အခန်း (၄၅) - ပစ္စည်းကိရိယာများ ဝယ်ယူခြင်း

ရပ်ကွက်အနှံ့ရှိ အိမ်နှင့် တိုက်ခန်းအတော်များများကို လိုက်လံကြည့်ရှုပြီးနောက် မွန်းသည် မြို့၏ ဘေးအကင်းဆုံးဇုန်တွင်ရှိသော လူကြိုက်များသည့် လူနေအဆောက်

အအုံတစ်ခုမှ သက်သောင့်သက်သာရှိသော အိပ်ခန်းတစ်ခန်းပါ တိုက်ခန်းလေးတစ်ခန်းကို ရွေးချယ်လိုက်သည်။

သူ ငွေမနှမြောခဲ့ပေ။ ခဏတဖြုတ်သာ နေထိုင်မည် ဖြစ်သော်လည်း သူနေထိုင်မည့်နေရာမှာ လုံခြုံစိတ်ချရပြီး သက်

သောင့်သက်သာရှိရန် လိုအပ်သည်ဟု သူခံယူထားသည်။

ထိုနေရာ၏ လုံခြုံရေးမှာ အထူးကောင်းမွန်သည်။

အဆောက်အအုံတွင် ပထမအဆင့် သန့်စင်နယ်‌မှ နိုးထသူ (first sanctuary awakeners) များကို အစောင့်များအဖြစ် ခန့်ထားပြီး အဝင်ဝနှင့် လမ်းတိုင်းလမ်းတိုင်းတွင် ကင်မရာများ တပ်ဆင်ထားသည်။ အရေးကြီးဆုံးမှာ ဒုတိယအဆင့် သန့်စင်နယ်‌မှ နိုးထသူတစ်ဦး အဆောက်အအုံ၏ အပေါ်ဆုံးထပ်တွင် နေထိုင်ခြင်းဖြစ်သည်။ ထိုသူရှိနေခြင်းကပင် ခြိမ်းခြောက်မှုအများစုကို ဟန့်တားနိုင်မည်ဖြစ်ပြီး မွန်းအနေဖြင့် ပြဿနာများကို ကိုယ်တိုင်ဖြေရှင်းနိုင်လောက်သည်အထိ အားကောင်းမလာခင်အထိ လုံလောက်သော အကာအကွယ်ဖြစ်ပေလိမ့်မည်။

မွန်းသည် စာချုပ်တွင် လက်မှတ်ထိုးလိုက်ပြီး လစဉ်ငှားရမ်းခ ဒေါ်လာနှစ်သောင်းကို သဘောတူလိုက်သည်။ ဈေးမချိုလှပေ။ သာမန်နိုးထသူတစ်ဦး၏ လစဉ်ထောက်

ပံ့ကြေးမှာ ဒေါ်လာတစ်သောင်းသာရှိပြီး အများစုမှာ အမဲလိုက်ခြင်းနှင့် ပစ္စည်းများရောင်းချခြင်းဖြင့် ဝင်ငွေရှာကြရသည်။ လစဉ် ဒေါ်လာနှစ်သောင်းဟူသော ပမာဏမှာ နိုးထသူအတော်များများ မတတ်နိုင်သော ဈေးနှုန်းမျိုးဖြစ်သည်။

သို့သော် သူခုလေးတင် ရရှိထားသော ၁.၅ သန်းနှင့်ယှဉ်လျှင် ငှားရမ်းခ နှစ်သောင်းနှင့် အာမခံစပေါ်ငွေ နှစ်သောင်းမှာ ဘာမှမဟုတ်သလောက်ပင်။ ဒေါ်လာလေးသောင်းကို သူ တွန့်ဆုတ်ခြင်းမရှိဘဲ လွှဲပြောင်းပေးလိုက်သည်။

အကျိုးဆောင်က ပြုံးရွှင်စွာဖြင့် သူ့ကို သော့များကမ်းပေးလိုက်သည်။ ငွေအဆင့် တည်းခိုဆောင်မှ ကြိုဆိုပါတယ် မစ္စတာ မွန်း‌အောက်လော။"

