အခန်း (၅၃) - လူမှန်များကို ရှာဖွေခြင်း

[ အမည် - မွန်း ]

[ မျိုးနွယ် - လူသား ]

[ အတန်းအစား - အတန်းအစားမဲ့ ]

[ အဆင့် - ၁၈ ] [ ၁၇% ]

[ အသက်အရေအတွက် - ၄၃၉၁ ]

[ ခွန်အား - ၂၇ ] [ လျင်မြန်မှု - ၂၉ ] [ ခံနိုင်ရည် - ၃၂ ] [ ‌‌‌‌မှော်စွမ်းအင် - ၃၉ ] (အခြေခံအရည်အချင်း အားလုံး +၅)

[ အမှတ်ပို - ၅ ]

[ စွမ်းရည်များ - ဒြပ်စင် တိုက်ခိုက်မှု (အဆင့်မြင့်), ဒြပ်စင်ငါးမျိုးပေါင်းစပ်မှု (မဟာအဆင့်), ကူးယူခြင်း (မဟာအဆင့်) ]

[ ပါရမီ - ‌သေမင်း ]

[ အတန်းအစားစွမ်းရည် - အတန်းအစားနေရာ {၀/၁} ]

မွန်းသည် သူ၏ အခြေအနေပြမျက်နှာပြင်ကို ကြည့်ရင်း စုဆောင်းမိထားသော အသက်အရေအတွက်ကို အလွန်အမင်း စိတ်ကျေနပ်နေမိသည်။ အမဲလိုက်ခြင်းမှ သူသည် အတော်အတန် များပြားသော ပမာဏကို ရရှိခဲ့ခြင်း ဖြစ်သည်။ ကံမကောင်းသည်မှာ သူ၏ စွမ်းရည်အားလုံးမှာ အမြင့်ဆုံးအဆင့်သို့ ရောက်ရှိနေသဖြင့် မည်သည့်စွမ်းရည်ကိုမျှ ထပ်မံအဆင့်မြှင့်၍ မရတော့ခြင်းပင် ဖြစ်သည်။

သို့သော်လည်း များပြားလှသော အသက်အရေအတွက်မှာ နောင်တွင် အဆင့်မြှင့်တင်မှုများ ပြုလုပ်ရန်နှင့် အသက်ရှင်သန်ရန်အတွက် အထောက်အကူ ဖြစ်စေလိမ့်မည်။ အထူးသဖြင့် မကြာမီအချိန်အတွင်း ၎င်းတို့က အသုံးဝင်လာပေတော့မည်။

မွန်းသည် ဝတ်စုံကို သပ်သပ်ရပ်ရပ် လဲလှယ်ဝတ်ဆင်လိုက်ပြီး အပိုအဝတ်အစား အချို့ကို သူ၏ သိုလှောင်လက်စွပ်ထဲသို့ ထည့်သွင်းလိုက်သည်။ ထို့နောက် မြို့အတွင်းရှိ 'ပထမသန့်စင်နယ်‌မြေဘုံ' (First Sanctuary) ကူးသန်းသွားလာရေးဝင်ပေါက်များထဲမှ တစ်ခုဆီသို့ ဦးတည်ထွက်ခွာလာခဲ့သည်။

ဝင်ပေါက်စခန်းသို့ ရောက်သောအခါ မွန်း

သည် ဝန်ဆောင်ခအဖြစ် ဒေါ်လာတစ်ရာ ပေးဆောင်လိုက်သည်။

"ဝန်ဆောင်မှုအတွက် ကျေးဇူးတင်ပါတယ်။ အပြင်မှာ အသက်ရှင်အောင် နေခဲ့ပါဦး" ဟု ငွေလက်ခံရရှိသော အစောင့်က ပြောလိုက်ပြီးနောက် မွန်း၏ ခန္ဓာကိုယ်သည် ဝေ့ဝဲနေသော စွမ်းအင်များအတွင်းသို့ ပျောက်ကွယ်သွားတော့သည်။

