အခန်း (၃၃) - ‌ဆောင်းရာသီ၏ သေဆုံးခြင်း

အေးစက်လှသော အခန်းအပြင် သူတို့ပတ်ပတ်လည်တွင် ကြောက်မက်ဖွယ်ရာများ ဝန်းရံနေသော်လည်း ဆယ်လင်းက နွေးထွေးမှုအပြည့်ရှိသော အပြုံးတစ်ခုဖြင့် သူ့ကို ကြည့်လိုက်သည်။

"ဘယ်တော့မှ မဖြစ်နိုင်ဘူး"

သူမသည် မွန်းကို ကျောပေးကာ ဒဲရက်နှင့် အခြားသူများကို ရင်ဆိုင်ရန် မွန်း၏ဘေးတွင် နေရာယူလိုက်သည်။ သူမ၏ လက်ကိုင်တုတ်ကို မြှောက်လိုက်ရာ ထိပ်ဖျား၌ မီးတောက်များ စတင်စုစည်းလာလေသည်။

"မင်း သူ့ကို တိုက်မယ်ဆိုရင် ငါ့ကိုပါ တိုက်ရမှာပဲ" ဟု ဆယ်လင်းက တည်ငြိမ်စွာ ပြောလိုက်သည်။ "အဲ့ဒီ့အစား ဟိုဘက်က သားရဲကြီးကိုပဲ တိုက်ကြရင် မကောင်းဘူးလား?"

အဆင့် ၁၅ ရှိသော ဝံပုလွေခြောက်ကောင် ဝန်းရံကာ ပလ္လင်ပေါ်မှ ကြည့်နေသည့် ပုံရိပ်ကို သူမ ညွှန်ပြလိုက်သည်။ "ဒါတွေအားလုံးရဲ့ နောက်ကွယ်က တရားခံက သူပဲ"

ဒဲရက်ခ်၏ မျက်နှာသည် ဒေါသကြောင့် ပုံပျက်ရှုံ့တွသွားသည်။ "အဲ့ဒီ့ကောင်မကိုပါ သူ့နဲ့အတူ သတ်ပစ်ကြ! သူလည်း အပြစ်မကင်းဘူး!"

အိုင်းရစ်ကတော့ သူမ၏ လေးကို တစ်ဝက်ခန့်သာ မြှောက်ထားရင်း တုံ့ဆိုင်းနေသည်။ သူမ၏ မျက်နှာတွင် မသေချာမရေရာမှုများ အထင်အသား ပေါ်လွင်နေသည်။ သူမ ဒဏ်ရာရထားပြီး သွေးများ ထွက်နေဆဲဖြစ်ရာ သူတို့အဖွဲ့ထဲတွင် အသန်မာဆုံး တိုက်ခိုက်ရေးသမားများကို ပြန်တိုက်မည်ဟူသော ဆုံးဖြတ်ချက်မှာ အကျိုးအကြောင်း ဆီလျော်မှု မရှိလှပေ။

သို့သော် အီလာရာမှာမူ အိုင်းရစ်ကဲ့သို့ တုံ့ဆိုင်းနေပုံမရပေ။

အီလာရာသည် မျက်ရည်များ စီးကျနေဆဲဖြစ်သော်လည်း ရှေ့သို့ တိုးထွက်လာကာ လေးကို အဆုံးထိ ဆွဲရင်း မွန်းကို တည့်တည့်ချိန်ထားသည်။ သူမ၏ လက်များ တုန်ရင်နေသော်လည်း ချိန်ချက်မှာ တိကျနေဆဲ ဖြစ်သည်။

"မင်း သူ့ကို ကယ်နိုင်ခဲ့တာပဲ" ဟု သူမက အက်ရှရှအသံဖြင့် တိုးတိုးလေး ပြောလိုက်သည်။ "ဂျွန်လေ... ဂါရက် သူ့ကို... သူ့ကို... မလုပ်ခင်ကတည်းက မင်း သတ်နိုင်ခဲ့တာပဲ" သူမ စကားကို အဆုံးမသတ်နိုင်တော့ဘဲ ဝမ်းနည်းပူဆွေးမှုကြောင့် စကားသံများ တစ်ဆို့သွားသည်။