တိုက်ခန်းမှာ ရှစ်လွှာတွင် ရှိသည်။

ရိုးရှင်းသပ်ရပ်သော ဒီဇိုင်း၊ ခေတ်မီပစ္စည်းကိရိယာများနှင့် ကြမ်းပြင်မှ မျက်နှာကြက်အထိ အပြည့်တပ်ဆင်ထားသော မှန်ပြတင်းပေါက်များကြောင့် မြို့ပြအလှကို အထပ်မြင့်မှ စီးမိုးကြည့်နိုင်သည်။ အိပ်ခန်းမှာ အနေတော်ဖြစ်ပြီး မီးဖိုချောင်တွင်လည်း လိုအပ်သော လျှပ်စစ်ပစ္စည်းများ စုံလင်စွာရှိကာ ရေချိုးခန်းမှာလည်း ခေတ်မီသည်။

ပရိဘောဂများလည်း အသင့်ပါပြီးသားဖြစ်သည်။ ခုတင်၊ ဆိုဖာ၊ စားပွဲနှင့် အခြေခံလိုအပ်ချက်များ အားလုံးရှိသည်။ ဇိမ်ခံပစ္စည်းများ မဟုတ်သော်လည်း သူလိုအပ်သည်များ အားလုံးရှိနေသည်။

မွန်းသည် သူ၏ ပစ္စည်းအနည်းငယ်ကို ချထားလိုက်ပြီး တိုက်ခန်းသစ်လေးထဲတွင် ခေတ္တရပ်ကာ ပတ်ဝန်းကျင်ကို ကြည့်လိုက်သည်။

ထို့နောက် သူသည် တံခါးကို သေချာပိတ်ကာ အပြင်သို့ ပြန်ထွက်ခဲ့သည်။

မွန်းသည် အရောင်းအဝယ်ဗဟိုဌာန (Trading Centre) သို့ ပြန်သွားလိုက်သည်။ ပထမသန့်စင်နယ်မြေ (First Sanctuary) ထဲ ရောက်မှ ဝယ်မည့်အစား ဤနေရာမှာတင် လိုအပ်သော ကိရိယာများကို ဝယ်ယူရန် သူဆုံးဖြတ်လိုက်ခြင်းဖြစ်သည်။

သန့်စင်နယ်မြေတွင်းတွင်လည်း အရောင်းအဝယ်ဗဟိုဌာန၏ ခွဲတမ်းများရှိသော်လည်း မွန်းက ယခုပင် အပြီးအစီး လုပ်ချင်နေသည်။ သူ့တွင် အချိန်ရှိသည်၊ ငွေရှိသည်၊ အရေးတကြီး လုပ်စရာကိစ္စလည်း မရှိသေး။ နောက်တစ်ခေါက် ခရီးမထွက်မီ လိုအပ်သည်များကို အဆင်သင့် ပြင်ဆင်ထားခြင်းက ပိုကောင်းသည်။

ရွှေရောင်အခွင့်ထူးခံကတ်က သူ့ကို ပထမသန့်စင်နယ်‌မြေ၏ အထပ်အားလုံးသို့ ဝင်ရောက်ခွင့် ပေးထားသည်။ ဓာတ်လှေကားသည် အဆင့်မြင့်ပစ္စည်းများ ရောင်းချရာ ကန့်သတ်ထားသော အထပ်များဆီသို့ သူ့ကို ခေါ်ဆောင်သွားသည်။

♢♢♢♢

အထဲသို့ ရောက်သောအခါ မွန်းသည် အထပ်များကို လှည့်ပတ်ကြည့်ရှုသည်။ အထပ်မြင့်လေ ပစ္စည်းများ၏ ရှားပါးမှုနှင့် စွမ်းဆောင်ရည်မှာ ပိုမိုမြင့်မားလေ ဖြစ်သည်။ ပထမထပ်တွင် အသင့်အတင့်ကောင်းသော ပစ္စည်းများရှိပြီး ငါးထပ်မြောက်သို့ ရောက်သောအခါ အထူးကောင်းမွန်သော ပစ္စည်းများ ဖြစ်သွားသည်။

