အခန်း (၆) ----ဝမ်အာနှင့် အရောင်းအဝယ်ပြုလုပ်ခြင်း၊ ဖျောင်းနန်ဇီ ဆင်းသက်လာခြင်း

[ချင်းဟောက် - "ကျွန်တော် မင်းဆီကို ဝိညာဉ်ရည်တချို့ ပို့ပေးထားတယ်။ အရင်ဆုံး သုံးကြည့်လိုက်ဦး။ ဒီအရည်က ထာဝရနုပျိုစေရုံတင်မကဘဲ အသက်ရှည်စေတယ်၊ ပြီးတော့ ဆေးဖော်စပ်မှု အောင်မြင်နှုန်းကိုတောင် မြှင့်တင်ပေးနိုင်သေးတယ်။ အာနိသင်ကို သဘောကျတယ်ဆိုရင် မင်းတို့ဂိုဏ်းက ဝိညာဉ်သန္ဓေတည်ခြင်းအဆင့် ဘိုးဘေးကို ဒီထက်ပိုလိုချင်ရင် ဆေးနည်းတွေနဲ့ လဲမလားလို့ မေးကြည့်ပေးလို့ရတယ်!"]

ချင်းဟောက်သည် လီမူဝမ်နှင့် အဆက်အသွယ်ရရန်အတွက် ဤဝိညာဉ်ရည်ကို ရည်ရွယ်ချက်ရှိရှိ လဲလှယ်ခဲ့ခြင်းဖြစ်သည်။

ဤအရာသာမရှိပါက လီမူဝမ်ထံ သီးသန့်စကားပြောရန် ချဉ်းကပ်ခြင်းသည် သူမ၏သံသယစိတ်ကို သေချာပေါက် နှိုးဆွမိလိမ့်မည်ဖြစ်ပြီး ၎င်းတို့နှစ်ဦးကြားတွင်လည်း ပြောစရာ ဘုံခေါင်းစဉ် မရှိပေ။

[လီမူဝမ် - "ဒါက တကယ်ပဲ အာနိသင်ရှိလို့လား? ကျွန်မကို လိမ်နေတာတော့ မဟုတ်ပါဘူးနော်?"]

[ချင်းဟောက်- "မင်းကို လုံးဝမလိမ်ပါဘူး။ ဒီလိုအတုမဲ့အလှပဂေးလေးကို ဘယ်သူကများ ရက်ရက်စက်စက် လိမ်ရက်မှာလဲ?"]

ဤချီးကျူးစကားကို မြင်လိုက်ရသောအခါ လီမုဝမ်သည် သူမ၏စိတ်နှလုံးထဲ၌ ချိုမြိန်သော ခံစားချက်တစ်ခုကို ခံစားလိုက်ရသည်။

အဆုံးတွင်တော့ သူမကို ချီးကျူးနေသူမှာ ပါရမီရှင်လူငယ်တစ်ဦး မဟုတ်ပါလား။

သူသည် အသက်တစ်ဆယ့်ခြောက်နှစ်သာ ရှိသေးသော်လည်း ဝိညာဉ်သန္ဓေတည်ခြင်းအဆင့် ပညာရှင်တစ်ဦး ဖြစ်နေပြီဖြစ်ကာ ရုပ်ရည်ခန့်ညားထည်ဝါမှုကိုမူ ပြောနေစရာပင် မလိုတော့ချေ။ထိုသို့သောလူမျိုးသည် မည်သည့်နေရာသို့သွားသည်ဖြစ်စေ ကျင့်ကြံဖော်အဖြစ် ရွေးချယ်ရန် အကောင်းဆုံးသူဟု သတ်မှတ်နိုင်ပေသည်။

[လီမုဝမ် - "ကျွန်မက ရှင့်စကားလောက် ဘယ်ကောင်းပါ့မလဲ။ စီနီယာမမရွှယ်ကမှ တကယ့်အတုမဲ့အလှပိုင်ရှင်ပါ။"]

[ချင်းဟောက် - "သူမက တကယ်လှတာ မှန်ပေမဲ့ ဝမ်အာနဲ့ ယှဉ်ရင်တော့ အများကြီး လိုပါသေးတယ်!"]

