အပိုင်း (၂၁) ထန်ရှောင် ဟောက်ထျန်းတုန့်လော့ ဖြစ်လာခြင်း

နောက်တစ်နေ့ နံနက်စောစောတွင် တစ်ညတာ ‘ကျင့်ကြံ’ ပြီးနောက် အားရင်သည် အနားယူနေဆဲ ဖြစ်သည်။ သူသည် မိမိ၏ နတ်ဘုရားစွမ်းအားကို အသုံးပြု၍ အားရင်၏ ခန္ဓာကိုယ်ကို စစ်ဆေးကြည့်လိုက်သည်။

ချန်ရွှင်ဖုန်းမှာ ချက်ချင်းပင် ဆွံ့အမှင်တက်သွားခဲ့ရသည်; သူမတွင် ကိုယ်ဝန်ရှိနေပြီ ဖြစ်သည်။

ထို့နောက်တွင်မူ သူ၏ နှလုံးသားထဲ၌ ဝမ်းသာပီတိဖြစ်မှုများ လှိုင်းလုံးတမျှ တိုးဝှေ့လာခဲ့တော့သည်; နှစ်ပေါင်းများစွာ ‘ကျင့်ကြံ’ ခဲ့မှုများက နောက်ဆုံးတော့ အသီးအပွင့် ဝေဆာခဲ့ပြီ ဖြစ်သည်။

ပိတ်ထားသော ပြတင်းပေါက်ဆီသို့ ခေါင်းလှည့်ကြည့်လိုက်ရာ ချန်ရွှင်ဖုန်း၏ နှုတ်ခမ်းထောင့်တွင် အပြုံးတစ်ခု ထွက်ပေါ်လာခဲ့သည်။

သူသည် ပြတင်းပေါက်ထံသို့ ဖြည်းဖြည်းချင်း လှမ်းသွားကာ ဖွင့်လှစ်လိုက်ပြီး ကြမ်းပြင်ပေါ်သို့ အမှတ်မထင် လှမ်းကြည့်ကာ သဘောကျစွာ ပြုံးလိုက်မိသည်။

“ငါ တုန်အာကို သတ်ဖြတ်ခြင်းမြို့တော်ဆီ စေလွှတ်ဖို့ အခွင့်အရေးတစ်ခု ရှာရမယ်။”

သူ့ကြောင့်ပင် တုန်အာသည် ကျင့်ကြံခြင်းမပြုဘဲ ရှစ်နှစ်တိုင်တိုင် အချိန်ဖြုန်းခဲ့ရသည်။ မူရင်းဇာတ်လမ်းထဲမှာတော့ သူမသည် အဆင့် ၇၀ ဝန်းကျင်လောက်မှာ သတ်ဖြတ်ခြင်းမြို့တော်သို့ ဝင်ရောက်ခဲ့တာ ဖြစ်သည်။ ယခုအခါ တုန်အာသည် သူမ၏ ကျင့်ကြံခြင်းစွမ်းအားများ ပြန်လည်ရရှိလာလျှင်ပင် ဝိညာဉ်ဧကရာဇ် အဆင့်လောက်သာ ရှိပေလိမ့်မည်။

“ငါ စတုတ္ထမြောက် စမ်းသပ်ချက်ကို အောင်မြင်ပြီး နောက်ထပ် ၁၀ ရာခိုင်နှုန်းသော စည်းစနစ်နတ်ဘုရားစွမ်းအား ကို ရရှိတာနဲ့ တုန်အာကို သတ်ဖြတ်ခြင်းမြို့တော်ထဲ ဝင်ခွင့်ပြုလိုက်မယ်။”

စည်းစနစ်နတ်ဘုရားစွမ်းအားကို ၃၀ ရာခိုင်နှုန်းအထိ ထိန်းချုပ်နိုင်ပြီဖြစ်ရာ သူသည် တုန်အာ၏ စိတ်ခံစားချက်များနှင့် နတ်ဘုရားစမ်းသပ်ချက်များကို အလွယ်တကူ လွှမ်းမိုးနိုင်မည် ဖြစ်သည်။

