အခန်း (၁၉) - ထောက်ပံ့ရေးတပ်ဖွဲ့၏ အလှည့်အပြောင်း

အီနိုမိုင်း၏ အကြံအစည်မှာ အနည်းငယ် ကလေးဆန်နေသည်ဟု ဆိုရမည်။ ဗေသူးဗီးယပ်စ် တောင်ဘက်တစ်ဝိုက်တွင် ပုန်ကန်မှုများကြောင့် ရှုပ်ထွေးနေသဖြင့် အနီးအနားရှိ အာနီးယားလမ်းမကြီးမှာလည်း ခြောက်ကပ်နေပြီဖြစ်သည်။ ယခင်ကလို ကံကောင်းခြင်းမျိုး ကြုံရဖို့မှာ မလွယ်ကူတော့ပေ။ သို့သော် သူထောက်ပြသွားသည့် လက်နက်ခဲယမ်း ပြတ်လပ်မှုပြဿနာမှာမူ အားလုံးအတွက် အစိုးရိမ်ရဆုံးကိစ္စ ဖြစ်နေသည်။ ကာပူးအာ မှ ထွက်ပြေးလာသည်မှာ တစ်လရှိပြီဖြစ်ပြီး အင်အားမှာ ၅,၀၀၀ နီးပါး ရှိလာသော်လည်း ဒိုင်း၊ သံလျက် သို့မဟုတ် လှံ ကဲ့သို့သော အခြေခံလက်နက် ကိုင်ဆောင်နိုင်သူမှာ ၅၀၀ ပင် မပြည့်ချင်သေးပေ။

ခေတ္တမျှ တိတ်ဆိတ်သွားပြီးနောက် စပါတာကပ်စ် က လေးနက်စွာဖြင့် “အီနိုမိုင်း ပြောတာလည်း ဟုတ်ပါတယ်။ အော့ခ်မာကို လူလွှတ်ပြီး စုံစမ်းကြည့်ခိုင်းရမယ်။ ဒါပေမဲ့ အဓိကကတော့ မနက်ဖြန်ကစပြီး စစ်သင်တန်းကို အပြင်းအထန် လေ့ကျင့်ပေးဖို့ပဲ။ ဒါမှ ရောမစစ်တပ် ရောက်လာတဲ့အခါ သူတို့ကို အနိုင်တိုက်ပြီး လက်နက်တွေကို သိမ်းပိုက်နိုင်မှာ။ တကယ်လို့ သူတို့ အမြန်ရောက်မလာဘူးဆိုရင်လည်း ငါတို့က ထိုင်စောင့်မနေဘူး။ ပွန်ပေလို မြို့ငယ်လေးတွေကို အရင်ဝင်တိုက်ပြီး လက်နက်တိုက်တွေကို သိမ်းမယ်။ ဒါမှသာ ရောမစစ်တပ်ကြီးနဲ့ ရင်ဆိုင်နိုင်မယ့် အခွင့်အရေး ရှိမှာပါ” ဟု ပြောကြားလိုက်ရာ အားလုံးက သဘောတူခဲ့ကြသည်။

အစည်းအဝေးအပြီးတွင် ဟာမီလ်ကာသည် ထောက်ပံ့ရေးအဖွဲ့ဝင်အားလုံးကို ရင်ပြင်တွင် စုဝေးစေပြီး “ဒီနေ့ကစပြီး မက်ဆီမတ်စ်က မင်းတို့ရဲ့ တပ်မှူးအသစ်ပဲ” ဟု ကြေညာလိုက်သည်။ ထိုအခါ ဝမ်းသာအားရ အော်ဟစ်သံများနှင့်အတူ လက်ခုပ်သံများ ဟိန်းထွက်သွားတော့သည်။

ဟာမီလ်ကာက မက်ဆီမတ်စ်ကို ကြည့်ကာ “ငါတို့ ဆုံးဖြတ်ချက် မှန်သွားပုံပဲ။ အားလုံးက မင်းကို တပ်မှူးအဖြစ် လိုလားနေကြတာ” ဟု ပြောသည်။ မက်ဆီမတ်စ်ကလည်း “ဒါက ဆရာ့ရဲ့ ပံ့ပိုးမှုကြောင့်ပါ။ ဆရာ ကျွန်တော့်ကို မနှမြောတမ်း သင်ကြားပေးခဲ့လို့ အခုလို ဖြစ်လာရတာပါ” ဟု ရိုးသားစွာ ပြန်ပြောလိုက်သည်။

