အခန်း (၄၃) - ကုန်သွယ်ရေးဗဟိုဌာန [၁]

မွန်းသည် တံဆိပ်ကိုရရှိပြီးနောက် နာရီအနည်းငယ် ကြာမြင့်သွားခဲ့ပြီဖြစ်သည်။ မှတ်ပုံတင်ထားသည့် နိုးထသူ (Awakener) တိုင်း အဆင့်မခွဲခြားဘဲ ရရှိမြဲဖြစ်သော လစဉ်ထောက်ပံ့ကြေး ဒေါ်လာတစ်သောင်းမှာ သူ၏ဘဏ်အကောင့်ထဲသို့ စီးဝင်လာပြီးဖြစ်သည်။ ဤပမာဏမှာ အလွန်အမင်း ကြွယ်ဝသွားစေနိုင်သည်မျိုး မဟုတ်သော်လည်း နိုးထသူများအတွက် အခြေအနေတစ်ခုတွင် အသက်ရှူချောင်စေနိုင်သည့် တည်ငြိမ်သော ရန်ပုံငွေတစ်ခု ဖြစ်သည်။

သူသည် ပထမဆုံးအလုပ်အနေဖြင့် သူ၏ဖုန်းအဟောင်းကို အစားထိုးရန် ဆုံးဖြတ်လိုက်သည်။ သူသည် ဟိတ်ဟန်မပါဘဲ အခြေခံလုပ်ဆောင်ချက်များပါဝင်သည့် အလတ်တန်းစား ဖုန်းတစ်လုံးကို ဝယ်ယူခဲ့ပြီး ချက်ချင်းပင် အသက်သွင်းလိုက်သည်။ ၎င်းအတွက် ဒေါ်လာ ၅၀၀ ခန့် ကုန်ကျခဲ့ရာ သင့်တင့်သော ဈေးနှုန်းဟု ဆိုနိုင်သည်။

ထို့နောက် သူ၏ ဒုတိယမြောက် အရေးကြီးသည့် ဆုံးဖြတ်ချက်ကို ချလိုက်သည် - ၎င်းမှာ မြို့အတွင်း အထင်ကရအရှိဆုံး လဲလှယ်ရေးစင်တာတစ်ခုဖြစ်သည့် ‘Trading Centre’ (ကုန်သွယ်ရေးဗဟိုဌာန) ၏ အဖွဲ့ဝင်အဖြစ် ဝယ်ယူရန်ဖြစ်သည်။

ကုန်သွယ်ရေးဗဟိုဌာန ဆိုသည်မှာ အရောင်းအဝယ်ပြုလုပ်ရာ နေရာတစ်ခုမျှသာ မဟုတ်ပေ။

၎င်းသည် သန့်စင်နယ်မြေ‌ဘုံမှရရှိသော ပစ္စည်းများ၊ သတင်းအချက်အလက်နှင့် လက်နက်ကိရိယာများကို နိုးထသူများအချင်းချင်း ရောင်းဝယ်ဖောက်ကားကြသည့် ကမ္ဘာလုံးဆိုင်ရာ ကွန်ရက်ကြီးတစ်ခု ဖြစ်သည်။

အဖွဲ့ဝင်ကြေးမှာ မနည်းလှပေ။ ကြိုတင်ပေးသွင်းရမည့် အခကြေးငွေအပြင် လစဉ်ကြေးပါ ပေးဆောင်ရသော်လည်း ရရှိလာမည့် အကျိုးကျေးဇူးများမှာ များပြားလှသည်။ စိစစ်ပြီးသား ဝယ်ယူသူများ၊ မျှတသော ဈေးကွက်ပေါက်ဈေး၊ စိတ်ချရသော ငွေပေးချေမှုစနစ်နှင့် အရေးကြီးဆုံးမှာ တန်ဖိုးကြီးပစ္စည်းများကို အရောင်းအဝယ်လုပ်ရာတွင် မည်သူမည်ဝါဖြစ်ကြောင်း လုံးဝလျှို့ဝှက်ထားနိုင်ခြင်းပင် ဖြစ်သည်။