ငါးထပ်မြောက်သို့ ရောက်သောအခါ ပစ္စည်းတစ်ခုချင်းစီ၏ ဈေးနှုန်းမှာ သိန်းဂဏန်းအထိ ရှိလာသည်။ ဓားတစ်လက်လျှင် ခြောက်သိန်း၊ သံချပ်ကာတစ်စုံလျှင် လေးသိန်း စသည်ဖြင့် ဖြစ်သည်။ အရည်အသွေးမှာ အပြစ်ပြောစရာ မရှိသော်လည်း ပစ္စည်းတစ်ခုချင်းစီအတွက် ထိုမျှလောက် ငွေသုံးစွဲခြင်းက သူ၏အရင်းအမြစ်ကို မြန်မြန်ကုန်စေလိမ့်မည်။

ထို့ကြောင့် သူသည် အကောင်းဆုံးပစ္စည်းနောက်ကို လိုက်မည့်အစား ဗျူဟာမြောက်သော ဝယ်ယူမှုများအပေါ်တွင်သာ အာရုံစိုက်ရန် ဆုံးဖြတ်လိုက်သည်။

သေချာစဉ်းစားပြီးနောက် မွန်းသည် ပစ္စည်းလေးခုကို ရွေးချယ်လိုက်သည်။

[ဟင်းလင်းပြင် သိုလှောင်လက်စွပ် (Spatial Storage Ring)] [အဆင့် (Order) - ပထမ] [အဆင့်အတန်း (Rank) - ဒုတိယ] [အသေးစိတ် - ၅ x ၅ x ၅ မီတာ အကျယ်ရှိသော ဟင်းလင်းပြင်အိတ်ကပ်ပါဝင်သည့် မှော်လက်စွပ်။ အတွင်းတွင် သိမ်းဆည်းထားသော ပစ္စည်းများမှာ အချိန်ရပ်တန့်နေသကဲ့သို့ ဖြစ်နေမည်ဖြစ်သဖြင့် ပုပ်သိုးခြင်း သို့မဟုတ် ပျက်စီးခြင်း မရှိနိုင်ပါ။ သာမန်သိုလှောင်လက်စွပ်များထက် ၁၀ ဆခန့် ပိုမိုကျယ်ဝန်းသည်။] [ဈေးနှုန်း - ဒေါ်လာ ၁၅၀,၀၀၀]

သူ့တွင်ရှိသော လက်ရှိလက်စွပ်မှာ အထဲတွင် ဘာမှမရှိတော့သော်လည်း နောင်တွင် ပစ္စည်းများ ပြည့်လာနိုင်သည်ကို သူသိသည်။ ဤလက်စွပ်က ကုန်ကြမ်းများ၊ ကိရိယာများ၊ အရေးပေါ်ရိက္ခာများနှင့် သူရရှိလာမည့် ပစ္စည်းများကို သိမ်းဆည်းရန် နေရာအလုံအလောက် ပေးနိုင်လိမ့်မည်။ ဒုတိယအဆင့်ဖြစ်ခြင်းက ၎င်း၏ အရည်အသွေးမြင့်မားမှုကို ပြသနေပြီး နိုးထသူအများစုမှာ သာ