“အဖွဲ့အစည်း ကောင်းစားဖို့က အဓိကပဲ။ အခု ထောက်ပံ့ရေးအဖွဲ့ကို မင်းလက်ထဲ အပ်လိုက်ပြီ၊ သေချာစီမံပါ။ တစ်ခုခု အခက်အခဲရှိရင်လည်း ငါ့ဆီလာခဲ့၊ အတူတူ ဖြေရှင်းကြတာပေါ့” ဟု ဟာမီလ်ကာက လေးလေးနက်နက် မှာကြားသည်။

မက်ဆီမတ်စ်က ချက်ချင်းပင် “ဆရာ... အခုပဲ ကျွန်တော့်မှာ အကူအညီလိုနေတဲ့ ပြဿနာတစ်ခု ရှိနေပြီ” ဟု ဆိုလိုက်ရာ ဟာမီလ်ကာက “မင်းကတော့ တကယ့်ကောင်ပဲ” ဟု ခပ်ပြုံးပြုံးဖြင့် ဆိုသည်။

“ထောက်ပံ့ရေးအဖွဲ့မှာ လူအင်အား မလုံလောက်ဘူး ဆရာ။ အခု လူ ၂၀၀ လောက် ရှိတယ်ဆိုပေမဲ့ အများစုက မိန်းမတွေ၊ သက်ကြီးရွယ်အိုတွေနဲ့ ကလေးတွေပဲ။ ကျန်းမာသန်စွမ်းတဲ့ အမျိုးသားက အယောက် ၈၀ ပဲ ရှိတယ်။ အားလုံးက အိုမင်းမစွမ်းသူတွေနဲ့ အားနည်းသူတွေ များနေတယ်” ဟု မက်ဆီမတ်စ်က အကျိုးအကြောင်း ရှင်းပြသည်။

ဟာမီလ်ကာက “အခုက ရောမစစ်တပ်က အချိန်မရွေး တိုက်လာနိုင်တာ။ လူသစ်တွေကို တိုက်ခိုက်ရေးတပ်တွေဆီ အရင်ပို့ရမှာပဲ။ ထောက်ပံ့ရေးကို ဦးစားပေးဖို့ အချိန်မဟုတ်သေးဘူး” ဟု ကန့်ကွက်သော်လည်း မက်ဆီမတ်စ်က လက်မလျှော့ပေ။

“စစ်ပွဲဖြစ်လာရင် ကျွန်တော်တို့ ထောက်ပံ့ရေးအဖွဲ့ကလည်း တိုက်ခိုက်ရေးတပ်တွေနောက်က လိုက်ရမှာပဲ။ အခုလို အေးဆေးချိန်မှာ မသိသာပေမဲ့ တကယ့်တိုက်ပွဲပြင်းထန်လာရင် ဒီလူတွေက ဝန်ထုပ်ဝန်ပိုး ဖြစ်ကုန်လိမ့်မယ်။ နောက်ပြီး တိုက်ခိုက်ရေးတပ်က လူတွေ လာကူပေးမယ်ဆိုရင်တောင် သူတို့က ထောက်ပံ့ရေးလုပ်ငန်းတွေကို နားမလည်တော့ ရှုပ်ထွေးကုန်မှာ။ ဒါကြောင့် သန်မာတဲ့ ကျွန်အချို့ကို ထောက်ပံ့ရေးအဖွဲ့ထဲ ထည့်ပေးဖို့ လိုအပ်ပါတယ်” ဟု မက်ဆီမတ်စ်က ခိုင်လုံစွာ တင်ပြလိုက်သည်။

ဟာမီလ်ကာ ခေတ္တမျှ စဉ်းစားပြီးနောက် “ကောင်းပြီ၊ ငါ စပါတာကပ်စ် နဲ့ ဆွေးနွေးပေးမယ်။ မင်းလည်း နောက်အစည်းအဝေးတွေမှာ ကိုယ်တိုင် တင်ပြပေါ့။ ဒါပေမဲ့ လူအများကြီးတော့ မျှော်လင့်မထားနဲ့ဦး” ဟု ဆိုလိုက်ရာ မက်ဆီမတ်စ် ဝမ်းသာအားရ ပြုံးလိုက်မိသည်။

သူသည် ဤရာထူးကို ရရန်အတွက် အစွမ်းကုန် ကြိုးစားခဲ့ရသည်။ ဂလက်ဒီယေတာများမှာ ခွန်အားကိုသာ အလေးထားကြသဖြင့် ထောက်ပံ့ရေးအဖွဲ့ကို အားနည်းသူများ စုဝေးရာဟုသာ ထင်မြင်ကြသော်လည်း မက်ဆီမတ်စ်ကမူ ဤနေရာသည် သူ၏ ဩဇာအာဏာကို အမြန်ဆုံး တည်ဆောက်နိုင်မည့် နေရာဖြစ်ကြောင်း ကောင်းစွာ သိထားသည်။