သွားလာရေး၀င်ပေါက် အသုံးပြုခများသည် အုပ်ချုပ်သူအဖွဲ့အစည်းထံသို့ နောက်ဆုံးတွင် ပြန်လည်ရောက်ရှိသွားသည်။ ၎င်းမှာ အခွန်ကောက်ခံခြင်းနှင့် ဆင်တူပြီး နယ်မြေအက်ကြောင်းများကြောင့် ထိခိုက်နစ်နာသူများကို ကူညီရန်နှင့် မြို့၏ လုံခြုံရေးအတွက် အသုံးပြုခြင်း ဖြစ်သည်။

♢♢♢♢

မွန်းသည် သူနှင့် ဆယ်လင်းတို့ ကမ္ဘာမြေသို့ ပြန်လာစဉ်က အသုံးပြုခဲ့သည့် ကူးသန်းသွားလာရေးဆင်းသက်ရာနေရာသို့ပင် ပြန်လည်ရောက်ရှိလာခဲ့သည်။ သူတို့နှစ်ဦး လမ်းခွဲခဲ့ပြီးကတည်းက သူမနှင့် စကားမပြောဖြစ်သေးပေ။ အဆက်အသွယ်လုပ်မည်ဟု ကတိပေးခဲ့သော်လည်း ကိစ္စအတော်များများ ဖြစ်ပျက်နေခဲ့သဖြင့် သူ စိတ်မပါခဲ့ခြင်း ဖြစ်သည်။

'အခြေစိုက်စခန်းအသစ်ကို ရောက်မှပဲ သူမနဲ့ ပြန်ဆုံတော့မယ်' ဟု မွန်း တွေးလိုက်သည်။

သူသည် စိတ်ထဲတွင် ရည်မှန်းထားသော ပန်းတိုင်ဆီသို့ စတင်လျှောက်လှမ်းလာခဲ့သည်။ သူသည် ပိုမိုအင်အားတောင့်တင်းသော အခြေစိုက်စခန်းတစ်ခုသို့ ရောက်ရှိလိုသည်။ ထိုသို့ဖြစ်လာရန်အတွက် သူသည် 'အခြေချသူ' (Settler) တစ်ယောက်ကို ရှာဖွေရန် လိုအပ်သည်။

အခြေချသူများဆိုသည်မှာ အခြေစိုက်စခန်းတစ်ခုတွင် ခြောက်လ သို့မဟုတ် ထိုထက်မက ကြာမြင့်စွာ တာဝန်ကျနေထိုင်သော 'နိုးထသူ' (Awakeners) များ ဖြစ်ကြသည်။ ၎င်းတို့သည် သူတို့ကျင်လည်ရာ နယ်ပယ်ကျဉ်းကျဉ်းလေးအတွင်း၌ အင်အားကြီးမားကြသော်လည်း အများစုမှာ ရှေ့သို့ ဆက်လက်တိုးတက်ရန် ရည်မှန်းချက်မရှိကြဘဲ ရရှိထားသော လုံခြုံမှုနှင့် အဆင့်အတန်းကိုသာ ကျေနပ်နေကြသူများ ဖြစ်သည်။

၎င်းတို့သည် ရင်းနှီးပြီးသား နေရာများတွင် အားနည်းသော သားရဲများကိုသာ အမဲလိုက်ကြပြီး အရင်းအမြစ်များကို ပုံမှန်အတိုင်း စုဆောင်းကာ ကြီးမားသော စွန့်စားမှုများ မပြုလုပ်ဘဲ အင်အားကို ဖြည်းဖြည်းချင်းသာ မြှင့်တင်ကြသည်။ သူတို့အတွက်မူ ဂုဏ်သိက္ခာထက် သက်သောင့်သက်သာရှိမှုက ပို၍ အရေးကြီးသည်။