"မင်းမှာ အစကတည်းက စွမ်းအားရှိနေတာပဲ။ မင်းက သူ့ကို အသေခံခိုင်းခဲ့တာ... မင်းပဲ သူ့ကို သတ်လိုက်တာ"

ထိုစွပ်စွဲချက်က လေထုထဲတွင် လေးလံစွာ ပျံ့လွင့်နေပြီး မွန်းလည်း ထိုလေးလံမှုကို ခံစားလိုက်ရသည်။ သူမပြောသည်မှာ လုံးဝကြီး မမှားပေ။ သူ အစွမ်းကို ထိန်းထားခဲ့သည်။ သူရော ဆယ်လင်းပါ ထိုစည်းကို မကျော်လိုခဲ့ကြဘဲ အသက်ရှင်ရန် လိုအပ်သည့်တိုင်အောင် လူသတ်သမားများ မဖြစ်လိုခဲ့ကြပေ။

[အသက်ရှင်ကျန်ရစ်သူ: ၅/၁] [အချိန်: ၄:၅၉]

အချိန်မှတ်နာရီက မညှာမတာ ဆုတ်ခွာနေသည်။

ဒဲရက်က သူ၏ဓားကို မြှောက်လိုက်သည်။ "နောက်ဆုံးအခွင့်အရေးပဲ။ အခုပဲ လက်နက်ချလိုက်၊ မင်းတို့ သက်သာအောင် ငါတို့ အမြန်ဆုံး ဇာတ်သိမ်းပေးမယ်"

မွန်း၏ လက်များ လှုပ်ရှားသွားပြီး ပိုမိုကောင်းမွန်လာသော ထိန်းချုပ်မှုဖြင့် မှော်စွမ်းအင် (Mana) များကို စုစည်းလိုက်သည်။ ဘေးရှိ ဆယ်လင်း၏ မီးတောက်များကလည်း သတိပေးသည့်အလား ပိုမိုတောက်ပလာသည်။

"မင်းက တကယ့်လူမိုက်ပဲ၊ မင်းကိုယ်မင်း သေတွင်းထဲ ပို့နေတာပဲ" မွန်းက တည်ငြိမ်စွာ ပြောလိုက်သည်။

"တိုက်ခိုက်ကြ!" ဟု ဒဲရက်ခ်က အော်ဟစ်ကာ သူ၏ဓားဖြင့် မွန်းကို ညွှန်ပြလိုက်သည်။

အိုင်းရစ်နှင့် အီလာရာတို့ နှစ်ယောက်စလုံး လေးကြိုးကို ဆွဲလိုက်ပြီး မြားများကို မွန်းထံသို့ ပစ်လွှတ်လိုက်ကြသည်။

မွန်း သက်ပြင်းချလိုက်သည်။ သူတို့ဘာသာ သူတို့ အဆုံးစီရင်လိုက်ကြပြီဖြစ်သည်။ သူနှင့် ဆယ်လင်းကို ယှဉ်လျှင် သူတို့က အလွန်အားနည်းလွန်းသည်။

လွန်ခဲ့သည့် ရက်များအတွင်း သူတို့နှစ်ယောက် အပြင်ထွက် အမဲလိုက်နေချိန်တွင် ဤအဖွဲ့သည် ခိုလှုံရာထဲမှ မထွက်ဘဲ ဂါရက်ရှာကျွေးသမျှကိုသာ မှီခိုနေခဲ့ကြသူများ ဖြစ်သည်။