ထိုစဉ် အမျိုးသမီးတစ်ဦး ပြုံးရွှင်စွာဖြင့် ချဉ်းကပ်လာပြီး “တပ်မှူး မက်ဆီမတ်စ်... အခုလို ရာထူးတက်တာကို အောင်ပွဲခံကြမလား” ဟု မေးလိုက်သည်။ သူမမှာ အသက် ၃၀ အရွယ် အက်ခရိုနစ် ဖြစ်ပြီး အီဂျစ်ပြည်မှ ကျွန်အဖြစ် ရောင်းစားခံခဲ့ရသူ ဖြစ်သည်။ သူမ၏ မိသားစုမှာ ကြွေးမြီများကြောင့် ဘဝပျက်ခဲ့ရပြီး သမီးကြီးဖြစ်သူမှာလည်း ခြံမန်နေဂျာ၏ စော်ကားမှုကြောင့် ကွယ်လွန်ခဲ့ရသူ ဖြစ်သည်။ ထို့ကြောင့် သူမသည် ပုန်ကန်မှုတွင် အားတက်သရော ပါဝင်ခဲ့သူ ဖြစ်သည်။

မက်ဆီမတ်စ်သည် ခေတ်သစ်လူသားတစ်ဦးဖြစ်သဖြင့် အမျိုးသမီးများအပေါ် ခွဲခြားမှုမရှိဘဲ သူမ၏ အရည်အချင်းကို မြင်ကာ မီးဖိုချောင်တာဝန်ခံအဖြစ် ခန့်အပ်ရန် တိုက်တွန်းပေးခဲ့သူလည်း ဖြစ်သည်။

မက်ဆီမတ်စ်က သူမကို ကြည့်ကာ “ကျေးဇူးတင်ပါတယ် အက်ခရိုနစ်။ ဒါပေမဲ့ အခုက ပျော်ပါးနေရမယ့် အချိန်မဟုတ်ဘူး။ ငါတို့ အလုပ်ကို အကောင်းဆုံးဖြစ်အောင် အရင်လုပ်ကြရမယ်။ စပါတာကပ်စ် ရဲ့ ဆုံးဖြတ်ချက် မှန်ကန်တယ်ဆိုတာကို လက်တွေ့ပြရမှာပဲ” ဟု တည်ငြိမ်စွာဖြင့် ပြန်လည်ပြောကြားလိုက်လေသည်။

အခန်း (၂၀) - မက်ဆီမတ်စ်၏ ပထမဆုံးခြေလှမ်း

မက်ဆီမတ်စ်တွင် ထုတ်မပြောသေးသည့် အတွေးများ ရှိနေသည်။ သူသည် ထွက်ပြေးလာသည့် ဂလက်ဒီယေတာများထဲတွင် အသက်ငယ်သူ ဖြစ်သည့်အပြင်၊ ယခင်က အဖွဲ့အပေါ် သစ္စာဖောက်ခဲ့ဖူးသည့် သမိုင်းကြောင်းလည်း ရှိခဲ့သည်။ ထို့ကြောင့် အနှိမ်ခံ ထောက်ပံ့ရေးအဖွဲ့မှာပင် ဖြစ်လင့်ကစား ယခုကဲ့သို့ ရာထူးအရှိန်အဝါ ရလာခြင်းမှာ အခြားသူများ၏ မနာလိုမှုကို ဖြစ်စေနိုင်ကြောင်း သူရိပ်မိသည်။ ထို့ကြောင့် သူသည် အစစအရာရာကို ခပ်နိမ့်နိမ့်သာ နေထိုင်ရန် ဆုံးဖြတ်ထားသည်။

အက်ခရိုနစ်ကမူ ထိုမျှအထိ မတွေးမိပေ။ သူမက မက်ဆီမတ်စ်ကို လေးစားသောအားဖြင့် ရင်ဘတ်ကို ပုတ်ကာ "တပ်မှူး မက်ဆီမတ်စ်... စိတ်မပူပါနဲ့၊ ကျွန်မတို့ အဖွဲ့သားတွေ အလုပ်ကို သေချာလုပ်ဖို့ ကျွန်မကိုယ်တိုင် ကြပ်မတ်ပေးပါ့မယ်" ဟု အားတက်သရော အာမခံလိုက်သည်။