နတ်ဘုရားစမ်းသပ်ချက်များကို အသုံးပြုပြီး တုန်အာကို စိတ်ပိုင်းဆိုင်ရာ စွမ်းအားများဖြင့် အဆက်မပြတ် လှုံ့ဆော်ပေးခြင်းက တကယ့်ကို ပိုမိုကောင်းမွန်သော ရလဒ်ကို ရရှိစေမည် ဖြစ်သည်။

အဝတ်အစားများ လဲလှယ်ဝတ်ဆင်ပြီးနောက် ချန်ရွှင်ဖုန်းသည် မည်သည့်အတားအဆီးမျှမရှိဘဲ ဘဏ္ဍာတိုက်အတွင်းသို့ ဝင်ရောက်ခဲ့သည်။

“အခု ငါ့မှာ ကိုယ်ထည်ဝိညာဉ်အရိုး နဲ့ ညာဘက်ခြေထောက်ဝိညာဉ်အရိုး ရှိနေပြီ။ နတ်ဘုရားဝတ်စုံတစ်ခု ဖြစ်လာဖို့အတွက် နောက်ထပ် ဝိညာဉ်အရိုး လေးခုပဲ လိုတော့တယ်။”

ဘဏ္ဍာတိုက်၏ နောက်ဆုံးစင်ပေါ်တွင် အရောင်အသွေးစုံလင်လှသော ဝိညာဉ်အရိုးများ ရှိနေသော်လည်း ၎င်းတို့မှာ နှစ်ထောင်ချီနှင့် နှစ်သောင်းချီသက်တမ်းရှိ ဝိညာဉ်အရိုးများသာ ဖြစ်ကြသည်။

နောက်ဆုံးစင်၏ အဆုံးသတ်သို့ ရောက်ရှိသွားသည့်အခါတွင်မူ ဆွဲဆောင်မှုရှိသော စွမ်းအားများ ထွက်ပေါ်နေသည့် သေတ္တာများထဲတွင် ဝိညာဉ်အရိုး အခု ၂၀ သာ ကျန်ရှိတော့သည်။

ဤဝိညာဉ်အရိုးများသည် သက်တမ်း နှစ်ငါးသောင်းကျော်ရှိသော အရိုးများဖြစ်ကြပြီး ထိပ်ဆုံးက သုံးခုမှာမူ ဝိညာဉ်နန်းတော်၏ မျိုးဆက်အလိုက် လက်ဆင့်ကမ်းလာခဲ့ကြသော အမြင့်မားဆုံးအဆင့်ရှိသည့် ရတနာဝိညာဉ်အရိုးများ ဖြစ်ကြသည်။

“နှစ်ငါးသောင်းသက်တမ်းရှိ အလင်းယူနီကွန်း ဘယ်ဘက်လက်ဝိညာဉ်အရိုး၊ နှစ်ခြောက်သောင်းသက်တမ်းရှိ တောက်ပသောလိပ်ပြာ ဦးခေါင်းခွံဝိညာဉ်အရိုး၊ နှစ်ခုနစ်သောင်းငါးထောင်သက်တမ်းရှိ တောက်လောင်နေသောချိုးငှက် ညာဘက်လက်ဝိညာဉ်အရိုး၊ နှစ်ခုနစ်သောင်းသက်တမ်းရှိ အလင်းအရှင်သခင် ဘယ်ဘက်ခြေထောက်ဝိညာဉ်အရိုး။”

ချန်ရွှင်ဖုန်း ရွေးချယ်လိုက်သော ဝိညာဉ်အရိုးများအားလုံးနီးပါးသည် အမြင့်မားဆုံးအဆင့်ရှိသော စွမ်းရည်များနှင့်အတူ ပါရှိလာကြပြီး သူ၏ ဝိညာဉ်နှင့်လည်း အလွန်အမင်း လိုက်ဖက်ညီလှပေသည်။