မွန်းအတွက်မူ သူတို့သည် သွားလာရေးယာဉ်များသာ ဖြစ်သည်။

အခြေချသူများသည် စခန်းအတွင်းရှိ အကြောင်းအရာများစွာကို သိရှိကြသည်။ စခန်းတစ်ခုနှင့်တစ်ခုအကြား လမ်းကြောင်းကောင်းများ ပေးနိုင်သည့် အကောင်းဆုံး သယ်ယူပို့ဆောင်ရေး အစီအစဉ်များကို သိကြသလို၊ မည်သည့်လမ်းက ဘေးကင်းပြီး မည်သည့်လမ်းက သေတွင်းဖြစ်သည်ကိုလည်း နားလည်ကြသည်။ ထို့ထက် ပို၍အရေးကြီးသည်မှာ ၎င်းတို့သည် အဆင့်မြင့်သော နေရာများသို့ သွားလိုသည့် နိုးထသူများအတွက် လမ်းပြအဖြစ် အခကြေးငွေယူ၍ လုပ်ကိုင်ပေးတတ်ကြခြင်းပင်။

မွန်းသည် စခန်းအတွင်းရှိ ထိုကဲ့သို့သော ဝန်ဆောင်မှုများကို ကြော်ငြာလေ့ရှိသည့် ဈေးတန်းဆီသို့ ဦးတည်သွားလိုက်သည်။

ဈေးတန်းသို့ ရောက်သောအခါ အသစ်ရောက်လာသူများကို ဝန်ဆောင်မှုအမျိုးမျိုး ပေးနေသည့် အခြေချသူ အများအပြားကို တွေ့ရသည်။ အချို့သော အခြေချသူများမှာ လူသစ်များကို လိမ်လည်လှည့်ဖြားရန် ကြိုးစားနေသူများ ဖြစ်သော်လည်း အချို့မှာမူ အမှန်တကယ်ပင် အကူအညီပေးလိုသူများ ဖြစ်ကြသည်။

မွန်းအနေဖြင့် ထိုသူများကို တစ်ဦးတစ်ယောက်မျှ လူကိုယ်တိုင် မသိသော်လည်း အသုံးဝင်မည့်သူကို ရှာမတွေ့နိုင်ဟု မဆိုလိုပေ။

သူသည် လူအုပ်ကြားထဲတွင် လျှောက်သွားရင်း လူအမျိုးမျိုးကို အကဲခတ်နေခဲ့သည်။ လူအများအပြား ဝိုင်းအုံနေသော အခြေချသူများကို မွန်းက စိတ်မဝင်စားပေ။ လူကြိုက်များရုံနှင့် ဝန်ဆောင်မှုကောင်းသည်ဟု မဆိုနိုင်သောကြောင့် ဖြစ်သည်။

သို့သော် သူတို့ကို လုံးဝဥပေက္ခာပြုထားခြင်းမျိုးတော့ မဟုတ်ပေ။ သူတို့သည်လည်း တစ်ချိန်ချိန်တွင် အသုံးဝင်လာနိုင်သည် မဟုတ်ပါလား။

ထိုစဉ် လူအုပ်ကြားမှ ရုတ်ရုတ်သဲသဲ အသံတစ်ခုက သူ၏ အာရုံကို ဖမ်းစားလိုက်သည်။

"ဒုတပ်မှူး (Lieutenant) ပြန်လာပြီဟေ့။ ဝါရင့်သူ (Veterans) တွေ အများကြီးလည်း ပါတယ်။ ဒီတစ်ခေါက် မစ်ရှင်ကတော့ အောင်မြင်ခဲ့ပုံပဲ!" ဟု နိုးထသူတစ်ဦးက အော်ဟစ်ကာ လူအုပ်ကြီးရှိရာသို့ ပြေးသွားသည်။

