အခန်း (၄၄) - ကုန်သွယ်ရေးဗဟိုဌာန [၂]

အတွင်းပိုင်းမှာ သပ်ရပ်သန့်ရှင်းပြီး အဆင့်အတန်းရှိလှသည်။ နံရံတစ်လျှောက်တွင် သီးသန့်အရောင်းအဝယ်များပြုလုပ်ရန် စီစဉ်ထားသော အခန်းငယ်လေးများ ရှိနေသည်။

လုံခြုံရေးဝန်ထမ်းများသည် ဗျူဟာကျသောနေရာများတွင် နေရာယူထားကြပြီး ၎င်းတို့ရှိနေခြင်းက သိပ်မသိသာသော်လည်း ထိရောက်မှုရှိလှသည်။ ဤနေရာမျိုးမှာ မည်သူမျှ မိုက်မိုက်ကန်းကန်း တစ်ခုခုလုပ်ရန် ကြံစည်ရဲသည့် နေရာမျိုးမဟုတ်ပေ။

မွန်းက ကုန်သွယ်ရေးဗဟိုဌန၏ ယူနီဖောင်းကို ဝတ်ဆင်ထားပြီး အသက် ၂၀ ကျော်ခန့်ရှိမည့် ဝန်ထမ်းကို ကြည့်ကာ “ကျွန်တော် ပထမသန့်စင်နယ်မြေဘုံ (First Sanctuary) ကရတဲ့ ပစ္စည်းတချို့ကို ရောင်းချင်လို့ပါ” ဟု ပြောလိုက်သည်။

ထိုလူငယ်က ခေါင်းငြိမ့်ပြကာ မည်သည့်စူးစမ်းလိုစိတ်ကိုမျှ မပြဘဲ လုပ်ငန်းကျွမ်းကျင်မှုရှိစွာဖြင့် “ဟုတ်ကဲ့ပါခင်ဗျာ၊ ပစ္စည်းတွေကို တန်ဖိုးဖြတ်နိုင်ဖို့ သီးသန့်အခန်းကို ကြွပေးပါဦး” ဟု ဖိတ်ခေါ်လိုက်သည်။

သူက မွန်းကို လူသွားလမ်းအတိုင်း ခေါ်ဆောင်သွားပြီး အခန်းငယ်တစ်ခုထဲသို့ ဝင်ရန် ညွှန်ပြသည်။ အခန်းက သေးငယ်သော်လည်း ပစ္စည်းစုံလင်စွာ ခင်းကျင်းထားသည်။ စားပွဲကြီးတစ်လုံး၊ တန်ဖိုးဖြတ်သည့် စက်ပစ္စည်းများနှင့် ကုန်သွယ်ရေးစင်တာ၏ ဈေးနှုန်းအခြေခံအ‌ချက်အလက်နှင့် ချိတ်ဆက်ထားသည့် ကွန်ပျူတာတစ်လုံးလည်း ရှိသည်။

“ဘာပစ္စည်းတွေကို ရောင်းချင်တာလဲခင်ဗျာ” ဟု ဝန်ထမ်းက မေးရင်း ကွန်ပျူတာပေါ်တွင် ‌လျှောက်လွှာတစ်ခုကို ဖွင့်လိုက်သည်။

မွန်းက တည်ငြိမ်သောအသံဖြင့် “အဓိကကတော့ အဆင့်မြင့်အဆင့်ရှိတဲ့ အမြုတေ (Core) တစ်ခု၊ သားရဲရဲ့ ရုပ်အလောင်းနဲ့ တခြားအမြုတေတွေ၊ ပစ္စည်းတွေပါ” ဟု ဖြေလိုက်သည်။

ထိုလူငယ်၏ လက်ချောင်းများ ကီးဘုတ်ပေါ်တွင် တန့်သွားသည်။ သူ၏မျက်လုံးများ ပြူးကျယ်သွားပြီး အံ့အားသင့်သွားသည့်အရိပ်အယောင်များ မျက်နှာပေါ်တွင် ထင်ဟပ်လာသည်။ “အဆင့်မြင့်အဆင့် အမြုတေ ဟုတ်ပါသလား။ သေချာလို့လားခင်ဗျာ”