မက်ဆီမတ်စ်က ခေါင်းညိတ်ပြပြီး ရင်ပြင်တွင် စုဝေးနေသူများကို ကြည့်ကာ "ဒီနေ့ကစပြီး ငါဟာ ထောက်ပံ့ရေးတပ်ဖွဲ့ရဲ့ တပ်မှူးပဲ။ ဘာမှ စိုးရိမ်စရာမရှိဘူး၊ အားလုံးဟာ အရင်အတိုင်းပဲ ဆက်သွားမှာပါ။ မင်းတို့ လုပ်စရာရှိတာတွေကို ဆက်လုပ်ကြ၊ ညဘက်ရောက်ရင်တော့ ဒီရင်ပြင်မှာ ပြန်ဆုံပြီး ပညာသင်ကြမယ်၊ ငါပြောပြမယ့် ပုံပြင်တွေကို နားထောင်ကြမယ်... ဟုတ်ပြီလား" ဟု ဟိန်းထွက်သွားအောင် ပြောလိုက်ရာ "ဟုတ်ကဲ့ပါ!!!" ဟူသော ပြိုင်တူအော်ဟစ်သံများ ထွက်ပေါ်လာတော့သည်။

"အရာအားလုံး အရင်အတိုင်းပဲ ဆက်သွားမယ်" ဆိုသည်မှာ လူစုမပျက်အောင် မက်ဆီမတ်စ် သုံးလိုက်သည့် စကားမျှသာ ဖြစ်သည်။ ညဘက်တွင် အဖွဲ့သားများ ပုံပြင်နားထောင်ပြီး အိပ်ဆောင် အသီးသီးသို့ ပြန်သွားကြသောအခါ သူသည် အဖွဲ့ခေါင်းဆောင်များကို ခေါ်ကာ အစည်းအဝေးပြုလုပ်သည်။

အစည်းအဝေးကို မက်ဆီမတ်စ်၏ အိပ်ဆောင်တွင် ပြုလုပ်ခြင်းဖြစ်သည်။ ယခုအခါ သူသည် ဝိုင်ခြံ၏ ပင်မအဆောက်အအုံတွင် သီးသန့်အခန်းတစ်ခန်း ရရှိထားပြီ ဖြစ်သည်။ ဖယောင်းတိုင်မီးရောင်အောက်တွင် သူသည် အဖွဲ့ခေါင်းဆောင်များကို တစ်ချက် အကဲခတ်လိုက်သည်။ မီးဖိုချောင်တာဝန်ခံ အက်ခရိုနစ်၊ ဂိုဒေါင်နှင့် ရိက္ခာတာဝန်ခံ ဂါယပ်စ် နှင့် ပြင်ပသယ်ယူပို့ဆောင်ရေးအဖွဲ့ခေါင်းဆောင် ပီဂါရစ်တို့ ဖြစ်ကြသည်။

ကြည့်လိုက်လျှင် ထောက်ပံ့ရေးအဖွဲ့၏ အဖွဲခေါင်းဆောင်များမှာ သိပ်မခန့်ညားလှဟု ထင်ရသော်လည်း သူတို့တွင် ကိုယ်စီအရည်အချင်း ရှိကြသည်။ ဂါယပ်စ်မှာ စာရေးစာချီ တတ်မြောက်သူဖြစ်ပြီး ပီဂါရစ်မှာ မြင်းလှည်းမောင်းနှင်ရာတွင် ကျွမ်းကျင်သူ ဖြစ်သည်။ ထို့ထက် ပိုသည်မှာ သူတို့အားလုံးသည် ရောမသားများကို နာကြည်းနေသူများ ဖြစ်ကြခြင်းပင်။

ဂါယပ်စ်မှာ ယခင်က လယ်ပိုင်ရှင်တစ်ဦး ဖြစ်သော်လည်း ရောမမှူးမတ်များ၏ မြေသိမ်းမှုကြောင့် အကြွေးနွံနစ်ကာ မိသားစုဘဝ ပျက်စီးခဲ့ရသူ ဖြစ်သည်။ ပီဂါရစ်မှာမူ ဂရိလူမျိုးဖြစ်ပြီး စစ်သုံ့ပန်းအဖြစ်မှ ကျွန်ဖြစ်လာသူ ဖြစ်သည်။ သူတို့အားလုံးသည် မက်ဆီမတ်စ်ထက် အသက်ကြီးကြသော်လည်း ငယ်ရွယ်သည့် မက်ဆီမတ်စ်အပေါ် လေးစားမှု ရှိကြသည်။