မွန်းက လက်ကို ရိုးရိုးရှင်းရှင်း လှုပ်ရှားလိုက်ရုံဖြင့် ထိုတိုက်ခိုက်မှုများကို ကာကွယ်ရန် ကျောက်နံရံတစ်ခု ဖန်တီးလိုက်ပြီး ကြီးမားသော မီးလုံးကြီး တစ်လုံးဖြင့် သူတို့သုံးယောက်လုံးကို အဆုံးစီရင်လိုက်သည်။

ထိုတိုက်ခိုက်မှုသည် သူတို့ကို ချက်ချင်း သေဆုံးစေခဲ့ပြီး မသေခင် မနာကျင်စေရန် သူ ဖန်တီးပေးခဲ့ခြင်းဖြစ်သည်။ ဤသည်မှာ ခက်ခဲသော ဆုံးဖြတ်ချက်ဖြစ်သော်လည်း အသက်ရှင်သန်ရေးအတွက် စိတ်ခံစားချက်များကို အနှောင့်အယှက် အဖြစ်မခံနိုင်တော့ပေ။

ဆယ်လင်းက သူတို့၏ အလောင်းများ ရှိရာနေရာကို ရှုပ်ထွေးသော မျက်နှာပေးဖြင့် ကြည့်လိုက်ပြီးမှ ခေါင်းခါလိုက်သည်။ "မင်း မှန်တာလုပ်ခဲ့တာပါ" သူမက မွန်းကို နှစ်သိမ့်ခြင်းထက် မိမိကိုယ်ကိုယ် ပြန်လည်နှစ်သိမ့်နေခြင်း ဖြစ်သည်။

မွန်းက ဘာမှပြန်မပြောဘဲ သူ၏ မျက်စိရှေ့တွင် ဖျတ်ခနဲ ပေါ်လာသော အသိပေးချက်များကိုသာ စိုက်ကြည့်နေသည်။

[သင်သည် အဆင့် ၆ နိုးထသူ 'အိုင်းရစ်' ကို သတ်ဖြတ်ခဲ့သည်။] [သင်သည် အသက် ၆၀ ရရှိသည်။]

[သင်သည် အဆင့် ၆ နိုးထသူ 'ဒဲရက်' ကို သတ်ဖြတ်ခဲ့သည်။] [သင်သည် အသက် ၈၀ ရရှိသည်။]

[သင်သည် အဆင့် ၅ နိုးထသူ 'အီလာရာ' ကို သတ်ဖြတ်ခဲ့သည်။] [သင်သည် အသက် ၆၀ ရရှိသည်။]

အခြေအနေများက ဤသို့ဖြစ်မလာစေရန် သူ ဆုတောင်းခဲ့သော်လည်း၊ အချိန်ခဏတာမျှ အတူရှိခဲ့သူများကို သူ ကိုယ်တိုင် သတ်ဖြတ်ခဲ့ရပြီဖြစ်သည်။

ပထမဆုံး ဘုံနယ်မြေထဲသို့ စတင်ဝင်ရောက်ကတည်းက ဤကဲ့သို့သော အခြေအနေမျိုး ကြုံလာရနိုင်သည်ကို သူ သိထားပြီးဖြစ်သည်။

အီလာရာသည် ဦးနှောက်ထက် စိတ်ခံစားချက်ကို ရှေ့တန်းတင်ခဲ့ပြီး ဒဲရက်နှင့် အိုင်းရစ်တို့ကတော့ သူ့ကို သတ်နိုင်လျှင် ဤစမ်းသပ်ပွဲ၏ အစစ်အမှန် ချန်ပီယံများ ဖြစ်လာလိမ့်မည်ဟု ထင်မှတ်ခဲ့ကြခြင်း ဖြစ်သည်။

သူတို့နှစ်ယောက်တည်းသာ ကျန်တော့သည့်အခါ မွန်းနှင့် ဆယ်လင်းတို့သည် အနှောင့်အယှက်ကင်းကင်းဖြင့် ရှေ့ဆက်ရမည့် နည်းလမ်းများကို စဉ်းစားရန် အချိန်ရသွားသည်။