[လီမူဝမ် - "မမရွှယ်သာ ဒါကိုကြားရင် သေချာပေါက် စိတ်ဆိုးပြန်တော့မှာပဲ။ (ပါးစပ်ကိုပိတ်၍ ရယ်မောလျက်)"]

[ချင်းဟောက် - "ဒါက ကျွန်တော်တို့နှစ်ယောက်ကြားက လျှို့ဝှက်ချက်လေးပေါ့။"]

[လီမူဝမ် - "နားလည်ပါပြီ။ ဒါဆို ကျွန်မ ဝိညာဉ်ရည်ကို ယူပြီး ဆေးလုံးအချို့ သွားဖော်စပ်ကြည့်လိုက်ဦးမယ်။"]

[လီမူဝမ်သည် ချင်းဟောက် ပို့လိုက်သော အနီရောင်စာအိတ်ကို လက်ခံရရှိလိုက်သည်!]

လီမူဝမ်သည် အနီရောင်စာအိတ်ကို နှိပ်လိုက်သည့်အဟုန်ဖြင့် လက်ရာမြောက်လှသော ကျောက်စိမ်းပုလင်းတစ်လုံးသည် သူမ၏လက်ထဲတွင် လေဟာနယ်ထဲမှ အလိုအလျောက် ပေါ်လာခဲ့သည်။

လီမူဝမ်သည် အနီရောင်စာအိတ်၏ လုပ်ဆောင်ချက်နှင့် စိမ်းသက်သူမဟုတ်ပေ။

ယခင်က သူမနှင့် ယောင်ရှင်းရွှယ်တို့ အဖွဲ့လိုက်စကားပြောခန်းထဲသို့ စတင်ဝင်ရောက်ခဲ့စဉ်က ၎င်း၏လုပ်ဆောင်ချက်များကို လေ့လာခဲ့ဖူးသည်။

ယောင်ရှင်းရွှယ်သည်ပင် သူမထံသို့ အထွတ်အထိပ်အဆင့် ဝိညာဉ်ကျောက်တုံးအချို့ ပေးပို့ရန် ဤအနီရောင်စာအိတ်လုပ်ဆောင်ချက်ကို အသုံးပြုခဲ့ဖူးသည်။

အထွတ်အထိပ်အဆင့် ဝိညာဉ်ကျောက်တုံးများသည် အလွန်အမင်း အဖိုးတန်ပြီး ရှားပါးလှရာ ဟော်ဖန်နိုင်ငံတစ်ခုလုံးတွင် တစ်တုံးမျှပင် မထုတ်လုပ်နိုင်ချေ။

လီမုဝမ်သည် ကျောက်စိမ်းပုလင်းကို ဖွင့်လိုက်ရာ အတွင်း၌ ပြင်းထန်သော ဝိညာဉ်စွမ်းအင်လှိုင်းများ ဖြာထွက်နေသည့် ကြည်လင်တောက်ပသော အရည်များကို တွေ့လိုက်ရသည်။

"ဒါက ကျင့်ကြံဖော်ကျင်း ပြောတဲ့ ဝိညာဉ်ရည်လား? ငါ အခုပဲ စမ်းသပ်ကြည့်ရမယ်!"

လီမူဝမ်သည် သူမ၏ဆေးဖော်ဖိုကို ချက်ချင်းထုတ်ဆင့်ကာ အဆင့် (၂) အဆင့်မြင့်ဝိညာဉ်ဆေးလုံးဖြစ်သော ချီဇူအိုဆေးလုံးကို စတင်ဖော်စပ်ရန် ကြိုးစားလိုက်သည်။

ဤဆေးလုံးအမျိုးအစားသည် အခြေခံအုတ်မြစ်တည်ဆောက်ခြင်းအဆင့် ကျင့်ကြံသူတစ်ဦး၏ ဝိညာဉ်ရေးရာကျင့်ကြံမှုကို မြှင့်တင်ပေးနိုင်ပြီး ပို၍အရေးကြီးသည်မှာ လူတစ်ဦး၏ စွမ်းအင်လမ်းကြောင်းများကို ချဲ့ထွင်ပေးနိုင်သည့် အာနိသင်ရှိသည်။

စွမ်းအင်လမ်းကြောင်းများကို ချဲ့ထွင်ပေးနိုင်သည့် မည်သည့်ဆေးလုံးမဆို အခြားဆေးလုံးများထက် ပို၍အဖိုးတန်လှသည်။

ခဏအကြာတွင်။

"ဆေးလုံး အောင်မြင်ပြီ!"