“ဒီမှာပါ” ဟု မွန်းက ပြောရင်း သူ၏ပစ္စည်းသိုလှောင်လက်စွပ်ထဲမှ ထုတ်လိုက်သည်။

စားပွဲပေါ်တွင် ‘ဆောင်းရာသီသားရဲ’ (Winter Beast) ၏ အမြုတေက ပထမဆုံး ပေါ်လာသည်။ လက်သီးဆုပ်ခန့်ရှိသော ထိုအမြုတေသည် အေးခဲနေသည့် အပြာရောင်အလင်းတန်းများ ဖြာထွက်နေသည်။ ၎င်း၏အတွင်းပိုင်းတွင် ရေခဲပုံဆောင်ခဲများက လှပသလို တစ်ဖက်တွင်လည်း ကြောက်မက်ဖွယ်ကောင်းအောင် လှည့်ပတ်စီးဆင်းနေသည်။

“ဒါကတော့ သူ့ရဲ့ ရုပ်အလောင်းပါ”

ဧရာမ ရုပ်အလောင်းကြီးတစ်ခု ကြမ်းပြင်ပေါ်တွင် ပေါ်လာသည်။ သေဆုံးနေပြီဖြစ်သော်လည်း ထိုရုပ်အလောင်းက အခန်းတွင်းရှိ နေရာအတော်များများကို ပြည့်နှက်သွားစေသည်။

နောက်ဆုံးတွင် မွန်းသည် အာတိတ်ဝံပုလွေ အလောင်းတစ်လောင်းကို ထုတ်လိုက်သည်။ ထိုဝံပုလွေထဲတွင် အမြုတေက ပါရှိနေဆဲဖြစ်ပြီး မွန်းက ထုတ်မယူထားခဲ့ပေ။

ဝန်ထမ်းက ထိုအမြုတေကို ကြည့်ကာ သူ၏ တည်ငြိမ်မှုများ ပျက်ပြားသွားသည်။ “ဒါက... ဒါက တကယ်ပဲ အဆင့်မြင့်အဆင့် အမြုတေပဲ။ ရေခဲဓာတ်စွမ်းအင်ကလည်း အရမ်းကို သန့်စင်တာပဲ။ ဒါက အခုလက်ရှိ ဈေးကွက်ထဲမှာရှိတဲ့ အကောင်းဆုံး ပထမအဆင့် (First-order) လက်နက်တွေကို သွန်းလုပ်ဖို့ အသုံးဝင်မှာပဲ”

သူက မွန်းကို မဖုံးဖိနိုင်သော အံ့ဩလေးစားမှုများဖြင့် မော့ကြည့်လိုက်သည်။

အမြုတေအဆင့် သတ်မှတ်ချက်များကို သားရဲ၏အဆင့်နှင့် ဓာတ်စွမ်းအင်ပါဝင်မှုပေါ် မူတည်၍ ကမ္ဘာ့အင်အားကြီးနိုင်ငံ လေးခုလုံးတွင် စံနှုန်းတစ်ခုတည်းအဖြစ် သတ်မှတ်ထားသည်။

ပထမသန့်စင်နယ်‌မြေအတွင်းမှ ရရှိသော ပထမအဆင့် အမြုတေများ၏ အဆင့်သတ်မှတ်ချက်မှာ အောက်ပါအတိုင်း ဖြစ်သည် -

* အက်ဖ် (F) အဆင့် အမြုတေ - အဆင့် (Level) ၁၀ အောက် * အီး (E) အဆင့် အမြုတေ - အဆင့် (Level) ၁၀ မှ ၁၅ အတွင်း * ဒီ (D) အဆင့် အမြုတေ - အဆင့် (Level) ၁၆ မှ ၁၇ အတွင်း * စီ (C) အဆင့် အမြုတေ - အဆင့် (Level) ၁၈ မှ ၁၉ အတွင်း * ဘီ (B) အဆင့် အမြုတေ - အဆင့် (Level) ၂၀ နှင့် အထက် * အေ (A) အဆင့် အမြုတေ - အဆင့် (Level) ၂၀ နှင့် အထက် (အခြေခံဓာတ်စွမ်းအင် ပါဝင်မှုရှိခြင်း) * အက်စ် (S) အဆင့် အမြုတေ - အဆင့် (Level) ၂၀ နှင့် အထက် (အားကောင်းသော ဓာတ်စွမ်းအင် ပါဝင်မှုရှိခြင်း)