မွန်း အတွက် ထိုလျှို့ဝှက်ချက် ထိန်းသိမ်းမှုမှာ အထူးလိုအပ်နေသည်။ သူ၏ သိုလှောင်လက်စွပ် (Storage Ring) ထဲတွင် အဆင့် ၂၀ ရှိသော ‌‌ဆောင်းရာသီသားရဲ (Winter Beast) အလောင်းနှင့် ရက်အတော်ကြာ စုဆောင်းထားသည့် ပစ္စည်းများစွာ ရှိနေသည်။ တရားဝင် လမ်းကြောင်းများမှတစ်ဆင့် ရောင်းချခြင်းက အခွန်အခများနှင့် မှတ်တမ်းမှတ်ရာများ ကျန်ရစ်စေမည်ဖြစ်သော်လည်း ကုန်သွယ်ရေးဗဟိုဌာန၏ ပုဂ္ဂိုလ်ရေးဆိုင်ရာ မူဝါဒများက သူ၏ အရောင်းအဝယ် ပမာဏနှင့် တန်ဖိုးများကို အစိုးရနှင့် အဖွဲ့အစည်းများ၏ စောင့်ကြည့်မှုအောက်သို့ မရောက်ရှိစေရန် အာမခံပေးထားသည်။

ဤသတင်းအချက်အလက်များကို လူသတ်မှု သို့မဟုတ် ရာဇဝတ်မှုဆိုင်ရာ စုံစမ်းစစ်ဆေးမှုကဲ့သို့သော ခိုင်လုံသောအကြောင်းပြချက်ရှိမှသာ အင်အားကြီးအဖွဲ့အစည်းများထံ ပေးအပ်မည်ဖြစ်သည်။

နိုးထသူများအသင်း (Awakener's Association) ပင်လျှင် ကုန်သွယ်ရေးဗဟိုဌာန ကို အရောင်းအဝယ်မှတ်တမ်းများ ထုတ်ပေးရန် ဖိအားမပေးနိုင်ပေ။ အကြောင်းမှာ ကုန်သွယ်ရေးဗဟိုဌာန၏ ပိုင်ရှင်မှာ နိုင်ငံများကိုပင် ဖြိုလှဲနိုင်စွမ်းရှိသည့် စတုတ္ထသန့်စင်နယ်‌‌မြေဘုံ (Fourth Sanctuary) အဆင့်ရှိ နိုးထသူအနည်းငယ်ထဲမှ တစ်ယောက် ဖြစ်သောကြောင့်ပင်။

သူသည် အဖွဲ့ဝင်မှတ်ပုံတင်ခြင်းကို အင်တာနက်မှတစ်ဆင့် ဆောင်ရွက်ခဲ့ပြီး ကနဦးကြေးအဖြစ် ဒေါ်လာနှစ်ထောင် ပေးဆောင်လိုက်သည်။ နာရီဝက်အတွင်းမှာပင် သူ၏အကောင့်မှာ အတည်ပြုခြင်း ခံလိုက်ရသည်။

ဖော်ပြချက်တွေကို ကြည့်ရှုနေရင်း မွန်း သည် ကမ္ဘာကြီး ပျက်သုဉ်းကပ် ဆိုက်ရောက်ပြီးနောက်ပိုင်း မည်မျှအထိ ပြောင်းလဲသွားသည်ကို ပြန်လည်တွေးတောမိသည်။

လွန်ခဲ့သော နှစ်ပေါင်းနှစ်ရာကျော်က ကပ်ဘေးဆိုက်ရောက်ပြီးနောက် နိုင်ငံအများအပြားမှာ ကမ္ဘာ့မြေပုံပေါ်မှ လုံးဝပျောက်ကွယ်သွားခဲ့သည်။ ‘အက်‌ကွဲကြောင်း’ (Rift) များ ပွင့်ထွက်လာခြင်း၊ သားရဲများ ကျူးကျော်ဝင်ရောက်ခြင်းတို့ကြောင့် လူဦးရေများမှာ သေကျေပျက်စီးခဲ့ရသည်။ အသက်ရှင်ကျန်ရစ်သူများသည် တစ်ဦးနှင့်တစ်ဦး ဆက်လက်တိုက်ခိုက်ကြမလား၊ သို့မဟုတ် လူသားမျိုးနွယ် တစ်ခုလုံးကို ခြိမ်းခြောက်နေသည့် အန္တရာယ်ကို စုပေါင်းခုခံကြမလားဟူသည့် ရွေးချယ်မှုနှင့် ရင်ဆိုင်ခဲ့ရသည်။