သူတို့သည် တစ်ဦးကိုတစ်ဦး သတိထားနေကြဆဲ ဖြစ်သော်လည်း သူတို့ကြားရှိ အကွာအဝေးနှင့် ဟန်ပန်များမှာ ယခင်ထက် ပိုမိုပြေလျော့သွားသည်။

[အသက်ရှင်ကျန်ရစ်သူ: ၂/၁] [အချိန်: ၄:၀၁]

"အခု ငါတို့ ဘာဆက်လုပ်ကြမလဲ?" ဆယ်လင်းက ပလ္လင်ပေါ်မှ ပုံရိပ်နှင့် ဘေးရှိ ကြီးမားသော ဝံပုလွေ ခြောက်ကောင်ကို ကြည့်ရင်း မေးလိုက်သည်။ "အဲ့ဒီ့ကောင်ပြောတာကို ငါတို့ ယုံလို့မရဘူး။ ဂါရက်လည်း ဒီလှည့်ကွက်ထဲမှာပဲ ကျရှုံးခဲ့တာ။ သူက မှတ်တမ်းစာအုပ်ထဲက လူနဲ့ အဖွဲ့တူ ဖြစ်ခဲ့ပုံရပြီး အဲ့ဒီ့တုန်းကလည်း ဂါရက် တစ်ယောက်ပဲ အသက်ရှင်ခဲ့တာ။ အခု ဒီအကောင်က ယဇ်ပူဇော်ဖို့ ထပ်တောင်းနေပြန်ပြီ"

သူမသည် မွန်းလည်း သူမကဲ့သို့ပင် စဉ်းစားနေမည်ဟု မျှော်လင့်ကာ သိသာထင်ရှားသောအချက်ကို ပြောနေခြင်းဖြစ်သည်။ မွန်း၏ စောစောက တိုက်ခိုက်မှုကို မြင်ပြီးနောက် သူမသာ မွန်းနှင့် တိုက်ခိုက်ရလျှင် အနိုင်ရရန် အခွင့်အရေး မရှိသလောက်ပင်ဟု သူမ သိလိုက်သည်။

အကယ်၍ မွန်းက သူမကို ဖယ်ထုတ်ရန် ဆုံးဖြတ်ခဲ့လျှင် သူမ ပြန်လည်ခုခံနိုင်မည် ဖြစ်သော်လည်း အသေအချာ သေဆုံးရပေလိမ့်မည်။

"ငါတို့ သူ့ကို တိုက်ကြမယ်" ဟု မွန်းက ပြတ်သားစွာ ပြောလိုက်ရာ သူမ စိတ်အေးသွားတော့သည်။

'အခြေအနေ (Status)'

[ အမည်: မွန်း ] [ မျိုးနွယ်: လူသား ] [ အတန်းအစား: အတန်းအစားမရှိ၊ ကုသရေးသမား (အချိန်အကန့်အသတ်ဖြင့်) ] [ အဆင့်: ၁၁ ] [ ၆၇% ] [ အသက်များ: ၂၆၈ ] [ ခွန်အား: ၂၀ ] [ လျင်မြန်မှု: ၂၂ ] [ ကြံ့ခိုင်မှု: ၂၅ ] [ ‌‌‌‌‌‌‌‌‌‌‌‌‌‌မှော်စွမ်းအင်: ၃၂ ] [ စွမ်းရည်အမှတ်: ၀ ] [ စွမ်းရည်များ: ဒြပ်စင်တိုက်ခိုက်မှု (အဆင့်-အဆန်း၊ အမြင့်ဆုံး)၊ ဒြပ်စင်လေးပါး ဆက်နွှယ်မှု (အဆင့်-ရှားပါး၊ အဆင့် ၆)၊ အခြေခံကုသခြင်း ] [ ပါရမီ: သေမင်း (Grim Reaper) ] [ အတန်းအစားစွမ်းရည်: အတန်းအစားနေရာ {၁/၁} ]