ဆောင်းရာသီသားရဲသည် အဆင့် ၂၀ ရှိပြီး လျှို့ဝှက်နယ်မြေတစ်ခုလုံးကို စိုးမိုးထားနိုင်သည့် အလွန်အားကောင်းသော ရေခဲဓာတ်စွမ်းအင်ကို ပိုင်ဆိုင်ထားခြင်း ဖြစ်သည်။

ဝန်ထမ်းက တံတွေးကို အနိုင်နိုင်မျိုချကာ တန်ဖိုးဖြတ်သည့် ကိရိယာများကို ထုတ်ယူလိုက်စဉ် သူ၏လက်များမှာ သိသိသာသာ တုန်ရင်နေသည်။ “ဒါက... ဒါက တကယ်ကို ရှားပါးလွန်းပါတယ်။ ဒီသားရဲကို နှိမ်နင်းဖို့ တကယ့်ကို ခက်ခဲခဲ့မှာပဲနော်”

“စိန်ခေါ်မှုတွေတော့ ရှိခဲ့တာပေါ့” ဟု မွန်းက ပြန်ဖြေသည်။ ထိုနယ်မြေတွင် အသက်ရှင်ကျန်ရစ်ရန် သူပေးဆပ်ခဲ့ရမှုများနှင့် အခက်အခဲများကို တွေးကြည့်လျှင် ဤစကားသည် အလွန်အမင်း လျှော့ပြောလိုက်ခြင်းပင် ဖြစ်သည်။

နိုးထသူ (Awakener) များ၏ စီးပွားရေးလောကတွင် အမြုတေများကို ရည်ရွယ်ချက်အမျိုးမျိုးဖြင့် အသုံးပြုကြသည်။

အဓိကအားဖြင့် အားကောင်းသော လက်နက်များနှင့် ဝတ်စုံများ သွန်းလုပ်ရာတွင် အသုံးပြုသည်။ လက်နက်များ ပြုလုပ်ရာတွင် အမြုတေမှ စွမ်းအင်များကို ထည့်သွင်းခြင်းဖြင့် ၎င်းလက်နက်ကို ဓာတ်စွမ်းအင်များ ပါဝင်စေကာ ပိုမိုခိုင်ခံ့စေသည်။

အဆင့်မြင့်အဆင့်ရှိ ရေခဲအမြုတေဖြင့် သွန်းလုပ်ထားသော လက်နက်သည် အလွန်အစွမ်းထက်ပြီး ထိတွေ့မိသည်နှင့် ရန်သူကို အေးခဲသွားစေနိုင်သည့်အပြင် သာမန်လက်နက်များထက် အဆပေါင်းများစွာ သာလွန်သော ပျက်စီးမှုကို ဖြစ်စေနိုင်သည်။

ထို့ပြင် အမြုတေများကို အားကောင်းသော စွမ်းအင်အရင်းအမြစ်များအဖြစ်လည်း အသုံးပြုကြသည်။ ဂိုဏ်းအဖွဲ့အစည်းများသည် ၎င်းတို့၏ အခြေစိုက်စခန်းများရှိ ကာကွယ်ရေးစနစ်များကို လည်ပတ်ရန် မြင့်မားသောအဆင့်ရှိ အမြုတေများကို အသုံးပြုကြသည်။ သုတေသနဌာနများတွင်လည်း စမ်းသပ်မှုများအတွက် အသုံးပြုကြသည်။ ချမ်းသာသော နိုးထသူများသည် သူတို့၏ စွမ်းရည်များကို ခေတ္တမြှင့်တင်ရန် သန့်စင်ထားသော အမြုတေအဆီအနှစ်များကို သောက်သုံးကြသော်လည်း ထိုလုပ်ငန်းစဉ်သည် အလွန်ဈေးကြီးပြီး အန္တရာယ်လည်း များလှသည်။

အဆင့်မြင့်အဆင့် အမြုတေတစ်ခုသည် ချမ်းသာကြွယ်ဝမှု၊ အာဏာနှင့် အခွင့်အလမ်းများကို တစ်ခုတည်းဖြင့် ဖော်ဆောင်နေခြင်း ဖြစ်သည်။