လီမူဝမ်သည် လုံးဝန်းပြည့်စုံသော ဆေးလုံးကို လက်ထဲတွင် ကိုင်ထားရင်း ဝမ်းသာအားရဖြင့် ရေရွတ်လိုက်သည်။ "ငါ့ရဲ့ ချီဇူအိုဆေးလုံး ဖော်စပ်မှုအောင်မြင်နှုန်းက ပုံမှန်ဆိုရင် လေးဆယ်ရာခိုင်နှုန်းထက် မကျော်ဘူး၊ ဒါပေမဲ့ ဒီတစ်ခါတော့ ပထမဆုံးအကြိမ်မှာတင် အောင်မြင်သွားတာပဲ!"

"ဒါပေမဲ့ တစ်ကြိမ်တည်း အောင်မြင်ရုံနဲ့တော့ ဘာမှ သက်သေမပြနိုင်သေးဘူး။ သေချာအောင် နောက်ထပ် ဖော်စပ်ကြည့်ဖို့ လိုသေးတယ်။"

ထိုသို့တွေးရင်း လီမူဝမ်သည် နောက်တစ်ကြိမ် စတင်ဖော်စပ်ပြန်သည်။

သူမသည် ချီဇူအိုဆေးလုံးကို ဆယ်ကြိမ်ဆက်တိုက် ဖော်စပ်ခဲ့ရာ ခုနစ်ကြိမ်တိုင်တိုင် အောင်မြင်ခဲ့သည်။

"ဒါက တကယ်ပဲ ဆေးဖော်စပ်မှု အောင်မြင်နှုန်းကို တိုးတက်စေတာပဲ!"

လီမူဝမ်သည် သူမ၏နုနယ်သောလက်ကလေးကို ဝေ့ယမ်းကာ ကျောက်စိမ်းပုလင်းကို သိမ်းဆည်းလိုက်ပြီး ဝိညာဉ်သန္ဓေတည်ခြင်းအဆင့် ဘိုးဘေးဖြစ်သူ လန်ရို့ထံသို့ တန်းတန်းမတ်မတ် သွားရောက်ရှာဖွေခဲ့သည်။

ချင်ဟောင်သည် ကြာမြင့်စွာ စောင့်ဆိုင်းစရာမလိုဘဲ လီမူဝမ်ထံမှ မက်ဆေ့ခ်ျကို လက်ခံရရှိခဲ့သည်။

[လီမူဝမ် - "ကျင့်ကြံဖော်ချင်၊ ဘိုးဘေးလန်ရို့က သဘောတူပါတယ်။ ဒါပေမဲ့ သူမက ဝိညာဉ်ရည် အနည်းဆုံး အစက် ၁၀၀၀ ရှိမှပဲ လဲလှယ်မယ်လို့ ပြောတယ်။ ရှင့်မှာ အဲဒီလောက်အများကြီး ရှိလားဟင်?"]

[ချင်းဟောက် - "လောလောဆယ် အစက် ၃၀၀၀ လဲလှယ်နိုင်တယ်၊ နောက်မှလည်း ထပ်ရှိဦးမှာပါ။ ပြီးတော့ ကျွန်တော် အဆင့် (၄) နဲ့ အဆင့် (၅) ဆေးနည်းအချို့ကိုလည်း လဲလှယ်ချင်ပါတယ်!"]

[လီမူဝမ် - "သုံးထောင်တောင်လား?"]

လီမူဝမ် အံ့အားသင့်သွားရသည်။

ဘိုးဘေးလန်ရို့ကိုယ်တိုင် ဤဝိညာဉ်ရည်ကို စစ်ဆေးအတည်ပြုခဲ့ပြီးဖြစ်ရာ ၎င်း၏အာနိသင်များသည် ချင်းဟောက်ပြောခဲ့သည့်အတိုင်း ထပ်တူထပ်မျှ မှန်ကန်နေခဲ့သည်။

ဘိုးဘေးလန်ရို့က ၎င်းသည် တစ်စက်တည်းသာဆိုပါက အဖိုးတန်လှသည်ဟု မသတ်မှတ်နိုင်ကြောင်း ပြောခဲ့သည်။

သို့သော် ပမာဏသည် အစက်တစ်ရာကျော်သွားပါက ကောင်းကင် မြင့်မားလှသော ဈေးနှုန်းကို ရရှိနိုင်ပေလိမ့်မည်။ အကယ်၍ အစက်တစ်ထောင်ကျော်အထိ ရောက်ရှိသွားပါကမူ ၎င်းတို့ကဲ့သို့သော ဆေးဖော်စပ်သည့်ဂိုဏ်းတစ်ခု၏ အင်အားကို သိသိသာသာ မြှင့်တင်ပေးရန် လုံလောက်ပေသည်။