သူ့တွင် နတ်ဘုရားစွမ်းအား ရှိနေခြင်းကြောင့် ချန်ရွှင်ဖုန်းအနေနှင့် ၎င်းတို့ကို တစ်ခုချင်းစီ သီးသန့်သွေးသောက်နေရန် မလိုအပ်ချေ။

သူသည် လျှို့ဝှက်အခန်းသို့ တိုက်ရိုက်ပြန်လာခဲ့ပြီး ဝိညာဉ်အရိုးများကို ဖြည်းဖြည်းချင်း လမ်းညွှန်ကာ စုပ်ယူရန် မိမိ၏ နတ်ဘုရားစွမ်းအားကို အသုံးပြုလိုက်သည်။

နှစ်နာရီခွဲမျှသော အချိန်အတောအတွင်းမှာပဲ။

ချန်ရွှင်ဖုန်းသည် သူ၏ မျက်ဝန်းများကို ဖြည်းဖြည်းချင်း ဖွင့်လှစ်လိုက်ရာ မည်သည့်စိတ်ခံစားချက်မျှမပါသော အသံတစ်ခုက သူ၏ နားထဲတွင် ဟိန်းထွက်လာခဲ့သည် -

“စည်းစနစ်နတ်ဘုရားစမ်းသပ်ချက် စတုတ္ထမြောက်စမ်းသပ်ချက် အောင်မြင်သည် - ဝိညာဉ်အရိုးအားလုံး၏ သက်တမ်းကို နှစ်တစ်သန်းအထိ တိုးမြှင့်ပေးပြီး၊ စည်းစနစ်နတ်ဘုရားစွမ်းအား ၁၀ ရာခိုင်နှုန်း ပေးအပ်ကာ၊ ဝိညာဉ်ကွင်းအားလုံး၏ သက်တမ်းကို နှစ်ငါးသောင်း တိုးမြှင့်ပေးသည်။”

ထိုအသံ ပျောက်ကွယ်သွားသည်နှင့်အမျှ ချန်ရွှင်ဖုန်းသည် သူ၏ ခန္ဓာကိုယ်တစ်ခုလုံး စုတ်ပြဲသွားသကဲ့သို့ ခံစားလိုက်ရပြီး သူ၏ ခန္ဓာကိုယ်ပေါ်ကနေ အရောင်အသွေးစုံလင်လှသော အလင်းတန်းများ ထွက်ပေါ်လာခဲ့သည်။

သူ၏ ဝိညာဉ်အရိုးသက်တမ်းများကို စည်းစနစ်နတ်ဘုရားစွမ်းအားဖြင့် တိုးမြှင့်လိုက်ခြင်းက ခန္ဓာကိုယ်တစ်ခုလုံးရှိ အရိုးများကို လုံးဝအသစ်လဲလှယ်လိုက်ရသလို ဖြစ်စေခဲ့ရာ ချန်ရွှင်ဖုန်းအား တစ်ခါမျှမကြုံဖူးသော ခံစားချက်မျိုးကို ပေးစွမ်းခဲ့သည်။

သူ၏ ခန္ဓာကိုယ်ပေါ်က အလင်းတန်းများ ပျောက်ကွယ်သွားပြီးနောက်၊ ချန်ရွှင်ဖုန်းသည် မောပန်းနွမ်းနယ်စွာဖြင့် ထရပ်လိုက်ပြီး သူ၏ နဖူးပေါ်က ချွေးစေးများကို သုတ်လိုက်မိသည်။

မကြုံစဖူး ထူးကဲလှသော နတ်ဘုရားအရှိန်အဝါ များသည် သူ၏ ခန္ဓာကိုယ်ပေါ်ကနေ ထွက်ပေါ်နေခဲ့ပြီ ဖြစ်သည်။