စိတ်ဝင်စားသွားသဖြင့် မွန်းသည်လည်း အေးအေးဆေးဆေးပင် နောက်မှ လိုက်သွားခဲ့သည်။

ဝါရင့်သူများဆိုသည်မှာ အခြေစိုက်စခန်းတွင် တစ်နှစ်ထက်မက နေထိုင်လာခဲ့သည့် နိုးထသူများ ဖြစ်ကြသည်။ ၎င်းတို့သည် စခန်းတွင် အင်အားအကြီးဆုံးသူများထဲ၌ ပါဝင်ပြီး ခိုင်မာသော အဆင့်အတန်းတစ်ခုကို ပိုင်ဆိုင်ထားကြသည်။ ဒုတပ်မှူးများမှာမူ အရေအတွက် မများလှသော်လည်း အခွင့်အာဏာ အပ်နှင်းခံထားရသူများ ဖြစ်သည်။ ၎င်းတို့၏ အဆင့်အတန်းမှာ စခန်းတစ်ခုလုံးကို အုပ်ချုပ်ပြီး ဒေသတွင်း အမြင့်ဆုံး အာဏာပိုင်ဖြစ်သည့် စခန်းသခင် (Base Lord) ပြီးလျှင် ဒုတိယအမြင့်ဆုံး ဖြစ်သည်။

မွန်းသည် လူအုပ်ကို တိုးဝှေ့ကာ ဘာတွေဖြစ်နေသည်ကို မြင်ရသည်အထိ ရှေ့သို့ တိုးသွားလိုက်သည်။

အဓိကဝင်ပေါက်မှ နိုးထသူတစ်စု ဝင်ရောက်လာကြသည်။ သူတို့၏ အသုံးအဆောင်များမှာ တိုက်ပွဲဒဏ်ကြောင့် နွမ်းဖတ်နေသော်လည်း ဟန်ပန်မှာမူ ယုံကြည်ချက် အပြည့်ရှိနေသည်။ အဖွဲ့၏ ရှေ့ဆုံးတွင် အသက်နှစ်ဆယ်ကျော်အရွယ် လူတစ်ဦးက စခန်း၏ တံဆိပ်ခတ်နှိပ်ထားသော သံချပ်ကာဝတ်စုံကို ဝတ်ဆင်ကာ လျှောက်လှမ်းလာသည်။ သူ၏ တည်ရှိမှုကပင် မည်သည့်အားစိုက်မှုမျှ မပါဘဲ လူအများ၏ အာရုံကို ဖမ်းစားထားသည်။

သူသည် ဒုတပ်မှူးပင် ဖြစ်သည်။

သူ၏ ဘေးပတ်လည်တွင် ဝါရင့်သူ ဆယ့်နှစ်ဦးခန့် ဝန်းရံလျှောက်လှမ်းလာကြပြီး တစ်ဦးချင်းစီတွင် အတွေ့အကြုံရင့်ကျက်သူများပီပီ တိုက်ပွဲအမာရွတ်များနှင့် လက်နက်ကိရိယာ အပြည့်အစုံ ရှိနေကြသည်။ သူတို့သည် တိုက်ပွဲပေါင်းများစွာကို အတူတူ ဖြတ်သန်းလာခဲ့ကြသူများပီပီ စည်းချက်ညီညီ ရွေ့လျားနေကြသည်။

"ဟေ့... သူတို့က သားရဲမျိုးနွယ်ထဲက ရှားပါးတဲ့ 'သမင်ဖြူ' (Elk beast) ကို ဖမ်းဖို့ သွားကြတာ မဟုတ်လား။ အဲ့ဒါကို ရှာနေကြတာ အပတ်ပေါင်း တော်တော်ကြာပြီလို့ ကြားတယ်" ဟု လူအုပ်ထဲမှ တစ်ယောက်က တိုးတိုးလေး ပြောလိုက်သည်။

ဘေးမှလူက ပခုံးတွန့်ပြရင်း "သူတို့နဲ့အတူ ပါမလာတော့ ရှုံးနိမ့်ခဲ့ပုံရတာပဲ" ဟု ပြန်ပြောသည်။

မွန်းသည် မြင်းပေါ်တွင် ထိုင်လျက် ချဉ်းကပ်လာသော ဒုတပ်မှူးကို စိုက်ကြည့်နေမိသည်။ ထိုမြင်းမှာ စခန်းအတွင်းရှိ ချမ်းသာကြွယ်ဝပြီး အာဏာရှိသူများ အသုံးပြုသည့် သယ်ယူပို့ဆောင်ရေး နည်းလမ်းတစ်ခု ဖြစ်သည်။ ၎င်း၏ အရွယ်အစားအရ အဆင့်တစ်ဆယ်ခန့် ရှိပုံရပြီး တိုက်ပွဲအတွက် အင်အားမကြီးသော်လည်း လျင်မြန်မှုနှင့် ခံနိုင်ရည်ရှိမှုတို့ကြောင့် ခရီးသွားလာရန်အတွက်မူ အလွန်ကောင်းမွန်သည်။