ရုန်းရင်းဆန်ခတ် ဖြစ်နေစဉ်အတွင်း မွန်းသည် ဒဲရက်အဖွဲ့ဝင်တစ်ဦးဖြစ်သော ကုသရေးသမား၏ မှော်စွမ်းအင်ကို ကူးယူနိုင်ခဲ့သည်။ သူ၏ ထံတွင် ဆယ်လင်း၏ တိုက်ခိုက်ရေး စွမ်းရည်များ ရှိပြီးသား ဖြစ်သောကြောင့် ဤဒုတိယအတန်းအစားမှာ အသုံးအဝင်ဆုံး ဖြစ်ပေသည်။ 'အခြေခံကုသခြင်း' သည် အားမကောင်းသော်လည်း ကြာရှည်တိုက်ရမည့် တိုက်ပွဲမျိုးတွင် သူတို့ကို အသက်ဆက်ပေးနိုင်မည်ဖြစ်သည်။

သူတို့အတွက် အခွင့်အရေးက သိပ်မရှိသော်လည်း၊ အကယ်၍ သူသာ ဝံပုလွေ ခြောက်ကောင်ကို သတ်နိုင်ပြီး 'သေမင်း' ပါရမီဖြင့် သူတို့၏ အသက်များကို စုပ်ယူနိုင်လျှင် 'ဒြပ်စင်လေးပါး ဆက်နွှယ်မှု' ကို နောက်တစ်ဆင့် မြှင့်တင်နိုင်ပေလိမ့်မည်။ ထိုစွမ်းအားနှင့်ဆိုလျှင် သူတို့အနေဖြင့် 'ဆောင်းရာသီ၏ နှလုံးသား' ကို အမှန်တကယ် ယှဉ်ပြိုင်နိုင်စွမ်း ရှိလာပေလိမ့်မည်။

ထို့ကြောင့် သူသည် မည်သူ့ကိုမျှ သတ်မှတ်ချက်များ ခွဲဝေမပေးလိုပေ။ အသက်တစ်ချောင်းချင်းစီတိုင်းက သူ့အတွက် အရေးကြီးသည်။

သူ ဆယ်လင်းဘက်သို့ လှည့်လိုက်သည်။ "မင်း ငါ့ကို ယုံလား?"

ဆယ်လင်းက သူ့ကို ကြည့်ပြီး ချက်ချင်းပင် ခေါင်းငြိမ့်ပြလိုက်သည်။ "ဒါပေါ့၊ ဒါ မေးနေစရာ လိုလို့လား"

မွန်းသည် ပလ္လင်ခြေရင်း၌ သူတို့ကို အစာကဲ့သို့ စိုက်ကြည့်နေသည့် ရေခဲပြာရောင် မျက်လုံးများရှိသော ဝံပုလွေခြောက်ကောင်ထံသို့ အကြည့်ကို ရွှေ့လိုက်သည်။

"အဲ့ဒီ့ကောင်တွေကို ငါတစ်ယောက်တည်း တိုက်ပြီး သတ်ချင်တယ်" ဟု မွန်းက ပြောလိုက်သည်။ "ငါ မခေါ်မချင်း မင်း ဝင်မပါနဲ့ဦး"

ဆယ်လင်း၏ မျက်နှာတွင် ဇဝေဇဝါ ဖြစ်သွားသည်။ ဤအကောင်များသည် အဆင့် ၁၅ ရှိသော သားရဲများဖြစ်ပြီး မွန်းကတော့ သူမကဲ့သို့ပင် အဆင့် ၁၁ သာ ရှိသေးသည်။ အဆင့်ကွာခြားမှုမှာ ကြီးမားလှပြီး ဤတိုက်ပွဲမှာ ကိုယ့်ကိုယ်ကိုယ် သတ်သေခြင်းနှင့်ပင် တူနေသည်။