ဤအခိုက်အတန့်တွင် သူ၏ နတ်ဘုရားစွမ်းအားကို အသုံးမပြုဘဲနေလျှင်ပင် ချန်ရွှင်ဖုန်းသည် အဆင့် ၁၀၀ ရှိသော နတ်ဘုရားအရာရှိ တစ်ဦးကို အလွယ်တကူ သတ်ဖြတ်နိုင်ပြီး၊ အဆင့် ၃ နတ်ဘုရားတစ်ပါးနှင့် သရေကျအောင် တိုက်ခိုက်နိုင်ပေသည်။ နတ်ဘုရားစွမ်းအားကိုသာ အသုံးပြုမည်ဆိုပါက အဆင့် ၂ နတ်ဘုရားတစ်ပါးနှင့် တိုက်ခိုက်ရန်လည်း မဖြစ်နိုင်စရာ မရှိချေ။

“စည်းစနစ် ပဉ္စမမြောက်စမ်းသပ်ချက် - နတ်ဘုရားအဆင့်ခွဲ လက်နက် တစ်ခုကို သွန်းလုပ်ပါ။ ဆုလာဘ် - စည်းစနစ်နတ်ဘုရားစွမ်းအား ၁၀ ရာခိုင်နှုန်း၊ ဝိညာဉ်ကွင်းအားလုံး၏ သက်တမ်းကို နှစ်တစ်သိန်း တိုးမြှင့်ပေးမည်ဖြစ်ပြီး၊ နတ်ဘုရားအဆင့်ခွဲ လက်နက်သည် ဆင့်ကဲကြီးထွားနိုင်သော နတ်ဘုရားလက်နက် ဖြစ်လာမည်။”

“နတ်ဘုရားစမ်းသပ်ချက်သည် ကုန်းမြေကြီးပေါ်ရှိ အသိပညာကဏ္ဍတွင် ကွက်လပ်တစ်ခု ရှိနေကြောင်း သိရှိသွားသည်။ ထို့ကြောင့် နတ်ဘုရားလက်နက် သွန်းလုပ်ရန် နည်းလမ်း ၁၀ ခုကို ရှာဖွေတွေ့ရှိထားသည် - ရေခဲနှင့် မီးတောက် ယင်ယန်ရေတွင်းအောက်ရှိ ရေခဲနှင့် မီးတောက်နဂါးဘုရင် ၏ ဝိညာဉ်အရိုးကို အသုံးပြု၍ နတ်ဘုရားလက်နက်တစ်ခု သွန်းလုပ်နိုင်သည်။”

“ကြယ်တာရာတောအုပ်ကြီး အတွင်းရှိ သက်စောင့်ရေကန်၏ နက်ရှိုင်းရာသို့ သွားရောက်ကာ သက်စောင့်ရွှေ ကို ယုံကြည်ခြင်းစွမ်းအားများနှင့် ပေါင်းစပ်ပြီး သွန်းလုပ်ပါ။”

“ပင်လယ်ရေအောက်ခြေသို့ သွားရောက်ကာ ပင်လယ်နက်ဝေလငါးဆိုးဘုရင်ကို သတ်ဖြတ်ပြီး၊ ၎င်း၏ ဝိညာဉ်အရိုးကို အသုံးပြု၍ နတ်ဘုရားလက်နက်အတုတစ်ခု ဖန်တီးကာ၊ ပင်လယ်ဝိညာဉ်သားရဲများ၏ ယုံကြည်ခြင်းစွမ်းအားများကို စုဆောင်းလျက် ယင်းကို နတ်ဘုရားအဆင့်ခွဲ လက်နက်တစ်ခုအဖြစ် ပြောင်းလဲပါ။”

“ပင်လယ်နတ်ဘုရားကျွန်းသို့ သွားရောက်ကာ ပင်လယ်နတ်ဘုရား သုံးခွလှံ ကို ခိုးယူပြီး ပြန်လည်သွန်းလုပ်ပါ။”

...