ထို့အပြင် ဤအရည်ကို ဆေးဖော်စပ်ရာတွင် သီးသန့်အသုံးပြုမည်ဆိုပါက ထွက်ပေါ်လာသော ဝိညာဉ်ဆေးလုံးများသည် အသက်ရှည်ခြင်းနှင့် နုပျိုမှုကို ထိန်းသိမ်းခြင်းတို့အတွက် ပိုမိုထိရောက်မည်ဖြစ်သည်။

လီမူဝမ်၏အမြင်အရ အကယ်၍ ၎င်းတို့သည် တစ်ကြိမ်တည်းဖြင့် အစက် ၃၀၀၀ ကို လဲလှယ်နိုင်မည်ဆိုပါက ၎င်းတို့၏ လော့ဟယ်ဂိုဏ်းသည် ဆေးဖော်စပ်ခြင်းပညာရပ်တွင် တစ်ကမ္ဘာလုံး၌ ကျော်ကြားလှသော အိမ်နီးနားချင်း ချူနိုင်ငံ၏ ယွန်းထျန်းဂိုဏ်းကို နောက်ဆုံးတွင် ကျော်ဖြတ်နိုင်မည့် အခွင့်အရေး ရရှိသွားနိုင်ပေသည်။

[ချင်းဟောက်သည် အနီရောင်စာအိတ်တစ်ခု ပေးပို့လိုက်သည်!]

[လီမူဝမ်သည် အနီရောင်စာအိတ်ကို လက်ခံလိုက်သည်!]

[လီမူဝမ် - "ဟင်? ဘာလို့ အစက် ၄၀၀0 တောင် ဖြစ်နေတာလဲ?"]

[ချင်းဟောက်- "အဲဒီထဲက ၃၀၀၀ က လော့ဟယ်ဂိုဏ်းနဲ့ ဆေးနည်းတွေ လဲလှယ်ဖို့အတွက်ပါ။ ကျန်တဲ့ ၁၀၀၀ ကတော့ မင်းအတွက် ဆုလာဘ်ပါ ဝမ်အာမမ။"]

[လီမူဝမ် - "ဒါက အလွန်အမင်း အဖိုးတန်လွန်းပါတယ်။ ကျွန်မ လက်မခံဝံ့ပါဘူး!"]

[ချင်းဟောက် - "မင်း လက်မခံဘူးဆိုရင်တော့ ကျွန်တော် ဒီအရောင်းအဝယ်ကို ဖျက်သိမ်းလိုက်တော့မယ်!"]

[လီမူဝမ် - "ဒီလိုအဖိုးတန်တဲ့ လက်ဆောင်မျိုးကို ရှင့်ကို ဘယ်လိုပြန်ပေးဆပ်ရမှန်းတောင် မသိတော့ပါဘူး။"]

[ချင်းဟောက် - "စိတ်ထဲမထားပါနဲ့ ဝမ်အာမမရာ။"]

လီမူဝမ်သည် ချင်းဟောက်က ဤအရာအတွက် အခြေခံအုတ်မြစ်တည်ဆောက်ခြင်း ဆေးလုံးဆယ်လုံးကိုသာ လဲလှယ်ခဲ့ရသည်ကို မသိရှိခဲ့ပေ။

ပြင်ပလူများအတွက်မူ ဤဝိညာဉ်ရည်သည် အလွန်အမင်း အဖိုးတန်လှသည်။

သို့သော် ဝမ်မာဇီမှာမူ ၎င်းကို စိတ်ပါတိုင်း သောက်သုံးနေပြီး ဖျော်ရည်တစ်ခုကဲ့သို့ သဘောထားကာ ပိုမိုလိုချင်သည့်အခါတိုင်း ပုတီးစေ့များကို ရေစိမ်ရုံဖြင့် ရရှိနိုင်ခဲ့သည်။

[လီမူဝမ် - "မဟုတ်သေးပါဘူး၊ ရှင်က ဝိညာဉ်သန္ဓေတည်ခြင်းအဆင့် ဘိုးဘေးတစ်ယောက်လေ၊ ဘာဖြစ်လို့ ကျွန်မလို အခြေခံအုတ်မြစ်တည်ဆောက်ခြင်းအဆင့် ကျင့်ကြံသူကို 'မမ' လို့ ခေါ်နေရတာလဲ?"]

[ချင်းဟောက် - "ဟီးဟီး၊ ကျွန်တော်က အသက်တစ်ဆယ့်ခြောက်နှစ်ပဲ ရှိသေးတာကိုး!"]