နောက်ဆုံးတွင် သူတို့သည် ပူးပေါင်းရန် သို့မဟုတ် အနည်းဆုံးအားဖြင့် အင်အားစုစည်းရန် ရွေးချယ်ခဲ့ကြသည်။

နိုင်ငံရေးဆိုသည်မှာ လုံးဝပပျောက်သွားခြင်းမရှိသော်လည်း နိုင်ငံဟောင်းများ၏ နယ်နိမိတ်မျဉ်းများမှာ ပျော်ဝင်သွားခဲ့သည်။ ကျန်ရှိနေသော အင်အားစုများသည် မိမိကိုယ်ကိုယ် အင်အားကြီးနိုင်ငံ လေးခုအဖြစ် ပြန်လည်ဖွဲ့စည်းခဲ့ပြီး အခြားသေးငယ်သော ဒေသဆိုင်ရာ အာဏာပိုင်အဖွဲ့အစည်းအချို့မှာမူ ထိုအင်အားကြီးနိုင်ငံများ၏ အကာအကွယ်အောက်တွင် သို့မဟုတ် သီးခြားရပ်တည်ခဲ့ကြသည်။

လူသားမျိုးနွယ်၏ အင်အားကြီးနိုင်ငံ လေးခုမှာ အောက်ပါအတိုင်း ဖြစ်သည် -

ပထမဆုံး အင်အားကြီးနိုင်ငံမှာ 'ကမ္ဘာမြေပူးပေါင်းမဟာမိတ်အဖွဲ့' (United Terran Alliance - UTA) ဖြစ်ပြီး မွန်း လက်ရှိ နေထိုင်ရာ ဒေသဖြစ်သည်။ ၎င်းတွင် အမေရိကန်၊ ကနေဒါ၊ မက္ကဆီကိုနိုင်ငံများနှင့် ကာရေဘီယံ ကျွန်းနိုင်ငံများ ပါဝင်သည်။ မြို့တော်မှာ ယခင် ဝါရှင်တန်ဒီစီကို ပြန်လည်တည်ဆောက်ထားသည့် 'နယူးအဗလွန်' (New Avalon) ဖြစ်သည်။ ကမ္ဘာမြေပူးပေါင်းမဟာမိတ်အဖွဲ့ သည် '၀င်ပေါက်' (Gate) သိပ်သည်းဆနှင့် သားရဲများထံမှရသော အရင်းအမြစ်များတွင် အကြွယ်ဝဆုံးအဖြစ် လူသိများသည်။ ဧရိယာစတုရန်းကီလိုမီတာအလိုက် ကြည့်လျှင် အခြားမည်သည့်အင်အားစုထက်မဆို ၀င်ပေါက်အရေအတွက် ပိုမိုများပြားပြီး စုစုပေါင်းပြည်တွင်းထုတ်ကုန်အမြင့်ဆုံး အင်အားကြီးနိုင်ငံလည်း ဖြစ်သည်။ သူတို့၏ စီးပွားရေးမှာ သန့်စင်နယ်မြေ‌၏ အရင်းအမြစ်များအပေါ်တွင် လည်ပတ်နေသည်။