မက်ဆီမတ်စ်က ပွင့်ပွင့်လင်းလင်းပင် "ခင်ဗျားတို့ သုံးယောက်လုံး ဒီအဖွဲ့မှာ တာဝန်ယူခဲ့တာ ကြာပြီဆိုတော့ ကိုယ့်လုပ်ငန်းခွင်ထဲက အခက်အခဲတွေနဲ့ အကြံပြုချင်တာတွေကို ပြောပြပေးကြပါ" ဟု ဆိုလိုက်သည်။

ထိုအခါ သုံးယောက်သား အံ့အားသင့်သွားကြသည်။ ယခင်တပ်မှူး ဟာမီလ်ကာသည် အမြဲတမ်း အမိန့်သာ ပေးလေ့ရှိပြီး သူတို့၏ အကြံဉာဏ်ကို တစ်ခါမျှ မတောင်းဆိုဖူးသောကြောင့် ဖြစ်သည်။ မက်ဆီမတ်စ်က ပြုံးကာ "စပါတာကပ်စ် ပြောဖူးသလိုပဲ၊ ငါတို့အဖွဲ့ထဲ ရောက်လာရင် အားလုံးဟာ ညီအစ်ကို မောင်နှမတွေပဲ။ ထောက်ပံ့ရေးအဖွဲ့ရဲ့ ကိစ္စဟာ အားလုံးနဲ့ ဆိုင်တယ်။ ပြဿနာတွေကို အတူတူ ဆွေးနွေးဖြေရှင်းမှ ငါတို့အဖွဲ့ တိုးတက်မှာပေါ့" ဟု အားပေးလိုက်သည်။

အက်ခရိုနစ်က အရင်ဆုံး စတင်ပြောသည်။ "တပ်မှူး... မီးဖိုချောင်မှာ မိန်းမတွေ များတော့ တခြားအဖွဲ့က စစ်သားတွေ လာလာနှောင့်ယှက်တာကို ခံနေရတယ်။ စပါတာကပ်စ်က ဝိုင်ခြံထဲ မဝင်ရလို့ အမိန့်ထုတ်ထားပေမဲ့ ခိုးဝင်လာတဲ့သူတွေ ရှိနေတုန်းပဲ။ အထူးသဖြင့် ခရောစ်ရဲ့ ဒုတိယတပ်ဖွဲ့ကလူတွေ မီးဖိုချောင်ထဲအထိ ဝင်ရှုပ်နေတော့ အဖွဲ့သားတွေ ကြောက်ပြီး အလုပ်မလုပ်နိုင်ကြဘူး"

မက်ဆီမတ်စ် မျက်မှောင်ကြုတ်သွားသည်။ ဤကိစ္စကို သူသိထားသော်လည်း ဟာမီလ်ကာကမူ စစ်သားများ စိတ်ဓာတ်တက်ကြွစေရန်အတွက် အနည်းငယ်လောက် ထိတွေ့မှုကို လျစ်လျူရှုထားခဲ့သည်။ သို့သော် မက်ဆီမတ်စ်ကမူ ဤသည်မှာ စည်းကမ်းပျက်ယွင်းမှုဟု မြင်သည်။ သူသည် ဖယောင်းတိုင်ပြားပေါ်တွင် ထိုပြဿနာကို မှတ်သားလိုက်ပြီး "ကောင်းပြီ၊ တခြား ဘာရှိသေးလဲ" ဟု မေးသည်။

"နောက်တစ်ခုက လူအင်အားပါ တပ်မှူး။ မီးဖိုချောင်မှာ လူတစ်ရာကျော် ရှိတယ်ဆိုပေမဲ့ မနက်ကနေ ညအထိ မနားတမ်း လုပ်နေရတာတောင် မလောက်ငချင်ဘူး။ လူသစ်တွေကလည်း နေ့တိုင်း တိုးလာနေတယ်။ နောက်ပြီး မီးဖိုတွေ၊ ဂျုံကြိတ်ဆုံတွေလည်း ထပ်လိုနေတယ်၊ အဲဒါတွေမရှိရင် လူဘယ်လောက်ရှိရှိ အစာအလုံအလောက် ထွက်လာမှာ မဟုတ်ဘူး"

မက်ဆီမတ်စ်က အလေးအနက် ခေါင်းညိတ်ကာ အက်ခရိုနစ် တင်ပြချက်များကို သေချာမှတ်သားလိုက်လေတော့သည်။