[လီမူဝမ် - "လူအချင်းချင်း နှိုင်းယှဉ်ရတာ တကယ်ပဲ စိတ်ပျက်ဖို့ကောင်းလိုက်တာ။ စိတ်ညှို့မတတ် ခံစားရတာပဲ။"]

လီမုဝမ်သည် လော့ဟယ်ဂိုဏ်းတွင် ထူးချွန်သော ပါရမီရှိသည်ဟု သတ်မှတ်ခံရသော်လည်း ချင်းဟောက်နှင့် နှိုင်းယှဉ်ပါက ကွာခြားချက်မှာ မိုးနှင့်မြေ ကဲ့သို့ပင် ဖြစ်နေတော့သည်။

၎င်းတို့နှစ်ဦး အရောင်းအဝယ် ပြီးမြောက်ပြီးနောက် ချင်းဟောက်သည် တောက်ရွှီကို ထပ်မံရှာဖွေကာ ဆေးဖော်စပ်ရန်အတွက် ကုန်ကြမ်းပစ္စည်းများကို စတင်စုဆောင်းခဲ့သည်။

ဤတစ်ကြိမ်တွင် ချင်းဟောက်သည် သူ၏ ဝိညာဉ်သန္ဓေတည်ခြင်းအဆင့်နယ်ပယ် ကျင့်ကြံမှုကို မြှင့်တင်ရန်အတွက် ဆေးလုံးများကို ဖော်စပ်ရန် ရည်ရွယ်ထားသည်။

"ဝုန်း!"

ဤနေ့တွင် ဟန်ယွဲ့တောင်ထွတ်တစ်ခုလုံးသည် ရုတ်တရက် ပြင်းထန်စွာ တုန်ခါသွားခဲ့သည်။

ထို့နောက် ကောင်းကင်ဘုံ၏ အရှိန်အဝါကဲ့သို့သော အသံတစ်ခုသည် ကောင်းကင်ယံမှ ရုတ်တရက် ဆင်းသက်လာပြီး မိုးခြိမ်းသံကဲ့သို့ အရပ်မျက်နှာအနှံ့ ပဲ့တင်ထပ်သွားခဲ့သည်။

"ငါက ရွှမ်တောက်ဂိုဏ်းက ဖျောင်းနန်ဇီ ဖြစ်တယ်။ ဟန်ယွဲ့ဂိုဏ်းရဲ့ မျိုးဆက်သစ်တွေ၊ အခုချက်ချင်း ဟန်ယွဲ့ဂိုဏ်းကနေ ထွက်သွားကြ!"

ဤအသံကို ကြားလိုက်ရသောအခါ ဟန်ယွဲ့ဂိုဏ်း၏ ကျင့်ကြံသူအားလုံး ရုပ်ပျက်ဆင်းပျက် ဖြစ်သွားကြသည်။

ဟန်ယွဲ့ဂိုဏ်းအတွင်းမှ အလင်းတန်းများသည် မြှားကဲ့သို့ ပျံသန်းထွက်ပေါ်လာပြီး ပင်မခန်းမကြီး၏ ရှေ့ရှိ ရင်ပြင်သို့ ရောက်ရှိလာကြသည်။

စိတ်ငြိမ်ကျင့်ကြံနေခဲ့ကြသော အမြုတေဖွဲ့စည်းခြင်းအဆင့် ပညာရှင်နှစ်ဦးပင်လျှင် ဤနေရာ၌ ပေါ်လာခဲ့ကြသည်။

တစ်ဦးမှာ သက်ကြီးဝါကြီး အကြီးအကဲတစ်ဦးဖြစ်ပြီး အခြားတစ်ဦးမှာ သက်ကြီးအမျိုးသမီးတစ်ဦး ဖြစ်သည်။ ၎င်းတို့နှစ်ဦးစလုံးသည် ဆံပင်ဖြူဖွေးနေကာ အလွန်အမင်း အသက်ကြီးရင့်နေပြီ ဖြစ်သည်။ ၎င်းတို့ ပေါ်လာသည်နှင့် ကောင်းကင်ယံသို့ လေးနက်တည်ကြည်သော မျက်နှာအမူအရာများဖြင့် လှမ်းမျှော်ကြည့်လိုက်ကြသည်။

ဟန်ယွဲ့ဂိုဏ်းသည် ဤတစ်ကြိမ်တွင် ကြီးမားသော ဘေးအန္တရာယ်နှင့် ကြုံတွေ့ရနိုင်ခြေရှိကြောင်း သူတို့အားလုံး သိကြသည်။

အကြီးအကဲ လျူဝန်ကျူးက ကျယ်လောင်စွာ အော်ဟစ်လိုက်သည်။ "အကြီးအကဲဖျောင်းနန်ဇီ၊ ဟန်ယွဲ့ဂိုဏ်းကို ဘယ်လိုကိစ္စမျိုးနဲ့ ကြွရောက်လာတာလဲဆိုတာ မေးပါရစေ?"