အခြားသော နတ်ဘုရားလက်နက် သွန်းလုပ်နည်းလမ်းများစွာလည်း အစီအရီ ရှိနေသေးသည်။

“သူက တကယ်ပဲ ငါ့ကို ဒုက္ခမရောက်စေချင်ဘူးပဲ။”

နတ်ဘုရားစမ်းသပ်ချက်က ပေးထားသော အရိပ်အမြွက်များကို ကြည့်ရသည်မှာ သူ ပဉ္စမမြောက်စမ်းသပ်ချက်တွင် ပိတ်မိနေမည်ကို စိုးရိမ်နေသည့်အလား ဖြစ်သည်။ ချန်ရွှင်ဖုန်း ခံစားခဲ့ရဖူးသမျှ တစ်ခုတည်းသော ဒုက္ခမှာ သူ၏ ဝိညာဉ်အရိုးသက်တမ်းများ တိုးမြှင့်စဉ်က ခံစားခဲ့ရသော နာကျင်မှုသာ ရှိသည်။

“ပထမဆုံးအနေနဲ့ အသစ်ရရှိထားတဲ့ စည်းစနစ်နတ်ဘုရားစွမ်းအား ၁၀ ရာခိုင်နှုန်းသောကို အချောသတ် ကျင့်ကြံရမယ်။”

အတွေးများစွာ မတွေးတော့ဘဲ ချန်ရွှင်ဖုန်းသည် ယခုအခါ ကုန်းမြေပေါ်တွင် အင်အားအကြီးဆုံးပုဂ္ဂိုလ် ဖြစ်နေပြီ ဖြစ်သည်။ သူ၏ ဖခင်ကြီးအပြင် ထန်ချန် နှင့် ပိုဆိုက်ရှီ တို့ အတူတူလာလျှင်ပင် ပါးသုံးချက်ရိုက်ရုံဖြင့် ပြီးသွားပေလိမ့်မည်။

တစ်လတာ အချောသတ်ကျင့်ကြံပြီးနောက် ချန်ရွှင်ဖုန်းသည် နောက်ဆုံး၌ လျှို့ဝှက်အခန်းထဲကနေ ထွက်လာခဲ့သည်။

စာရွက်စာတမ်းများကို ကိုင်တွယ်ဖြေရှင်းသည့် စာရေးခုံတွင် ထိုင်ရင်း ချန်ရွှင်ဖုန်းသည် ကုလားထိုင်နောက်မှီကို မှီချလိုက်သည်။

ယင်းအပေါ်တွင် သူ အိတ်သွန်ဖန်မှောက် မကျင့်ကြံမီက ဝိညာဉ်နန်းတော်ကို စုဆောင်းခိုင်းထားခဲ့သည့် ကုန်းမြေပေါ်က နောက်ဆုံးရ အဖြစ်အပျက်ကြီးများ ရှိနေသည်။

ချန်ရွှင်ဖုန်းသည် သတင်းစာဖတ်နေသူတစ်ဦးကဲ့သို့ မိမိကိုယ်မိမိ လက်ဖက်ရည်တစ်အိုး ငှဲ့လိုက်သည်။

လွန်ခဲ့သည့် ခြောက်လအတွင်းမှာပဲ ဖြစ်ရပ်များစွာ ဖြစ်ပျက်ခဲ့သည်၊ ဥပမာအားဖြင့် ဟောက်ထျန်းဂိုဏ်းက ထန်ကျန့် သည် တံခါးပိတ်ကျင့်ကြံရင်း အဆင့်တက်ရန် ကြိုးစားမှု ကျရှုံးခဲ့သဖြင့် ကွယ်လွန်သွားခဲ့ကြောင်း ရုတ်တရက် ကြေညာခဲ့သည်။

ထန်ရှောင်သည် ဘွဲ့အမည်ရတုန့်လော့ အဆင့်သို့ အောင်မြင်စွာ တက်လှမ်းနိုင်ခဲ့ပြီး ဟောက်ထျန်းဂိုဏ်း၏ ဂိုဏ်းချုပ်ရာထူးကို ဆက်ခံကာ ဟောက်ထျန်းတုန့်လော့အသစ် ဖြစ်လာခဲ့သည်။