မန်အဆင့်လက်စွပ်များကိုသာ အသုံးပြုကြသည်။

[အစွန်းနှစ်ဖက် အပေါ်ဝတ်ရုံ (Cloak of the Two Extremes)] [အဆင့် (Order) - ပထမ] [အဆင့်အတန်း (Rank) - ဒုတိယအဆင့်အထက်] [အသေးစိတ် - အပူချိန်ကို ထိန်းညှိပေးနိုင်သော မှော်ချည်မျှင်များဖြင့် ရက်လုပ်ထားသည့် ရာသီဥတုဒဏ်ခံ အပေါ်ဝတ်ရုံ။ အလွန်အမင်း ပူပြင်းခြင်းနှင့် အလွန်အမင်း အေးခဲခြင်းတို့မှ ကာကွယ်ပေးပြီး ကြမ်းတမ်းသော ပတ်ဝန်းကျင်များတွင် ခန္ဓာကိုယ်အပူချိန်ကို ပုံမှန်ရှိအောင် ထိန်းပေးသည်။ ရုပ်ပိုင်းဆိုင်ရာ ထိခိုက်မှုများကိုလည်း အနည်းငယ် ခုခံနိုင်စွမ်းရှိသည်။ တိုက်ပွဲဝင်မနေချိန်တွင် အသုံးပြုသူ၏ မှော်စွမ်းအင် (mana) ကို အသုံးပြု၍ သူ့အလိုလို ပြန်လည်ပြင်ဆင်နိုင်သော မှော်စွမ်းအင် ပါဝင်သည်။ ခန္ဓာကိုယ်ကြံ့ခိုင်မှု (Constitution) +၅] [ဈေးနှုန်း - ဒေါ်လာ ၂၂၀,၀၀၀]

အေးခဲနေသော ငရဲခန်းထဲတွင် သုံးလကြာ နေထိုင်ခဲ့ရပြီးနောက် မွန်းအနေဖြင့် ပတ်ဝန်းကျင်အန္တရာယ်များကို ပေါ့ပေါ့

တန်တန် မတွေးတော့ပေ။ ဤဝတ်ရုံက သူ့ကို ကောင်းကောင်း ကာကွယ်ပေးနိုင်လိမ့်မည်။

[အရိပ်သံမဏိ ဓားမြှောင် (Shadowsteel Dagger)] [အဆင့် (Order) - ပထမ] [အဆင့်အတန်း (Rank) - တတိယ] [အသေးစိတ် - အရိပ်သံမဏိသတ္တုစပ်ဖြင့် သွန်းလုပ်ထားသော တိုက်ပွဲဝင်ဓားမြှောင်။ အလွန်ထက်မြက်ပြီး ခိုင်ခံ့သည်။ သူ့အလိုလို ပြန်လည်ထက်မြက်စေသော မှော်စွမ်းအင်ကြောင့် အစဉ်အမြဲ ထက်မြက်နေမည်။ ပစ်ပေါက်ရန်နှင့် အနီးကပ်တိုက်ခိုက်ရန်အတွက် ဟန်ချက်ညီအောင် ပြုလုပ်ထားသည်။ ခွန်အား (Strength) +၂] [ဈေးနှုန်း - ဒေါ်လာ ၇၀,၀၀၀]

မွန်းသည် သူ၏ အတန်းအစားအရ အဝေးမှ တိုက်ခိုက်သူဖြစ်သော်လည်း 'ဆောင်းရာသီသားရဲ' နှင့် ရင်ဆိုင်ရစဉ်က အနီးကပ်တိုက်ခိုက်ရန် နည်းလမ်းမရှိခြင်း၏ အန္တရာယ်ကို သူသင်ခန်းစာ ရခဲ့သည်။ ရန်သူက အနီးကပ်ရောက်လာပါက အားကိုးရသော အနီးကပ်လက်နက်တစ်ခု ရှိနေခြင်းက အသက်ကို ကယ်တင်နိုင်ပေလိမ့်မည်။