ဒုတပ်မှူး၏ အကြည့်မှာ လူအုပ်ကြီးကို လျစ်လျူရှုကာ ဝေ့ဝဲကြည့်လိုက်ရာမှ မွန်းနှင့် အကြည့်ချင်း ဆုံသွားသည်။

မွန်း၏ မျက်နှာတွင် အပြုံးနုနုလေးတစ်ခု ပေါ်လာသည်။

'ဒါ ငါရှာနေတဲ့သူ အတိအကျပဲ' ဟု မွန်း တွေးလိုက်သည်။

အကယ်၍ သူသာ ဒုတပ်မှူးနှင့် ချိတ်ဆက်နိုင်လျှင် အရာအားလုံးက ပိုမိုလွယ်ကူသွားပေလိမ့်မည်။ ဒုတပ်မှူးသည် သာမန်နိုးထသူများ မသိနိုင်သော လမ်းကြောင်းများ၊ အန္တရာယ်များနှင့် အခွင့်အလမ်းများကို သိရှိသူ ဖြစ်သည်။ မည်သည့်လမ်းက အဆင့်မြင့်စခန်းများသို့ ဦးတည်သနည်း၊ မည်သည့်နယ်မြေက လက်ရှိတွင် တည်ငြိမ်ပြီး မည်သည့်နေရာတွင် သားရဲများ သောင်းကျန်းနေသနည်း စသည့် အချက်အလက်များကို သူ သိနိုင်ပေသည်။

သို့သော် သူနှင့် နီးစပ်ရန်မှာ မလွယ်ကူပေ။ ဒုတပ်မှူးများဆိုသည်မှာ အသစ်ရောက်လာသူများနှင့် အလွယ်တကူ တွေ့ဆုံပေးလေ့ မရှိကြ။ သူတို့တွင် တာဝန်ဝတ္တရားများ၊ ထိန်းသိမ်းရမည့် ဂုဏ်သိက္ခာများ ရှိသလို၊ သူတို့၏ အာရုံစိုက်မှုကို ရရှိရန် ကြိုးစားနေသူများမှာလည်း မနည်းလှပေ။

မွန်း၏ အကြည့်က ဒုတပ်မှူး၏ မြင်းဘေးတွင် လျှောက်လာသော ဝါရင့်သူများဆီသို့ ရောက်သွားသည်။ သူတို့၏ မျက်နှာများ၊ အသုံးအဆောင်များနှင့် ဟန်ပန်များကို သူ မှတ်သားထားလိုက်သည်။ အသေးစိတ် အချက်အလက်တိုင်းက အရေးကြီးသည်။

သူသည် ထိုဝါရင့်သူများထဲမှ တစ်ဦးမှတစ်ဆင့် ဒုတပ်မှူးထံသို့ ရောက်အောင် သွားရမည်ဖြစ်သည်။ မှန်ကန်သော ဝါရင့်သူကို ရှာဖွေပြီး ဆွဲဆောင်မှုရှိသော ကမ်းလှမ်းမှုတစ်ခု ပြုလုပ်နိုင်မှသာ လျစ်လျူရှုခြင်း မခံရသည့် မိတ်ဆက်မှုတစ်ခုကို ဖန်တီးနိုင်မည် ဖြစ်သည်။

လူအုပ်ကြီးက ဒုတပ်မှူးနှင့် သူ၏အဖွဲ့ကို စခန်းအတွင်းပိုင်းအထိ လိုက်လံပို့ဆောင်နေစဉ် မွန်းသည် နောက်သို့ ဆုတ်လိုက်ပြီး လူအုပ်ကြားထဲ၌ပင် ပြန်လည်ပျောက်ကွယ်သွားတော့သည်။