ထန်ဟောင်သည်လည်း ချန်ရွှင်ဖုန်းထံမှ ရရှိထားသော ဖိအားများကြောင့် ယခုအခါ အဆင့် ၈၉ ရှိသော ဝိညာဉ်တုန့်လော့ တစ်ဦး ဖြစ်နေပြီ ဖြစ်သည်။ နောက်ထပ် တစ်လှမ်းတင်လှမ်းလိုက်ရုံဖြင့် သူသည်လည်း ဘွဲ့အမည်ရတုန့်လော့တစ်ဦး ဖြစ်လာပေလိမ့်မည်။

ရတနာခုနှစ်ပါဖန်စီဂိုဏ်ကမူ ဟောက်ထျန်းဂိုဏ်း တိုးတက်ပြောင်းလဲလာစေရန် ကူညီသည့်အနေဖြင့် ဝိညာဉ်ရွှေ ဒင်္ဂါး သန်းတစ်ရာကို လက်ဆောင်အဖြစ် ပေးပို့ခဲ့သည်။

“ဒီနင်ဖုန်းကျစ်က ငါမင်္ဂလာဆောင်တုန်းကတော့ ဆေးဝါးအချို့နဲ့ ဝိညာဉ်ရွှေ ဒင်္ဂါး သန်းငါးဆယ်ပဲ ပို့ခဲ့တာ။”

မူရင်းဇာတ်လမ်းထဲမှာ လူပြက်တစ်ယောက်လို လှုပ်ရှားခဲ့သော နင်ဖုန်းကျစ်ကို ချန်ရွှင်ဖုန်းအနေနှင့် တော်တော်လေး အမြင်ကတ်မိသည်။ သူက စီးပွါးရေးသမားတစ်ယောက်နှင့်တူ လွန်းလှသည်။

ဒါတွေအားလုံးက အကွက်သေးလေးတွေပဲ ဖြစ်သည်။ ပံ့ပိုးကူညီရေးဂိုဏ်းတစ်ခုက ဘာလို့ ဒီလောက်တောင် လူသိရှင်ကြား ဖြစ်အောင် လုပ်နေရတာလဲ။ တကယ့်ကို အသေစောချင်နေတဲ့အတိုင်းပဲ။

သူ တွေးတောနေစဉ်မှာပဲ ကာဒီနယ် တစ်ဦးက တံခါးအပြင်ဘက်တွင် ရပ်ကာ သတင်းပို့လိုက်သည် - “ပုပ်ရဟန်းမင်းကြီး... ဟောက်ထျန်းဂိုဏ်းချုပ် ထန်ရှောင်က အရှင်မင်းကြီးကို တွေ့ဆုံခွင့်တောင်းခံနေပါတယ်ဘုရား။”

“ဝင်ခွင့်ပြုလိုက်ပါ။”

သတင်းအချက်အလက်များကို ဖတ်ရှုပြီးဖြစ်ရာ ချန်ရွှင်ဖုန်းအနေနှင့် ထန်ရှောင် မည်သည့်အတွက်ကြောင့် လာရောက်ရသည်ကို အကြမ်းဖျင်း သိရှိပြီးသား ဖြစ်သည်၊ ထို ဝိညာဉ်ဆိုးကျင့်ကြံသူ အမျိုးသမီးအတွက် ဖြစ်ပေလိမ့်မည်။

မကြာမီမှာပဲ ထွားကျိုင်းလှသော ထန်ရှောင်သည် လှမ်းဝင်လာခဲ့သည်။ ဂိုဏ်းချုပ်အဖြစ် နှစ်အနည်းငယ်ကြာ တာဝန်ယူခဲ့ပြီးနောက် သူသည် တည်ငြိမ်မှု ပိုရှိလာခဲ့ပြီး သူ၏ မာန်မာနများလည်း အနည်းငယ် လျော့ပါးသွားခဲ့ပြီ ဖြစ်သည်။

ရာထူးပိုမိုမြင့်မားလေလေ ဝိညာဉ်နန်းတော်ထံမှ ရရှိသော ဖိအားများကို ပိုမိုခံစားရလေလေဖြစ်ရာ၊ သူ၏ နှလုံးသားထဲတွင် ဝိညာဉ်နန်းတော်အပေါ် ထားရှိသည့် ကြောက်ရွံ့မှုအချို့ ကိန်းအောင်းလာခဲ့ရသည်။