ဒုတိယမြောက် အင်အားကြီးနိုင်ငံမှာ 'အရှေ့တိုင်းအာရုဏ်ဦးသမဂ္ဂ' (Eastern Dawn Confederation - EDC) ဖြစ်သည်။ ၎င်းတွင် တရုတ်၊ ဂျပန်၊ ကိုရီးယားနှင့် အိမ်နီးချင်း အာရှနိုင်ငံများ ပါဝင်သည်။ မြို့တော်မှာ ဘေဂျင်းနှင့် ရှန်ဟိုင်းပျက်စီးခြင်းများအပေါ်တွင် တည်ဆောက်ထားသည့် ‘ထျန်းလုံနက်စပ်စ်’ (Tianlong Nexus) ဖြစ်သည်။ အရှေ့တိုင်းအာရုဏ်ဦးသမဂ္ဂ သည် ရှေးဟောင်းကျင့်စဉ်များကို ခေတ်သစ်နိုးထမှုစနစ်များနှင့် ပေါင်းစပ်ထားခြင်းကြောင့် လူသိများပြီး လူဦးရေအထူထပ်ဆုံးလည်း ဖြစ်သည်။ သူတို့၏ များပြားလှသော လူဦးရေကြောင့်ပင် အခြားအင်အားစုများထက် နိုးထသူ အရေအတွက် ပိုမိုထွက်ရှိသည်။

တတိယမြောက် အင်အားကြီးနိုင်ငံမှာ 'ထာဝရပဋိညာဉ်အဖွဲ့' (The Eternal Covenant) ဖြစ်သည်။ ဗြိတိန်၊ ပြင်သစ်၊ ဂျာမနီနှင့် အခြားဥရောပနိုင်ငံများ ပါဝင်သည်။ မြို့တော်မှာ 'လူမီနာမြို့တော်' (Luminar City) ဖြစ်သည်။ သူတို့သည် ၀င်ပေါက်ဆိုင်ရာ သုတေသနနှင့် မှော်ပညာသီအိုရီများတွင် အဆင့်မြင့်ဆုံး ဖြစ်သည်။ သူတို့၏ နိုးထသူမျိုးနွယ်ကြီးများသည် နိုင်ငံရေးနှင့် စီးပွားရေးတွင် ဩဇာညောင်းကြပြီး ခေတ်သစ်အုပ်ချုပ်ရေးယန္တရားအတွင်း၌ မြေရှင်ပဒေသရာဇ်ဆန်သော အာဏာတည်ဆောက်ပုံမျိုး ရှိကြသည်။

နောက်ဆုံး အင်အားကြီးနိုင်ငံမှာ 'ဆာဟာရာပိုင်နက်' (The Sahara Dominion) ဖြစ်သည်။ အီဂျစ်၊ တောင်အာဖရိက၊ မော်ရိုကိုနှင့် အခြားအာဖရိကနိုင်ငံများ ပါဝင်သည်။ မြို့တော်မှာ 'ဘုရင်ရပ်၀န်း' (Kingdoms’ Rest) ဖြစ်သည်။ ၎င်းမှာ အသက်ငယ်ဆုံး အင်အားကြီးနိုင်ငံဖြစ်သော်လည်း အသစ်အသစ် ထွက်ပေါ်လာသော အရင်းအမြစ်များကြောင့် အလျှင်အမြန် တိုးတက်လာခဲ့သည်။ သူတို့သည် အစပိုင်းတွင် အထင်သေးခံခဲ့ရသော်လည်း မဟာဗျူဟာမြောက် ၀င်ပေါက်များကို ထိန်းချုပ်နိုင်ခြင်းကြောင့် ယခုအခါ အင်အားကြီးနိုင်ငံဟောင်းများနှင့် ရင်ပေါင်တန်းနိုင်လာပြီ ဖြစ်သည်။

မွန်း သည် ကမ္ဘာမြေပူးပေါင်းမဟာမိတ်အဖွဲ့ ၏ နှလုံးသားဖြစ်သော နယူးအဗလွန်တွင် နေထိုင်သည်။ ဆိုလိုသည်မှာ သူသည် အကောင်းဆုံးသော သန့်စင်နယ်‌မြေအရင်းအမြစ်များနှင့် တက်ကြွဆုံးသော ကုန်သွယ်ရေးဈေးကွက်ကို လက်လှမ်းမီနိုင်ခြင်းဖြစ်သည်။ တစ်ဖက်တွင်လည်း အဆင့်မြင့်နိုးထသူများ များပြားလှသဖြင့် ပြိုင်ဆိုင်မှု၊ စောင့်ကြည့်မှုနှင့် အန္တရာယ်များလည်း ပိုမိုများပြားသည်။