[ဒြပ်စင်ပဲ့တင်ထပ်ခြင်း တောင်ဝှေး (Staff of Elemental Resonance)] [အဆင့် (Order) - ပထမ] [အဆင့်အတန်း (Rank) - ဒုတိယအဆင့်အထက်] [အသေးစိတ် - မှော်သစ်သားနှင့် တတိယအဆင့်ဒြပ်စင်အနှစ်သာရများဖြင့် ပြုလုပ်ထားသော ခိုင်ခံ့သည့် တိုက်ပွဲဝင်တောင်ဝှေး။ မန္တန်များ၏ ပြန်လည်အသုံးပြုချိန် (cooldown) ကို ၁၀ ရာခိုင်နှုန်း လျှော့ချပေးသည်။ ဒြပ်စင်စွမ်းအင်များကို ထုတ်လွှတ်ရာတွင် ပိုမိုချောမွေ့စေပြီး ‌မှော်စွမ်းအင်စီးဆင်းမှုကို တည်ငြိမ်စေကာ မန္တန်များကို ပိုမိုအားကောင်းစေသည်။ ခိုင်ခံ့သော တည်ဆောက်ပုံကြောင့် အနီးကပ်တိုက်ပွဲတွင် လှံကဲ့သို့ အသုံးပြုနိုင်သည်။ အသုံးပြုသူ၏ အဓိကဒြပ်စင်နှင့် ကြာလေလေ လိုက်လျောညီထွေ ဖြစ်လေလေ ဖြစ်သည်။ မှော်စွမ်းအင် (Mana) +၅] [ဈေးနှုန်း - ဒေါ်လာ ၃၅၀,၀၀၀]

ဒါက သူအများဆုံး သုံးစွဲလိုက်သည့် ပစ္စည်းဖြစ်သည်။ ပြန်လည်အသုံးပြုချိန် လျှော့ချပေးနိုင်ခြင်းကပင် တန်ဖိုးရှိလှပြီး စွမ်းအင်ထုတ်လွှတ်မှုကို ပိုမိုကောင်းမွန်စေခြင်းက သူ၏ ဒြပ်စင်တိုက်ခိုက်မှုများကို ပိုမိုပြင်းထန်စေမည်။ အကယ်၍ တစ်စုံတစ်ယောက် အနားကပ်လာပါကလည်း ဤတောင်ဝှေးဖြင့်ပင် ခုခံနိုင်သည်။

မွန်းသည် ပစ္စည်းလေးခုကို ယူကာ ငွေရှင်းသည့်နေရာသို့ သွားလိုက်သည်။

သူ ချဉ်းကပ်သွားသောအခါ အသက် ၃၀ ကျော်အရွယ် အရောင်းဝန်ထမ်း အမျိုးသမီးတစ်ဦးက သူ့ကို မော့ကြည့်သည်။ သူမသည် အဖြူရောင် ရှပ်အင်္ကျီနှင့် ကိုယ်ကျပ်စကတ်ရှည်ကို ဝတ်ဆင်ထားပြီး ခြေအိတ်အမည်းကို စီးထားသည်။

"နေကောင်းပါသလား ရှင့်။ ဒီနေ့အတွက် ဒါတွေပဲ ဝယ်ယူမှာလားရှင့်" ဟု ထိုအမျိုးသမီးက ပြုံးလျက် မေးလိုက်သည်။

မွန်းက ပစ္စည်းများကို ကောင်တာပေါ် တင်လိုက်ပြီး "ဟုတ်ကဲ့" ဟု ပြန်ဖြေသည်။

သူမက ပစ္စည်းတစ်ခုချင်းစီကို စကင်ဖတ်ရင်း သဘောကျသည့်အမူအရာဖြင့် ကြည့်သည်။ "ရွေးချယ်မှုတွေက အရမ်းကောင်းပါတယ်ရှင့်။ ဟင်းလင်းပြင်လက်စွပ်နဲ့ ဒြပ်စင်တောင်ဝှေးက အစွမ်းထက်တဲ့ မှော်ဆရာတွေကြားမှာ အရမ်းနာမည်ကြီးပါတယ်။"

သူမက ငွေပေးချေမှုကို လုပ်ဆောင်ရင်း မွန်း၏အခွင့်ထူးခံကတ်ကို ကြည့်လိုက်သည်။ "ပစ္စည်းတွေရဲ့ ပေါင်းစပ်အာနိသင်ကို ရွေးချယ်တတ်တဲ့ အမြင်က တော်တော်လေး ကောင်းပါတယ်ရှင့်။"