သို့သော်လည်း အဆင့် ၉၉ ရှိသော ပြိုင်ဘက်ကင်းတုန့်လော့ ဖြစ်သည့် သူ၏ အဖိုးကို တွေးမိလိုက်သည့်အခါတွင်မူ သူသည် သူ၏ ကျောပြင်ကို ပြန်လည်မတ်လိုက်မိသည်။

“ဂိုဏ်းချုပ်ထန်အနေနဲ့ ဝိညာဉ်နန်းတော်ကိုလာပြီး ငါ့ကို တွေ့ဆုံချင်ရတဲ့ အကြောင်းရင်းက ဘာများလဲ သိပါရစေ။”

ထုံးတမ်းစဉ်လာအရတော့ မေးမြန်းရပေမည်။ ချန်ရွှင်ဖုန်းသည် ကုလားထိုင်ပေါ်တွင် ထိုင်ကာ လက်ဖက်ရည်တစ်ငုံ သောက်ရင်း ထန်ရှောင်ကို လှမ်းကြည့်လိုက်သည်။

“နှုတ်ခွန်ဆက်သပါတယ် ပုပ်ရဟန်းမင်းကြီးအရှင်မင်းကြီး။ ကျွန်တော် ဒီတစ်ခါ လာရတာက လူတစ်ယောက်ကို တောင်းဆိုချင်လို့ပါဘုရား။”

ထန်ရှောင်၏ မျက်နှာအမူအရာက တည်ကြည်နေသည်။ လွန်ခဲ့သည့် နှစ်အနည်းငယ်က ယုအာ နှင့် ပထမဆုံး စတင်တွေ့ဆုံခဲ့စဉ်ကတည်းက သူသည် သူမနှင့်အတူ လွတ်ရာသို့ ထွက်ပြေးရန် ဆုံးဖြတ်ခဲ့တာဖြစ်ပြီး၊ ယခုအခါ ဂိုဏ်းချုပ်ဖြစ်လာချိန်တွင်လည်း ထိုနည်းအတိုင်းပင် ဖြစ်သည်။

“အို... ဂိုဏ်းချုပ်ထန်ရဲ့ မျက်စိကျခြင်းကို ခံရတဲ့သူက ဘယ်သူများလဲ စိတ်ဝင်စားစရာပဲ။”

ချန်ရွှင်ဖုန်းက သဘောကျစွာ ရယ်မောလိုက်ပြီး သူ ဘာကို တောင်းဆိုရမလဲဟု တွေးတောနေမိသည် - ဝိညာဉ်အရိုးလား၊ ရှားပါးဆေးဝါးတွေလား သို့မဟုတ် ရွှေဝိညာဉ်ဒင်္ဂါးတွေလား။

“အရှင်မင်းကြီးက အလုပ်များတဲ့သူဆိုတော့ မေ့နေလောက်ပါပြီ။ အဲ့ဒီလူက လွန်ခဲ့တဲ့ နှစ်အနည်းငယ်က အရှင်မင်းကြီး ဖမ်းဆီးခေါ်ဆောင်သွားခဲ့တဲ့ ယုအာ ပါပဲ။ ကျွန်တော် ဒီနေ့ လာရတာက အရှင်မင်းကြီးအနေနဲ့ သူမကို ပြန်လွှတ်ပေးဖို့ တောင်းဆိုချင်လို့ပါဘုရား။”