သို့သော် ယခုအချိန်တွင်မူ ၎င်းက သူ၏အကျိုးအတွက် ဖြစ်နေသည်။ အထီးကျန်နေခြင်းထက် လူအုပ်ကြီးထဲတွင် ပျောက်ကွယ်သွားရန်က ပို၍လွယ်ကူသောကြောင့်ပင်။

သူ၏ဖုန်းသစ်မှ အကြောင်းကြားချက်တစ်ခု ဝင်လာသည်။ ကုန်သွယ်ရေးဗဟိုဌာန ၏ အဖွဲ့ဝင်အဖြစ် အပြည့်အဝ အတည်ပြုပြီးပြီဖြစ်သည်။ ယခုဆိုလျှင် သူသည် ဈေးကွက်ကို ဝင်ရောက်ကြည့်ရှုနိုင်ပြီဖြစ်သည်။

မွန်း ၏ နှုတ်ခမ်းထောင့်တွင် အပြုံးတစ်ခု ပေါ်လာသည်။ သူသည် ဒီနေ့အတွက် သတ်မှတ်ထားသော ရည်မှန်းချက်များစွာကို အောင်မြင်စွာ ဆောင်ရွက်နိုင်ခဲ့ပြီဖြစ်သည်။ မှတ်ပုံတင်ခြင်း၊ ဝင်ငွေလမ်းကြောင်းသစ် ရှာဖွေခြင်းနှင့် ကုန်သွယ်ရေးဌာနတွင် အဖွဲ့ဝင်ဝင်ခြင်းတို့ပင် ဖြစ်သည်။

***

ကုန်သွယ်ရေးဌာန အဆောက်အအုံ၏ ရှေ့သို့ ရောက်ရှိလာသောအခါ ၎င်း၏ ကြီးမားထည်ဝါမှုကို မြင်တွေ့လိုက်ရသည်။ ၎င်းမှာ ပစ္စည်းများ၊ သတင်းအချက်အလက်များနှင့် နိုးထသူများစွာဖြင့် ပြည့်နှက်နေသော မိုးမျှော်တိုက်ကြီးတစ်ခု ဖြစ်သည်။

အထက်ထပ်များသို့ အတော်ဆုံးသူများသာ တက်ရောက်နိုင်ပြီး ပထမသန့်စင်နယ်မြေ (First Sanctuary) အဆင့်ရှိ နိုးထသူများသည် ပထမထပ် ဆယ်ထပ်အထိသာ ကန့်သတ်ထားသည်။ သို့သော်လည်း ဤအထပ်များမှာပင် အံ့ဩဖွယ်ရာ ပစ္စည်းများဖြင့် ပြည့်နှက်နေသည်။

မွန်း သည် သူ၏ကတ်ကို စကန်ဖတ်ပြီး အပြင်ဘက်တွင် ရပ်နေသော အစောင့်များကို ခေါင်းညိတ်ပြကာ အထဲသို့ ဝင်ခဲ့သည်။ အစောင့်များမှာ ပထမသန့်စင်နယ်မြေဘုံအဆင့်သာ ရှိသော်လည်း ၎င်းတို့မှာ အဆောက်အအုံ၏ ကာကွယ်ရေး အစိတ်အပိုင်းလေးတစ်ခုသာ ဖြစ်ကြောင်း မွန်က နားလည်သည်။

ဤအဆောက်အအုံအတွင်း၌ တတိယသန့်စင်နယ်မြေဘုံမှ ရရှိသော ပစ္စည်းများပင် ရှိနေနိုင်ရာ ပိုမိုသန်မာသော နိုးထသူများသည် အတွင်းပိုင်းတွင် ရှိနေမည်မှာ သေချာသည်။

"မင်္ဂလာပါ ခင်ဗျာ။ ဘာများ ကူညီပေးရမလဲ။"

လူငယ်တစ်ဦး၏ အသံသည် မွန်း ၏ နားထဲသို့ တိုးဝင်လာခဲ့လေသည်။