"ကျေးဇူးပါ" ဟု မွန်းက တိုတိုပင် ပြန်ပြောသည်။

သူမက စုစုပေါင်းကို တွက်ချက်လိုက်သည်။ "စုစုပေါင်း ခုနစ်သိန်း ကိုးသောင်း ကျသင့်ပါတယ်ရှင့်။ ၅ ရာခိုင်နှုန်း လျှော့စျေးနဲ့ဆိုရင် စုစုပေါင်း ခုနစ်သိန်း ငါးသောင်း ဖြစ်ပါတယ်ရှင့်။"

"ဘယ်လို ငွေပေးချေမှာလဲရှင့်"

"ဘဏ်ကနေပဲ ပေးပါမယ်"

"ဟုတ်ကဲ့ပါရှင့်" သူမ၏ လက်ချောင်းများက ကီးဘုတ်ပေါ်တွင် အလုပ်ရှုပ်သွားသည်။ "သင့်ရဲ့ စက်ပစ္စည်းပေါ်မှာ ငွေလွှဲတာကို အတည်ပြုပေးပါရှင့်။"

မွန်းက ဖုန်းကို ထုတ်လိုက်ပြီး ငွေလွှဲခြင်းကို အတည်ပြုလိုက်သည်။ သူ့အကောင့်ထဲမှ ငွေများ နုတ်ယူသွားသည်ကို သူတွေ့လိုက်ရသည်။

လက်ကျန်ငွေ - ဒေါ်လာ ၇၁၈,၀၀၀

တိုက်ခန်းအတွက် လေးသောင်းနှင့် ယခု ပစ္စည်းများအတွက် သုံးစွဲပြီးနောက် သူ၏ လက်ကျန်ငွေမှာ တစ်သန်းအောက်သို့ ရောက်သွားသည်။ သို့သော် အလုပ်မလုပ်ဘဲ နောက်ထပ် နှစ်အတော်ကြာ သက်သောင့်သက်သာ နေထိုင်ရန် သို့မဟုတ် ပိုကောင်းသည့် ပစ္စည်းများ ဝယ်ရန်အတွက် လုံလောက်သေးသည်။

မွန်းက ထပ်မဝယ်တော့ပေ။ ဤပစ္စည်းများက ပထမသန့်စင်နယ်‌မြေအတွက် လုံလောက်နေပြီဖြစ်ပြီး နောက်တစ်ချိန် ဒုတိယသန့်စင်နယ်‌မြေသို့ တက်လှမ်းရန်အတွက် ငွေအချို့ကို ချန်ထားရန် လိုအပ်သေးသည်။

မွန်းသည် ဟင်းလင်းပြင်လက်စွပ်အသစ်ကို လက်တွင် စွပ်လိုက်သည်။ လက်စွပ်အတွင်းရှိ ဟင်းလင်းပြင် အိတ်ကပ်က သူ၏ စိတ်အာရုံနှင့် ဆက်သွယ်သွားသည်ကို သူခံစားလိုက်ရသည်။ လက်စွပ်ဟောင်းနှင့် ယှဉ်လျှင် ၅ ဆခန့် ပိုမိုကျယ်ဝန်းလှသည်။

"ဝယ်ယူအားပေးတဲ့အတွက် ကျေးဇူးတင်ပါတယ် မစ္စတာ မွန်းအောက်လော။ နောက်ထပ် လိုအပ်တာရှိရင်လည်း ကြွလှမ်းခဲ့ပါဦးရှင့်" ဟု သူမက ပြုံးကာ နှုတ်ဆက်သည်။

မွန်းက ခေါင်းငြိမ့်ပြကာ ထွက်ပေါက်ဆီသို့ လျှောက်သွားသည်။ အထပ်တွင် ရှိနေသော အစောင့်များက သူ့ကို လေးစားစွာဖြင့် ခေါင်းငြိမ့်ပြကြသည်။ မွန်းကဲ့သို့ ငွေအမြောက်အ

မြားကို တစ်ခါတည်း သုံးစွဲနိုင်သူမှာ သိပ်မရှိလှပေ။