ဝန်ထမ်းက အမြုတေကို တန်ဖိုးဖြတ်စက်ဖြင့် ဂရုတစိုက် စစ်ဆေးနေစဉ် ကွန်ပျူတာပေါ်ရှိ ကိန်းဂဏန်းများက တရိပ်ရိပ် တက်လာသည်။ စစ်ဆေးမှုရလဒ် တစ်ခုချင်းစီ ထွက်လာတိုင်း သူ၏မျက်နှာက ပို၍ ပို၍ အံ့ဩသွားသည်။

“သန့်စင်မှုနှုန်းက တကယ်ကို မြင့်မားလွန်းတယ်... ပထမအဆင့် အမြုတေတစ်ခုမှာ ဒီလောက်အထိ မြင့်မားတဲ့ ရလဒ်မျိုး တစ်ခါမှ မတွေ့ဖူးဘူး။ ဒါက ဒုတိယအဆင့် (Second-order) အမြုတေတချို့နဲ့တောင် ယှဉ်နိုင်တယ်” ဟု သူက ရေရွတ်လိုက်သည်။

သူသည် ရင်ခုန်စိတ်လှုပ်ရှားနေသော်လည်း အလုပ်ကိုတော့ အာရုံစိုက်ကာ လုပ်ဆောင်နေသည်။ သူ၏ လက်ချောင်းများက ကွန်ပျူတာပေါ်တွင် လျင်မြန်စွာ ရွေ့လျားရင်း လက်ရှိဈေးကွက်ပေါက်ဈေး၊ အလားတူပစ္စည်းများ၏ အရောင်းအဝယ်မှတ်တမ်းများကို တွက်ချက်နေသည်။

နောက်ဆုံးတွင် သူက မွန်းကို မော့ကြည့်ကာ “ဓာတ်စွမ်းအင်ရဲ့ သန့်စင်မှု၊ စွမ်းအားနဲ့ အမြုတေရဲ့ အဆင့်ပေါ် မူတည်ပြီး ကုန်သွယ်ရေဗဟိုဌာနကနေ ဒီအမြုတေတစ်ခုတည်းအတွက် ဒေါ်လာ တစ်သန်း ပေးပါမယ်” ဟု ပြောလိုက်သည်။

ထို့နောက် ဆောင်းရာသီသားရဲ၏ ရုပ်အလောင်းနှင့် အာတိတ်ဝံပုလွေ အစရှိသည့် တခြားပစ္စည်းများကို ညွှန်ပြကာ “ကျန်တဲ့ ရုပ်အလောင်းတွေနဲ့ ပစ္စည်းတွေအတွက်ကတော့ ဒေါ်လာ ငါးသိန်း ပေးပါမယ်။ အကယ်၍ လူကြီးမင်းက ပိုက်ဆံအစား အဆင့်နိမ့်တဲ့ အမြုတေတွေနဲ့ လဲချင်တယ်ဆိုရင်လည်း ရပါတယ်”

မွန်းက ခေါင်းခါလိုက်ပြီး “ပိုက်ဆံပဲ ယူပါမယ်။ သဘောတူတယ်” ဟု ပြောလိုက်သည်။

အရောင်းဝန်ထမ်းလေး၏ မျက်နှာက သိသိသာသာ တောက်ပသွားသည်။ ဤမျှကြီးမားသော အရောင်းအဝယ်တစ်ခုအတွက် သူရမည့် ကော်မရှင်သည် မနည်းလှသလို သူ၏ အလုပ်အကိုင် အခွင့်အလမ်းအတွက်လည်း များစွာ အထောက်အကူဖြစ်မည်ဖြစ်သည်။

“ကောင်းပါပြီခင်ဗျာ။ အားလုံးကို အဆင်ပြေအောင် စီစဉ်ပေးပါမယ်” ဟု ဆိုကာ ခဏရပ်ပြီး သူ၏ လေသံကို အနည်းငယ် ပြောင်းလိုက်ကာ “ဒါတွေ စီစဉ်နေတုန်း တစ်ခုခု သောက်ချင်ပါသလားခင်ဗျာ” ဟု မေးသည်။