ထန်ရှောင်၏ လေသံမှာ အနည်းငယ် တိုးလျှိုးတောင်းပန်နေပုံရသည်။ သူ့ရှေ့က ပုဂ္ဂိုလ်သည် ၎င်းတို့၏ ဟောက်ထျန်းဂိုဏ်းကို အလွယ်တကူ ဖျက်ဆီးပစ်နိုင်ကြောင်း သူ သိရှိသည်။ သူ ဂိုဏ်းချုပ်ဖြစ်လာကတည်းက ဝိညာဉ်နန်းတော်နှင့် မဆန့်ကျင်ရန် ဆုံးဖြတ်ခဲ့ပြီး၊ ဘေးကင်းစေရန်အတွက် ရတာနာခုနှစ်ပါးဖန်စီဂိုဏ်းနှင့်သာ ရံဖန်ရံခါ အဆက်အသွယ် ပိုမိုလုပ်ဆောင်ခဲ့ခြင်း ဖြစ်သည်။

“ဒါကတော့...”

ချန်ရွှင်ဖုန်း၏ မျက်နှာအမူအရာက အနည်းငယ် တည်တင်းသွားခဲ့ပြီး အဓိပ္ပာယ်ပါပါဖြင့် ပြောလိုက်သည် - “သူမက ဝိညာဉ်ဆိုးကျင့်ကြံသူတစ်ယောက်လေ။ ငါတို့ ဝိညာဉ်နန်းတော်နဲ့ ဝိညာဉ်ဆိုးကျင့်ကြံသူတွေကြားထဲမှာ စေ့စပ်လို့မရတဲ့ အမုန်းတရားတွေ ရှိတယ်။ ဂိုဏ်းချုပ်ထန် ပြောတဲ့စကားက ငါ့ကို တော်တော်လေး အကျပ်ရိုက်စေတာပဲ။”

“တောင်းပန်ပါတယ် အရှင်... သဘောတူပေးပါ။ ဒီအတွက်ကြောင့် ကျွန်တော် သက်တမ်းနှစ်သောင်းရှိတဲ့ ဝိညာဉ်အရိုးတစ်စုကို လျော်ကြေးအဖြစ် ပေးအပ်ဖို့ ဆန္ဒရှိပါတယ်၊ ပြီးတော့ နောင်ကျရင် ယုအာကို သေချာပေါက် ထိန်းသိမ်းပဲ့ပြင်ပါ့မယ်။”

ချန်ရွှင်ဖုန်း အကျပ်ရိုက်နေသော အမူအရာကို မြင်လိုက်ရသည့်အခါတွင်မူ ထန်ရှောင်သည် စိုးရိမ်ပူပန်သွားခဲ့ပြီး ချက်ချင်းပင် သူ၏ အိတ်ထဲကနေ သက်တမ်းတစ်သောင်းငါးထောင်ရှိသော ဝိညာဉ်အရိုးတစ်ခုကို ထုတ်ယူကာ စာပွဲပေါ်သို့ တင်လိုက်သည်။

“ဟူး... ဂိုဏ်းချုပ်ထန်ရဲ့ ရိုးသားမှုကို တကယ်ပဲ လေးစားမိပါတယ်။ ငါလည်း ဒီလို စုံတွဲတစ်တွဲကို မခွဲရက်ပါဘူး။ ဒါဆိုရင်တော့ ငါ မင်းနဲ့အတူ လိုက်ခဲ့ပေးမယ်။”

ချန်ရွှင်ဖုန်းက ဟန်ဆောင်၍ သက်ပြင်းချလိုက်သည်။ အချိန်ကို တွက်ချက်ကြည့်ရသော် ယုအာကို လွှတ်ပေးရမည့် အချိန်သို့ ရောက်ရှိနေပြီ ဖြစ်သည်။ ယခုအခါ ထန်ရှောင်ကိုယ်တိုင် လာရောက်တောင်းဆိုနေခြင်းက သူ့အတွက် အလုပ်ရှုပ်သက်သာစေခဲ့သည်။

ပြီးတော့ သူက သက်တမ်းသောင်းချီရှိသော ဝိညာဉ်အရိုးတစ်ခုကိုလည်း အခွင့်ကောင်းယူကာ ရရှိလိုက်သေးသည်။ တကယ့်ကို အကျိုးရှိလှသော အရောင်းအဝယ်တစ်ခု ဖြစ်ပေသည်။