သို့သော် သူမ ဘာမှမမေးခဲ့ပေ။ မွန်း၏ မျက်လုံးများထဲရှိ ပြတ်သားမှုနှင့် ယုံကြည်မှုကို သူမ မြင်တွေ့လိုက်ရသောကြောင့် ဖြစ်သည်။

"ကောင်းပါပြီ" ဟု သူမက ရိုးရှင်းစွာ ပြောလိုက်သည်။

သူမက သူ့ကို ငြင်းခုံခြင်းမရှိဘဲ ယုံကြည်ပေးသည့်အတွက် မွန်း ကျေးဇူးတင်မိသည်။ သူသည် ဝံပုလွေများနှင့် အထက်မှ ကြည့်နေသော သတ္တဝါကြီးထံသို့ အာရုံအပြည့်အဝ စုစည်းလိုက်သည်။

'ဆောင်းရာသီ၏ နှလုံးသား' သည် ဤအခြေအနေကို သဘောကျသည့်အလား ပို၍ ပြုံးလိုက်သည်။

"တကယ့်ကို ဖျော်ဖြေမှု ကောင်းတာပဲ" ဟု ၎င်းက ရေခဲကြိတ်သံကဲ့သို့ အက်ကွဲသောအသံဖြင့် ပြောလိုက်သည်။ "သားကောင်က ငါ့အဖော်တွေကို တစ်ယောက်တည်း ကပြချင်တယ်ပေါ့။ ကောင်းပြီလေ။ မင်းရဲ့ မာန်မာနက မှန်ကန်မှု ရှိ၊ မရှိ ကြည့်ကြတာပေါ့"

[ဆောင်းရာသီ၏ နှလုံးသား စမ်းသပ်ပွဲသည် 'ဆောင်းရာသီ၏ သေဆုံးခြင်း စမ်းသပ်ပွဲ' အဖြစ် ပြောင်းလဲသွားပြီဖြစ်သည်။]

[ဆောင်းရာသီ၏ သေဆုံးခြင်း စမ်းသပ်ပွဲ] ▹ အသက်ရှင်နိုင်ခြေ: < ၅% စနစ်သည် ဤစမ်းသပ်ပွဲ၏ အလွန်အမင်း ခက်ခဲမှုကို အသိအမှတ်ပြုလိုက်သည်။

အပိုဆုလာဘ်များ သတ်မှတ်ချက်- ▹ ရရှိမည့် အတွေ့အကြုံ (Exp) ၂ ဆ တိုးမြှင့်မည်။ ▹ ရရှိမည့် အသက် (Lives) ၂ ဆ တိုးမြှင့်မည်။

အဆင့် ၁၅ ရှိသော အာတိတ်ဝံပုလွေ ခြောက်ကောင်သည် ပလ္လင်ပေါ်မှ တစ်ပြိုင်နက်တည်း ဆင်းလာကြသည်။ သူတို့၏ လှူပ်ရှားမှုတိုင်းက အသားစားသတ္တဝါများပီပီ စနစ်တကျ ရှိလှသည်။ သူတို့ အသက်ရှူလိုက်တိုင်း လေထဲတွင် ရေခဲပွင့်များ ဖြစ်ပေါ်လာပြီး အဆင့် ၁၅ ၏ စွမ်းအားများသည် ဖိအားတစ်ခုကဲ့သို့ ပျံ့လွင့်လာသည်။

မွန်းသည် ဆယ်လင်းနှင့် ဝေးရာသို့ ရှေ့တိုးထွက်လိုက်သည်။ သူရင်ဆိုင်ရမည့် အခက်ခဲဆုံး တိုက်ပွဲအတွက် သူ၏လက်ထဲတွင် မှော်စွမ်းအင်များကို စတင်စုစည်းလိုက်ပြီ ဖြစ်သည်။