မွန်းက ခဏစဉ်းစားပြီး “ရေဆို ရပါပြီ” ဟု ဆိုသည်။

ဝန်ထမ်းက စားပွဲအောက်ရှိ ရေခဲသေတ္တာအသေးလေးထဲမှ အေးစက်နေသော ရေတစ်ပုလင်းကို ထုတ်ယူကာ ပြုံး၍ ကမ်းပေးသည်။ ထို့နောက် သူ၏ကွန်ပျူတာဆီသို့ ပြန်လှည့်ကာ ငွေလွှဲပြောင်းမှုဆိုင်ရာ လုပ်ငန်းစဉ်များကို စတင်လိုက်သည်။

မွန်းက ရေကို ဖြည်းဖြည်းချင်း သောက်ရင်း ထိုလူငယ် အလုပ်လုပ်နေသည်ကို ကြည့်နေမိသည်။

ဒေါ်လာ ၁,၅၀၀,၀၀၀ ဆိုသည်မှာ သူ၏ တစ်သက်တာတွင် ပိုင်ဆိုင်နိုင်လိမ့်မည်ဟု တစ်ခါမျှ မတွေးခဲ့ဖူးသော ပမာဏ ဖြစ်သည်။ သူ၏ မိဘများ မသေဆုံးမီ စုဆောင်းခဲ့သည့် ငွေများထက် ပိုများသလို သူ၏ အရင်အရောင်းအလုပ်ကို ဆယ်စုနှစ်ပေါင်းများစွာ လုပ်လျှင်တောင် ရနိုင်မည့် ပမာဏ မဟုတ်ပေ။

ငါးမိနစ်ခန့်အကြာတွင် ထိုလူငယ်က ကျေနပ်အားရစွာဖြင့် မော့ကြည့်လာသည်။ “ငွေလွှဲတာကို စတင်လိုက်ပါပြီ။ ဒေါ်လာ တစ်သန်းကျော်တဲ့ အရောင်းအဝယ်တွေမှာ လုံခြုံရေးစစ်ဆေးမှုတွေ ရှိတာကြောင့် သင့်အကောင့်ထဲကို ရောက်ဖို့ နာရီအနည်းငယ်တော့ စောင့်ပေးရပါမယ်”

“နားလည်ပါပြီ” ဟု မွန်းက ပြန်ဖြေသည်။

ဝန်ထမ်းက ခဏတာ ဝေခွဲမရဖြစ်နေဟန်ဖြင့် “စပ်စုသလို ဖြစ်သွားရင် ခွင့်လွှတ်ပါ၊ လူကြီးမင်းက အဆင့်မြင့် အတန်းအစား အဆင့်မြှင့်တင်မှု (Class Evolution) ကို ပြုလုပ်ပြီးပြီလားခင်ဗျာ” ဟု မေးလိုက်သည်။

မွန်းက ခေါင်းခါပြလိုက်သည်။ “မလုပ်ရသေးပါဘူး”

အတန်းအစား အဆင့်မြှင့်တင်မှုသည် များသောအားဖြင့် အဆင့် ၂၅ ခန့်တွင် ပြုလုပ်ကြခြင်းဖြစ်သည်။ ထိုအချိန်တွင် နိုးထသူများသည် ၎င်းတို့၏ စွမ်းရည်များကို ပိုမိုနားလည်လာပြီး နောက်ထပ် အဆင့်တစ်ခုသို့ တက်လှမ်းကာ ပိုမိုအားကောင်းသော စွမ်းရည်အသစ်များကို ရရှိကြသည်။ ၎င်းသည် နိုးထသူတစ်ဦး၏ အစွမ်းကို သိသိသာသာ ပြောင်းလဲပေးနိုင်သော လုပ်ငန်းစဉ် ဖြစ်သည်။

လူငယ်က ခေါင်းငြိမ့်ပြကာ စားပွဲအံဆွဲထဲမှ ကုန်သွယ်ရေးစင်တာ၏ လိုဂိုပါသည့် ရွှေရောင်ကတ်ပြားတစ်ခုကို ထုတ်ပေးလိုက်သည်။

“ဒီလောက်ကြီးမားတဲ့ အရောင်းအဝယ်ကို ပြုလုပ်ပေးတဲ့အတွက် လူကြီးမင်းကို ဒီ အရေးကြီးပုဂ္ဂိုလ် အသင်းဝင်ကတ်ကို ပေးချင်ပါတယ်။ ဒီကတ်နဲ့ဆိုရင် ကျွန်တော်တို့ အဆောက်အအုံရဲ့ ပထမ ၁၀ ထပ်အထိ ဝင်ထွက်ခွင့်ရမယ့်အပြင် လျှော့ဈေးတွေ၊ ဦးစားပေး ရောင်းချခွင့်တွေနဲ့ လေလံပွဲ ဖိတ်ကြားစာတွေကိုလည်း ရရှိမှာပါ”