"လူအူကြောင် ကြားချင်ယောင်ဆောင်နေတာပဲ!"

ကွက်တိ ထိုအချိန်တွင် ဖျောင်းနန်ဇီ၏ ပုံရိပ်သည် ကောင်းကင်ယံ၌ ပေါ်လာခဲ့သည်။သူသည် ခရမ်းရောင်ဝတ်စုံကို ဝတ်ဆင်ထားပြီး မျက်နှာကျယ်ကာ နားရွက်ကြီးမားပြီး သန်မာထွားကျိုင်းသော ခန္ဓာကိုယ်ပိုင်ရှင်ဖြစ်ရာ အလွန်ပင် ခန့်ညားထည်ဝါလှသည်။

ဖျောင်းနန်ဇီက ပြောလိုက်သည်။ "မင်းတို့ ဟန်ယွဲ့ဂိုဏ်းရဲ့ ဝိညာဉ်သန္ဓေတည်ခြင်းအဆင့် ဘိုးဘေးတွေအားလုံး ပြင်ပလောကစစ်မြေပြင်မှာ ကျဆုံးကုန်ကြပြီ။ မင်းတို့ ဒီဟန်ယွဲ့တောင်ထွတ်ကို ထိန်းသိမ်းထားနိုင်မှာ မဟုတ်ဘူး။ ဒါကြောင့် တခြားဂိုဏ်းတွေကို အကျိုးအမြတ်ရစေမယ့်အစား ငါ့ရဲ့ ရွှမ်တောက်ဂိုဏ်းကို လွှဲအပ်ပေးလိုက်တာက ပိုကောင်းလိမ့်မယ်!"

"အကြီးအကဲ၊ ကျွန်တော်တို့ ဟန်ယွဲ့ဂိုဏ်းရဲ့ သခင်ကြီးက ဒီဟန်ယွဲ့တောင်ထွတ်ပေါ်မှာပဲ ဒီဂိုဏ်းကို တည်ထောင်ခဲ့တာပါ။ ကျွန်တော်တို့ ဒီတောင်းဆိုချက်ကို မလိုက်လျောနိုင်မှာကို စိုးရိမ်မိပါတယ်!"

သက်ကြီးအမျိုးသမီးက ဒေါသတကြီးမျက်နှာဖြင့် ပြောလိုက်သည်။

"အကောင်းပြောတာကို မကြားဘဲ အဆိုးနဲ့မှ တွေ့ချင်တာကိုး!"

ဖျောင်းနန်ဇီ၏ မျက်နှာအမူအရာသည် အေးစက်သွားပြီး တည်ငြိမ်စွာ ပြောဆိုလိုက်သည်။ "ဒီအဖိုးကြီး မင်းတို့ရဲ့ ဂိုဏ်းစောင့်မဟာဗျူဟာကို ဘယ်လိုဖျက်ဆီးမလဲဆိုတာ စောင့်ကြည့်နေလိုက်၊ ပြီးမှ ငါတို့ မျက်နှာချင်းဆိုင် စကားပြောကြတာပေါ့ မျိုးဆက်သစ်တို့!"

သူ၏အသံ ဆုံးသည်နှင့်အမျှ ဖျောင်းနန်ဇီ၏ ခန္ဓာကိုယ်သည် ရုတ်တရက် လျင်မြန်စွာ ကြီးထွားလာခဲ့သည်။

မျက်စိတစ်မှိတ်အတွင်း၌ သူသည် ဟန်ယွဲ့တောင်ထွတ်ထက်ပင် မြင့်မားသော ပုံရိပ်ကြီးတစ်ခုအဖြစ်သို့ ပြောင်းလဲသွားခဲ့ပြီး သူ၏ခန္ဓာကိုယ်တစ်ခုလုံးမှ ထိတ်လန့်ဖွယ်ရာ ဖိအားများ ဖြာထွက်နေကာ နတ်ဘုရားတစ်ပါးနှင့်ပင် တူညီနေတော့သည်။