတိုးလေး ပြောလိုက်သော စကားကို ကြားနိုင်သည့် အကွာအဝေးသို့ ရောက်သောအခါ ထိုသူက မေးသည်။ "မင်း ဘာလုပ်ဖို့ စီစဉ်ထားလဲ"
မွန်း ခဏလောက် စဉ်းစားလိုက်သည်။ သမင်ကြီး၏ အမူအရာ၊ လှုပ်ရှားပုံနှင့် အစာစားနေချိန်မှာပင် မိမိကိုယ်ကိုယ် နေရာချထားပုံများကို အသေအချာ လေ့လာလိုက်သည်။ "လောလောဆယ်တော့ အကဲခတ်ရုံပဲ လုပ်ကြရအောင်" ဟု မွန်းက ပြန်လည် တိုးတိုးလေး ပြောလိုက်သည်။ "လောစရာ မလိုပါဘူး။ ခင်ဗျားပြောပုံအရ ဒီသမင်က အမြဲတမ်း ဒီဝန်းကျင်မှာပဲ ရှိနေတယ်ဆိုတော့... အန္တရာယ်ရှိမှန်း သိနေရင်တောင် ဒီနေရာကနေ မထွက်ချင်တဲ့ သဘောပဲ။ ဒါကြောင့် သူ အဝေးကြီး ထွက်မပြေးလောက်ဘူး။ တစ်ခုခု မလုပ်ခင် သူ့ရဲ့ နေထိုင်မှု ပုံစံကို အရင် နားလည်အောင် လုပ်ကြရအောင်"
တပ်စုမှူး၏ မျက်လုံးများမှာ ကျေနပ်သည့် အရိပ်အယောင်ဖြင့် တောက်ပသွားပြီး ခေါင်းညိမ့်လိုက်သည်။ "အစီအစဉ် ကောင်းတယ်" သူသည် အခြားသူများကို ဘေးကင်းသည့် အကွာအဝေးသို့ ဆုတ်ခွာရန် အချက်ပြလိုက်သည်။ သူနှင့် မွန်း နှစ်ယောက်သာ ရှေ့ဆုံးတွင် ကျန်ရစ်ခဲ့ပြီး သူတို့ ရှိနေသည်ကို လုံးဝ မရိပ်မိဘဲ အစာကို ဆက်စားနေသည့် သမင်ကြီးကို စောင့်ကြည့်နေကြသည်။
မွန်းသည် အဖွဲ့သားများ၏ ပြောပြချက်များမှတစ်ဆင့် ဤသားရဲနှင့် ပတ်သက်၍ သူ သိရှိထားသော အချက်အလက်များကို ပြန်လည် စဉ်းစားကြည့်သည်။ ဤခန့်ညားထည်ဝါသော သမင်ကြီးမျိုးမှာ အလွန် ရှားပါးလှသဖြင့် ၎င်း၏ ပေါ်ထွက်လာမှုကို ဒဏ္ဍာရီများတွင် အရေးကြီးသော ဖြစ်ရပ်များ၏ နိမိတ်အဖြစ် ယူဆလေ့ရှိကြသည်။ ဥပမာ - ဘုရင်တစ်ပါး ဖွားမြင်ခြင်း၊ ကြီးကျယ်သော အောင်ပွဲ ရရှိခြင်း သို့မဟုတ် ကြီးမားသော အပြောင်းအလဲများ ဖြစ်ပေါ်ခြင်း စသည်ဖြင့်ပေါ့။ ဒါတွေကတော့ ပုံပြင်တွေသာ ဖြစ်နိုင်သော်လည်း ၎င်း၏ ရှားပါးမှုမှာမူ အစစ်အမှန်ပင်။
သမင်ကြီးမှာ အလွန် လျင်မြန်ပြီး ဝါရင့်စစ်သည်များ၏ မြင်းများထက်ပင် ပို၍ အပြေးသန်သည်။ ၎င်းသည် ဘယ်တော့မှ ပြန်လည် တိုက်ခိုက်ခြင်း မရှိပေ။ ရန်သူကို ရင်ဆိုင်ရန် မကြိုးစားဘဲ သူ၏ သာလွန်သော အရှိန်နှင့် နယ်မြေကျွမ်းကျင်မှုကို အသုံးချကာ အမြဲတမ်း ထွက်ပြေးလေ့ရှိသည်။ ထိုအမူအရာကြောင့်ပင် ပတ်ဝန်းကျင်က လူများက သူ့ကို သီတင်းပတ်ပေါင်းများစွာကြာအောင် ဖမ်းမမိဘဲ ဖြစ်နေရခြင်းပင်။
သို့သော် မွန်း စောင့်ကြည့်နေရင်းဖြင့် ခိုင်လုံသော ကောက်ချက်အချို့ ချနိုင်ခဲ့သည်။ ဤသားရဲသည် ဤနယ်မြေအတွင်း တစ်ခုခုကို ဝှက်ထားခြင်း သို့မဟုတ် စောင့်ရှောက်နေခြင်း ဖြစ်ရမည်။ မည်သို့ပင်ဖြစ်စေ ဤနေရာအပေါ် တွယ်တာနေမှုမှာ ၎င်းကို ဖမ်းဆီးရန်အတွက် အခွင့်ကောင်းတစ်ခုပင်။ ဤအဖွဲ့သည် အမြဲတမ်း အင်အားသုံး၍ ဝိုင်းဖမ်းရန်၊ လိုက်လံ ဖမ်းဆီးရန် သို့မဟုတ် လူအင်အားဖြင့် ပိတ်ဆို့ရန်သာ ကြိုးစားခဲ့ကြသည်။ အခြားသော နည်းလမ်းများကို သူတို့ မစဉ်းစားတတ်၍တော့ မဟုတ်ပေ။ သို့သော် အကြိမ်အနည်းငယ် ရှုံးနိမ့်ပြီးနောက်တွင်မူ ၎င်းကို ဖမ်းမိခြင်းမှာ သူတို့အတွက် ဂုဏ်သိက္ခာပိုင်းဆိုင်ရာ ကိစ္စတစ်ခု ဖြစ်လာခဲ့သည်။ သူတို့သည် မိမိတို့ကိုယ်တိုင် ၎င်းကို ဖမ်းပြနိုင်ကြောင်း သက်သေပြချင်နေကြခြင်း ဖြစ်သည်။
မွန်းသည် အသေးစိတ် အချက်အလက်များကို မှတ်သားရင်း ဆက်လက် စောင့်ကြည့်နေသည်။ သမင်ကြီးသည် သတ်မှတ်ထားသော နေရာတစ်ခုတွင်သာ အစာစားနေပြီး ခန္ဓာကိုယ်ကိုလည်း ဘက်ပေါင်းစုံမှ လာမည့် အန္တရာယ်ကို မြင်နိုင်သည့် အနေအထားတွင် ထားရှိထားသည်။ စက္ကန့်အနည်းငယ် ကြာတိုင်း ဦးခေါင်းကို မော့ကြည့်ပြီး မိုးရွာနေသည့် ကြားမှပင် အသံပလံများကို နားစွင့်နေသည်။ မိနစ်အနည်းငယ် ကြာပြီးနောက်တွင်မူ ၎င်းသည် အခြားနေရာတစ်ခုသို့ ရွှေ့သွားသော်လည်း ကျောက်ဆောင်များနှင့် သစ်ပင်အုပ်စုအချို့ကိုမူ အမြဲတမ်း မြင်ကွင်းအတွင်း ထည့်သွင်းထားလေသည်။