သူက ထိုကတ်ကို မွန်းထံ ကမ်းပေးလိုက်သည်။ “ဒါ့အပြင် အဖိုးတန် ပစ္စည်းတွေ၊ လက်နက်ကိရိယာတွေနဲ့ တခြားလိုအပ်တာတွေကိုလည်း ဝယ်ယူနိုင်ပါတယ်။ ဒါတွေက သာမန်အသင်းဝင်တွေ ဝယ်လို့မရတဲ့ အဆင့်မြင့် ပစ္စည်းတွေပါ”

သူက ခဏရပ်ကာ ပုံမှန်သတိပေးချက်တစ်ခုကို ထည့်ပြောလိုက်သည်။ “တစ်ခုသတိပြုရမှာက ဒီမှာဝယ်တဲ့ ပစ္စည်းတွေကို ပထမသန့်စင်နယ်‌မြေဘုံထဲကို ယူသွားလို့ မရပါဘူး။ စနစ် (System) ကနေ အသိအမှတ်ပြုထားပြီး ဖိတ်ခေါ်ခြင်းခံရတဲ့ ပစ္စည်းတွေပဲ ယူသွားလို့ ရပါတယ်။ သန့်စင်နယ်မြေရဲ့၀င်ပေါက်တံခါးတွေက ပြင်ပပစ္စည်းတွေကို လက်ခံမှာ မဟုတ်ပါဘူး”

ဝန်ထမ်းက ဤအချက်ကို ထပ်ခါတလဲလဲ ပြောနေခြင်းမှာ မိမိတို့ဝယ်လာသည့် လက်နက်များကို ပထမသန့်စင်နယ်‌မြေထဲသို့ ဝင်မည့် သူငယ်ချင်း သို့မဟုတ် ဆွေမျိုးများထံ ပေးလိုက်ခြင်းမျိုး မဖြစ်စေရန် ဖြစ်သည်။ ယခင်က ထိုသို့လုပ်ဆောင်ရန် ကြိုးစားခဲ့ကြသည်မှာ အကြိမ်ပေါင်း မနည်းတော့ပေ။

မွန်းက ကတ်ကိုယူကာ ခေတ္တကြည့်လိုက်သည်။ အထပ် ၁၀ ထပ်အထိ ဝင်ခွင့်ရခြင်းဆိုသည်မှာ အရည်အသွေးမြင့် လက်နက်များ၊ ရှားပါးပစ္စည်းများ၊ အခြေခံအချက်

အလက် များနှင့် အခြားသော အထူးဝန်ဆောင်မှုများကို ရရှိနိုင်ခြင်းပင် ဖြစ်သည်။

“ကျေးဇူးတင်ပါတယ်” ဟု မွန်းက ပြောကာ ကတ်ကို အိတ်ကပ်ထဲ ထည့်လိုက်သည်။

“အခုလို လာရောက်အားပေးတဲ့အတွက် ကျေးဇူးတင်ပါတယ်ခင်ဗျာ။ နောက်နောင် တစ်ခုခုလိုအပ်ရင်လည်း ကြွခဲ့ပါဦး” ဝန်ထမ်းက မတ်တတ်ရပ်ကာ ရိုသေသမှုဖြင့် ဦးညွှတ်လိုက်သည်။

မွန်းလည်း မတ်တတ်ရပ်ကာ ခေါင်းငြိမ့်ပြပြီး ထိုအခန်းထဲမှ ထွက်လာခဲ့သည်။

မွန်းသည် မနက်ပိုင်းက ချိန်းဆိုထားသော အိမ်ခြံမြေ အကျိုးဆောင်ထံသို့ သွားရန် ပြင်လိုက်သည်။ လက်နက်ကိရိယာအချို့ ဝယ်ချင်သော်လည်း လောလောဆယ်တွင် ထိုကိစ္စကို နောက်ဆုတ်ထားရန် သူ ဆုံးဖြတ်လိုက်သည်။